NAP’AN ni fil Jesus ngak pi gachalpen rogon ni ngar machibnaged fare thin nib fel’, ma aram me yog ngorad ni gathi gubin e girdi’ ni yad ra adag ni ngar motoyilgad ngay. (Luke 10:3, 5, 6) Nap’an ni gad ra yan ko machib, ma rayog ni ngad mada’naged boch e girdi’ ni yad ma yog e thin nib kireb ngodad ara ra gafgownaged gadad. Riyul’ ni mit ney e ngongol e rayog ni nge mo’maw’nag ngodad ni ngad runguyed e piin ni gad be machibnagrad.

Be’ ni ma runguy e girdi’ e ma guy e n’en nib t’uf rok yugu boch e girdi’ nge magawon rorad, maku ma runguyrad, ma baadag ni nge ayuwegrad. Machane, faan gad ra tabab ni nge dab kud runguyed e girdi’ ni gad ma mada’nag u nap’an e machib, ma aram e rayog ni ngad malmalgad ko machib ma dabkiyog ni ngad ayuweged e girdi’. Rayog ni ngad taareb rogonnaged e pasig ni gad ma tay ko nifiy. Faanra nge par ba nifiy ni be daramram, ma aram e ba t’uf ni ngan tay boor e l’ud ngay. Ku arrogon ni faanra ngad pared ni gad ba pasig, ma aram e ba t’uf ni ngaud daged e runguy!​—1 Thess. 5:19.

Ere uw rogon ni ngad nanged rogon ni ngaud daged e runguy ngki mada’ ko ngiyal’ nib mo’maw’ ni ngad rin’ed? Ngad weliyed murung’agen dalip ni’ nib fel’ ni ngad folwokgad rok ni aram Jehovah, nge Jesus, nge apostal Paul.

Ke yan bokum biyu’ e duw ni be k’adan’ Jehovah u puluwon e piin ni yad be darifannag e ngachal rok. Yugu aram rogon, ma ma “gol ngak e piin ndarir pininged e magar ngak nge piin nib kireb.” (Luke 6:35) Rogon feni gum’an’ e ir e be m’ug riy feni rib gol. Baadag Jehovah ni nge “urngin” mit e girdi’ me yag e yafos ngorad. (1 Tim. 2:3, 4) Yugu aram rogon nib fanenikan Got e tin nib kireb ban’en, machane ba ga’ fan e girdi’ u wan’ ma dabun ni nge guy be’ ni ke yim’.​—2 Pet. 3:9.

Manang Jehovah nrib salap Satan i k’aring e girdi’ ni nge mich u wan’rad boch ban’en nde riyul’. (2 Kor. 4:3, 4) Boor e girdi’ e ka nap’an ni ka yad bbitir ma aram min tabab i fil ngorad boch e machib nge lem nde puluw. Ere aram fan nib mo’maw’ ni ngar adaged e tin riyul’. Ri baadag Jehovah ni nge ayuweg e pi girdi’ ney. Uw rogon ni kad nanged e re n’ey?

Am lemnag rogon ni i lemnag Jehovah piyu Nineveh kakrom. Yugu aram rogon ni yad boch e girdi’ ni yad baadag e cham, machane me gaar Jehovah ngak Jonah: “Gur gathi ngar gu runguy yu Nineveh nib binaw nib ga’ nib pag 120,000 e girdi’ riy ndar nanged e n’en nib thil u thilin e tin nib fel’ nge tin nib kireb?” (Jonah 4:11, NW) I runguy Jehovah piyu Nineveh ni bochan e dar nanged e tin riyul’ u murung’agen. Ere aram fan ni l’og Jonah ni nge yan i ginangrad.

Ba ga’ fan e girdi’ u wan’dad ni bod rogon Jehovah. Ere rayog ni ngad folwokgad rok ni aram e ngad pasiggad i guy rogon ni ngad ayuweged e piin ni gomanga yad ra motoyil, ni mus ni faanra gad be lemnag nsana dab ra adaged e tin riyul’.

Jesus e ku bod e Chitamangin ya i kireban’ ngak e piin nib t’uf e ayuw rorad ko tirok Got ban’en. “Faani guy e pi girdi’ nem ni aram urngirad, me taganan’ ngorad, ya kar pired ni ke magafan’rad ndar nanged e n’en ni ngar rin’ed, ya yad bod e saf nde moy rorad e en ni ma gafaliyrad.” (Matt. 9:36) Manang Jesus fan ni aram rogon e pi girdi’ nem. Manang ni piin ni kar bad ni ngar motoyilgad ngak e i gafgownagrad e pi tayugang’ ko teliw maku yad be fil boch e machib nde riyul’ ngorad. Yugu aram rogon ni manang ni boor e girdi’ ni yad ra pag boch e magawon ni nge talegrad ndab ra manged boch i gachalpen, machane ki ulul i fil “boor ban’en” ngorad.​—Mark 4:1-9.

