1, 2. (a) Mang e bin th’abi ga’ fan e maruwel u lan e yafos rok Jesus, ma mang fan? (b) Mang e thingar da rin’ed ya nge yag ni ngad ‘maruwelgad Got u taabang’ nib fel’ rogon?

 JESUS KRISTUS e immoy ni ir reb e daiksang, me boch nga tomuren me mang reb e tamachib. (Mark 6:3; John 13:13) Ke rin’ e gal maruwel ney nib fel’ rogon. Ya nap’an ni immoy ni ir reb e daiksang me fil rogon ni nge fanay e pi talin e maruwel rok ni nge ngongliy yaan boch ban’en riy ko ren nrayog ni ngan fanay. Ma nap’an ni mang reb e tamachib me fanay e tamilangan’ rok ko pi n’en nib toar fan ni bay u lan e Bible ni nge ayuweg e girdi’ ni ngar nanged fan e Thin rok Got. (Matt. 7:28; Luke 24:32, 45) Ere nap’an ni gaman 30 e duw rok Jesus me tal ndaki mang reb e daiksang, ma aram me mang reb e tamachib. Ya manang ni ireray e bin th’abi ga’ fan e maruwel ni nge rin’. Ke yog nreb i fan ni ke l’og Got ni nge yib nga fayleng e bochan ni nge machibnag fare thin nib fel’ ni murung’agen Gil’ilungun Got. (Matt. 20:28; Luke 3:23; 4:43) Aram fan ni tay e re maruwel ney ni ngan machibnag fare thin nib fel’ ni ireram e n’en nib m’on u lan e yafos rok, ma baadag ni nge un yugu boch e girdi’ i rin’ e re maruwel ney.​—Matt. 9:35-38.

² Yooren i gadad e gathi yad boch e daiksang, machane gad gubin ni gad bogi tamachib ni fan ko fare thin nib fel’. Ma re maruwel ney nrib ga’ fan e ba muun Got ngay. Bin riyul’ riy e be yog e Bible ni ‘gadad be maruwel Got u taabang.’ (1 Kor. 3:9; 2 Kor. 6:4) Aram fan nib m’agan’dad ko n’en ni yog fare psalmist ni gaar: “Tin riyul’ e ir e def ko thin rom.” (Ps. 119:159, 160, NW) Ere thin rok Jehovah e ba riyul’. Aram  fan ni gad baadag ni ngad ‘machibnaged e thin rok Got nrogon’ u nap’an e machib. (Mu beeg 2 Timothy 2:15.) Ere ngad athamgilgad ni ngad salapgad i fanay e Bible, ya ireray e bin th’abi ga’ fan e talin e maruwel ni gad ma fanay ni ngad filed murung’agen Jehovah nge Jesus nge Gil’ilungun ngak e girdi’. Ke ngongliy e ulung rok Jehovah boch e talin e maruwel ni nge ayuwegdad ni ngad machibgad nib fel’ rogon, ere ba t’uf ni ngad nanged rogon i fanay e pi n’ey. Pi talin e maruwel ney e bay u lan fare Tafen Talin e Maruwel ni Yima Fanay ni Ngan Fil Ban’en ko Girdi’.

3. Mang e thingar da tiyan’dad ngay ni ngad nameged u nap’an ni gad be machib, ma uw rogon ni be ayuwegdad fare thin ko Acts 13:48 ni ngad rin’ed e re n’ey?

³ Rayog ni ngam lemnag ko mang fan ni gad ma yog Tafen Talin e Maruwel ni Yima Fanay ni Ngan Fil Ban’en ko Girdi’ ngay ma gathi Tafen Talin e Maruwel ni Fan ko Machib. Re n’ey e bochan ni faanra ngam “machib” ma be yip’ fan ni ga be weliy murung’agen ban’en ngak be’. Machane ra ngam “fil” ban’en ku be’ ma be yip’ fan ni ngam weliy murung’agen ban’en ngak mag tamilangnag fan ya nge yag ni nge nang fan, ya aram e n’en nra k’aring ni nge fol ko pi n’en ni ke fil. Ere chiney ni ke ngoch nap’an e gin ni ka bay ko re m’ag ney, ma aram fan thingar da tiyan’dad ni ngad nameged ni ngad tababnaged e fol Bible ko girdi’, ma gad fil ngorad e tin riyul’ ya nge yag ni ngar manged boch pi gachalpen Kristus. Re n’ey e be yip’ fan ni ngad pasiggad i gay e “piin ni bay rogon ni nge yag e yafos ni manemus ngorad,” ma gad ayuwegrad ni ngar pigpiggad ngak Jehovah.​—Mu beeg e Acts 13:44-48, NW. a

