Ireray e Bin Th’abi Fel’ Kanawoen e Yafas!
Ireray e Bin Th’abi Fel’ Kanawoen e Yafas!
“Demtrug ko gadad ba fos ara gadad ba yam’ machane mmil fadad ngak Somol.”—ROM. 14:8.
1. Mang e yog Jesus u murung’agen e bin th’abi fel’ kanawoen e yafas?
BAADAG Jehovah ni ngad leked e bin th’abi fel’ kanawoen e yafas. Boor ban’en nrayog ni nge rin’ e girdi’ ko yafas rorad, machane taareb riy e th’abi fel’ ni aram e ngar folgad ko thin rok Got mi yad fil boor ban’en rok Jesus Kristus ni Fak. I yog Jesus ngak pi gachalpen ni ngar liyorgad ngak Got u daken gelngin nib thothup ngu fithik’ e yul’yul’, miki tay chilen ngorad ni ngar yognaged boch e girdi’ ngar manged pi gachalpen. (Matt. 28:19, 20; John 4:24) Faan gad ra fol rok Jesus, ma aram e gad be felfelan’nag Jehovah ma ra tow’athnagdad.
2. (a) Mang e rin’ e piin ni kar rung’aged fare thin nib fel’ ko bin som’on e chibog? (b) Mang e be yip’ fan ni ngan fol ko “Fare Kanawo’ rok Somol”?
2 Nap’an nra un e piin ni yad baadag ni nge yog e yafas ni manemus ngorad ko taufe, ma bay rogon ni ngad gaargad ngorad, “Ireray e bin th’abi fel’ kanawoen e yafas!” (Acts 13:48) Nap’an e bin som’on e chibog, ma boor e girdi’ nra bad ko nam nib thilthil ni mich e tin riyul’ u wan’rad, mar uned ko taufe. (Acts 2:41) Pi girdi’ nem ni kar manged boch i gachalpen Jesus e kar folgad ko “Fare Kanawo’ rok Somol.” (Acts 9:2; 19:23) Re thin ney e ba m’ag ngak e piin nra manged pi gachalpen Kristus ni bochan e ba m’on u wan’rad e tin ni tay chilen ni ngar rin’ed, maku yad be folwok rok u gubin ban’en.—1 Pet. 2:21.
3. (a) Mang fan ni ma un e girdi’ rok Jehovah ko taufe? (b) Uw urngin e girdi’ ni kan taufenagrad u lan fa ragag i duw ni ke yan?
3 Be mon’og fare maruwel ni machib e chiney ko tin tomuren e rran ma ke pag 230 e nam ni yibe rin’ riy. U lan fa ragag i duw ni ke yan, mab pag 2,700,000 e girdi’ ni kar dugliyed ni ngar pigpiggad ngak Jehovah ma kar uned ko taufe ni nge m’ug e mich riy ni kar ognaged yad ngak. Ere ra yan i aw ni gubin e wik mab pag 5,000 e girdi’ ni ke un ko taufe! T’ufeg rok be’ ngak Got, nge rogon ni ke tamilang e thin nu Bible u wan’, nge michan’ rok ko tin ke fil e ir e ra k’aring ni nge un ko taufe. Rib ga’ fan e taufe ya aram e ngiyal’ ni ngari chugur e tha’ u thilmew Jehovah. Maku faan ga ra un ko taufe ma aram e ga be dag nib pagan’um nra ayuwegem Jehovah ni ngam pigpig ngak u fithik’ e yul’yul’ ni bod rogon ni ayuweg e pi tapigpig rok kakrom.—Isa. 30:21.
Mang Fan ni Ngan Un ko Taufe?
4, 5. Mog boch e tow’ath nge angin nra yib ngom ni faan ga ra un ko taufe.
4 Sana kam un ko fol Bible ma kam thilyeg boch ban’en ko yafas rom, ma chiney e gur reb e publisher ndawor mu un ko taufe. Rib fel’ e n’en ni kam rin’. Machane, kam ognagem ngak Got u daken e meybil ni ga be lemnag ni ngam un ko taufe, fa? Kam un ko fol Bible, ere dabisiy ni kam nang ni pi n’en ni yira pining e sorok riy ngak Jehovah e aram e n’en thingari m’on u lan e yafas rom, ma gathi tin ni ga baadag, fa salpiy ara chugum ko re fayleng ney. (Mu beeg e Psalm 148:11-13; Luke 12:15) Ere, mang boch e tow’ath nge angin nra yib ngom ni faan ga ra un ko taufe?
