1, 2. Mang reb e maruwel nib ga’ nni pi’ ngak Joshua ni nge rin’ u tomuren ni yim’ Moses?

 I YOG Jehovah ngak Joshua ni gaar: “Tapigpig rog i Moses e ke yim’. Ere mfal’eg rogom e chiney, ni gur nge urngin e girdi’ nu Israel, ngam th’abed e lul’ ni Jordan ngam marod nga lan fare gi nam ni ir e nggu pi’ ngomed.” (Josh. 1:1, 2) Ba chugur ko 40 e duw ni immoy ni ir e ma ayuweg Moses, ma aram e chiney e ke thil e n’en ni nge rin’!

² Ba n’uw nap’an ni pow’iy Moses e girdi’ nu Israel, ma aram e chiney e Joshua e ir e nge pow’iyrad. Ere rayog ni nge lemnag Joshua ko ra m’agan’ e pi girdi’ nem ngay ni ir e nge pow’iyrad fa danga’. (Deut. 34:8, 10-12) Bay reb e babyor ni be weliy murung’agen e Bible ni weliy murung’agen fare thin ko Joshua 1:1, 2 ni gaar: “Kab kafram i yib nnap’an nra thil e en ni nge pow’iy reb e nam, ma aram e ngiyal’ nra  mo’maw’ rogon e par ko girdi’ ma kub gel e riya’ ni ma buch.”

3, 4. Uw rogon ni ke tow’athnag Got Joshua ni bochan e ba pagan’ Joshua ngak? Ma mang deer e ngad fithed gadad riy?

³ Bay fan ni nge magafan’ Joshua, machane ba pagan’ ngak Jehovah, ere gurnag ir ni nge fol ko pi n’en ni ke yog ngak ni nge rin’. (Josh. 1:9-11) Ere ke tow’athnag Got Joshua ni bochan e pagan’ rok ngak, ma aram me fanay reb e engel ni nge pow’iy Joshua nge piyu Israel. Ma re engel ney e rayog ni ir fare Thin ni bin nganni’ i Fak Got.​—Ex. 23:20-23; John 1:1.

⁴ Ke ayuweg Jehovah fare nam nu Israel ni ngar guyed rogon ni ngar uned i rin’ e tin ni kan thilyeg e ngiyal’ nem ni bochan e Joshua e be pow’iyrad. Ma ngiyal’ ney e ku bay boch ban’en nib ga’ fan ni be thil. Ere rayog ni ngad fithed gadad ni lungudad, ‘Chiney ni be mon’og e ulung rok Got i yan, ere gur, bay fan ni nge pagan’dad ngak Jesus ni ir e kan dugliy ni nge Pow’iydad?’ (Mu beeg e Matthew 23:10.) Ra ngad nanged e fulweg ko re deer ney, ma ngad weliyed rogon ni pow’iy Jehovah e girdi’ rok kakrom u nap’an ni ke thil boch ban’en.

5. Mang e buch rok Joshua u nap’an ni kar chugurgad ko fare binaw nu Jeriko ndawori buch rok bayay? (Mu guy e sasing ni bay u tabolngin e re article ney.)

⁵ Boch nga tomuren ni th’ab piyu Israel fare lul’ nu Jordan, me buch ban’en rok Joshua ndawori buch rok bayay. Nap’an ni kar chugurgad ko fare binaw nu Jeriko, me mada’nag be’ nib moon ni bay e sayden rok. Ma aram me fith Joshua ngak e re moon nem ni gaar: “Gur reb e salthaw romad ara gur e toogor romad?” Ke gin Joshua ngay u nap’an ni yog fare moon ni ir e be “gagiyegnag e ba’ rok Somol e salthaw”, ma ke fal’eg rogon ni nge ayuweg e girdi’ rok Got. (Mu beeg e Joshua 5:13-15) Yugu aram rogon ni kan weliy u boch e thin nu Bible ni Jehovah e ir e be non ngak Joshua, machane yaney e bod ni be fanay Jehovah e re engel ney ni nge non ngak Joshua. Ma re n’ey e ke rin’ Jehovah ngak boch e girdi’ kafram.​—Ex. 3:2-4; Josh. 4:1, 15; 5:2, 9; Acts 7:38; Gal. 3:19.