4. Uw rogon nrayog ni ngad pirieged e “piin ni bay rogon ni nge yag e yafos ni manemus ngorad”?

⁴ Uw rogon nrayog ni ngad pirieged e “piin ni bay rogon ni nge yag e yafos ni manemus ngorad”? Tin som’on e Kristiano e ur machibgad ya kemus e taare e kanawo’ nrayog ni ngar pirieged e pi girdi’ ney riy. Ere yog Jesus ngak pi gachalpen ni gaar: “Faan gimed ra yib nga reb e binaw ni pire’ e girdi’ riy fa reb e binaw nib lich e girdi’ riy, mi gimed yan nga lan ngam guyed be’ ni ba adag ni ngam pired rok [“e piin ni yad baadag ni ngar nanged e tin riyul’,” NW].” (Matt. 10:11) Ere ku ireray e n’en ni ngad rin’ed e ngiyal’ ney. Bin riyul’ riy e, faanra de yul’yul’ e girdi’, ma yad ba tolangan’, ara dariy fan Got u wan’rad, ma dab da lemnaged ni yad ra motoyil ko fare thin nib fel’. Ya gad be gay e piin ni yad ba yul’yul’, mab sobut’an’rad, ma riyul’ ni yad baadag ni ngar nanged e tin riyul’. Rayog ni ngad taareb rogonnaged rogon ni gad be gay e girdi’ ko pi n’en ni rin’ Jesus u nap’an ni immoy nib daiksang. U m’on ni nge ngongliy reb e ban’en ni fen lan e naun, ara reb e mab, ara mat’, ara yugu ban’en, ma som’on e nge gay reb e ren nra fel’ ko re miti n’en ni nge ngongliy. Ma aram me fek talin e maruwel rok, me fanay e salap rok ni nge ngongliy fare n’em. Ere ku arrogon e ngiyal’ ney, som’on e ngad gayed e piin ni yad baadag ni ngar nanged e tin riyul’, ma aram ma gad fanay e pi talin e maruwel nge salap rodad ni ngad ayuweged yad ni ngar manged boch pi gachalpen Jesus.​—Matt. 28:19, 20.

5. Mang e ba t’uf ni ngad nanged ko pi talin e maruwel rodad ni bay u lan fare Tafen Talin e Maruwel ni Yima Fanay ni Ngan Fil Ban’en ko Girdi’? Mu weliy rogon. (Mu guy fapi sasing ni bay u tabolngin e re article ney.)

⁵ U lan fare tafen talin e maruwel, ma ra reb e talin e maruwel riy ma bay e n’en ni yima fanay ngay. Bod ni, am lemnag e pi talin e maruwel ni fanay Jesus u nap’an ni ir reb e daiksang. b Ba t’uf ni nge yag e pi talin e maruwel ngak ni nge fanay ni nge foleg ban’en, me tay e pow ngay, me th’ab, me burburnag, me fal’eg rogon fare gi ren nge yan i par. Ma kub t’uf boch talin e maruwel ni nge ayuweg u nap’an nra puthuy ban’en me par nib taab foyin. Ere ku taareb rogon ko pi talin e maruwel  ni bay rodad u lan fare Tafen Talin e Maruwel ni Yima Fanay ni Ngan Fil Ban’en ko Girdi’, ya ra reb ma bay e n’en ni yima fanay ngay. Ere ngad weliyed rogon nrayog ni ngad fanayed e pi talin e maruwel ney nrib ga’ fan.

6, 7. (a) Uw rogon ni ke yag ni ngam fanay fapi contact card? (b) Mang fan ni gad ma fanay fare invitation ni ngad pininged e girdi’ ko muulung?

