1. Mang e be micheg ni Jehovah e ir reb e Got nib gol?

 YUGU aram rogon ni immoy Jehovah ni yigoo ir u m’on ni nge tabab i sunmiy urngin ban’en, machane gathi kemus ni yigoo ir e i lemnag ir. Bin riyul’ riy e, ke pi’ e yafos nib tow’ath ngak e pi engel u tharmiy nge girdi’ u fayleng. Jehovah ni ir “fare Got nib felfelan’” e baadag ni ma pi’ e tin nib fel’ ban’en ngodad. (1 Tim. 1:11, NW; Jas. 1:17) Maku reb e, bochan ni baadag Jehovah ni ngad felfelan’gad, ma aram fan ni be fil ngodad rogon ni ngaud golgad ko girdi’.​—Rom. 1:20.

2, 3. (a) Mang fan ni gad ma felfelan’ u nap’an nra ud golgad ko girdi’? (b) Mang e gad ra fil ko re article ney?

² Ke sunmiy Got e girdi’ ni bod yaan. (Gen. 1:27) Re n’ey e be yip’ fan ni ke sunmiydad ni bay pi fel’ngin rodad. Ere faanra nge yag e bin riyul’ e felfelan’ ngodad miki tow’athnagdad Jehovah, mab t’uf ni ngad folwokgad rok u rogon ni ma lemnag e girdi’ nge rogon ni ma gol ngorad. (Fil. 2:3, 4; Jas. 1:5) Mang fan? Ya bochan ni aram rogon ni ke sunmiydad Jehovah. Yugu aram rogon ndawor da flontgad, machane rayog ni ngad folwokgad rok u rogon ni ma gol ko girdi’.

³ Be fil e Bible ngodad rogon ni ngaud golgad ko girdi’. Chiney e  ngad weliyed boch ban’en ni be fil e Bible ngodad u murung’agen e re n’ey. Gad ra fil ni faanra ud golgad, ma aram e ra ayuwegdad e re n’ey ni ngad rin’ed fare maruwel ni ke pi’ Jehovah ngodad nge fan nra yib e felfelan’ ngodad ni faanra ud golgad ko girdi’. Ku gad ra weliy fan nsusun e ngad ululgad ngad golgad ko girdi’.

4, 5. Uw rogon ni ke dag Jehovah nge Jesus e kanawo’ ngodad u rogon ni ngaud golgad ko girdi’?

⁴ Baadag Jehovah ni ngad folwokgad rok, ere ma felfelan’ ni faanrra ud golgad ko girdi’. (Efe. 5:1) Faan gad ra yaliy rogon ni ke sunmiydad nge rogon feni fel’ yaan nge feni manigil e pi n’en ni ke sunmiy nib liyegdad ma rib tamilang ni baadag ni ngad felfelan’gad. (Ps. 104:24; 139:13-16) Ere ra m’ug ni gad be tayfan ni faan gad ra gay rogon ni ngad felfelan’naged e girdi’.

⁵ Tin riyul’ e Kristiano e yad ma folwok rok Kristus u rogon ni ke dag e bin th’abi fel’ e kanawo’ u rogon ni ngad golgad ko girdi’. I yog ni gaar: ‘En ni Fak e Girdi’ e de yib ni ngan pigpig ngak, machane yib ni nge pigpig me pi’ e pogofan rok nge biyuliy boor e girdi’ ngay.’ (Matt. 20:28) Aram fan ni fonownag apostal Paul e piin Kristiano ni gaar: “Rogon e lem nge pangin ni nge yog ngomed e fare lem nge fare pangin ni immoy rok Kristus Jesus . . . [I] pag e flaab rok ni gubin, nge yib i ngal’ nib tapigpig.” (Fil. 2:5, 7) Ere gad gubin nra bagadad mab fel’ ni nge fith ir ni nge gaar, ‘Gur, rayog ni nggu mon’og u rogon ni gu be folwok rok Jesus, fa?’​—Mu beeg e 1 Peter 2:21.

6. Mang e ke fil Jesus ngodad ko fare fanathin ni weliy ni murung’agen facha’ nu Samaria ni ayuweg be’ nib moon ni ke yib i og e moro’ro’ ngak? (Mu guy e sasing ni bay u tabolngin e re article ney.)

