1. Mang boch e kanawo’ nrayog ni ngad maruwelgad Jehovah riy u taabang?

 TOMUREN ni sunmiy Jehovah e girdi’ nib flont me lemnag ni ngar maruwelgad u taabang ni ngar lebguyed e n’en nib m’agan’ ngay. Yugu aram rogon ndawori flont e girdi’ e ngiyal’ ney, machane piin ni yad ba yul’yul’ e ka rayog ni ngar maruwelgad Jehovah u taabang ni gubin e rran. Bod nrayog ni ‘ngad maruwelgad Got u taabang’ u nap’an ni gad be machibnag fare thin nib fel’ ni murung’agen Gil’ilungun, ma gad be ayuweg e girdi’ ni ngar manged boch i gachalpen Jesus. (1 Kor. 3:5-9) Ri gad ba tow’ath ni ke mel’egdad e En ni Ke Sunmiy urngin ban’en ni gubin ma rayog rok ni ngad uned i rin’ reb e maruwel nrib ga’ fan. Machane gathi kemus ni yigoo machib ni gad ma tay e aram kanawoen ni gad ma maruwel Jehovah u taabang. Re article ney e gad ra fil riy rogon ni gad ma maruwel Jehovah u taabang u nap’an ni gad be ayuweg chon e tabinaw rodad nge pi walag u lan e ulung, ngu nap’an ni gad ra gol ko girdi’, ngu nap’an ni gad ra pi’ e ayuw nga boch e maruwel ni fan ko ulung rodad ni yima rin’ u ga’ngin yang e fayleng, ngu nap’an ni gad ra yoornag boch ban’en ni gad be rin’ ni fan ko pigpig rodad ngak Jehovah.​—Kol. 3:23.

2. Mang fan nde fel’ ni ngad taareb rogonnaged e tin nrayog ni ngad rin’ed ni fan ngak Jehovah ko tin nrayog ni nge rin’ yugu boch e walag?

 ² Nap’an ni gad be fil e re article ney, ma dab mu taareb rogonnag e pi n’en nrayog ni ngam rin’ ni fan ngak Jehovah ko pi n’en nrayog ni nge rin’ yugu boch e walag. Dab mu pagtalin nib thilthil yangardad, nge rogon fithik’ i dowdad, nge rogon e par rodad, nge pi n’en nrayog rok bagadad nge bagadad. I yog apostal Paul ni gaar: “Ra be’ ma nge mang ir e changar ngak nge fal’eg i yaliy e ngongol rok ara pangin. Ma faanra ba fel’ e ngongol rok, me ere rayog ni nge felfelan’ ko ngongol ni ke rin’, me siy i puluwnag e ngongol rok ko ngongol ni ke rin’ yugu be’.”​—Gal. 6:4.

3. Mang fan nrayog ni nga nog ni urngin e piin ni yad be ayuweg chon e tabinaw rorad e yad be maruwel Got u taabang?

³ Ba m’agan’ Jehovah ngay ni nge ayuweg e pi tapigpig rok chon e tabinaw rorad. Bod nsana rayog nib t’uf ni ngam maruwel ni ngam yognag e salpiy ni ngam ayuweg chon e tabinaw rom. Boor e matin e yad ma par u tabinaw ni ngar ayuweged e bitir rorad ni kab achig. Ma nap’an nra pilibthir e gallabthir rodad ndabkiyog ni ngar ayuweged yad, ma gadad e thingar da ayuweged yad. Pi n’ey e goo bogi ban’en thingar da rin’ed. Be gaar e Bible: “Faanra dabi ayuweg be’ e girdi’ rok, ni ba ga’ ni girdien e tabinaw rok, ma aram e ke n’ag rogon nib mich Got u wan’, ma kab gel e kireb rok ngak be’ ndawori mich Got u wan’.” (1 Tim. 5:8) Faanra ireray boch ban’en nthingar mu rin’, ma sana dabiyog ni ngam yoornag e tayim rom ni fan ko tirok Got ban’en ni bod rogon ni ga baadag. Machane dabi mulan’um, ya re n’ey ni ga be ayuweg chon e tabinaw rom e ban’en nib fel’ u wan’ Jehovah.​—1 Kor. 10:31.

