1, 2. (a) Mang boch ban’en ni weliy Jesus ngak pi gachalpen ko fare nep’ u m’on ni yim’? (Mu guy e sasing ni bay u tabolngin e re article ney.) (b) Mang nib ga’ fan ni ngaud lemnaged fan e machib ni gad ma tay? (c) Mang e gad ra weliy?

 FARE nep’ u m’on ni yim’ Jesus, mab n’uw nap’an nra nonad e pi apostal rok. I micheg ngorad nri yad ba t’uf rok. Ki weliy ngorad ba fanathin ni murung’agen kenggin e grapes ni ir e kad weliyed murung’agen ko fa binem e article ni ke yan. I fanay Jesus e re fanathin nem ni nge pi’ e athamgil nga laniyan’ pi gachalpen ni nge ‘yib wom’engirad ni pire’,’ ni be yip’ fan ni ngar athamgilgad ngar machibnaged murung’agen Gil’ilungun Got.​—John 15:8.

² Machane, gathi kemus ni yog Jesus ngak pi gachalpen e n’en nib t’uf ni ngar rin’ed, ya ki yog fan ngorad. I weliy fan nib t’uf ni ngar rin’ed fare maruwel ni machib. Mang nib ga’ fan ni ngad weliyed e pi n’ey? Ya faan gad ra lemnag fan nib t’uf ni ngad ululgad ko machib, ma aram e ra k’aringdad ni ngad athamgilgad ni ngad ‘machibgad u gubin yang u fayleng ni nge urngin e girdi’ me nang.’ (Matt. 24:13, 14) Ere chiney e ngad weliyed aningeg ban’en nib puluw ko Bible ni be tamilangnag fan ni gad ma machib. Ku gad ra weliy murung’agen aningeg e tow’ath ni ke pi’ Jehovah ngodad nra  ayuwegdad ni nge yib wom’engidad ko athamgil ni gad be tay.

3. (a) Mang fan ni gad ma machib nrogon ni kan tamilangnag ko John 15:8? (b) Mang e be yip’ fan fapi grapes ni weliy Jesus ko fare fanathin rok? Mang fan nib puluw e re n’ey?

³ Bin th’abi ga’ i fan ni gad ma machib e bochan ni ngad ted fan ara ngad pininged e sorok ngak Jehovah ma gad tayfan e ngachal rok. (Mu beeg e John 15:1, 8.) Mu tay fanam i yan riy ni taareb rogonnag Jesus Jehovah ni Chitamangin ngak be’ ni ma ayuweg e woldug, ara reb e tamilay’ ni ma yung e grapes. I taareb rogonnag Jesus ir ko kenggin e grapes, ma pi gachalpen e yad papa’ngin. (John 15:5) Ere fapi grapes e be yip’ fan fare wom’engin ni ma yib rok pi gachalpen Kristus, ara fare maruwel ni machib ni yad ma rin’. I gaar Jesus ngak e pi apostal rok: “Ara’ rogon min ta’ fan [ara “ni pining e sorok ngak”] e en ni Chitamangiy ni faanra yib wom’engimed ni pire’.” Be’ nib tamilay’ ni ma yung e woldug ni grapes e faanra yib wom’engin e woldug rok nib fel’, ma aram e yira tayfan. Ku arrogon ni faan gad ra athamgil u rogon nrayog rodad ni ngad machibnaged murung’agen Gil’ilungun Got, maku aram e gad be tayfan ara gad be pining e sorok ngak Jehovah.​—Matt. 25:20-23.

4. (a) Mang boch e kanawo’ ni gad ma tayfan e ngachal rok Got riy? (b) Uw rogon u wan’um fare tow’ath ni bay rom ni aram e rayog ni ngam tayfan e ngachal rok Got?

