1, 2. Mang fan ni bay e gonop riy ni ngam motoyil ngak e En Tasunmiy u nap’an ni ngam dugliy ko mang e ngam rin’ ko yafos rom? (Mu guy fapi sasing ni bay u tabolngin e re article ney.)

 FAANRA ba fel’ yangarem mab mudugil ni boor e fonow ni yima pi’ ngom u murung’agen e n’en ni ngam rin’ boch nga m’on. Pi sensey, nge pi counselor u skul, ara yugu boch e girdi’ e rayog ni nga rogned nib t’uf ni ngam nameg e skul nib tolang ara reb e maruwel nra yibnag boor e salpiy ngom. Machane Jehovah e ba thil e fonow ni be pi’ ngom. Riyul’ ni baadag ni ngam tiyan’um ko skul ya nge yag reb e maruwel ngom nrayog ni nge ayuwegem ko par rom u tomuren ni kam chuw u skul. (Kol. 3:23) Machane ku manang nra kab fel’ yangarem, ma boor ban’en nib ga’ fan ni ngam dugliy ni bay rogon ko tin ngam rin’ boch nga m’on. Aram fan ni ke pi’ e pi kenggin e motochiyel u Bible ni nge pow’iyem me ayuwegem, ya nge yag ni ngam rin’ boch ban’en u lan e yafos rom nib puluw ko n’en nib m’agan’ ngay ko ngiyal’ ney ko tin tomuren e rran.​—Matt. 24:14.

² Dab mu pagtalin ni manang Jehovah gubin ban’en. Ma manang ko mang e ra buch boch nga m’on, nge feni chugur ni ngan thang e  re m’ag ney. (Isa. 46:10; Matt. 24:3, 36) Maku manangem Jehovah nib fel’ rogon. Ma manang ko mang e ra yibnag e felfelan’ ngom nge n’en nra kirebnag lanin’um. Ere rayog ni nge pi’ e girdi’ e fonow nib fel’, machane faanra de puluw ko Thin rok Got ma aram e dariy e gonop riy.​—Prov. 19:21.

3, 4. Bochan ni motoyil Adam nge Efa nge pi fakrow ko fonow nib kireb, ma mang e buch rorad?

³ Fonow nib kireb e kab kakrom ni immoy. Satan e ir e som’on ni pi’ e fonow nib kireb ngak e girdi’. Ke yog ngak Efa ni yow ra felfelan’ Adam ni faanra yow e ngar dugliyew ko mang e ngar rin’ew ko yafos rorow. (Gen. 3:1-6) Machane Satan e yigoo ir e i lemnag ir! Ya baadag ni nge fol me liyor Adam nge Efa nge pi fakrow ngak ma gathi ngak Jehovah. Machane Satan e dariy ban’en nib fel’ ni ke rin’ ngak e girdi’. Ya gubin ban’en ni bay rorow ma Jehovah e ke pi’. Ke sunmiyrow ni ngar parew u taabang, miki pi’ ba milay’ nib fel’ yaan ni ngar parew riy, nge dowef rorow nib flont nra par ni manemus.

⁴ Machane ba gel e kireban’ riy ya de fol Adam nge Efa rok Got. Bochan ndar folgow ma aram e kar kirebnigew e tha’ u thilrad e En ni ke pi’ e yafos ngorow. Ere wenegan ni yib e rib gel e kireb riy. Munmun me tabab Adam nge Efa ni ngar pilibthirgow ngar m’ow ni bod ba pa’ i floras ni kan th’ab u kenggin. Mus ngak pi fakrow ni gad ba muun ngay ni ki gafgow. (Rom. 5:12) Yooren e girdi’ e ngiyal’ ney e yad be siyeg e n’en ni be yog Got ma yad be rin’ e tin yad baadag. (Efe. 2:1-3) Ere mang wenegan ni be yib riy? Be gaar e Bible dabi yib e angin e “gonop” ko girdi’ ni faanra ba togopuluw ko gonop rok Got.​—Prov. 21:30, BT.

5. Mang e ba pagan’ Got ngay nra rin’ e girdi’, ma gur, ba puluw e re n’ey?

⁵ Jehovah e ba pagan’ ngay ni bay e girdi’ nib muun e piin fel’ yangaren ngay ni yad ra adag ni ngar nanged ko ir mini’ mi yad pigpig ngak. (Ps. 103:17, 18; 110:3) Pi fel’ yangaren ney e ba ga’ farad u wan’ Jehovah! Ere gur bagayad, fa? Ra arrogon, mab mudugil ni boor ban’en “nib fel’” ni ke yib rok Got ni ga be felfelan’ ngay, ma aram e pi n’en ni ma gelnag e felfelan’ rom. (Mu beeg e Psalm 103:5, BT; Prov. 10:22) Ere ngad weliyed aningeg riy ni aram e ggan ni fan ko tirok Got ban’en, nge fager nib manigil, nge tin ni ngan nameg ni bay fan, nge bin riyul’ e puf rogon.