⁶ Pi Contact Card. Yugu aram rogon nib achig, machane ireray reb e talin e maruwel rodad nib ga’ angin nra yib ko machib rodad. Ya pi card ney e ma yog ko girdi’ ko gad mini’ maku ma pow’iyrad ko fare website rodad ni jw.org. Ma nap’an ni yad ra yan ko website rodad, ma yad ra nang boch ban’en u murung’agdad maku rayog ni ngar yoloyed bang e request ni ngan fil e Bible ngorad. Ke pag 400,000 e girdi’ ni yad ma yan ko jw.org ni nga rogned ni ngan fil e Bible ngorad, ma ra reb e rran mab pag raay e girdi’ ni yad be rin’ e re n’ey! Rayog ni ngam tay in e pi contact card ney rom, ya nge yag ni ngam fanay ni ngam non ngak e girdi’ ni ga be mada’nagrad u reb e rran ngu reb.

⁷ Pi Invitation. Pi invitation ney ni kan ngongliy e be gaar: “Yibe piningem ni ngam un ko Pi Mich Rok Jehovah ko fol Bible.” Ma aram miki yog nrayog ni ngam rin’ e re n’ey “u nap’an e pi muulung romad” ara “gimew be’.” Ere fare invitation e be yog ko girdi’ ko gad chon mini’, maku be pining e “piin ni kar pirieged u lanin’rad ni kar gafgowgad ndabi siy ni nge yog Got ngorad” ni ngad filed e Bible ngorad. (Matt. 5:3) Riyul’ ni gubin e girdi’ nib puf mat’awun ni ngar uned ko pi muulung rodad ni yugu aram rogon ndawor rogned ni ngan fil e Bible ngorad. Machane nap’an ni yad ra un ko muulung rodad, ma yad ra guy ni boor ban’en nrayog ni ngar filed u murung’agen e Bible.

8. Mang nib ga’ fan ni nge un e girdi’ ko pi muulung rodad ni yugu aram rogon ni taab yay ni ke yag ni ngar bad ko muulung? Mu weliy ban’en ni ke buch.

⁸ Ba ga’ fan ni ngad ululgad i pining e girdi’ ni ngar bad ko pi muulung rodad ni yugu aram rogon ni taab yay ni ke yag ni ngar bad ko muulung. Mang fan? Ya nap’an ni yad ra yib, ma yad ra guy ni Pi Mich Rok Jehovah e yad be fil e tin riyul’ u lan e Bible, ma yad be ayuweg e girdi’ ni ngar nanged Got, ni aram ban’en nder rin’ e pi teliw ni googsur. (Isa. 65:13) Bod ni, bay ba wu’ i mabgol u Meriken ni ka nog Ray nge Linda ngorow ni ke yan boch e duw ni ke tamilang e re n’ey u wan’row. Ba mich Got u wan’row maku yow baadag ni ngki yoor ban’en ni ngar nangew u murung’agen. Ere ra dugliyew ni nga ranow nga gubin e galesiya ni bay u lan e re mach nem ni yow ma par riy. Ma l’agruw ban’en ni yow be changarnag u m’on ni ngar dugliyew ko bin ngan e ngar unew ngay. Bin som’on e, nap’an ni yow ra un ko re galesiya nem ma bay ban’en ni ngar filew u nap’an ni yira pi’ e welthin. Ma bin l’agruw e, susun nra m’ug u rogon e munmad ko girdien e re teliw nem ni yad be munmad nrogon e piin ni yad ma pigpig ku Got. Ere boor e duw nrin’ew e re n’ey ni bochan e boor raba’ e teliw u rom. Ma kari kireban’row ni bochan e gubin e pi galesiya ni ka ranow ngay, ma dariy ban’en ni ke yag ni ngar filew riy, ma be m’ug u rogon e munmad ko girdien e pi teliw nem nde yalen. Ere tomuren ni kar chuwgow ko bin tomur e galesiya ni bay ko babyor rorow ni kar yoloyew nga but’, ma aram me yan Linda ko maruwel me sul Ray nga tabinaw. Machane nap’an ni be sul i yib nga tabinaw me thilyeg reb e Tagil’ e Liyor rodad. Ma aram me gaar u wan’, ‘Nggu wan ngaram nggu guy e n’en ni be buch u rom.’ Ma riyul’ ni ireray ban’en ni ke buch rok nrib manigil! Ya gubin e girdi’ u rom ni yad ba gol mab fel’ rogon e munmad rorad. Ere par Ray ko thal ni nga m’on e chiya ma ri baadag e n’en ni ke fil! Re n’ey e be puguran ngodad fare thin ni yog apostal Paul u murung’agen e n’en ni ma yog be’ nra un ko muulung rodad ko yay nsom’on ni ma gaar: “Riyul’ ni ba’ Got romed u roy.” (1 Kor. 14:23-25) Ma nga tomuren e re ney, ma gubin e Madnom ni ma yib Ray ko muulung. Munmun me tabab ni nge un ko gubin e muulung ni yima tay u lan e wik. Ku arrogon Linda ni ki tabab ni nge un ko muulung, ma  yugu aram rogon ni ke pag 70 e duw rorow, mar tababgow ko fol Bible, ma boch nga tomuren mar unew ko taufe.

