1. Mang ni bay fan ni ngad felfelan’gad?

 RIB gel e felfelan’ ni gad be tay ni gad be guy rogon e mon’og ni be tay e pi tapigpig rok Got u ga’ngin yang e fayleng! Fa binem e duw e ra filed e Bible ngak 10,000,000 e girdi’. Re n’ey e be dag ni pi tapigpig rok Got e be gal ramaerad! Kum lemnag urngin e girdi’ nra uned ko Puguran nib pag bokum e milyon urngirad mar filed murung’agen e t’ufeg ni ke dag Got ngorad u nap’an ni pi’ fare biyul.​—1 John 4:9.

2, 3. (a) Mang reb e magawon ni bay nder yag ni nge talegdad ni nge dabi ‘gal ramaedad’? (b) Mang e gad ra weliy ko re article ney?

² Ba thilthil e thin ni ma yog e pi tapigpig rok Jehovah u ga’ngin yang e fayleng. Yugu aram rogon ma der talegdad e re n’ey ndab kud pininged e sorok ngak Jehovah ni Chitamangidad. (Rev. 7:9) Demtrug e thin rodad ara gin ni gad ma par riy, ma rayog ni nge ‘gal ramaedad’ u fithik’ e girdi’ nu fayleng.​—Fil. 2:15.

³ Rogon e mon’og ni gad be tay, nge taareban’ ni bay u thildad, nge rogon ni gad be tedan’dad ko tirok Got ban’en e gubin ni be pining e sorok ngak Jehovah. Re article ney e gad ra weliy riy rogon ni be yag ni ngad rin’ed e pi n’ey.​—Mu beeg e Matthew 5:14-16.

4, 5. (a) Mang yugu reb e kanawo’ nrayog ni nge gal ramaedad riy? (b) Mang angin nra yib ni faanra ud daged e sumunguy ko girdi’? (Mu guy e sasing ni bay u tabolngin e re article ney.)

⁴ “Dariy be’ nrayog ni nge par nib yul’yul’ ngak Somol e ngiyal’ ney ko tin tomuren e rran . . . ni faanra dabi guy rogon ni nge gal ramaen.” Ireray e n’en nnog u lan fare article ni kenggin e “Light in the Darkness,” ni bay ko fare Watch Tower ko June 1, 1925 ni thin ni Meriken. Ki ulul e re article nem ngay ni gaar: “Thingari rin’ e re n’ey ni aram e nge weliy fare thin nib fel’ ngak urngin e girdi’ nu fayleng me lek kanawoen e tamilang.” Ere ba tamilang nreb e kanawo’ ni nge gal ramaedad riy e aram e ngad machibnaged fare thin nib fel’ ma gad ayuweg e girdi’ ni ngar manged pi gachalpen Jesus. (Matt. 28:19, 20) Maku reb e, rayog ni ngad pininged e sorok ngak Jehovah u daken e ngongol rodad. Ma yaliydad e girdi’ u nap’an ni gad ma machib. Nap’an ni gad ra siminmin ngorad ma gad yog bbugithin nib fel’ ngorad, ma aram e rayog ni nge ayuwegrad e re n’ey ni ngar sapgad nga fel’ngidad nge fare Got ni gad be liyor ngak.

⁵ I gaar Jesus ngak pi gachalpen: “Faan gimed ra yan nga lan reb e naun me lungumed ngorad, Nge yib e gapas ngomed.” (Matt. 10:12) Pi binaw ni i machib Jesus nge pi apostal rok riy e ka bang ko yalen riy ni nge pining e girdi’ e milekag nga naun rorad. Ngiyal’ ney e boor e binaw ni gathi aray rogon e yalen riy. Yugu aram rogon ma faan ga ra dag e sumunguy ko girdi’ mag weliy fan ni kam man nga taferad, ma aram e rayog ni nge dab ra dabuyed ni kam man nga taferad, fa reb e war e damumuw rorad. Ba ga’ ni n’en nib fel’ ni ngad rin’ed ko som’on e aram e ngad siminmingad. Ba ga’ ni ireray e n’en ni ma rin’ e pi walag u nap’an ni yad be fanay e cart ni ngar wereged e babyor riy ko girdi’. Nap’an ni ga ra un ko machib ko biney e kanawo’, ma sana rayog ni ngam guy nib ga’ ni boor e girdi’ ni yad baadag ni ngar talgad ngar feked ba ken e babyor rodad ni faanra yad be guy ni gad be siminmin ara ka dogned bbugithin nib manigil ngorad. Faanra um ngongol u fithik’ e sumunguy, ma aram e rayog ni nge adag e girdi’ ni ngam nonad.

