Rogon ni Ngam Fil e Bible u Reb e Kanawo’ Nra Yib Angin Mag Felfelan’ Ngay

PLAY

KAN pi’ reb e maruwel ngak Joshua nrib mo’maw’ ngak. Re maruwel nem e aram e nge pow’iy fare nam nu Israel nga lan fare Nam ni Kan Micheg ni yugu aram rogon ni boor e magawon nib ga’ ni yad ra mada’nag. I yog Jehovah ngak ni gubin ban’en nra rin’ ma ra fel’, ngemu’ miki pi’ e athamgil nga laniyan’. I gaar ngak: ‘Ngam gelnigem, ma ri dab mu rus. Nguum fol u urngin fapi Motochiyel rog. Um fil ni rran nge nep’, mu um rin’ urngin ban’en ni ba’ riy ni kan yoloy. Ma pi n’en ni ga ra lemnag ngam dugliy e ra fel’, ma yira rin’ ma ra yan i fel’.’—Josh. 1:7, 8.

Ngiyal’ ney ni gad bay ko ‘tin tomren e rran ni kari mo’maw’’ e par e ku gad ma mada’nag boch e magawon nib ga’. (2 Tim. 3:1) Machane, faan gad ra fol ko fonow ni pi’ Jehovah ngak Joshua, maku rayog ni nge fel’ urngin ban’en ni gad be rin’ ni bod ir. Ere, ba t’uf ni ngaud beeged e Bible ni gubin e rran, ma gad fal’eg i fanay e pi kenggin e motochiyel ni gad be fil riy ko pi magawon ni gad ma mada’nag.

Machane, sana bay boch i gadad nde nang rogon ni nge fol Bible ara gathi ri baadag ni nga i fil e Bible ni goo ir. Yugu aram rogon, ma rib ga’ fan ni ngaud ted e fol Bible ni goo gadad. Ere mu beeg e thin ni bay ko fare kahol ni kenggin e “ Mu Gay Rogon ni Ngam Rin’ e Pi N’ey,” ya be weliy boch ban’en nrayog ni nge ayuwegem ni nge yib angin e fol Bible ni ga ma tay mu kum adag.

I tang fare psalmist ni gaar: “Mu yal’uwegeg nguug fol ko tin ka mog ni ngan rin’ [“mu pow’iyeg u kanawoen e pi motochiyel rom,” NW], ya fithik’ e pi n’em e gu ma pirieg e felfelan’ riy.” (Ps. 119:35, BT) Ku arrogom nrayog ni ngam felfelan’ u nap’an ni ga be fil e Thin rok Got. Faan ga ra ulul ngaum fil e Bible ma boor ban’en riy nrib manigil ni ga ra pirieg.

Yugu aram rogon nde t’uf ni ngam pow’iy reb e nam ni bod rogon ni rin’ Joshua, machane bay boch e magawon ni ga ma mada’nag. Ere um fil ma ga be fol ko pi n’en ni kan yoloy nga lan e Thin rok Got ya nge yag ni yib angin ngom, ni bod rogon Joshua. Faan ga ra rin’, ma aram e ku ra fel’ urngin ban’en ni ga be rin’ me yag nim ngongol u fithik’ e gonop.

