1, 2. (a) Nap’an nra thil boch ban’en u lan e yafos rodad nib tomgin, ma mang e ra rin’ e re n’ey ngodad? (Mu guy e sasing ni bay u tabolngin e re article ney.) (b) Mang e rayog ni nge ayuwegdad ni nge gapas lanin’dad nrogon ni be weliy e Psalm 131?

 TOMUREN ni pigpig Lloyd nge Alexandra u Bethel ni ke pag 25 e duw, ma aram min thilyeg e maruwel rorow ni aram e ngar machibgow u polo’ e tayim. Som’on e ke kireban’row. Ya yog Lloyd ni gaar: “Ug lemnag ni Bethel nge maruwel ni ug rin’ u rom e ke mang bang u rarogog. Yugu aram rogon ni gu manang nib ga’ fan e re n’em ni kan thilyeg, machane u lan e pi wik nge pul ni yan ma yu ngiyal’ e gu ma dabuy e re n’em ni ke thil.” Ere yu ngiyal’ e puluw rogon ni be lemnag Lloyd e re n’ey, ma yu ngiyal’ e ma par nib kireban’ ngay.

² Yu ngiyal’ ma ma buch boch ban’en u lan e yafos rodad ndad lemnaged nra buch. Pi n’ey e rayog ni nge k’aring e magafan’ nge mochuch ngodad. (Prov. 12:25) Ere mang e rayog ni ngad rin’ed ya nge yag ni nge ‘gapas me paslag lanin’dad’ u nap’an nra thil boch ban’en u lan e yafos rodad nib mo’maw’ ni nge m’agan’dad ngay  ara da mechamgad ngay? (Mu beeg e Psalm 131:1-3.) Ngad guyed rogon ni ke par boch e tapigpig rok Jehovah kakrom nge ngiyal’ ney nib gapas lanin’rad ni yugu aram rogon ni ke thil boch ban’en u lan e yafos rorad nib tomgin.

3. Uw rogon ni thil boch ban’en nib tomgin u lan e yafos rok Josef?

³ Am lemnag murung’agen Josef. U fithik’ gubin pi fak Jakob me ir e bin nth’abi t’uf rok. Ma re n’ey e k’aring pi walagen Josef ni nge awan’rad ngak. Ere nap’an ni gaman 17 e duw rok Josef, ma aram mi yad pi’ nchuway’ ni nge mang reb e sib. (Gen. 37:2-4, 23-28) Sogonap’an 13 e duw ni gafgow u Egypt ni ir reb e sib me boch nga tomuren min kalbusnag. Ere rib palog Josef rok e chitamangin ni aram e cha’ nrib t’uf rok. Pi n’en ni buch rok e rayog ni nge k’aring ni nge damumuw me lemnag ndakuriy e athap rok, machane de lem ni aram rogon. Mang e ke ayuweg?

4. (a) Mang e i tiyan’ Josef ngay u nap’an ni bay u kalbus? (b) Uw rogon ni ke fulweg Jehovah taban e meybil rok Josef?

⁴ Nap’an ni i gafgow Josef u kalbus ma rayog ni i tiyan’ nga rogon ni be ayuweg Jehovah. (Gen. 39:21; Ps. 105:17-19) Ku rayog ni i lemnag fa gal lik’ay ni tay ni kab bitir ni be yiiynag ban’en ma aram e n’en ni pi’ e pagan’ ngak ni bay Jehovah rok. (Gen. 37:5-11) Ku rayog ni boor yay ni ma meybil ngak Jehovah nga i weliy e pi n’en ni bay u gum’irchaen. (Ps. 145:18) Ma aram me fulweg Jehovah taban e meybil rok ni aram e pi’ e pagan’ ngak ndemtrug ko mang e ra buch rok ma bay “ni be un ngak.”​—Acts 7:9, 10. a

