1, 2. Mang e pirieg reb e walag nder yag ni nge rin’ ni fan ko tirok Got ban’en? Mang e rin’ ko re magawon rok ney?

 ROBERT e un ko taufe u nap’an ni kab fel’ yangaren, machane tin riyul’ e gathi aram e n’en nth’abi m’on u wan’. I yog ni gaar: “Da ug rin’ ban’en nib kireb, kemus ni gu be un ko tin ni yibe rin’ u lan e ulung ni bochan e aram e n’en ni gu be guy ni yibe rin’. Ra guyeg be’ ma ra lemnag ni gub gel ko tirok Got ban’en ni bochan e da gur ma pag e muulung, ma ra reb e duw ma bay in yay ni kug un ko pioneer ni ayuw. Machane, bay ban’en ndariy rog.”

² De yag ni nge nang Robert e re n’em nge yan i taw ko ngiyal’ ni fini un ko mabgol. Bayi n’en ma yow ma gosgos leengin ni aram e nge fith bagayow reb e deer ni bay rogon ko Bible me pi’ bagayow e fulweg riy. Leengin e ir be’ ni ke ilal ko tirok Got ban’en. Ere rib mom ngak ni nge pi’ e fulweg ko pi deer nem. Machane Robert e bayi n’en ma ma tamra’ ni bochan e de nang e fulweg riy. I yog ni gaar: “Gowa bod ndariy ban’en ni gu manang. Ere lungug u wan’ug, ‘Faanra gag e ngaug yarmiy rogon e pi n’en ni gamow ma rin’ leengig ni fan ko tirok Got ban’en, ma bay ban’en nib t’uf ni nggu rin’.’” Ma aram e n’en ni rin’ Robert. I yog ni gaar: “Ug par ni yug gu be fil e Bible, me munmun ma aram me yag ni nge peth reb e ban’en riy nga reb ma aram me tamilang boor ban’en u wan’ug. I yag e tamilangan’ ngog, ma n’en nth’abi ga’ fan riy e yag ni nge chugur e tha’ u thilmow Jehovah.”

3. (a) Mang e rayog ni ngad filed ko n’en ni buch rok Robert? (b) Mang boch ban’en nib ga’ fan ni ngad weliyed e chiney?

 ³ Bay boch ban’en nib ga’ fan nrayog ni ngad filed ko n’en ni buch rok Robert. Sana bay boch ban’en ni gad manang u Bible, ma gubin ngiyal’ ni gad ma un ko muulung nge machib, machane ra ud rin’ed e pi n’ey ma aram e gathi be yip’ fan ni kad ilalgad ko tirok Got ban’en. Fa reb e rayog ni kad mon’oggad, machane nap’an ni gad ra fal’eg i yaliy rarogodad, ma gad ra guy ni ka bay boch ban’en nib t’uf ni ngad mon’oggad riy ko tirok Got ban’en. (Fil. 3:16) Bay dalip e deer nib ga’ fan ni gad ra weliy ko re article ney ya nge yag ni ayuwegdad ni ngad ululgad i guy rogon ni ngad mon’oggad ko tirok Got ban’en: (1) Mang e ra ayuwegdad ni ngad nanged ko kad ilalgad ko tirok Got ban’en fa danga’? (2) Uw rogon ni ngad ilalgad ko tirok Got ban’en ma gad ulul ni ngaud mon’oggad i yan? (3) Faanra gad ba gel ko tirok Got ban’en, ma uw rogon nra ayuwegdad ko pi n’en ni gad ma rin’ u reb e rran ngu reb?

4. Mini’ e fan ngak fare fonow ni bay ko Efesus 4:23, 24?

⁴ Nap’an nda manged boch e tapigpig rok Got, ma aram ma gad thilyeg rarogodad. Re n’ey nda thilyeged e bay rogon nga gubin ban’en ni gad ma rin’ u lan e yafos rodad. Nap’an nda uned ko taufe, ma thingar kud ululgad i thilyeg boch ban’en u rarogodad. Be yog e Bible ni ‘gum’ircha’dad nge lanin’dad’ e gubin ngiyal’ nthingari “pig ni polo’ nge beech.” (Efe. 4:23, 24) Bochan ndawor da flontgad, ma aram fan ni gubin ngiyal’ nib t’uf ni ngad thilyeged boch ban’en u rarogodad. Mus ngak e piin ni ke n’uw nap’an ni kar pigpiggad ngak Jehovah, ma kub t’uf ni ngar guyed rogon ni ngar pared ni yad ba gel ko tirok Got ban’en.​—Fil. 3:12, 13.

