Mu Fanay “fare Sayden ni Ke Pi’ Gelngin Got” nib Fel’ Rogon

“Mu . . . fek fare sayden ni ke pi’ gelngin Got ni aram e thin rok.”​—EFE. 6:17, NW.

1, 2. Mang e kub t’uf ni ngad rin’ed ya nge yoor boch e tamachib?

 NAP’AN ni guy Jesus e girdi’ nib t’uf e tirok Got rorad, me yog ngak pi gachalpen ni gaar: “Woldug ni ngan kunuy ngan tay nga naun e ba ga’ ni ba ga’ yang, machane piin ni ngar maruweliyed nge thap nga naun e ba lich. Mu yibilgad ngak e en ni ir e suwon e re woldug nem ngki pi’ boch girdien e maruwel ngar maruweliyed e re woldug rok nem nge thap nga naun.” Gathi kemus ni ke yog Jesus e pi thin nem ya ke “ulunguy Jesus fa ragag nge l’agruw i girdi’ ni gachalpen” me l’ograd ni ngar machibgad ara ‘mokun woldug.’ (Matt. 9:35-38; 10:1, 5) Tomuren e biney “me mel’eg Somol yugu boch e girdi’ ni medlip i ragag nge l’agruw i pumoon me l’ograd nga ranod ni yad lal’agruw” ni ngar rin’ed e re maruwel ney.​—Luke 10:1, 2.

² Kub t’uf ni nge yoor boch e tamachib e ngiyal’ ney. Ke gaman 18,168,323 e girdi’ ni kar uned ko Puguran ko yam’ ni tay Jesus u ga’ngin yang e fayleng ko duw ni 2009. Ngiyal’ ney e ke pag medlip milyon e Pi Mich rok Jehovah. Ere 10 milyon e girdi’ ni kar uned ko re muulung nem ni gathi tapigpig rok Jehovah. Ere riyul’ ni boor e girdi’ nib t’uf e ayuw rorad ko tirok Got ban’en. (John 4:34, 35) Ere thingar da yibilayed ni nge yoor boch e tamachib. Machane mang e thingar da rin’ed? Ngad athamgilgad ni ngad mon’oggad u rogon ni gad be machib nge rogon ni gad be pingeg e girdi’ ngar manged pi gachalpen Jesus.​—Matt. 28:19, 20; Mark 13:10.

3. Uw rogon ni ra ayuwegdad gelngin Got ni ngad salapgad ko machib?

³ Kad weliyed ko fa binem e article ni ra ayuwegdad gelngin Got nge yog ni ‘ngad machibgad ndab kud rusgad.’ (Acts 4:31) Maku ra ayuwegdad gelngin Got nib thothup ni ngad salapgad ko machib. Reb e kanawo’ ni rayog ni ngad mon’oggad ko re maruwel ney e ngad fanayed e Thin rok Got nib fel’ rogon ni aram e Bible. Gelngin Got e ke ayuweg e girdi’ kar yoloyed e Bible. (2 Tim. 3:16) Ma Got e ke thagthagnag, ere faanra ngad weliyed e thin riy ngak e girdi’ nib fel’ rogon ma rayog ni nga nog ni gelngin Got e be pow’iydad. U m’on ni ngad weliyed rogon ni ngad rin’ed e re n’ey, ma ngad guyed ko uw feni gel gelngin e Thin rok Got.

‘Thin Rok Got e Bay Gelngin’

4. Uw rogon ni ra thilyeg e thin nu Bible e ngongol ko girdi’?

⁴ Rib gel gelngin e thin rok Got! (Heb. 4:12) Thin rok Got ni bay u Bible e kab m’uth ko sayden ya ma yan i taw nga fithik’ e ulul nge yil. Thin rok Got e rayog ni nge taw nga fithik’ i laniyan’ be’ ma rayog ni ngan nang ko ri uw rarogon facha’. Thin nu Bible e bay gelngin ni rayog ni ngari thilyeg rarogon be’. (Mu beeg e Kolose 3:10.) Riyul’ ni Thin rok Got e ra thilyeg e ngongol ko girdi’!

