‘Ngam Machibnag e Thin Rok Got Ni Dab Mu Rus’

“Ma yad gubin ni yib i suguyrad gelngin Got nib thothup mi yad tabab i weliy e thin rok Got ngak e girdi’ ndaki yib e marus ngorad.”​—ACTS 4:31, NW.

1, 2. Mang fan ni ngad athamgilgad ni nge yib angin e machib ni gad ma tay?

 DALIP e rran u m’on ni yim’ Jesus me yog ngak pi gachalpen ni gaar: “Ma re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomuren e fayleng.” U m’on ni yan nga tharmiy miki yog Jesus ngorad ni ngar pingeged e girdi’ ngar manged pi gachalpen mar ‘filed ngorad rogon ni nguur folgad u gubin e tin ni ke yog ni ngar rin’ed.’ Ke micheg ngorad ni bay rorad “nge yan i mada’ nga tomren e fayleng.”​—Matt. 24:14; 26:1, 2; 28:19, 20.

² Gadad e Pi Mich Rok Jehovah e gad ba pasig ni gad be machibnag fare thin u murung’agen Gil’ilungun Got, ma gad be pingeg e girdi’ ngar manged pi gachalpen ni ireray e maruwel ni ke tabab ko fa bin som’on e chibog. Dariy yugu reb e maruwel ni kab ga’ fan ko re maruwel ney ya be ayuweg e yafas ko girdi’. Ere rib ga’ fan ni ngad rin’ed nib fel’ rogon. Gad ra beeg u lan e re babyor ney ma gad ra nang rogon ni ra ayuwegdad gelngin Got nib thothup ni nge dab kud rusgad u nap’an ni gad be machib. Gal ni migid e thin e ra dag ko uw rogon nra ayuwegdad gelngin Jehovah ni ngad salapgad i fil e thin rok ngak e girdi’ ma ngad machibgad u fithik’ e yul’yul’.

Ba t’uf Ni Dab ni Rus

3. Mang fan ni ngad athamgilgad ni nge dabda rusgad u nap’an ni nga darod ko machib?

³ Re maruwel ney ni ngan machibnag fare thin u murung’agen Gil’ilungun e ba tow’ath nrib ga’ fan. Machane yu ngiyal’ e ba mo’maw’. Yugu aram rogon ni boch e girdi’ e yad ba adag e machib, machane ku boor i yad e dabun ni bod rogon u nap’an Noah. Ke yog Jesus ni gaar: “Da ur nanged [“da ur tayedan’rad,” NW] e n’en ni bay yib ngorad nge yan i mada’ ko ngiyal’ ni baaram ni yib e ran nge tharey e binaw nge fekrad ni yad gubin.” (Matt. 24:38, 39) Boch e girdi’ e bay ur moninggad ma yad be togopluw ngodad. (2 Pet. 3:3) Rayog ni nge togopluw girdien e am, nge piin ni gadad nga skul, nge piin ni gadad nga maruwel, nge girdien e tabinaw rodad. Ma kub muun ngay e pi n’en ni gad ba meewar riy ni bod e tamra’ nge marus nra puwan’ be’ ngodad. Boor ban’en nra mo’maw’nag ‘ni ngad weliyed’ e Thin rok Got ni dab da “tamdaggad.” (Efe. 6:19, 20) Ba t’uf ni ngad ululgad i machibnag e thin rok Got ndab da rusgad. Mang e rayog ni nge ayuwegdad?

4. (a) Mang fan fare bugithin ndab ni rus? (b) Uw rogon ni ke yog rok Paul ni nge machibnag yu Thessalonika nde rus?

