GIRDI’ e ba ga’ ni yad baadag ni ngar pared ni yad ba felfelan’. Machane, gubin e girdi’ e ngiyal’ ney ko tin tomuren e rran e yad ma mada’nag boch e magawon ni ma ‘mo’maw’nag e par’ rorad. (2 Tim. 3:1) Bay boch e girdi’ ni ma kireban’rad ni bochan e ngongol nde mat’aw ni yibe rin’ ngorad, ara m’ar, ara kan talegrad ko maruwel, ara ke yim’ be’ nib t’uf rorad. Ku bay boch e girdi’ ndakurur pirieged e felfelan’ ni bochan e ke buch ban’en rorad ni ke k’aring e magafan’ ara kireban’ ngorad. Mus ko pi tapigpig rok Got nrayog ni nge mulan’rad me munmun me war e felfelan’ rorad. Faanra ireray e n’en ni ke buch rom, ma uw rogon nrayog ni ngam pirieg e felfelan’ bayay?

Ra ngad nanged e fulweg ko re deer ney, ma som’on e ba t’uf ni ngad nanged ko mang e bin riyul’ e felfelan’, nge rogon ni ke yag ni nge par boch e girdi’ ni yad ba felfelan’ ni yugu aram rogon ni boor e magawon ni yad be mada’nag. Ngemu’ ma gad weliy rogon nrayog ni ngad pared ni gad ba felfelan’ nge rogon ni ngki gel boch e felfelan’ rodad.

Bin riyul’ e felfelan’ e ba thil ko bin ni ngam dag ko ngongol rom ni gab felfelan’ taaboch ngiyal’. Baaray rogon ni ngan susunnag: Nap’an nra unum be’ nge ching, ma rayog ni nga i par ni be minmin. Machane nap’an nra yan i tar, ma dabki minmin ya ra guy ndawori m’ay boor e magawon rok. Taaboch ngiyal’ e ke m’ug nib felfelan’, ere gathi riyul’ nib felfelan’.​—Prov. 14:13.

Machane, bin riyul’ e felfelan’ e ban’en ni ma sum u gum’ircha’dad. Yima yog ni felfelan’ e “ban’en ni gad ma thamiy u nap’an nra yag ban’en nib fel’ ngodad ara nap’an ni gad be sonnag ban’en nib fel’.” Ra bay e bin riyul’ e felfelan’ rok be’, ma yugu demtrug e miti n’en ni be yan u fithik’ ma ka be par nib felfelan’. (1 Thess. 1:6) Bin riyul’ riy e, rayog ni nge magawonnag ban’en laniyan’ be’, machane ka be par nib felfelan’. Bod ni, immoy bayay nni toy e pi apostal ko dimow ni bochan e yad be weliy murung’agen Kristus. Yugu aram rogon, ma ranod “ngar chuwgad ko fare ulung, ni kar felfelan’gad ni bochan e ke tafinaynag Got ni ba’ rogorad ni ngar gafgowgad ni fan nga fithingan Jesus.” (Acts 5:41) Ba tamilang ni gathi kar felfelan’gad ni bochan e kan toyrad, ya fan ni kar felfelan’gad e bochan e ke yag ni ngar pared ni yad ba yul’yul’ ngak Got.

Bin riyul’ e felfelan’ e gathi ban’en nni gargelegdad ni bay rodad, ara ban’en ni yugu ra yag ngodad nib tomgin. Mang fan? Ya felfelan’ e aram bang u wom’engin gelngin Got nib thothup. Rayog ni nge ayuwegdad gelngin Got nib thothup ni ngad maruweliyed ni nge yag ngodad e ‘bin nib beech i gadad’ nib muun ngay e felfelan’. (Efe. 4:24; Gal. 5:22) Ma nap’an nra yag e felfelan’ ngodad, ma aram e ra mom ni ngad athamgilgad u fithik’ e pi magawon ni gad ma mada’nag.

