1, 2. Mang e n’en ni fanay Satan ni ngari gafgownag e girdi’ ngay?

 BAY boch ban’en ni kan ngongliy ni bod e telefon, nge bulb ko magal, nge karrow, nge icebox ni ke momnag e par rodad e ngiyal’ ney. Machane ku bay boch ban’en ni bod gan e boyoch, nge donmach ni yima k’eyag, nge tamagow, nge ku boch e donmach nrib gel gelngin. Pi n’ey e be tay e yafos rodad nga thatharen e riya’. Machane bay ban’en ni kab kakrom ni immoy u m’on nni ngongliy e pi n’ey ni ir e kari gelnag e gafgow ko girdi’. Mang e re n’ey? Aram fare ban! Ra ngan ban ma be yip’ fan ni gad be yog ban’en ni gad manang nde riyul’ ni bochan e ngad bannaged be’. Ere mini’ e yog e bin th’abi som’on e ban? Aram fare Moonyan’! Ya aram fan ni yog Jesus Kristus ni “ir e chitamangin urngin e malulifith.” (Mu beeg e John 8:44.) Mingiyal’ e yog Satan e bin som’on e ban?

² Ke yog Satan e bin nth’abi som’on e ban u lan fagi milay’ nu Eden ni ke yan bokum biyu’ e duw. Ba felfelan’ Adam nge Efa ko par rorow u lan fare Paradis ni ke ngongliy Jehovah ni fan ngorow. Ke yog ngorow ni faan yow ra kay wom’engin “fare ke gek’iy ni ma tamilangnag an’uy ko tin nib fel’ nge tin nib kireb,” ma aram e yow ra yim’. Yugu aram rogon ni manang Satan e re n’ey, machane me fanay ba porchoyog ni nge non ngak Efa ni nge gaar: “Gathi gimew  ra yim’.” Ireray e bin som’on e ban. Ki yog Satan ni gaar: “I yog Got e re bugithin nir ya manang ni gimew ra kay mi gimew bod Got, me tamilangan’mew ngam nangew e n’en nib fel’ nge n’en nib kireb ni bod ir.”​—Gen. 2:15-17; 3:1-5.

3. Mang fan nrayog ni nga nog nre ban nem ni yog Satan e rib kireb? Ma mang wenegan ni yib riy?

³ Re ban nem ni yog Satan e rib kireb ni bochan e yog ni nge gafgownag Efa me kirebnag thin. Ya manang ni faanra mich u wan’ Efa e re n’ey, me kay wom’engin fare ke gek’iy ma ra yim’. Ma ireray e n’en ni buch. Bochan nde fol Efa nge Adam ko motochiyel rok Jehovah, ma aram fan ni munmun mi yow yim’. (Gen. 3:6; 5:5) Maku reb e, bochan e denen ni tay Adam, ma aram fan ni “af e yam’ ngak urngin e girdi’ nu fayleng.” Bin riyul’ riy e, ke “gagiyegnag e yam’ urngin e girdi’, ni mus ngak e piin ni gathi taareb rogon e denen rorad ko denen ni rin’ Adam.” (Rom. 5:12, 14) Ireray fan ndawor da flontgad maku darud pared ni manemus nrogon ni lemnag Got ko som’on. Ya kemus ni gad ma par ni gad ba fos ni ‘medlip i ragag e duw n’umngin nap’an, ara meruk i ragag ni faanra ba gel fithik’ i downgin bagadad.’ Machane yigoo “magafan’ nge gafgow” e ke sug ko yafos rodad. (Ps. 90:10) Ere gubin e pi n’ey ni be buch rodad ni bochan e ban ni tay Satan!

4. (a) Mang boch e deer nthingar da nanged e fulweg riy? (b) Mini’ e rayog ni nge mang fager rok Jehovah nrogon ni be tamilangnag e Psalm 15:1, 2?