5. Mang boch e kanawo’ ni ma pow’iydad e Bible riy, ma mang angin?

⁵ Dariy bang nrayog ni ngam pirieg e gonop nib fel’ riy ya kemus ni goo Bible e yira pirieg riy. Bay e thin riy nra ayuweg e girdi’ nge fel’ boch e yafas rorad u lan e re fayleng ney ni ka ri yoor e magawon riy. Thin rok Got e ma pow’iydad ni gathi kemus ni chiney ya ku rayog ni nge pow’iydad i yan nga m’on. (Ps. 119:105) Ra ayuwegdad u rogon ni ngad pithiged e magawon rodad nge nap’an ni ngad mel’eged e piin ni nge mang fager rodad, nge pi n’en ni ma chuweg e chalban, nge maruwel, nge rogon e munmad,  nge ku boch ban’en. (Ps. 37:25; Prov. 13:20; John 15:14; 1 Tim. 2:9) Gad ra fol ko thin rok Got ma ra ayuwegdad ni nge fel’ e tha’ u thildad yugu boch e girdi’. (Matt. 7:12; Fil. 2:3, 4) Faan gad ra pag e thin rok Got ni nge pow’iydad ma rayog ni ngad guyed fel’ngin ara kireb ko n’en ni gad ra dugliy. (1 Tim. 6:9) Thin nu Bible e be fil ngodad murung’agen e tin ra rin’ Got boch nga m’on, ere be ayuwegdad re n’ey ni ngad puluwniged e yafas rodad ko tin nib m’agan’ ngay. (Matt. 6:33; 1 John 2:17, 18) Uw feni rib fel’ ni faanra nge pag be’ e thin rok Got nge pow’iy.

6. Uw feni gel gelngin e thin nu Bible u nap’an ni gad be togopluw nga gelngin Satan?

⁶ Mu lemnag ko uw feni gel gelngin e thin nu Bible nrayog ni ngad fanayed u nap’an ni gad be togopluw nga gelngin Satan. Ke yog Paul ni Thin rok Got e bod e “sayden ni ke pi’ gelngin Got.” (Mu beeg e Efesus 6:12, 17.) Ra ngan fanay e thin nu Bible nib fel’ rogon ma rayog ni nge ayuweg e girdi’ ngar chuwgad u tan pa’ Satan. Ireray e sayden nra ayuweg e yafas ko girdi’ ma gathi nge thangrad. Ere thingar da fanayed e re sayden ney nib fel’ rogon.

Ngan Fanay e Thin Rok Got ni Rogon

7. Mang nib ga’ fan ni ngad nanged rogon i fanay “fare sayden ni ke pi’ gelngin Got” nib fel’ rogon?

⁷ Faan ra i fanay reb e salthaw talin e cham rok ni gubin ngiyal’, ma aram e ra salap u rogon ni nga i maruwel ngay. Ma ku aram rogon ni ngad fanayed “fare sayden ni ke pi’ gelngin Got” u nap’an ni gad be togopluw ngak Satan. Ke yoloy Paul ni gaar: “Mu athamgiliy u rogon nrayog rom nge par e maruwel rom nrib fel’ u mit Got, ni bod rogon be’ ni girdien e maruwel nder tamra’ ko maruwel rok, ni ir be’ ni ma machibnag e thin rok Got nrogon.”​—2 Tim. 2:15.

8, 9. Mang e ra ayuwegdad ni ngad nanged fan e n’en ni be yog e Bible? Mu weliy rogon.

⁸ Mang e ra ayuwegdad ni ngad ‘machibnaged e thin rok Got nrogon’? Som’on e ba t’uf ni ngad nanged fan e thin nu Bible, fin aram e rayog ni ngad weliyed ngak e girdi’ nib fel’ rogon. Ma rayog ni ngad nanged fan nib fel’ rogon ni faan gad ra fal’eg i beeg e thin ni bay u tabolngin ngu tungun reb e verse.