Nap’an nra dabi motoyil e girdi’ ko machib ni gad be tay, ma aram e ba t’uf ni ngad guyed rogon ni ngad nanged fan ni dubrad ni ngar motoyilgad. Sana boch i yad e bay boch ban’en nde puluw u wan’ u murung’agen e Bible ara teliw ni Kristiano ni bochan boch ban’en nib kireb ni  ma rin’ e piin ni yad ma yog ni yad e Kristiano. Maku reb e, sana bay boch i yad ni ka nog boch ban’en ngorad nde riyul’ u murung’agen e pi n’en ni ke michan’dad ngay. Ma boch i yad e sana yad be magar nri moningnagrad e girdi’ u lan binaw ara girdi’ rorad ni faan yad ra non ngodad.

Sana bay boch e girdi’ ni gad ma mada’nag u nap’an e machib ni yad ma togopuluw ni bochan e ke buch boch ban’en rorad ni kari kirebnag lanin’rad. I yog reb e missionary ni ka nog Kim ngak ni gaar: “Bay bang ko gin ni gamad ma machib riy ni boor e girdi’ riy nra mageygad ni yad ba fos u tomuren reb e mahl nni tay, ma gubin e chugum nge ku boch ban’en ni immoy rorad ni mul u pa’rad u tan e re mahl nem. Dariy ban’en nri be l’agan’rad ngay ni fan ko gabul nge langlath. Ke ngochngochan’rad ma dakir pagan’rad ngak be’. Ba ga’ ni gamad ma mada’nag e girdi’ ko gin’ey ni gamad ma machib riy ni yad ma togopuluw ko machib rodad. Immoy bayay ni yog be’ boch e thin nib kireb ngog me guy rogon ni nge lieg.”

Uw rogon ni ulul Kim nga i dag e runguy ni yugu aram rogon nib kireb e ngongol ni be rin’ e girdi’ ngak? I yog ni gaar: “Nap’an ni yira togopuluw ngog, ma gu ma guy rogon ni nggu lemnag fare thin ni bay ko Proverbs 19:11 (BT) ni be gaar: ‘Faanra gur be’ ni ga ba filmunguyan’, ma rayog ni ngam filan’um ko damumuw rom.’ Nap’an ni gu ra lemnag e n’en ni i buch ko girdi’ ko gin ni gu ma machib riy, ma ma ayuwegeg ni nggu dag e runguy ngorad. Bin riyul’ riy e, gathi gubin e girdi’ ni gamad ma mada’nagrad ni yad ba damumuw. Bay boch e girdi’ ni gamad ma sul ngguyed yad ko gin’em ni gamad ma machib riy ni yad baadag e machib.”

Sana rayog ni nge bagadad me fith ir ni nge gaar, ‘Faanra gag bagayad e pi girdi’ nem ni yibe machibnag, ma mang e gu ra rin’ u nap’an ni gu ra rung’ag fare thin nib fel’ ni murung’agen Gil’ilungun Got?’ Bod ni, uw rogon ni faanra ke yoor yay ni yugu yibe yog boch ban’en ngodad nde riyul’ ni murung’agen e Pi Mich Rok Jehovah? Dabisiy ni ku dab da adaged ni ngad motoyilgad ko machib ni yibe tay, maku ra t’uf ni ngan runguydad. Faan gad ra lemnag fare thin ni tay Jesus chilen ni aram e ngad rin’ed ko girdi’ e n’en ni gad baadag ni ngan rin’ ngodad, ma aram e rayog ni ngad guyed rogon ni ngad nanged fan laniyan’ e girdi’ ma gad gum’an’ u puluwrad ni yugu aram rogon nib mo’maw’ ni ngad rin’ed.​—Matt. 7:12.

I runguy Paul e piin ni yad ma togopuluw ko machib ni i tay maku yad be guy rogon ni ngar lied. Mang fan? Bochan e da i pagtalin rarogon ni kafram. I yog ni gaar: ‘Yugu aram rogon nib kireb e thin ni ugog mu ug gafgownagrad ma gu be yog e thin nib kireb. Machane me runguyeg Got, ya de mich Kristus u wun’ug e ngiyal’ nem, ni aram e dagur nang e n’en ni gu be rin’.’ (1 Tim. 1:13) Manang Paul nib ga’ e runguy ni ke dag Jehovah nge Jesus ngak. Manang rarogon e pi girdi’ nem ni ur guyed rogon ni ngar taleged e machib ni be tay ni bochan e ir e aram rogon kafram.