⁴ Ke weliy Jesus murung’agen Satan ni gaar: “Dariy ba ngiyal’ ni ke yib nga ba’ rok e tin riyul’ [“de par ko tin riyul’,” NW] ya dariy e tin riyul’ rok.” Ere ku dawori thil Satan ya ku be “bannag e girdi’ nu fayleng ni polo’” ko pi ban rok. (Rev. 12:9) Machane gadad e dubdad ni nge bannagdad Satan. Ere ba t’uf ni ngad nanged e fulweg u dalip e deer. Pi deer ney e aram e, uw rogon ni be bannag Satan e girdi’ e ngiyal’ ney? Mang fan ni ma ban e girdi’? Ma uw rogon ni ngad dogned e tin riyul’ ni gubin ngiyal’, ya nge dabi kireb e tha’ u thildad Jehovah ni bod rogon ni buch rok Adam nge Efa?​—Mu beeg e Psalm 15:1, 2.

5. Uw rogon ni be bannag Satan e girdi’ e ngiyal’ ney?

⁵ Rayog ni ngad siyeged ndabi bannagdad Satan. Aram fan ni yog apostal Paul ni gaar: “Gadad manang e tin ni be lemnag [Satan] ngodad.” (2 Kor. 2:11) Gad manang ni Satan e be gagiyegnag e fayleng nib polo’ nib muun e pi yurba’ i teliw ni googsur, nge pi am nib sasaliyeb, nge girdien e siyobay ni lem ni chogow e bay rorad. (1 John 5:19) Ere darud gingad ngay ni be gagiyegnag Satan nge pi moonyan’ rok e pi girdi’ ney nib gel lungurad ni ngar ‘lifithed l’ugunrad.’ (1 Tim. 4:1, 2) Bod ni bay yu ngiyal’ ni ma ban girdien e siyobay u nap’an ni yad ra weliy murung’agen boch ban’en ni yad baadag ni ngar pied ni chuway’, ni yugu aram rogon ni yad manang ni pi n’em e bogi ban’en nrayog ni nge gafgownag e girdi’. Ma yad ma rin’ e re n’ey ni bochan e ngar feked e salpiy ko girdi’.

6, 7. (a) Mang fan nrib gel e kireb riy ni faanra bannagey e pi tayugang’ ko teliw? (b) Mang boch e ban ni kam rung’ag ni ma yog e pi tayugang’ ko teliw?

⁶ Ban ni ma tay e pi tayugang’ ko teliw e rib gel e kireb riy. Mang fan? Bochan ni faanra mich u wan’ be’ e pi machib ni googsur ni yad be machibnag, me rin’ boch ban’en ni be fanenikay Got, ma aram e rayog ni nge mul e athap rok ko yafos ni manemus. (Hos. 4:9) Ngiyal’ ni immoy Jesus riy, ma manang ni pi tayugang’ ko teliw e yad be bannag e girdi’. Aram fan nde rus ni nge yog ngorad ni gaar: “Kari mu gafgowgad e pi tamachib ko Motochiyel nge gimed e pi Farise! Ya gimed be dake modingniged gimed! Gimed be chur u maday ma gimed be th’ab e pi nam nga baraba’ ni ngam pingeged taabe’ nge un ko taliw romed; ma faani yog romed mi gimed ngongliy nge par ni ke l’agruw yay e mon’og  ni ke tay romed ko yan ni nge tay nga fithik’ e nifiy ni bod gimed” ara Gehenna ni aram e be yip’ fan e math mit. (Matt. 23:15, NW ftn.) Ere n’en ni be tamilangnag Jesus e pi tayugang’ ko teliw ni googsur e yad bod e chitamangirad ni fare Moonyan’, ni “ir be’ ni ma thang e fan rok e girdi’.”​—John 8:44.

⁷ Ngiyal’ ney e ku boor e tayugang’ ko teliw ni yima pining e pastor, ara padrey, ara rabbi, ara swami ngorad. Ku darur filed ko girdi’ e tin riyul’ ni bay u lan e Thin rok Got ma “kar thiliyeged e tin riyul’ ni murung’agen Got ko tin nde riyul’” ni bod rogon ni rin’ e pi Farise kakrom. (Rom. 1:18, 25) Boch ko pi ban nem ni yad ma fil ko girdi’ e “nap’an ni ga ra thap, ma aram e kam thap.” Ma reb e ra yim’ be’ maku bay e yaal rok, ma piin ni kar m’ad e yad ra yim’ mar fosgad ngar ngal’gad ni yugu ban’en ara yugu be’. Ku reb e ba m’agan’ Got ko par ko pumoon nge pumoon nge ppin nge ppin, ara nge mabgol e pumoon nge pumoon nge ppin nge ppin.