6. Mang fan ni ngam gamaneg e tin nib t’uf rom ko tirok Got ban’en? Ma mang e ke pi’ Jehovah ni nge ayuwegem?

⁶ Pi gamanman e de t’uf e tirok Got ban’en rorad, ere darur lemnaged ni ngar nanged ko mini’ e ke Sunmiyrad. Machane gadad e ba t’uf rodad. (Matt. 4:4) Nap’an ni gad ra motoyil ngak Got ma aram e ra yag e tamilangan’, nge gonop, nge felfelan’ ngodad. Ke gaar Jesus: “Nge felan’ e piin ni kar pirieged u lanin’rad ni kar gafgowgad ndabi siy ni nge yog Got ngorad.” (Matt. 5:3) Ke pi’ Got e Bible ngodad maku be fanay “fare tapigpig nib yul’yul’ ma ba gonop” ni nge pi’ e pi babyor nra ayuwegdad ni nge gelnag e michan’ rodad. (Matt. 24:45) Pi babyor ney e aram e ggan ni fan ko tirok Got ban’en, ya ma gelnag e michan’ rodad me gelnag e tha’ u thildad Jehovah. Ere gad ma felfelan’ ni boor mit e ggan ni bay ni fan ko tirok Got ban’en!​—Isa. 65:13, 14.

7. Uw rogon nra ayuwegem e ggan ni fan ko tirok Got ban’en ni ke yib rok?

⁷ Ggan ni fan ko tirok Got ban’en e rayog ni nge pi’ e gonop ngom me ayuwegem ni ngam lemnag boch ban’en nib fel’ rogon. Ma gali n’ey e boor e kanawo’ nrayog ni nge ayuwegem riy. (Mu beeg e Proverbs 2:10-14.) Bod ni gal fel’ngin ney e ra ayuwegem ni ngam nang boch ban’en  ni yigoo ban. Bod e ban ni yima yog ndariy be’ ni ke Sunmiydad nge murung’agen e salpiy nge chugum ni ir e ra yibnag e felfelan’ ngodad. Ku gal fel’ngin ney e ra ayuwegem ni ngam siyeg boch ban’en ni ga baadag ara boch ban’en ni kam mecham ngay nra gafgownagem. Ere mu rin’ e tin rayog rom ya nge yag e gonop ngom me yag ni ngam lemnag boch ban’en nib fel’ rogon. Ma aram e ga ra guy ni gab t’uf rok Jehovah ma baadag ni nge yag e tin nib fel’ ngom.​—Ps. 34:8; Isa. 48:17, 18.

8. Mang fan ni nge chugur e tha’ u thilmew Got e chiney? Ma mang angin nra yib ngom boch nga m’on?

⁸ Dabki n’uw nap’an ma ngan gothey gubin ban’en ni bay ko re fayleng rok Satan ney. Ma kemus ni yigoo Jehovah e rayog rok ni nge ayuwegdad me pi’ e tin nib t’uf rodad nib muun ngay e ggan ni ngan kay. (Hab. 3:2, 12-19) Ere ireray e ngiyal’ ni ngad chugurgad ngak Got ma gad gelnag e pagan’ rodad ngak. (2 Pet. 2:9) Faanra mu rin’ e re n’ey, ma demtrug ko mang e ra buch ma rayog ni ngam lem ni bod David ni gaar: “Ba’ Somol u lanin’ug ni gubin ngiyal’; ba’ nrib chugur ngog, ma dariy ban’en nrayog ni nge rurgeg.”​—Ps. 16:8.

9. (a) Mang e ma rin’ Jehovah nrogon ni kad beeged ko John 6:44? (b) Mang e n’en nib thil u nap’an ni ga ra mada’nag e Pi Mich?

⁹ Nap’an ni ga ra mada’nag be’ ko som’on nde nang e tin riyul’, ma mang e ga manang u murung’agen? Rayog ni ga manang fithingan nge yaan, machane rayog ni kemus e n’en ni ga manang u murung’agen. Re n’ey e rib thil ko yay som’on ni kam mada’nag be’ ni manang e tin riyul’. Ya ga manang nib t’uf Jehovah rok. Ma ga manang ni ke guy Jehovah ban’en nib fel’ rok, ma aram fan ni ke pining ke mang reb i chon e tabinaw rok ni ma pigpig ngak. (Mu beeg e John 6:44.) Ere demtrug e gin ni ke yib facha’ riy ara rogon ni kan chuguliy, machane boor ban’en ni ga manang u murung’agen maku boor ban’en ni manang u murung’agem!