6-8. (a) Mang fan nsana be lemnag piyu Israel ni pi n’en ni yog fare engel ni ngar rin’ed e gowa de puluw? (b) Uw rogon ni kad nanged nib gonop mab puluw e tayim ko pi n’en ni ka nog ni ngan rin’? (Kum guy e footnote.)

⁶ Ke yog fare engel ngak Joshua e n’en nib t’uf ni nge rin’ ya nge yag ni nge gel ko fare binaw nu Jeriko. Som’on e bay boch ban’en ko pi n’em ni ka nog ni ngan rin’ nsana rayog ni ngan lemnag nde puluw. Bod ni yog fare engel ngak Joshua ni nge maad’adnag gubin fapi salthaw. Ma re n’ey e be yip’ fan nra yan in e rran ndabiyog ni ngar uned ko cham. Ere gur, ri ireray e ngiyal’ nib fel’ ni ngan maad’adnag e pi pumoon ney?​—Gen. 34:24, 25; Josh. 5:2, 8.

⁷ Rayog ni nge lemnag fapi salthaw u wan’rad ni, ‘Faanra yib e pi toogor ni ngar chamgad ko gin ni gamad bay riy, ma uw rogon ni nggu ayuweged chon e tabinaw romad?’ Machane yigi buch ban’en ndan lemnag nra buch! Ke rus fapi pumoon nu Jeriko ngak piyu Israel ma aram fan ndakur chamgad ngorad. Be yog e Bible ni gaar: “Ma kan ning e garog ko binaw nu Jeriko nrib fel’ rogon, ni fan e nge dabiyog ni yib piyu Israel nga lan. Ma dariy be’ ni ku rayog ni nge yan nga lan e re binaw nem, fa reb e chuw u lan.” (Josh. 6:1) Re n’ey ni rung’ag piyu Israel e rib mudugil ni gelnag boch e pagan’ rorad nga rogon ni be pow’iyrad Got!

⁸ Ke yog fare engel ngak Joshua ndabi cham piyu Israel ngak yu Jeriko. Ya n’en ni ngar rin’ed e ngar liyeged e re binaw nem u lan nel’ e rran, nra reb e rran ma taab yay. Machane nap’an e bin medlip e rran ma medlip yay ni ngar rin’ed e re n’ey riy. Sana rayog ni nge lemnag fapi salthaw u lanin’rad ni, ‘Kemus ni yad be adbey e tayim rorad nge gelngirad!’ Machane bin riyul’ riy e, en ndanir guy ni be Pow’iy piyu Israel e manang e n’en ni be rin’! Nap’an ni fol piyu Israel ko n’en  ni ke yog ngorad ni ngar rin’ed, ma re n’ey e gelnag e michan’ rorad. Ere de t’uf ni ngar chamgad ko pi salthaw nu Jeriko.​—Josh. 6:2-5; Heb. 11:30. a

9. Mang fan nsusun e ngad folgad ko fonow ni ke pi’ e ulung rok Got? Mu weliy reb e ban’en.

⁹ Ere mang e rayog ni ngad filed ko re n’ey? Bay yu ngiyal’ nsana der tamilang u wan’dad fan boch ban’en ni ke thilyeg e ulung rok Jehovah. Bod nsana som’on ma darud lemnaged nib puluw e n’en ni be yog ulung ni ngad rin’ed ni aram e ngad fanayed e cellphone, ara tablet u nap’an ni gad be fil e Bible ni yigoo gadad, ngu nap’an e machib, ngu nap’an e muulung. Machane chiney e ke tamilang u wan’dad angin ni ke yib ni bochan e kad folgad riy. Ere nap’an ni kad guyed angin ni ke yib ko pi n’ey ni kan thilyeg, ma aram e ke gel boch e michan’ rodad, ma ke taareban’dad pi walagdad u ga’ngin yang e fayleng.

10. Mini’ e riyul’ ni be pow’iy fare ulung ni ma pow’iyey u Jerusalem ni ngar ted fare muulung nib ga’ fan ni murung’agen ni ngan maad’adnagey?