9, 10. (a) Mang fan nib mom rogon ni ngad fanayed e pi tract rodad? (b) Mu weliy rogon nrayog ni ngad fanayed fare tract ni Mang e Gil’ilungun Got?

⁹ Pi Tract. Bay meruk e tract ni gad ma fanay ni bay u lan fare tafen talin e maruwel ni gad ma fanay ni ngad filed ban’en ko girdi’. Pi tract ney e ba mom rogon ni ngad tababnaged e numon riy ngak e girdi’. Ka nap’an nni ngongliy e bin som’on e tract rodad ko duw ni 2013, ma ke gaman 5 bilyon ken ni kan printnag! Ba taareb rogon ni kan yarmiy e pi n’en ni bay ko pi tract ney. Ere nap’an ni ga ra nang rogon ni ngam fanay reb, ma aram e ku rayog ni ngkum fanay e tin ka bay e tract! Uw rogon ni ngam fanay reb ko pi tract ney ni ngam tababnag e numon ngak be’?

¹⁰ Rayog nsana ga baadag ni ngam fanay fare tract ni kenggin e Mang e Gil’ilungun Got? Ere som’on ni kam mada’nag be’, ma ngam dag ngak fare deer ni bay u m’on ko re tract nem, mag fith ngak ni lungum: “Ga be lemnag ma mang Gil’ilungun Got? Ga ra yog ni aram e . . . ?” Ngemu’ mag pag ni nge mel’eg reb e fulweg ko pi n’en ni bay ko re tract nem. Yugu demtrug ko ba puluw e fulweg ni ke mel’eg fa danga’, mag pithig e re tract nem ko fare section ni “Mang e Be Yog e Bible” ni bay u langgin fare tract, mag beeg fa gal thin nu Bible ni Daniel 2:44 nge Isaiah 9:6. Tomuren e numon romew, ma rayog ni ngam fith fare deer ni “Ra uw rogon e par ko girdi’ u tan Gil’ilungun Got?” ni bay u tomur ko re tract nem ko fare section ni “Ngan Lemnag.” Ireray e n’en nrayog ni ngam weliyew e fulweg riy ko yay ni migid ni ngam nonow. Ma nap’an ni gimew ra mada’ bayay, ma rayog ni ngam weliyew e guruy ni 7 ko fare ke brochure ni Thin nib Fel’ ni Yib rok Got!, ni ireray reb ko pi n’en ni gad ma fanay ni ngad tababnaged e fol Bible ngak be’.