⁶ Ra felfelan’ Jehovah ngodad ni faan gad ra athamgil ni ngad folwokgad rorow Kristus ni Fak. Rayog ni ngad rin’ed e re n’ey ni faan gad ra lemnag rarogon yugu boch e girdi’ nge rogon nrayog ni ngad ayuweged yad. I tamilangnag Jesus ko fare fanathin rok ni murungagen facha’ nu Samaria ni ayuweg be’ nib moon ni ke yib i og e moro’ro’ ngak nib m’agan’ ngay ni nge rin’ pi gachalpen urngin ban’en nrayog rorad ni ngar ayuweged e girdi’, ni mus ngak e piin nib thil e nam rorad. (Mu beeg e Luke 10:29-37.) Ka ga manang fare deer nni fith ngak Jesus, ma aram me weliy fare fanathin ni murung’agen facha’ nu Samaria, fa? I fith fare moon nib Jew ni gaar: “Mini’ e en ni ir e mmigid ngog?” Rogon e fulweg ni pi’ Jesus e be m’ug riy ni faanra nge felfelan’ Got ngodad, ma thingari m’agan’dad ngay ni ngad golgad ko girdi’ ni bod rogon e n’en ni rin’ fare moon nu Samaria.

7. Uw rogon ni ngad daged nib mich u wan’dad ni birok Got e kanawo’ u rogon ni ngan rin’ ban’en e aram e bin th’abi fel’?

⁷ Boor fan ni nga i gol e piin Kristiano ko girdi’. Re fel’ngin ney e ba l’ag rogon ko togopuluw ni tababnag Satan u lan fare milay’ nu Eden. Ni uw rogon? I yog Satan ni Adam nge Efa, ni aram e kub muun gubin e girdi’ ngay e ra fel’ rogon e yafos rorad ni faan yad ra mon’eg e pi n’en ni yad baadag ni ngar rin’ed ko bin ni ngar folgad rok Got. I dag Efa ni yigoo ir e be lemnag ir, ya baadag ni nge taareb rogon ngak Got. Ku arrogon Adam ni yigoo ir e be lemnag ir ma baadag ni nge rin’ e n’en ni baadag Efa ko bin ni nge fol rok Got. (Gen. 3:4-6) Rib tamilang wenegan ni yib ni bochan e n’en nrin’ew. Faanra ud pared ni goo gadad e gad be lemnaged gadad, ma dabiyog ni ngad pirieged e felfelan’. Machane faan gad ra gol ko girdi’, ma aram e gad be dag nib mich u wan’dad ni birok Got e kanawo’ u rogon ni ngan rin’ ban’en e aram e bin th’abi fel’.

8. Mang fan nsusun e nge lemnag Adam nge Efa pi fakrow?

⁸ Pi motochiyel ni pi’ Jehovah ngak Adam nge Efa e susun nra k’aringrow ni ngar lemnagew pi  fakrow ni yugu aram rogon ni yigoo yow u lan fagi milay’ nu Eden e ngiyal’ nem. I tow’athnagrow Jehovah, me yog ngorow ni ngar diyengow nge yoor pi fakrow nge wer e piin owcherow nga gubin yang u fayleng ngar pared riy mi yad suwey. (Gen. 1:28) Ri ma lemnag Jehovah rarogon e pi n’en ni ke sunmiy. Ere ku aram rogon e gal ga’ rodad nsusun e ngkur lemnagew rogon laniyan’ pi fakrow nge rogon e felfelan’ ni yad ra tay boch nga m’on. Ba m’agan’ Jehovah ngay ni nge maruwel Adam nge Efa nge chon e tabinaw rorow u taabang ngar paradisnaged e fayleng ni ga’ngin. Re maruwel nem ni ngar rin’ed e ba maruwel nib ga’.

