“Gelngin Got nge fare Pin Ni Nge Mabgol e Be Lungurow: ‘Moy!’”
“Gelngin Got nge fare Pin Ni Nge Mabgol e Be Lungurow: ‘Moy!’”
“Gelngin Got nge fare pin ni nge mabgol e be lungurow: ‘Moy!’ . . . Moy i gur e en ni ke yib e belel ngom; ngam fek fare ran ko yafos nib tow’ath ni yira pi’ ngak e en ni ba adag ni nge yog ngak.”—REV. 22:17, NW.
1, 2. Uw feni ga’ fan e Gagiyeg rok Got u wan’dad, ma mang fan?
UW FENI ga’ fan e Gagiyeg rok Got u wan’dad? I fonownag Jesus pi gachalpen ni ‘ngar m’oneged u wan’rad e gagiyeg rok Got,’ me micheg ngorad ni faan yad ra rin’ ni aram rogon ma yira “pi’ urngin” ban’en nib t’uf rorad. (Matt. 6:25-33) I taareb rogonnag Jesus fare Gil’ilungun Got ko churuwo’ nu l’ugun e yar nib tolang puluwon. Me yog ni faani pirieg be’ ni ma chuway’ “reb nrib fel’ me yan i pi’ ni chuway’ urngin ban’en ni ba’ rok, me fek e salpiy nge chuw’iy fare churuwo’ ngay.” (Matt. 13:45, 46) Ere, rib ga’ fan ni ngad machibgad ma ngad pingeged e girdi’ ni ngar manged pi gachalpen Jesus.
2 Kad filed u l’agruw e article ni ke yan ni faanra gad be machib ni dabda rusgad ma gad be weliy e Thin rok Got nib tamilang ngak e girdi’ ma be m’ug riy ni be pow’iydad gelngin Got nib thothup. Maku be ayuwegdad gelngin Got nib thothup nge yog ni ngad machibnaged fare thin u murung’agen Gil’ilungun Got ni gubin ngiyal’. Ngad guyed ko mang fan ni aram rogon.
Yibe Pining e Girdi’!
3. Ba miti mang ran e yibe gaar “moy” ni ngam fek?
3 Gelngin Got nib thothup e be ayuwegey ni ngan pining e girdi’ ngar rin’ed ban’en. (Mu beeg e Revelation 22:17.) Fare pong ni yibe gaar “moy” i gur e en ni ke yib e belel ngom e ngam fek yugu ba mit e ran. Re ran ney e be yip’ fan ban’en ya gathi ran ni yima unum. Ran e rib ga’ fan ko yafas, aram fan ni yog Jesus ngak fare pin nu Samaria murung’agen ba mit e ran ni gaar: “En nra unum e ran ni gu ra pi’ ngak e dab ki sul e belel ngak bayay. Ya ran ni gu ra pi’ ngak e ra ngal’ ni ba alublub u fithik’ i dow, ni ir e bay i pi’ e ran ngak ni ma pi’ e yafos, me pi’ e yafos ngak ndariy n’umngin nap’an.” (John 4:14) Fare ran ni yibe pining e girdi’ ni ngar unumed e ra pi’ e yafas ni manemus ngorad.
4. Mang fan ni ke t’uf fare ran ko yafas, ma mang e be yip’ fan e re ran ney?
4 Nap’an ni denen Adam nge Efa ma dakur folgow ku Jehovah ma aram e ke t’uf ko girdi’ e re ran ney ni ma pi’ e yafas. (Gen. 2:16, 17; 3:1-6) Kan tharbogrow ko fare milay’ ni taferow ya nge “dab ni pag [Adam] nge kay wom’engin fare ke gek’iy ni ma pi’ e yafos, ya ra par ni dab ki yim’.” (Gen. 3:22) Bochan e denen rok Adam ma ke fek e yam’ i yib ngak e girdi’ ni gubin. (Rom. 5:12) Fare ran ko yafas e be yip’ fan gubin ban’en ni ma pi’ Got ya nge chuweg e girdi’ ko denen nge yam’ me pi’ e yafas ni manemus ngorad u Paradis u fayleng. Ma bin th’abi ga’ fan ko pi n’ey ni ke pi’ Jehovah e aram e ke pi’ fak ni Jesus Kristus ni nge biyuliy e girdi’ u fayleng.—Matt. 20:28; John 3:16; 1 John 4:9, 10.
