1, 2. (a) Mang fan ni baadag e girdi’ ni immoy u nap’an apostal Paul ni ngan weliy murung’agen e n’en ni be buch ko piin ni yad boch e sib nge rogon ni nge yag e puf rogon ngorad? (b) Mini’ e yog Paul ko girdi’ ni ngar sapgad ngak ya nge yag e bin riyul’ e puf rogon ngorad?

 TIN som’on e Kristiano e ur pared u tan e Am nu Roma. Girdi’ u tan e re am nem e yad ma uf ko pi motochiyel rorad, nge rogon ni yad ma pithig yu pa’ e oloboch u tagil’ e puf oloboch, nge rogon e puf rogon ni bay rorad. Machane bin riyul’ riy e, i yag ni nge par e Am nu Roma nib gel gelngin mab gilbuguwan ni bochan e pi maruwel ni ma rin’ e pi sib rorad. Immoy ba ngiyal’ ni yan i par ni sogonap’an 30 e pasent ko girdi’ ni ma par u rom e yad boch e sib. Ere dariy e maruwar riy ni aram fan ni boor e girdi’ ni kub muun e piin Kristiano ngay ni yad baadag ni ngan weliy murung’agen e n’en ni be buch ko piin ni yad boch e sib, nge rogon ni nge yag e puf rogon ngorad.

² Fapi babyor ni i yoloy apostal Paul e boor ban’en riy ni be weliy murung’agen e puf rogon. Machane, gathi i machib ni bochan e be guy rogon ni nge pithig e pi magawon ni be mada’nag e girdi’ u tan e re am nem. Boor e girdi’ e ngiyal’ nem ni aram e n’en ni yad baadag ni ngar rin’ed. Machane, Paul nge pi Kristiano ni ur moyed e ngiyal’ nem e ur maruwelgad nib gel ni yad be ayuweg e girdi’ ni ngar nanged fare thin  nib fel’ ni murung’agen Gil’ilungun Got, nge feni ga’ fan fare biyul ni maligach ni pi’ Kristus Jesus, ma da ur taga’gad ko pi pilung ara boch e ulung ni immoy e ngiyal’ nem ni nge pi’ e puf rogon ngorad. I ayuweg Paul e piin taareb e michan’ rorad ni ngar sapgad ngak e En Nra Pi’ e bin riyul’ e puf rogon ngorad. Nap’an ni yoloy e gin migid e babyor nge pi’ ko pi Kristiano nu Korinth, ma aram me yog ni gaar: “Jehovah e ba Kan. Ra bay gelngin Jehovah nib thothup u bang, ma aram e bay e puf rogon riy.”​—2 Kor. 3:17.

3, 4. (a) Mang e weliy Paul u m’on ni nge yog fapi thin ni bay ko 2 Korinth 3:17? (b) Mang e thingar da rin’ed me yag ngodad e puf rogon ni ma pi’ Jehovah?

³ Boch nga tabolngin e gi babyor ney ni pi’ Paul ngak piyu Korinth, ma aram me weliy murung’agen owchen Moses ni ke gal ramaen u nap’an ni yib nga but’ u daken fare Burey ni Sinai u tomuren ni kar nonow reb e engel rok Jehovah. Nap’an ni guy e girdi’ Moses mar tamdaggad, ma aram me upunguy Moses owchen. (Ex. 34:29, 30, 33; 2 Kor. 3:7, 13) I weliy Paul ni gaar: ‘Machane ra nchuweg . . . e mad u mit . . . ko ngiyal’ nra chel nge sap ngak Somol.’ (2 Kor. 3:16) Mang e be yip’ fan e pi thin ney ni yog Paul?