5. Uw rogon nra ayuwegdad e “gapas rok Got” ni ngar da dugliyed ni ngad pigpiggad ngak Jehovah?

⁵ Demtrug feni mo’maw’ e n’en ni gad be yan u fithik’ ma “gapas rok Got” e rayog ni nge ayuweg e “tafinay” rodad ni nge par nib gapas. (Mu beeg e Filippi 4:6, 7.) Ma nap’an nra magafan’dad ara da mochuchgad ma “gapas rok Got” e ra pi’ gelngidad ngad ululgad ko pigpig ni gad be tay ngak Jehovah ndabi mulan’dad. Ere ngad weliyed murung’agen boch e walag e ngiyal’ ney ni ke buch e re n’ey rorad.

6, 7. Uw rogon nrayog ni nge ayuwegdad e meybil ni nge gapas lanin’dad bayay? Mu weliy ban’en ni ke buch.

⁶ Kari kireban’ Ryan nge Juliette u nap’an nra nangew ni ke taw nga nap’an ni ngar talgow ko special pioneer. Ere yog Ryan ni gaar: “N’en ni gu rin’ew nsom’on e gu yibilayew murung’agen e re n’ey ngak Jehovah. Ya kug nangew ni ireray e ngiyal’ ni ke mab e kanawo’ ni nggu dagew nib pagan’mow ngak. Boor e girdi’ u lan e ulung romow ni ka yad bbeech ko tin riyul’, ere gu meybilgow ni nge ayuwegmow Jehovah ni nggu dagew e kanawo’ nrib manigil u rogon ni nggu parew nib gel e michan’ romow.”

⁷ Uw rogon ni ke fulweg Jehovah taban e meybil rorow? Ke yog Ryan ni gaar: “Ka ngiyal’ nem u tomuren ni kug mu’gow ko meybil ma fapi lem nde puluw nge magafan’ ni immoy romow e ke m’ay. Gapas rok Got e ir e ke yororiy gum’ircha’mow nge lanin’mow. Ke tamilang u wan’mow ni faan gamow ra par nib puluw rogon ni nggu lemnagew boch ban’en, ma aram e rayog ni nge ulul Jehovah ni nge fanaymow ni nggu rin’ew boch ban’en ni fan ngak.”

8-10. (a) Uw rogon nrayog ni nge ayuwegdad gelngin Got nib thothup u nap’an nra magafan’dad? (b) Uw rogon nrayog ni nge ayuwegdad Jehovah ni faanra da tedan’dad ko pigpig ni gad be tay ngak?

⁸ Gelngin Got nib thothup e rayog ni nge gapaseg lanin’dad me pow’iydad ko thin nu Bible  nra ayuwegdad ni ngad nanged e n’en nth’abi ga’ fan u lan e yafos rodad. (Mu beeg e John 14:26, 27.) Am lemnag e n’en ni buch rok Philip nge Mary ni ba wu’ i mabgol ni ke chugur ni nge gaman 25 e duw ni kar pigpiggow u Bethel. U lan aningeg e pul ma yow l’agruw ni yim’ e chitiningrow nge reb e girdi’ rorow, ere ba t’uf ni ngar ayuwegew e chitamangin Mary ni ke pilibthir ni bay mit e m’ar ko man’ey rok ni ma k’aring ni nge pagtalin ban’en.

⁹ Ke yog Philip ni gaar: “Kug lemnag nib fel’ rogon ni gu be athamgil machane bay ban’en ni kab t’uf ni nggu rin’. Ere immoy ba ngiyal’ nug beeg fare thin ko Kolose 1:11 (NW) u lan reb e article ko Wulyang ko Damit. Fin aray e ngiyal’ ni kug nang ni yugu aram rogon nriyul’ ni gu be athamgil, machane da gur rin’ nrogon nrayog rog. Ba t’uf ni nggu ‘athamgiliy urngin ban’en u fithik’ e gum’an’ nge felfelan’.’ Re thin nu Bible ney e ke puguran ngog nrogon e felfelan’ rog e gathi be yan u rogon e pi n’en ni be buch rog, ya be yan u rogon ni gu be pag gelngin Got nib thothup ni nge maruwel u lan e yafos rog.”

