GAD be par u ba fayleng ni boor ban’en riy ni ma k’aring e mochuch ko girdi’. Ere ba mo’maw’ ni ngad pirieged e gapas. Mus ni faanra bay buchuuw e gapas rodad, machane ba mom ni nge chuw. Mang e be yog e Bible nra ayuwegdad ni ngad pirieged e bin riyul’ e gapas nra par ndabi chuw? Ma uw rogon ni ngad ayuweged yugu boch e girdi’ ni ngar pirieged e re gapas ney?

Ra nge yag e bin riyul’ e gapas ngodad, ma aram e ba t’uf ni nge pagan’dad ma gad par ndabi buch ban’en rodad. Ba t’uf ni nge yag boch e fager nib manigil ngodad, ma bin th’abi ga’ fan riy e, ba t’uf ni ngad chugurgad ngak Got. Uw rogon ni ngad rin’ed e re n’ey?

Pi motochiyel nge kenggin e motochiyel rok Jehovah e gubin ngiyal’ ni ma yib angin ngodad. Faan gad ra fol riy, ma aram e gad be dag nib pagan’dad ngak Jehovah ma gad baadag ni nge fel’ e tha’ u thildad. (Jer. 17:7, 8; Jas. 2:22, 23) Faan gad ra rin’ ni aray rogon, ma aram e ra chugur Jehovah ngodad me ayuwegdad ni nge gapas lanin’dad. Be gaar e Isaiah 32:17 (NW): “Angin e ngongol nib mat’aw e aram e gapas nge pagan’ ndariy n’umngin nap’an.” Faanra ud folgad rok Jehovah nib m’agan’dad ngay, ma aram e rayog ni ngad pirieged e bin riyul’ e gapas.​—Isa. 48:18, 19.

Ku bay reb e tow’ath nib manigil ni ke pi’ Jehovah nra ayuwegdad ni nge yag e gapas ngodad nra par ndariy n’umngin nap’an. Re tow’ath ney e aram gelngin nib thothup.​—Acts 9:31.

I yog apostal Paul ni gapas e aram bang u “wom’engin gelngin Got nib thothup.” (Gal. 5:22, 23, NW) Gelngin Got nib thothup e ma yibnag e gapas ngodad, ere aram fan nib t’uf ni ngad paged ni nge pow’iydad. Uw rogon ni ngad rin’ed e re n’ey?

Som’on e ba t’uf ni ngaud beeged e Thin rok Got ni gubin ngiyal’. (Ps. 1:2, 3) Nap’an ni gad be fal’eg i lemnag e n’en ni gad be beeg, ma aram e ra ayuwegdad gelngin Got nib thothup ni ngad nanged fan rogon e lem rok Jehovah u murung’agen boch ban’en. Bod nrayog ni ngad filed rogon ni ma par Jehovah ni bay e  gapas rok nge fan nib ga’ fan e gapas u wan’. Nap’an ni gad ra fol ko n’en ni kad filed u Bible, ma aram e rayog ni ngaud pared ni bay e gapas rodad.​—Prov. 3:1, 2. 

Bin migid e thingar ud yibilayed gelngin Got nib thothup. (Luke 11:13) Ke micheg Jehovah ngak e piin ni yad ra ning e ayuw ngak ni gaar: “Gapas rok Got ndabi chuchugur ni nge nang e girdi’ fan e ra yororiy gum’ircha’med nge tafinay romed ngi i par rok Kristus Jesus.” (Fil. 4:6, 7) Faan gad ra par ni gad ba chugur ngak Jehovah, ma gad taga’ nga gelngin nib thothup, ma aram e ra pi’ e bin riyul’ e gapas nga lanin’dad.​—Rom. 15:13.

Boor e girdi’ ni ke yag ni nge ayuwegrad e thin nu Bible ni ngar thilyeged rogon e par rorad. Bochan e re n’ey ma aram fan ni ke yag ni nge gapas thilrad Jehovah, ma ke gapas lanin’rad, miki gapas thilrad yugu boch e girdi’. Uw rogon ni ke yag ni ngar thilyeged e ngongol rorad?