6. Uw rogon ni thilyeg ba wu’ e mabgol ni kar pilibthirgow rogon e machib ni yow ma tay?

⁶ Bay wu’ i mabgol u England ni kar pilibthirgow ndabkiyog ni ngar unew ko machib u mit e tabinaw ni bod rogon ni ur rin’ew kafram ni bochan e kar m’argow. Ere ra dugliyew ni ngar tew reb e tebel nga wuru’ e naun rorow ni bay boch e babyor riy nib puluw e thin riy ko Bible ko ngiyal’ ni ma yib e piin gallabthir ra feked pi fakrad u ba skul ni bay u tooben e gin ni yow ma par riy. Bay boch e gallabthir nra feked yu ken fare babyor ni Questions Young People Ask​—Answers That Work, Volume 1 nge 2 ni thin ni Meriken, nge yu ken e brochure ni bochan e yad baadag ni ngar nanged ko mang e bay riy. Boch nga tomuren ma aram me un reb e walag nib pin ko ulung rorow nib pioneer ngaur pied e yu ke babyor nem u taabang. I guy e pi gallabthir nem nre walag nib pin nem e ir be’ nib gol, maku arrogon e re wu’ i mabgol ney ni yow baadag ni ngar ayuwegew e girdi’. Bochan e re n’ey ma aram me m’agan’ bagayad ngay ni nge un ko fol Bible.

7. Uw rogon nrayog ni ngam ayuweg e girdi’ ni yad be mil ko nam rorad ngar bad ko nam rom?

⁷ Nap’an fapi duw ni ka fini yan, ma ke yoor e nam ni be yib boor e girdi’ ngay ni yad be mil ngar chuwgad ko nam rorad. Ere mang e rayog ni ngam rin’ ni ngam ayuweg e pi girdi’ ney ni ngar nanged Jehovah nge n’en nib m’agan’ ngay? Som’on e rayog ni ngam fil bbugithin ko thin rorad nrayog ni nga mog ngak bagayad u nap’an ni kam mada’nag. Ireray reb e ban’en nrayog ni nge ayuwegem fare app riy ni ka nog e JW Language ngay ni thin ni Meriken.  Maku reb e, rayog ni ngam fil in bug e thin ko thin rorad nrayog ni nga mog nra k’aringrad ni ngar adaged ni ngam nonad. Tomuren ma aram e rayog ni ngam dag boch e video ara yu ken e babyor ngorad ni bay ko jw.org ni kan pilyeg ko thin rorad.​—Deut. 10:19.

8, 9. (a) Mang boch ban’en ni yima ayuwegdad riy u nap’an e pi muulung u lan e wik? (b) Uw rogon nrayog ni nge ayuweg e piin gallabthir pi fakrad ni ngar mon’oggad u rogon ni yad ma pi’ e fulweg u nap’an e muulung?

⁸ Bochan ni gad ba t’uf rok Jehovah ma aram fan ni ke ngongliy rogon fare Muulung ni ka nog e N’en ni Gad Ma Rin’ nge Machib ni Gad Ma Tay ngay, ya nge yag nda mon’oggad ko machib ni gad be tay. Pi fonow ni yima pi’ ngodad u nap’an e re muulung ney e ke yag ni nge ayuweg boor i gadad ni nge dabki magagawon ni nga i sul ko girdi’ me tabab i fil e Bible ngorad.

⁹ Boor e girdi’ ni ka yad bbeech ko muulung ni yad ma ngat ko piin bitir u nap’an e muulung nga rogon e pi fulweg ni yad ma pi’. Ere gimed e piin gallabthir e ngam ayuweged pi fakmed ni nge gal ramaerad ni aram e ngam ayuweged yad ni ngar nanged rogon ni ngar pied e fulweg nrogon ni keb u gum’ircha’rad. Bay boch e girdi’ ni kar adaged ni ngkur nanged boch ban’en u murung’agen e tin riyul’ ni bochan rogon ni ma pi’ boch e bitir e fulweg nib mom ma ke yib u gum’ircha’rad.​—1 Kor. 14:25.