11. Mang fan ni kan ngongliy e pi magazine rodad? Ma mang e thingar da nanged u murung’agen?

¹¹ Pi Magazine. Fa gal ke magazine ni kenggin e Fare Wulyang ko Damit nge Awake! e ireram e gal magazine nth’abi yoor ni yima ngongliy ngan pilyeg nga boor mit e thin u ga’ngin yang e fayleng! Ma bochan ni boor e girdi’ nib thilthil e nam rorad ni yad ma beeg e pi magazine ney, ma aram fan ni kan tay murung’agen boch ban’en ni nge mang kenggin reb nge reb e pi magazine ney ni gubin e girdi’ ni yad ra adag ni ngar nanged murung’agen. Ere thingar da fanayed e pi magazine ney ni ngad ayuweged e girdi’ ni ngar tedan’rad ko n’en th’abi ga’ fan u lan e yafos rorad e ngiyal’ ney. Machane som’on e, ba t’uf ni ngad nanged ko chon mini’ e kan ngongliy reb ko pi magazine ney ni fan ngorad.

12. (a) Chon mini’ e kan ngongliy fare Awake! ni fan ngorad, ma mang fan ni kan ngongliy e re ke magazine ney? (b) Mang boch ban’en nib manigil ni ke buch rom u nap’an ni ga be fanay e biney e talin e maruwel?

¹² Awake! e kan ngongliy ni fan ngak e piin ni buchuuw ara dariy ban’en ni yad manang u murung’agen e Bible. Rayog ndariy ban’en ni yad manang u murung’agen e pi machib ni ma fil e pi Kristiano, ara der pagan’rad ko pi yurba’ i teliw, ara dawor nanged ni Bible e ra ayuwegrad. Reb i fan ni kan ngongliy fare Awake! e bochan ni nge ayuweg e girdi’ ni nge mich u wan’rad ni bay Got. (Rom. 1:20; Heb. 11:6) Maku reb e, bochan ni nge ayuweg e girdi’ ni ngki mich u wan’rad ni Bible e “thin rok Got ni er e bin ni ir.” (1 Thess. 2:13) Kenggin fa dalip ke Awake! ni kan ngongliy ni fan ko duw ni 2018 e: “The Way of Happiness,” nge “12 Secrets of Successful Families,” nge “Help for Those Who Grieve” ni thin ni Meriken.

13. (a) Fare ke Wulyang ko Damit ni yima wereg ko girdi’ ni yoor e chon mini’ e kan ngongliy ni fan ngorad? (b) Mang boch ban’en nib manigil ni ka fini buch rom u nap’an ni ga be fanay e biney e talin e maruwel?

¹³ Fan ni kan ngongliy Fare Wulyang ko Damit ni yima wereg ko girdi’ ni yoor e bochan ni nge weliy e pi n’en ni be fil e Bible ngak e piin ni yad ma  tayfan Got nge Bible. Rayog ni bay boch ban’en ni yad manang u murung’agen e Bible, machane de puluw rogon ni kar nanged fan e n’en ni be fil. (Rom. 10:2; 1 Tim. 2:3, 4) Fa dalip ke Wulyang ko Damit ni fan ko duw ni 2018 e be pi’ e fulweg ko pi deer ni baaray: “Kab Puluw e Bible Ngodad e Ngiyal’ Ney, Fa?,” nge “Mang e Ka Bay Nga M’on?,” nge “Bay Fam u Wan’ Got, Fa?”

14. (a) Mang fan ni kan ngongliy e pi video ni bay u lan fare Tafen Talin e Maruwel ni Gad Ma Fanay ni Ngad Filed Ban’en ko Girdi’? (b) Mang boch ban’en nib manigil ni ke buch rom u nap’an ni kam fanay e pi video ney?

¹⁴ Pi Video. Nap’an ni immoy Jesus u fayleng, ma pi talin e maruwel ni ma fanay reb e daiksang e yima maruwel ngay nga paay. Machane ngiyal’ ney e piin daiksang e ku bay boch e talin e maruwel rorad ni ma fanay e gamig ni bod e galyoch, nge burbur, nge talin e maruwel ni yima pacheg ban’en ngay. Ere yugu aram rogon ni ku bay e babyor rodad ni gad ma fanay u nap’an e machib, machane ngiyal’ ney e kun ngongliy boch e video nib manigil nrayog ni ngad daged ko girdi’. Ma aningeg ko pi video nem e bay u lan fare tafen talin e maruwel ni gad ma fanay ni ngad filed ban’en ko girdi’ ni kenggin e: Mang Fan ni Ngam Fil e Bible? nge Mang e Yima Rin’ u Nap’an e Fol Bible? nge Mang e Yima Rin’ ko Pi Tagil’ e Liyor Romad? nge Jehovah’s Witnesses​—Who Are We? ni thin ni Meriken. Pi video ney nib ngoch nap’an e rayog ni ngan yaliy u lan 2 e minit fa ba lich, ere ra fel’ ni ngam dag ko yay nsom’on ni kam mada’nag be’. Ma pi video nib n’uw boch nap’an e rayog ni ngam fanay u nap’an ni kam sul ni ngam guy be’ nge piin ni boor e tayim nrayog ni ngam nonad. Rib manigil e pi video ney ni bochan e rayog ni nge pi’ e athamgil nga laniyan’ e girdi’ ni ngar filed e Bible mi yad yib ko pi muulung rodad.

