Mang Fan ni Ngam Ognagem Ngak Jehovah?

“Ya fowngan e Got ni gag girdien me ir e gu ma meybil ma gu ma liyor ngak e yib ba engel rok ngog.”​—ACTS 27:23.

1. (a) Mang boch ban’en ni thingari rin’ be’ ni faanra nge un ko taufe? (b) Mang boch e deer ni bay?

 “BOCHAN e maligach ni pi’ Kristus, kam kalngan’um ko denen rom ma kam ognagem ngak Jehovah ni ngam rin’ e tin nib m’agan’ ngay?” Ireray reb fa gal deer ni yima fith ngak e piin ni ngar uned ko taufe. Mang fan nib t’uf ni pi Kristiano e ngar ognaged yad ngak Jehovah? Uw rogon nra fel’ rogodad ni faanra da ognaged gadad ngak Got? Mang fan ni dabi fel’ u wan’ Got e liyor rok be’ ni faanra dawori ognag ir ngak? Ra ngad  nanged e fulweg ko pi deer ney, ma som’on e ngad guyed ko mang fan ni ngan ognagey.

2. Mang e be yip’ fan ni nge ognag be’ ir ngak Jehovah?

² Mang e be yip’ fan ni nge ognag be’ ir ngak Got? Rayog ni ngam nang rogon ni tamilangnag Paul e tha’ u thilrow Got. Nap’an ni ke chugur ni nge pil e barkow me yog Paul ngak e girdi’ ni Jehovah e ir e ‘Got rok.’ (Mu beeg e Acts 27:22-24.) Jehovah e Got ko tin riyul’ e Kristiano, ma tin ni ka bay e girdi’ nu fayleng e ke “suweyrad Faanem nib Kireb.” (1 John 5:19) Pi Kristiano e kar manged girdi’ rok Jehovah u nap’an ni kar ognaged yad  ngak u fithik’ e meybil. Ra kam ognagem ngak Got ma aram e kam micheg ban’en ngak ma aram e rayog ni ngan taufenagem.

3. (a) Mang e be dag e taufe ni tay Jesus? (b) Uw rogon ni nge folwok pi gachalpen rok?

³ Ke pi’ Jesus e kanawo’ ngodad u nap’an ni ke dugliy ni nge rin’ e tin nib m’agan’ Got ngay. Kan gargelnag ko fare nam nu Israel ni kan ognag ngak Got. Machane, nap’an ni ke taufe ma aram e ke rin’ ban’en nri ku ba ga’ fan. Bible e be dag e thin rok Jesus ni gaar: “Got, gub aray ni nggu rin’ e tin ni gab adag.” (Heb. 10:7; Luke 3:21) Taufe ni  ke tay Jesus e be dag ni aram e ke pi’ ir ni nge rin’ e tin nib m’agan’ e Chitamangin ngay. Piin ni gachalpen e ku yad ra folwok rok Jesus u nap’an ni yad un ko taufe. Ere yad ra un ko taufe ya nge guy e girdi’ ni kar ognaged yad ngak Got u fithik’ e meybil.

 Rogon ni Nge Yib Angin ni Ngan Ognagey

4. Mang e be fil ngodad rogon e fager rok David nge Jonathan?

⁴ Gadad e Kristiano ni kad ognaged gadad ngak Got e kad rin’ed ban’en nrib ga’ fan. Gathi kemus ni kad micheged ban’en ngak Got. Ere uw rogon nra yib angin ni faanra ngad ognaged gadad? Ngad weliyed rogon nra yib angin ni faanra kad micheged ban’en ni ngad rin’ed ngak e girdi’. Rayog ni ngam micheg ku be’ ni ngam fagergow. Machane ra nge fel’ e fager romew ma bay boch ban’en ni thingar mu rin’ ya nge fel’ thilmew. Be weliy e Bible rogon e fager rok David nge Jonathan ni par nrib fel’. Kar fal’egew e m’ag ni nge par e fager rorow ni dabi kireb. (Mu beeg e 1 Samuel 17:57; 18:1, 3.) Yugu aram rogon nib mo’maw’ e fager ni aram rogon, machane bay boch e fager ni ku ma fel’ rogon u nap’an ni kar micheged ni ngar rin’ed ban’en ni fan ngorad.​—Prov. 17:17; 18:24.

5. Uw rogon ni rayog ni nge par reb e tapigpig rok reb e masta nib fel’ ni n’umngin nap’an e yafas rok?

⁵ Motochiyel ni pi’ Got ngak piyu Israel e be tamilangnag rogon reb e m’ag ni yira micheg me yib angin ko girdi’. Faanra baadag reb e tapigpig ni nge pigpig ko masta rok ni n’umngin nap’an e yafas rok ma rayog ni ngar fal’egew e m’ag u thilrow. Be gaar e Motochiyel: “Machane faanra tamilangnag fare moon ni sib ni nge yog nib t’uf fare masta rok, nge pin rok, nge bitir, ere dabun ni ngan pag nge yan. Ma aram ma nge fek e masta fare sib i yan nga mit Got u tagil’ e meybil. Me sak’iynag nga dow e ren u langan e mab nge kuruf tel. Ma aram e nge sib rok fare masta u n’umngin nap’an e yafos rok.”​—Ex. 21:5, 6, BT.