Immoy yu ngiyal’ ni i mada’nag Paul boch e girdi’ ni kari mich u wan’rad boch e machib nde riyul’. Ere uw rogon e re n’em u wan’? Be weliy e Acts 17:16 nnap’an ni immoy u Athens, ma “dakiyog ni nge k’adan’ ni bochan e  guy lan e re binaw nem nib sug ko liyos ni ma meybil boch e girdi’ ngay.” Machane, me fanay e re n’em nde yag ni nge k’adan’ riy ni nge fil ban’en riy ko girdi’. (Acts 17:22, 23) I guy rogon ni nge puluw rogon e machib ni be tay nga rarogon e girdi’ ni immoy ko re binaw nem nib thilthil ya nge yag ni “yognag boch i yad ngak Kristus u rogon e re mit i kanawo’ nrayog riy.”​—1 Kor. 9:20-23.

Rayog ni ngad folwokgad rok Paul u nap’an ni gad be machibnag e girdi’ ni dubrad e machib ara ke mich boch e machib u wan’rad nde puluw. Rayog ni ngad fanayed boch ban’en ni gad manang u murung’agrad ya nge yag nda ayuweged yad ni ngar nanged fare “thin nib fel’” ni murung’agen ban’en ni kab pag feni fel’. (Isa. 52:7) I yog reb e walag nib pin ni ka nog Dorothy ngak ni gaar: “Boor e girdi’ ko gin ni gamad ma machib riy ni kan fil ngorad ni Got e ba kireb ma ke mu’ i dugliy rarogodad u wan’. Ere nap’an ni gu ra mada’nag boch e girdi’ ni aray rogon ma gu ma yog ngorad nib fel’ nib mich Got u wan’rad, ma aram mu gog ngorad e n’en ni be yog e Bible u murung’agen Jehovah nge rogon ni ma t’ufegey nge murung’agen e pi n’en ni ke micheg ni fan ngodad boch nga m’on.”

Nap’an ni gad ra chugur i yan ko tomur, ma gad manang ni piin ni gad ma machibnagrad e ri ‘bayi gel feni kireb’ e lem rorad. (2 Tim. 3:1, 13) Machane thingar dab da paged e re n’ey ni nge k’aringdad ni nge dab kud runguyed e girdi’ ara chuweg e felfelan’ rodad. Rayog ni nge pi’ Jehovah gelngidad ya nge yag ni ngaud ‘ngongliyed e ngongol nib fel’ ngad gelgad ngak e kireb.’ (Rom. 12:21) Reb e walag nib pin nib pioneer ni ka nog Jessica ngak e yog ni gaar: “Ba ga’ ni gu ma mada’nag e girdi’ u nap’an e machib nib tolangan’rad ma yad ma moningnagdad nge machib ni gad ma tay. Re n’ey e ba mom ni nge k’aring e kankanan’ ngog. Ere nap’an ni gu ra tabab ni nggu non ngak be’, ma aram mug meybil ngak Jehovah u lanin’ug ni nge ayuwegeg ni nggu lemnag rarogon facha’ ni bod rogon ni ma lemnag. Re n’ey e ma ayuwegeg ni nge dab ki kankanan’ug, ma aram mug lemnag rogon nrayog ni nggu ayuweg facha’.”

Susun e ngkud guyed rogon ni ngad pied e athamgil nga laniyan’ e piin ni gad be machib u taabang. I gaar Jessica: “Faanra bay bagamad ni ke buch ban’en nib kireb rok u nap’an e machib, ma gu ma guy rogon ni nge dab yug gu par ni aram e n’en ni gu be weliy. Ya n’en ni gu ma rin’ e aram e gu ma guy rogon ni nggu weliy boch ban’en nrayog ni nge pi’ e athamgil nga lanin’uy, ni bod rogon ni nggu weliy angin e machib ni kan tay ni yugu aram rogon ni bay boch e girdi’ ni kar togopuluwgad.”

Ri manang Jehovah urngin e magawon ni gad ma mada’nag u nap’an e machib. Machane ri ma felfelan’ u nap’an nra guy ni gad be folwok rok u rogon ni ma dag e runguy! (Luke 6:36) Riyul’ ndabi runguy Jehovah e girdi’ ndariy n’umngin nap’an. Ere rayog ni nge pagan’dad ngay ni manang e ngiyal’ nib puluw ni nge thang e re m’ag ney. Machane, chiney ndawor da tawgad ko ngiyal’ nem e rib ga’ fan e machib ni gad be tay. (2 Tim. 4:2) Ere ngad ululgad i rin’ e maruwel rodad u fithik’ e pasig ma gad be dag e runguy ngak “urngin” mit e girdi’.