¹⁰ Gonap’an ke yan 13 e duw nap’an ni ke mang Kornelius reb e Kristiano ni gathi ir reb e Jew ndawor ni maad’adnag. Maku bay boch e Jew ni Kristiano ni yad be yog ni kab ga’ fan ni ngan maad’adnagey. (Acts 15:1, 2) Ere bay boch e walag u lan fare binaw nu Antiok ni yad be maluagthin u murung’agen e re n’ey. Ke dugliy e piin piilal nge yan Paul nga Jerusalem nge fith ngak fare ulung ni ma pow’iyey u murung’agen e re n’ey. Machane mini’ e riyul’ ni be yarmiy e re n’ey ni nge rin’? Ke tamilangnag Paul ni gaar: “Gu wan  yi dag Got ngog ni nggu wan.” Ere ba tamilang ni Kristus e be pow’iy e pi n’en ni be buch ya nge yag ni nge pi’ fare ulung ni ma pow’iyey e fulweg ko fare deer ni ke sum.​—Gal. 2:1-3.

11. (a) Mang e kab mich u wan’ boch e Kristiano nu Jew u murung’agen ni ngan maad’adnagey? (b) Uw rogon ni dag Paul ni ke sobut’nag laniyan’ ni nge fol ko piin piilal u Jerusalem? (Kum guy e footnote)

¹¹ Ke pow’iy Kristus fare ulung ni ma pow’iyey ni ngar tamilangnaged ni piin Kristiano ni gathi yad e Jew e daki t’uf ni ngan maad’adnagrad. (Acts 15:19, 20) Machane boch e duw nga tomuren, ma ka bay boch e Jew ni Kristiano ni ka yad be maad’adnag pi fakrad. Ma aram miki rung’ag e piin piilal u Jerusalem ni be yog e girdi’ nder tay Paul fan fare Motochiyel rok Moses. Ere yog e piin piilal ngak Paul ni nge rin’ ban’en nra dag ni be tay fan fare Motochiyel. b (Acts 21:20-26) Ka rogned ngak ni nge fek aningeg e pumoon nga tempel ya nge guy e girdi’ ni aram e be tayfan fare Motochiyel. Ere rayog ni nge gaar Paul: ‘De puluw e re n’ey! Mang fan ni ka mogned ngog ni nggu rin’ e biney? Pi Jew ni Kristiano nder tamilang u wan’rad murung’agen ni ngan maad’adnagey e aram e pi cha’ nib t’uf ni ngan yal’uweg rogon ni yad be lemnag e re n’ey.’ Machane manang Paul ni baadag e piin piilal ni nge par gubin e Kristiano nib taareban’rad, ere aram fan ni sobut’nag laniyan’ nge fol ko n’en ni ka nog ngak. Ere rayog ni ngad lemnaged ko mang fan ni ke pag Jesus fare deer u murung’agen ni ngan maad’adnagey ni nge par nib n’uw nap’an, ni yugu aram rogon nda kud moyed u tan fare Motochiyel rok Moses u tomuren ni yim’ Jesus.​—Kol. 2:13, 14.

12. Mang fan nrayog ni pag Kristus ba ngiyal’ ni nge yan mfini tamilangnag fare deer u murung’agen ni ngan maad’adnagey?

¹² Nap’an ni yira thilyeg rogon ni kan tamilangnag ban’en mab t’uf e tayim ni ngad guyed rogon ni nge m’agan’dad ngay. Bay boch e Jew ni Kristiano nib t’uf e tayim ni nge m’agan’rad ngay ndakur moyed u tan fare Motochiyel. (John 16:12) Ya kar mechamgad ngay ni yad ma lemnag nre n’em ni ngan maad’adnagey e aram e pow riy nri yad girdien Got nrib fel’ e tha’ u thilrad. (Gen. 17:9-12) Ku bay boch i yad ni yad be rus ni yira gafgownagrad ko gin ni yad be par riy ni bochan e yad ba thil ko tin ka bay e Jew. (Gal. 6:12) Machane munmun miki pi’ Jesus boch e fonow u murung’agen e re n’ey u daken e pi babyor nni thagthagnag nga laniyan’ Paul ni nge yoloy.​—Rom. 2:28, 29; Gal. 3:23-25.

