1. Mang fan ni yugu ba thil e ngiyal’ ney ni gad be par riy?

 NGIYAL’ NEY u chepin e girdi’ e dariy ba ngiyal’ ni taareb rogon ngay. Chiney e be kunuy Jehovah e girdi’ “ni pire’ ni pire’ . . . u gubin e nam, nge ganong, nge gubin mit e girdi’, ngu gubin e thin” ni bod rogon ni ke yiiynag e Bible. Pi girdi’ ney e yad “ba nam ni ba ga’” ni ke pag meruk e milyon e girdi’ riy ni “yad be pigpig ngak [Got] ni rran nge nep’.” (Rev. 7:9, 15; Isa. 60:22) Dariy ba ngiyal’ ni er feni yoor e girdi’ ni be t’ufeg Got nge yugu boch e girdi’.

2. Ba miti mang t’ufeg e ma dag e piin ni yad mmal’af rok Got? (Mu guy e sasing ni bay u tabolngin e re article ney.)

² Machane, ke yiiynag e Bible nra taw ko ngiyal’ ney ni gad bay riy, ma bay ba mit e t’ufeg ni yugu ba thil nra i dag e piin ni yad mmal’af rok Got. Mit ney e t’ufeg e ba chag e lem ni fel’ ngak ngay. I yoloy apostal Paul ni gaar: “Tin tomren e rran e . . . , bayi par e girdi’ ni ke mus ni yad e yad be lemnagrad, ma kari gel e chogow rorad, . . . ma bayi t’uf e fafel rorad me tomur Got u wun’rad.” (2 Tim. 3:1-4) Mit ney e t’ufeg e ba thil ko t’ufeg ni bay rok e piin Kristiano. Faanra i nameg be’ boch ban’en ni ir e nge fel’ ngak ma dabi pirieg e felfelan’ ni yugu aram rogon ni be lemnag ni ireray e n’en nra yibnag e felfelan’  ngak. Arrogon, mit ney e t’ufeg e ma k’aring e girdi’ ni ngaur pared ni yigoo yad e yad be lemnaged yad maku ma ‘mo’maw’nag’ e par.

3. Mang e gad ra weliy ko re article ney, ma mang fan?

³ Manang Paul nra garer e t’ufeg nib chag e lem ni fel’ ngak ngay, maku ra magawonnag e piin Kristiano. Aram fan ni yog ngorad ni ngar ‘ted yad u urel’ rok e piin ndarur daged e bin riyul’ e t’ufeg. (2 Tim. 3:5) Machane, dabiyog ni ngad paloggad ko re miti girdi’ ney ya gubin yang ni yad bay riy. Ere, uw rogon ni ngad ayuweged gadad ko lem ko girdi’ nu fayleng ni ke liyegdad, ma gad felfelan’nag Jehovah ni ir e Got ko t’ufeg? Chiney e ngad guyed e n’en nib thil u thilin e t’ufeg rok Got nge t’ufeg ni kan weliy murung’agen ko 2 Timothy 3:2-4. Faan gad ra rin’ e re n’ey, ma ra ayuwegdad ni ngad fal’eged i yaliy rarogodad ma gad guy rogon nrayog ni nge m’ug e t’ufeg rodad nra yibnag e pagan’ nge felfelan’ ngodad.

4. Mang fan nde kireb ni ngad t’ufeged gadad u rogon nib puluw ni ngad rin’ed?

⁴ I yoloy apostal Paul ni gaar: “Bayi par e girdi’ ni ke mus ni yad e yad be lemnagrad.” Gur, ba kireb ni nge bagadad mi i lemnag ir? Danga’, ya re n’ey e ban’en ni gad ma rin’, maku ban’en nib t’uf ni ngad rin’ed. Aram rogon ni sunmiydad Jehovah. I gaar Jesus: “Thingari t’uf rom e en ni ir e mmigid ngom ni gowe gur.” (Mark 12:31) Faanra dabi t’ufeg be’ ir ma dabiyog ni nge t’ufeg e en nib migid ngak. Ku be gaar e Bible: “Pumoon e thingari t’uf rorad e piin nleengirad ni bod rogon nib t’uf dowrad rorad. Re moon nib t’uf leengin rok e aram e be t’ufeg ir. Ya dariy be’ ni kaa fanenikay e birok e dowef. Ya ma duruw’iy ma ma ayuweg.” (Efe. 5:28, 29) Ere ba tamilang nde kireb ni nge be’ mi i t’ufeg ir, machane dabi pag rogon.