⁴ Kad filed ko fa binem e article ni kemus ni yigoo Jehovah ni ir e En ni Ke Sunmiy urngin ban’en e dariy e gin nra mus e puf rogon rok riy. Ere ba puluw ni nga dogned ni gin ni bay Jehovah nge ‘gelngin nib thothup’ riy e aram e gin ni bay e puf rogon riy. Machane faanra nge yag me yib angin e re puf rogon nem ngodad, ma aram e thingar da ‘sapgad’ ngak Jehovah ni be yip’ fan ni nge fel’ e tha’ u thildad. Nap’an ni immoy piyu Israel u daken e ted ma da ur lemnaged boch ban’en ni bod rogon ni i lemnag Jehovah, ya ur lemgad ni bod ni ma lem e girdi’. Ere gowa bay ban’en ni ke ning lanin’rad nge gum’ircha’rad kar pared ni yugu yad be lemnag rogon ni ngar fanayed e puf rogon rorad ni ngar rin’ed e tin ni yad baadag.​—Heb. 3:8-10.

5. (a) Uw rogon e puf rogon ni ma pi’ gelngin Jehovah nib thothup ngodad? (b) Uw rogon ni kad nanged nrayog ni nge par be’ ni bay e puf rogon rok ni ma pi’ Jehovah, ni yugu aram rogon ni kan kalbusnag ara ir reb e sib ni yibe maruwel ngak? (c) Mang l’agruw e deer nib t’uf ni ngad weliyed e fulweg riy?

⁵ Puf rogon ni ma pi’ gelngin Jehovah nib thothup ngodad e gathi kemus nra ayuwegdad ni nge dab kud manged sib. Re gelngin nem e ka boor ban’en nrayog ni nge ayuwegdad ni nge dab kud manged sib riy, ma pi n’em e bogi ban’en ndabiyog ko girdi’. Rayog ni nge ayuwegdad ni nge dab kud manged sib ko denen nge yam’, nge liyor ni googsur, nge pi n’en ni yima rin’ ni bay rogon ngay. (Rom. 6:23; 8:2) Rib manigil e biney e puf rogon nra yag ngak be’! Ku rayog ni nge yib angin e re puf rogon ney ngak be’ ni yugu aram ni kan kalbusnag ara ir reb e sib ni yibe maruwel ngak. (Gen. 39:20-23) Ireray e n’en ni buch rok l’agruw e walag ni ka nog Nancy Yuen nge Harold King ngorow. Gal walag ney e ni kalbusnagrow u lan boor e duw ni bochan e michan’ rorow. Rayog ni ngam yaliy yaarow ni yow be weliy e n’en ni buch rorow ko JW Broadcasting. (Mu yaliy fare thin ni INTERVIEWS AND EXPERIENCES > ENDURING TRIALS.) Machane ba t’uf ni ngad weliyed l’agruw e deer ni be gaar, Uw rogon nrayog ni ngad daged nib ga’ fan u wan’dad e puf rogon ni bay rodad? Ma uw rogon ni ngad maruwelgad ko re puf rogon ney nib fel’ rogon?

6. Uw rogon ni dag piyu Israel nde ga’ fan u wan’rad e puf rogon ni pi’ Jehovah ngorad?

⁶ Nap’an ni gad ra nang feni ga’ fan reb e tow’ath  nib tolang puluwon, ma aram e gad ra adag ni ngad pininged e magar ngak e en ke pi’. De ga’ fan u wan’ piyu Israel e puf rogon ni pi’ Jehovah ngorad u nap’an ni chuwegrad ko sib u Egypt. De gaman in e pul nga tomuren nni chuwegrad ko sib, ma aram mar tababgad ni ngaur fineyed e ggan ni ur ked u Egypt nge garbod ni ur unumed, mu ur gun’gun’gad ni bochan e n’en ni be pi’ Jehovah ni ngar ked. Ku rogned ni yad baadag ni ngar sulod nga Egypt. Aygum lemnag, ya kar m’oneged e ‘nig, nge kiyuri, nge mayis, nge subuyas, nge tamanengi, nge garlic’ ko puf rogon ni ke pi’ Jehovah ni bin riyul’ e Got ngorad ni ngar pigpiggad ngak. Dariy e maruwar riy ni aram fan ni damumuw Jehovah ngorad. (Num. 11:5, 6, 10; 14:3, 4) Ere bay ban’en nib ga’ fan ni gad ra fil ko re n’ey!