9. Mang fan nrayog ni nge felfelan’ e girdi’ u nap’an ni yad be fal’eg e fayleng ni nge mang Paradis?

⁹ Ba t’uf ni nge maruwel e girdi’ nib flont nge Jehovah u taabang ya nge yag nra paradisnaged e fayleng mi yad lebguy e n’en nib m’agan’ Jehovah ngay. Faan yad ra rin’ ni aram rogon, ma aram e rayog ni ngar uned ngak Jehovah ko toffan. (Heb. 4:11) Am lemnag gelngin e felfelan’ ni yad ra tay ko re maruwel nem ni ngar rin’ed! Rib ga’ e tow’ath nra pi’ Jehovah ngorad ni bochan e gathi goo yad e yad be lemnaged yad maku yad be ayuweg yugu boch e girdi’.

10, 11. Uw rogon ni ngad lebguyed fare maruwel ni ngan machib min yognag pi gachalpen Jesus?

¹⁰ Ngiyal’ ney e ke pi’ Jehovah reb e maruwel ko girdi’ rok ni aram e ngar machibgad mi yad ayuweg e girdi’ ni ngar manged boch i gachalpen Jesus. Ra ngad rin’ed e re maruwel ney mab t’uf ni ngar ud lemnaged rarogon e girdi’. Faanra ba t’uf Got nge girdi’ rodad, ma aram e n’en nra ayuwegdad ni ngad athamgilgad ni ngad rin’ed e re maruwel ney.

 ¹¹ Nap’an e bin som’on e chibog C.E., ma aram me yog Paul ni ir nge boch e Kristiano e yad be ‘maruwel Got u taabang’ ni bochan e yad be yung maku yad be rannag e tin riyul’ u murung’agen Gil’ilungun Got ni yad be yung nga laniyan’ e girdi’. (1 Kor. 3:6, 9) Ngiyal’ ney e ku rayog ni ngad ‘maruwelgad Got u taabang’ ni faan gad ra fanay e tayim rodad, nge pi n’en ni bay rodad, nge gelngidad ni fan ko fare maruwel ni machib. Ireray reb e tow’ath nrib manigil!

12, 13. Ga be lemnag ma mang boch e tow’ath ni ma yag ngodad u nap’an ni gad be ayuweg boch e girdi’ ni ngar manged boch i gachalpen Jesus?

¹² Faan gad ra fanay e tayim rodad, nge pi n’en ni bay rodad, nge gelngidad ni fan ko fare maruwel ni machib, mab gel e felfelan’ nra yib ngodad. Ireray e n’en ni ma yog yooren e pi walag ni ke yag ni ngar filed e Bible ngak boch e girdi’. Riyul’ nrib gel e felfelan’ ni gad ma tay u nap’an ni gad ra guy ni be felfelan’ be’ ni gad be fil e Bible ngak ni bochan e ke tamilang e tin riyul’ u wan’, ma be gel e michan’ rok, ma be thilyeg boch ban’en u lan e yafos rok, maku be tabab ni nge weliy ko girdi’ e tin riyul’ ni ke fil. Ku arrogon Jesus nib gel e felfelan’ ni tay u nap’an ni guy ni ke sul fa 70 i gachalpen ni kar ‘felfelan’gad’ ni bochan angin e machib ni kar ted.​—Luke 10:17-21.

¹³ Pi walag u ga’ngin yang e fayleng e yad ma felfelan’ ni yad be guy rogon ni be ayuweg fare thin nib fel’ e girdi’ ni ngar mon’ognaged rogon e par rorad. Bod ni, bay reb e walag nib pin nib muchugbil ni ka nog Anna ngak ni baadag ni nge yoornag e tin ni be rin’ ni fan ngak Jehovah. a Ere yan i par nga reb e binaw u Eastern Europe nib t’uf e ayuw riy ko machib. I yoloy ni gaar: “Boor e girdi’ ni be yag ni nggu tababnag e fol Bible ngorad u roy ma ri gu baadag e re n’ey. Rug ma felfelan’ ko machib ni gu ma tay. Nap’an ni gu ra taw nga tabinaw ma dariy e tayim ni nggu par ni yigoo tirog ban’en e gu be lemnag. Ya gu ma par ngaug lemnag e piin ni gu be fil e Bible ngorad, nge rogon e magawon nge magafan’ ni be yib ngorad. Gu ma lemnag boch e kanawo’ nrayog ni nggu pi’ e athamgil riy nga lanin’rad mug ayuwegrad u boch ban’en nrayog ni nggu ayuwegrad riy. Chiney e kari mich u wan’ug ni ‘ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.’”​—Acts 20:35.