Baadag Jehovah ni nge guy ni yibe rin’ e tin nib fel’ u fayleng. De m’agan’ ngay ni nge guy e tin nib kireb ni be buch e ngiyal’ ney. Yugu aram rogon ni be rin’ e girdi’ e kireb, machane ka be par Jehovah nib felfelan’. Be gaar e Thin rok: “Gel nge felfelan’ e ba suguy e Tempel rok.” (1 Kron. 16:27, BT) Maku reb e, ri ma “felfelan’ [Jehovah]” ko pi n’en nib fel’ ni ma guy ni be rin’ e pi tapigpig rok.​—Prov. 27:11, BT.

Rayog ni ngad folwokgad rok Jehovah ni aram e dabi pag rogon e magafan’ rodad ni faanra de yan i aw e tin ni kad lemnaged nga rogon. Nap’an nra buch boch ban’en rodad ni aray rogon, ma rayog ni ngad lemnaged e pi n’en nib fel’ ni bay rodad e chiney, mad gum’an’naged gadad ngad sonnaged e pi n’en nib fel’ ni ka  bay nga m’on ko bin ni ngaud pared ni be magafan’dad. a

Ku boor murung’agen boch e girdi’ u Bible nra pared ni yad ba felfelan’ ni yugu aram rogon ni boor e magawon ni ur mada’naged. Abraham e ir bagayad e piin ni i mada’nag boch e magawon ni tay e yafos rok nga thatharen e riya’, maku bay boch e girdi’ ni ur k’aringed boch e magawon ngak. (Gen. 12:10-20; 14:8-16; 16:4, 5; 20:1-18; 21:8, 9) Yugu aram rogon, ma i par Abraham nib felfelan’. Uw rogon ni yag ni nge par nib felfelan’? Rib tamilang u wan’ e athap rok ko par u lan e bin nib beech e fayleng u tan e gagiyeg rok fare Messiah. (Gen. 22:15-18; Heb. 11:10) I gaar Jesus: “Chitamangimed i Abraham e i felfelan’ ni bayi guy e birog e rran.” (John 8:56) Rayog ni ngad folwokgad rok Abraham ngaud lemnaged e pi n’en ni gad ra felfelan’ ngay boch nga m’on.​—Rom. 8:21.

Apostal Paul nge Silas e ur parew ni yow be lemnag e pi n’en ni ke micheg Got ni bod rogon Abraham. Ba gel e michan’ rorow, ma yugu aram rogon ni ur mada’nagew boch e magawon machane ur parew ni yow ba felfelan’. Bod nu tomuren nni toyrow nib elmerin mi nin’row nga kalbus, ma ‘gonap’an e ke lukngun e nep’ mu ur meybilgow ma yow be yin’ e tang ni yow be pining e sorok ngak Got.’ (Acts 16:23-25) Gathi kemus ni athap rorow e ir e i tayrow ni yow ba felfelan’, ya kur parew ni yow ba felfelan’ ni bochan e yow be gafgow ni fan nga fithingan Kristus. Ku arrogodad nrayog ni ngad folwokgad rok Paul nge Silas ni aram e ngaud lemnaged angin nra yib ngodad ni faanra ud pigpiggad ngak Got u fithik’ e yul’yul’.​—Fil. 1:12-14.

Ngiyal’ ney e boor e walag ni kar daged e kanawo’ nib fel’ u rogon ni kar pared ni yad ba felfelan’ ni yugu aram rogon ni yad be mada’nag e magawon. Bod nnap’an e November 2013, ma aram me aw fagi yoko’ ni ka nog e Super Typhoon Haiyan ngay ko pi donguch ni bay u lukngun yu Manile’. Ba pag 1,000 e naun ko Pi Mich u rom ni kireb. George nreb e walag ni ma par ko fare mach nu Tacloban e ir bagayad e piin ni puth e naun rok u tan e re yoko’ nem. I gaar: “Yugu aram rogon e n’en ni ke buch, machane ka be par e pi walag ni yad ba felfelan’. Ba mo’maw’ ni nggu weliy gelngin e felfelan’ ni gamad be tay.” Faanra ud fal’eged i lemnag e pi n’en ni ke rin’ Jehovah ni fan ngodad, ma aram e rayog ni ngad pared ni gad ba felfelan’ ni yugu demtrug gelngin e magawon ni keb ngodad. Ku mang reb e ban’en ni ke pi’ Jehovah ni be ayuwegdad ni ngad felfelan’gad?