10, 11. Mang boch ban’en nib taareban’ e girdi’ rok Jehovah riy? Ma uw rogon nra yib angin e re n’ey ngodad?

¹⁰ Nap’an ni ga ra mada’nag reb e Pi Mich ma ga manang ni bay boch ban’en nib ga’ fan nib taareban’mew ngay. Ma ga manang ni yugu aram rogon nib thil e thin romew, machane  taab thin e gimew manang ni aram fare “thin nib machalbog” ko tin riyul’. (Zef. 3:9, NW) Re n’ey e be yip’ fan ni gimew l’agruw nib mich Got u wan’mew, ma taab motochiyel e gimew be fol riy, ma taab athap e bay romew ko gabul nge langlath. Pi n’ey e ma ayuwegmew ni nge pagan’mew ngomew, me gelnag e tha’ u thilmew nra par ni manemus.

¹¹ Ere nap’an ni ga ra pigpig ngak Jehovah ma riyul’ nrayog ni nga mog ni bay e tin nib fel’ e fager rom. Ma ga’ngin yang e fayleng ni bay e pi fager rom riy ni mus ngak e piin ndawor mu mada’gad! Ere gur, rayog ni ngkum lemnag be’ nga bang ni gathi ir reb e girdi’ rok Jehovah ni bay e biney e tow’ath nrib manigil rok?

12. Mang boch ban’en nrayog ni ngam nameg nra yib angin ngom?

¹² Mu beeg e Eklesiastes 11:9–12:1. Gur, bay ban’en ni ga be maruweliy ni ga be nameg ni nge yag ngom? Rayog nsana kam nameg ni ngam beeg e Bible ni gubin e rran ara ngam mon’ognag rogon e fulweg nge welthin ni ngam pi’ u nap’an e muulung. Ara rayog ni ga be gay rogon ni ngam mon’ognag rogon ni ngam fanay e Bible u nap’an e machib. Ere uw rogon u wan’um ni faan ga ra guy ni ga be mon’og ko pi n’ey ni ga be rin’ ara yog be’ ngom ni ga be mon’og? Mudugil nre n’ey e ra k’aring e felfelan’ ngom, ma bin riyul’ riy e susun ni ngam felfelan’ ko re n’ey. Mang fan? Ya bochan ni ga be rin’ e tin baadag Jehovah ni ngam rin’ ni bod rogon ni i rin’ Jesus.​—Ps. 40:8; Prov. 27:11.

13. Uw rogon ni kab fel’ ni ngan pigpig ngak Got ko bin ni ngan nameg e tin nu fayleng ban’en?

¹³ Nap’an ni ga ra tiyan’um ko pigpig rom ngak Jehovah, ma aram e ga be rin’ reb e maruwel nra yibnag e felfelan’ ngom me yibnag fan e yafos rom. Aram fan ni ke yoloy Paul ni gaar: “Um pired ni gimed mmudugil. Gubin ngiyal’ ma nguum muruwliyed e maruwel romed ni fan ngak Somol, ya gimed manang ni pigpig ni gimed be tay ngak Somol e gathi ra yan i aw nib m’ay fan.” (1 Kor. 15:58) Machane nap’an nra tiyan’ e girdi’ ko tin yad be nameg ko re fayleng ney, ni bod ni ngar yognaged e salpiy ni boor ara nge gilbuguwrad, ma der yag ni ngar pirieged e felfelan’. Ya yugu aram rogon nib fel’ rogorad, machane yooren e ngiyal’ e yad ma lemnag nib m’ay fan e yafos rorad. (Mark 8:36) Ma ireray e n’en nrayog ni ngad filed ko n’en ni buch rok Solomon ni Pilung.​—Rom. 15:4.