4. Uw rogon nrayog ni nge m’oneg e piin gallabthir e tirok Got ban’en u wan’rad, ma mang angin ni ma yib riy?

⁴ Nap’an nra ayuweg e piin gallabthir ni Kristiano pi fakrad ni ngar nameged boch ban’en ni fan ko pigpig rorad ngak Jehovah, ma aram e yad be maruwel Jehovah u taabang. Boor e gallabthir ni ke yag ni ngar rin’ed e re n’ey, ma angin ni ke yib riy e ke yag ni ngar guyed pi fakrad ni kar dugliyed ni ngar pigpiggad ngak Jehovah u polo’ e tayim rorad u boch e binaw nib palog ko gin ni yad ma par par riy. Boch i yad e missionary, ma boch i yad e be pioneer u boch e binaw nib t’uf boch e tamachib riy, ma boch i yad e ma pigpig u Bethel. Riyul’ nra yan i par e pi bitir ney nga bang nib palog ma dabkiyog ni ngaur mada’gad e gallabthir rorad ko ngiyal’ ni yad baadag. Machane pi gallabthir nib m’on e tirok Got ban’en u wan’rad e yad ma pi’ e athamgil nga laniyan’ pi fakrad ni ngar tedan’rad ko pigpig ni yad be tay ngak Jehovah ko gin ni yad bay riy. Mang fan? Bochan e ri yad ba felfelan’ ngay ni be m’oneg pi fakrad Jehovah u lan e yafos rorad. (3 John 4) Ba mudugil ni boor ko pi gallabthir ney e taareb rogon e lem rorad Hannah ni yog ni ke ‘pi’ [Samuel] nga pa’’ Jehovah. Yad ma tay nri yad ba tow’ath nrayog ni ngar maruwelgad Jehovah u taabang ko biney e kanawo’.​—1 Sam. 1:28.

5. Uw rogon nrayog ni ngam ayuweg e pi walag u lan e ulung rom ni ke t’uf e ayuw rorad? (Mu guy e sasing ni bay u tabolngin e re article ney.)

⁵ Faanra dariy ban’en nrib t’uf ni ngam rin’ ni fan ngak chon e tabinaw rom, me ere gur, rayog ni ngam ayuweg e pi walag u lan e ulung ni kar m’argad, ara kar pilibthirgad, ara ba t’uf e ayuw rorad? Fa gur, rayog ni ngam ayuweg e piin ni yad ma ayuweg e pi walag ney? Mu gay e pi walag u lan e ulung rom nib t’uf e ayuw rorad. Bod nsana rayog ni bay reb e walag nib pin ni be ayuweg e gallabthir rok ni kar pilibthirgow. Ere gur, rayog ni nge ba ngiyal’ mag par ko gallabthir rok ya nge yag ni rin’ boch ban’en nib t’uf ni nge rin’, fa? Maku reb e, rayog ni ngam ayuweg be’ ndariy e gin ni nge yan riy ko muulung, ara ba t’uf ni ngan fek ko chuway’, ara ngan fek nga aspital ni nge guy be’. Faan ga ra rin’ e pi n’ey, ma aram e gimew be maruwel Jehovah u taabang maku rayog ni nge fanayem ni nge ni fulweg taban e meybil rok be’.​—Mu beeg e 1 Korinth 10:24.

6. Mang e ba muun ngay ni ngad golgad ko girdi’?

⁶ Piin ni yad ma maruwel Got u taabang e yad ba gol. U lan e Pi Babyor ko Bible nni Yoloy Nsom’on  ni Thin ni Greek e fare bugithin ni kan pilyeg ni “ngam ayuweged e milekag” e be yip’ fan ni “ngam ayuweg be’ ndam nangew gimew.” (Heb. 13:2) Be weliy e Thin rok Got murung’agen boch ban’en ni buch kakrom ni be fil ngodad rogon ni ngaud golgad ko girdi’. (Gen. 18:1-5) Ere nap’an nra mab e kanawo’ ngodad ni ngad ayuweged be’, ma gad rin’ ni yugu demtrug ko cha’nem e ir reb e girdi’ rodad fa danga’.​—Gal. 6:10.