8. Mang e bayi bannagey e pi tayugang’ ko teliw riy, ma susun ni nge uw rogon e re n’em u wan’dad?

⁸ Mus ngak girdien e am ma yad ma bannag e girdi’. Bin th’abi ga’ e ban ni bay rogned e aram e ke yag rorad ni ngar feked e “gapas” nga fayleng ndakuriy ban’en nra buch. Machane ‘yad ra da’da’ ma ke taw e riya’ ngorad.’ Ere susun ndabi mich u wan’dad e n’en ni yad be yog ni aram e be mon’og i yan e par rodad. Ya gad manang nre “Rran rok Somol nem e bay taw ni bod be’ nib moro’ro’ ni yib nnep’.”​—1 Thess. 5:1-4.

9, 10. (a) Mang fan ni ma ban e girdi’, ma mang e ma buch ni bochan e re n’ey? (b) Mang e dab da paged talin u murung’agen Jehovah?

⁹ Ngiyal’ ney e gathi kemus ni piin nib gel lungurad e yad ma ban. Fare article ni yoloy Y. Bhattacharjee ni kenggin e “Why We Lie” e yog ni gaar, “ban e ke mang bang u rarogon e girdi’.” Re n’ey e be yip’ fan ni ban e ban’en ni ma lemnag e girdi’ ndariy ban’en nib kireb riy, ya ban’en ni ki yima rin’. Ba ga’ ni ma ban e girdi’ ni bochan e ngar ayuweged yad, ara bochan e ngar mithaged e oloboch rorad ara reb e kireb ni kar rin’ed. Ki yog ni ku yad ma ban ni bochan e ngar yognaged e salpiy, ara nge yag ban’en ngorad nib fel’. Miki yog e re article ney ni bay boch e girdi’ ndarur tuntungad ni ngar bannaged e “girdi’ ndar nanged, ara piin ni yad nga maruwel, ara pi fager rorad, ara piin nib t’uf rorad.”

¹⁰ Ere mang e ke buch ni bochan e pi ban ney? Bochan e pi ban ney ma aram fan ndakir yag ni nge pagan’ be’ ku be’ ma ki kireb e tha’ u thiliy. Bod ni, am lemnag rogon e kireban’ nra tay reb i figirngiy nib yul’yul’ u nap’an nra nang ni be par leengin nge yugu reb e pumoon, ma be bannag ni be mithag e n’en ni be rin’. Ara reb e, mu lemnag feni gel e kireban’ riy ni faanra bay reb e moon nib kireb e tin ma rin’ ko ppin nge bitir rok u nap’an ni yad bay u tabinaw. Machane nap’an ni yad ra yib nga fithik’ e girdi’ ma ma dake ir be’ ni ma t’ufegrad ma ma ayuwegrad. Mit ney e girdi’ e rayog ni ngar bannaged e girdi’, machane susun ndab da paged talin ndabiyog ni ngar bannaged Jehovah. Ya be yog e Bible ni gubin ban’en ma “be par u p’eowchen ndariy e upong u daken.”​—Heb. 4:13.

11. Mang e gad ra fil ko n’en ni rin’ Ananias nge Safira? (Mu guy e sasing ni bay u tabolngin e re article ney.)

¹¹ U lan e Bible e bay murung’agen ba wu’ i  mabgol ni Kristiano riy ni ‘kar pagew Satan ni nge mang ir e gagiyegnag lanin’row’ ni ngar bannagew Got. Gali cha’ney e aram Ananias nge Safira. Ra gayew rogon ni ngar bannagew e pi apostal. Ya ra piew bangi binaw rorow ni chuway’, ma aram mar fekew bang ko salpiy riy ngar piew ko pi apostal. Bochan ni baadag Ananias nge Safira ni ngar fel’gow u wan’ e girdi’ u lan e ulung, ma aram fan nrognew ko pi apostal ni kemus chi urngin e salpiy ni ke yag ngorow ni puluwon fagi binaw ni kar piew ni chuway’. Machane manang Jehovah ni yow be ban, ma aram fan ni gechignagrow.​—Acts 5:1-10.