14. Mang e ga be fil ko fare n’en ni rin’ Solomon ni nge guy angin nra yib?

¹⁴ Solomon e immoy ni ir be’ nth’abi fel’ rogon mab ga’ lungun kakrom, me rin’ ban’en ya nge guy ko mang angin nra yib. Ke gaar u wan’: “Nggu rin’ e pi n’en ni gu baadag nra k’aring e felfelan’ ngog ni nggu guy ko mang e n’en nib fel’ nra yib riy.” (Ekl. 2:1-10, NW) Ere toy Solomon boch e naun nrib fel’ yaan, me ngongliy e milay’ nge yungi ban’en ni yima yan ngay ngan toffan, maku be rin’ e tin baadag. Ere gur, kari chum’er ma ke felfelan’ ko pi n’em, fa? Nap’an ni sap Solomon nge guy e tin ke ngongliy me gaar: ‘Kug nang ndariy ban’en ni fan ngay.’ Miki ulul nge gaar: ‘Dariy gam’engin nga bang.’ (Ekl. 2:11) Ere gur, bay ban’en ni ga be fil ko re n’ey ni ke rin’ Solomon?

15. Mang fan nib t’uf ni nge yag e michan’ ngom, ma uw rogon nra ayuwegem e re n’ey nrogon ni kad filed ko Psalm 32:8?

¹⁵ Bay boch e girdi’ ni fin ngiyal’ ni yad ra oloboch ma yad gafgow ni bochan wenegan e n’en ni kar rin’ed e fin aram e ngiyal’ ni yad ra fil ban’en riy. Ma Jehovah e dabun ni nge buch ban’en rodad ni aray rogon. Aram fan ni baadag ni ngam motoyil ngak ma ngam fol rok. Machane ba t’uf e michan’ ni faanra ngam rin’ e re n’ey, machane tin ni kam mel’eg ni bochan e michan’ rom e dab mu kalngan’um riy. Ma dabi pag Jehovah talin e ‘t’ufeg ni kam dag ngak.’  (Heb. 6:10) Ere ngam maruwel nib gel ya nge yag ni ngam gelnag e michan’ rom ngak. Ya faan ga ra rin’ ni aray rogon, ma rayog ni ngam mel’eg boch ban’en nib fel’ u lan e yafos rom, mag guy ni Chitamangidad ni bay u tharmiy e baadag e tin nib fel’ ni fan ngom.​—Mu beeg e Psalm 32:8.

16. Mang ni nge ga’ fan e puf rogon u wan’dad, ma uw rogon ni ngad fanayed u fithik’ e gonop?

¹⁶ Ke yoloy Paul ni gaar: “Ra bay gelngin Jehovah nib thothup u bang, ma aram e bay e puf rogon riy.” (2 Kor. 3:17, NW) Ba ga’ fan u wan’ Jehovah e puf rogon, ma aram fan ni ke sunmiyem ni ngki ga’ fan e puf rogon u wan’um. Machane baadag ni ngam gonopiy rogon ni ngam fanay e puf rogon rom u reb e kanawo’ nra ayuwegem. Rayog nsana bay boch e taab yangar rom ni yad ma yaliy yaan e ngongol ni puwlag, ara yad ma un ko ngongol ndarngal, ara gosgos ni ma tay e yafos rorad nga thatharen e riya’, ara yad ma fanay e falay nib kireb, ara yad ma muun rrum. Sana som’on e pi n’ey e ra yibnag e felfelan’ ngorad, machane ba ga’ ni ma yib wenegan ngorad ni bod e m’ar, ara yam’, ara ngan mecham nga boch ban’en nib kireb. (Gal. 6:7, 8) Piin fel’ yangaren ni yad ma un ko pi n’ey e yad ra lemnag ni ke puf rogorad, machane bin riyul’ riy e danga’.​—Titus 3:3.

17, 18. (a) Uw rogon nra yag e bin riyul’ e puf rogon ngodad ni faan gad ra fol rok Got? (b) Mang kanawo’ e ba puf rogon Adam nge Efa riy nib thil ko girdi’ e ngiyal’ ney?

¹⁷ Machane faan gad ra fol rok Jehovah ma ra yib angin ngodad. Ya ban’en nib fel’ nga fithik’ i dowey ma ra pi’ e bin riyul’ e puf rogon ngodad. (Ps. 19:7-11) Nap’an ni ga ra fanay e puf rogon rom u fithik’ e gonop, ni aram e ngam dugliy ni ngam fol ko motochiyel nge pi kenggin e motochiyel rok Got ndariy thibngin, ma aram e ga be dag ngak Got nge gallabthir rom ni gur be’ nrayog ni ngan pag fan boch ban’en ngom. Maku rayog ni nge gel e pagan’ ko gallabthir rom ngom mar pagew gur ni ngam rin’ boch ban’en ni yow ma talegem riy kafram. Ke micheg Jehovah ndab ki n’uw nap’an ma ra pi’ e puf rogon nrib manigil ngak gubin e pi tapigpig rok ni yad ba yul’yul’. Re puf rogon ney e be yog e Bible ni aram e “puf rogon nrib manigil ni fan ngak pi fak Got.”​—Rom. 8:21, NW.