5. Mini’ e ke yog ni ngan pining e girdi’ ni ngar feked “fare ran ko yafos nib tow’ath”? Mu weliy.
5 Mini’ e be yog ni ngan pining e girdi’ ni ngar feked “fare ran ko yafos nib tow’ath”? Nap’an fare biyu’ e duw nra gagiyeg Kristus ma rayog urngin ban’en nib t’uf ko yafas rodad ni bod rogon “fare lul’ ni bay e ran ko yafos riy, ni be galgal ramaen ni bod e krystal.” Fare lul’ ni kan guy e be “yib u tagil’ Got nge fare Fak e Saf.” (Rev. 22:1) Jehovah e ir e ma pi’ e yafas ere ku ir e Tabolngin fare ran ni ma pi’ e yafas. (Ps. 36:9) Ir e ke gagiyegnag ni nge sum e re ran nem u daken fare “Fak e Saf,” i Jesus Kristus. (John 1:29) Ra fanay Jehovah e re lul’ nem nib fanathin ni nge chuweg urngin e magawon ni ke sum ni bochan e togopuluw ni tay Adam. Ba tamilang ni Jehovah e ke yog ko girdi’ ni ngar gaargad “moy.”
6. Wuin e ke tabab “fare lul’ ni bay e ran ko yafos riy”?
6 Yugu aram rogon ni “fare lul’ ni bay e ran ko yafos riy” e ra sugubur u nap’an fare Biyu’ i Duw ko Gagiyeg rok Kristus, machane ke tabab e re n’ey u nap’an e “rran rok Somol” ni aram e ngiyal’ ni pilung fare “Fak e Saf” ko duw ni 1914. (Rev. 1:10) Ere tomuren e re duw nem ma kan pi’ ngak e girdi’ ban’en nra ayuweg e yafas rorad, nib muun ngay e thin nu Bible, ya thin riy e kan taareb rogonnag ko “ran.” (Efe. 5:26) Fare thin nib fel’ ni yibe wereg e ngiyal’ ney e fan ko urngin e girdi’. Machane mini’ e be pining e girdi’ u nap’an fare rran rok Somol?
“Fare Pin ni Nge Mabgol” e Be Gaar, “Moy!”
7. Chon mini’ e som’on ni kar pininged e girdi’ u nap’an fare “rran rok Somol,” ma mini’ e yad be pining?
7 Fare pin ni nge mabgol ni aram e piin Kristiano ni kan dugliyrad, e yad e som’on ngar gaargad “moy.” Mini’ e kar pininged? Ba tamilang ni fare pin ni nge mabgol e be gaar, “Moy!” ya aram e be pining e girdi’ ni yad be athapeg e yafas ni manemus u fayleng u tomuren fare “mahl ni fan ko fare rran ni ba ga’ fan, ni Rran rok Got ni Gubin ma Rayog Rok.”—Mu beeg e Revelation 16:14, 16.
8. Mang e be dag ni be fol e piin Kristiano ni kan dugliyrad ko thin ni yog Jehovah ni ngar pininged e girdi’ ni ka nap’an e duw ni 1918 ke mada’ ko chiney?
8 Piin ni kan dugliyrad e kar tababgad i pining e girdi’ ko duw ni 1918. Nap’an e re duw nem, ma fare welthin ni fan ko yoor ni bay kenggin ni “Bokum Milyon e Girdi’ nib Fas e Dab Kur M’ad” e ke tamilangnag ni bay e athap rorad ni ngar pared u paradis u fayleng u tomuren Armageddon. Fare welthin ni kan pi’ u nap’an fare convention u Cedar Point, Ohio, u Meriken, ko duw ni 1922 e ke pi’ e athamgil nga laniyan’ e girdi’ ni ngar ‘weliyed murung’agen fare Pilung nge gil’ilungun.’ Re n’ey e ke ayuweg e tin ni ka ba’ ko piin ni kan dugliyrad ni ngar pininged boor e girdi’. Nap’an e duw ni 1929, ma fare The Watchtower ni March 15 e bay e article riy ni “Yibe Pining e Girdi’,” ni kenggin e thin nu Bible riy e Revelation 22:17. Bang ko re article ney e be gaar: “Tin ni ka ba’ ko piin kan dugliyrad e yad be un ngak [Faen Th’abi Tolang] i pining e girdi’ ni yad be gaar, ‘Moy.’ Yira wereg e re thin ney ngak e piin ni baadag e tin nib mat’aw nge tin riyul’. Thingar ni rin’ e re n’ey e chiney.” Piin ni kan dugliyrad e ka yad be pining e girdi’ ke mada’ ko chiney.