6, 7. (a) Uw rogon ni pi n’en ni kan micheg e ma yib angin ko girdi’? (b) Uw rogon ni ngan micheg ban’en e ma fal’eg e tha’ u thildad Jehovah?

⁶ Tha’ u thilin e mabgol e ba t’uf ni ngan micheg ban’en riy. N’en ni kam michegew e en mabgol rom e gathi kam yoloyew nga babyor, ya gimew e kam michegew ngomew. L’agruw ni’ ni yow ma par u taabang ni dawora mabgol e dabiyog ni nge pagan’row, maku arrogon e bitir rorow ni dabiyog ni nge pagan’rad. Machane piin ni kar mabgolgad, ma kar micheged ban’en ngorad e thingar ra pithiged e magawon ni ke yib nga lan e mabgol rorad u fithik’ e t’ufeg nrogon nib puluw ko Bible.​—Matt. 19:5, 6; 1 Kor. 13:7, 8; Heb. 13:4.

⁷ Kakrom, e ma yib angin ban’en ni ke micheg e girdi’ ngorad ni fan ko siyobay nge maruwel rorad. (Matt. 20:1, 2, 8) Ban’en ni aram rogon e ku ma ayuwegdad e ngiyal’ ney. Ra yib angin ngodad ni faan gad ra fal’eg e babyor ni ngad micheged ban’en u m’on ni ngad tababnaged reb e siyobay ara u m’on ni ngad uned nga reb e maruwel. Ere, faanra ke ayuweg e n’en ni kar micheged thilin e fager, nge mabgol, nge maruwel rorad, me ere rib mudugil nra yib angin ngom ni faanra mu ognagem ngak Jehovah. Gad ra weliy e chiney u murung’agen e girdi’ kakrom ni kar ognaged yad ngak Jehovah Got ma ke fel’ rogorad, ma ku ngad guyed rogon ni ngan ognagey e gathi kemus ni ngan micheg ban’en.

Piyu Israel e Kar Ognaged Yad Ngak Got Ma Ke Yib Angin Ngorad

8. Mang e be yip’ fan ni ke ognag piyu Israel yad ngak Got?

⁸ Fare nam nu Israel e kar ognaged yad ngak Jehovah u nap’an ni kar micheged ban’en ngak Got. Ke ulunguyrad Jehovah nga taabang nga reb e binaw nib chuchugur ko fare Burey ni Sinai, me gaar ngorad: “Faan gimed ra fol rog ngam ayuweged e m’ag rog, ma gimed ra par ni kam manged e girdi’ rog.” Me fulweg fapi girdi’ ni gubin ntaab yay ni lungurad, “Bay gu rin’ed urngin e tin ni ke yog Somol.” (Ex. 19:4-8) Nap’an nra ognaged yad ngak Got ma aram e be yip’ fan ni gathi kemus ni kar micheged ban’en ngak ni ngar rin’ed. Kar manged girdi’ rok Got, ma ke ‘mel’egrad’ u fithik’ urngin e girdi’.

9. Uw rogon ni ke yib angin ngak piyu Israel u nap’an ni kar ognaged yad ngak Got?

⁹ Ke fel’ rogon piyu Israel ni kar manged girdien Jehovah. I yul’yul’ ngorad ma i ayuwegrad ni bod reb e llabthir ni be ayuweg e bitir rok. Ke gaar ngak piyu Israel: “Gur rayog rok  be’ ni ppin ni nge pag talin fak ni kabran ma dabi t’uf rok e re tir nem ni ir e gargeleg? Gomanga ra pag be’ ni ppin talin fak, machane gag e dab gu pag talimed.” (Isa. 49:15) Ke pi’ Jehovah e motochiyel nge pi profet nge pi engel ni ngar ayuweged yad. Ke yog e en ni yoloy e psalm ni gaar: “Ma pi’ e thin rok ngak e girdi’ rok, ni pi fonow nge motochiyel rok ngak yu Israel. De rin’ e re n’ey ni fan ngak yugu boch e nam.” (Ps. 147:19, 20; mu beeg e Psalm 34:7, 19; 48:14.) Ere faanra ke ayuweg Jehovah fare nam nu Israel, maku ra ayuweg e girdi’ ni yad ra ognaged yad ngak e ngiyal’ ney.