⁴ Uw rogon ni gad ma tayfan e ngachal rok Got u daken e machib ni gad ma tay? Dabiyog ni ngad gelnaged boch e thothup u fithingan Got, ya gad manang ni fithingan Got e rib thothup. Machane, mu tay fanam i yan ko n’en ni yog Isaiah ni profet ni gaar: “Jehovah ni Gubin ma Rayog Rok e aram e En nsusun e ngam ted nib thothup.” (Isa. 8:13, NW) Gad ma tayfan e ngachal rok Got ni aram e gad ma tay ni yugu ba thil ko tin ni ka bay e ngachal, ma gad ma ayuweg e girdi’ ni ngar nanged nib thothup e re ngachal nem. (Matt. 6:9) Bod ni, faan gad ra machibnag e tin riyul’ u murung’agen pi fel’ngin Jehovah nrib manigil nge n’en nib m’agan’ ngay ni fan ko girdi’ ndabi thil, ma aram e gad be ayuweg e girdi’ ni ngar nanged ni urngin e pi n’en nib kireb ni ke yog Satan u murung’agen Jehovah e goo ban. (Gen. 3:1-5) Maku reb e, faan gad ra athamgil ni ngad ayuweged e girdi’ ko gin ni gad ma machib riy ni ngar nanged ni bay rogon ‘ni nga nog e sorok, min ta’ fan, ma ba’ rogon ni nge mil suwon urngin ban’en ngak’ Jehovah, ma aram e gad be tayfan e ngachal rok. (Rev. 4:11) Rune nreb e walag ni ke gaman 16 e duw ni ke pioneer e yog ni gaar: “Gu be pining e magar ni bochan e gu manang ni kan pi’ reb e tow’ath ngog ni aram e nggu mang mich rok e En ni Ke Sunmiy e palpalth’ib. Re n’ey e ma k’aringeg ni nggu adag ni nggu ulul ko machib.”

5. (a) Mang fan ni gad ma machib nrogon ni kan weliy ko John 15:9, 10? (b) Uw rogon ni tamilangnag Jesus fan nib t’uf ni nge athamgil pi gachalpen?

⁵ Mu beeg e John 15:9, 10. Bin migid i fan ni gad ma machibnag murung’agen Gil’ilungun Got e bochan nib t’uf Jehovah nge Jesus rodad. (Mark 12:30; John 14:15) I yog Jesus ngak pi gachalpen ni ngar ‘pired ni yad ba t’uf rok.’ Mang fan? Bochan e manang nib t’uf ni nge athamgil pi  gachalpen ya nge yag nra pared ni yad boch e tin riyul’ e Kristiano. Bin riyul’ riy e, boor yay ni yog Jesus fare bugithin ni “par” u John 15:4-10 ni nge tamilangnag fan nib t’uf ni nge athamgil pi gachalpen.

6. Uw rogon ni ngad daged ni gad baadag ni ngad pared ni gad ba t’uf rok Kristus?

⁶ Uw rogon ni ngad daged ni gad baadag ni ngad pared ni gad ba t’uf rok Kristus ma gad ba fel’ u wan’? Aram e ngad folgad ko pi motochiyel rok. Ere, kemus ni be yog Jesus ngodad ni ngad rin’ed e n’en ni rin’, ya ki ulul ngay ni gaar: “Bod rogon ni kug fol ko tin ni ning e Chitamag chilen ngog gu be par ni ku gub t’uf rok.” Ere Jesus e ke dag e kanawo’ nrayog ni ngad folwokgad riy.​—John 13:15.

7. Uw rogon nib peth e fol ni yima tay ko t’ufeg?

⁷ I tamilangnag Jesus ngak e pi apostal rok rogon nib peth e fol ni yima tay ko t’ufeg u nap’an ni gaar: “En nra fel’ u wan’ e tin ni kug ta’ chilen ngomed me fol riy, e ereram e cha’ ni gub t’uf rok.” (John 14:21) Maku reb e, faan gad ra fol ko n’en ni tay Jesus chilen ni aram e nga darod ngad machibgad, ma aram e ku gad be dag nib t’uf Got rodad. Fan e re n’ey e bochan ni pi motochiyel ni pi’ Jesus e be m’ug riy rogon e lem ko Chitamangin. (Matt. 17:5; John 8:28) Ma nap’an ni gad ra dag ngak Jehovah nge Jesus ni yow ba t’uf rodad, ma aram e ku gad ra par ni gad ba t’uf rorow.