13. Mang e rayog ni nge ayuwegdad ni ngad folgad u rogon ni be pow’iydad Kristus e ngiyal’ ney?

¹³ Kristus e ir e ka be Pow’iy e ulung ni Kristiano e ngiyal’ ney. Ere faanra bay ban’en ni ke thilyeg e ulung nder tamilang u wan’um, ma aram e ba t’uf ni ngam lemnag rogon ni ke pow’iy Kristus e girdi’ rok Got kakrom. Ka nap’an Joshua nge mada’ nga nap’an e pi apostal ni ma pi’ Kristus e fonow ni bay e gonop riy ni nge pow’iy e girdi’ rok Got, me gelnag e michan’ rorad, miki ayuwegrad ni ngar pared nib taareban’rad.​—Heb. 13:8.

14-16. Uw rogon ni be micheg e pi fonow ni yib ko “fare tapigpig nib yul’yul’ ma ba gonop” ni baadag Kristus ni nge ayuwegdad ni nge par e michan’ rodad nib gel?

¹⁴ Ngiyal’ ney e “fare tapigpig nib yul’yul’ ma  ba gonop” e ma pi’ e fonow ngodad ko ngiyal’ nib t’uf rodad. (Matt. 24:45) Re n’ey e be dag ni ma lemnagdad Jesus. Bay reb e matam ni ka nog Marc ngak ni bay aningeg e bitir rok ni yog ni gaar: “Be gay Satan rogon ni nge meewarnag e ulung ni aram e be gay rogon ni nge kirebnag e pi tabinaw u lan e ulung. Aram fan ni kan pi’ e athamgil nga laniyan’ chon e tabinaw ni ngar ted e fol Bible ni tabinaw u gubin e wik. Ya aray rogon ni nge ayuweg e piin lolugen e tabinaw girdien e tabinaw rorad!”

¹⁵ Nap’an nra tamilang u wan’dad rogon ni be pow’iydad Kristus, ma aram e gad ra nang ni baadag ni nge ayuwegdad ni nge par e michan’ rodad nib gel. Bod ni bay reb e piilal ni ka nog Patrick ngak ni gaar: “Som’on e bay boch e walag ni mulan’rad ni bochan ni ke tabab fare yaram ko machib ni in e walag e yad ra mada’ nga taabang ni fan ko machib ko Sabado nge Madnom.” Machane i yog nre n’ey ni kan yarmiy e be dag rogon ni ma lemnag Jesus gubin e girdi’ u lan e ulung. Bod ni bay boch e walag ni yad ba tamra’ ara gathi boor e tayim ni yad ma yan ko machib. Machane bochan e re yaram ney, ma aram e kar nanged nib t’uf e ayuw rorad mab ga’ farad. Re n’ey e ke gelnag e michan’ rorad.

¹⁶ Ku be ayuwegdad Kristus ni ngad tedan’dad ko fare maruwel ni machib ni aram e bin th’abi ga’ fan e maruwel ni yibe rin’ u fayleng e ngiyal’ ney. (Mu beeg e Mark 13:10.) Bay reb e walag ni ka nog André ngak ni ka fini mang reb e piilal. Gubin ngiyal’ ni ma gay rogon ni nge fol ko fonow nib beech ni ke yib ko ulung rok Jehovah. Ke yog ni gaar: “Re n’ey ni kan lichnag e girdi’ ni be maruwel u Branch e be puguran ngodad feni ga’ fan ni ngad tedan’dad ko fare maruwel ni machib ni bochan e gad bay u tungun e re m’ag nib kireb ney.”

17, 18. Mang fan nthingar da tedan’dad nga rogon angin ni ma yib ngodad ni faan gad ra gay rogon ni ngad folgad u boch ban’en ni kan thilyeg?