7. Mang angin nra yib ni faan ga ra gol ngak e piin ni yad ma pigpig u polo’ e tayim rorad?

⁷ Gur, rayog ni ngam maruwelgow Got u taabang ni aram e ngam gol ngak e piin ni yad ma pigpig u polo’ e tayim rorad ni kar bad u boch e binaw mab t’uf bang ni ngar pared riy, fa? (Mu beeg e 3 John 5, 8.) Ireray e ngiyal’ nrayog ni ngam rin’ed boch ban’en u taabang nra ayuwegem ni nge ‘fel’ rogom ko michan’ rorad, me fel’ rogorad ko michan’ rom.’ (Rom. 1:11, 12) Am lemnag e n’en ni buch rok Olaf. Nap’an ni kab bitir, ma aram me yib reb e walag ni pumoon i lekag e ulung ni ma un ngay. Re walag nem e ba muchugbil mab t’uf bang ni nge par riy. Machane dariy be’ u lan e ulung nrayog ni nge ayuweg e re walag nem. Ere fith Olaf e gallabthir rok ni gathi yow e Pi Mich ko rayog ni nge par fare walag ni pumoon ni ma lekag e ulung rorad u tabinaw rorad fa dabiyog. Ma aram ma rognew ngak nrayog, machane ir e nge mol u daken e couch. Ere aram e n’en ni rin’ Olaf, ma ri de kalngan’ ko n’en ni rin’. I yog Olaf ni gaar, “Rib gel e felfelan’ nug tew u lan e re wik nem. Gubin e rran ni gamow ma od nri kab kakadbul mug weliyew boor ban’en nrib manigil u nap’an ni gamow be abich. Pi n’ey e pi’ e athamgil nga lanin’ug me k’aringeg ni nggu adag ni nggu pigpig u polo’ e tayim rog.” Ke pag 40 e duw e chiney ni ke pigpig Olaf ni ir reb e missionary u boch e nam.

8. Mang boch i fan ni ngad golgad ko girdi’ ni yugu aram rogon ni som’on e sana der m’ug nib ga’ fan e re n’ey u wan’rad? Mu weliy reb e ban’en ni ke buch.

⁸ Boor e kanawo’ nrayog ni ngam dag e t’ufeg riy ngak e piin ndam nangrad ni yugu aram nsom’on e dariy fan u wan’rad e athamgil ni ga be tay. Am lemnag reb e ban’en ni buch. Nap’an ni be fil reb e walag nib pin e Bible ngak reb e ppin u Ecuador ni ka nog Yesica ngak, ma aram me guy fare walag ni be yor Yesica ndakir yag ni nge tal. Ere fith fare walag ngak ko mang fan ni be yor. Ma aram me yog Yesica ngak nu m’on ni nge yib nga Spain, ma ir be’ nrib gafgow. Ere immoy reb e rran ndariy e ggan ni ngar kew bochi tir nib pin ni fak, ma kemus ni yigoo ran e bay nrayog ni nge pi’ nge unum e re tir rok nem. Ere nap’an ni be guy rogon ni nge chuchuweg fare tir rok ni nge mol, ma aram me meybil ni ngan ayuweg. De n’uw nap’an nga tomuren ma aram me yib l’agruw e Pi Mich nga tafen mar piew reb e babyor ngak. Machane, me guchthuy Yesica fare ke babyor, me gaar ngorow: “Ireray e ggan ni gimew be lemnag ni nggu pi’ nge kay fakag?” Ere guy fa gal walag nib pin rogon ni ngar fal’egew laniyan’ Yesica, machane de motoyil ngorow. Boch nga tomuren, ma aram me yib i tay fa gal walag boch e ggan nga langan e mab ku Yesica. Ri gin Yesica nga rogon feni gol e gal walag nem, miri kireban’ ni bochan e ke nang nde tiyan’ nga rogon ni ke pi’ Got e fulweg ko meybil rok. Machane chiney e ke dugliy u wan’ ni nge pigpig ngak Jehovah. Ere, rib ga’ angin e gol ni dag e gal walag nib pin nem!​—Ekl. 11:1, 6.