5. Mang boch e deer nrayog ni nge ayuwegdad ni ngad nanged ko gad ba gel ko tirok Got ban’en fa danga’?

⁵ Ra ngad mon’oggad ko tirok Got ban’en ma gad par ni gad ba gel ko tirok Got, mab t’uf ni ngad fal’eged i yaliy rarogodad u fithik’ e yul’yul’. Demtrug ko ka gad bbitir fa kad ilalgad, ma gad gubin nra bagadad ma rayog ni nge fith ir ni nge gaar: ‘Kug guy boch ban’en ni ke thil u rarogog ni be dag ni gu be ilal i yan ko tirok Got ban’en, fa? Be thil rarogog i yan ni gu be bod rarogon Kristus, fa? Mang e be m’ug u rogon e lem nge ngongol rog u nap’an e muulung ni yima tay? Mang e ma m’ug ko pi n’en ni gu ma weliy u murung’agen e pi n’en ni gu baadag? Mang e be m’ug u rarogog ko rogon e fol Bible, nge munmad ni gu ma tay nge rogon ni gu ma fal’eg yaag, ara rogon e n’en ni gu ma rin’ u nap’an ni yira fonownageg? Mang e gu ma rin’ u nap’an nra yib e lumel ngog ni nggu rin’ ban’en nib kireb? Kug mon’og i yan ke yag ni nggu ilal ko tirok Got ban’en ni gag reb e Kristiano, fa?’ (Efe. 4:13) Faan gad ra lemnag e fulweg ko pi deer ney, ma rayog ni nge ayuwegdad ni ngad nanged rogon e mon’og ni kad ted ko tirok Got ban’en.

6. Ku mang reb e ban’en nib t’uf ni ngad rin’ed ya nge yag nda nanged rogon e mon’og ni kad ted ko tirok Got ban’en?

⁶ Ra ngad nanged rogon e mon’og ni kad ted ko tirok Got ban’en, ma bay yu ngiyal’ nib t’uf ni ngad ninged e ayuw ngak yugu boch e girdi’. I yog apostal Paul ni be’ ni ma pag e pi n’en ni ma ar’arnag ni nge pow’iy e dabiyog ni nge nang e tin nib kireb ni be rin’ u p’eowchen Got. Machane be’ ni ma pag gelngin Got nib thothup ni nge pow’iy e manang rogon ni ma lemnag Got boch ban’en. Manang nde m’agan’ Jehovah ngay ni nga i rin’ be’ e tin nib kireb ni be ar’arnag. (1 Kor. 2:14-16; 3:1-3) Piin piilal ni bay laniyan’ Kristus rorad e nap’an nra tabab be’ ni nge pag e pi n’en  ni be ar’arnag ni nge pow’iy, mab mom ni ngar nanged. Ere faanra ke yog e piin piilal ngodad ni gad be ngongol ni aray rogon, ma gur, ra m’agan’dad ko fonow ni kar pied ma gad fol riy, fa? Faan gad ra fol, ma aram e gad be dag ni gad baadag ni ngad mon’oggad ko tirok Got ban’en.​—Ekl. 7:5, 9.

7. Ra ngad mon’oggad ko tirok Got ban’en, ma mang fan nde gaman ni kemus ni nge yag e tamilangan’ ngodad u lan e Bible?

⁷ Dab mu pagtalin nra ngad mon’oggad i yan ko tirok Got ban’en, ma de gaman ni kemus ni nge yag e tamilangan’ ngodad u lan e Bible. Solomon ni Pilung e boor ban’en ni manang u murung’agen Jehovah. Pi n’en ni i yog e munmun me mang bang ko Bible. Machane tomur riy, ma aram me war e michan’ rok ma daki par nib yul’yul’ ngak Jehovah. (1 Ki. 4:29, 30; 11:4-6) Ere yugu aram rogon nib t’uf ni nge yag e tamilangan’ ngodad u lan e Bible, machane mang e n’en ni kub t’uf ni nge yag ngodad? Ba t’uf ni ngad guyed rogon ni ngad mon’oggad i yad ko tirok Got ban’en. (Kol. 2:6, 7) Machane uw rogon ni ngad rin’ed e re n’ey?

