1. Uw rogon ni dag bochi pagel nib mich e fos ko yam’ u wan’?

 BAY bochi pagel ni ka nog Matthew ngak ni immoy ba mit e m’ar rok nib ubchiya’, ma boor yay nib t’uf ni ngan sey. Bay reb fapi JW Broadcasting^® ni yima ngongliy ni gubin e pul ni ur yaliyed chon e tabinaw rok u nap’an ni ke gaman medlip e duw rok. Nap’an ni chugur nga tungun e re video nem, ma aram min dag yaan ba music video ni be weliy murung’agen e piin nib t’uf rodad ni gad ra mada’ u nap’an e fos ko yam’. b Nap’an ni m’ay fare video me yan Matthew i kol pa’ e gallabthir rok me gaar ngorow: “Am guyew, mus ni faan gu ra yim’ ma yira fasegeg. Rayog ni ngam sonnagew gag, ere dabi magafan’mew.” Am lemnag gelngin e felfelan’ ni tay e gallabthir nem u nap’an nra nangew nrib mich e fos ko yam’ u wan’ fakrow.

2-3. Mang fan nib fel’ ni ngaud lemnaged e n’en kan micheg u murung’agen e piin yira fasegrad?

² Ba fel’ ni ngaud lemnaged e n’en ke micheg e Bible u murung’agen e piin yira fasegrad boch nga m’on. (John 5:28, 29) Mang fan? Ya dad nanged e ngiyal’ nrayog ni nge yib ba mit e m’ar ngodad nib ubchiya’ ara yim’ be’ nib t’uf rodad nib tomgin. (Jas. 4:13, 14) Athap rodad ko fos ko yam’ e rayog ni nge ayuwegdad ni ngad athamgilgad u nap’an ni ke buch reb e gali n’ey rodad. (1 Thess. 4:13) Be micheg e Bible nri manangdad e Chitamangidad ni bay u tharmiy ma ri gad ba t’uf rok. (Luke 12:7) Am lemnag feni fel’ rogon ni manangdad Jehovah Got nrayog rok ni nge fasegdad miki sulweg rarogodad nge pi n’en bay u lanin’dad nga rogon. Maku reb e, riyul’ nri gad ba t’uf rok Jehovah ni ke bing e kanawo’ ngodad nrayog ni ngad pared ni manemus ni kub muun ngay ni nge fasegdad ko yam’ ni faanra kad m’ad!

³ Gad ra weliy ko re article ney fan nrayog ni nge mich u wan’dad  e fos ko yam’ ni kan micheg. Ngemu’ ma gad weliy fare chep ni bay u Bible ni ir e bay fare kenggin e thin nu Bible riy ni fan ko re article ney ni be gaar: “Bay ni faseg walagem ko yam’.” (John 11:23) Tomur riy e gad ra weliy rogon ni ngari riyul’ u wan’dad e athap rodad ko fos ko yam’.

4. Ra nge mich ban’en u wan’dad, ma mang e thingar ki mich u wan’dad? Mu susunnag.

⁴ Ra nge mich ban’en u wan’dad, ma thingar ki mich u wan’dad ni en ke micheg fapi thin e baadag maku rayog rok ni nge lebguy e n’en ke micheg. Rayog ni ngan susunnag e re n’ey ko naun rom ni ke kireb u nap’an e yoko’, ma aram me yib reb e fager rom me gaar ngom, ‘Nggu fal’eg e naun rom.’ Fare fager rom e be riyul’ ko n’en be yog, mab mich u wan’um ni baadag ni nge ayuwegem. Maku reb e, faanra ir be’ nib salap ko dimow naun maku bay talin e maruwel rok, ma aram e ga manang nrayog rok ni nge ayuwegem. Bochan e re n’ey, ma aram me mich u wan’um e n’en ni yog. Ere uw rogon e n’en ke micheg Got u murung’agen e fos ko yam’? Gur, riyul’ ni baadag maku rayog rok ni nge rin’ e re n’ey, fa?

5-6. Mang fan nrayog ni nge pagan’dad ni baadag Jehovah ni nge faseg e piin kar m’ad?

