Ga Be Lek Kristus u Fithik’ e Pasig, Fa?

“Gamad be wenig ngomed ma gamad be ta’mad ngomed . . . ni ngam athamgilgad boch.”​—1 THESS. 4:1.

1, 2. (a) Mang boch ban’en ni guy e girdi’ ni i buch u nap’an Jesus? (b) Mang ni kub ga’ fan e ngiyal’ ney ni gad bay riy?

 KA AM lemnag feni fel’ ni faanra um moy ko ngiyal’ ni baaram ni immoy Jesus u fayleng? Sana ga ra lemnag angin nra yib ngom ni faanra um moy ko ngiyal’ nem me chuweg Jesus e m’ar rom. Maku reb e sana ga ra adag ni ngam guy Jesus, ma ga rung’ag laman, mu kum fil boor ban’en rok, mag guy e pi maang’ang ni i ngongliy. (Mark 4:1, 2; Luke 5:3-9; 9:11) Faan gomanga ud guyed Jesus ni be rin’ e pi n’em, ma rib manigil! (Luke 19:37) Dakuriy reb e mfen nga tomuren Jesus nra guyed boch ban’en ni ki buch ni aram rogon ma n’en ni rin’ “u daken e maligach ni pi’ ni aram ir” e dab ki rin’ bayay.​—Heb. 9:26; John 14:19.

² Ngiyal’ ney ni gad bay riy e kub ga’ fan. Mang fan? Bochan ni be yog e Bible ni gad bay u “tungun” urngin ban’en ara “tin tomren e rran.” (Dan. 12:1-4, 9; 2 Tim. 3:1) Aray e ngiyal’ ni ka nin’ Satan nga wuru’ e tharmiy, ma dab ki n’uw nap’an min kol nga non’ “nga lan fare low nib toar.” (Rev. 12:7-9, 12; 20:1-3) Ku aray e ngiyal’ ni gad be machibnag fare thin nib fel’ ni “murung’agen e gagiyeg rok Got” u ga’ngin yang e fayleng, ma gad be weliy ngak e girdi’ murung’agen e athap ko par u paradis. Re maruwel ney e gathi bay kun rin’ bayay.​—Matt. 24:14.

3. (a) U m’on ni sul Jesus nga tharmiy, ma mang e yog ngak pi gachalpen ni ngar rin’ed? (b) Mang e ba muun ko re maruwel nem?

³ U m’on ni sul Jesus nga tharmiy me yog ngak pi gachalpen ni gaar: “Mi gimed weliy murung’ageg u lan yu Jerusalem, ngu lan yu Judea ni polo’, ngu lan yu Samaria, nge yan i mada’ ko yungi n’en ni yan i mus e fayleng ngay.” (Acts 1:8) Re maruwel nem e ba muun e machib ngay u ga’ngin yang e fayleng. Mang e yibe nameg ko re maruwel nem? Aram e ngan yognag boch e girdi’ ngar manged pi gachalpen Jesus u m’on ni nge yib e tomur. (Matt. 28:19, 20) Ere mang e thingar da rin’ed ni faanra ngad lebguyed e n’en ni ke tay Jesus chilen ni ngan rin’?

4. (a) Mang e tamilangnag Peter ko 2 Peter 3:11, 12 ni ngad rin’ed? (b) Mang e thingar da kol ayuwgad riy?

 ⁴ Mu tay fanam i yan ko n’en ni yog apostal Peter ni gaar: “Ere mit i mang girdi’ e susun e ngam boded? Pangimed e nge par nib thothup ma kam pied gimed nga pa’ Got, ma gimed be sonnag e chirofen nem, ni ir e Rran rok Got.” (2 Pet. 3:11, 12) Ere ba tamilang ko thin rok Peter nib t’uf ni ngaud tedan’dad e chiney ko tin tomuren e rran, ma gad guy rogon ni ngaud pared ni tirok Got ban’en e ba m’on u wan’dad. Re n’ey e ba muun ngay e machib ni gad ma tay. Ere ri gad ba felfelan’ ni gad be guy gelngin feni pasig pi walagdad u ga’ngin yang e fayleng ni yad be rin’ e re maruwel ney ni tay Jesus chilen ni ngan rin’! Machane, ku gad manang nthingar da kol ayuwgad ni nge dabi malmalnagdad e pi n’en ni bay ko re fayleng rok Satan ney nge pi magawon rodad. Ere chiney e ngad weliyed rogon nrayog ni ngaud leked Kristus ni gubin ngiyal’.