⁴ Fare thin nu Greek ni kan thilyeg ni “dab ni rus” e be yip’ fan “nib pufpuf e thin rok be’ mab pagan’. Ma dabi yog ban’en nra k’aring e damumuw ngak be’. (Kol. 4:6) Dab da rusgad machane ku gad baadag ni nge gapas thildad urngin e girdi’. (Rom. 12:18) Maku, nap’an ni gad be machibnag fare thin nib fel’ ni murung’agen Gil’ilungun Got, mab t’uf ni dabda rusgad machane ku gad be tay farad. Ba t’uf boch ban’en ni ngam maruweliy ya nge dab mu rus. Ya re n’ey ni dab ni rus e dabiyog u  gelngidad. Tomuren ni kan gafgownag Paul nge boch e girdi’ u Filippi, ma uw rogon ni ke yog rorad ni ngkur weliyed e thin nib fel’ ngak yu Thessalonika? Ke gaar Paul: “Got rodad e pi’ e athamgil nga lanin’mad.” (Mu beeg e 1 Thessalonika 2:2.) Rayog ni nge ayuwegdad Jehovah ni nge dab kud rusgad ni bod Paul.

5. Uw rogon ni ayuweg Jehovah Peter nge John nge boch i gachalpen Jesus ni ngar machibgad ndab da rusgad?

⁵ Nap’an ni togopluw e “piin ni piilal, nge piin ni tamachib ko Motochiyel,” me gaar apostal Peter nge John: “Gimed e ngam turguyed ko bin ngan e mmat’aw u p’eowchen Got, ko ngan fol romed ara ngan fol rok Got. Ya dabiyog ni nge dab kug weliyew e n’en ni kug guyew nge n’en ni kug rung’agew.” Ere dar yibilayew ni nge taleg Got fare togopluw ya kar meybilgow ni lungurow: “Somol, mu changar ko tin ni ka rogned ni yad ra rin’ ngomad, ma ga ayuwegmad e pi tapigpig rom nggu weliyed e thin rom ndab kug rusgad.” (Acts 4:5, 19, 20, 29) Ere mang e rin’ Jehovah? (Mu beeg e Acts 4:31.) Ke ayuwegrow nga gelngin nib thothup ni ndab kur rusgow. Ma ku arrogodad ni ku rayog ni nge ayuwegdad gelngin Got nib thothup. Ere uw rogon ni nge ayuwegdad u nap’an ni gad be machib?

Rogon ni Nge Dab Kun Rus

6, 7. Mang e bin nth’abi fel’ e kanawo’ ni nge yog gelngin Got riy ngodad? Mu weliy.

⁶ Bin th’abi fel’ e kanawo’ ni nge yog ngodad gelngin Got ni thothup e ngad ninged. I yog Jesus ngak e piin ni ur motoyilgad ngak ni gaar: “Yugu ereyer fanmed kireb, ma gimed manang rogon ni ngam pied e tin nib fel’ ban’en ngak pi fakmed. Ere en ni Chitamangiy ni bay u tharmiy e ri ra pi’ gelngin nib thothup ngak e piin ni yad ra ning ngak!” (Luke 11:13, NW) Bin riyul’ riy e thingar da ninged gelngin Got nib thothup ni gubin ngiyal’. Faanra gad ma rus u nap’an ni gad be un ko machib u kanawo’, u fithik’ e sabethin, nge machib u tabon e maruwel, ma rayog ni ngad meybilgad ni nge ayuwegdad gelngin Got ni dab kud rusgad.​—1 Thess. 5:17.

⁷ Ireray e n’en ni rin’ reb e Kristiano ni Rosa fithingan. * Reb e rran u nap’an ni immoy ko gin ni ma maruwel riy, ma reb e sensey ni yow nga maruwel e be beeg e babyor ni be weliy murung’agen e skul ni yibe gafgownag e bitir riy. Kari kireban’ fare sensey ni bochan e n’en ni ke beeg me yog ni gaar, “Mang e ri be buch ko re fayleng ney?” Nap’an ni rung’ag Rosa e n’en ni yog fare sensey ma ri baadag ni nge machibnag. Ere mang e rin’ me machibnag nde rus? Ke yog Rosa ni gaar: “Kug ning gelngin Jehovah nib thothup ni nge ayuwegeg.” Ma aram e ke yog rok ni nge machibnag fare pin, ma ka rognew ni bay kur machibgow bayay. Kum lemnag e n’en ni buch rok Milane ni 5 e duw rok ni ma par u New York. Ke yog ni gaar: “M’on ni nggu wan nga skul ma gamow ma meybil e nina’ rog.” Mang e yow ma yibilay? Yow ma yibilay ni rayog ni nge machib Milane. Ke yog e nina’ rok ni gaar: “Re n’ey e ke ayuweg Milane ni nge weliy ko mang fan ndabi un ko birthday nge boch e madnom ko fayleng ni yima tay u skul.” N’en ni ke buch rok Rosa nge Milane e be dag nriyul’ nra ayuwegdad e meybil ni ngad machibgad ndab da rusgad.