7. Uw rogon ni fol Paul ko fare fonow ni pi’ ni bay ko 2 Korinth 6:1, ma uw rogon ni ngad folwokgad rok?

⁷ Ke yog apostal Paul ngodad e piin Kristiano ndab da darifannaged e puf rogon ni ke pi’ Jehovah ngodad u daken Jesus Kristus ni Fak. (Mu beeg e 2 Korinth 6:1.) Am lemnag gelngin e gafgow ni i tay laniyan’ nge rogon ni i magawon e nangan’ rok ni bochan e manang ni be par ni ke mang sib ko denen nge yam’. Yugu aram rogon, me yog ni gaar: “Ke magar Got u daken e Somol rodad i Jesus Kristus!” Mang fan? I weliy fan ngak e pi Kristiano ni taareb e michan’ rorad ni gaar: “Ya motochiyel rok fare Kan ni Thothup [“gelngin Got nib thothup,” NW] ni ir e ma fek e yafos i yib ngodad ko taab girdi’ ni gadad ma tay Kristus Jesus e ke chuwegeg ko gagiyeg ni ma tay e denen nge yam’.” (Rom. 7:24, 25; 8:2) Ku arrogodad nsusun e dab da darifannaged e puf rogon ni ke pi’ Jehovah ngodad ni aram e ke chuwegdad ko sib ko denen nge yam’ ni bod rogon Paul. Bochan fare biyul, ma aram fan nrayog ni ngad pigpiggad ngak e Got rodad nib beech e nangan’ rodad ma gad ba felfelan’.​—Ps. 40:8.

8, 9. (a) Mang ginang e pi’ apostal Peter nib l’ag nga rogon ni gad ma maruwel ko puf rogon rodad? (b) Mang boch ban’en ni bay e ngiyal’ ney nrayog ni nge magawonnagdad?

⁸ Machane, gathi kemus ni ngad pininged e magar ko puf rogon ni kan pi’ ngodad, ya susun e ngkud kol ayuwgad ndab da maruwelgad ngay nib kireb rogon. I pi’ apostal Peter ba ginang ni be yog nsusun e dab da fanayed e puf rogon ni kan pi’ ngodad ni nge mang tawey rodad ni ngad rin’ed e tin nib kireb ni gad be ar’arnag.  (Mu beeg e 1 Peter 2:16. a) Re ginang ney e be puguran ngodad e n’en ni buch rok piyu Israel u nap’an ni yad bay u daken e ted. Kab t’uf e re ginang ney rodad e ngiyal’ ney. Machane, gadad e rib gel feni t’uf rodad ni bochan e boor ban’en ni ma ognag Satan nge re fayleng ney ngodad nib mom ni ngad adaged, ni bod rogon e mad ni yima chuw ngay, nge ggan, nge garbod, nge pi n’en ni yima chuweg e chalban ngay, nge yugu boch ban’en. Piin ni yad ma dag fel’ngin e chugum ni ngan chuw’iy ni yad ba salap u rogon ni ngar pingeged laniyan’ e girdi’ e yad ma fanay boch e girdi’ nib fel’ yaan ni ngar k’aringed gadad ni ngad lemnaged nib t’uf ni ngad chuw’iyed boch ban’en nde t’uf rodad. Rib mom ni ngad awgad ko pi ban ney, ma gad maruwel ko puf rogon rodad nib kireb rogon!

⁹ Fare fonow ni pi’ Peter e ku bay rogon nga boch ban’en ni gad ma rin’ nib ga’ fan, ni bod rogon e re miti skul, ara maruwel ni gad ra mel’eg ni ngad uned ngay. Bod ni, yima towasariy e piin fel’ yangaren u skul e ngiyal’ ney ni ngar tedan’rad ko skul ya nge yag nra uned nga boch e skul nib tolang nrib manigil. Boor e girdi’ ni ma yog ngorad ni faan yad ra un ko skul nib tolang, ma aram e rayog ni nge yag e maruwel ngorad nib fel’ mab tolang puluwon, maku ra tay e girdi’ farad. Ku rayog ni nge dag e pi girdi’ ney ngorad boch ban’en ni be micheg ni piin ni kar chuwgad u reb e skul nib tolang e boor e salpiy ni yad ra thognag ngak e piin ni kemus nra chuwgad u high school. Rib mom ni nge adag e piin fel’ yangaren ni ngar uned ko skul nib tolang u nap’an nra t’uf ni ngar dugliyed boch ban’en ni bay rogon ko par rorad boch nga m’on. Machane, mang e susun ni ngar lemnaged nge gallabthir rorad?