5 Nap’an ni ga ra mang reb e Kristiano, ma ra thil e yafas rom. Ga ra felfelan’ ni bochan e ga be rin’ e tin nib m’agan’ Got ngay. (Rom. 12:1, 2) Ma gelngin Jehovah nib thothup e ra ayuwegem ni nge m’ug fel’ngin Got rom ni aram e gapas nge michan’. (Gal. 5:22, 23) Ra fulweg Got taban e meybil rom ma ra tow’athnagem ni bochan e ga be athamgil ni ngam fol ko Thin rok. Ga ra felfelan’ ko machib ni ga be tay, ma ra um athapeg e yafas ni manemus ni bochan e ga be rin’ e tin nib m’agan’ Got ngay. Maku reb, e faan ga ra ognagem ngak Got ma ga un ko taufe, ma aram e be m’ug nriyul’ ni ga baadag ni ngam mang reb e Mich Rok Jehovah.—Isa. 43:10-12.
6. Mang e gad be micheg ni faan gad ra un ko taufe?
6 Faan gad ra ognaged gadad ngak Got ma gad un ko taufe, ma aram e gad be micheg nib mil fadad ngak Jehovah. I yoloy apostal Paul ni gaar: “Dariy bagadad ni be par nib fos nri ir e mmil fan ir ngak, ma dariy bagadad nra yim’ ni ke mus ni ir e mmil fan ir ngak; faanra ud pired ni gadad ba fos ma fan ngak Somol, ma gadad ra yim’ ma ngad m’ad ni fan ngak Somol. Demtrug ko gadad ba fos ara gadad ba yam’ machane mmil fadad ngak Somol.” (Rom. 14:7, 8) Ke pi’ Got e puf rogon ngodad ni aram e mich riy nib ga’ fadad u wan’. Ere, rra felfelan’ ni faan gad ra turguy ni ngad pigpiggad ngak ni bochan e ba t’uf rodad. (Prov. 27:11) Faanra un be’ ko taufe ma aram e be micheg ko girdi’ ni yoor ni ke ognag e yafas rok ngak Jehovah, ma ke mang Jehovah e Pilung rok, ma be tay tanggin mat’awun ko gagiyeg. (Acts 5:29, 32) Faanra rin’ be’ e re n’ey ma aram e bay Jehovah u ba’ rok. (Mu beeg e Psalm 118:6.) Maku reb e boor e tow’ath nra yog ngak e chiney i yan nga m’on.
Kan Tow’athnagrad Ya Kar Uned ko Fare Ulung i Walag
7-9. (a) Mang e ke micheg Jesus ngak e piin ni kar paged fan urngin ban’en ni fan e ngar uned ngak? (b) Uw rogon ni be lebug e n’en ni ke micheg Jesus u Mark 10:29, 30?
7 I yog apostal Peter ngak Jesus ni gaar: “A mu guy, kug paged gubin ban’en kug uned ngom. Ere mang e bay yog ngomad.” (Matt. 19:27) Baadag Peter ni nge nang e n’en nra buch rorad pi gachalpen Jesus boch nga m’on. Boor ban’en nra paged fan ya nge yog ni ngar mon’eged fare maruwel ni machib. (Matt. 4:18-22) Ere mang e micheg Jesus ngorad?
8 Rogon e thin rok Mark e yog Jesus nra mang pi gachalpen bang fare ulung i walag. I gaar: “En nra pag e tabinaw rok, ara pi walagen ni pumoon, ara pi walagen ni ppin, ara chitiningin, ara chitamangin, ara pi fak, ara yungi binaw ntafen ni bochag nge bochan e Thin Nib Fel’ ni yib rok Got, e ka boor e tin nrayog ngak ko biney e tamilang nra reb ma raay yay e ke mun ngay ni naun, nge pi walagen ni pumoon, nge pi walagen ni ppin, nge pi chitiningin, nge pi fak, nge yungi binaw ntafen, ma ku er rogon e togopluw ni bay i tay e girdi’ ngak; ma bin ni bay yib e tamilang e bay yog e yafos riy ngak ndariy n’umngin nap’an.” (Mark 10:29, 30) Immoy boch e Kristiano ko bin som’on e chibog ni bod Lydia, Aquila, Priscilla, nge Gaius ni ur binged e tabinaw rorad ngak pi walagrad, mar manged e ‘pi walag ni pumoon, nge pi walag ni ppin, nge pi chitiningiy’ ni bod rogon ni micheg Jesus.—Acts 16:14, 15; 18:2-4; 3 John 1, 5-8.