¹⁸ Ireray e re puf rogon ni immoy rok Adam nge Efa ni ur felfelan’gow ngay. Kemus ni taab n’en e yog Got ngorow ndab ra rin’ew u lan e re gi milay’ nem nu Eden, ni aram e bay taab ke gek’iy ndab ra kay wom’engin. (Gen. 2:9, 17) Ere gur, ga be lemnag nde puluw e re n’ey ni yog Got ngorow? Ma gur, re motochiyel ney ni pi’ ngorow e kaygi yoor ban’en ni be talegrow riy? Mudugil ni danga’! Am lemnag urngin e motochiyel ni ke ngongliy e girdi’ ni yad be towasariy e girdi’ ni ngar folgad riy. Machane Jehovah e kemus ni taareb e motochiyel e pi’ ngak Adam nge Efa.

19. Mang e be fil Jehovah nge Jesus ngodad nra ayuwegdad ni nge puf rogodad?

¹⁹ Rib gonop Jehovah u rogon ni ma rin’ ban’en ni fan ngodad. Ya be gum’an’ nga i fil ngodad ni ngad folgad ko fare motochiyel ko t’ufeg ko bin ni nge pi’ e motochiyel ngodad ni boor. Be fil ngodad ni ngad folgad ko pi kenggin e motochiyel rok ma gad fanenikay e tin nib kireb. (Rom. 12:9) U lan fare Welthin Rok Jesus u Daken e Burey ma ke ayuwegdad ni ngad  nanged fan ni ma rin’ e girdi’ e tin nib kireb. (Matt. 5:27, 28) Ma lan e bin beech e fayleng ni Jesus e ir e Pilung u Gil’ilungun Got e aram e ra fil ngodad rogon ni ngad lemnaged e tin nib mat’aw nge tin nde mat’aw nrogon ni ma lemnag. (Heb. 1:9) Maku ra ayuwegdad Jesus ni ngad flontgad i yan. Am susunnag ko uw rogon e par u nap’an ndakuriy ban’en nib kireb nra waliydad, ma dab kud gafgowgad ni bochan e dawor da flontgad. Fin aram e ngiyal’ ni gad ra felfelan’ ko “puf rogon nrib manigil” ni ke micheg Jehovah.

20. (a) Uw rogon ni ma fanay Jehovah e puf rogon rok? (b) Uw rogon ni ngad folwokgad rok?

²⁰ U lan e bin beech e fayleng e ka bay e gin ni nge mus e puf rogon rodad riy. T’ufeg rodad ngak Got nge girdi’ e aram e n’en nra i gagiyegnag e puf rogon rodad. Ya nap’an ni gad ra pag e t’ufeg ni nge gagiyegnagdad, ma aram e gad be folwok rok Jehovah. Yugu aram rogon ndariy e gin ni ma mus e puf rogon rok Jehovah riy, machane ke dugliy ni nge pag e t’ufeg rok ni nge pow’iy gubin ban’en ni ma rin’ nib muun ngay rogon ni ma rin’ boch ban’en ni fan ngodad. (1 John 4:7, 8) Ere aram fan ni faan gad ra folwok rok Got, ma aram e kemus rogon nrayog e bin riyul’ e puf rogon ngodad.

21. (a) Uw rogon Jehovah u wan’ David? (b) Mang e gad ra weliy ko bin migid e article?

²¹ Ere gur, ba ga’ fan u wan’um gubin ban’en nib fel’ ni ke pi’ Jehovah ngom? Ke pi’ ngom e ggan ni fan ko tirok ban’en, nge tin nrib fel’ e fager, nge boch ban’en ni ngam nameg nra yib angin ngom, nge athap rom boch nga m’on nrayog e bin riyul’ e puf rogon ngom, nge ku boch e tow’ath nrib manigil. (Ps. 103:5) Rayog ni ga ra lem ni bod David u nap’an ni meybil ni be yog fapi thin ko Psalm 16:11 ni be gaar: “Bay mu dag ngog fare pa’ i wo’ ni yan ko yafos; i gur e kam suguyeg ko felfelan’, ya ga ba’ rog, ma ayuw ni ga be tay ngog e bay i pi’ e felfelan’ ngog ndariy n’umngin nap’an.” Bin migid e article e gad ra weliy boch e tin riyul’ nib ga’ fan ni kan fek ko Psalm 16. Pi n’ey e ra ayuwegem ni ngam nang rogon nrayog e bin th’abi fel’ e yafos ngom!