DIANA e ke pag 80 e duw rok ma u lan e pi duw ni ke yan ma boor e gafgow ni ke yan u fithik’. Ya pumoon rok e bay mit e m’ar rok ni ka nog e Alzheimer ngay maku immoy ko gin ni yima ayuweg e piin pilibthir riy me par nge yim’ u rom. Miki yim’ l’agruw i pagel ni fak ma ki yib e cancer nga thuthun. Machane nap’an nra guy e pi walag Diana u nap’an e muulung ara machib ma gubin ngiyal’ mab felfelan’.

John e ke pag 43 e duw ni ma lekag e ulung. Ri baadag e maruwel rok ma dakuriy reb e maruwel nga bang ni ka baadag ni nge rin’. Machane ke tal i lekag e ulung ni bochan e ke m’ar reb i girdien nib t’uf ni nge ayuweg. Yugu aram rogon, ma nap’an nra guy e pi walag John ko pi assembly ara convention ma dawori thil. Ya ka be par nib felfelan’.

Ere uw rogon ni ke yag ni nge par Diana nge John ni yow ba felfelan’? Ma uw rogon nrayog ni nge par be’ nib felfelan’ ni yugu aram rogon ni be gafgow? Ma uw rogon nrayog ni nge par be’ nib felfelan’ ni faanra kan taleg ko maruwel rok u lan e ulung nri baadag? Be pi’ e Bible e fulweg ko pi deer ney. Ya be gaar: “Piin nib mat’aw e bay ra felfelan’gad” ni bochan Jehovah. (Ps. 64:10, BT) Ra nge tamilang u wan’dad e re thin ney, mab t’uf ni ngad nanged ko mang e n’en nra yibnag e felfelan’ ngodad nra par ni manemus, nge n’en dabi yibnag e felfelan’ ngodad.

Bay boch ban’en nib ga’ ni ma yibnag e felfelan’ ngodad. Bod ni, am lemnag l’agruw ni’ ni ngar mabgolgow ni yow be t’ufegew yow. Ara be’ ni nge mang reb e gallabthir ara be’ ni ke yag reb e maruwel ngak nib beech ni fan ko pigpig rok ngak Jehovah. Pi n’ey e ma yibnag e felfelan’ ngodad ni bochan e gubin ma bogi tow’ath ni ke yib rok Jehovah. Ir e ke sunmiy e mabgol, maku ir e ke tay nrayog ni ngan fakay e bitir. Ku ir e ke pi’ e maruwel ni ngan rin’ u lan e ulung rok.​—Gen. 2:18, 22; Ps. 127:3; 1 Tim. 3:1.

Machane bay boch ban’en ni ma yibnag e felfelan’ ngodad nib ngoch nap’an. Ba gel e kireban’ riy ni faanra en mabgol rok be’ e dabki par nib yul’yul’ ngak ara ra taw nga ba ngiyal’ me yim’. (Eze. 24:18; Hos. 3:1) Ma piin bitir e rayog ni nge dab kur folgad rok e gallabthir rorad ara Got, maku rayog ni nge taw nga ba ngiyal’ min tharbog bagayad ko ulung. Bod fa gal pagel ni fak Samuel ndar pigpiggow ngak Jehovah nrogon nib m’agan’ ngay, nge David ni boor e magawon ni yib nga lan e tabinaw rok ni bochan e kar parew Bath-sheba. (1 Sam. 8:1-3; 2 Sam. 12:11) Nap’an  nra buch boch ban’en ni aray rogon, ma der ma yibnag e felfelan’ ya kireban’ nge amith e ma fek i yib.

Ere ku taareb rogon ngodad, ya bay yu ngiyal’ ndabiyog ni ngad ululgad ko maruwel ni gad ma rin’ ni fan ngak Jehovah ni bochan e kad m’argad, ara ba t’uf ni ngad talgad ya ngad ayuweged reb i chon e tabinaw rodad ni ke m’ar. Ara reb e bochan e kan thilyeg boch ban’en u lan e ulung rok Jehovah. Yooren e walag ni kar talgad u boch e maruwel u lan e ulung e ka rogned ni yad ma finey e felfelan’ ni ur ted u nap’an ni ur rin’ed e pi maruwel ney.

