BOCHAN ni ke gel e mo’maw’ ko par e ngiyal’ ney ko “tin tomren e rran,” ma aram fan nrib t’uf ni ngaud gum’an’gad. (2 Tim. 3:1-5) Gad be par u ba fayleng ni girdi’ riy e yigoo yad e yad be lemnaged yad, ma dubrad ni nga ranod nga laniyan’ yugu boch e girdi’, ma darur t’ared lanin’rad. Girdi’ ni aray rogon e darur gum’an’naged yad. Ere ba t’uf ni ngad fithed gadad ni nge lungudad: ‘Gu bod e girdi’ ko re fayleng ney ndar nanged rogon ni ngar gum’an’naged yad, fa? Mang e be yip’ fan ni ngaun gum’an’nagey? Ma uw rogon ni nggu maruweliy e re fel’ngin ney ya nge yag ni par ni ke mang bang u rarogog?’

Mang e be yip’ fan fare bugithin ni “gum’an’” nrogon ni kan fanay u lan e Bible? Re bugithin ney e gathi kemus ni be yip’ fan ni ngam athamgil u fithik’ reb e magawon. Be’ nib gum’an’ e be athamgil ni bochan e bay ban’en ni be athapeg ni aram e ra taw nga ba ngiyal’ ma ra m’ay e magawon rok. Gathi kemus ni yigoo ir e ma lemnag ir, ya ku ma lemnag rogon laniyan’ yugu boch e girdi’, ni kub muun ngay e piin ni kar kirebnaged laniyan’ ara kar rin’ed ban’en nde mat’aw ngak. Ku ma athapeg ni nge ba ngiyal’ me fel’ e tha’ u thilrad bayay. Ere aram fan ndab da gingad ngay ni be yog e Bible ni faanra bay e t’ufeg rodad, ma aram e rayog ni ngaud ‘gum’an’gad’. a (1 Kor. 13:4) Ku be weliy e Bible ni “gum’an’” e aram bang u “wom’engin gelngin Got nib thothup.” (Gal. 5:22, 23, NW) Ere faanra nge yag e re fel’ngin ney ngodad, ma mang e ba t’uf ni ngad rin’ed?

Ra ngad nanged rogon ni ngaud gum’an’gad, mab t’uf ni ngad meybilgad ngak Jehovah ni nge pi’ gelngin nib thothup ni nge ayuwegdad, ya ma pi’ e re n’ey ngak e piin ni ma pagan’rad ngak ma yad ma taga’ ngak. (Luke 11:13) Ere yugu aram rogon nrib gel gelngin Got nib thothup, ma thingar da maruweliyed e pi n’en ni gad be yibilay. (Ps. 86:10, 11) Re n’ey e be yip’ fan ni gubin e rran nthingar da gayed rogon ni ngaud gum’an’gad ya nge yag ni par ni ke mang bang u rarogodad. Yugu aram rogon ma sana ka bay boch ban’en nib t’uf ni ngad rin’ed ya nge yag ni m’ug e re fel’ngin ney ko ngongol rodad ni gubin ngiyal’. Ere, mang e rayog ni ngki ayuwegdad?

Rayog ni nge yag e re fel’ngin ney ngodad ni faan gad ra fal’eg i fil murung’agen e pi n’en ni i rin’ Jesus ma gad folwok rok. Nap’an ni weliy apostal Paul murung’agen e ‘bin nib beech i gadad’ nib muun ngay e gum’an’, ma aram me pi’ e athamgil nga lanin’dad ni gaar: “Gapas ni ma pi’ Kristus nga lanin’dad e nge mang ir e ngi i gagiyegnag lanin’med.” (Kol. 3:10, 12, 15) Rayog ni ngad paged e re gapas ney ni nge “gagiyegnag” lanin’dad ni aram e ngad folwokgad rok Jesus u rogon ni par nrib mich u wan’ nra yal’uweg Got gubin ban’en ko ngiyal’ ni ke dugliy riy ni nge rin’. Faan gad ra folwok rok Jesus ma demtrug ko mang e ra buch u toobdad ma rayog ni ngad gum’an’gad.​—John 14:27; 16:33.

Yugu aram rogon nri gad be athapeg ni nge papey nge yib e bin nib beech e fayleng rok Got, machane faan gad ra fal’eg i lemnag rogon ni be gum’an’ Jehovah u puluwdad, ma rayog ni nge ayuwegdad ni ngaud gum’an’gad. Be micheg e Bible ngodad ni be gaar: “Dawori sowath Somol ni nge rin’ e tin ni ke yog nra rin’, ni bod rogon ni be lemnag boch e girdi’. Ya be gum’an’nag ir u puluwmed, ni fan e dabun ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.” (2 Pet. 3:9) Ere nap’an ni gad ra fal’eg i lemnag rogon ni be gum’an’ Jehovah u puluwdad, ma ra k’aringdad e re n’ey ni ngkud gum’an’gad u puluwon e girdi’. (Rom. 2:4) Ere mang boch ban’en ni ma buch rodad nib t’uf ni ngad gum’an’gad riy?