5. Uw rogon e girdi’ ni yad ma t’ufeged yad ni yugu ba pag rogon?

⁵ Fare t’ufeg ni kan weliy murung’agen ko 2 Timothy 3:2 e de fel’. Ya mit ney e t’ufeg e ra bay rok be’ ma yigoo ir e ma lemnag ir. Girdi’ ni yad ma t’ufeged yad nib pag rogon e yad ma tolangnaged yad u lanin’rad nge pag rogon e lem nsusun e ngaur ted. (Mu beeg e Roma 12:3.) Girdi’ ni aray rogon e yigoo yad e yad ma lemnagrad ma darur lemnaged yugu boch e girdi’. Nap’an nra sum e magawon, mab ga’ ni yad ma yon’ e kireb riy nga daken yugu boch e girdi’ ko bin ni nga rogned ni yad e ba kireb e rorad. Bay be’ ni ma weliy murung’agen e Bible ni taareb rogonnag e piin ni yigoo yad e yad ma lemnaged yad nga “ba mit e gamanman ni ka nog e hedgehog ngay ni ma . . . tubugbug nge par ni bod bbat’ nib lulbuy. Nap’an nra tubugbug me mith tanyin ni aram e gin ni bay bunuen riy nib sumunguy, . . . me . . . m’ug daken keru’ ni bay bogi ban’en riy nib m’uthm’uth ni bod e rachangal.” Girdi’ ni aray rogon e dariy e bin riyul’ e felfelan’ rorad.  

6. Mang angin nra yib ngak e piin nib t’uf Got rorad?

⁶ Ke yog e piin ni boor ban’en u murung’agen e Bible ni yad manang ni weliy apostal Paul murung’agen e mit ney e t’ufeg nsom’on ni bochan e faanra bay rok be’ ma aram e ku ra i m’ug e tin baaram e ngongol rok ni weliy ni migid. Machane, girdi’ nib t’uf Got rorad e ba thil e ngongol rorad. Ke taareb rogonnag e Bible e t’ufeg rok Got ko felfelan’, nge gapas, nge gum’an’, nge gol, nge fel’ ngak e girdi’, nge michan’, nge sumunguy, nge t’ar laniyan’. (Gal. 5:22, 23) I yoloy fare psalmist ni gaar: “Nge felan’ e pi girdi’ ni Got rorad e Somol!” (Ps. 144:15, BT) Jehovah e ir reb e Got nib felfelan’, ma ma m’ug e re fel’ngin ney ko girdi’ rok. Pi tapigpig rok Jehovah e  yad ba felfelan’ ngay ni yad ma pi’ e pi n’en ni bay rorad ni fan ngak yugu boch e girdi’, ma yad ba thil ngak e piin ni yigoo yad e yad ma lemnaged yad ni kemus ni yad ma lemnag e n’en ni nge yag ngorad.​—Acts 20:35.