⁹ Thin rok Paul ni bay ko Galatia 5:13 e be dag nriyul’ ni aram rogon. Ki yoloy ni gaar: “Pi walageg ni girdien Kristus gimed, e ke piningmed Kristus ni ngam chuwgad u tan fare Motochiyel. Machane re n’em ni kam chuwgad u tan fare Motochiyel e ngam guyed rogon ndabi mang ba tawey ngomed ngam paged e ar’ar u fithik’ i dowmed nge mang ir e i gagiyegnagmed. Machane rogon nib t’uf romed Kristus nge girdi’ e ir e nge gagiyegnagmed nge bigimed mi i pigpig ngak bigimed.” Mang e be weliy Paul murung’agen? Gur be weliy ni susun dab ku da pared ni gad ba sib ko denen, yam’, nge machib ni googsur ara ku boch ban’en? Thin ni bay u tabolngin ara tungun e thin ko re verse ney e be dag ni be weliy Paul ni ke puf rogorad ko “buch waathan ni Motochiyel e ke fek i yib ngodad.” (Gal. 3:13, 19-24; 4:1-5) Ke weliy Paul u roy ni ke puf rogon e Kristiano, ya bochan e kar leked luwan ay Jesus Kristus. Piin nib ga’ fan u  wan’rad ni ke puf rogorad e ra bagayad ma be pigpig ngak bagayad u fithik’ e t’ufeg. Ma piin ni de ga’ fan u wan’rad ni ke puf rogorad e ur gun’gun’gad ma ur tugthin gad u murung’agen e tin de ga’ fan.​—Gal. 5:15.

10. Ra ngan nang fan e thin nu Bible nib fel’ rogon, mang boch ban’en ni ngan lemnag, ma uw rogon ni ngan rin’?

¹⁰ Maku ba t’uf ni ngad nanged ko mini’ e ke yoloy reb e babyor u Bible, nge wuin e ke yoloy, nge rarogon e girdi’ u nap’an ni yoloy. Maku ba ga’ fan ni ngan nang ko mang fan ni ke yoloy, nge ngongol ko girdi’, nge teliw rorad e ngiyal’ nem. *

11. Mang e thingarda ayuwgad riy u nap’an ni gad be weliy e thin nu Bible?

¹¹ Ngan “machibnag e thin rok Got nrogon” e gathi kemus ni ngan weliy e thin nu Bible nib tamilang, ya dabda fanayed ni ngad k’aringed e marus ngak e girdi’. Rayog ni ngad weliyed e thin nu Bible ya ngad tamilangnaged e thin ni riyul’ ni bod rogon ni rin’ Jesus u nap’an ni waliy Moonyan’. Machane dab da towasariyed e girdi’ ni ngar folgad ko n’en ni ke mich u wan’dad. (Deut. 6:16; 8:3; 10:20; Matt. 4:4, 7, 10) Thingarda folgad ko thin ni yog Peter ni gaar: “Machane ngam liyorgad ngak Kristus u lanin’med, mi gimed tay ni ir e Somol romed. Mu fal’eged rogomed ni gubin ngiyal’ ni ngam pied e fulweg ko n’en nra fith be’ ngomed ni ngam weliyed u murung’agen e re n’en ni ir e ke l’agan’med ngay. Machane ngam rin’ed u fithik’ e sumunguy nge ta’ fan.”​—1 Pet. 3:15, 16.

12, 13. Mang e “yungi n’en ni ke fal’eg e moonyan’ rogon ke par,” nra chuweg e thin rok Got? Mu weliy rogon.

¹² Mang angin ni ra yib ngodad ni faanra ngad fanayed e thin rok Got ni rogon? (Mu beeg e 2 Korinth 10:4, 5.) Thin rok Got e rayog ni nge kirebnag e “yungi n’en ni ke fal’eg e moonyan’ rogon ke par,” ni aram e machib ni googsur, ngongol nib kireb, nge llowan’ ko girdi’ ni de flont. Rayog ni ngad fanayed e Bible ni ngad chuweged e pi n’en ni “yibe togopuluwnag ko tin ni kan nang ni murung’agen Got.” Thin nu Bible e ra ayuweg e girdi’ nge puluw e lem rorad ko tin riyul’.