10. Uw rogon nrayog ni nge ayuweg e fol Bible ni tabinaw chon e tabinaw ni nge mon’og rogon e taareban’ u thilrad?

¹⁰ Ku reb e kanawo’ nrayog ni nge gal ramaedad riy e aram e ngad mon’ognaged e taareban’ u lan e tabinaw nge ulung rodad. Reb e kanawo’ nrayog ni nge rin’ e piin gallabthir e re n’ey riy e aram e ngar yarmiyed ni ngaur ted chon e tabinaw rorad e Fol Bible ni Tabinaw ni gubin ngiyal’. Bay boch e tabinaw ni bay ba ngiyal’ u lan reb e pul ni yad ma yaliy fare JW Broadcasting. Ere tomuren ni kam yaliyed chon e tabinaw rom e re video ney, ma  mang ndab mu ted e tayim ni ngam weliyed rogon ni ngam folgad ko pi n’en ni kan weliy riy? Nap’an ni be yarmiy reb e gallabthir e fol Bible ni tabinaw ma susun e dabi pagtalin nrayog nib thil e fonow nib t’uf ni nge fol reb e bitir riy ko fonow nib t’uf ni nge fol reb e fel’ yangaren riy. Ere mu guy rogon ni ngam ayuweg gubin e girdi’ u lan e tabinaw rom ya nge yag ni yib angin ngorad e pi n’en ni kan fil u nap’an e fol Bible ni tabinaw.​—Ps. 148:12, 13.

11-13. Uw rogon nrayog ni nge gubin e girdi’ u lan e ulung mar mon’ognaged rogon e taareban’ u lan e ulung mu kur ayuweged yugu boch e girdi’ ni nge gal ramaerad?

¹¹ Uw rogon nrayog ni nge mon’ognag e piin fel’ yangaren e taareban’ u lan e ulung, mu kur pied e athamgil nga laniyan’ e tin ni ka bay e girdi’ u lan e ulung ni nge gal ramaerad? Faanra gur reb e Kristiano ni kab fel’ yangarem, ma mang ndab mu nameg ni ngam m’ag fager ngak e pi walag ni pumoon nge ppin ni kar pilibthirgad? Sana rayog ni nga mog ngorad u fithik’ e tayfan ni nga rogned ngom boch ban’en ni ke buch rorad u lan e pi duw ni kar pigpiggad riy. Re n’ey e rayog ni nge pi’ e athamgil nga lanin’um, miki ayuwegem nge pi walag nem ni nge gal ramaemed. Gad gubin nrayog ni ngad nameged ni ngad nonad ngak e piin ni ka fin nra bad ko muulung nga Tagil’ e Liyor rodad, ma gad pining e magar ngorad. Faan ga ra rin’ e re n’ey ma aram e rayog ni ngam mon’ognag e taareban’ u lan e ulung, mu kum k’aring e piin ni ka fin nra bad ko muulung ni ngar adaged ni ngki gal ramaerad. N’en nrayog ni ngam rin’ e aram e ngam pining e magar ngorad, mag siminmin, mag ayuwegrad ni ngar pirieged bang ni ngar pared ngay. Mu guy rogon ni ngkur nanged owchen yugu boch e walag u lan e ulung ya nge dab kur magagawongad.

¹² Faanra ka nog ngom ni ngam yarmiy e muulung ni fan ko machib, ma rayog ni ngam ayuweg e pi walag ni kar pilibthirgad u rogon ni nge yag nra uned ko machib. Gur, bay bang nrayog ni ngan pi’ ngorad ni ngar machibgad riy, fa? Bay yu ngiyal’ nrayog ni ngan yarmiy ni ngar machibgad boch e walag ni yad bbitir ngorad u taabang nrayog ni ngar ayuweged yad ko yan u bang nga bang, nge ku boch ban’en nib t’uf rorad. Ku rayog ni ngan dag ni yi manang fan e magawon rok boch e walag ndabkiyog ni ngar rin’ed boor ban’en ni fan ko pigpig ni yad be tay ni bochan e m’ar ara yugu boch e magawon. Arrogon, faan gad ra dag ngak urngin e walag ndemtrug ko piin ni kab fel’ yangarrad, ara kar pilibthirgad, ara ke n’uw nap’rad ko pigpig ni yad be tay, ara ka fin nra tababgad ni gad be lemnagrad ma gad manang fan rarogorad, ma aram e rayog ni ngan ayuwegrad ni ngar machibnaged fare thin nib fel’ u fithik’ e pasig.​—Lev. 19:32.