Ere rib tamilang ni ma yib e felfelan’ ngodad ni bochan e pi n’ey ni kad weliyed, machane dabi par nib n’uw nap’an. Ere gur, rayog ni ngam par ni gab felfelan’ nib n’uw nap’an ni yugu aram rogon ni ke mo’maw’ e par rodad? Mmudugil nrayog ni bochan e ke yag ni nge par Samuel nge David nge yugu boch e girdi’ ni yad ba felfelan’ ni yugu aram rogon ni yad be yan u fithik’ e gafgow.

Manang Jesus ko mang e ma yibnag e bin riyul’ e felfelan’. U m’on ni nge yib nga fayleng ma be yog e Bible ni ‘gubin ngiyal’ ni i par rok [Jehovah] nib felfelan’.’ (Prov. 8:30) Machane nap’an ni yib nga fayleng, ma immoy yu ngiyal’ ni i yan u fithik’ e magawon. Yugu aram rogon mi i par nib felfelan’ ni be rin’ e tin nib m’agan’ e Chitamangin ngay. (John 4:34) Ere uw rogon e tin tomur e awa nib gel e amith ni yan u fithik’? Be gaar e Bible: “Bochan e felfelan’ ni be sonnag ma daki tafinaynag e tamra’ nra tay ko yam’ ni nge tay” u daken fare ley i gek’iy. (Heb. 12:2) Ere boor ban’en nrayog ni ngad filed u l’agruw ban’en ni yog Jesus u murung’agen e bin riyul’ e felfelan’.

Bay ba ngiyal’ u nap’an ni sul fa 70 i gachalpen Jesus ngak u tomuren ni kar mu’gad ko machib. Ma kar felfelan’gad ni bochan e pi n’en ni ke yag ni ngar rin’ed nib muun ngay e pi moonyan’ ni kar tulufed. Machane me gaar Jesus ngorad: “Dabi felan’med ni fan e be fol e pi moonyan’ romed; machane nge felan’med ni fan e kan yoloy fithingmed nga babyor u tharmiy.” (Luke 10:1-9, 17, 20) Arrogon kab ga’ fan ni ngad fel’gad u wan’ Jehovah ma kab gel e felfelan’ ni ma yibnag ngodad ko tin ka bay e maruwel ni kan pi’ ngodad u lan e ulung.

Ku bay ba ngiyal’ ni be non Jesus ngak ba ulung i girdi’ ma bay reb e ppin nu Jew riy ni kari gin ko tin be fil Jesus, ma aram me yog ngak nib mudugil ni kari felfelan’ e chitiningin Jesus ngak. Machane me fulweg Jesus ni gaar: “Ri kab felan’ e piin ni kar rung’aged e  thin rok Got ma kar pired ni yad be fol riy!” (Luke 11:27, 28) Riyul’ ni pi bitir rodad e yad ma k’aring e felfelan’ ngodad. Machane rogon ni ga ma fol rok Jehovah nge tha’ rodad ni nge par nib chugur e aram e n’en nra pi’ e felfelan’ ni manemus ngodad.

Ri gad ma felfelan’ u nap’an ni gad ra nang ni gad be felfelan’nag Jehovah. Ma yugu aram rogon ni dubdad ni ma yib e skeng ngodad, machane dabiyog ni nge chuweg e re n’em e felfelan’ ni bay rodad. Bin riyul’ riy e, nap’an ni gad ra par ni gad ba yul’yul’ u nap’an ni gad be yan u fithik’ e skeng, ma ma gel e felfelan’ rodad. (Rom. 5:3-5) Maku reb e, ma pi’ Jehovah gelngin nib thothup ngak e piin nib pagan’rad ngak, ma felfelan’ e reb i wom’engin gelngin Got nib thothup. (Gal. 5:22) Ere re n’ey e be ayuwegdad ni nge tamilang u wan’dad fan ni yog e Psalm 64:10 (BT) ni gaar: “Gubin e piin nib mat’aw e bay ra felfelan’gad” ni bochan Jehovah.