9 Ngiyal’ ney e kari lebug e n’en ni yog Jesus. Fa yungi binaw ni tafen pi gachalpen ni kar digeyed e be yip’ fan e pi n’en ni ke digey boch e walag nib muun ngay e pi missionary, nge piin ma maruwel u Bethel, nge ku boch e walag ni fan e ngar pied e ayuw ko machib u boch e nam. Boor e walag e kar digeyed e tabinaw rorad ni fan e ngar momnaged e par rorad, machane gad ma felfelan’ ngay u nap’an ni gad ma rung’ag rogon ni ke ayuwegrad Jehovah nge rogon ni yad ma felfelan’ ko pigpig ni yad ma tay. (Acts 20:35) Maku reb e gubin e piin ni ma pigpig ngak Jehovah ni kar taufegad e ku rayog e tow’ath ngorad ni bochan e yad be “mon’eg e gagiyeg rok Got nge tin nib m’agan’ ngay” ni yad bang ko fare ulung i walag ni Kristiano u ga’ngin yang e fayleng.—Matt. 6:33.
Gin’en ni “Dab ki Buch Ban’en Rom Riy”
10, 11. (a) Mang e be yip’ fan ni nge yan be’ ngak e “en Th’abi Tolang ni bochan e nge dab ki buch ban’en rok”? (b) Uw rogon ni nga darod ko re gin’em nib fanathin?
10 Faanra ognag be’ ir nge un ko taufe maku ra yib angin nib fel’ ngak ni aram e ra “yan ngak e en ni Th’abi Tolang ni bochan e nge dab ki buch ban’en rok.” (Mu beeg e Psalm 91:1.) Mang e be yip’ fan e re n’ey? Re n’ey e ba fanathin ni be yip’ fan ni ke par nga reb e dodow nrayog ni ngari chugur e tha’ u thilrow Got, me par nib gel ko tirok Got ban’en, ma ke mo’maw’ ni nge meewar. Machane, piin ndarur pagedan’rad ngak Got e dar nanged e gin ni bay e re gin’em riy. Faan gad ra rin’ e n’en ni kad micheged ngak Jehovah me pagan’dad ngak, ma bod ni gadad be gaar ngak: “I gur e ga be yoror rog me gur e gu be naf ngom! I gur e Got rog; ni gur e ke pagan’ug ngom.” (Ps. 91:2) Ere ra yan i bod ni ka darod ngak Jehovah ni bochan e nge dab ki buch ban’en rodad. (Ps. 91:9) Ireray e gin th’abi fel’ ni nga darod ngay.
11 Gad ra yan ko re gin’em nib fanathin ma aram e ku be dag ni kari fel’ e tha’ u thildad Got. Machane, som’on e thingar da ognaged gadad ngak Got ma gad un ko taufe. Ma tomur riy e ngad gelnaged e tha’ u thildad Got u daken e fol Bible, nge meybil ni yib u gum’ircha’dad, mu ud folgad rok. (Jas. 4:8) Dariy be’ nib chugur e tha’ u thilrow Jehovah ni bod Jesus ni gubin ngiyal’ ni ma pagan’ ngak Got. (John 8:29) Ere dariy ba ngiyal’ ni nge maruwar Jehovah u wan’dad nge rogon nrayog ni nge ayuwegdad ni ngad lebguyed e tin ni kad micheged ngak. (Ekl. 5:4) Pi n’en ni ke pi’ Got ni nge ayuweg e girdi’ rok ko tirok ban’en e aram e mich riy ni gad ba t’uf rok ma baadag ni ngad pigpiggad ngak nrogon nib m’agan’ ngay.
Nge Felfelan’dad ko Gapas nge Taareban’ ni Bay u Thildad
12, 13. (a) Mang kanawo’ e ke mab ngodad ni faan gad ra ognaged gadad ngak Got ma gad un ko taufe? (b) Uw rogon nrayog ni ngad ayuweged e piin ni ka yad ba beech ko ulung?
12 Gad ra ognaged gadad ngak Got ma gad un ko taufe, ma aram e ke mab e kanawo’ ngodad ni ngad liyorgad e tin ka bay e tapigpig rok Jehovah u taabang u fithik’ e gapas nge taareban’ ni bochan e tha’ nib fel’ ni bay u thildad Jehovah. Kemus ni piin taareb e michan’ rodad e rayog ni ngad pigpiggad u taabang ni bochan e gapas ni bay u thildad nge Jehovah. (Ps. 29:11; Isa. 54:13) Dariy ban’en ko re fayleng ney nrayog ni ngan taareb rogonnag ko gapas nge taareban’ ni bay u thildad pi walagdad. Riyul’ e re n’ey ya ra yan i taw nga nap’an e pi international convention ma boor e walag ni kar bad nib thilthil e nam rorad ni gad ma muulung u taabang.