Bin th’abi ga’ i fan ni gad ba felfelan’ e bochan nib fel’ e tha’ u thildad Got. Aygum lemnag e re n’ey: Kad nanged e En Th’abi Tolang u palpalth’ib. Ir e Got rodad, nge Chitamangidad, nge Fager rodad!​—Ps. 71:17, 18.

Kub ga’ fan u wan’dad e yafos rodad ni kan pi’ nib tow’ath nge rogon nrayog ni ngad felfelan’gad ngay. (Ekl. 3:12, 13) Bochan ni ke pow’iydad Jehovah ngak, ma aram fan ni gad manang e n’en nib m’agan’ ngay ni fan ngodad. (Kol. 1:9, 10) Ere, aram fan ni keb fan e yafos rodad ma kud nanged e n’en nib fel’ ni ngad rin’ed ngay. Machane, yooren e girdi’ e de tamilang u wan’rad fan ni kan pi’ e yafos ngodad. I tamilangnag Paul e re n’ey u nap’an ni yoloy ni gaar: “N’en ndawori guy be’ ara ke rung’ag, n’en ndariy be’ ni ke taw e lem rok ngay nra yodorom, e ri ir e re n’en ni ke fal’eg Got rogon ke tay ni fan ngak e piin nib t’uf Got rorad. Machane Got e ke dag ngodad u daken fare Kan ni Thothup rok [“gelngin Got nib thothup,” NW] e tin ni i tay nib mith.” (1 Kor. 2:9, 10) Ere, gathi gad be felfelan’ ni ke yag ni ngad nanged e n’en nib baadag Jehovah ni ngad rin’ed nge n’en nib m’agan’ ngay ni fan ngodad?

Kum lemnag reb e ban’en ni ke rin’ Jehovah ni fan ko girdi’ rok. Gathi gad be felfelan’ nrayog ni ngan n’ag fan e denen rodad? (1 John 2:12) Bochan e runguy rok Got ngodad, ma aram fan ni gad be athapeg ndab ki n’uw nap’an ma ra yib e bin nib beech e fayleng. (Rom. 12:12) Mus ko chiney ni ke pi’ Jehovah boch e girdi’ nrayog ni ngad pigpiggad ngak u taabang. (Ps. 133:1) Ku be micheg e Thin rok Got ngodad ni ma ayuweg Jehovah e girdi’ rok u pa’ Satan nge pi moonyan’ rok. (Ps. 91:11) Faan gad ra fal’eg i lemnag urngin e pi tow’ath ney ni ke pi’ Got ngodad, ma aram e ra gel boch e felfelan’ rodad.​—Fil. 4:4.

Gur, rayog ni nge gel boch e felfelan’ rok reb e Kristiano ni ma par nib felfelan’? I gaar Jesus: “Ku gog e re bugithin ney ngomed ni bochan e nge par e felfelan’ rog u fithik’ i lanin’med, nge yan i mus nga rogon e felfelan’ romed.” (John 15:11) Re n’ey e be dag nrayog ni ngad guyed rogon ni nge gel boch e felfelan’ rodad. Rayog ni ngam taareb rogonnag e felfelan’ ni ga ma tay ko nifiy.  Faanra ga baadag ni nge gel e gowel ko nifiy, ma thingar mu yoornag e l’ud ngay. Ere, ku arrogon e felfelan’ rodad, faanra gad baadag ni nge gel e felfelan’ rodad ma thingar da rin’ed e pi n’en nib t’uf ni ngad rin’ed ni fan ko tirok Got ban’en. Dab mu pagtalin ni gelngin Got nib thothup e aram e n’en ni ma gelnag e felfelan’ rodad. Ere, faanra um ning gelngin Jehovah u daken e meybil ni gubin ngiyal’ ma ga be fal’eg i lemnag e Thin rok ni ke thagthagnag u daken gelngin, ma aram e rayog ni nge gel e felfelan’ rom.​—Ps. 1:1, 2; Luke 11:13.