Mu Rin’ e Maruwel ni Ke Pi’ Got Ngom u Fithik’ e Pasig

5, 6. (a) Mang e yog Paul ni be rin’ e pi Kristiano u Jerusalem nib fel’? (b) Mang e ginangrad riy? (c) Mang fan nib t’uf ni ngad maruwelgad nib gel ni ngad rin’ed e n’en nib milfan ngodad ni ke pi’ Got?

⁵ Nap’an ni yol apostal Paul ngak e pi Kristiano u Jerusalem, me yog nib fel’ e pigpig ni ur ted u fithik’ e yul’yul’ ni yugu aram rogon ni un gafgownagrad. I gaar: “Ki gimed manang rogomed ko tin baaram e rran ni ke yan nga tomur. Lan e pi rran nem u tomren ni ke gal ramaen e tamilang rok Got nga dakenmed, e boor ban’en ni mu gafgowgad riy, machane gafgow ni i yib ngomed e de gel ngomed.” Arrogon, de pag Jehovah talin rogon ni ur pared ni yad ba yul’yul’. (Heb. 6:10; 10:32-34) Maku dabisiy ni thin ni yog Paul ko pi Kristiano nu Hebrew ney e ke pi’ e athamgil nga lanin’rad. Machane, ku lan e re ngi babyor rok Paul nem e ki ginangrad u ban’en nrayog ni nge malmalnag be’ ko pigpig ni be tay ngak Got. I yog ni piin Kristiano e thingar ra kol ayuwgad ndab ur “dabuyed” ara ur towaygad nga boch ban’en ya nge dab ra folgad ko pi motochiyel rok Got.​—Heb. 12:25.

⁶ Re n’em ni yog ndab ra “dabuyed” ni ngar rin’ed e n’en nib milfan ngorad ni ke pi’ Got e ku bay rogon ngak e piin Kristiano e ngiyal’ ney. Ba t’uf ni ngad maruwelgad nib gel ya nge yog nda rin’ed e n’en nib milfan ngodad ko pigpig ni gad be tay. (Heb. 10:39) Machane, bin th’abi ga’ fan riy e pigpig ni gad be tay e bay rogon ko yafas rodad.​—1 Tim. 4:16.

7, 8. (a) Mang e ra ayuwegdad ni ngad pared ni gad pasig ko pigpig ni gad be tay ngak Got? (b) Faanra gathi ri ka gad ba pasig ko pigpig ni gad be tay, ma mang e ngad lemnaged u murung’agen Jehovah nge Jesus?

⁷ Mang e ra ayuwegdad nge dab da towaygad nga boch ban’en ni fan e nge dab da rin’ed e n’en nib milfan ngodad ko pigpig ni gad be tay ngak Got? Reb e kanawo’ e ngaud fal’eged i lemnag fan ni kad ognaged gadad ni ngad pigpiggad ngak Got. Kad micheged ngak Jehovah ni gad ra mon’eg e tin nib m’agan’ ngay u lan e yafas rodad, maku gad baadag ni ngad ululgad i rin’ ni aram rogon. (Mu beeg e Matthew 16:24.) Aram fan ni yu ngiyal’ e ba fel’ ni ngad fithed gadad: ‘Ku gub pasig ni gu be rin’ e n’en ni gu micheg ngak Got u nap’an ni gu un ko taufe? Fa da kug pasig ni bod rogon kafram?’