10. Mang e ba t’uf ni ngad lemnaged u nap’an ni gad be fanay e puf rogon rodad ni ngad dugliyed boch ban’en ni ngad rin’ed ni gadad rodad?

¹⁰ Bay boch e girdi’ ni yad ma lemnag ni pi n’ey ni ngar dugliyed e dariy rogon ngak be’. Ere susun e ba puf rogorad ni ngar mel’eged e n’en ni yad baadag ni ngar rin’ed ni faanra der magawonnag e nangan’ rorad. Sana rayog ni yad be lemnag fapi thin ni yog Paul ngak e pi Kristiano u Korinth ni bay rogon ko ggan ni gaar: ‘Mang fan nib puf rogog ni nggu rin’ e tin ni nggu rin’, machane dabiyog ni fan nga laniyan’ be’?’ (1 Kor. 10:29) Riyul’ nib puf rogodad ni ngad mel’eged e re miti skul nge maruwel ni ngad uned ngay. Machane, susun e dab da paged talin ni bay e gin ni nge mus e puf rogon rodad riy, ma gubin ban’en ni gad ma dugliy ni bay angin ara wenegan nra yib. Aram fan ni gaar Paul: “‘Urngin ban’en nrayog ni ngad rin’ed,’ ara’ rogon ni ka nog. Er rogon, machane gathi urngin ban’en ma ba fel’. ‘Urngin ban’en nrayog ni ngad rin’ed’​—machane gathi urngin ban’en ma ba fel’ ngodad [“ra pi’ e athamgil nga lanin’uy,” NW].” (1 Kor. 10:23) Re n’ey e be ayuwegdad ni ngad nanged ni bay boch ban’en ni kab ga’ fan ni ngad lemnaged u nap’an ni gad be fanay e puf rogon rodad ni ngad dugliyed e n’en ni ngad rin’ed ko pi n’en ni gad ma rin’ u lan e yafos rodad, ko bin ni kemus ni ngad rin’ed e n’en ni gad baadag.

11. Mang fan ni kan chuwegdad ko sib ko denen nge yam’?

¹¹ Nap’an ni be ginang Peter e girdi’ ndab ra maruwelgad ko puf rogon rorad nib kireb rogon, ma aram miki tamilangnag fan ni ngad rin’ed e re n’ey. I yog ni ngad fanayed e puf rogon rodad ni ngad “ngongolgad nrogon e sib rok Got.” Ere, fan ni ke fanay Jehovah Jesus ni nge chuwegdad u tan e sib ko denen nge yam’ e bochan e nge yag nda fanayed e yafos rodad ni ngad manged “sib rok.”