Faanra um fanay e tayim rom ni fan nga boch e maruwel nib m’agan’ Jehovah ngay, ma aram e rayog ni nge gel e felfelan’ rom. (Ps. 35:27; 112:1) Mang fan? Ya be yog e Bible ni ‘nguud pared ni ba’ madgun Got u wun’dad ma gad be fol ko thin rok, ya kari mus fan ni sunumiy Got e girdi’.’ (Ekl. 12:13) Re n’ey e be yip’ fan ni kan sunmiydad ni ngad rin’ed e tin nib m’agan’ Got ngay. Ere, faanra ud pigpiggad ngak Jehovah, ma aram e rayog ni nge yag e bin riyul’ e felfelan’ ngodad. b

Faan gad ra guy rogon ni nge gel e felfelan’ rodad, maku boor i angin nra yib ngodad. Bod nrayog ni ngad fel’gad u wan’ e Chitamangidad ni bay u tharmiy u nap’an ni gad be ulul ko pigpig ni gad be tay ngak ni yugu demtrug e re miti magawon ni gad be mada’nag. (Deut. 16:15; 1 Thess. 5:16-18) Maku reb e, faanra bay e bin riyul’ e felfelan’ rodad, ma aram e dab ud guyed rogon ni nge yoor e chugum rodad, ya n’en ni gad ra rin’ e aram e ra ud paged fadad u boch ban’en ni fan nga Gil’ilungun Got. (Matt. 13:44) Faan gad ra guy angin e re n’ey, ma aram e ra gel e felfelan’ rodad, me pagan’dad ngodad, mu kud k’aringed e felfelan’ ngak yugu boch e girdi’.​—Acts 20:35; Fil. 1:3-5.

“Faanra gab felfelan’ mab fel’ u wan’um e par rom e chiney, ma aram e ra mo’maw’ ni nge yib e m’ar ngom boch nga m’on.” Ireray e n’en ni yoloy be’ ni ma gay murung’agen boch ban’en u reb e skul nib tolang u Nebraska nreb e binaw u Meriken u tomuren ni gay murung’agen boch ban’en ni bay rogon nga fithik’ i dow e girdi’. Re thin ney ni ke yog e ba puluw ko fare thin nu Bible ni be gaar: “Faanra ga ba felfelan’ ni ga ma par ma ba falay nga fithik’ i dowam.” (Prov. 17:22, BT) Arrogon, faan ga ra guy rogon ni nge gel e felfelan’ rom, ma dabisiy nra mo’maw’ ni nge yib e m’ar ngom.

Ere yugu aram rogon ni gad be par u ba ngiyal’ ni boor ban’en ni ma k’aring e mochuch ngodad, machane rayog ni nge yag e bin riyul’ e felfelan’ ngodad u nap’an ni gad ra ning gelngin Got nib thothup u daken e meybil, nge fol Bible, nge Thin rok Jehovah ni gad ma fal’eg i lemnag. Maku reb e, faanra ud lemnaged e pi tow’ath ni be yag ngodad e ngiyal’ ney, ma gad folwok ko michan’ rok yugu boch e girdi’, ma gad rin’ e tin nib m’agan’ Got ngay, ma aram e rayog ni nge gel boch e felfelan’ rodad. Faan gad ra rin’ ni aray rogon, ma aram e rayog ni ngad guyed ni ke riyul’ fapi thin ni bay ko Psalm 64:10 (BT) ni be gaar: “Gubin e piin nib mat’aw e bay ra felfelan’gad ni bochan e n’en ni ke rin’ Somol.”