⁸ Faanra kad fal’eged i yaliyed gadad u fithik’ e yul’yul’ ma kad guyed ni gathi ri ka gad ba pasig ko pigpig ngak Jehovah, mab fel’ ni ngad lemnaged fapi thin ni yog Zefaniah ni profet ni gaar: “Dab mu pag paam nge ul nga but’! Fare Somol ni Got romed e be par romed; ni gelngin e be gelnagmed. Bayi felfelan’ Somol ngomed.” (Zef. 3:16, 17) Pi thin ney e nog ni fan ngak piyu Israel u nap’an ni kar chuwgad u kalbus u Babylon ni yad be sul nga Jerusalem. Machane, ka bay fan e re thin ney ngak e girdi’ rok Got e ngiyal’ ney. Re  maruwel ney ni gad be rin’ e maruwel rok Jehovah, ere dab ud paged talin ni gubin ngiyal’ ni bay Jehovah nge Fak ni yow be ayuwegdad ni ngad rin’ed e n’en nib milfan ngodad ni ke pi’ Got. (Matt. 28:20; Fil. 4:13) Faan gad ra athamgil ngad ululgad i rin’ e maruwel rodad ni gad ba pasig ma ra tow’athnagdad Got maku ra ayuwegdad ni ngaud mon’oggad i yan ko tirok ban’en.

Ngad ‘Mon’eged u Wan’dad e Gagiyeg Rok Got’

9, 10. (a) Mang e be yip’ fan fare fanathin ni yog Jesus u murung’agen be’ nib moon ni ngongliy ba mur nib ga’? (b) Mang e gad ra fil ko re n’ey?

⁹ Immoy ba ngiyal’ ni un Jesus ko abich u tafen reb e pilungen e Farise me weliy ba fanathin ni murung’agen be’ nib moon ni ngongliy ba mur nib ga’. U lan e re fanathin rok nem e weliy rogon ni kan pining e girdi’ ni ngar uned ko gagiyeg u Gil’ilungun Got u tharmiy. Miki fanathinnag e n’en ni be yip’ fan ni nge ‘dabuy’ be’ e re n’ey fa towey nga ban’en. (Mu beeg e Luke 14:16-21.) Bagayad e yog ni bay bangi binaw ni ka fini chuw’iy nib t’uf ni nge lekag. Ma bagayad e yog ni ka fini chuw’iy boch e garbaw, ere ba t’uf ni nge maruwel ngorad. Ma bagayad e gaar: ‘Dabiyog ni nggub ya ka fin gu mabgol.’ Ere pi girdi’ ney e kar toweygad nga boch ban’en ndariy fan. U m’on ni nge chuw’iy be’ bangi binaw fa boch e gamanman ma ri ma fal’eg i yaliy nib fel’ rogon, ma gathi u tomuren ni ke chuw’iy. Maku reb e, mang fan ni faanra ke mabgol be’, ma dab ki un nga ban’en ni aram feni ga’ fan? Aram fan ni damumuw fare moon ni ke ngongliy fare mur.

¹⁰ Gubin e pi tapigpig rok Got nrayog ni ngar filed ban’en ko re fanathin rok Jesus ney. Mang e re n’em? Thingar dab da paged boch ban’en nde ga’ fan ni nge magawonnag e pigpig ni gad be tay ngak Got. Faanra dabi fol reb e Kristiano ko re n’ey, ma ra munmun me malmal ko machib. (Mu beeg e Luke 8:14.) Rogon ndabi buch e re n’ey e ngad folgad ko fare thin ni yog Jesus ni gaar: “Ngam m’oneged u wan’med e gagiyeg rok Got nge tin nib m’agan’ ngay ni ngam rin’ed.” (Matt. 6:33) Riyul’ ni ma yib e athamgil nga lanin’dad u nap’an ni gad ma guy e pi tapigpig rok Got ni tin ni ke pilibthir nge tin ni kab fel’ yangaren ni yad be fol ko re fonow ney. Bin riyul’ riy e boor i yad ni ke thilyeg boch ban’en u rarogon e par rok ya nge yog ni nge yoor e tayim ni fanay ko machib. Bochan e re n’ey ma kar guyed ni faan yira m’oneg u wan’uy e gagiyeg rok Got ma aram e ra yibnag e bin riyul’ e felfelan’.

