Mang fan ndabiyog ni ngan tay e pi babyor ni ke ngongliy e Pi Mich Rok Jehovah nga yugu boch e website ara nga boch ban’en ni bay ko internet ni yima non riy ngak yugu boch e girdi’?

Bay boch e girdi’ ni yad ma lemnag ni bochan e dariy puluwon e pi babyor ni gad ma pi’, ma aram fan nrayog ni ngar feked ngar tayed nga yugu boch e website ara nga boch ban’en ni bay ko Internet ni yima non riy ngak yugu boch e girdi’. Machane re n’ey e rayog ni nge sum boch e magawon riy, maku be togopuluw ko motochiyel ko fare website rodad nrogon ni bay ko fare thin ni Rogon ni Ngan Fanay. a Rib tamilang ni be yog u rom ndariy be’ ni bay mat’awun ni nge tay “yaan boch ban’en ni kan yoloy, ara babyor ko ulung ni ke downloadnag nga lan e cellphone ara tablet rok, ara pi trademark, ara musik, ara sasing, ara pi video, ara boch e babyor ni bay ko re website ney ko Internet (re n’ey e ba muun ngay gubin e website, ara boch e site nrayog ni ngam pi’ boch e file nge video riy ngak yugu boch e girdi’, ara yu yang ko Internet ni yima non riy ngak yugu boch e girdi’).” Mang nib ga’ fan e pi motochiyel ney?

Gubin ban’en ni bay ko pi website rodad e kan ngongliy boch e motochiyel ni fan ngay nrayog ni nge ayuweg ndabi fek be’ ngki tay nga yugu boch e website ara yugu bang. Ba ga’ fan e re n’ey ni bochan e be ayuweg e pi n’en ni bay ko website rodad ni nge dab ni fanay nga boch ban’en nsusun e gathi ir e ngan fanay ngay. Bay boch e girdi’ ni kar chelgad kar togopuluwgad ko tin riyul’ nge yugu boch e girdi’ ni yad baadag ni ngar kirebnaged e maruwel rodad. Ere yad ma tay boch e babyor rodad ko pi website rorad ni nge k’aring e Pi Mich Rok Jehovah nge yugu boch e girdi’ ni nga ranod ko pi website nem. Machane, ku yad ma tay boch ban’en ko pi website nem nrayog ni nge k’aring e girdi’ ni nge maruwar e tin riyul’ u wan’rad. (Ps. 26:4; Prov. 22:5) Bay boch e girdi’ ni yad ma fanay boch ban’en ni ke ngongliy e ulung rodad ara fare bugithin ni jw.org ni fan nga boch ban’en ni yad be dag ko shimbung, ara TV, ara boch ban’en, fa reb e ra fanayed ni fan nga boch e app ko cellphone, ara boch ban’en ni yad be pi’ ni chuway’. Machane bochan ni bay e pi babyor, nge website rodad, nge fare bugithin ni jw.org u tan e re motochiyel ney, ma aram fan nrayog ni ngad feked e piin ni yad be fanay e pi n’ey nga kort mad taleged yad ndab kur fanayed e pi n’em. (Prov. 27:12) Machane rayog ni nge dabi ayuwegdad e kort ni faan gad ra pag yugu boch e girdi’, nib muun pi walagdad ngay ni ngar ted e pi babyor rodad nga boch e website ara ra fanayed fare bugithin ni jw.org ni ngaur pied boch ban’en riy nchuway’.

Rayog ni nge sum e magawon ni faan gad ra downloadnag boch e babyor rodad u yugu boch e website ni gathi jw.org. Kemus ni yigoo “fare tapigpig nib yul’yul’ ma ba gonop” e be fanay Jehovah ni nge pi’ e tin nib t’uf rodad ni fan ko tirok ban’en. (Matt. 24:45) Re “tapigpig” nem e kemus ni yigoo fapi website ni www.pr418.com, nge tv.pr418.com, nge wol.pr418.com e ma fanay ni nge pi’ e tin nib t’uf rodad. Ma kemus nri dalip e app ni bay rodad ni yima fanay ko cellphone ara tablet ni aram e JW Language^®, nge JW Library^®, nge JW Library Sign Language^®. Ra mman ko pi website nge app ney ma dab mu pirieg ban’en riy ni yibe pi’ nchuway’ ara ban’en ni bay rogon ko re fayleng rok Satan ney. Machane, faan gad ra fek e pi babyor rodad u yugu reb e website ara app ni gathi ulung rok Jehovah e ke ngongliy, ma rayog ni bay boch ban’en riy ni kan thilyeg.​—Ps. 18:26; 19:8.

Maku reb e, faan gad ra tay boch ban’en ni ke ngongliy e ulung rodad nga boch e website nrayog ni nge weliy e girdi’ lanin’rad riy, ma aram e rayog ni nge bing e kanawo’ ngak e piin ni kar digeyed e tin riyul’ ma kar chelgad kar togopuluwgad ngay nge yugu boch e girdi’ ni ngar gathibthibnaged e ulung rok Jehovah. Re n’ey e rayog ni nge k’aring boch e walag ni ngar luaged e pi girdi’ ney e thin me k’aring ni ngan darifannag Jehovah. Bin riyul’ riy e, pi n’ey ni yima weliy ko Internet e gathi aram e bin nib puluw e kanawo’ ni ngan yal’uweg e lem rok be’ riy min ayuweg ni nge nang e tin riyul’. (1 Tim. 6:3-5; 2 Tim. 2:23-25) Ku bay boch e girdi’ ni yad ma ngongliy boch e website ara boch ban’en ni bay ko Internet ni yima non riy ngak yugu boch e girdi’ ni yira guy min lemnag ni ke yib ko ulung rodad ara fare Ulung ni Ma Pow’iyey. Machane pi n’ey e goo bogi ban’en nde riyul’. Dariy reb i girdien fare Ulung ni Ma Pow’iyey ni bay reb e website ni fen, ara reb e account rok ko yungi n’en ko Internet ni yima non riy ngak yugu boch e girdi’.

Nap’an ni gad ra pow’iy e girdi’ ko fare website ni jw.org, ma aram e gad be pi’ e ayuw ni ngan machibnag fare thin “nib fel’.” (Matt. 24:14) Be munmun ma be fel’ i yan fapi website nge app rodad, ma gad baadag ni nge yib angin e re n’ey ngak urngin e girdi’. Ere rayog ni ngad e-mailnaged ba ken e babyor rodad ngak be’ ara da pied e link ngorad nra fekrad i yan ko website rodad. Faan gad ra rin’ ni aray rogon, ma aram e gad be pow’iy e girdi’ ko taare kanawo’ ni be fanay Jehovah ni nge pi’ e tin nib t’uf ko ulung rok riy, ni aram u daken “fare tapigpig nib yul’yul’ ma ba gonop.”