Fan ni Ngad Ognaged Gadad Ngak Got

10, 11. Kan gargelegdad ni gad girdien Got, fa? Mu tamilangnag.

¹⁰ Boch e girdi’ e ma lemnag, ‘Mang fan ni dabiyog ni nggu liyor ngak Got ni faanra dawor gu ognageg ngak?’ Dabiyog ni bochan e dawori fel’ thildad Got. Maku bochan ni ke af e denen rok Adam ngodad, ma aram e gathi ka gadad girdien Got. (Rom. 3:23; 5:12) Rib ga’ fan ni ngad ognaged gadad ngak ya nge yog ni da manged girdien. Ngad guyed ko mang fan.

¹¹ Kemus ni Jehovah e ra pi’ e yafas ni manemus ngodad. (1 Tim. 6:19) Gathi kan gargelegdad ni gad pi fak Got ni bochan e nap’an ni denen Adam nge Efa, ma ke palog e girdi’ rok Got. (Mu taarebrogonnag ko Deuteronomy 32:5.) Ere ka nap’an e ngiyal’ nem i yib e ngaray, ma gubin e girdi’ u fayleng e yad be par nib dar rok Got.

12. (a) Uw rogon ni rayog ko girdi’ ni dawora flontgad ni ngar manged girdien Got? (b) Mang boch ban’en ni thingar mu rin’ u m’on ni ngam un ko taufe?

¹² Ra bagadad ma rayog ni nge wenig ni nge mang girdien Got me pigpig ngak. * Ere uw rogon ni rayog ni ngad manged girdien Got? Be gaar Paul: “Ud moyed ni gadad e toogor rok Got, machane ngongliydad Got kad manged pi tafager rok u daken e yam’ ni ke ta’ Fak.” (Rom. 5:10) Gad ma wenig ngak Got u nap’an e taufe ni nge fel’ e nangan’ rodad ya nge yog ni ngad fel’gad u wan’. (1 Pet. 3:21) U m’on ko taufe ma bay boch ban’en ni thingar da rin’ed. Thingar da nanged Got, me pagan’dad ngak, ngad kalgadngan’dad ma gad thilyeg e ngongol rodad. (John 17:3; Acts 3:19; Heb. 11:6) Maku bay ban’en nib t’uf ni ngad rin’ed ya nge yog ni ngad manged girdien Got. Mang e re n’em?

13. Mang fan nib puluw ni nge micheg be’ ban’en me ognag ir ni nge mang girdien Got?

¹³ U m’on ni nge mang be’ girdien Got, ma susun e thingari micheg ban’en ngak Jehovah. Rayog ni ngan susunag ngak be’ nib matam ni baadag ni nge pof be’ nib pagel ni nge mang girdien e tabinaw rok. Fare matam e goo yi manang ni ir be’ nib fel’. U m’on ni nge pof ma baadag ni nge micheg fare pagel ban’en ngak. Ere gaar fare moon ngak, “U m’on ni ngam mang reb e bitir rog, ma gu baadag ni ngam t’ufegeg ma ga tayfag ni gag e chitamam.” Rayog ni nge mang fare pagel reb e bitir ko fare moon ni faanra m’agan’ ngay ni nge micheg ban’en ngak. Ireray ban’en nib fel’ ni thingari rin’ fare pagel. Ere taareb rogon ngak Jehovah, ra m’agan’ ngay ni ngad manged girdien ni faanra da micheged ma da ognaged gadad ngak. Be gaar e Bible: “Ngam pied gimed ngak: ni maligach nib fas, mi gimed ognagmed ya ngam fel’gad u wan’.”​—Rom. 12:1, The New English Bible.

Ra Ngan Ognagey Ma Nge M’ug e T’ufeg nge Michan’

14. Uw rogon ni ngad ognaged gadad ma aram e gad be dag e t’ufeg?

¹⁴ Ra ngad micheged ma da ognaged gadad ngak Got ma aram e gad be dag nib t’uf Jehovah rodad. Ku rayog ni ngan taarebnag ko m’ag ni kan fal’eg u thilin l’agruw ni’ ni ngar mabgolgow. Reb e Kristiano ni nge mabgol e thingari dag e t’ufeg ni aram e nge micheg ni nge par nib yul’yul’ ngak leengin ni demtrug  ko mang e ra buch. Ere gathi kemus ni kam micheg ni ngam rin’ ban’en ya kam micheg ni ngam yul’yul’ ngak e ani mabgol rom. Be’ ni Kristiano ni nge mabgol e dabiyog ni ngar parew faen ni nge leengiy ni faanra dawor ni m’agpa’row. Ere ku dabiyog ni ngad manged girdien Jehovah ni faanra dawor da ognaged gadad ngak. Ere gad ma ognaged gad ngak Got ni bochan e gad baadag ni ngad manged girdien ma gad par ni gad ba yul’yul’ ngak ni demtrug ko mang e ra buch.​—Matt. 22:37.