8, 9. (a) Mang e ra ayuwegdad ni nge mudugil e michan’ rodad? (b) Mang e ngad nameged u nap’an ni gad be fil e Bible rodad ma gad be fal’eg i lemnag e pi n’en ni gad be fil? (Mu guy e sasing ni bay u tabolngin e re article ney.)

⁸ I pi’ Paul e athamgil nga laniyan’ e pi Kristiano ko bin som’on e chibog ni ngar ‘tedan’rad ko tin ni ka ba’ ni ngar filed ngar mu’niged.’ (Heb. 6:1) Ere, faanra ngad folgad ko fonow rok Paul e ngiyal’ ney, ma mang boch ban’en nib t’uf ni ngad rin’ed? Reb e ban’en nib ga’ fan ni ngad rin’ed e aram e ngad filed fare ke babyor ni kenggin e “Um Pired ni Gimed Ba T’uf rok Got.” Ga ra fil e re ke babyor ney nge m’ay, ma ra ayuwegem ni ngam nang rogon ni ngam fanay e pi kenggin e motochiyel u Bible nga lan e yafos rom. Faanra kam mu’ i fil e re ke babyor ney, ma gur, rayog ni ngkum fil yugu ba ken e babyor rodad nra ayuweg e michan’ rom ni nge par nib mudugil, fa? (Kol. 1:23) Ga ma meybil mag fal’eg i lemnag rogon nrayog ni ngam fanay e pi n’en ni ga ma fil nga lan e yafos rom, fa?

⁹ Dab mu pagtalin nnap’an ni gad be fil e Bible ma gad be fal’eg i lemnag e pi n’en ni gad be fil, ma susun ni ngad nameged ni ngad adaged ni ngad rin’ed e tin nib m’agan’ Jehovah ngay ma gad fol ko pi motochiyel rok. (Ps. 40:8; 119:97) Maku reb e, susun ni ngad athamgilgad ni ngad siyeged boch ban’en nra magawonnag rogon e mon’og ni gad be tay ko tirok Got ban’en.​—Titus 2:11, 12.

10. Mang e rayog ni nge rin’ e piin fel’ yangaren ya nge yag nra mon’oggad ko tirok Got ban’en?

¹⁰ Faanra gur reb e fel’ yangaren, ma bay boch ban’en ni ga be nameg ni fan ko tirok Got ban’en, fa? Bay reb e walag ni pumoon ni ma pigpig u Bethel nnap’an nra un nga boch e circuit assembly ni yima  tay, mab ga’ ni ma non ngak e pi walag ni yad ra un ko taufe u m’on ni nge tabab e muulung. Boor e pi walag nem ni yad ma un ko taufe e kab fel’ yangarrad. Ere ma fith e re walag ney ko mang e pi n’en ni yad be nameg ni fan ko tirok Got ban’en. Boor i yad e ma m’ug ko fulweg ni yad ma pi’ nib tamilang u wan’rad e n’en ni yad baadag ni ngar rin’ed ni fan ko pigpig ni yad be tay ngak Jehovah. Boch i yad e yad ma yog ni yad be lemnag ni ngar uned nga boch e maruwel ni yima rin’ ni fan ngak Jehovah u polo’ e tayim ara nga ranod ra pied e ayuw nga boch e binaw nib t’uf boch e tamachib riy. Bay yu ngiyal’ ni bay boch e fel’ yangaren ndar nanged rogon ni ngar pied e fulweg ko deer rok. Ere gur, re n’ey e be yip’ fan ni yad be lemnag nde t’uf ni ngar nameged boch ban’en ni fan ko tirok Got ban’en? Faanra gur reb e fel’ yangaren, ma ngam fithem ni nge lungum: ‘Gu ma un ko muulung nge machib ni bochan e aram e n’en ni baadag e gallabthir rog ni nggu rin’, fa? Gu ma rin’ boch ban’en ni yigoo gag ya nge yag ni chugur e tha’ u thilmow Got, fa?’ Riyul’ ni gathi kemus ni yigoo piin fel’ yangaren e ba t’uf ni ngar nameged boch ban’en ni fan ko tirok Got ban’en. Ya gad gubin ni faan gad ra rin’ e re n’ey, ma ra ayuwegdad ni ngad mon’oggad i yan ko tirok Got ban’en.​—Ekl. 12:1, 13.