⁵ Baadag Jehovah ni nge faseg e piin kar m’ad, fa? Arrogon. I thagthagnag nga laniyan’ boch e girdi’ nra uned i yoloy e Bible ni ngar yoloyed nga but’ e n’en ke micheg u murung’agen e piin yira fasegrad boch nga m’on. (Isa. 26:19; Hos. 13:14; Rev. 20:11-13) Ma nap’an nra micheg Jehovah ban’en, ma gubin ngiyal’ ni ma lebguy. (Josh. 23:14) Bin riyul’ riy e, ri baadag Jehovah ni nge faseg e piin kar m’ad. Mang fan nrayog ni nga dogned e re n’ey?

⁶ Am lemnag e n’en ni yog Job. Ba pagan’ ngay ni mus ni faanra yim’, ma baadag Jehovah ni nge guy ni ke fos ko yam’. (Job 14:14, 15) Ku aray rogon e n’en baadag Jehovah ni fan ngak e pi tapigpig rok ni kar m’ad. Ri baadag ni nge fasegrad ko yam’ ni ke fel’ fithik’ i dowrad ma yad ba felfelan’. Ma uw rogon bokum bilyon e girdi’ ni kar m’ad nde yag ni ngar nanged e tin riyul’ u murung’agen Jehovah? Ku baadag e Got rodad ni nge fasegrad. (Acts 24:15) Baadag ni nge mab e kanawo’ ngorad ni ngar manged fager rok mar pared u fayleng ndariy n’umngin nap’an. (John 3:16) Ere ba tamilang ni baadag Jehovah ni nge faseg e piin kar m’ad.

7-8. Mang fan nrayog ni nge pagan’dad nrayog rok Jehovah ni nge faseg e piin kar m’ad?

⁷ Ku rayog rok Jehovah ni nge faseg e piin kar m’ad, fa? Arrogon, ya ir e “Gubin ma Rayog Rok.” (Rev. 1:8) Ere ba gel gelngin nrayog ni nge gel ko pi toogor rok nib muun e yam’ ngay. (1 Kor. 15:26) Re n’ey ni kad nanged e ma pi’ gelngidad maku ma fal’eg lanin’dad. Am lemnag e n’en ni buch rok Sister Emma Arnold. Boor ban’en ni buch rorad chon e tabinaw rok u nap’an e Bin L’agruw e Mahl ko Fayleng nri skengnag e michan’ rorad. I yog boch e thin ni nge fal’eg laniyan’ bochi pin ni fak ni ke yim’ boch e girdi’ nib t’uf rok ni ur moyed ko pi concentration camp ko Nazi. I gaar: “Faanra dabki fos e piin kar m’ad, me ere gathi ra yan i aw ni kab gel e yam’ ngak Got?” Dariy ban’en nib gel gelngin ngak Jehovah! Got ni gubin ma rayog rok ni ir e ke sunmiy gubin e yafos e rayog rok ni nge faseg e piin kar m’ad.

⁸ Ku reb i fan ni gad manang nrayog rok Got ni nge faseg e yam’ e bochan nder ma pagtalin ban’en. Ma pining fithingan e pi t’uf nreb nge reb. (Isa. 40:26) Maku reb e, der ma pagtalin e piin kar m’ad. (Job 14:13; Luke 20:37, 38) Rib mom ni nge yib ngan’ urngin ban’en u rarogon e piin nra fasegrad nib muun ngay yaarad, nge rarogorad, nge pi n’en ni i buch rorad, nge pi n’en bay u lanin’rad.

9. Mang fan nib mich u wan’um e n’en ke micheg Jehovah u murung’agen e piin yira fasegrad boch nga m’on?

⁹ Ba tamilang nrayog ni nge mich u wan’dad e  n’en ke micheg Jehovah u murung’agen e piin yira fasegrad boch nga m’on ni bochan e baadag maku rayog rok ni nge rin’ e re n’ey. Ku baaray reb i fan ni nge mich e re n’ey u wan’um. Re n’em e aram e: Bay boch e girdi’ ni ke fasegrad Jehovah ko yam’. I pi’ gelngin boch e pumoon ni yad ba yul’yul’ kakrom nib muun Jesus ngay ni ngar faseged e piin kar m’ad. Ere chiney e ngad weliyed murung’agen be’ ni faseg Jesus ko yam’ ni bay ko John ko guruy ni 11.