8, 9. (a) Ku mang reb i fan ni gad ma machib? (b) Mang fan ni be k’aringdad fapi thin ni ke yog Jehovah ni bay ko Ezekiel 3:18, 19 nge 18:23 ni ngad ululgad ko machib ni gad be tay?

⁸ Ku reb i fan ni gad be ulul ko machib e bochan ni gad be ginang e girdi’. Be weliy e Bible murung’agen Noah ni ir be’ ni i ‘machib.’ (Mu beeg e 2 Peter 2:5.) Machib ni i tay u m’on ko fare Ran ni Tharey e Fayleng e kub muun ngay e ginang ni i tay ko girdi’ u murung’agen e gechig ni bayi fek Got i yib. Mang fan nrayog ni nga dogned e re n’ey? Mu tay fanam i yan ko n’en ni yog Jesus ni gaar: “Bod rogon fapi rran ni ba aram ni immoy nga m’on ko fa ngiyal’ i n’em ni yib e ran nge tharey e binaw, un abich ma yibe garbod, ma be mabgol e pumoon nge ppin nge yan i mada’ ko rofen ni baaram ni yan Noah riy nga lan fare ark; machane da ur nanged e n’en [“tedan’rad ko n’en,” NW] ni bay yib ngorad nge yan i mada’ ko ngiyal’ ni baaram ni yib e ran nge tharey e binaw nge fekrad ni yad gubin. Ere aram rogon e ngiyal’ ni baaram ni bay yib e en ni Fak e Girdi’ riy.” (Matt. 24:38, 39) Yugu aram rogon nda i motoyil e girdi’ ngak Noah, machane ki ulul ni nge weliy e n’en ni ke yog Jehovah ngak ni nge weliy ko girdi’.

⁹ Ngiyal’ ney e gad ma machibnag murung’agen Gil’ilungun Got ni bochan e ngad ayuweged e girdi’ ni ngar nanged e n’en nib m’agan’ Got ngay ni fan ngorad. Ri gad baadag ni nge motoyil  e girdi’ ko n’en ni gad be machibnag ya nge yag e “yafos” ngorad ni bod rogon ni baadag Jehovah. (Ezek. 18:23) Maku reb e, nap’an ni gad ra machib u mit e tabinaw i yan nge yungi n’en ni ma muulung e girdi’ ni yoor ngay, ma aram e gad be ginang e girdi’ ara gad be yog ngorad ni bay yib Gil’ilungun Got ni nge thang e re m’ag nib kireb ney.​—Ezek. 3:18, 19; Dan. 2:44; Rev. 14:6, 7. 

10. (a) Mang fan ni gad ma machib nrogon ni bay ko Matthew 22:39? (b) Mu weliy rogon ni ayuweg Paul nge Silas ba pilungen e kalbus u Filippi?

¹⁰ Bin aningeg i fan ni gad be ulul ko machib e bochan nib t’uf e girdi’ rodad. (Matt. 22:39) Re t’ufeg ney e ireray e n’en ni be ayuwegdad ni ngad ululgad ko re maruwel ney ni bochan e gad manang nrayog ni nge thil e lem ko girdi’ u nap’an nra thil boch ban’en u rogon e par rorad. Am lemnag e n’en ni buch rok apostal Paul nge Silas. Nap’an ni ur moyew u lan e mach nu Filippi, ma aram me kolrow boch e girdi’ ni yad be togopuluw ngorow nga ron’ed yow nga kalbus. Ma nap’an ni ke lukngun e nep’, ma aram ma yigi yib ba durru’ nib gel nge rurug fare kalbus nge mada’ ko def riy me mab urngin e mab riy. I rus facha’ ni pilungen e kalbus ni bochan e be lemnag ni ke mil urngin fapi kalbus, ma aram me lemnag ni nge li’ ir nge yim’. Machane, me tolul Paul ni gaar: “Dab mmaad’ad ngom!” Ere fith fare pilungen e kalbus ni gaar: “Mang e thingar gu rin’ me yog ni gu thap ngak Got?” Me gaar Paul nge Silas: “Nge mich u wun’um Somol Jesus, ma aram e kam thap ngak Got.”​—Acts 16:25-34.