12. Mang e ra buch rok e piin ni yad ma yog boch e ban nrib kireb ndarur kalgadngan’rad, ma mang fan?

¹² Uw rogon u wan’ Jehovah e piin ni yad ma ban? Gubin e girdi’ ni ma yog boch e ban nrib kireb ndarur kalgadngan’rad e yira nin’rad nga lan “fare lipath i nifiy” ni bod e n’en ni yira rin’ ngak Satan. Re n’ey e be yip’ fan ni yira thangrad ni manemus. (Rev. 20:10; 21:8; Ps. 5:6) Mang fan? Ya taareb rogon u wan’ Jehovah e piin ni yad ma ban ngak e “piin ni yad ma rin’ boch ban’en nib sonogor u mit.”​—Rev. 22:15, NW ftn.

13. Mang e gad manang u murung’agen Jehovah? Ma mang e be k’aringdad e re n’ey ni ngad rin’ed?

¹³ Gad manang ni Jehovah e “gathi bod e girdi’ ni ma ban” ere ‘dabiyog ni nge lifith l’ugun.’ (Num. 23:19, BT; Heb. 6:18) Ku be yog e Bible “ndabun Somol . . . ba yunmon ni ma lifith e thin.” (Prov. 6:16, 17) Ere faanra gad baadag ni ngad fel’gad u wan’, ma thingar u dogned e tin riyul’. Aram fan ‘ndabi lifith bagadad l’ugun ngak bagadad.’​—Kol. 3:9.

14. (a) Mang e n’en nib thil e tin riyul’ e Kristiano riy ko girdien e pi teliw ni googsur? (b) Mu weliy fan fare kenggin e motochiyel ni bay ko Luke 6:45.

¹⁴ Mang reb e ban’en nib thil e tin riyul’ e Kristiano riy ko girdien e pi teliw ni googsur? Gad ma ‘weliy e tin riyul’.’ (Mu beeg e Zekariah 8:16, 17.) I yog Paul ni gaar: ‘Gadad ma  dag ni gadad bogi tapigpig rok Got, . . . [u] daken e thin nib riyul’’ ni gadad ma yog. (2 Kor. 6:4, 7) Me yog Jesus nra “be’ ma be yog l’ugun e pi n’en nib sug u laniyan’.” (Luke 6:45) Re n’ey e be yip’ fan ni be’ nib yul’yul’ e ma yog e tin riyul’ ngak e piin nde nangrad, nge ngak e piin yad nga maruwel, nge pi fager rok, nge piin nib t’uf rok. Ere ngad weliyed murung’agen boch e kanawo’ u rogon nrayog ni ngad daged ni gad be athamgil ni ngad yul’yul’gad u gubin ban’en.

15. (a) Mang fan nde fel’ ni ga be dake pigpig ngak Jehovah machane ga be rin’ boch ban’en nde puluw ko motochiyel rok? (b) Mang e rayog ni nge ayuweg e piin fel’ yangaren ni ngar siyeged e towasar ni ma yib ngorad? (Mu guy e footnote.)

¹⁵ Faanra gur reb e fel’ yangaren ma dabisiy ni ga baadag ni nge adag e pi taab yangar rom dakenam. Ma bochan e re n’ey, ma aram fan ni bay boch e fel’ yangaren ni yad be dake yad be pigpig ngak Jehovah, machane ka yad be rin’ boch ban’en nde puluw ko motochiyel rok. Ere nap’an ni yad bay u fithik’ girdien e tabinaw rorad ara u lan e ulung, ma yad ma dag e ngongol nib fel’. Machane nap’an ni yad be fanay e Internet ni ngar nonad ngak yugu boch e girdi’, ara nap’an ni yad bay u fithik’ e piin ndarur pigpiggad ngak Jehovah, mab thil rogon e ngongol rorad. Ere yad ma yog boch e thin nib kireb, mar chuwgad nga boch e mad nde yalen, mar motoyilgad nga boch e musik nib kireb e thin riy, ma yad ma chingaw, ma yad ma fanay boch e falay ni kireb, ma yad be un ngak be’ nib mith, ara ngar rin’ed boch e ngongol nib kireb. Ere n’en ni yad be rin’ e yad be bannag e gallabthir rorad, nge pi walag u lan e ulung, nge Jehovah. (Ps. 26:4, 5) Machane manang Jehovah e ngiyal’ ni kemus ni gad be ‘ta’ fan ko thin ni gad be yog, machane rib mal’af lanin’dad rok.’ (Mark 7:6) Ere ba manigil ni ngad rin’ed e n’en ni be yog e proverbs ni be gaar: “Dabi awan’um ko girdi’ ni tadenen; nge par ni madgun Somol e ngam lik’eg u lan e yafos rom.”​—Prov. 23:17, BT. a

16. Uw rogon nthingar da pied e fulweg ko pi deer ni bay ko fagi babyor ni fan ngak e piin ni yad ra pigpig u polo’ e tayim rorad?