7. Mang boch e deer nra ayuwegdad ni ngad fal’eged i lemnag rogon e t’ufeg rodad ngak Got?

⁷ Uw rogon me nang be’ ni ke pag rogon ni be t’ufeg ir ma ke war e t’ufeg rok ngak Got? Am lemnag fare fonow ni bay ko Filippi 2:3, 4 ni be gaar: “Dabi suk’ ngan’med ni ngam muruwliyed ban’en ni gimed e ngam m’onod riy ni fan e nga nognimed riy ni gimed e soromed, ara bochan e nge yib ufan ngomed; machane nge bigimed me sobut’nagan’, ma dabi finey bigimed ni ir e ba sorok ngak e tin ni ka bay e girdi’. Ra bigimed ma ngi i lemnag bigimed ngi i ayuweg u rogon nrayog rok, ma gathi go ir e ngi i lemnag ir.” Ere, rayog ni nge bagadad me fith ir ni nge gaar: ‘Gu ma fol ko re fonow ney, fa? Riyul’ ni gu be guy rogon ni nggu rin’ e n’en nib m’agan’ Got ngay, fa? Gu ma gay boch e kanawo’ nrayog ni nggu ayuweg yugu boch e girdi’ riy u lan e ulung ngu nap’an e machib, fa?’ De mom ni ngad fanayed e tayim rodad nge gelngidad ni fan ngak yugu boch e girdi’. Ra ngad rin’ed e re n’ey, mab t’uf ni ngad maruwelgad nib gel ma gad pag fadad. Machane, dariy ban’en nra yibnag e felfelan’ nib gel ngodad ni bod rogon gelngin e felfelan’ ni gad ra tay ni bochan e gad manang ni gad ba fel’ u wan’ e En Th’abi Tolang u palpalth’ib!

8. Mang e ke rin’ boch e girdi’ ni bochan e t’ufeg rorad ngak Got?

⁸ Bay boch e Kristiano ni kar digeyed boch e maruwel nra yag boor e salpiy riy ngorad ni bochan e ba t’uf Got rorad ma yad baadag ni nge yoor e tayim ni yad be fanay ni fan ko pigpig rorad ngak Jehovah. Ericka ni ma par u Meriken e ir reb e togta. Yugu aram rogon, me dugliy ni nge un ko regular pioneer ma ranow e pumoon rok nga in e nam ni ngar pigpiggow riy ko bin ni nge nameg ni nge yag reb e maruwel nib tolang ngak  ni ir reb e togta. Nap’an ni sul nge lemnag e n’en ni ke mel’eg ni nge rin’, me yog ni gaar: “Urngin e pi n’en nib manigil ni ke buch romow u nap’an ni gamow be pi’ e ayuw u boch e ulung ni yima non riy ni thin nu bang, nge pi fager ni ke yag ngomow e riyul’ ni ke yib angin nga lan e yafos romow. Kug ma maruwel ni gag reb e togta, machane gu ma fanay yooren e tayim rog nge gelngig ni nggu ayuweg e girdi’ ni ngar nanged e tin riyul’, mug ayuweg e pi walag u lan e ulung. Re n’ey e rib gel e felfelan’ ni ma yibnag ngog.”

9. Mang fan ndabi felfelan’ be’ ni faanra ba m’on e salpiy u wan’?

⁹ I yoloy Paul nra “gel e chogow” ko girdi’. Boch e duw kafram, ma aram me weliy reb e walag nib pioneer murung’agen Got ngak reb e pumoon u Ireland. Ere, fek fare pumoon e wallet rok me girngiy boch e salpiy riy nga but’, me gaar, “Ireray e got rog!” Yugu aram rogon ni yooren e girdi’ e dab rogned nib m’on e salpiy u wan’rad, machane boor e girdi’ u fayleng ni kar pared ni salpiy nge chugum e ir e ba m’on u wan’rad. Machane, be ginangey e Bible ni gaar: “Faanra ba t’uf rom e salpiy, ma dariy ba ngiyal’ nra gaman oren u wun’um; ma faanra mum’ ni bochan ni nge fel’ rogom, ma dariy ba ngiyal’ ni ga ra gaman ko tin ga baadag.” (Ekl. 5:10, BT) Girdi’ ni aray rogon e dariy e ngiyal’ nra gaman u wan’rad e salpiy ni bay rorad. Gubin ngiyal’ nra ur guyed rogon ni nge yoor e salpiy rorad, ma re n’ey e ra k’aring “e kireban’ ni pire’ ngorad.”​—1 Tim. 6:9, 10.