Re n’ey e be tamilangnag fan ni ke yag ni nge par Diana nge John ni yow ba felfelan’ ni yugu aram rogon ni boor e magawon nra mada’nagew. Ke yog Diana ni gaar: “Kug par ni gu be naf ngak Jehovah ni bod rogon reb e bitir ni be naf ngak e gallabthir rok.” Miki yog ni gaar: “Gu lemnag ni ke tow’athnageg ni aram e ke pi’ gelngig ni nggu ulul ni nguug machib ni gubin ngiyal’ u fithik’ e felfelan’.” Mang e ke ayuweg John ni nge par nib felfelan’ ma be tiyan’ ko machib u tomuren ni ke tal ko maruwel rok ni fan ngak Jehovah? Ke yog ni gaar: “Ka nap’an e 1998 min pieg nggu senseynag e pi walag ko fare skul ni ka nog e Ministerial Training School ngay ke mada’ ko ngiyal’ ney ma kug yoornag e tayim ni gu ma tay ko fol Bible ni yigoo gag.” Ke weliy nib mom rogon nra thilyegew e ppin rok rogon e par rorow ni bochan e demtrug e maruwel ni kan pi’ ngorow mab m’agan’row ngay ni ngar rin’ew ni fan ngak Jehovah. Ki ulul ngay nge gaar: “Kug rin’ew e re n’ey nda gu kalgowngan’mow riy.”

Boor e girdi’ e kar nanged nib riyul’ fapi thin ko Psalm 64:10 ni bochan e n’en ni ke buch rorad. Bod ni, bay ba wu’ e mabgol ni ke pag 30 e duw ni kar pigpiggow u Bethel u Meriken. Ma aram min pi’ reb e maruwel ngorow nib thil ni aram e ngar mangew special pioneer. Kar gaargow: “Nap’an ni yira chuweg ban’en nib t’uf rom ma ra kireban’um. Machane dabiyog ni ngam par n’umngin nap’an e yafos rom ni gab kireban’.” Ere nap’an nni pi’ e bin nib beech e maruwel ngorow, ma aram mar tababgow ni ngar machibgad e ulung rorow u taabang. Maku ra gaargow: “Kug yibilayew boch ban’en nib tamilang. Ma nap’an ni gamow ra guy ni kan fulweg taban e meybil romow, ma ri be pi’ e athamgil nga lanin’mow maku ma ma yibnag e felfelan’ ngomow. Ma tomuren nug tawgow ngaram, ma bay boch e walag u lan e ulung nra tababgad ko pioneer, ma kan tow’athnagmow ya l’agruw e girdi’ ni gamow ma fil e Bible ngorow ni yow be mon’og i yan.”

Riyul’ nde mom ni ngan par ni yib felfelan’. Ya yu ngiyal’ e ma kireban’dad. Machane be pi’ Jehovah e pagan’ ngodad ko fapi thin ni bay ko Psalm 64:10. Mus ko ngiyal’ nra kireban’dad, ma rayog ni nge pagan’dad ni faan gad ra par ni gad ba yul’yul’ ndemtrug ko mang e gad be yan u fithik’, ma gad ra ‘felfelan’’ ni bochan Jehovah. Ku rayog ni ngad athapeged e ngiyal’ nra riyul’ e tin ni ke micheg Jehovah ni aram e bayi “sunumiy reb e fayleng nib beech nge reb e lan e lang nib beech.” Ma aram e gubin e girdi’ ni bay ra flontgad mi yad ‘felfelan’ ndariy n’umngin nap’an’ ni bochan gubin ban’en nra rin’ Jehovah.​—Isa. 65:17, 18.

Aygum lemnag e n’en ni be yip’ fan e re n’ey. Ra taw ko ngiyal’ nem ma ke fel’ fithik’ i dowdad ma gubin e rran ni gad ra od mab gel gelngidad. Demtrug ko mang e tin ni ke buch rodad kakrom ni ma k’aring e kireban’ ngodad, ma ra taw ko ngiyal’ nem ma dabki k’aring e amith ngodad. Ya ke micheg Jehovah ngodad ni “tin kakrom e ri bay ni pag talin.” Gad ra felfelan’ ni ngad mada’gad e piin ni yad ba t’uf rodad ni kar m’ad. Maku gad ra thamiy e n’en ni thamiy e gallabthir rok fachi buliyel ni 12 e duw rok ni ke faseg Jesus ko yam’. Be yog e Bible ni gaar: “Faani yodorom fachi pin mi yigoo ra gingad ngak ni ke balyangan’rad [“kar felfelan’gad,” NW]!” (Mark 5:42) Ere ra munmun ma gubin e girdi’ u fayleng ni yad ra mat’aw ma yad ra ‘felfelan’’ ni manemus ni bochan Jehovah.