13 Pi n’en ni gad be felfelan’ ngay e de taareb rogon ko pi n’en ni bay ko re fayleng ney ni ke gel e kireb riy. (Mu beeg e Isaiah 65:13, 14.) Machib ni gad ma tay e aram kanawoen ni gad ma pining e girdi’ ni ngki yog e gapas nge re felfelan’ nem ngorad. Gad ba tow’ath ni ngad ayuweged e piin ni ka yad ba beech ko ulung ni ngar salapgad ko machib. Ku gad ba felfelan’ ni ngad ayuweged boch e girdi’ ni kab beech ko ulung nrogon ni be yog e piin piilal ko ulung, ni bod Aquila nge Priscilla nra weliyew ngak Apollos “murung’agen kanawoen Got nib puluw.”—Acts 18:24-26.
Ngaum Fil Ban’en Rok Jesus
14, 15. Mang ni bay fan ni ngad filed ban’en rok Jesus?
14 Bay fan ni ngaud filed ban’en rok Jesus. U m’on ni yib nga fayleng mab n’uw nap’an ni ur maruwelgow e Chitamangin u taabang. (Prov. 8:22, 30) Manang ni bin th’abi fel’ kanawoen e yafas e ngan pigpig ngak Got min machibnag murung’agen e tin riyul’. (John 18:37) Ku manang ni faanra lek yugu reb i kanawoen e yafas ndariy rogon ko tirok Got ban’en, ma ra yan i aw ni yigoo ir e be lemnag ir ma der lemnag e gabul nge langlath. Manang nra i mada’nag e skeng nge yan i mada’ ko ngiyal’ nra yim’. (Matt. 20:18, 19; Heb. 4:15) Ir e ke fil ngodad rogon ni ngaud pared ni gad ba yul’yul’.
15 De n’uw nap’an nga tomuren ni kan taufenag Jesus me gay Satan rogon ni nge waliy ni nge denen, machane de yog rok. (Matt. 4:1-11) Gad be fil ko re n’ey ndemtrug e n’en nra rin’ Satan ngodad, ma rayog ni ngad pared ni gad ba yul’yul’. Piin nri be nameg e aram e piin ni yad be lemnag ni ngar uned ko taufe nge piin ni kafin ra taufegad. (1 Pet. 5:8) Rayog ni nge togopuluw chon e tabinaw rodad ngodad ni bochan e ke mich u wan’rad boch ban’en nde riyul’ ni yima weliy u murung’agen e Pi Mich Rok Jehovah ma yad baadag ni ngar ayuweged gadad. Machane ireray boch e kanawo’ nrayog ni nge m’ug pi fel’ngin e Kristiano rodad ni bod e tayfan nge gonop u nap’an ni gad be pi’ e fulweg u boch e deer rorad. (1 Pet. 3:15) Pi n’ey e rayog ni nge yib angin ngak e piin ni yad ra motoyil ngodad.—1 Tim. 4:16.
Um Man ko Bin Th’abi Fel’ Kanawoen e Yafas!
16, 17. (a) Mang dalip ban’en ni be yog e Deuteronomy 30:19, 20 nthingar da rin’ed? (b) Uw rogon ni micheg Jesus nge John nge Paul nriyul’ e n’en ni yoloy Moses?
16 Sogonap’an 1,500 e duw u m’on ni yib Jesus nga fayleng me yog Moses ngak piyu Israel ni ngar mel’eged e bin th’abi fel’ kanawoen e yafas. I gaar: “Chiney e kug taymed ni ngam dugliyed ko yafos e nge yib ngomed fa yam’, fa nge fal’eg Got waathmed fa nge bucheg waathmed. Nggu non ko tharmiy nge fayleng ni ngar mangew mich ko bin ni bay mu turguyed ni ngeb ngomed. Mu turguyed e yafos ni ir e nge yib ngomed. Nge t’uf romed Somol ni Got romed, um folgad rok ma gimed be par ni gimed ba yul’yul’ ngak.” (Deut. 30:19, 20) Yugu aram rogon nde fol piyu Israel rok Got, machane de thil fa dalip i n’en ni yog Moses ni ngan rin’. Mu nap’an Jesus nge ku yugu boch e tapigpig rok Got miki tamilang bayay.