¹⁰ Bochan ni par Philip nge Mary ni yow be tiyan’ ko pigpig rorow ngak Jehovah, ma aram fan ni boor e kanawo’ ni ke tow’athnagrow riy. Ya tomuren ni kar chuwgow u Bethel ma yow l’agruw ni kar piriegew e girdi’ ni yad baadag ni ngar filed e Bible. Ma pi girdi’ ney e ba fel’ rogon e mon’og ni yad be tay maku yad baadag ni ngan fil e Bible ngorad ni gathi taab yay u reb e wik. Ere ke yog Mary ni gaar: “Pi girdi’ ney e yad tapgin e felfelan’ romow, maku ireray reb e kanawo’ ni gowa be yog Jehovah ngomow ni gubin ban’en ma ra yan i aw nib fel’ rogon.”

11, 12. (a) Mang ban’en ni rin’ Josef ni tow’athnag Jehovah riy? (b) Uw rogon ni tow’athnag Jehovah Josef?

¹¹ Nap’an nra thilthil boch ban’en nib tomgin u lan e yafos rodad, ma ma magafan’dad. Re n’ey e ra k’aringdad ni ngad pared ni yigoo magawon rodad e gad be lemnag. Ireray ban’en nrayog ni nge buch rok Josef, machane ke dugliy ni nge rin’ e tin nrayog rok u fithik’ e tin ni be mada’nag. Ere i maruwel nib gel u kalbus ndemtrug e maruwel ni yog faen nib milfan e kalbus ngak ni nge rin’ ni bod rogon ni i maruwel nib gel rok Potifar.​—Gen. 39:21-23.

¹² Reb e rran min nog ngak Josef ni nge ayuweg l’agruw e kalbus ni yow ma pigpig u tafen Farao. Ma bochan nib gol Josef ngorow, ma aram fan ni pagan’row ngak. Ere ra weliyew ngak e tin ni be magafan’row ngay nge n’en nra lik’aynag ndar nangew fan u reb e nep’ riy. (Gen. 40:5-8) De nang Josef e ngiyal’ nem ni n’en ni yad be weliy e ra munmun ma aram e n’en nra chuweg u kalbus. Ere l’agruw e duw nga tomuren, ma aram min pag Josef u kalbus me mang be’ nib ga’ lungun u Egypt ni ir e en nib migid ngak Farao.​—Gen. 41:1, 14-16, 39-41.

13. Uw rogon nrayog ni ngad rin’ed ban’en nra tow’athnagdad Jehovah riy ndemtrug ko mang e be buch rodad?

 ¹³ Rayog ni nge buch ban’en rodad ndabiyog ni ngad rin’ed ban’en ngay ni bod rogon Josef. Machane faanra da gum’an’gad ngad rin’ed e tin nrayog rodad, ma aram e ra tow’athnagdad Jehovah. (Ps. 37:5) Yugu aram rogon nda kud nanged ko mang e ngad rin’ed ma be magafan’dad, machane ‘dabi mulan’dad’ ara da lemnaged ndakuriy e athap rodad. (2 Kor. 4:8) Ya bay Jehovah nra ayuwegdad nib ga’ ni faan gad be tedan’dad ko machib ni gad be tay.

14-16. Uw rogon ni par Filip ni tamachib ni be tiyan’ ko machib ni yugu aram rogon ni thilthil boch ban’en u lan e yafos rok?

