FA BINEM e duw ni ke yan e bokum biyu’ e pi walagdad ni pumoon ni kan dugliyrad ni ngar manged boch e piilal nge boch e ministerial servant. Faanra gur bagayad e pi cha’ney, mab mudugil ni gab felfelan’ ni ngam pigpig ku Jehovah mag ayuweg e pi walag ko biney e kanawo’.

Machane faanra be magafan’um ko re maruwel ney, ma dabi mulan’um ya ku ireray rogon e lem rok boch e girdi’. Bay reb e pagel ni ka nog Jason ngak ni kan dugliy ni nge mang reb e piilal ni gaar: “Nap’an nni dugliyeg ni nggu mang reb e piilal, ma ke magafan’ug ko pi n’en ni ke milfan ngog ni nggu rin’.” Mus ngak Moses nge Jeremiah ma ireray rogon e lem rorow ya ra lemnagew ni dawori bung rogorow ni ngar rin’ew fare maruwel ni ke pi’ Jehovah ngorow. (Exodus 4:10; Jeremiah 1:6) Ere faanra ireray rogon e magawon rom, ma mang e rayog ni ngam rin’ ya nge yag ni ngam rin’ fare maruwel nib milfan ngom u fithik’ e pagan’, mag ulul ni ngam mon’og i yan? Boor ban’en nrayog ni ngam fil rok Timothy.​—Acts 16:1-3.

Sogonap’an ni ke gaman reliw’ e duw rok Timothy ma aram me tabab ni nge un ngak apostal Paul ni ngar lekagew e ulung i yan. Nap’an ni yog Paul ngak Timothy ni nge un ngak ko milekag, ma sana lemnag ndawori bung rogon ni nge fil ban’en ngak e girdi’ miki fonownagrad ni bochan e kab bitir. (1 Timothy 4:11, 12; 2 Timothy 1:1, 2, 7) Machane i ulul Timothy ni nge mon’og ma aram e ragag e duw nga tomuren, me yol Paul ngak piyu Filippi ni gaar: “Ba pagan’ug ngak Somol Jesus ni bayi gagiyegnag nge yog ni gu l’og Timothy nge yib ngomed ni kane’.” Mang fan ni yog Paul e pi thin ney? Ke weliy fan ni gaar: “Ke mus ni go ir e ba taareb lanin’mow ngomed.”​—Filippi 2:19, 20.

Mang fan nrib fel’ e kanawo’ ni ke dag Timothy nrayog ni nge folwok e piin piilal riy? Ngad weliyed nel’ i fan.

1. Ri ma lemnag rarogon e girdi’. Ke yog Paul ngak e pi walag u Filippi ni Timothy e ‘ri ba adag ni nge ayuwegrad.’ (Filippi 2:20) Ba m’agan’ Timothy ngay ni nge pag fan e tayim rok nge gelngin ni nge ayuweg e pi walag, ya baadag ni nge par e tha’ u thilrad Jehovah nib chugur.

William ni ke pag reliw’ e duw ni ke mang reb e piilal e bay e n’en ni ma yog ngak e piin ni ka fin ra dugliyed ni ngar manged boch e piilal ni gaar: “Nge t’uf e pi walag romed. Mu tiyan’um ko pi n’en nib t’uf rorad, ko bin ni ngam tiyan’um nga rogon ni ngam gagiyegnagrad.” Dab mu bod be’ ni ma kol e yap’ ko bus ni kemus ni n’en ni be nameg e nge taw ko gin ni nge yan ngay nib puluw ko tayim riy, ko bin ni nge pi’ e tayim ngak e piin ni ngar uned u bus ni ngar afgad nga lan fare bus.

2. Ke m’oneg e pigpig ni be tay ngak Jehovah u lan e yafos rok. Ke yog Paul nrib thil Timothy ko tin ni ka bay e girdi’ ni yigoo ‘tirorad e yad be finey, ma gathi tirok Jesus Kristus e yad be finey.’ (Filippi 2:21) Ke guy Paul ni pi walag ni ur med u nap’an Timothy e yigoo tirorad ban’en e yad be lemnag. Yu ngiyal’ e yad ma m’oneg e tirorad ban’en ko pigpig ni yad be tay ngak Jehovah. Machane gathi aram rogon Timothy! Nap’an nra mab e kanawo’ ngak nrayog ni nge yoornag boch ban’en ni nge rin’ ni fan ngak Got, mab puluw rogon e ngongol rok ko n’en ni i rin’ Isaiah u nap’an ni gaar: “Bay gu wan! Mu l’ugeg!”​—Isaiah 6:8.

Uw rogon ni nge puluw urngin e tayim ni ngam rin’ e tin nib t’uf rom ma ngkum rin’ e pi n’en nib t’uf ni ngan rin’ u lan e ulung? Bin som’on e, rayog ni ngam fol ko fonow rok Paul ni gaar: “Ngam mel’eged e tin ni ir e th’abi ga’ fan.” (Filippi 1:10, NW) Ere ngam m’oneg e pigpig ni ga be tay ngak Jehovah u lan e yafos. Bin migid e, mu siyeg boch ban’en ni yima rin’ nrayog ni nge fek yooren e tayim rom nge gelngim. I yog Paul ngak Timothy ni gaar: “Mu tiyem u urel ko tin ni ma ar’arnag e piin ni pagel, ma ga nameg e tin nib mat’aw, mu um athamgiliy nguum par nib mich Kristus u wun’um, ma ba t’uf Got rom nge girdi’, ma ba gapas lanin’um.”​—2 Timothy 2:22.