¹⁶ Faanra ga baadag ni ngam un ko regular pioneer, ara ngam pigpig u polo’ e tayim rom ni bod ni ngam maruwel u Bethel, ma bay bbabyor ni ga ra ngongliy ni fan ngak e piin ni yad ra pigpig u polo’ e tayim rorad. Ere ba ga’ fan ni ngam yoloy e fulweg ko pi deer ney u murung’agen rogon fithik’ i dowam, nge pi n’en ni ga ma chuweg e chalban rom ngay, nge rogon e ngongol rom u fithik’ e yul’yul’. (Heb. 13:18) Machane uw rogon ni faanra kam rin’ ban’en nib fanenikan Jehovah, ara ban’en ni be magawonnag e nangan’ rom ma dawor mu weliy ngak e piin piilal? Mu ning e ayuw ngorad ya nge yag ni ngam pigpig ngak Jehovah nib beech e nangan’ rom.​—Rom. 9:1; Gal. 6:1.

17. Mang e thingar da rin’ed u nap’an ni be fith e piin ni yad be gafgownagdad boch e deer u murung’agen e pi walag?

¹⁷ Faanra kan taleg e machib ko gin ni ga ma  par riy, me yib girdien e am ngar fithed boch e deer ngom u murung’agen e pi walag, ma mang e ga ra rin’? Gur, ga ra weliy gubin ban’en ni ga manang? Mang e rin’ Jesus u nap’an ni be fithfith e governor nu Roma boch e deer ngak? Ke fol Jesus ko fare kenggin e motochiyel u Bible ni yog ni bay “ngal’an ni ngan th’ab gulungey nge ngal’an ni ngan welthin,” ere yu ngiyal’ e dariy ban’en ni ma yog! (Ekl. 3:7; Matt. 27:11-14) Ere faanra ke buch ban’en rodad ni aray rogon, mab t’uf ni ngad gonopgad ma gad kol ayuw ya nge dab da ted e pi walag nga thatharen e riya’.​—Prov. 10:19; 11:12.

18. Mang e ba milfan ngodad ni faanra fith e piin piilal boch e deer ngodad u murung’agen e pi walag?

¹⁸ Uw rogon ni faanra bay be’ u lan e ulung ni ke rin’ reb e denen nib ubchiya’, ma ga manang murung’agen? Piin piilal e ba milfan ngorad ni ngar ted e ulung rodad nib beech, ere rayog ni yad ra fith ngom e n’en ni ga manang u murung’agen e re n’em. Ere mang e ga ra rin’ ni faanra cha’nem e fager rom nib pach e thin romew ara reb i girdiem? Be yog e Bible ni gaar: “Be’ ni ma micheg ban’en u fithik’ e yul’yul’ e ra weliy e tin nib riyul’.” (Prov. 12:17, NW; 19:5) Ere ba milfan ngom ni ngam weliy ngak e piin piilal e tin riyul’ ma dariy ban’en ni ngam mithag. Ya bay rogon ni nge nang e piin piilal e tin riyul’, ya nge yag ni ngar ayuweged facha’ ni nge fel’ bayay e tha’ u thilrow Jehovah.​—Jas. 5:14, 15.

19. Mang e gad ra weliy ko bin migid e article?

¹⁹ Ke meybil David ngak Jehovah ni gaar: “Tafinay nib yul’yul’ e ir e gab adag.” (Ps. 51:6) Manang David ni n’en nib ga’ fan e bin riyul’ i rarogodad. Tin riyul’ e Kristiano e gubin ngiyal’ ma yad ma ‘weliy e tin riyul’ ngorad.’ Reb e kanawo’ ni ngad daged ni gad ba thil ngak girdien e teliw ni googsur e aram e ngad filed e tin riyul’ ni bay u lan e Bible ngak e girdi’. Ere bin migid e article e gad ra weliy rogon nrayog ni ngad rin’ed e re n’ey u nap’an e machib.