11. (a) Mang e ba t’uf ni ngad rin’ed ni faanra ngad mon’oggad ko tirok Got ban’en? (b) Mini’ e bay murung’agen u lan e Bible nrayog ni ngad folwokgad rok?

¹¹ Nap’an ni gad ra nang e pi n’en nib t’uf ni ngad mon’oggad riy, ma aram e ba t’uf ni ngad tababgad i thilyeg boch ban’en u rarogodad. Rib ga’ fan e re n’ey ni bochan e rogon ni gad ra fol riy e ir e ra dugliy ko ra yag e yafos ngodad fa gad ra yim’. (Rom. 8:6-8) Machane faanra ngad ilalgad ko tirok Got ban’en, ma gathi be yip’ fan ni ngad flontgad. Rayog ni nge ayuwegdad gelngin Jehovah nib thothup ni ngad mon’oggad ko pi n’en nib t’uf ni ngad mon’oggad riy. Machane kub t’uf ni ngad athamgilgad. Bay bayay ni weliy reb e walag ni ka nog John Barr ngak ni ir reb i girdien fare Ulung ni Ma Pow’iyey murung’agen fare thin ni  bay ko Luke 13:24 ni gaar: “Boor e girdi’ ni ma war e michan’ rorad ni bochan e darur athamgilgad ni ngar rin’ed e pi n’en nra gelnag e michan’ rorad.” Ba t’uf ni ngad boded Jakob ni dugliy u wan’ ndab ra talgow fare engel ko thal nge taw ko ngiyal’ ni ke fal’eg waathan. (Gen. 32:26-28) Yugu aram rogon nrayog ni ngad felfelan’gad ko fol Bible ni gad ma tay, machane susun e dab da lemnaged ni Bible e bod ba ke babyor ni kan ngongliy ni ngaun beeg ni bochan e nge n’ag e chalban. Ba t’uf ni ngad athamgilgad ngad gayed e tin riyul’ u lan e Bible nra ayuwegdad.

12, 13. (a) Mang e ra ayuwegdad ni ngad folgad ko fare thin u Filippi 2:5? (b) Uw rogon nrayog ni nge ayuwegdad e n’en ni buch rok apostal Peter nge fonow ni pi’? (c) Mang e rayog ni ngam rin’ ya nge yag nim mon’og ko tirok Got ban’en? (Mu guy fare kahol ni kenggin e “ Boch Ban’en Nrayog ni Ngam Rin’ ni Ngam Mon’og ko Tirok Got Ban’en.”)

¹² Nap’an ni gad ra rin’ e pi n’en nib t’uf ni ngad rin’ed ya nge yag nda mon’oggad ko tirok Got ban’en, ma aram e ra pi’ gelngin Got nib thothup gelngidad ni ngad thilyeged rogon e lem ni gad ma tay. Gelngin Got nib thothup e rayog ni nge ayuwegdad ni nge yag laniyan’ Kristus ngodad ni buchuuw ma buchuuw. (Fil. 2:5) Maku reb e, ra ayuwegdad ni ngad chuweged e ar’ar nib kireb u lanin’dad ma gad maruweliy boch e fel’ngin nib m’agan’ Got ngay. (Gal. 5:16, 22, 23) Faanra kad guyed ni yigoo chugum e gad be lemnag ara gad be ar’arnag boch ban’en nib kireb, ma susun e dabi mulan’dad. Um ning gelngin Jehovah nib thothup, ya faan ga ra rin’ ma ra ayuwegem ni nge puluw rogon e lem ni ga ma tay. (Luke 11:13) Dab mu pagtalin apostal Peter. Immoy in yay nda i pag gelngin Got nib thothup ni nge pow’iy. (Matt. 16:22, 23; Luke 22:34, 54-62; Gal. 2:11-14) Machane de mulan’, ya ayuweg gelngin Jehovah nib thothup ni nge yag laniyan’ Kristus ngak ni buchuuw ma buchuuw. Ku arrogodad nrayog ni ngad rin’ed e re n’ey.