MU GAY ROGON NI NGAM RIN’ E PI N’EY

Mmeybil u m’on ni ngam tabab ko fol Bible. Lem rok Got ni gubin ma rayog rok e ir e bay u lan e Bible, ma ke tay e pi n’ey ngaram ni nge yib angin ngom. Ere u m’on ni ngam beeg e Bible, mag meybil ngak ni nge ayuwegem ni ngam nang fan e thin riy, me par u lanin’um, mag fanay nga lan e yafos rom.—Ezra 7:10.
Mu fithem u boch e deer u nap’an ni ga be beeg e Bible ara boch e babyor rodad ni kan ngongliy nib puluw e thin riy ko Bible. Mu fithem ni nge lungum: ‘Mang e be fil e re n’ey ngog u murung’agen Jehovah? Uw rogon nib l’ag rogon e re n’ey nga kenggin e machib u lan e Bible? Uw rogon nrayog ni nggu fanay e pi n’ey ni nggu ayuweg boch e girdi’ ngay?’
Mu fal’eg i lemnag e n’en ni ga be fil. Mu tal ko beeg, mag lemnag e pi deer ni baaray ni be gaar: ‘Uw rogon e re n’ey u wan’ug? Mang fan ni be k’aringeg ni nggu lem ni aray rogon? Mang rogon e re n’ey ko pi n’en ni ka i buch rog kafram, nge n’en ni be buch rog e chiney, nge n’en nrayog ni nge buch rog boch nga m’on? Uw rogon nrayog ni nggu fanay e pi kenggin e motochiyel nge pi fonow ney ni kan fek u Bible nga lan e yafos rog?’ (Job 23:5; Ps. 49:3) Nap’an ni ga be fal’eg i lemnag boch ban’en, mag guy ko rayog ni ngam weliy fan ni ke yog Jehovah ko girdi’ rok ni ngar siyeged boch e ngongol fa dabiyog. Fa reb e mu lemnag e n’en nrayog ni nge buch rok facha’ ni ga be beeg murung’agen ni faan gomanga ba thil e n’en ni rin’.—Deut. 32:28, 29.
Mu susunnag boch ban’en u lanin’um u nap’an ni ga be beeg bang u Bible ni be weliy murung’agen ban’en ni buch. Bod ni gur, rayog ni ngam susunnag u lanin’um e n’en ni buch u nap’an ni chel fapi pumoon ni walagen Josef ngar pied ni chuway’ ngak bogi ni’ ni ka nog e Ishmaelite ngorad, fa? (Gen. 37:18-28) Mang e ga be guy, ara ga be rung’ag, ara ga be farabon? Mu susunnag ni ga bay rorad. Mang e yad be lemnag ara yad be thamiy? Faan ga ra susunnag boch ban’en u lanin’um, ma aram e rayog ni nge yib angin e fol Bible ni ga be tay mag felfelan’ ngay.
Mu fanay boch ban’en ni ke ngongliy e ulung rodad nrayog ni nge ayuwegem ni ngam adag ni ngarim gay murung’agen e pi n’en ni ga be fil. Mu fil rogon i fanay e pi n’en ni kan ngongliy ni bay u online ara yu ken e babyor ni kan printnag ni kan pilyeg ko thin rom. Dab mu magagawon ni nga mog ngak boch e walag ni ngar filed ngom rogon ni ngam fanay e pi n’ey nib fel’ rogon. Bod ni, fare Watch Tower Publications Index ara fare Research Guide for Jehovah’s Witnesses ni thin ni Meriken e ra ayuwegem ni ngam pirieg boch ban’en ni kan yoloy u murung’agen boor ban’en ko machib rodad, nge fan boch e thin nu Bible. Ku rayog ni ngam fanay fare ke babyor ni kenggin e Boch Ban’en Nra Ayuwegdad u Nap’an e Fol Bible. Re ke babyor ney e bay boch ban’en riy u murung’agen e pi nam ni bay fithingan u lan e Bible, nge ngiyal’ ni buch boch ban’en, nge rogon i fek tomalngin ban’en nge rogon i foleg ban’en, nge ku boch ban’en.
Mu sul u daken e pi n’en nib ga’ fan ni bay ko n’en ni kam fil ya nge yag ni par u lanin’um. Ma bin th’abi fel’ riy e ngam weliy e pi n’em ngak yugu boch e girdi’. Gur, bay ban’en riy nrayog ni ngam fanay u nap’an e machib? Faan ga ra rin’ ni aray rogon, ma gathi kemus nra ayuwegem ni nge dab mu pagtalin e pi n’en nib ga’ fan ni kam fil, ya ku aram e ga be fanay e pi n’en ni kam fil ni ngam ayuweg yugu boch e girdi’ ngay.

FARE WULYANG KO DAMIT—KEN NGAN FIL