10. Mang e be yog e Bible u murung’agen e fel’ rogon nge gafgow?

¹⁰ Riyul’ ni gad gubin nib t’uf e salpiy rodad, ya rayog ni nge ayuwegdad u boch ban’en. (Ekl. 7:12) Machane gur, rayog ni ngari felfelan’ be’ ni faanra bay e salpiy rok ni kemus nib gaman nrayog ni nge fek e tin nib t’uf rok ngay, fa? Arrogon! (Mu beeg e Eklesiastes 5:12.) I yoloy Agur ni fak Jakeh ni gaar: “Mu ayuwegeg nge . . . dab ri fel’ rogog ma dab rug gafgow. Ere mu pi’ ngog chi urngin e ggan nib t’uf rog.” Ba mom ni ngad nanged fan ndabun Solomon ni ngari gafgow. I yog ndabun ni nge moro’ro’ ni bochan e be gafgow, ya faanra rin’ e biney e ngongol ma aram e be darifannag Got. Machane, mang fan ni meybil ndab yigi pag rogon e fel’ rogon rok? I yoloy ni gaar: “Faanra yug ra yoor ngog, ma rayog ni gog ni dariy angim ngog.” (Prov. 30:8, 9, BT) Dariy e maruwar riy ni bay boch e girdi’ ni ga manang ni be pagan’rad ko fel’ rogon rorad, ma ke tomur Got u wan’rad.

11. Mang e fonow ni pi’ Jesus u murung’agen e salpiy?

¹¹ Piin nib m’on e salpiy u wan’rad e dabiyog ni ngar felfelan’naged Got. I gaar Jesus: “Dariy be’ nrayog ni nge mang sib rok l’agruw i masta: ya ra fanenikay bagayow me t’uf bagayow rok; ya ra yul’yul’ ngak bagayow me darifannag bagayow. Dabiyog ni ngam manged tapigpig rok Got ma ki gimed e tapigpig rok e salpiy.” Ki yog ni gaar: “Dab mu ulunguyed e flaab u roy u fayleng, ya ra kirebnag e ngal nge t’ay ma ra yib e moro’ro’ nga naun nge iring. Machane ngam ulunguyed e flaab romed u tharmiy, ya dabi kirebnag e ngal nge t’ay, ma dabi yib e moro’ro’ nga naun nge iring.”​—Matt. 6:19, 20, 24.

12. Uw rogon nrayog ni nge mom rok be’ ni nge pigpig ngak Got ni faanra momnag rogon e par rok? Mu weliy ban’en ni ke buch.

¹² Boor e pi tapigpig rok Jehovah ni kar guyed ni bochan ni kar momnaged rogon e par rorad, ma aram e gathi kemus ni ke gel e felfelan’ rorad ya kki yoor e tayim nrayog ni ngar pigpiggad riy ngak Jehovah. Jack ni ma par u Meriken e pi’ e naun rok nib ga’ nge siyobay rok ni chuway’ ni bochan e manang ni faanra rin’, ma aram e rayog ni nge un ngak e ppin rok ngar pioneergow u taabang. I weliy ni gaar: “De mom ngomow ni nggu chuwgow ko re naun nem ni gamow ma par riy nrib fel’ yaan maku bay u bangi ban’en nib palog ko mach. Yugu aram rogon, ma boor e duw nra  gub nga tabinaw ma kari chalbag ni bochan e magawon ni gu be mada’nag u tabon e maruwel. Machane, ppin rog ni ir reb e regular pioneer e gubin ngiyal’ nrib felfelan’. Ba ga’ ni ma yog ni gaar, ‘Gu be maruwel u tan pa’ e bin th’abi fel’ e ga’ ko maruwel!’ Ere chiney ni kug be pioneer e gamow be maruwel rok Taabe’, ni aram Jehovah.”

13. Uw rogon ni ngad nanged rogon ni gad ma lemnag e salpiy?

¹³ Ra ngad nanged rogon ni gad ma lemnag e salpiy, ma rayog ni ngad fal’eged i lemnag rogon ni gad ra pi’ e fulweg ko pi deer ni baaray u fithik’ e yul’yul’ ni be gaar: ‘Rib mich u wan’ug e n’en ni be yog e Bible u murung’agen e salpiy, ma ma m’ug ko ngongol rog, fa? Ba m’on u wan’ug e mangongol salpiy, fa? Ba ga’ fan e chugum u wan’ug ko tha’ u thilmow Jehovah nge girdi’, fa? Rib pagan’ug ngak Jehovah nra pi’ e tin nib t’uf rog, fa?’ Rayog ni nge pagan’dad ni gubin ngiyal’ nra i ayuweg e piin ni be pagan’rad ngak.​—Matt. 6:33.