10. Mang e buch u nap’an ni be machib Jesus u barba’ e lul’ ni Jordan, ma mang e rin’? (John 11:1-3)

¹⁰ Mu beeg e John 11:1-3. Am lemnag e n’en ni buch u Bethany u nap’an ni ke chugur nga tungun e duw ni 32 C.E. Bay boch e girdi’ nrib fel’ e thin rorad Jesus ni yad ma par ko re binaw nem ni aram Lazarus nge walagen ni Maria nge Martha. (Luke 10:38-42) Machane me m’ar Lazarus, me magafan’ fa gali ppin ni walagen. Ere ra piew e thin nge yan ngak Jesus ni bay u barba’ e lul’ ni Jordan. Ra nge yan be’ u rom nga Bethany ni be yan u but’ ma ra fek sogonap’an l’agruw e rran. (John 10:40) Ba gel e kireban’ riy ya yim’ Lazarus u bang ko ngiyal’ ni taw e thin ngak Jesus. Yugu aram rogon ni manang Jesus ni ke yim’ e fager rok, machane miki par u rom u lan l’agruw e rran mfini milekag nga Bethany. Ere nap’an ni taw ngaram ma ke gaman aningeg e rran ni ke yim’ Lazarus. Machane i lemnag ni nge rin’ ban’en nra yib angin ko pi fager rok min pining e sorok riy ngak Got.​—John 11:4, 6, 11, 17.

11. Mang e rayog ni ngad filed u murung’agen e fager ko re n’ey ni buch?

¹¹ Re n’ey ni buch e be fil ban’en ngodad u murung’agen e fager. Am lemnag e re n’ey: Nap’an ni pi’ Maria nge Martha e thin nge yan ngak Jesus, ma da rognew ngak ni nge yan nga Bethany. Kemus nrognew ngak ni ke m’ar e fager rok. (John 11:3) Nap’an ni yim’ Lazarus, ma rayog rok Jesus ni nge faseg ko yam’ ni yugu aram rogon nib palog ko gin bay riy. Machane i dugliy ni nge yan nga Bethany ni nge guy Maria nge Martha ni fager rok. Bay e fager rom nra ayuwegem ni yugu aram rogon ndawor mu ning e ayuw ngak, fa? Faanra bay, ma aram e rayog ni ngam taga’ ngak ni nge ayuwegem u nap’an ni kam “gafgow.” (Prov. 17:17, BT) Ere manga yugu da manged boch e fager ni aray rogon ni bod Jesus! Chiney e ngkud ululgad i weliy e n’en ni buch ni migid.

12. Mang e micheg Jesus ngak Martha, ma mang fan nrayog ni nge mich e re n’ey u wan’? (John 11:23-26)

¹² Mu beeg e John 11:23-26. I nang Martha ni ke chugur Jesus nga Bethany, me yan ni ka chingiyal’ nem ni ngar mada’gow me gaar ngak: “Somol, faan mang e um moy u roy, ma dawori yim’ walageg!” (John 11:21) Riyul’ nrayog ni nge golnag Jesus Lazarus ko ngiyal’ ni kab m’ar. Machane ka bay ban’en ni baadag ni nge rin’ ni kab fel’ boch. I micheg ngak Martha ni gaar: “Bay ni faseg walagem ko yam’.” Ki weliy ngak fan ni nge mich e re thin ney u wan’ ni gaar: “I gag owchen e fos ko yam’ nge yafos.” Arrogon, ke pi’ Got gelngin nrayog ni nge faseg e yam’. U m’on riy me faseg bochi pin ni ka fini yim’, miki faseg be’ nib pagel ko rofen ni yim’ riy. (Luke 7:11-15; 8:49-55) Machane gur, rayog ni nge faseg  be’ ni ke gaman aningeg e rran ni ke yim’ ma ke tabab ni nge kireb, fa?

13. Mang e rin’ Jesus u nap’an ni guy Maria nge piin kar uned ngak ni yad be yor nrogon ni bay ko John 11:32-35? (Kum guy e sasing.)