Bay boch i walagdad nu m’on ni ngar uned ko tin riyul’ ma yad boch e girdi’ ni yad ba damumuw maku yad ba ta cham. Machane, ba gel e athamgil ni kar ted ya nge yag nra thilyeged e ngongol rorad. Ere chiney e ke yag ni ngar golgad, mar gum’an’naged yad, mar pared nib aw e gapas u thilrad e girdi’. a (Prov. 29:22) Mu guy rogon ni ke yag rok reb e walag ni pumoon ni ka nog David ngak nge reb e walag nib pin ni ka nog Rachel ngak ni ngar thilyegew e pi n’ey u rarogorow.

U m’on ni un David ko tin riyul’, ma yugu ma gathibthibnag yugu boch e girdi’ mab gel e thin ni ma yog ngak chon e tabinaw rok. Machane, boch nga tomuren ma aram me nang nib t’uf ni nge thilyeg ir. Ere uw rogon ni ke yag ni nge pirieg e gapas? I yog ni gaar, “Gu tabab ni nggu fol ko pi kenggin e motochiyel u Bible, ma angin ni yib riy e yag ni nggu tayfan e girdi’ u lan e tabinaw rog miki yag ni ngar ted fag.”

Rachel e af rarogon e girdi’ ngak ko gin ni ilal riy. I weliy ni gaar, “Mus ko chiney ma bay e magawon rog ko damumuw ni bochan e gu ilal u reb e tabinaw nib damumuw e girdi’ riy.” Ere mang e ke ayuweg Rachel ni nge pirieg e gapas? I yog ni gaar: “Gu ma taga’ ngak Jehovah u daken e meybil.”

 David nge Rachel e kemus ni l’agruw ni’ u fithik’ boch e piin ni yad be par e chiney u fithik’ e gapas ni bochan e yad be fol ko pi kenggin e motochiyel u Bible ma yad be taga’ nga gelngin Got nib thothup. Yugu aram rogon ni gad be par u ba fayleng nib damumuw e girdi’ riy, machane rayog ni ngad pared nib gapas lanin’dad. Re n’ey e ra momnag ngodad ni nge fel’ thildad chon e tabinaw rodad nge pi walagdad u lan e ulung. Machane, be yog Jehovah ngodad ni ngad ‘pired ni ba aw e gapas u thildad nge urngin e girdi’.’ (Rom. 12:18) Machane gur, rayog ni ngad rin’ed e re n’ey? Ma mang fan nsusun e ngad guyed rogon ni nge aw e gapas u thildad e girdi’?

Nap’an ni gad ra yan ko machib, ma gad ma machibnag ba thin nra fek e gapas i yib ni murung’agen Gil’ilungun Got. (Isa. 9:6, 7; Matt. 24:14) Boor e girdi’ ni yad baadag ni ngar motoyilgad ko re thin ney ma ke m’agan’rad ngay. Ere angin ni ke yib riy, e dakurur lemnaged ndakuriy e athap rorad nga bang ara ur pared ni yad ba damumuw ni bochan e pi n’en ni be buch ko re fayleng ney. Chiney e ke yag e athap ngorad ni fan ko gabul nge langlath, ma bochan e re n’ey ma aram fan ni yad baadag ni ngar athamgiliyed ni nge yag e “gapas” ngorad.​—Ps. 34:14.