14. Mang e bin nib puluw e kanawo’ ni ngaud lemnaged e fafel riy?

¹⁴ Kan yiiynag nnap’an nra taw ko tin tomuren e rran, ma boor e girdi’ nra “t’uf e fafel rorad.” Gad manang ndariy ban’en nib kireb riy ni nga i lemnag be’ ir nge salpiy ndabi pag rogon. Ku dariy ban’en nib kireb riy ni ngad rin’ed boch ban’en ni ngad felfelan’gad ngay ndabi pag rogon. Dabun Jehovah ni ngad pared ndab da rin’ed e pi n’en ni gad baadag ara ngad rin’ed boch ban’en ni ngad felfelan’gad ngay. Be pi’ e Bible e athamgil nga laniyan’ e piin ni yad ba yul’yul’ ni gaar: “Mman ngam abich ma ga be felfelan’, mu unum nunum wain u fithik’ e felfelan’.”​—Ekl. 9:7, BT.

15. Mang e be yip’ fan ni nge ‘t’uf e fafel rok’ be’?

¹⁵ Bin l’agruw e Timothy 3:4 e be weliy murung’agen e piin ni ke t’uf e fafel rorad ma ke tomur Got u wan’rad. Mu tay fanam i yan riy nder yog e re verse nem nra gel feni t’uf e fafel ko girdi’ me war e t’ufeg rorad ngak Got. Faanra aray rogon, ma aram e be yip’ fan ni ka bay buchuuw e t’ufeg rorad ngak Got. Ya n’en ni be yog e ra “tomur Got u wun’rad.” I yoloy be’ ni boor ban’en ni manang ni gaar: “Re [verse] ney e der yip’ fan ni ka bay buchuuw e t’ufeg rorad ngak Got. Ya be yip’ fan ndaki t’uf Got rorad.” Ireray reb e ginang nrib t’uf ni nge fal’eg i lemnag e piin nib t’uf e fafel rorad! Fare thin ni “bayi t’uf e fafel rorad” e be yip’ fan e piin ni yad be “m’oneg” e “felfelan’ nu fayleng.”​—Luke 8:14.

16, 17. Mang kanawo’ e ke dag Jesus nrayog ni ngan folwok riy u rogon ni i rin’ boch ban’en ni nge felfelan’ ngay?

¹⁶ I dag Jesus e bin th’abi fel’ e kanawo’ u rogon ni ngaun lemnag e pi n’en ni yima rin’ ni ngan felfelan’ ngay. Immoy bayay ni un nga reb e “madnom ko mabgol” nge “ba madnom ni ba ga’” nni tay u tafen be’. (John 2:1-10; Luke 5:29) Nap’an ni un ko fare madnom ko mabgol, ma aram me ngongliy ba maang’ang ni aram e pilyeg e ran nge ngal’ ni wain ni bochan e be yan ni nge m’ay e wain ni ngan unum. Ku immoy bayay u nap’an ni yog boch e girdi’ ni ir be’ ni ma abich ma be garbod nib pag rogon, ma aram me yog ni pi girdi’ nem e de puluw rogon e lem ni ur ted.​—Luke 7:33-36.