9, 10. (a) Mang boch e maruwel ni un rin’ kakrom ni bay murung’agen u Bible nib t’uf ni nge ognag e girdi’ rok Got yad ni ngar pied e ayuw riy? (b) Mang boch e kanawo’ nrayog ni nge pi’ e pi walag ni pumoon e ayuw riy u lan e ulung e ngiyal’ ney?

⁹ Nap’an piyu Israel kakrom, ma immoy yu ngiyal’ nib t’uf boch e girdi’ ni ngar ognaged yad ni ngar rin’ed boch e maruwel. (Ex. 36:2; 1 Kron. 29:5; Neh. 11:2) Ngiyal’ ney e ku boor e kanawo’ nrayog ni ngam ognagem ngay ni ngam fanay e tayim rom, nge  pi n’en ni bay rom, nge salap rom ni ngam ayuweg pi walagdad. Ere faan ga ra ognagem ngam rin’ e pi n’ey, ma rib gel e felfelan’ ni ga ra tay, ma boor e tow’ath nra yag ngom.

¹⁰ Be pi’ e Thin rok Got e athamgil nga laniyan’ e pi walag ni pumoon ni ngar maruwelgad Jehovah u taabang ni aram e ngar manged boch e ministerial servant nge piilal. (1 Tim. 3:1, 8, 9; 1 Pet. 5:2, 3) Piin ni yad ma rin’ e re n’ey e yad baadag ni ngar ayuweged e girdi’ ko tin nib t’uf rorad nge tin nib t’uf ko tirok Got ban’en. (Acts 6:1-4) Bay ba ngiyal’ ni ke fith reb e piin piilal ko ga baadag ni ngam ayuweg e girdi’ ni yad ma yib ko muulung rodad, ara ngaum yarmiy e pi babyor rodad, ara ngaum ayuweg e pi walag ni ngar nanged e gin ni nga ranod ngay ko machib, ara ngam ayuweg ma ga be fal’eg e yungi n’en ni ke kireb ko pi naun ni fan ko liyor rodad ngak Jehovah, ara ku boch ban’en, fa? Piin ni yad ma rin’ e pi maruwel ney e yad ra yog ngom nri yad ma felfelan’ ni be yag ni ngar ayuweged e girdi’.

11. Uw rogon ni ke yib angin ngak reb e walag nib pin e fager ni ke yag ngak u nap’an ni ur toyed boch e naun rodad u taabang?

¹¹ Piin ni yad ma ognaged yad ni ngar uned i toy boch e naun rodad e boor e fager ni ma yag ngorad. Am lemnag e n’en ni buch rok reb e walag ni ka nog Margie ngak ni ke gaman 18 e duw ni ke un i toy boch e Tagil’ e Liyor rodad. U lan e pi duw nem, ma ke yag ni nge ayuweg boch e walag nib pin ni yad bbitir ngak miki skulnagrad u rogon ni ngar rin’ed e re maruwel nem. Ke guy ni pi maruwel nem ni yima rin’ e aram boch e kanawo’ nrayog ni nge bagadad me pi’ e athamgil nga laniyan’ bagadad ko tirok Got ban’en. (Rom. 1:12) Ma riyul’ e re n’em, ya nap’an nra mada’nag Margie reb e magawon, ma pi fager ni ke yag ngak u nap’an ni ur toyed boch e Tagil’ e Liyor rodad u taabang e aram e piin ni yad ma pi’ e athamgil nga laniyan’. Bay ba ngiyal’ ni kam ognagem ni ngam un i toy boch e naun rodad, fa? Gur, rayog ni ngam ognagem ni ngam un i rin’ e pi maruwel ney ndemtrug ko ga manang rogon e dimow naun fa danga’?

12. Uw rogon nrayog ni ngam pi’ e ayuw u tomuren ni ke yib e yoko’, ara durru’, ara boch ban’en ni ma yib ni yima gafgow riy?