8. Mang e rayog ni ngad filed rok Jeremiah ni i machib ni de rus?

⁸ Mu fal’eg i lemnag ko mang e ke ayuweg Jeremiah ni profet ni nge machib ni der rus. Nap’an ni yog Jehovah ngak ni nge mang profet, me fulweg ni gaar: “Somol ni Got, da gu nang rogon e welthin; ya kayigi gel fanag bitir.” (Jer. 1:4-6) Machane munmun ma daki rus Jeremiah me ulul me machib u fithik’ e pasig ma aram fan ni lemnag boor e girdi’ ni ir be’ ni goo gafgow e ma weliy murung’agen.  (Jer. 38:4) Ke pag 65 e duw ni i machibnag Jeremiah murung’agen e pufthin nra tay Jehovah. Piyu Israel e ri yad manang ni ir ba ta machib ni der ma rus. Ya tomuren ni ke yan 600 e duw mi yad guy Jesus ni be machib ni der rus me lemnag boch i yad ni ir Jeremiah ni ke fas ko yam’. (Matt. 16:13, 14) Mang e ke ayuweg Jeremiah ni nge machib ni daki rus? Ke yog ni gaar: “Mi i gak’ e thin rom ni bod ba nifiy u fithik’ i lanin’ug ngu fithik’ e yil rog ni dabiyog ni nge chuw.” (Jer. 20:9) Ba tamilang ni thin rok Jehovah e ke k’aring Jeremiah ni nge machib.

9. Mang fan ni rayog ni nge ayuwegdad e thin rok Got ni bod ni ayuweg Jeremiah?

⁹ I yol Paul ngak piyu Hebrew ni gaar: “Thin rok Got e ba fos ma ba’ gelngin ni ma maruwel. “Ya kab m’uth nga bangi sayden ni ruw raba’ ma mm’uth. Ya ma yan nge yan i taw nga fithik’ i lanin’dad ko n’en ni gadad be lemnag, nge fithik’ e ul’ul nge yil, ma ma pufthinnag e n’en ni yima yim’ ni bochan nge tin ni yima lemnag.” (Heb. 4:12) Thin rok Got e ku rayog ni nge ayuwegdad ni bod Jeremiah. Dab mu pagtalin ni thin ni bay u lan e Bible e gathi llowan’ ko girdi’, ya Got e ke thagthagnag. Thin ni bay ko bin 2 Peter 1:21 (NW) e gaar: “Dariy bbugithin ni yog e profet ni sum u laniyan’ be’, ya gelngin Got nib thothup e yib i ying ngak e girdi’ ngar weliyed e thin ni ke yib rok Got ngorad.” Faan gad ra fil e Bible nib fel’ rogon ma ra sug lanin’dad ko thin ni ke thagthagnag gelngin Got nib thothup. (Mu beeg e 1 Korinth 2:10.) Re thin ney e ra “bod ba nifiy” u fithik’ i lanin’dad ni dabiyog ni nge dab dogned.

10, 11. (a) Susun uw rogon ni ngad filed e Bible ni faanra gad baadag ni ngad machibgad ni dabda rusgad? (b) Mog reb e kanawo’ ni ga be nameg ni fan e ngam mon’og u rogon ni ga be fil e Bible.

¹⁰ Ngad filed e Bible ni goo gadad ni gad be guy rogon ni nge taw nga gum’ircha’dad ma aram e rayog ni nge ayuwegdad. Ni bod Ezekiel nni pilyeg e changar rok mi nog ngak ni nga kay bangi babyor ni kan bachiy ni bay e thin riy nib gel ni fan ko girdi’ nib kireb. Re n’em e be yip’ fan nib t’uf ni ngari nang Ezekiel fan ni bod ni ke mang bangi dow. Faanra rin’ ni aram rogon ma rayog ni nge  machibnag fare thin u fithik’ e felfelan’.​—Mu beeg e Ezekiel 2:8–3:4, 7-9.