Boor ban’en ni ma buch u reb e rran ngu reb nrayog ni nge skengnag e gum’an’ rodad. Bod ni, faanra ga be lemnag ni bay ban’en nib ga’ fan nthingar mog ngak be’, mab t’uf ni ngam gum’an’ ngam son ya nge dab mu th’ab e thin rok facha’. (Jas. 1:19) Maku reb e, thingar mu gum’an’nagem u nap’an ni gimed be chag boch e walag u taabang ni ma kankanan’um ngorad ni bochan boch ban’en u rarogorad ni kar mechamgad ngay. Gab gonop ni faan ga ra lemnag rogon e n’en ni ma rin’ Jehovah nge Jesus ko pi meewar rodad, ko bin ni ngam pag e pi n’ey ni nge k’aring e damumuw ngom. Jehovah nge Jesus e darur parew ngaur fal’egew i yaliy nochi ban’en ni gad ba meewar riy, ya yow ma yaliy pi fel’ngidad maku yow ma gum’an’ ngar piew e tayim ngodad ni ngad thilyeged boch ban’en u rarogodad.​—1 Tim. 1:16; 1 Pet. 3:12.

Ku reb e ban’en nrayog ni nge skengnag e gum’an’ rodad e nap’an nra yog be’ ni bay ban’en ni ka dogned ara kad rin’ed nib kireb. Sana n’en ni gad ra rin’ nsom’on e ngad damumuwgad ngak facha’, ma gad guy rogon ni nge yan i aw ni gadad e ba fel’ e rodad. Machane ba thil e n’en ni be yog Got ko Thin rok ni ngad rin’ed. Be gaar: “Kab fel’ e gum’an’ ko tolangan’. Mu kol ayuw ko damumuw rom; de fel’ ni ngam chaariy e kireb u wun’um.” (Ekl. 7:8, 9, BT) Ere yugu aram rogon ni kan weliy ban’en u murung’agdad nde riyul’, machane thingar da gum’an’gad ma gad lem nib fel’ rogon u m’on ni ngad rin’ed ban’en. Ireray e n’en ni rin’ Jesus u nap’an ni weliy boch e girdi’ boch ban’en nde riyul’ u murung’agen.​—Matt. 11:19.

Ba ga’ ni piin gallabthir e rib t’uf ni ngar gum’an’gad u nap’an ni yad be guy rogon ni ngar ayuweged pi fakrad ni ngar yal’uweged rogon e lem ni yad be tay mi yad siyeg boch e ar’ar nib kireb ni bay rorad. Am lemnag e n’en ni buch rok Mattias nreb e walag ni ma pigpig u Bethel u Scandinavia. Nap’an ni kab fel’ yangaren Mattias ma gubin ngiyal’ ni yima moningnag u skul ni bochan e michan’ rok. Som’on e de nang e gallabthir rok murung’agen e re ney. Machane, munmun ma aram mar guyew ni ke tabab ni nge maruwar e tin riyul’ u wan’ Mattias. I yog Gillis ni chitamangin Mattias ni gaar: “Thingar gu gum’an’gow u puluwon Mattias, ya bayi n’en me fith ni gaar, ‘Mini’ Got? Uw rogon ni faanra Bible e gathi Thin rok Got? Uw rogon ni kad nanged nriyul’ ni Got e baadag ni ngad rin’ed e re n’ey ara re n’em?’” Maku bayi n’en me fith ngak e chitamangin ni gaar: “Mang fan ni ngan pufthinnigeg ni faanra de mich u wan’ug e n’en nib mich u wan’um?”

Ki yog Gillis ni gaar: “Bay yu ngiyal’ ni ma fith fakmow e pi deer ney ngomow u fithik’ e damumuw. Machane gathi be dag ni be togopuluw ngomow e chitiningin, ya be togopuluw ko tin riyul’, ya be lemnag ni tin riyul’ ni ke fil e be mo’maw’nag rogon e par rok.” Ere uw rogon ni  ayuweg Gillis e re pagel ni fak ney? I yog ni gaar: “Gamow ma par fakag nga but’ nggu nonow ni bokum e awa. Ba ga’ ni gu ma motoyil ngak u nap’an ni be non, ngemu’ mug fith boch e deer ngak ya nge yag nug nang ko mang e be lemnag. Bay yu ngiyal’ ni gu ma weliy boch ban’en ngak mug pi’ reb e rran ara in e rran ngak ni nge fal’eg i lemnag u m’on ni ngkug weliyew bayay. Ma yu ngiyal’ e gu ma yog ngak ni nge pi’ in e rran ngog ni nggu fal’eg i lemnag ban’en ni ke yog ngog. Bochan ni gamow ma non Mattias ni gubin e rran, ma aram me munmun me yag ni nge ga’ e tamilangan’ rok miki puluw u wan’ boch e machib ni bod rogon murung’agen e biyul, nge mat’awun Got ko gagiyeg, nge t’ufeg rok Jehovah. Ba t’uf e tayim ni nggu rin’ e re n’ey, ma kub ga’ nib mo’maw’ ni nggu rin’, machane buchuuw ma buchuuw ma aram me yag ni nge gel e t’ufeg rok ngak Jehovah. Kug felfelan’gow e ppin rog ni bochan e kug athamgilgow kug gum’an’gow u puluwon fakmow u nap’an ni kab fel’ yangaren ma ke yag ni nge yib angin miki yag ni nge rich e tin riyul’ nga gum’irchaen.