¹⁴ Filip ni tamachib e dag e kanawo’ nrib fel’ u rogon ni be tiyan’ ko machib ni yugu aram rogon ni thilthil boch ban’en u lan e yafos rok. Bay ba ngiyal’ ni immoy u Jerusalem ni be rin’ e maruwel rok ni ka fin nni pi’ ngak nib felfelan’ ngay. (Acts 6:1-6) Ma aram me buch boch ban’en ni thilyeg rogon e par rok. Tomuren nthang e fan rok Stephen, ma aram e ngiyal’ ni tabab ni ngan gafgownag e piin Kristiano nrib gel. Ere bochan e re n’ey ma aram me mil e piin Kristiano ngar chuwgad u Jerusalem. Machane Filip e baadag ni nge par ni boor ban’en ni be rin’ ni fan ko pigpig rok ngak Jehovah. Ere yan ko fare binaw nu Samaria ni aram e gin nib t’uf ni nge rung’ag e girdi’ fare thin nib fel’ riy.​—Matt. 10:5; Acts 8:1, 5.

¹⁵ Ba m’agan’ Filip ni nge yan ko gin ni be pow’iy gelngin Got nib thothup ngay. Ere fanay Jehovah Filip ni nge yan ko gin ni bay e girdi’ riy ndawor rung’aged murung’agen fare thin nib fel’ ni nge machibnagrad. Boor e Jew ni yad ma sap nga but’ ngak e girdi’ nu Samaria ma kub kireb e ngongol ni yad ma rin’ ngorad. Machane Filip e dariy e biney e lem ni laniyan’ rok, ya ri baadag ni nge weliy fare thin nib fel’ ngak e girdi’ nu Samaria. Ma aram fan ni “yad gubin” nra motoyilgad ngak!​—Acts 8:6-8.

¹⁶ Bin migid e pow’iy gelngin Got nib thothup Filip nge yan i machib u lan fa gal binaw nu Ashdod nge Cesarea ni aram e gin ni boor e girdi’ riy ni gathi yad piyu Jew. (Acts 8:39, 40) Ma aram miki buch ban’en rok ni ki thilyeg rogon e par rok. Ya aray e ngiyal’ ni yag reb e tabinaw ngak. Yugu aram rogon ni boor ban’en ni i thil u lan e yafos rok Filip, machane i par ni be tiyan’ ko machib, ma aram fan ni ulul Jehovah ni nge tow’athnag nge tabinaw rok.​—Acts 21:8, 9.

17, 18. Faan gad ra tedan’dad ko machib u nap’an nra thilthil boch ban’en u lan e yafos rodad, ma uw rogon nra ayuwegdad?

¹⁷ Boor e piin ni yad ma pigpig u polo’ e tayim  rorad ni ka rogned nnap’an nra thil boch ban’en u lan e yafos rorad, ma machib ni yad be tiyan’ ngay e aram e n’en ni ke ayuwegrad ni ngar pared ni yad ba felfelan’ mab puluw rogon ni yad be lem. Bod ni bay ba wu’ e mabgol u South Africa ni ka nog Osborne nge Polite ngorow nap’an nra talgow ko pigpig u Bethel mar lemnagew nib mom ni ngar piriegew e maruwel nrayog ni ngar unew ngay ni gathi polo’ e tayim nge bang ni ngar parew riy. Machane i yog Osborne ni gaar: “De yag ni nggu piriegew e maruwel nib papey ni bod ni gu lemnagew.” Miki yog Polite ni gaar: “Dalip e pul nde pat e maruwel ngomow, maku dariy e salpiy ni kug ayuwegew, ere ba gel e mo’maw’ ko par romow.”

¹⁸ Ere mang e ayuweg Osborne nge Polite ko ngiyal’ nem ni ke mo’maw’ e par rorow? Ke yog Osborne ni gaar: “N’en ni ayuwegmow ni nggu tiyan’mow ko pi n’en ni gamow be rin’ me puluw rogon ni nggu lemnagew boch ban’en, e aram e machib ni ug ted e pi walag u taabang.” Ere kar dugliyew ni ngar tiyan’row ko machib ko bin ni ngar parew u tabinaw ngi i magafan’row. Ma re n’ey e ke yibnag e felfelan’ ngorow! Miki ulul Osborne nge gaar: “Urngin yang nug gayew e maruwel riy, machane munmun mug piriegew e maruwel.”