¹¹ Chiney e gad bay u ba ngiyal’ ni bod nap’an Ezekiel, boor e girdi’ ni daburad e thin rok Got. Faanra gad baadag ni ngad ululgad i machibnag fare thin rok Got ma ba ga’ fan ni ngad filed e Bible ma gad nang fan nib fel’ rogon. Ma kub t’uf ni ngad filed e Bible ni gubin ngiyal’. Ngad boded fare psalmist, ya ke yog ni gaar: “Mang e gu par nib fel’ u wun’um e thin ni be yib u l’ugunag nge pi n’en ni gu be lemnag. A Somol, ni gur e gu be naf nga tan paam mi gur e Tabiyul rog!” (Ps. 19:14) Rib ga’ fan ni ngad ted e tayim ni ngad fal’eged i lemnag e pi n’en ni kad beeged ya nge yog ni taw e thin nib riyul’ nga gum’ircha’dad. Thingarda athamgilgad ni ngad mon’oggad u rogon ni gad be fil e Bible. *

12. Mang fan ni pi muulung rodad e ma ayuwegdad ni nge pow’iydad gelngin Got nib thothup?

¹² Reb e kanawo’ ni rayog ni nge ayuwegdad gelngin Got nib thothup riy e nge “bagadad ma ngi i lemnag bagadad, ma nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak. Ma ngad guyed rogon ndab da paged e muulung rodad.” (Heb. 10:24, 25) Gad ra athamgil ni ngad uned ko muulung ni gubin ngiyal’, ma gad motoyil nib fel’ rogon, ma gad fol ko n’en ni kad filed ma aram reb e kanawo’ ni ra pow’iydad gelngin Got nib thothup riy. Ya gad manang ni ma pow’iydad gelngin Jehovah nib thothup u daken e pi  muulung rodad.​—Mu beeg e Revelation 3:6.

Angin nra Yib ni Faanra Dabin Rus

13. Mang e rayog ni ngad filed u murung’agen e machib ni i tay pi Kristiano kakrom?

¹³ Gelngin Got nib thothup ni th’abi gel, e rayog ni ayuweg e girdi’ ni ngar rin’ed e tin nib m’agan’ Got ngay. Piin Kristiano kakrom e kub fel’ rogon e machib ni ur ted ni bochan gelngin Got, ma aram e ke yog rorad ni ngar machibnaged “urngin e girdi’ u fayleng.” (Kol. 1:23) Faan gadad ra lemnag ni yooren i yad e “dariy e skul” rorad ma aram e ba tamilang nriyul’ ni gelngin Got e ke ayuwegrad.​—Acts 4:13.

14. Mang e ra ayuwegdad ni ngad machibgad u “fithik’ e pasigan”?

¹⁴ Ra ngad folgad u rogon ni be pow’iydad gelngin Got nib thothup ma ra ayuwegdad ni ngaud machibgad ndab da rusgad. Angin ni ra yib ni faan ra ngaud yibilayed gelngin Got nib thothup, ma ngad filed e Bible ni goo gadad, ma ngad fal’eged i lemnag e n’en ni kad beeged, ma ngaud uned ko pi muulung  rodad ma ra ayuwegdad ni ngaud ‘pigpiggad ngak Somol ni gadad ba pasig ngay u lanin’dad.’ (Rom. 12:11) Be yog e Bible murung’agen “be’ u Israel ni Apollos fithingan, nni gargeleg u lan yu Alexandria, e yib nga Efesus, ni ir be’ nib fel’ l’ugun ko welthin ma ba tamilangan’ ko thin ni bay u lan e babyor nib thothup” ni ke “weliy u fithik’ e pasigan’ e tin riyul’ ni murung’agen Jesus.” (Acts 18:24, 25) Gad ra pigpig ngak Got ‘ndab ud malmalgad’ ma aram e gad be dag ni darud rusgad ni ngad machibgad u mit e tabinaw i yan ngu fithik’ e sabethin.​—Rom. 12:11.