15. Mang ban’en nrayog ni nge buch ni faanra yaliy be’ reb ko pi video rodad ko thin rok? Mu weliy e n’en ni buch rok l’agruw ni’.

¹⁵ Am lemnag reb e ban’en ni ke buch. Bay reb e walag nib pin ni mada’nag yugu reb e ppin ni ke yib u Micronesia ni thin rok e thin nu Waab. Ere dag fare walag ngak fare video ni kenggin e Mang Fan ni Ngam Fil e Bible? ko thin nu Waab. Nap’an ni pag fare video me yog fare pin ni gaar: “Ireray e thin rog. Ba mo’maw’ ni nge mich u wan’ug e re n’ey! Rayog ni nggog ni rogon ni be non e cha’nir e be’ ko donguch rog ya be non ni thin rog!” Tomuren e re n’ey me yog ni nge yan ko fare website rodad ni jw.org ni nge beeg me yaliy gubin ban’en ni bay riy ni bay ko thin rok. (Mu taareb rogonnag ko Acts 2:8, 11.) Ku reb e ban’en ni buch e bay reb e walag nib pin ni ma par u Meriken ni bay reb e pagel ni fak walagen ni ma par u yugu reb e nam. Ere e-mailnag ngak e link ko fare video ni Mang Fan ni Ngam Fil e Bible? ko thin ko fare pagel. Tomuren ni yaliy e re pagel nem fare video me e-mail ngak fare walag nib pin ni gaar: “Gin ni gu baadag ko re video ney e gin baaram ni be yog ni bay be’ nib kireb ni be gagiyegnag e re fayleng ney. Ere ku gog ni nge yib be’ i fil e Bible ngog.” Re n’ey e ban’en nra k’aring e felfelan’ ngodad ya chi pagel nem e be par u reb e nam ni kan taleg e machib rodad riy!

16. Mu weliy fan ni kan ngongliy e pi brochure ney ni: (a) Mmotoyil ngak Got me Yog e Yafas ni Manemus Ngom. (b) Thin nib Fel’ ni Yib rok Got! (c) Mini’ e Piin ni Yad Be Rin’ e N’en nib M’agan’ Jehovah Ngay e Ngiyal’ Ney?

¹⁶ Pi Brochure. Uw rogon ni ngad filed e tin riyul’ ngak be’ ndabiyog ni nge beeg e babyor nib fel’ rogon ara dariy reb e babyor ni kan ngongliy nib puluw e thin riy ko Bible ni thin rok? Rayog ni ngad fanayed fare brochure ni kenggin e Mmotoyil ngak Got me Yog e Yafas ni Manemus Ngom. Ma fare brochure ni kenggin e Thin nib Fel’ ni Yib rok Got! e rib manigil ya rayog ni ngam fanay ni ngam tababnag e fol Bible ku be’. Rayog ni ngam dag keru’ e re brochure ney ngak ni bay 14 e deer riy, mag fith ngak ko bin ngan e baadag ni nge nang e fulweg riy. Ma nap’an nra mel’eg reb, ma aram e  bin ni ngam filew. Gur, kam gay rogon ni ngam fanay e re n’ey u nap’an ni kam sul ni ngam guy be’? Bin dalip ko pi brochure ney ni kenggin e Mini’ e Piin ni Yad Be Rin’ e N’en nib M’agan’ Jehovah Ngay e Ngiyal’ Ney? e ku bay u lan tafen talin e maruwel ni yima fanay ni ngan fil ban’en ko girdi’. Kan ngongliy e re ke brochure ney ni nge ayuweg e piin ni gad be fil e Bible ngorad ni ngar filed murung’agen e ulung rodad. Ra ngam nang rogon i fanay e re ke brochure ney mag guy fare ke babyor ni Pi N’en ni Ma Rin’ e Piin Kristiano nge Machib ni Yad Ma Tay ni fan ko March 2017.