¹² Ku gad ma maruwel Jehovah u taabang u nap’an ni gad ra ayuweg pi walagdad ni kar gafgowgad ni bochan e yoko’, ara durru’, ara boch ban’en ni  ma yib ni yima gafgow riy. Bod nrayog ni ngad pied e salpiy ni ayuw ngorad. (John 13:34, 35; Acts 11:27-30) Reb e kanawo’ ni ku rayog ni ngad pied e ayuw riy e aram e ngad pied e ayuw ko klin ara ngad fal’eged e yungi n’en ni ke kireb ko naun rorad. Bay reb e walag nib pin u Poland ni ka nog Gabriela ngak ni kireb e naun rok u tomuren ni yib e ran i tharey e binaw ko gin ni ma par riy. Ri felfelan’ u nap’an ni yib e pi walag u reb e ulung nib chugur e ngaram ni ngar ayuweged. I yog ni gaar: “Dabug ni nggu weliy murung’agen e chugum rog ni ke kireb, ya pi n’em e kemus ni chugum. Machane, gu baadag ni nggu weliy murung’agen e pi n’en ni ke yag ngog ni bochan e re n’ey ni ke buch rog. Re n’ey ni ke buch rog e be puguran ngog nri gub tow’ath ni gag bang ko ulung ni Kristiano, maku gub felfelan’ ko re n’ey.” Boor e piin ni kan ayuwegrad u tomuren reb e yoko’, ara durru’, ara boch ban’en ni ma yib ni yima gafgow riy ni ku rogned ni boor ban’en ni ke fel’ rogorad riy ni fan ko tirok Got ban’en ni bochan e n’en ni ke buch rorad. Ma piin ni yad ma maruwel Jehovah u taabang ni ngar ayuweged e pi walag ney e rib gel e felfelan’ ni ma yib ngorad.​—Mu beeg e Acts 20:35; 2 Korinth 9:6, 7.

13. Uw rogon ni ma gel e t’ufeg rodad ngak Jehovah u nap’an ni gad ra ognaged gadad ni ngad rin’ed boch e maruwel ni fan ngak? Mu weliy ban’en ni ke buch.

¹³ Bay reb i walagdad nib pin ni ka nog Stephanie ngak nge ku boch e walag nra felfelan’gad ni ke yag ni ngar maruwelgad Got u taabang ni ngar ayuweged e Pi Mich ni kar milgad kar chuwgad ko binaw rorad kar bad nge Meriken ni bochan e mahl. Kar ayuweged e pi walag ney ni ngar pirieged bang ni ngar pared riy, mu kun ayuwegrad ni ngar pirieged boch e chugum ni ngar ted nga lan e naun rorad. I yog Stephanie ni gaar: “Rug felfelan’gad ni bochan e gguyed gelngin e felfelan’ ni kar ted nge rogon e t’ufeg ni ke dag e pi walag ngorad ni kar bad u ga’ngin yang e fayleng.” Ki ulul ngay ni gaar: “Be lemnag girdien e pi tabinaw ney ni gamad e kug ayuweged yad, machane bin riyul’ riy e, yad e kar ayuweged gamad. Rogon e t’ufeg, nge taareban’ ni bay u thilrad, nge michan’, nge pagan’ rorad ngak Jehovah ni kug guyed e kari gelnag e t’ufeg romad ngak Jehovah, ma re n’ey e be k’aringmad ni ngari ga’ fan u wan’mad urngin ban’en ni be pi’ ngodad u daken e ulung rok.”

14, 15. (a) Uw rogon e lem rok Isaiah ni profet? (b) Uw rogon nrayog ni nge folwok e piin Kristiano rok Isaiah?

¹⁴ Ga baadag ni ngki yoor boch ban’en ni gimew be rin’ Jehovah u taabang, fa? Ba m’agan’um ngay ni ngam man mu pi’ e ayuw ko machib nga reb e nam nib t’uf boch e tamachib riy, fa? Riyul’ nde t’uf ni nga darod da pared nga yugu reb e nam nib palog ni ngad pigpiggad ngak Jehovah. Machane bay boch e walag nrayog ni ngar rin’ed e re n’ey. Pi walag ney e taareb rogon e lem rorad Isaiah ni profet. Nap’an ni fith Jehovah ni gaar: “I mini’ e nggu l’og nge yan? I mini’ e nggu tay e thin nga l’ugun nge fek e thin romad nge yan?” Me fulweg fare profet ni gaar: “Bay gu wan! Mu l’ugeg!” (Isa. 6:8) Ere rayog rom ma kub m’agan’um ngay ni ngam pi’ e ayuw u lan e ulung rok Jehovah, fa? Mang boch e kanawo’ nrayog ni ngam pi’ e ayuw riy?