14. Uw rogon ni ngad pirieged e felfelan’ ko machib ni gad be tay ni yugu aram rogon ni buchuuw e girdi’ ni be motoyil ngodad?

¹⁴ Ku rayog ni ngad felfelan’gad ya gad be bing e kanawo’ ko girdi’ ni ngar motoyilgad ko fare thin nib fel’ ni yugu aram rogon ni dubrad ni ngar motoyilgad. Baadag Jehovah ni ngad rin’ed e n’en ni yog ngak Ezekiel ni nge rin’. I gaar ngak: “Mog ngorad e tin ni bay gu weliy ngom, ndemturug ko yad ra motoyil ngom fa dab ra motoyilgad.” (Ezek. 2:7; Isa. 43:10) Ere demtrug ko ra motoyil be’ ngodad fa danga’, machane gad manang nib ga’ fan u wan’ Jehovah e athamgil ni gad be tay. (Mu beeg e Hebrews 6:10.) Bay reb i walagdad ni pumoon ni weliy murung’agen e machib ni ma tay ni gaar: “Kug yunged e awoch, ma gamad be rannag, maku gamad be yibilay ni nge pi’ Jehovah gelngin e tin riyul’ ni kug yunged ni nge ga’.”​—1 Kor. 3:6.

15. Gur, yigoo piin nib ga’ fan u wan’rad e gol ni gad ma dag ngorad e ir e ngaud golgad ngorad, fa? Mu weliy rogon.

¹⁵ Baadag Jesus ni ngaud golgad ya nge yag nda pirieged e felfelan’. Boor e girdi’ ni yad baadag ni ngan gol ngorad. Aram fan ni pi’ e athamgil nga lanin’dad ni gaar: “Mu golgad ngak e girdi’ me gol e girdi’ ngomed. Yad ra pi’ ngomed nge yan i mus nga rogon e fol riy, nra map’ nga pa’med ni pire’ nge sugsug pa’med riy. Ya re fol ni gimed ra pi’ ngorad e ereram e re fol ni yad ra pi’ ngomed.” (Luke 6:38, NW) Riyul’ ni bay boch e girdi’ ndariy fan u wan’rad ni gad ma gol ngorad. Machane piin nib ga’ fan e re n’ey u wan’rad e rayog ni ngam k’aringrad ni ngkur golgad ngak yugu boch e girdi’. Ere yugu aram rogon ni ga be guy nde ga’ fan u wan’ e girdi’ e gol ni ga be tay ngorad, machane mu ulul ngam gol ko girdi’, ya yugu dam nang angin nra yib riy.

16. Chon mini’ e thingar ud golgad ngorad, ma mang fan?

¹⁶ Girdi’ nriyul’ ni yad ba gol e darur pied ban’en ko girdi’ ni bochan e yad be lemnag ni nge yag ban’en riy ngorad. I gaar Jesus: “Faan mu ngongliy e mur, ma ga non ngak e piin ni gafgow, nge piin ni marwoth, nge piin ni mugutgut, nge piin ni malmit, ma aram me fal’eg Got waatham; ni fan e dabiyog rorad ni ngar fulweged taban e magar rom.” (Luke 14:13, 14) Ku be gaar e Bible: “Mu gol . . . ma gur e ra fel’ waatham riy.” Ku be ulul ngay ni gaar: “Nge felan’ e piin ma magafan’rad ko piin gafgow.” (Prov. 22:9, BT; Ps. 41:1, BT) Arrogon, susun ni ngad rin’ed e re n’ey ni bochan e gad ra felfelan’ ni faanra ud ayuweged e girdi’.