11, 12. (a) Mang rogon fare thin nu Bible ni murung’agen fare pilungen e kalbus ko machib ni gad ma tay? (b) Mang fan ni gad baadag ni ngad ululgad ko machib ni gad be tay?

¹¹ Mang rogon fare thin nu Bible ni murung’agen fare pilungen e kalbus ko machib ni gad ma tay? Mu tay fanam i yan riy ni fin u tomuren fare durru’ e aram e ngiyal’ ni thil laniyan’ fare pilungen e kalbus me yog ni ngan ayuweg. Ku arrogon ni bay boch e girdi’ e ngiyal’ ney nda ur motoyilgad ko machib kafram, machane tomuren ni ke buch ban’en nib tomgin u lan e yafos rorad, ma aram me thil e lem rorad mar gayed e ayuw. Bod nsana rayog ni bay boch e girdi’ ko gin ni gad ma machib riy ni kar gingad ni bochan e kan talegrad ko maruwel rorad. Fa bay boch i yad ni ke kireban’ ni bochan e ke wer e mabgol rok. Ku bay boch e girdi’ nsana kari kireban’rad ni bochan e kan pirieg ni bay ba mit e m’ar rorad nib ubchiya’ ara ke yim’ be’ nib t’uf rorad. Nap’an nra buch boch ban’en ni aray rogon, ma aram e rayog ni nge tabab e girdi’ i fith boch e deer ni bay rogon ko par rorad nda ur lemnaged kafram. Sana ku rayog ni nge lungurad, ‘Mang e thingar gu rin’ed me yag ni gu thapgad ngak Got?’ Ere, nap’an ni gad ra mada’nag e pi girdi’ ney, ma rayog ni yad baadag ni ngar motoyilgad ko thin ni gad be machibnag nra pi’ e athap ngorad. Rayog ni aram e yay nth’abi som’on ni kar motoyilgad ko machib rodad.

¹² Ere faan gad ra ulul ngad machibgad u fithik’ e yul’yul’, ma nap’an nra dugliy boch e girdi’ u wan’rad ni aram e ngar motoyilgad me m’agan’rad ko fare thin ni yibe machibnag ni ma fal’eg lanin’uy, ma aram e gad bay ni ngad weliyed ngorad. (Isa. 61:1) Charlotte ni ke gaman 38 e duw ni ke machib u polo’ e tayim rok e yog ni gaar: “Girdi’ e ngiyal’ ney e dariy e athap rorad. Ere ba t’uf ni ngar rung’aged fare thin nib fel’.” Ma Ejvor nreb e walag ni ke gaman 34 e duw ni ke pioneer e yog ni gaar: “Ngiyal’ ney e kari yoor e girdi’ ni be magawon lanin’rad. Ere rug baadag ni nggu ayuwegrad. Ireray e n’en ni ma k’aringeg ni nggu machib.” Ere rib puluw ni ngad ululgad ko machib ni gad be tay ni bochan e ba t’uf e girdi’ rodad.

13, 14. (a) Mang tow’ath e kan weliy murung’agen ko John 15:11? (b) Uw rogon ni ngad felfelan’gad ni bod Jesus? (c) Faanra gad ba felfelan’, ma uw rogon nra ayuwegdad ko machib ni gad ma tay?

¹³ Nap’an fare nep’ u m’on ni nge yim’ Jesus, miki weliy ngak e pi apostal rok murung’agen  boch e tow’ath nra ayuwegrad ni nge yib wom’engirad. Mang e pi tow’ath nem, ma uw rogon ni ma yib angin ngodad?