12. Mang e rin’ Noah nge chon e tabinaw rok nrayog ni ngad folwokgad riy?

¹² Bin th’abi fel’ e kanawo’ ni nge dab da kirebnaged rogon ni gad ma maruwel ko puf rogon rodad  riy e aram e ngad fanayed e tayim rodad nge gelngidad ni ngad pigpiggad ngak Jehovah. Faan gad ra rin’ ni aray rogon, ma aram e ra ayuwegdad ni nge dab da paged boch ban’en ni yima nameg ko re fayleng ney ara boch ban’en ni gad baadag ni ngad rin’ed ni nge par ni aram e n’en nth’abi ga’ fan u lan e yafos rodad. (Gal. 5:16) Bod ni, am lemnag e n’en ni rin’ Noah nge chon e tabinaw rok. Ur pared u ba ngiyal’ ni ke gel e cham ma ke yoor e kireb ni be rin’ e girdi’. Yugu aram rogon, ma da ur uned i rin’ e pi n’en ni baadag e girdi’ u toobrad ara pi n’en ni ur nameged ni ngar rin’ed. Uw rogon ni yag ni ngar rin’ed e re n’ey? Ra dugliyed ni ngar fanayed e tayim rorad ni ngar rin’ed e maruwel ni ke pi’ Jehovah ngorad, ni aram e ngar toyed fare arke, mar kunuyed e ggan ni ngar ked nge fapi gamanman u lan fare arke, mar ginanged e girdi’. I “rin’ Noah urngin e tin ni yog Got ngak ni nge rin’.” (Gen. 6:22) Ere mang angin ni yib riy? I magey Noah nge chon e tabinaw rok ndar m’ad u nap’an ni thang Got e piin ni yad ba kireb e ngiyal’ nem.​—Heb. 11:7.

13. Mang maruwel e tay Got chilen ngak Jesus ni nge rin’, miki tay Jesus chilen ngak pi gachalpen ni ngar rin’ed?

¹³ Mang e ke tay Jehovah chilen ngodad ni ngad rin’ed e ngiyal’ ney? Bochan ni gadad boch i gachalpen Jesus, ma gad manang e n’en ni ke tay Got chilen ngodad ni ngad rin’ed. (Mu beeg e Luke 4:18, 19.) Ngiyal’ ney e yooren e girdi’ e ke tay Satan lanin’rad u fithik’ e lumor ma kar pared ni kar manged sib ko teliw ni googsur, nge chugum, nge pi am ko re fayleng ney ndarur nanged. (2 Kor. 4:4) Gad ba tow’ath ni gad be folwok rok Jesus gad be ayuweg e girdi’ ni ngar nanged Jehovah ni ir fare Got ni ma pi’ e puf rogon, mar liyorgad ngak. (Matt. 28:19, 20) De mom e re maruwel ney, ma boor e magawon ni gad ma mada’nag riy. Bay boch e nam ni girdi’ riy e gathi ri yad baadag ni ngar filed murung’agen Got, maku bay boch i yad ni ma damumuw u nap’an ni gad ra machibnagrad. Ere ra bagadad ma susun e nge lemnag e re deer ni baaray ni be gaar: ‘Rayog ni nggu fanay e puf rogon rog ni nggu yoornag boch ban’en ni gu be rin’ ni fan ko fare maruwel ni machib, fa?’

14, 15. Mang e ke rin’ boor e tapigpig rok Jehovah ni fan ko fare maruwel ni machib? (Mu guy e sasing ni bay u tabolngin e re article ney.)

¹⁴ Rib gel e athamgil ni be tay lanin’dad ni gad be guy boor e walag ni kar nanged ni kar da chugurgad nga tungun e re m’ag ney ma kar momnaged rogon e par rorad ya nge ya yag nra uned ko machib u polo’ e tayim rorad. (1 Kor. 9:19, 23) Boch i yad e ma machib ko gin ni be machib e ulung rorad riy, ma boch i yad e ma chuw nge yan i pi’ e ayuw nga boch e binaw nib t’uf e ayuw ko machib riy. Nap’an fa lal i duw ni ke yan, mab pag 250,000 e walag ni kar uned ko pioneer, ma chiney e ke pag 1,100,000 e regular pioneer. Ere, rib manigil angin ni ke yib ni bochan e boor e walag ni yad be fanay e puf rogon rorad ni ngar pigpiggad ngak Jehovah!​—Ps. 110:3.