Ba pagan’ Gillis nge ppin rok ngak Jehovah nra ayuwegrow u nap’an ni yow be gum’an’nagew yow ni ngar ayuwegew e re pagel ni fakrow nem. I yog Gillis ni gaar: “Ba ga’ ni gu ma yog ngak Mattias ni bochan gelngin nrib t’uf romow e chitiningin, ma aram e n’en ni ke k’aringmow ni ngaug parew ni gamow be meybil ngak Jehovah ni nge ayuweg nge nang fan e tin riyul’.” Dariy e maruwar riy ni kari felfelan’ Gillis nge ppin rok ni kar gum’an’nagew yow!

Kub t’uf ni ngad gum’an’gad u nap’an ni gad be ayuweg reb i girdien e tabinaw rodad ara fager rodad ni ke n’uw nap’an ni be par nib m’ar. Am lemnag e n’en ni buch rok Ellen b ni ku ma par u Scandinavia.

Sogonap’an meruk e duw ni ke yan, ma l’agruw yay ni stroke e pumoon rok Ellen, ma aram me magawon rogon ni ma maruwel e man’ey rok. Bochan e re n’ey ma dabkiyog ni nge runguy e girdi’, ara felfelan’, ara kireban’, ere rib gel e mo’maw’ riy ngak Ellen. I yog ni gaar: “Rib t’uf ni ngaug gum’an’nageg, ma gu be meybil ni gubin ngiyal’.” Ki ulul ngay ni gaar: “Fare thin nu Bible ni bay ko Filippi 4:13 (NW) e aram e re thin nu Bible nrug baadag, ya be gaar: ‘Demtrug e miti n’en ni gu ra mada’nag ma ba’ gelngig ni ke pi’ nrayog ni gu par riy.’” Ere, bochan gelngin Jehovah, ma ke yag ni nge gum’an’nag Ellen ir me athamgil u fithik’ e magawon rok me pagan’ ngak Jehovah nra ayuweg.​—Ps. 62:5, 6.

Riyul’ ni yigoo Jehovah e ke dag e bin th’abi fel’ e kanawo’ u rogon ni ngad gum’an’naged gadad. (2 Pet. 3:15) Ba ga’ ni gad ma beeg murung’agen rogon feni gum’an’ Jehovah u lan e Bible. (Neh. 9:30; Isa. 30:18) Ka ga manang e n’en ni rin’ Jehovah u nap’an ni fith Abraham boch e deer ngak u murung’agen fan ni nge gothey fare mach nu Sodom? Som’on e de th’ab Jehovah e thin rok Abraham u nap’an ni be non. Ya gum’an’nag ir nge motoyil nga urngin e deer ni fith Abraham ngak miki motoyil ngak u nap’an ni be weliy murung’agen e pi n’en ni be magafan’ ngay. Ma aram me dag ngak Abraham ni be motoyil ngak ni aram e sul u daken urngin e pi n’en ni ke yog Abraham ni be magafan’ ngay, ma aram miki micheg ngak ni mus ni faanra kemus ni ragag e girdi’ nib mat’aw ni bay u lan fare mach nu Sodom, ma dabi thang e re mach nem. (Gen. 18:22-33) Ere, rib manigil e kanawo’ ni ke dag Jehovah u rogon ni ke gum’an’nag ir ke motoyil ma de damumuw nib papey!

Gum’an’ e aram reb i fel’ngin Got, maku bang ko bin nib beech e pangin nib t’uf ni nge gubin e Kristiano ma ron’ed nga dakenrad. Faan gad ra athamgil ni nge yag e re fel’ngin ney ngodad nrib manigil, ma aram e rayog ni ngad pininged e sorok ngak Jehovah ni Chitamangidad ni ir fare Got nrib gum’an’ mu kud manged boch e “piin nib mich Kristus u wun’rad ma ba gum’an’rad, ma aram fan ni ke yog ngorad e tin ni yog Got nra pi’.”​—Heb. 6:10-12.