¹⁵ Baaray e n’en ni yog Jesus u murung’agen fare  maruwel ni ngan machib min ayuweg e girdi’ ni ngar manged boch i gachalpen. I gaar: “Woldug ni ngan kunuy ngan tay nga naun e ba ga’ ni ba ga’ yang, machane piin ni ngar muruwliyed nge thap nga naun e ba lich. Mu yibilgad ngak e en ni ir e suwon e re woldug nem ngki pi’ boch girdien e maruwel ngar muruwliyed e re woldug rok nem nge thap nga naun.” (Matt. 9:37, 38) Ere gur, rayog ni ngam pioneer u reb e binaw nib t’uf boch e tamachib riy, fa? Rayog ni ngam ayuweg be’ ni nge rin’ e re n’ey, fa? Boor e walag ni yad ma yog ni bin th’abi fel’ e kanawo’ ni ngar daged nib t’uf Got nge girdi’ rorad e aram e ngar pioneergad u boch e binaw nib t’uf boch e tamachib riy. Ka bay yugu boch e kanawo’ nrayog ni ngam yoornag boch ban’en ni ga be rin’ riy ni fan ko pigpig rom ngak Jehovah, fa? Faan rayog ni ngam rin’ reb e pi n’ey, ma rib gel e felfelan’ ni ga ra tay.

16, 17. Mang boch e kanawo’ ni ku rayog ni ngam yoornag boch ban’en riy ni ga be rin’ ni fan ko pigpig rom ngak Jehovah?

¹⁶ Ba m’agan’um ngay ni ngam pigpig u Bethel ara ngam un i toy boch e naun rodad ni bay n’umngin nap’an mag tal ara kemus ni in e rran u reb e wik, fa? Gubin ngiyal’ nib t’uf boch e walag nrayog ni ngar pigpiggad ngak Jehovah ko gin ni kan tayrad ngay ni ngar pied e ayuw, maku demtrug e re miti maruwel ni yira pi’ ngorad ma yad ra rin’ ni yugu aram rogon nsana gathi ri ireram e re miti maruwel nri yad ba salap riy. Machane rib ga’ fan u wan’ Jehovah e piin ni yad ma pag farad u boch ban’en ya nge yag nra pigpiggad ko gin nib t’uf e ayuw riy.​—Ps. 110:3.

¹⁷ Ga baadag ni ngan skulnagem ya nge yag nim yoornag boch ban’en ni ga be rin’ ni fan ko pigpig rom ngak Jehovah, fa? Faanra arrogon, ma sana rayog ni ngam un ko fare skul ni ka nog e School for Kingdom Evangelizers ngay. Re skul ney e ma ayuweg e pi walag ni pumoon nge ppin ni kar ilalgad ko tirok Got ban’en ni yad be pigpig u polo’ e tayim rorad ya nge yag ni fanayrad e ulung rok Jehovah ni ngkur rin’ed yugu boch e maruwel. Piin ni yad ma un ko re skul ney e thingari m’agan’rad ngay ni ngar pigpiggad ko gin ni kan pi’rad ngay u tomuren ni kar mu’naged e re skul ney. Ere gur, ba m’agan’um ngay ni ngam ognagem ni ngkum rin’ yugu boch ban’en ni fan ngak Jehovah, fa?​—1 Kor. 9:23.

18. Mang angin nra yib ni faan gimew ra maruwel Jehovah u taabang ni gubin e rran?

¹⁸ Bochan ni gadad e girdi’ rok Jehovah ma aram fan ni gad ma gol ko girdi’, ma gad ma dag e ngongol nib fel’ ngorad, ma gad ma dag e sumunguy, nge t’ufeg ngorad. Re n’ey e ma yibnag e gapas nge felfelan’ ngodad. (Gal. 5:22, 23) Demtrug rogon e par rom, ma rayog ni ngam pirieg e felfelan’ ni faan ga ra folwok rok Jehovah u rogon ni ma gol ngodad, me yag nim ulul ni ngam maruwelgow u taabang mag par nib ga’ fam u wan’!​—Prov. 3:9, 10.