¹³ Bin riyul’ riy e, boch nga tomuren ma aram me weliy Peter boch e fel’ngin nrayog ni ngad maruweliyed ni nge yag ngodad. (Mu beeg e 2 Peter 1:5-8.) Faanra da “athamgiliyed” ni nge yag boch e fel’ngin ngodad ni bod rogon e t’ar laniyan’, nge k’adan’, me bagadad me t’uf rok bagadad, ma aram e rayog ni nge ayuwegdad Jehovah ni ngad mon’oggad ma gad bod e piin ni yad ma pag gelngin nib thothup ni nge pow’iyrad. Gubin e rran nrayog ni ngam fithem ni nge lungum, ‘Mang e re fel’ngin nib t’uf ni nggu maruweliy e daba’ ya nge yag nug mon’og i yan ko tirok Got ban’en?’

14. Faanra kad ilalgad ko tirok Got ban’en, ma mang e ra rin’ ko pi n’en ni gad ma rin’ u lan e yafos rodad?

¹⁴ Faanra yag laniyan’ Kristus ngodad ma ra rin’ ban’en ko ngongol rodad u tabon e maruwel ara skul, nge rogon e numon ni gad ma tay, nge pi n’en ni gad ma dugliy u reb e rran ngu reb. Ra m’ug ko pi n’en ni gad ma dugliy ni gad be athamgil ni ngad folwokgad rok Kristus. Faanra kad ilalgad ko tirok Got ban’en, ma aram e dubdad ni ngad rin’ed ban’en nra kirebnag e tha’ u thildad e Chitamangidad ni bay u tharmiy. Faanra bay laniyan’ Kristus rodad ma nap’an nra yib e lumel ngodad, ma aram e n’en nra k’aringdad ni ngad siyeged e pi n’em. Ma nap’an nra t’uf ni ngad dugliyed ban’en, ma aram e gad ra tal ngad lemnaged e pi deer ni baaray ni be gaar: ‘Mang e pi kenggin e motochiyel u Bible nra ayuwegeg ni nggu dugliy e n’en ni nggu rin’? Faan gomanga Kristus, ma mang e ra rin’? Mang e gu ra dugliy nra m’agan’ Jehovah ngay?’ Chiney e ngad weliyed boch ban’en ni ma buch ya nge yag nda nanged rogon ni ngaud lemgad ni aray rogon. Nap’an ni gad be weliy reb nge reb e pi n’ey, ma aram e gad ra weliy boch i kenggin e motochiyel u Bible nrayog ni nge ayuwegdad ni ngad dugliyed e n’en ni ngad rin’ed u fithik’ e gonop.

15, 16. Faanra bay laniyan’ Kristus rodad, ma uw rogon nrayog ni nge ayuwegdad u rogon ni ngad mel’eged e (a) en ni ngad leayed? (b) piin ni ngaud chaggad ngorad?

¹⁵ Nap’an ni ngad mel’eged e en ni ngad leayed. Kenggin e motochiyel u Bible nib puluw ko re n’ey e bay ko 2 Korinth 6:14, 15. (Mu beeg.) Ba tamilang e thin ni yog Paul ni be’ ni ma pag gelngin Got nib thothup ni nge pow’iy e dabiyog ni nge taareban’row be’ ni ma pag e pi n’en ni ma ar’arnag ni nge pow’iy. Uw rogon nrayog ni nge ayuweg e re kenggin e motochiyel ney be’ ni nge mel’eg e en ni nge leay?

¹⁶ Piin ni gad ma chag ngorad. Mu tay fanam i yan ko fare kenggin e motochiyel ni bay ko 1 Korinth  15:33. (Mu beeg.) Be’ ni ke ilal ko tirok Got ban’en e der ma chag ngak e piin nrayog ni ngar magawonnaged e michan’ rok. Mang l’agruw e deer nrayog ni nge ayuwegdad ni ngad nanged e n’en nib puluw ni ngad rin’ed? Bin som’on e, uw rogon nrayog ni nge ayuwegdad e re n’ey ni ngad dugliyed rogon ni gad ma fanay e pi n’en ni bay ko Internet nrayog ni ngaud nonad boch e girdi’ riy? Fa reb e, mang e rayog ni ngad rin’ed ni faanra bay boch e girdi’ ndad nanged yad ko Internet ni yad be yog ngodad ni ngad uned ngorad nga boch e gosgos ni yima tay ko Internet?