17. (a) Mang fan ni kan ngongliy fa gal ke babyor ni gad ma fanay ni ngad filed e Bible ngak e girdi’? (b) Mang e ba t’uf ni nge rin’ e piin ni kar taufegad, ma mang fan?

¹⁷ Pi Babyor. Tomuren ni kam tababgow be’ i fil e Bible ni ga be fanay reb fapi brochure, ma demtrug e ngiyal’ nrayog ni ngam thilyeg ngam filew fare ke babyor ni kenggin e Mang e Ri Be Fil e Bible? Re ke babyor ney e rayog ni nge ayuweg e girdi’ ni nge yoor ban’en ni ngar filed u murung’agen pi kenggin e machib u Bible. Ma faanra be mon’og facha’ ko fol Bible ni gimew be tay, ma kam mu’nagew e re ke babyor ney, ma aram e rayog ni ngam ululgow ngam filew fa binem e babyor ni kenggin e Um Pired ni Gimed Ba T’uf rok Got. Rayog ni nge fil e en ni gimew be fil e Bible rogon ni nge fol ko pi kenggin e motochiyel u Bible ko re ke babyor ney. Dab mu pagtalin ni mus nga tomuren ni ke un ko taufe, ma kub t’uf ni nge ulul nge mada’ ko ngiyal’ ni ke mu’nag e gal ke babyor ney. Ya re n’ey e ra ayuweg ni nge gelnag e michan’ rok ngak Jehovah me par nib yul’yul’ ngak.​—Mu beeg e Kolose 2:6, 7.

18. (a) Mang e be pi’ e 1 Timothy 4:16 e athamgil riy nga lanin’dad ni ngad rin’ed ni gadad e piin ni gad ma fil e tin riyul’ ngak e girdi’, ma mang angin nra yib riy? (b) Mang e gad be nameg u nap’an ni gad be fanay e pi n’en ni bay u lan fare Tafen Talin e Maruwel ni Yima Fanay ni Ngan Fil Ban’en ko Girdi’?

¹⁸ Gadad e Pi Mich Rok Jehovah e ba milfan ngodad ni ngad filed ngak e girdi’ e ‘thin rok Got’ ni aram fare thin nib fel’ nra pow’iyrad ko yafos ni manemus. (Kol. 1:5; mu beeg e 1 Timothy 4:16.) Pi n’en ni bay u lan fare Tafen Talin e Maruwel ni Yima Fanay ni Ngan Fil Ban’en ko Girdi’ e rayog ni nge ayuwegdad ni ngad rin’ed e re n’ey. (Mu guy fare kahol ni kenggin e “ Tafen Talin e Maruwel ni Yima Fanay ni Ngan Fil Ban’en ko Girdi’.”) Ere ngad fanayed e pi n’ey nrogon nrayog rodad. Ra bagadad ma rayog ni nge mel’eg ko bin ngan e nge fanay ko pi n’ey nge ngiyal’ nib puluw ni nge fanay riy. Machane dab da paged talin ni n’en ni gad be nameg e gathi kemus ni ngad pied e pi babyor rodad. Yab fel’ ndab da pied e pi babyor ngak e piin dubrad ni ngar motoyilgad ko n’en ni gad be machibnag. Ya n’en ni gad be nameg e ngad ayuweged e girdi’ ni yad ba yul’yul’, ma yad ba sobut’an’, ma riyul’ ni yad baadag ni ngar nanged Got, ni aram e piin ni “bay rogon ni nge yag e yafos ni manemus ngorad” ni ngar manged boch pi gachalpen Jesus.​—Acts 13:48, NW; Matt. 28:19, 20.