¹⁴ Felfelan’. Gur, ba mo’maw’ ni ngad machibgad? Danga’. Tomuren ni weliy Jesus fare fanathin u murung’agen fare kenggin e grapes, ma aram me yog nnap’an ni gad ra machib mab gel e felfelan’ ni gad ra tay. (Mu beeg e John 15:11.) Bin riyul’ riy e, yog ni gad ra felfelan’ ni bod ir. Ni uw rogon? Kad weliyed faram ni ke taareb rogonnag Jesus ir ko kenggin e grapes, ma pi gachalpen e yad papa’ngin. Fare kenggin e grapes e aram e n’en ni ma ayuweg papa’ngin. Faanra i par papa’ngin fare ke grapes nib peth nga kenggin, ma aram e rayog ni nge fek e ran nge boch ban’en ni bay u fithik’ i kenggin fare woldug ni be ayuweg ni nge par nib fel’ rogon. Ku arrogodad ni faan gad ra par ni gad ba taareb Kristus ma gad lek luwan ay, ma aram e rayog ni ngki yag ngodad e re felfelan’ ni baaram ni immoy rok u nap’an ni be rin’ e tin nib m’agan’ e Chitamangin ngay. (John 4:34; 17:13; 1 Pet. 2:21) Hanne nreb e walag ni ke pag 40 e duw ni ke pioneer e yog ni gaar, “Felfelan’ ni gu ma tay u tomuren e machib e aram e n’en ni ma k’aringeg ni nggu ulul ko pigpig ni gu be tay ngak Jehovah.” Arrogon, felfelan’ e aram e n’en ni ma pi’ gelngidad ya nge yag nda ululgad ko machib ni yugu aram rogon nder motoyil yooren e girdi’ ngodad.​—Matt. 5:10-12.

15. (a) Mang tow’ath e kan weliy murung’agen ko John 14:27? (b) Uw rogon nra ayuwegdad e gapas ni nge yib wom’engidad?

¹⁵ Gapas. (Mu beeg e John 14:27.) Ku re nep’ i n’em u m’on ni nge yim’ Jesus miki gaar ngak e pi apostal rok: “Nggu pi’ e gapas rog ngomed.” Uw rogon nra ayuwegdad e re tow’ath ney ni nge yib wom’engidad? Faanra ud athamgilgad, ma rayog ni ngad pared nib gapas lanin’dad ni bochan e gad manang ni gad be rin’ e tin nib m’agan’ Jehovah nge Jesus ngay. (Ps. 149:4; Rom. 5:3, 4; Kol. 3:15) Ulf ni ke gaman 45 e duw ni ke pioneer e yog ni gaar, “Ma aw parawog ko machib ni gu ma tay, machane ma ayuwegeg ni nggu par nib pagan’ug ma bay fan e yafos rog.” Ri gad ba felfelan’ ni ke yag ni ngad pirieged e mit ney e gapas nra par ndariy n’umngin nap’an!

16. (a) Mang tow’ath e kan weliy murung’agen ko John 15:15? (b) Uw rogon nrayog ni nge par e pi apostal ni yad e fager rok Jesus?

¹⁶ Ra yag e fager nib fel’ ngodad. Tomuren ni yog Jesus ngak e pi apostal rok ni baadag ni ngar felfelan’gad “nge yan i mus nga rogon,” ma aram me weliy ngorad feni ga’ fan ni ngar paged farad ngar daged e t’ufeg. (John 15:11-13) Ngemu’ me yog ni gaar: “Nggog ni gimed e tafager rog.” Rib manigil e binem e tow’ath ni ke yag ngorad ni aram e kar manged fager rok Jesus! Machane, mang e ba t’uf ni nge rin’ e pi apostal nem ya nge yag nra pared ni yad e fager rok Jesus? Thingar  ‘ranod nge yib wom’engirad ni pire’.’ (Mu beeg e John 15:14-16.) Sogonap’an l’agruw e duw u m’on riy, ma aram me gaar Jesus ngorad: “Marod ngam machibgad ni nge lungumed, ‘Gagiyeg rok Got e ke chugur!’” (Matt. 10:7) Ere nap’an e re nep’ i n’em ma aram me tay Jesus ir ngorad ni ngar athamgilgad ngar ululgad ko machib ni yad be tay. (Matt. 24:13; Mark 3:14) Ba mo’maw’ ni ngar rin’ed e re maruwel nem ni tay Jesus chilen ngorad. Machane rayog ni ngar rin’ed, ma aram e n’en ni ayuwegrad ni ngar pared ni yad e fager rok Jesus. Ni uw rogon? Ku bay reb e tow’ath ni ki ayuwegrad.