“Gubin e Girdi’ ni Yad Ra Rung’ag e Re Bugithin Ney e Thingar Ki Lungurad: ‘Moy!’”
9, 10. Uw rogon ni piin ni kan piningrad e ku yad ra gaar, “Moy!”?
9 Ere mang e thingari rin’ e piin ni kan gaar ngorad “moy”? Yibe piningrad ni nga ki lungurad, “Moy!” i gur e en ni kam rung’ag e re bugithin ney. Fare The Watchtower ko August 1, 1932 ko page 232 e be gaar: “Piin ni kan dugliyrad e ngar pied e athamgil ngak urngin e girdi’ ni yad ra un i machibnag fare thin nib fel’ u murung’agen gil’ilungun Got. Pi girdi’ ney e de t’uf ni ngar manged girdien e piin ni kan dugliyrad ni ngar uned i machibnag e thin rok Somol. Rib gel e pagan’ ko pi mich rok Jehovah ya kar nanged ni kan pi’ mat’awrad ni ngar feked fare ran ko yafas i yan ngak e girdi’ nra yog ni ngar mageygad u nap’an e Armageddon me yog e yafas ni manemus ngorad u paradis u fayleng.”
10 Rib ga’ fan e re maruwel ney ni nge rin’ e piin ni kar rung’aged e re thin ney ni ngar gaargad, “Moy!” Fare The Watchtower ni August 15, 1934, page 249 e be gaar: “Piin ni ka nog e Jonadab ngorad e thingar ra uned ngak e girdi’ ni ka nog e Jehu ngorad ni aram e piin ni kan dugliyrad i machibnag murung’agen gil’ilungun Got, ni yugu aram rogon ni gathi yad e pi mich rok Jehovah ni kan dugliyrad.” Nap’an e duw ni 1935, ma ke tamilang ko chon mini’ fapi “girdi’ ni ke muulung ni pire’ ni pire’” ni be weliy e Revelation 7:9-17. Ma re thin ney e ke pi’ e athamgil ngorad ni ngar ululgad i pining e girdi’. Ka nap’an e ngiyal’ nem, ma ke tabab ni nge yoor e re ulung ni ba ga’ ney ni yad be liyor ngak Got ya ke pag medlip e milyon urngirad e chiney. Kar felfelan’gad ni kar rung’aged e thin rok Got, ma kar ognaged yad ngak Got, ma kar uned ko taufe ma yad be un ngak e piin ni kan dugliyrad i pining boch e girdi’ ni ‘ngar bad ngar feked fare ran ko yafas nib tow’ath.’
“Gelngin Got” e Be Gaar, “Moy!”
11. Nap’an e bin som’on e chibog u nap’an Jesus, uw rogon ni i ayuweg gelngin Got nib thothup e machib ni un tay?
11 Nap’an ni machib Jesus u lan tafen e muulung u Nazareth, me pithig fare babyor ni yoloy Isaiah ni profet me beeg ni gaar: “Gelngin Jehovah e ke yib nga dakenag. Ke dugliyeg ni nggu machibnag e thin nib fel’ ni yib rok ngak e piin ni gafgow, ke l’ugeg ni nggog ngak e piin ni kan kolrad kan tayrad ni bay ni pagrad, mu gog ngak e piin ni malmit ni bay ra guyed ban’en, ma nggu chuweg ko gafgow e piin ni yibe gafgownagrad, mu gog ngorad e re duw ni ir e bayi runguy Somol e girdi’ rok riy me thapegrad ngak!” Me tabab ko welthin ngorad ni gaar, “Fare gin’en ni kad beeged u lan e babyor nib thothup e ke yib i m’ug nib riyul’ e bin daba’ e rran, ni bod rogon ni kug beeg kam rung’aged.” (Luke 4:17-21, NW) U m’on ni yan nga tharmiy me gaar ngak pi gachalpen: “Bay yib gelngimed ko ngiyal’ ni bay yib gelngin Got nga dakenmed, ma aram mi gimed weliy murung’ageg . . . ko yungi n’en ni yan i mus e fayleng ngay.” (Acts 1:8, NW) Nap’an e bin som’on e chibog, ma ba ga’ ni i fanay Got gelngin ni ayuweg e machib ni un tay.