¹⁷ Machane, da i par Jesus ni yigoo pi n’en ni yima rin’ ni ngan felfelan’ ngay e ir e be rin’. I m’oneg Jehovah u wan’, ma i rin’ e tin nrayog rok  ni nge ayuweg yugu boch e girdi’. Ki m’agan’ ngay ni nge yim’ u daken ba ley i gek’iy nrib gel e gafgow ko yam’ ni tay ni bochan e nge yag e yafos ngak boor e girdi’. Nap’an ni be non ngak e piin ni yad baadag ni ngar manged boch i gachalpen, ma aram me gaar: “Ngam felan’gad ko ngiyal’ nra yog e girdi’ e thin nib tagan ngomed mi yad ngongliy e tin nib kireb ngomed ma yad be tunguy urngin mit e thin nib kireb nib togopluw ngomed ni bochan e gimed girdieg. Ngari felan’med, ya bay labgen ni ba ga’ ni fan ngomed ni kan tay u tharmiy. Ya erera’ rogon e gafgow ni i tay e girdi’ ngak e pi profet ni yad ba kakrom ngomed.”​—Matt. 5:11, 12.

18. Mang boch e deer nra ayuwegdad ni ngad fal’eged i lemnag rogon feni ga’ fan u wan’dad e pi n’en ni yima rin’ ni ngan felfelan’ ngay?

¹⁸ Mang e ra ayuwegdad ni ngad fal’eged i lemnag rogon feni ga’ fan u wan’dad e pi n’en ni yima rin’ ni ngan felfelan’ ngay? Ba fel’ ni nge bagadad me fith ir ni nge gaar: ‘Ba m’on u wan’ug e pi n’en ni gu ma rin’ ni nge chuweg e chalban rog mfini yib e muulung nge machib nga tomuren, fa? Ra m’agan’ug ngay ni nggu pag boch ban’en ni gu baadag ni gu ma rin’ ni bochan e gu baadag ni nggu pigpig ngak Got, fa? Gu ma lemnag rogon laniyan’ Jehovah ko pi n’en ni gu ma mel’eg ni nggu chuweg e chalban rog ngay, fa?’ Faanra riyul’ nib t’uf Got rodad, ma aram e gad ra guy rogon ni gathi kemus ni ngad siyeged e pi n’en ni gad manang nib kireb, ya ku gad ra siyeg e pi n’en ni gad be lemnag nde m’agan’ Got ngay.​—Mu beeg e Matthew 22:37, 38.

19. Mini’ e piin dabiyog ni ngar pirieged e bin riyul’ e felfelan’?

¹⁹ Ke gaman sogonap’an 6,000 e duw ni ke gafgow e girdi’ u lan e re fayleng rok Satan ney. Re fayleng ney e ke sugnag e girdi’ ni kemus ni yigoo yad e yad ma lemnaged yad, ma yad ba chogow, mab t’uf e fafel rorad. Pi girdi’ ney e kemus ni tin ni yad be lemnag ni nge yag ngorad nge pi n’en ni yad baadag e ir e ba m’on u wan’rad. Girdi’ ni aray rogon e dabiyog ni ngar pirieged e felfelan’. Machane, i yog fare psalmist ni gaar: “Ba felan’ e piin bay e Got rok Jakob rorad ni be ayuwegrad, ma yad ma tor ngak Somol ni Got rorad.”​—Ps. 146:5, BT.

20. Uw rogon ni ke yag ni ngam pirieg e felfelan’ ni bochan e ba t’uf Got rom?

²⁰ Rogon nib t’uf Jehovah ko pi tapigpig rok e be gel i yan. Gubin e duw ni be yoor e girdi’ ni yad be fil murung’agen ma yad be t’ufeg. Ireray e mich riy ni be gagiyeg Gil’ilungun Got, ma dabki n’uw nap’an ma ra fek boch e tow’ath i yib nga fayleng nrib pag feni manigil ndabi chuchugur ni nge taw e lem rodad ngay. Bin riyul’ e felfelan’ e ma yib ngak e piin ni yad ma rin’ e n’en nib m’agan’ Got ngay, maku yad manang ni yad be felfelan’nag e En Th’abi Tolang ni bay. Ma piin nib t’uf Jehovah rorad e yad ra par ni yad ba felfelan’ ndariy n’umngin nap’an! Bin migid e article e gad ra weliy riy boch e ngongol nib kireb ni ma sum ni bochan e t’ufeg nib chag e lem ni fel’ ngak ngay, nge rogon nib thil e pi n’ey ko pi fel’ngin nib fel’ ni bay rok e pi tapigpig rok Jehovah.