17. Mang boch e kanawo’ nrayog ni ngad golgad riy ko girdi’ ma gad felfelan’?

¹⁷ Nap’an ni sul Paul u daken fapi thin ni yog Jesus ni faani gaar, “ba gel e felfelan’ ni ma yib ko pi’ ban’en ngak be’ ko bin ni be’ e nge pi’  ban’en ngom,” ma gathi be yip’ fan ni kemus ni yigoo chugum e ngaud pied ko girdi’. Ya kub muun ngay ni ngaud pied e athamgil nga lanin’rad, ma gad be pi’ boch e fonow ngorad u lan e Bible, maku gad ayuwegrad ko tin nib t’uf rorad. (Acts 20:31-35) I dag Paul u daken e thin nge ngongol rok rogon ni ngaud golgad u rogon ni gad ma fanay e tayim rodad, nge gelngidad, nge rogon ni gad ma tay e tayim ni fan ko girdi’, nge rogon ni gad ma dag e t’ufeg ngorad.

18. Mang e ke yog e piin ni yad ma gay murung’agen ban’en u rogon angin nra yib ni faanra ud golgad ko girdi’?

¹⁸ Bay boch e girdi’ ni yad ma gay murung’agen boch ban’en u rogon e ngongol ko girdi’ ni kar pirieged ni faanra ud golgad ko girdi’, ma aram e gad ra felfelan’. Be yog reb e babyor ni “ma yog e girdi’ nib gel e felfelan’ ni yad ma tay u nap’an ni yad ra rin’ boch ban’en nib fel’ ni fan ngak yugu boch e girdi’.” Ku bay boch e girdi’ ni yad ma gay murung’agen boch ban’en ni ka rogned nnap’an ni gad ra ayuweg be’, ma aram e gad ra guy ni ke yib fan e yafos rodad. Aram fan ni ma yog e girdi’ ni llowan’ ni ngad ognaged gadad ni ngad rin’ed boch e maruwel ni ngad ayuweged e girdi’, ya re n’ey e rayog ni nge fal’eg fithik’ i dowdad me yibnag e felfelan’ ngodad. Pi n’ey ni kan weliy murung’agen e susun e dab da gingad ngay ni bochan e Jehovah ni Ir e Sunmiydad e ke yog ni faan gad ra pi’ ban’en ngak be’ ma gad ra felfelan’.​—2 Tim. 3:16, 17.

19, 20. Mang fan ni ga baadag ni ngam gol ko girdi’?

¹⁹ Rayog ni nge mo’maw’ ngodad ni ngad golgad ko girdi’ ni faanra girdi’ u toobdad e yigoo yad e yad ma lemnaged yad. Machane i yog Jesus ni gal nth’abi ga’ e motochiyel e nge t’uf Jehovah rodad u polo’ i gum’ircha’dad, ngu polo’ i lanin’dad, ngu polo’ i lem rodad, ngu polo’ i gelngidad, ma ngki t’uf rodad e en nib migid ngodad ni gowa gadad. (Mark 12:28-31) Kad filed ko re article ney ni piin nib t’uf Jehovah rorad e yad ma folwok rok. Ma gol Jehovah nge Jesus ngak e girdi’, ma yow ma pi’ e athamgil nga lanin’dad ni ngad folwokgad rorow, ya ireray e n’en nra yibnag e bin riyul’ e felfelan’ ngodad. Faan gad ra athamgil ni ngad golgad u gubin ban’en ni gad be rin’ ni fan ngak Got nge girdi’, ma aram e rayog ni ngad pininged e sorok ngak Jehovah, me yib angin ngodad nge tin ni ka bay e girdi’.

²⁰ Ba mudugil ni ga be rin’ e tin rayog rom ni ngam gol ko girdi’ mag ayuwegrad, nib ga’ ni pi walag u lan e ulung. (Gal. 6:10) Faan ga ra ulul ni ngam rin’ ni aram rogon, ma aram e ra ga’ fan u wan’ e girdi’ e gol ni ga be dag ngorad, ma ga ra t’uf rorad, ma ga ra felfelan’. Be gaar e Proverbs 11:25 (BT): “Nge puf paam, ma aram e ra fel’ rogom. Mu ayuweg boch e girdi’ mi ni ayuwegem.” Boor e kanawo’ nrayog ni ngad rin’ed boch ban’en riy ni fan ko girdi’ ma gad gol ngorad u nap’an ni gad be rin’ e pi n’en ni gad ma rin’ ngu nap’an e machib ni gad be tay. Ireray e pi n’en ni gad ra weliy ko bin migid e article.