17, 18. (a) Mang tow’ath e kan weliy murung’agen ko John 15:16? (b) Uw rogon ni ayuweg e re tow’ath ney pi gachalpen Jesus? (c) Mang boch e tow’ath ni ma pi’ gelngidad e ngiyal’ ney?

¹⁷ Yima fulweg taban e meybil rodad. I gaar Jesus: “En ni Chitamangiy e demturug e n’en ni gimed ra ning ngak u fithingag ma ra pi’ ngomed.” (John 15:16) Dariy e maruwar riy nri pi’ e re thin ney e athamgil nga laniyan’ e pi apostal rok Jesus! a Yugu aram rogon ndawor ri tamilang u wan’rad ni bayi yim’ Jesus, machane yam’ nra tay e gathi aram e be yip’ fan ndab kun ayuwegrad. Bay Jehovah nrayog ni nge fulweg taban e meybil rorad u nap’an ni yad ra ning e ayuw ngak ni nge ayuwegrad ni ngar rin’ed fare maruwel ni aram e ngar machibnaged murung’agen Gil’ilungun. Ma aram e n’en ni rin’, ya de n’uw nap’an nga tomuren ni yim’ Jesus, ma aram me fulweg Jehovah taban e meybil rorad ni yad be man ayuw ngak.​—Acts 4:29, 31.

¹⁸ Ku arrogodad e ngiyal’ ney. Faan gad ra athamgil ngad ululgad ko machib, ma aram e gad ra par ni gadad e fager rok Jesus. Maku reb e, rayog ni nge pagan’dad nra fulweg Jehovah taban e meybil rodad u nap’an ni gad ra ning e ayuw ngak ni nge ayuwegdad ni ngad gelgad nga boch e magawon ni gad ma mada’nag u nap’an ni gad be machibnag fare thin nib fel’ ni murung’agen Gil’ilungun Got. (2 Kor. 4:7) Ri gad be pining e magar ngak Jehovah ni bochan e ma fulweg taban e meybil rodad ma bay Jesus ni ir e fager rodad! Pi tow’ath ney ni ke pi’ Jehovah ngodad e aram e n’en ni ma pi’ gelngidad ya nge yag ni nga i yib wom’engidad.​—Jas. 1:17.

19. (a) Mang fan ni gad be ulul ko machib ni gad be tay? (b) Mang e be ayuwegdad ya nge yag nda mu’naged e maruwel ni ke pi’ Got ngodad?

¹⁹ Ere kad filed ko re article ney ni fan ni gad be ulul ko machib e bochan ni ngad pininged e sorok ngak Jehovah, ma gad tayfan e ngachal rok, ma gad dag nib t’uf Jehovah nge Jesus rodad, ma gad ginang e girdi’, ma gad dag nib t’uf e girdi’ rodad. Maku reb e, fare aningeg i tow’ath ni bay rodad ni aram e felfelan’, nge gapas, nge fager nib manigil, nge meybil rodad ni yima fulweg taban e ir e ma pi’ gelngidad ya nge yag nda mu’naged e maruwel rok Got. Dariy e maruwar riy nrib gel e felfelan’ ni ma tay Jehovah u nap’an nra i guydad ni gad be athamgil ya nge yag ni ‘yib wom’engidad ni pire’’!