¹³ Mu lemnag reb e ppin ni 93 e duw rok ni ma par u India. Kan fil ngak murung’agen fare machib ni reincarnation u nap’an ni kab bitir. Ba pagel ni fak ni ma par u reb e nam e yol ngak, me tabab ni nge machibnag me fil e thin nu Bible ngak, ma ke fel’ u wan’ e pi n’en ni ke fil u murung’agen e tin ni ke micheg Jehovah. Machane fare machib ni Reincarnation fa nap’an nra yim’ be’ ma bay ban’en nu fithik’ i dow ndabi yim’ ma ku ra yan i ngal’ ni kub mit e yafas e kari mich u wan’. Ere ke togopluw u nap’an ni ke yol fak ngak u murung’agen rarogon be’ u nap’an ni ke yim’. Ke yog ni gaar: “Dag nang fan e n’en ni be yog e Bible rom. Gu manang ni urngin e teliw e yad ma fil nnap’an nra yim’ be’ ma bay ban’en u fithik’ i dow ndabi yim’. Ke mich u wan’ug e re thin nem ya re n’em ni bay u fithik’ i dow ndab ni guy e ra yan i ngal’ ni ku  boch e yafas ma ra buch ni aram rogon ni, 8,400,000 yay. Ere yooren e teliw e de riyul’? Rayog ni ‘fare sayden ni aram fare thin rok Got’ e nge chuweg e re machib nem ni ka ri mich u wan’? Mu ur weliyew boch e thin nu Bible ma tomuren in e wik me yoloy ni gaar: “Chiney e ka fin gu nang fan rarogon be’ u nap’an ni ke yim’. Ka ri gu felfelan’ nrayog nug guy e piin ba t’uf rog u nap’an ni yira fasegrad ko yam’. Gu be athapeg nra yib Gil’ilungun Got nib papey.”

Mu Guy Rogon ni Nge Mich u Wan’

14. Mang e be yip’ fan ni ngan guy rogon ni nge mich u wan’ be’ e n’en ni gad be weliy?

¹⁴ Ra ngan machibnag e thin rok Got ngak e girdi’ nib fel’ rogon e gathi kemus ni nga nog. Ke machibnag Paul e thin rok Got ni “be guy rogon ni nge mich u wun’rad rogon e gagiyeg rok Got” ere ku thingar da rin’ed ni aram rogon. (Mu beeg e Acts 19:8, 9; 28:23.) Ngan ‘guy rogon ni nge mich u wun’uy’ e be yip’ fan ni ka ri tamilang ban’en u wun’uy. Be’ ni ke mich ban’en u wan’ e be yip’ fan ni “kari pagan’ ko n’en ni kan weliy.” Nap’an ni gad be guy rogon ni nge mich u wan’ be’ e n’en ni be fil e Bible ma aram e kad ayuweged ni nge tamilang u wan’ me pagan’ ngay. Ere ngad guyed rogon ni nge riyul’ u wan’ e thin ni ka dogned ngak. Baaray boch e kanawo’ ni rayog ni ngad rin’ed e re ney riy.

15. U nap’an ni ga ra beeg e thin nu Bible ngak be’, ma uw rogon ni ngam ayuweg ni nge tay fan?

¹⁵ Rayog ni ngam ayuweg be’ ni nge tiyan’ ko thin rok Got me tay fan. Nap’an ni ga ra beeg reb e thin nu Bible ngak be’, ma ngam guy rogon nge nang ko uw rogon u wan’ Got e n’en ni gimew be weliy murung’agen. Tomuren ni kam fith reb e deer me fulweg, ma rayog ni ngam gaar, ‘Ngad guyew ko mang e be lemnag Got u murung’agen e re n’ey.’ Ara ngam fith ni ngam gaar, ‘Mang e be yog Got u murung’agen e re n’ey? Gad ra yog ban’en ni aram rogon u m’on ni ngad beeged reb e thin nu Bible ma aram e gad be ayuweg ni nge nang ni Bible e thin rok Got mab t’uf ni nge tay fan. Rib ga’ fan e re n’ey u nap’an ni gad be machibnag be’ nib mich Got u wan’ machane de nang e n’en ni be fil e Bible.​—Ps. 19:7-10.

16. Mang e rayog ni ngam rin’ ya nge yog nim weliy reb e thin nu Bible nib fel’ rogon?

¹⁶ Gathi kemus ni ngam beeg e thin nu Bible ya ngam weliy fan. Ke mecham ngak Paul ni nge machibnag e girdi’ ma be ‘weliy fan ngorad ma be dag ngorad u lan e babyor nib thothup e n’en ni be yog.’ (Acts 17:3) Ra reb e thin nu Bible ma ba ga’ ni boor ban’en ni be weliy murung’agen, ere ba ga’ fan ni ngam gagiyelnag fare thin ni ir e bay rogon ko n’en ni gimew be weliy. Rayog ni ngam sul u daken fare thin ni ir e ga be guy rogon ni nge tamilang u wan’ ara ngam fith boch e deer ni ra ayuweg ni nge nang fan ngemu’ ma ga weliy fan. Tomuren mag ayuweg ni nge guy ko uw rogon nib m’ag e re thin nu Bible nem ngak.