3. Ke maruwel nib gel ni fan ko pigpig rok ngak Jehovah. Ke weliy Paul murung’agen Timothy ni gaar: “Ke par ni bod be’ ni fakag ngog  ni be un ngak e chitamangin ko maruwel ni fan ko Thin Nib Fel’ ni yib rok Got.” (Filippi 2:22) Timothy e gathi ir be’ nib malmal. Ur maruwelgow Paul u taabang nib gel, ma re n’ey ni rin’ e chugurnag e tha’ u thilrow.

Boor e maruwel nib t’uf ni ngan rin’ u lan e ulung rok Jehovah e ngiyal’ ney. Pi maruwel ney e ra yibnag e felfelan’ ngom, me ayuwegem ni nge chugur e tha’ u thilmed e pi walag. Ere mu guy rogon ni gubin ngiyal’ ma boor ban’en ni ga be maruweliy “ni fan ngak Somol.”​—1 Korinth 15:58.

4. Ke fol ko pi n’en ni ke fil. I yol Paul ngak Timothy ni gaar: “Kam fol ko machib ni gu be yog, nge pangig, nge n’en ni gu be nameg ko biney e tamilang; ma kam fal’eg i yaliy rogon ni gu be par nib mich Kristus u wun’ug, nge fanag gum’an’, nge rogon nib t’uf Got rog nge girdi’, nge rogon ni gu ma k’adan’ug.” (2 Timothy 3:10) I fol Timothy ko pi n’en ni ke fil, ere boor ban’en ni yag ni ngan pag fan ngak.​—1 Korinth 4:17.

Mang fan ndab mu gay reb e piilal ni ke yoor ban’en ni ke nang ko tirok Got ban’en nrayog ni ngaum folwok rok? Bay reb e walag ni ka nog Tom ngak ni ke yoor e duw ni ke mang reb e piilal, ni yog ni bay reb e walag ni ke yoor e duw ni ke mang reb e piilal ma ke yoor ban’en ni ke nang ko tirok Got ban’en ni i dag ni be lemnag rarogon Tom mab fel’ rogon ni i skulnag. Ke yog Tom ni gaar: “Gubin ngiyal’ ni gu ma ning e ayuw rok ma kug ma fol ko fonow rok. Ma re n’ey e ke gelnag e pagan’ rog.”

5. I par ma be skulnag ir. Ke fonownag Paul Timothy ni gaar: “Um par ma ga be muruwliy ni ngi i par pangim nib m’agan’ Got ngay.” (1 Timothy 4:7) Mus ngak e piin ni yad ma un ko gosgos ni bay be’ ni ma coachnagrad, machane ra bagayad mab t’uf ngki skulnag ir. Ere be pi’ Paul e athamgil nga laniyan’ Timothy ni gaar: “Mu tiyan’um nguum beeg e thin u lan e babyor nib thothup ngak e girdi’ ko muulung, ma ga be machib ngorad ma ga be weliy fan e thin rok Got ngorad. . . . Um rin’ e pi n’ey ma ga tiyan’um ngay [“mag fal’eg i lemnag,” NW], nge yog ni guy e girdi’ ni gubin ni ga be mon’og i yan.”​—1 Timothy 4:13-15.

Ku arrogom nib t’uf ni ngaum mon’ognag e pi salap ni bay rom. Mu tiyan’um ko fol Bible ni ga ma tay, mag fil rogon e yaram nge fonow nib beech ni be pi’ e ulung rok Got. Dabi pag rogon ni nge pagan’um ngom. De fel’ ni ngam lemnag ni ke yoor e tin ni kam nang ere nap’an nra buch reb e magawon nib t’uf ni ngan pithig, ma dakuriy fan ni ngam fal’eg i gay murung’agen. Ere ngam bod Timothy ngam ayuwegem “ma ga ayuweg rogon ni ga be weliy murung’agen e thin rok Got ngak e girdi’.”​—1 Timothy 4:16.

6. Ke pagan’ nga gelngin Jehovah. Nap’an ni be weliy Paul murung’agen e machib ni be tay Timothy, ma aram me puguran ngak ni gaar: “Fare Kan ni Thothup [“gelngin Got nib thothup, NW] ni be par u fithik’dad e gelngin e ngam ayuweg ngay fapi n’en nib fel’ ni faan kan pag fan ngom.” (2 Timothy 1:14) Ere ba t’uf ni nge pagan’ Timothy nga gelngin Got nib thothup.

Bay reb e walag ni pumoon ni ka nog Donald ngak ni ke yoor e duw ni ke mang reb e piilal ni gaar: “Piin ni kan dugliyrad ni ngar manged e piin piilal e thingari ga’ fan u wan’rad e tha’ u thilrad Got. Piin ni yad ra rin’ e re n’ey e ‘yad ra gel i yan.’ Faan yad ra yibilay gelngin Got nib thothup, mar maruweliyed ni nge yag fapi wom’engin gelngin ngorad, ma aram e ra yib angirad ngak e pi walag.”​—Psalm 84:7; 1 Peter 4:11.

Gad ra guy e pi ministerial servant nge piin piilal ni ka fin dugliyrad ni yad be mon’og ko pigpig ni yad be tay ngak Jehovah, ni bod rogon e n’en ni ga be rin’ ma re n’ey e rayog ni nge pi’ e athamgil nga lanin’dad. Fare walag ni ka nog Jason ngak ni kan weliy murung’agen boch kafram e yog ni gaar: “Boor ban’en ni kug fil u nap’an ni kug mang reb e piilal, ma re n’ey e ke gelnag e pagan’ rog. Chiney e ri gub felfelan’ ko maruwel rog, ya gu be lemnag ni ireray reb e tow’ath nrib manigil!”

Gur, ga ra athamgil ni ngaum mon’og? Faan ga ra folwok rok Timothy maku rayog ni ngari yib angim ngak e pi walag.