¹⁵ Mang e ke ayuweg e pi walag ney ni ngar fanayed e puf rogon rorad nib fel’ rogon? Am lemnag e n’en ni ke rin’ John nge Judith ni ke gaman 30 e duw ni kar pigpiggow u boch e nam u roy u fayleng. Keb ngan’row nnap’an ni tabab fare skul ko piin pioneer ni ka nog e Pioneer Service School ngay ko duw ni 1977, ma aram mu un pi’ e athamgil nga laniyan’ e piin ni ur uned ko re skul ney ni nga ranod ra pied e ayuw nga boch e  binaw nib t’uf e ayuw ko machib riy. Ere, yog John nrogon ni yag ni ngar rin’ew e re n’em, e aram e i par ni be thilyeg e maruwel rok ni boor yay ni bochan e nge yag nra momnagew e par rorow. Munmun u nap’an nra tawgow nga reb e nam ni gathi nam rorow, ma aram mar nangew ni meybil ni ur tew ngak Jehovah nge rogon ni ur taga’gow ngak e aram e n’en ni ke ayuwegrow ni ngar gelgow nga boch e magawon ni ur mada’nagew u nap’an ni yow be fil reb e thin nib beech, ma yow be fil rogon ni ngar mechamgow nga reb e yalen nge yafang nib thil. Ere, uw rogon ni yib angin ngorow e pigpig ni ur tew u lan e pi duw nem? I yog John ni gaar, “Gowa bod ni gu be rin’ e bin th’abi fel’ e maruwel ni bay. I yag ni nge riyul’ Jehovah u wan’ug me par ni bod rogon ba matam ni ma t’ufegey. Chiney e ka fini tamilang fan u wan’ug fare thin ni bay ko James 4:8 ni be gaar: ‘Mu chugurgad ngak Got, me chugur ngomed.’ Gu manang ni kug pirieg e n’en ni ku ug gay ni ke n’uw nap’an, ni aram e nge yib fan e yafos rog.”

16. Uw rogon ni ke maruwel bokum biyu’ e walag ko puf rogon rorad nib fel’ rogon ni yugu aram rogon ni buchuuw e tayim nrayog ni ngar rin’ed boch e maruwel riy ni bochan rarogorad?

¹⁶ Machane, bay boch e walag ni yad ba thil ngak John nge Judith, ya kemus ni taaboch ngiyal’ e rayog ni ngar pigpiggad riy u polo’ e tayim rorad ni bochan rarogorad. Machane, boor e walag ni yad ma ognaged yad ni ngar uned i toy boch e naun rodad ni bay u ga’ngin yang e fayleng. Bod nnap’an ni yibe toy e tochuch rodad u Warwick u New York, ma sogonap’an 27,000 e walag ni pumoon nge ppin nra ognaged yad ni ngar pied e ayuw ni boch i yad e kemus ni l’agruw e wik, ma boch e reb e duw, ara ba n’uw nap’an ngay. Boor i yad e ra paged farad u boch ban’en ni fan e ngar pied e ayuw ko re maruwel nem. Rib manigil e kanawo’ ni kar daged u rogon ni kar fanayed e puf rogon ni ke pi’ Jehovah ngorad ni ngar n’ufed mi yad tayfan ni ir fare Got ko puf rogon!

17. Mang e rayog ni nge athapeg e piin ni yad be maruwel ko puf rogon ni ke pi’ Got ngorad nib fel’ rogon e chiney?

¹⁷ Gad be pining e magar ngak Jehovah ni ke yag ni ngad nanged murung’agen ma ke yag fare puf rogon ngodad ni bay rok e piin ni yad ma un ko bin riyul’ e liyor. Ere, manga yigi m’ug ko pi n’en ni gad ma dugliy nib ga’ fan u wan’dad e re puf rogon nem. Maku reb e, ngad fanayed e puf rogon rodad ni ngad pigpiggad ngak Jehovah u rogon kanawoen nrayog rodad ko bin ni ngad maruwelgad ngay nib kireb rogon ara da fanayed nga boch ban’en nde ga’ fan. Faan gad ra rin’ ni aray rogon, ma aram e rayog ni nge yag ngodad e pi tow’ath ni ke micheg Jehovah nra pi’ u nap’an nra lebug e thin ko re yiiy ni baaray ni be gaar: “Aram e reb e rran e bay ra pired ni gathi yad e sib rok e wod, mi yad un ko flaab rok pi fak Got.”​—Rom. 8:21.