¹³ Mu beeg e John 11:32-35. Am lemnag e n’en ni buch ni migid. Ki yan Maria ni walagen Lazarus ni ngar mada’gow Jesus, miki sul u daken fapi thin ni ke yog walagen ni gaar: “Somol, faan mang e um moy u roy, ma dawori yim’ walageg!” Kari kireban’ maku arrogon e piin kar uned ngak. Nap’an ni guyrad Jesus ni yad be yor, ma aram mi ri taganan’. Bochan e re n’ey, ma aram me yor. Manang gelngin e amith ni ma tay laniyan’ be’ u nap’an nra yim’ be’ nib t’uf rok. Ere ba mudugil nri baadag ni nge rin’ ban’en ni nge talegrad ndab kur yorgad!

14. Mang e rayog ni ngad filed u murung’agen Jehovah ko n’en ni rin’ Jesus u nap’an ni guy Maria ni be yor?

¹⁴ N’en ni rin’ Jesus u nap’an ni guy Maria ni be yor e be fil ngodad ni Jehovah e ir reb e Got nri ma runguyey. Mang fan nrayog ni nga dogned e re n’ey? Kad filed ko fa binem e article nrib fel’ rogon ni i m’ug rarogon e lem rok e Chitamangin Jesus rok. (John 12:45) Ere nap’an ni gad ra beeg ni yor Jesus ni bochan e ri taganan’ ngak e pi fager rok, ma rayog ni ngad nanged riy nri ku ma taganan’ Jehovah u nap’an nra guy ni gad be yor ya ke kireban’dad. (Ps. 56:8) Ere gathi be k’aringem e re n’ey ni ngam adag ni ngam chugur ngak e Got rodad ni ma runguyey?

15. Mang e buch u nap’an ni yi bay ko fare yiy ni kan chibgiliy Lazarus ngay nrogon ni bay ko John 11:41-44? (Kum guy e sasing.)

¹⁵ Mu beeg e John 11:41-44. I taw Jesus ko fare yiy ni kan chibgiliy Lazarus ngay me yog ni ngan chuweg e re gaf i malang nem ni bay u langan e re yiy nem. Me yog Martha ndab ni chuweg ya ra yib gol’ochngin e re yam’ nem. Me fulweg Jesus ni gaar: “Gathi gog ngom faram ni ga ra guy e tin nrayog ni nge rin’ Got ni yira ngat ngay ni faanra mmich Got u wun’um?” (John 11:39, 40) Ere sap Jesus nga lang me meybil. Baadag ni nge pining e sorok ngak Jehovah ko n’en ni nge buch ni migid. Ngemu’ me pong nib ga’ laman ni gaar: “Lazarus, moy nga wen!” Ma aram me yib Lazarus nga wen! Ere ke rin’ Jesus ban’en ni lemnag boch e girdi’ ndabiyog ni nge rin’.​—Mu guy e study note ko John 11:17.

16. Uw rogon ni be ayuwegdad e n’en ni buch ni bay ko John ko guruy ni 11 ni ngari mich u wan’dad e athap rodad ko fos ko yam’?

 ¹⁶ N’en ni buch ni bay ko John ko guruy ni 11 e be ayuwegdad ni ngari mich u wan’dad e athap rodad ko fos ko yam’. Ni uw rogon? Dab mu pagtalin ni micheg Jesus ngak Martha ni gaar: “Bay ni faseg walagem ko yam’.” (John 11:23) Baadag Jesus maku rayog rok ni nge rin’ e re n’ey ni ke micheg ni bod e Chitamangin. Meyor ni tay e be dag nri baadag ni nge chuweg e yam’ nge kireban’ ni yima tay ni bochan e ke yim’ be’. Ki micheg Jesus ni bay gelngin ni nge faseg e yam’ u nap’an ni yib Lazarus nga wuru’ fare yiy nni chibgiliy ngay. Kum lemnag e n’en ni puguran Jesus ngak Martha ni gaar: “Gathi gog ngom faram ni ga ra guy e tin nrayog ni nge rin’ Got ni yira ngat ngay ni faanra mmich Got u wun’um?” (John 11:40) Ere bay fan ni nge mich u wan’dad nra riyul’ e n’en ke micheg Got u murung’agen e piin yira fasegrad boch nga m’on. Machane mang e rayog ni ngad rin’ed ya ngari riyul’ e re athap ney u wan’dad?

17. Mang e susun ndab da paged talin u nap’an ni gad be beeg murung’agen e piin kan fasegrad ni bay murung’agrad u Bible?