11. Mang ban’en ni buch rok be’ u Bible ni be dag feni ga’ fan ni ngan pigpig ngak Got u polo’ i gum’irchaey?

¹¹ Mu tay fanam i yan ko n’en ni buch rok Jehoash ni be dag feni ga’ fan ni ngad pasiggad ko pigpig ngak Got. I yan Jehoash ngak Elisha ni be yor ya ke rus nri war fare nam nu Israel nga pa’ yu Syria. Ma aram me yog fare profet ngak ni nge pag gan e gat’ing rok u langan e winda nge puluwon yu Syria, ni aram e mich riy ni ngar gelgad ko re mahl nem. Ere susun e ngari pasig laniyan’ fare pilung ni nge rin’ e re ney. Me yog Elisha ngak ni nge fek gan e gat’ing rok nge toy nga but’. Dalip yay ni toy Jehoash fapi gan e gat’ing rok nga but’. Mi ri damumuw Elisha ngak ya faan gomanga toy ni lal ara nel’ yay ma ‘ra i par ni be gel ngak yu Syria.’ Machane, bochan nde fol ma kemus ni dalip yay ni gel ko mahl. Maku bochan nde ngongol u fithik’ e pasig ma de yib angin ngak nib fel’. (2 Kings 13:14-19) Ere mang e gad ra fil ko re n’ey? Faan gad ra rin’ e maruwel rok Jehovah u polo’ i gum’ircha’dad ngu fithik’ e pasig ma aram e boor e tow’ath nra pi’ ngodad.

12. (a) Mang e ra ayuwegdad ni ngad pared ni gad ba pasig ko pigpig ni gad be tay ni yugu aram rogon ni boor e magawon u lan e yafas rodad? (b) Mu weliy rogon angin ni ke yib ngom ni bochan e gab pasig ko machib.

¹² Pi magawon u lan e yafos rodad e ma skengnag e yul’yul’ nge pasig rodad ko pigpig  ngak Got. Boor e walag ni bay e magawon rorad ko salpiy, ma boch i yad e ke mulan’ ni bochan e dabiyog ni ngar pigpiggad ngak Jehovah ni bod kafram ni bochan e m’ar rorad. Machane gad gubin nrayog ni ngad athamgilgad ni nge yog ni ngad pared ni gad ba pasig ko pigpig ni gad be tay ma gad ulul ngaud leked Kristus. Mu guy e n’en ni be yog fare thin ni kenggin e “Mang e Ra Ayuwegem ni Ngam Ulul Ngaum Lek Kristus?” Ngemu’ mag fal’eg i lemnag rogon nrayog ni ngam fol riy. Ya faan ga ra rin’ ma ra yib angin ngom. Faan gad ra pasig ko machib ma ba ga’ angin nra yib ngodad, ya ra fel’ rogon e yafas rodad me gapas lanin’dad ma gad felfelan’. (1 Kor. 15:58) Maku reb e faan gad ra pigpig ngak Got u polo’ i gelngidad ma ra ayuwegdad ni ngad ‘sonnaged e chirofen nem, ni ir e Rran rok Got.’​—2 Pet. 3:12.

Ngad Fal’eged i Yaliy Rarogodad u Fithik’ e Yul’yul’

13. Uw rogon ma gad nang ko mang e be yip’ fan ni ngad pigpiggad u polo’ i gelngidad?

¹³ Ba fel’ ni ngad lemnaged ni pigpig ni gad ma tay u polo’ i gelngidad e der yan u rogon urngin e tayim ni gad ma tay ko machib, ya ba thilthil rarogodad. Faanra kari mus ni taareb ara l’agruw e awa ni ke yognag be’ u lan reb e pul ni bochan e m’ar rok, ma ra felfelan’ Jehovah ni bochan e ke rin’ e tin nrayog rok. Machane, ra ngad nanged ko mang e ri be yip’ fan ni ngan pigpig u polo’ i gelngiy, mab t’uf ni nge bagadad me fal’eg i yaliy rarogon nge tin nrayog rok u fithik’ e yul’yul’. Ere gadad e piin ni gad be lek Kristus e thingar da puluwniged e lem rodad ko re n’ey. (Mu beeg e Roma 15:5; 1 Kor. 2:16) Mang e tay Jesus nib m’on u lan e yafas rok? I yog ngak fapi girdi’ ni kar muulunggad nga Kapernaum ni gaar: “Dabi siy ni ngku gu machibnag u boch e binaw i yan fare Thin Nib Fel’ ni murung’agen e gagiyeg rok Got, ya ke l’ugeg Got ku gub ni ereray e n’en ni nggu rin’.” (Luke 4:43; John 18:37) Mu fal’eg i lemnag feni pasig Jesus ko machib u nap’an ni ga be fal’eg i yaliy rarogom ya nge yog ni ngam nang urngin e tin nrayog rom ni fan ko machib.​—1 Kor. 11:1.