17. Uw rogon ni ngan weliy fan e thin nu Bible ya nge yog ni mich u wan’uy?

¹⁷ Ngam weliy e thin nu Bible u rogon ni nge mich u wan’uy. Ke pi’ Paul e athamgil nga laniyan’ e girdi’ me weliy boch ban’en nib tamilang ngorad ma aram e ke yog ni weliy e ‘thin rok Got’ ngorad me mich u wan’rad. (Acts 17:2, 4) Ngam guy rogon ni nge taw e thin rok Got nga gum’irchaen e girdi’ ni bod rogon ni i rin’ Paul. Ngam fith boch e deer u fithik’ e tayfan ya nge yog ni ngam nang e n’en ni be lemnag. (Prov. 20:5) Dab mog ban’en ni ra k’aring e damumuw ngak be’, ya ngam weliy nib tamilang nge yog ni nang fan. Mog boch ban’en ni rayog ni nge micheg e thin ni ga be weliy. Ma urngin  ban’en ni ngam weliy e susun nge puluw ko n’en ni be yog e Bible. Kab fel’ ni ngam beeg taareb e thin nu Bible ma ngam weliy nib tamilang ko bin ni ngam beeg l’agruw ara dalip e thin nu Bible ni dab mu weliy fan. Nga dogned ban’en ni nge micheg e thin ni gad be weliy ‘ma dap’iluguney e ra manging’nag.’ (Prov. 16:23) Yu ngiyal’ ma ba t’uf ni ngan fal’eg i gay ban’en ya nge yog ni ngada weliyed nib tamilang. Ni bod fare pin ni 93 e duw rok ni kaad weliyed faram ko som’on ni ba t’uf ni nge tamilang u wan’ ko mang fan ni yooren e teliw e ma fil ni ra yim’ be’ ma bay yaan. Nap’an ni ke tamilang u wan’ ko uw e ke yib fare machib riy nge uw rogon ni ke fanay yooren e teliw, me mich u wan’ e n’en ni be weliy e Bible u murung’agen e yam’. *

Nguum Weliy e Thin Rok Got nib Fel’ Rogon

18, 19. Mang fan ni ngaud ululgad i fanay “fare sayden ni ke pi’ gelngin Got” nib fel’ rogon?

¹⁸ Be yog e Bible ni “be thil rarogon e re fayleng ney i yan”. Piin nib kireb e be gel i yan e kireb rorad. (1 Kor. 7:31, NW; 2 Tim. 3:13) Ere rib ga’ fan ni ngad ululgad i chuweg e “yungi n’en ni ke fal’eg e moonyan’ rogon ke par,” ni gad be fanay fare “sayden ni gelngin Got e ke pi’, ni aram e thin rok Got.”

¹⁹ Ere gad ba felfelan’ ni bay e thin rok Got ni rayog ni ngad fanayed ni ngad chuweged e machib ni googsur u laniyan’ e girdi’ ni baadag e machib! Dariy ban’en ni kab gel ko thin rok Got. Ere ngad athamgilgad ni ngad fanayed “fare sayden ni ke pi’ gelngin Got” nib thothup nib fel’ rogon u nap’an ni gad be machib.

[Footnotes]

Mang e Kam Fil?

• Uw feni gel gelngin e Thin rok Got?

• Uw rogon ni ngan “machibnag e thin rok Got nrogon”?

• Mang e rayog ni nge rin’ e thin nu Bible ko “yungi n’en ni ke fal’eg e moonyan’ rogon ke par”?

• Uw rogon ni ngam mon’og u rogon ni ga be ayuweg e girdi’ ni nge mich e thin rok Got u wan’rad?

[Study Questions]

[Picture on page 18]

Rogon ni Ngan Weliy e Thin rok Got ni Yibe Guy Rogon ni  Nge Mich u Wan’uy

▪ Ngam ayuweg be’ ni nge tay fan e Bible

▪ Mu weliy fan e thin nu Bible

▪ Mu weliy nib tamilang ni nge taw  nga gum’irchaey

[Picture on page 17]

Thingar mu nang rogon ni ngam fanay “fare sayden ni ke pi’ gelngin Got” nib fel’ rogon