15. Uw rogon ni ngan ognagey ngak Got ma aram e kan dag e michan’?

¹⁵ Nap’an ni gad ra ognaged gadad ngak Got ma aram e kad daged nib michan’dad ngak. Mang fan ni aram rogon? Ya michan’ rodad ngak Jehovah e ma n’igindad ni nge pagan’dad nib fel’ ni ngad chugurgad ngak Got. (Ps. 73:28) Gad manang ni de mom ni ngad pigpiggad ngak Got ya gad be par u “fithik’ e girdi’ ndar yal’uwgad ma yad ba kireb,” machane ba pagan’dad ngak Jehovah ni ke micheg nra ayuwegdad me gelnagdad. (Fil. 2:15; 4:13) Gad manang ni daworda flontgad, machane ba pagan’dad nra runguydad Jehovah ni faanra kad olobochgad. (Mu beeg e Psalm 103:13, 14; Roma 7:21-25.) Ba mich u wan’dad nra flaabnagdad Jehovah ere gad ma athamgil ni ngad pared ni gad ba yul’yul’ ngak.​—Job 27:5.

Rayog ni Ngan Felfelan’ ni Faanra Ngan Ognagey Ngak Got

16, 17. Mang fan ni rayog ni ngan felfelan’ ni faanra ngan ognagey ngak Got?

¹⁶ Ra ngan ognagey ngak Jehovah ma ra yibnag e felfelan’ ni bochan e ngad pied gadad ngak. Ke gaar Jesus: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Manang Jesus e felfelan’ ni ngan pi’ ban’en u nap’an ni tabab ko machib. Yu ngiyal’ e i yan ni der yog ni nge toffan ma dariy e ggan ni nge kay ya be guy rogon ni nge ayuweg e girdi’ ni nge yog e yafas ngorad. (John 4:34) Ke felfelan’ Jesus ya manang ni ke felan’nag gum’irchaen e Chitamangin. Ke yog ni gaar: “Gubin ngiyal’ ma gu be rin’ e tin nib m’agan’ ngay.”​—John 8:29; Prov. 27:11.

¹⁷ Ere ke pow’iy Jesus pi gachalpen ko kanawo’ ni yad ra felfelan’ ngay ya ke gaar ngorad: “Faanra ba adag be’ ni nge un ngog, ma thingari pag talin ir.” (Matt. 16:24) Ere faanra da paged fadad ngad folwokgad rok Jesus ma ra chugurnagdad ngak Jehovah. Rayog ni ngad pied gadad ngak be’ nra ayuwegdad me t’ufegdad ni bod Jehovah, fa?

18. Mang fan ni ngad ognaged gadad ngak Jehovah e ba gel e felfelan’ nra yib riy ngodad ko bin ni ngad ognaged gadad ngak be’?

¹⁸ Ra ngad ognaged gad ngak Jehovah ma gad par ni gad be fol rok ma rayog ni nge yib e felfelan’ ngodad nib gel. Boch e girdi’ e yad ma fanay e tayim rorad ni nge yoor e chugum rorad, machane der yog e bin riyul’ e felfelan’ ngorad. Machane piin ni kar ognaged yad  ngak Jehovah e yad ma felfelan’ ni gubin ngiyal’. (Matt. 6:24) Yad be felfelan’ ni yad be “maruwel rok Got u taabang,” machane bin ba ga’ fan riy e kar ognaged yad ngak Got. (1 Kor. 3:9) Dariy be’ ni bod Jehovah nib m’agan’ ngay ni ngad ognaged e yafas rodad ngak. Ma ra fulweg e girdi’ nge fel’ yangarad bayay me ayuwegrad ni manemus.​—Job 33:25; mu beeg e Hebrews 6:10.

19. Mang e tow’ath ni ma yib ngak e piin ni kar ognanged yad ngak Jehovah?

¹⁹ Ra ngam ognag e yafas rom ngak Jehovah ma rayog ni nge chugurnag thilmew. Be gaar e Bible: “Mu chugurgad ngak Got, me chugur ngomed.” (Jas. 4:8; Ps. 25:14) U lan e bin migid e thin e gad ra fil ko mang fan ni rayog ni nge pagan’dad ni rayog ni ngad mel’eged ni ngad manged girdien Jehovah.

[Footnote]

Uw Rogon ni Ga Ra Fulweg?

• Mang e be yip’ fan ni nge ognag be’ ir ngak Got?

• Uw rogon nra fel’ rogodad ni faanra da ognaged gadad ngak Got?

• Mang fan nib t’uf ni nge ognag e pi Kristiano yad ngak Jehovah?

[Study Questions]

[Picture on page 12]

Ngad ognaged gadad ma gad par nib yul’yul’ ngak Got e ra yibnag e felfelan’ ni manemus ngodad