17 Bin som’on e thingari ‘t’uf rodad Somol ni Got rodad.’ Faanra ud ngongolgad u rogon nib m’agan’ Got ngay ma aram e be m’ug nriyul’ nib t’uf rodad. (Matt. 22:37) Bin l’agruw e thingar ud ‘folgad rok’ ni aram e ngaud filed e thin rok ma gad be fol ko pi motochiyel rok. (1 John 5:3) Re n’ey e be dag nthingar ud uned ko muulung ni gubin ngiyal’ ya aram e gin ni yima weliy e thin nu Bible riy. (Heb. 10:23-25) Bin dalip e thingar ud pared ni ‘gadad ba yul’yul’ ngak.’ Demtrug e miti skeng nra yib ngodad, ma ngaud pared nib mich Got u wan’dad ma gad be lek Jesus ni Fak.—2 Kor. 4:16-18.
18. (a) Uw rogon ni weliy reb e Watch Tower ko duw ni 1914 murung’agen e tin riyul’? (b) Susun e nge uw rogon u wan’dad e tin riyul’ e ngiyal’ ney?
18 Faanra yibe ngongol nib puluw ko thin nu Bible, ma aram reb e tow’ath! Nap’an e duw ni 1914 me yog reb e Watch Tower ni gaar: “Gathi gad ba tow’ath ma gad ba felfelan’? Ma gathi ba yul’yul’ e Got rodad? Faanra bay ban’en ni be lemnag be’ ni kab fel’ boch, me rin’. Faanra ke pirieg bigimed ban’en ni kab gel e fel’ riy, ma gamad be athapeg ni manga yigi yog ngomad. Ya gamad e dariy ban’en ni kug pirieged ni kab gel e fel’ riy ko n’en ni kug pirieged u lan e Thin rok Got. . . . Dabiyog i weliy gelngin e gapas nge felfelan’ nge tow’ath ni ke yog ngomad ni bochan e kug filed e tin riyul’ u murung’agen e bin riyul’ e Got. Gonop rok Got, nge feni mat’aw, nge gelngin nib gel, nge t’ufeg rok e be tay lanin’mad nge gum’ircha’mad nib mudugil. Dakuriy ban’en ni nggu gayed nga bayang. N’en ni gamad baadag e nge yoor ban’en ni gu nanged u murung’agen Got.” (The Watch Tower, December 15, 1914, page 377-378) Dabi thil rogon e tin riyul’ u wan’dad. Kab gel e felfelan’ nra yog ni ngad ted e chiney ni gad be yan u “lan e tamilang ni Somol e ke pi’ ngodad.”—Isa. 2:5; Ps. 43:3; Prov. 4:18.
19. Mang fan ni piin ni ke bung rogorad nrayog ni ngar uned ko taufe e aray e ngiyal’ ni ngar dugliyed ban’en?
19 Faanra ga baadag ni ngam man u “lan e tamilang ni Somol e ke pi’,” machane dawor mu un ko taufe, ma ireray e ngiyal’ ni ngam dugliy ban’en. Ere ngam rin’ e n’en nthingar mu rin’ ya nge yog ni ngam un ko taufe, ya aram rogon ni ga ra dag nib ga’ fan u wan’um e n’en nib m’agan’ Got ngay nge Kristus ni fan ngodad. Mu pi’ ngak Jehovah e n’en nth’abi ga’ fan ni bay rom ni aram e yafas rom. Mu dag ni ga baadag ni ngam rin’ e n’en nib m’agan’ Got ngay ni aram e ngaum lek Jesus ni Fak. (2 Kor. 5:14, 15) Ya dariy e maruwar riy ni aram e bin th’abi fel’ kanawoen e yafas!
Uw Rogon ni Ga Ra Fulweg?
• Mang e gad be micheg ni faan gad ra un ko taufe?
• Mang boch e tow’ath nra yog ngodad ni faan gad ra ognaged gadad ngak Got ma gad un ko taufe?
• Mang nib ga’ fan ni ngaud filed ban’en rok Jesus?
• Mang e ra ayuwegdad ni nga u darod ko bin th’abi fel’ kanawoen e yafas?
[Study Questions]
[Picture on page 29]
Ga ra un ko taufe ma aram e be m’ug ni kam mel’eg e bin th’abi fel’ kanawoen e yafas
[Picture on page 30]
Ga bay ko gin ni “dab ki buch ban’en rom riy,” fa?