12. Uw rogon ni be un gelngin Got i pining e girdi’ e ngiyal’ ney?
12 Uw rogon ni ka be un gelngin Got i pining e girdi’ ke mada’ ko ngiyal’ ney? Ma pi’ Jehovah gelngin nib thothup ni nge tamilangnag laniyan’ e piin ni kan dugliyrad ni ngar nanged fan e thin rok ni bay u Bible. Gelngin Got e ma ayuwegrad ni ngar ululgad i pining e girdi’ mar tamilangnaged fan e tin riyul’ ni bay u Bible ngak e girdi’ ni yad baadag ni ngar pared u Paradis u fayleng. Ere ku er rogon e piin ni kan piningrad ni ngar manged pi gachalpen Jesus, ni thingar ku ra pininged boch e girdi’. Gelngin Got e ku be ayuweg e girdi’. Faanra kan taufenagrad nga ‘gelngin Got nib thothup,’ ma aram yad be fol u rogon ni be pow’iyrad ma ke pagan’rad nra ayuwegrad. (Matt. 28:19) Rayog ni ngam lemnag rogon e machib ni be weliy e piin ni kan dugliyrad nge girdien ko ulung nib ga’. Thin ni yad ma machibnag e bay u Bible ni fare babyor ni fanay Got gelngin ni nge yoloy e girdi’. Ere, be fanay Got gelngin nib thothup ni nge ayuwegey ni ngan pining e girdi’. Ere riyul’ ni be pow’iydad gelngin Got. Re n’ey e ra ayuweg ni nge yoor e tayim ni ngad pininged boch e girdi’.
“Be Lungurow: ‘Moy!’”
13. Mang fan fare thin ni “gelngin Got nge fare pin ni nge mabgol e be lungurow ‘Moy!’”?
13 “Gelngin Got nge fare pin nib mabgol” e gathi kemus ni yow be gaar, “Moy!” Re bugithin ney e be dag ni ka be ulul i pining e girdi’. Fare Bible ni New World Translation e be gaar: “Gelngin Got nge fare pin ni nge mabgol e be lungurow: ‘Moy!’” Re thin ney e be dag ni ngaun pining e girdi’. Ere mang e nge rin’ e piin ni kan piningrad? Ku yad ra gaar, “Moy!” Fare ulung nib ga’ ni yad be liyor ngak Got e be yog e Bible ‘ni yad be pigpig ngak ni rran nge nep’ u lan e tempel rok.’ (Rev. 7:9, 15) Uw rogon ni yad be pigpig ni rran nge nep’? (Mu beeg e Luke 2:36, 37; Acts 20:31; 2 Thessalonika 3:8.) Kanawo’ ni ke dag Anna ni reb e profet nib pin nge apostal Paul e kar dagew e athamgil ko machib ni ur tew ni gubin ngiyal’ ni ‘rran nge nep’’.
14, 15. Uw rogon ni ke dag Daniel nib ga’ fan e liyor ngak Got ni gubin ngiyal’?
14 Ku arrogon fare profet ni Daniel ni ke dag ni rib ga’ fan ni ngan liyor ngak Got ni gubin ngiyal’. (Mu beeg e Daniel 6:4-10, 16.) Da i thilyeg e ngiyal’ ni ke dugliy ni nge liyor ngak Got ya ke mecham ngay ni nga i meybil ngak Got “nra reb e rran ma dalip yay ni ke meybil ngak Got.” Ere yugu aram rogon ni yira yon’ nga lan e low ni tafen e layon machane de pag e liyor rok Got ni mus nga reb pul ma de tal. Rib tamilang ni ke dag Daniel ko girdi’ ni dariy ban’en ni kab ga’ fan ko liyor ngak Jehovah!—Matt. 5:16.
15 Tomuren reb e nep’ ni ke par Daniel u lan e low ni tafen e layon, me yib fare pilung ni be tolul u fithik’ e magafan’ ni gaar: “Daniel, ni tapigpig rok fare Got ni be par nib fos! Mog, fare Got nri ga be pigpig ngak u fithik’ e yul’yul’ e ke yog rok ni nge ayuwegem rok fapi layon?” Me fulweg Daniel ni gaar: “Pilung rog, nguum par ndariy n’umngin nap’an. Got e ke l’og e engel rok ke yib i m’ag l’ugun fapi layon ndabiyog ni ngar rin’ed ban’en ngog. Ke rin’ ni aray rogon ya manang ndawor gu bucheg ban’en, nge bochan e dawor gu rin’ e kireb ngom i gur pilung.” Ke tow’athnag Jehovah Daniel ni bochan e “yul’yul’” ni i tay.—Dan. 6:19-22.