Yugu aram rogon ma gathi gubin e girdi’ ni yad ra rung’ag e machib rodad ko som’on e yad ra adag ni ngar motoyilgad ngay. (John 3:19) Demtrug ko ra motoyil e girdi’ fa danga’, machane ra pi’ Got gelngin nib thothup ngodad. Re gelngin nem e ra ayuwegdad ni ngad pared ni gad ba gapas ma gad dag e tayfan u nap’an ni gad be machib. Faan gad ra rin’ ni aray rogon, ma aram e gad be fol ko fare fonow ni pi’ Jesus ni be gaar: “Faan gimed ra yan nga lan reb e naun me lungumed ngorad, Nge yib e gapas ngomed. Faanra ba adag e girdi’ u lan fare naun ni kam marod ngorad, mi gimed pag e gapas ni ka mogned nge par; ma faanra daburad ni kam marod ngorad, mi gimed fulweg murung’agen e gapas ni ka mogned.” (Matt. 10:11-13) Faanra ud lemgad ni aray rogon, ma yugu demtrug e n’en ni ke yog ara ke rin’ be’ ngodad ma gad ra par ni gad ba gapas. Maku reb e, ra ud pared ma gad be lemnag ndabisiy nra boch nga m’on ma ra mab e kanawo’ ngodad ni ngad ayuweged e pi girdi’ nem.

Ku gad ma mon’ognag e gapas u thildad e girdi’ u rogon ni gad ma non ngak e pi tayugang’ ko am u fithik’ e tayfan ni mus ni faanra yad be togopuluw ko maruwel rodad. Bod ni, immoy reb e nam u Africa nda i pag e am e pi walag ni ngar toyed e pi Tagil’ e Liyor rodad riy. Machane, manang e pi walag u rom nsusun e ngar guyed rogon ni ngar pithiged e re magawon ney u fithik’ e gapas. Ere ra pied reb e walag ni pumoon ni i mang missionary ko re nam nem kafram ni nge yan i guy e en ni ir e High Commissioner ara reb e tayugang’ ko am ko re nam nem ni ma maruwel u London u England ni nge weliy ngak murung’agen e maruwel ni ma rin’ e Pi Mich Rok Jehovah u fithik’ e gapas.

I yog e re walag nem ni gaar: “Nap’an nug wan ko reception desk ara gin ni bay e en ni ma ayuweg e girdi’ ni ka ranod ko re ofis nem riy, ma aram mug nang u rogon e munmad ko re ppin nem ni be maruwel u rom ni ir bagayad e pi girdi’ ni baaram ni kug fil e thin rorad. Ere gu non ngak ko thin rok. Ri gin e re ppin nem, ma aram me fitheg ni gaar, ‘Mang fan ni ka mub e ngaray?’ Ma aram mu gog ngak u fithik’ e sumunguy ni gu baadag ni ngguy e en ni ir e High Commissioner. Ere callnag fare tayugang’, ma aram me yib nga wen ni nggu mada’gow miki non ngog ko thin rok. Tomuren e re n’ey, ma aram me motoyil ngog u nap’an ni gu be weliy ngak rogon e maruwel ni ma rin’ e Pi Mich u fithik’ e gapas.”

Tomuren ni rung’ag fare tayugang’ e n’en ni yog e re walag rodad ney, ma aram me yag ni nge nang boch ban’en u murung’agen e maruwel rodad miki yag ni nge war e laniyan’ ni i tay kafram. Boch nga tomuren, ma aram me thilyeg e re am nem e n’en ni kar dugliyed ma aram me yag ni ngar paged e Pi Mich Rok Jehovah ni ngaur toyed e pi Tagil’ e Liyor rorad u rom. Kari felfelan’ e pi walag u rom! Ere ba tamilang ni faanra ud ted fan e girdi’ ma aram e rayog ni ngad mon’ognaged e gapas u thildad.

Ngiyal’ ney e bay e girdi’ rok Jehovah u lan fare paradis ni be yip’ fan ban’en, ma yad be liyor ngak u fithik’ e gapas. Gad gubin nrayog ni ngad mon’ognaged e re gapas ney ni aram e ngad guyed rogon ni ngki yib e gapas nga lan e yafos rodad. Faan gad ra rin’ ni aray rogon, ma aram e rayog ni ngad fel’gad u wan’ Jehovah. Ma nap’an ni gad ra yan nga lan e bin nib beech e fayleng, ma aram e ra pi’ ngodad e gapas nra par ndariy n’umngin nap’an.​—2 Pet. 3:13, 14.