15. Uw rogon nra fel’ rogodad ni faanra ngaud machibgad ndab da rus gad?

¹⁵ Ngad machibgad ndab da rusgad ma ra yib angin nib fel’ ngodad. Gad ra adag ni ngad rin’ed e re maruwel ney u nap’an nra tamilang u wan’dad feni ga’ fan ma bay angin. Gad ra pasig ya kad guyed ni kad mon’oggad ko machib ma kad guyed nib t’uf ni ngad rin’ed e re maruwel ney nib papey.

16. Mang e thingarda rin’ed ni faanra kad meewargad ko machib?

¹⁶ Uw rogon ni faanra da kud pasiggad ko machib ni bod rogon ko som’on? Ngad yaliyed gadad u fithik’ e yul’yul’. I yoloy Paul ni gaar: “Mu changargad ngomed ko gimed be par ni gimed be ngongol u fithik’ e michan’ romed ngak Kristus fa dangay.” (2 Kor. 13:5) Ere mu fithem: ‘Ku gub pasig ni bod ko som’on, fa? Gu ma ning gelngin Jehovah nib thothup, fa? Ma m’ug ko meybil rog ni be pagan’ug ngak ni nge ayuwegeg ni nggu rin’ e tin nib m’agan’ ngay? Ma m’ug ko meybil rog ni gub felfelan’ ko fare maruwel ni machib ni kan pi’ ngodad? Uw rogon e fol Bible ni gu ma tay? Uw n’umngin nap’an ni gu ma fal’eg i lemnag e pi n’en ni kug beeg nge pi n’en ni kug rung’ag? Gu ma un ko pi n’en ni yima rin’ u nap’an e muulung?’ Gad ra fal’eg i lemnag e pi deer ney, ma ra ayuwegdad ni ngad nanged e pi n’en ni gad ba meewar riy ngad yal’uweged.

Mu Pag Gelngin Got nge Ayuwegem ni Dab Mu Rus

17, 18. (a) Uw urngin e nam ni kan machibnag fare thin nib fel’ riy? (b) Uw rogon ni ngad machibnaged fare thin nib fel’ ni ‘dabda tamdaggad?’

¹⁷ Ke yog Jesus ngak pi gachalpen ni bay yib gelngirad ko ngiyal’ ni bay yib gelngin Got nib thothup nga dakenrad ma aram mi yad weliy murung’agen u “lan yu Jerusalem, ngu lan yu Judea ni polo’, ngu lan yu Samaria, nge yan i mada’ ko yungi n’en ni yan i mus e fayleng ngay.” (Acts 1:8) Ke mon’og e re maruwel ney e ngiyal’ ney. Ya ke pag medlip e milyon e Pi Mich rok Jehovah ni yad be machibnag murung’agen Gil’ilungun Got u boor ko 230 e nam, ma ke chugur ko 1.5 bilyon e awa ni kar thognaged ko machib u lan reb e duw. Ba gel e felfelan’ riy ni rayog ni ngad uned ko re maruwel ney ni dakuriy ba ngiyal’ ni yira rin’.

¹⁸ Machib ni yibe tay e ngiyal’ ney u ga’ngin yang e fayleng e Got e be ayuweg ni bod kakrom. Faan gad ra fol u rogon ni be pow’iydad gelngin Got nib thothup ma aram e rayog ni ngad machibgad ni ‘dabda tamdaggad.’ (Acts 28:31) Ere ngad paged gelngin Got nib thothup ni nge pow’iydad u nap’an ni gad be machibnag fare thin nib fel’ u murung’agen Gil’ilungun Got.

[Footnotes]

Mang e Kam Fil?

• Mang fan nib t’uf ni dabda rusgad u nap’an ni gad be machibnag e thin rok Got?

• Mang e ke ayuweg pi gachalpen Jesus kakrom ni ngar machibgad ni dab ra rusgad?

• Mang e ra ayuwegdad ni dabda rusgad?

• Mang angin ni faanra ngad machibgad ni dabda rusgad?

[Study Questions]

[Picture on page 13]

Uw rogon ni nge ayuweg e gallabthir pi fakrad ngar machibgad ndab ra rusgad?

[Picture on page 14]

Meybil nib ngoch e ra ayuwegem ni dab mu rus u nap’an e machib