19-21. (a) Mang e ra ayuwegdad ni ngad pared nib gapas lanin’dad? (b) Mang angin nra yib ni faan gad ra gay rogon ni ngad mechamgad nga ban’en ni ke thil u lan e yafos rodad ndad lemnaged?

¹⁹ Ere ke tamilang ko n’en ni ke buch rok e pi walag ni faan gad ra rin’ e tin rayog rodad u fithik’ e pi n’en ni gad be yan u fithik’, ma ngari pagan’dad ngak Jehovah, ma rayog ni nge gapas lanin’dad ndemtrug ko mang e ra buch. (Mu beeg e Mikah 7:7.) Ya ra munmun ma ra tamilang u wan’dad nrogon ni kad gayed rogon ni ngad mechamgad nga ban’en ni ke thil u lan e yafos rodad, e ir e ke gelnag e tha’ u thildad Jehovah. Ke weliy Polite e n’en ni buch rok ni gaar: “Re n’ey ni ke thil e maruwel romow e kug fil riy e n’en nri be yip’ fan ni nge pagan’uy ngak Jehovah ni yugu aram rogon ni ke mo’maw’ e par rog. Ma re n’ey e kari chugurnag e tha’ u thilmow Jehovah.”

 ²⁰ Mary ni faan kan weliy murung’agen e ku be ayuweg e chitamangin ni ke pilibthir maku be pioneer. Ke yog ni gaar: “Kug nang nnap’an nra magafan’ug, mab t’uf ni nggu tal nggu meybil mug toffan. N’en ni kug fil ko re n’ey nrib ga’ fan e nggu pag fan gubin ban’en ngak Jehovah, ma ireray ban’en nra t’uf ni nggu rin’ boch nga m’on.”

²¹ Ke yog Lloyd nge Alexandra nre n’ey ni ke thil boch ban’en u lan e yafos rorow e ke skengnag e michan’ rorow u boch e kanawo’ ndar lemnagew nra buch. Machane kar guyew ni ke yib angin e pi skeng nem ni u ranow u fithik’. Ra gaargow: “Chiney e kug nangew ni ke gel e michan’ romow nrayog ni nge fal’eg lanin’mow u nap’an nra yib e magawon ngomow. Ma ke yag ni nggu mangew e girdi’ nib manigil.”

22. Faan gad ra rin’ e tin nrayog rodad u fithik’ e pi n’en ni be buch rodad, ma mang e rayog ni nge pagan’dad ngay?

²² Rayog ni nge buch boch ban’en nib tomgin u lan e yafos rodad u lan e re m’ag nib kireb ney. Bod nrayog ni ngan thilyeg e maruwel ni gad be rin’ ni fan ko pigpig rodad ngak Jehovah, ara kad m’argad, ara ka fini buch ban’en u lan e tabinaw rodad nra t’uf ni ngad pied e ayuw riy. Machane demtrug ko mang e ra buch, ma nge pagan’um ni be lemnagem Jehovah, ma ra ayuwegem ko ngiyal’ nib puluw ni nge rin’ riy. (Heb. 4:16; 1 Pet. 5:6, 7) Ere chiney e ngad guyed rogon ni ngad rin’ed e tin nrayog rodad u fithik’ e pi n’en ni be buch rodad. Ma gad meybil ngak Jehovah ni Chitamangidad, ma gad gay rogon ni ngari pagan’dad ngak. Gad ra rin’ ni aray rogon, ma demtrug ko mang e ra i thil u lan e yafos rodad, ma gubin ngiyal’ nra pi’ Jehovah e gapas rok ngodad ni nge gapaseg lanin’dad.