¹³ I yog fare psalmist ni gaar: “Rib fel’ ma ba manigil, ni ngi i par e girdi’ rok Got u taabang nib taareb lungurad!” (Mu beeg e Psalm 133:1, 2, BT.) Bochan ni ma chag piyu Israel u taabang, ma aram fan nrayog ni nge yib angin ngorad e pi n’en nib fel’ ni ku be rin’ yugu boch i yad ni be liyor ngak Jehovah. Re n’em e bod rogon e gapgep ni fen e mathiy nib fel’ bon ma ma munguynag dowey. Ere ku arrogodad nrayog ni ngaud daged e ngongol nib fel’ nge sumunguy ngak pi walagdad, ya nge yag nda pied e athamgil nga lanin’rad. Re n’ey e rayog ni nge mon’ognag e taareban’ u lan e ulung. Machane gur, rayog ni ngam guy rogon ni ngkum nang e pi walag u lan e ulung nib fel’ rogon, fa?​—2 Kor. 6:11-13.

14. Uw rogon ni nge gal ramaem ko gin ni ga ma par riy?

¹⁴ Uw rogon e bin ni ngam guy rogon ni nge gal ramaen e tin riyul’ u Bible ko gin ni ga ma par riy? Thin ni ga ma yog nge ngongol ni ga ma dag u fithik’ e gol nge sumunguy e rayog ni nge k’aring reb e buguli yoror rom ni nge adag e tin riyul’. Ere mu fithem ni nge lungum: ‘Mang e ma lemnag e piin buguli yoror rog u murung’ageg? Gu ma guy rogon  ni nga i par e tabinaw nge chugum rog nib beech, ya nge yag ni par e binaw rog nib fel’ thin, fa? Ma gu ma guy rogon ni nggu ayuweg e girdi’, fa?’ Nap’an ni gimed be sabethin yugu boch e walag, ma rayog ni ngam fith ngorad ko uw rogon ni ke yag ni nge yib angin e gol, nge sumunguy, nge ngongol nib fel’ ni yad ma dag ngak e girdi’ rorad, nge piin buguli yoror rorad, nge piin ni yad nga maruwel nge skul. Ba mudugil ni bay boch ban’en ni ke buch rorad nrayog ni ngar weliyed ngom nra pi’ e athamgil nga lanin’um.​—Efe. 5:9.

15. Mang nib ga’ fan ni ngad pared ni kad fal’eged rogodad?

¹⁵ Faanra gad baadag ni ngaud pared ni be gal ramaedad, mab t’uf ni nge tamilangan’dad u rarogon e ngiyal’ ney ni gad be par riy. Bay in yay ni yog Jesus ngak pi gachalpen ni gaar: “Mu fal’eged rogomed ngam pired.” (Matt. 24:42; 25:13) Ere ba tamilang ni faanra gad be lemnag ni kab n’uw nap’an mfini yib fare “gafgow” nib ga’, fa reb e sana dabi yib ko ngiyal’ ni ka gad ba fos, ma aram e rayog ni ngad malmalgad ko machib. (Matt. 24:21) N’en nra buch e aram e ra munmun ma dabki gal ramaedad ko gin ni gad ma par riy. Re n’ey e ra bod rogon ba magal ni be talablab me munmun me math.

16, 17. Mang e rayog ni ngam rin’ ya nge yag nim par ni kam fal’eg rogom?

¹⁶ Chiney ni be gel e kireb u gubin ban’en e gad gubin nib t’uf ni ngad pared ni kad fal’eged rogodad. Machane, gad manang nra taw ko ngiyal’ ni ke  dugliy Jehovah ni nge yib e tomur, ma ra yib ndariy e maruwar riy. (Matt. 24:42-44) Machane chiney ni gad be sonnag e re ngiyal’ i n’em e ngam gum’an’nagem, mag par ni kam fal’eg rogom. Um beeg e Thin rok Got ni gubin e rran, mu um tiyan’um ko meybil. (1 Pet. 4:7) Mu fil ban’en rok e pi walag ni ke n’uw nap’an ni yad be pigpig u fithik’ e felfelan’, ma yad be par ni kar fal’eged rogorad, maku be gal ramaerad. Bagayad e pi walag ney e bay murung’agen ko fare article ko Fare Wulyang ko Damit ni kenggin e “Seventy Years of Holding On to the Skirt of a Jew” ni thin ni Meriken ko April 15, 2012, ko page 18-21.