¹⁷ Mu beeg murung’agen boch e girdi’ ni kan fasegrad kakrom mag fal’eg i lemnag. Be weliy e Bible murung’agen meruk e girdi’ nni fasegrad ko yam’ u roy u fayleng. c Mang ndab mu fal’eg i fil murung’agen e pi fos ko yam’ ney? Nap’an ni ga be rin’ e re n’ey, ma dab mu pagtalin ni pi pumoon, nge ppin, nge bitir ney e riyul’ ni ur moyed e ngiyal’ nem. Mu gay boch ban’en nrayog ni ngam fil riy. Mu lemnag rogon ni be dag reb nge reb e pi fos ko yam’ ney ni baadag Got maku rayog rok ni nge faseg e piin kar m’ad. Bin th’abi ga’ fan riy e, ngam lemnag murung’agen e fos ko yam’ ni tay Jesus ni aram e bin th’abi ga’ fan e fos ko yam’ ni buch. Dab mu pagtalin ni bokum miriay e girdi’ nra guyed Jesus ni kan faseg ko yam’, ma ireray e n’en be tor e michan’ rodad nga daken.​—1 Kor. 15:3-6, 20-22.

18. Uw rogon ni nge yib angin ngom e pi tang rodad ni murung’agen e athap ko fos ko yam’? (Kum guy e footnote.)

 ¹⁸ Mmotoyil, ma ga be yon’, ma ga be lemnag e pi “tang ni thin rok Got” ni murung’agen e athap ko fos ko yam’. d (Efe. 5:19) Pi tang ney e ma riyul’nag e fos ko yam’ u wan’dad, maku ma ayuwegdad ni ngari mich u wan’dad e re athap ney nrib manigil. Um motoyil ngay, ma ga be fil, ma gimed be weliy chon e tabinaw rom fan e thin riy u nap’an e fol Bible ni tabinaw. Mu fil e thin riy nge mit ngom mu kum guy rogon ni nge taw nga gum’irchaem. Faan ga ra rin’ e re n’ey, ma nap’an ni ga ra mada’nag reb e magawon ni ke tay e yafos rom nga thatharen e riya’ ara ke yim’ be’ nib t’uf rom, ma aram e ra ayuwegem gelngin Jehovah nib thothup ni nge yib ngan’um e pi tang ney ya nge yag ni fal’eg lanin’um me pi’ gelngim.

19. Mang e rayog ni ngad susunnaged u lanin’dad u murung’agen e fos ko yam’? (Mu guy fare kahol ni kenggin e “ Mang e Ga Ra Fith Ngorad?”)

¹⁹ Um susunnag boch ban’en u lanin’um. Ke sunmiydad Jehovah nrayog ni ngad susunnaged rarogodad u lan e bin nib beech e fayleng. I yog reb e walag nib pin ni gaar: “Bochan ni ke n’uw nap’an nug ma susunnag rarogog u lan e bin nib beech e fayleng ma gowa bod nrayog ni nggu farabon e floras ni rose ni be puf u Paradis.” Mu susunnag ni kam mada’gad boch e pumoon nge ppin ni yad ba yul’yul’ ni bay murung’agrad u Bible. Mini’ e ga be athapeg ni ngam mada’nag? Ma mang boch e deer ni ga ra fith ngak? Kum susunnag ni kam mada’gad bayay e piin nib t’uf rom ni kar m’ad. Mu susunnag e n’en ni ga ra yog ngorad nsom’on, nge rogon ni gimed ra gumuchmuch, nge gelngin e felfelan’ ni ga ra tay ni kam guyrad bayay.

20. Mang e susun ni ngad adaged ni ngad rin’ed?

²⁰ Ri gad be pining e magar ko n’en ke micheg Jehovah u murung’agen e piin yira fasegrad! Rayog ni nge pagan’dad ngay nra riyul’ e re n’ey ni kan micheg ni bochan e baadag Jehovah ni nge lebguy, maku rayog rok ni nge rin’ e re n’ey. Gad baadag ni ngari mich u wan’dad e re athap ney nrib manigil. Gad ra rin’ e re n’ey, ma aram e gad ra chugur ngak fare Got ni ke micheg ngodad ni ke gaar, ‘Bay ni faseg e piin nib t’uf rom ko yam’!’