16. Mang boch e deer ni ngad fithed gadad riy u rogon ni gad ma un ko machib ni bod e n’en ni ke rin’ Daniel?
16 M’agan’ Daniel ngay ni nge yim’ ko bin ni nge pag e liyor ni i tay ngak Jehovah. Ere uw rogodad? Mang boch ban’en ni gad ma pag fan ya nge yog ni ngad machibnaged fare thin nib fel’ ni murung’agen Gil’ilungun Got ni gubin ngiyal’? Dab da paged ni nge yan reb e pul ni dab da weliyed murung’agen Jehovah ngak boch e girdi’. Ngad guyed rogon ni ngad uned ko machib u gubin e wik. Yugu aram rogon ni bay e m’ar fa gad be pilibthir ma rayog ni ngad weliyed murung’agen Got ngak e girdi’ ni gonap’an 15 e minit u reb e pul, ma rayog ni ngad yoloyed ko report rodad. Mang fan? Bochan ni gad baadag ni ngad uned ngak gelngin Got nge fare pin ni nge mabgol ni ngad gaargad, “Moy!” Gad baadag ni ngad pared ni gad be machibnag murung’agen Gil’ilungun Got ni gubin ngiyal’.
17. Uw rogon ni ngad folgad rok Jehovah nge dab da talgad i pining e girdi’?
17 Thingar da guyed rogon ni ngad pininged e girdi’ u gubin e kanawo’ ni rayog rodad, ma gathi kemus ni ngiyal’ ni kad dugliyed ni ngad uned ko machib. Rib gel e felfelan’ riy ni gad ra pining e piin ni ke yib e belel ngorad ni ngar ‘feked fare ran ko yafas nib tow’ath’ ni demtrug e ngiyal’ ni rayog rodad. Rayog ni ngam rin’ u nap’an ni kam man nga kantin, tabon e maruwel, u skul, fa ga be milekag. Faanra ke taleg e am e machib, ma rayog ni ngad machibgad u taareb fa l’agruw e naun u reb e binaw ma ku darod nga yugu reb e binaw fa da machibnaged e girdi’ u fithik’ e sabethin.
Nguum Gaar, “Moy!”
18, 19. Uw rogon ni ga ra dag ni ga be tayfan ni gur reb i girdien e maruwel rok Got?
18 Ke pag mereb i ragag e duw ni ke yan ma der tal gelngin Got nge fare pin ni nge mabgol i pining e girdi’ ni be lungurow, “Moy!” ngak gubin e girdi’ ni yad baadag ni ngar unumed fare ran ko yafas. Kam rung’ag lungurad ni yad be pining e girdi’, fa? Faanra kam rung’ag ma thingar kum pining boch e girdi’.
19 Da da nanged ko uw n’umngin nap’an ni ke yog Jehovah ni ngan pining e girdi’, machane bochan ni kad rung’aged ma ku da gaargad, “Moy!” ya aram e kad manged girdien e maruwel rok Got. (1 Kor. 3:6, 9) Rib fel’ e re tow’ath nem ni ke pi’ Got ngodad. Thingar daged ni gad be tayfan e tow’ath ni ke pi’ Got ngodad “ere nguud pininged e magar ngak Got ni gubin ngiyal’.” (Heb. 13:15) Gad gubin e girdi’ ni gad be athapeg e yafas u fayleng e thingar da uned ngak e piin ni kan dugliyrad nguud gaargad, “Moy!” Nge yog e “ran” ko yafas nib tow’ath ngak boor e girdi’.
Mang e Kam Fil?
• Fare pong ni be gaar “moy” e yibe pining chon mini’?
• Mang fan ni rayog ni nga nog ni Jehovah e ke yog ni ngan pining e girdi’ ni ngan gaar “moy”?
• Uw rogon ni be un gelngin Got nib thothup i pining e girdi’ ni be gaar, “moy”?
• Mang fan ni thingar da athamgilgad ni ngad machibgad ni gubin ngiyal’?
[Study Questions]
[Picture on page 22]
(For fully formatted text, see publication)
Nguum Gaar, “Moy!”
1914
5,100 publishers
1918
Boor e girdi’ e rayog e yafas ni manemus ngorad u Fayleng
1922
“Ngar weliyed murung’agen fare Pilung nge gil’ilungun”
1929
Tin ni ka bay ko piin ni kan dugliyrad e yad be gaar, “Moy!”
1932
Fare thin ni “Moy!” e gathi kemus ni fan ngak e piin ni kan dugliyrad
1934
Kan pining e girdi’ ni ka nog e Jonadab ngorad ni ngar machibgad
1935
Ke tamilang ko chon mini’ “fapi girdi’ ni ke muulung ni pire’ni pire’”
2009
7,313,173 publishers