¹⁷ Mu fanay e tayim rom ni fan ko pigpig ngak Jehovah, mag rin’ boch ban’en ni fan ngak boch e girdi’, mu um chag ko pi walag u lan e ulung. Faan ga ra rin’ ni aray rogon, ma aram e ga ra felfelan’ mag lemnag ni be yan e tayim nib papey. (Efe. 5:16) Nap’an fare raay i duw ni ke yan, ma boor ban’en ni ke yag ni nge rin’ pi walagdad. Machane chiney e kki yoor boch ban’en ni be yag ni ngad rin’ed u tan gelngin e ayuw rok Jehovah. Bin riyul’ riy e, kari gel ramaedad e ngiyal’ ney ni ke thil nga rogon ni ud lemnaged ko som’on.

18, 19. Uw rogon nrayog ni nge ayuwegdad e piin piilal ni ngad pigpiggad ngak Jehovah u fithik’ e pasig? Mu weliy ban’en ni ke buch.

¹⁸ Yugu aram rogon ndawor da flontgad, machane der talegdad e re n’ey ndab kud pigpiggad ngak Jehovah u rogon nib m’agan’ ngay. Ireray reb e ban’en ni ma gelnag e michan’ rodad. Ere, nge ga’ fan u wan’um e “pi pumoon ni tow’ath” ni ke pi’ Jehovah ngodad ni aram e piin piilal u lan e ulung. (Mu beeg e Efesus 4:8, 11, 12, NW.) Ere yay ni migid nra yib e piin piilal ra guyed gur, mag guy rogon ni nge yib angin e gonop rorad ngom mag fil ban’en riy.

¹⁹ Bod ni, bay ba wu’ i mabgol u England ni ur mada’nagew boch e magawon u lan e mabgol rorow, ma aram ma rognew ngak l’agruw e piilal ni ngar ayuwegew yow. Fare pin e i lemnag ni pumoon rok e der rin’ e n’en nib milfan ngak ni ir lolugen e tabinaw. Ma fare pumoon e yog ni gathi ir e bin th’abi fel’ e sensey ni bay, maku der yag ni nga i yarmiy rogon e fol Bible ni tabinaw. Ere weliy e piin piilal murung’agen Jesus ngak fa wu’ i mabgol. Jesus e i ayuweg pi gachalpen mi i lemnag e tin nib t’uf rorad. Ere pi’ fa gal piilal e athamgil nga laniyan’ fare pumoon ni nge folwok rok Jesus. Kur piew e athamgil nga laniyan’ fare pin ni nga i gum’an’nag ir. Kur piew boch e fonow nib manigil ko re wu’ i mabgol nem nra ayuwegrow ni ngar maruwelgow u taabang, ya nge yag nra ted gal fakrow e fol Bible ni tabinaw u taabang. (Efe. 5:21-29) Boch nga tomuren ma aram me pining fa gal piilal e magar ngak fare pumoon ko athamgil ni be tay. Ra piew e athamgil nga laniyan’ ni nge guy rogon ni nge athamgil me taga’ nga gelngin Got nib thothup ni nge ayuweg ya nge yag ni mang e en lolugen e tabinaw nib manigil. Bochan e ayuw ni ke pi’ e gal piilal ney ko re tabinaw ney u fithik’ e t’ufeg, ma aram e n’en ni ke ayuwegrad ni nge gal ramaerad.

20. Mang angin nra yib ngom ni faanra i gal ramaem?

²⁰ I tangnag fare psalmist ni gaar: “Ba felan’ e piin yad ma fol rok Somol, ni yad ma par nrogon ni ke yog.” (Ps. 128:1, BT) Faanra i gal ramaem ni aram e ngam ayuweg boch e girdi’ ni ngkur pigpiggad ngak Got, mag guy rogon ni nge mon’og e taareban’ u thilmed yugu boch e girdi’, mag fal’eg rogom ngam par, ma aram e ra gel e felfelan’ rom. Ra guy yugu boch e girdi’ e tin nib fel’ ni ga be rin’ ma yad ra adag ni ngkur pininged e sorok ngak Jehovah ni Chitamangidad.​—Matt. 5:16.