17-19. Faanra kam ilal ko tirok Got ban’en, ma uw rogon nra ayuwegem ni ngam (a) siyeg boch ban’en ndariy gam’engin? (b) nameg boch ban’en nib fel’? (c) nang e n’en ni ngam rin’ u nap’an ni ke sum e maluagthin u thilmew be’?

¹⁷ Boch ban’en nrayog ni nge talegdad ndab kud mon’oggad ko tirok Got ban’en. Bay ban’en nib ga’ fan ni kan ginangey riy ko Hebrews 6:1. (Mu beeg.) Mang e “tin ndariy fan e ngongol” nsusun e ngad siyeged? Pi ngongol nem e aram boch e ngongol ndariy gam’engin ma dabiyog ni nge ayuwegdad ni ngad mon’oggad ko tirok Got ban’en. Rayog ni nge ayuwegdad e re kenggin e motochiyel ney ni ngad nanged e fulweg u boch e deer ni ma sum ni bod rogon fare deer ni be gaar: ‘Faan gu ra rin’ e re n’ey, ma ra yib angin ngog fa ireray reb e ban’en ndariy gam’engin? Gur, nggu un ko mit ney e siyobay fa danga’? Mang fan nsusun e dab gu un nga reb e ulung ni yad be guy rogon ni ngar thilyeged boch ban’en u fayleng?’

¹⁸ Pi n’en ni gad ma nameg ni fan ko tirok Got ban’en. Fapi thin ni yog Jesus ko fare Welthin rok u Daken e Burey e ba tamilang e fonow ni be pi’ u murung’agen e pi n’en ni gad ma nameg. (Matt. 6:33) Be’ ni ma pag gelngin Got nib thothup ni nge pow’iy e ma nameg boch ban’en ni fan ko tirok Got. Ra ud lemnaged e re kenggin e motochiyel ney, ma ra ayuwegdad ni ngad nanged e fulweg ko gal deer ni baaray ni be gaar: ‘Gur, nggu nameg ni nggu un ko skul nib tolang, fa? Gu ra un ngab mit e maruwel ni kan ognag ngog, fa?’

¹⁹ Maluagthin. Uw rogon nra ayuwegdad e fonow ni pi’ Paul ko ulung nu Roma u nap’an ni ke sum e maluagthin u thildad be’? (Rom. 12:18) Bochan ni gad ma folwok rok Kristus ma aram fan ni gad ra guy rogon ni ‘ngad pired ni ba aw e gapas u thildad nge urngin e girdi’.’ Mang e gad ma rin’ u nap’an nra sum e maluagthin u thildad yugu boch e girdi’? Gad ma guy nib mo’maw’ ngodad ni ngad t’ared lanin’dad ngad folgad rorad, fa gad ma guy rogon ni ngad awnaged e “gapas” u thildad?​—Jas. 3:18.

20. Mang fan ni ga baadag ni ngam mon’og i yan ko tirok Got ban’en?

²⁰ Pi n’ey ni kad weliyed e be dag rogon nrayog ni nge ayuwegdad e pi kenggin e motochiyel u lan e Bible ni ngad dugliyed boch ban’en nra m’ug riy ni gad be pag gelngin Got nib thothup ni nge pow’iydad. Faanra kad ilalgad ko tirok Got ban’en, ma rayog ni nge ayuwegdad ni ngad pirieged e felfelan’ nge pagan’. Robert ni faan kad weliyed murung’agen u tabolngin e re article ney e yog ni gaar: “Nap’an nri fel’ e tha’ u thilmow Jehovah, ma aram me yag ni nggu mang reb e matam nge reb i figirngiy nib fel’. Kug felfelan’ ni bochan e ke yag ni nggu ilal ko tirok Got ban’en.” Rayog ni nge yag boch e tow’ath ngodad ni aray rogon ni faan gad ra rin’ e tin nrayog rodad ni ngad mon’oggad ko tirok Got ban’en. Faan gad ra rin’ e re n’ey, ma aram e gad ra pirieg e felfelan’ e chiney, me yag e “bin riyul’ e yafos” ngodad boch nga m’on.​—1 Tim. 6:19.