¹⁷ Pi fonow ni ma pi’ Jesus Kristus ni ir e Pilung rodad e ra ayuwegdad e chiney i yan nga m’on.  Ere mu tiyan’um nga rogon angin ni ke yib ngom ni bochan e kam gay rogon ni ngam fol u boch ban’en ni kan thilyeg. Maku nap’an e fol Bible ni tabinaw, ma rayog ni ngan weliy rogon ni ke ayuweg chon e tabinaw rom boch ban’en ni kan thilyeg ko pi muulung ni gad ma tay nge machib.

¹⁸ Rayog ni nge mom ngodad ni ngad folgad ko fonow ni ma yib ko ulung rok Jehovah u fithik’ e felfelan’ ni faanra dab da paged talin ni faan gad ra fol riy ma ra yib angin ngodad. Bod ni be yag ni nge ayuweg e ulung rodad e salpiy ni bochan daki yoor e babyor ni yibe printnag ni bod kafram. Ma bochan ni gad be fanay e pi n’en nib beech ni kan ngongliy ni bod e cellphone, nge computer, nge tablet ma ke yag ni nge yoor e girdi’ ni nge nang fare thin nib fel’. Ere gur, rayog ni nge bagadad me fanay e pi babyor rodad ni yima downloadnag miki fanay e cellphone ara tablet rok u nap’an e muulung nge machib? Ireray reb e kanawo’ nrayog ni ngad daged ni gad be fol u rogon ni be pow’iydad Kristus, ya baadag ni ngad fanayed e pi n’en ni be pi’ e ulung rodad nib fel’ rogon.

19. Mang fan nsusun ni ngad pied e ayuw u rogon ni be pow’iydad Kristus?

¹⁹ Nap’an ni gad ra pi’ e ayuw u rogon ni be pow’iydad Kristus ma aram e gad be ayuweg e pi walagdad ni nge gel e michan’ rorad mi yad par nib taareban’rad. Ke weliy André murung’agen fare yaram ni aram e kan lichnag urngin e walag ni ngar maruwelgad ko pi Bethel u ga’ngin yang e fayleng ni gaar: “Bochan ni m’agan’ e pi walag ni ur maruwelgad u Bethel ni ngan thilyeg e n’en ni ngar rin’ed e chiney, ma aram e n’en ni pi’ e athamgil nga lanin’ug ni ngari pagan’ug mug tayfan e ulung rodad. N’en ni yad be rin’ e aram e yad be fol u rogon ni be mithmith fare karrow rok Jehovah ni aram e demtrug e maruwel ni kan pi’ ngorad mi yad ba felfelan’ ngay ni ngar rin’ed.”

20, 21. (a) Mang fan nrayog ni nge pagan’dad ngak Kristus ni ir e be Pow’iydad? (b) Mang deer e gad ra weliy e fulweg riy ko bin migid e article?

²⁰ Dabki n’uw nap’an ma ra yan Jesus Kristus ni ir e be Pow’iydad “ko mahl nge gel” maku ra “rin’ bogi ban’en ni yira ngat ngay.” (Rev. 6:2; Ps. 45:4, NW) Machane chiney e be ayuwegdad ni ngad fal’eged rogodad ni fan ko par ni gad ra tay u lan e bin nib beech e fayleng nge maruwel ni gad ra rin’ ni aram e gad ra fil e tin riyul’ ngak e piin ni yira fasegrad ma ngkud ngongliyed e re fayleng ney nge mang paradis.

²¹ N’umngin nap’an ni gad ra par nib pagan’dad ngak e en ni be Pow’iydad maku ir e Pilung rodad, ma gad manang ni ir e ra pow’iydad nga lan e bin nib beech e fayleng ndemtrug ko mang e ra buch. (Mu beeg e Psalm 46:1-3.) Ngiyal’ ney e nap’an nra thilthil boch ban’en, ma rayog ni nge mo’maw’ ngodad ni ngad folgad riy nib ga’ ni faanra ban’en ndad lemnaged nra buch. Ere nap’an nra buch ban’en ni aray rogon, ma uw rogon ni ngad pared nib gapas lanin’dad mab gel e michan’ rodad ngak Jehovah? Gad ra weliy e fulweg ko re deer ney ko bin migid e article.