14. Uw rogon ni ngad yoornaged e tin ni gad be rin’ ni fan ko machib?

¹⁴ Faan gad ra fal’eg i yaliy rarogodad u  fithik’ e yul’yul’ ma dabisiy ni gad ra guy nrayog ni ngkud yoornaged boch e tin nrayog ni ngad rin’ed. (Matt. 9:37, 38) Bod ni bokum biyu’ e pi walagdad ni kafin ra chuwgad u skul e kar uned ko pioneer ya nge yog ni ngar yoornaged e tayim rorad ni fan ko machib. Ga baadag ni ngam felfelan’ ni aram rogon, fa? Boch e walag e kar fal’eged i yaliy rarogorad u fithik’ e yul’yul’ ma kar dugliyed nrayog ni ngar pied e ayuw ko machib ko yungi n’en nib t’uf e ayuw riy ko nam rorad fa yugu reb e nam. Ma boch e ke fil e thin u yugu reb e nam ni bochan e nge yog ni nge ayuweg e girdi’ riy. Yugu aram rogon nib mo’maw’ e pi n’ey, machane yira tow’athnagdad riy, maku ra bing e kanawo’ ngodad ni ngad ayuweged boch e girdi’ “ngar nanged e tin nib riyul’.”​—1 Tim. 2:3, 4; 2 Kor. 9:6.

Boch e Girdi’ ni Ngan Folwok Rorad

15, 16. Mini’ pi gachalpen Jesus ni yad ba pasig nrayog ni ngad folwokgad rorad?

¹⁵ Mang e rin’ boch e girdi’ nra manged boch e apostal rok Kristus u nap’an ni piningrad ni ngar uned ngak? Be weliy e Bible murung’agen Matthew ni gaar: “Me pag urngin ban’en nge un ngak.” (Luke 5:27, 28) Ku be weliy murung’agen Peter nge Andrew ni yow be fita’ ni gaar: “Ka chingiyal’ nem mi yow digey e nug rorow ngar unew ngak.” Ngemu’ miki guy Jesus, James, nge John nge chitamangirow ni yad be fal’eg e nug rorad ni nga ranod ko fita’. Ere mang e rin’ James nge John u nap’an ni piningrow Jesus ni ngar unew ngak? “Ka chingiyal’ nem mi yow digey e nug rorow ngar unew ngak.”​—Matt. 4:18-22.

¹⁶ Ku be’ nib fel’ ni ngad folwokgad rok e Saul ni yib i mang apostal Paul. Yugu aram rogon ni i gafgownag pi gachalpen Jesus, machane me thilyeg e ngongol rok nge mang be’ ni kan “turguy” ni nge machibnag murung’agen Kristus. “Mi i yan u lan tafen e muulung i yan, ni aram e ke tabab i machibnag murung’agen Jesus ni be gaar, ‘Jesus e ir faanem ni Fak Got.’” (Acts 9:3-22) Yugu aram rogon nib gel e magawon nge gafgow ni yib ngak Paul ma dariy ba ngiyal’ ni malmal ko machib.​—2 Kor. 11:23-29; 12:15.

17. (a) Mang e kam turguy ni ngam rin’ e chiney? (b) Mang boch e tow’ath nra yog ngodad ni faan gad ra rin’ e tin nib m’agan’ Jehovah ngay u polo’ i gum’ircha’dad nge gelngidad?

¹⁷ Ri gad baadag ni ngad folwokgad rok e pi gachalpen Jesus ney, ma gad lek Kristus u m’on ni nge sagaal. (Heb. 6:11, 12) Mang boch e tow’ath nra yog ngodad ni faan gad ra athamgil ni ngaud leked Jesus u fithik’ e pasig ni gubin ngiyal’? Gad ra adag ni ngad rin’ed e n’en nib m’agan’ Got ngay me yog ni ngad rin’ed boch e maruwel u lan e ulung. (Ps. 40:8; mu beeg e 1 Thessalonika 4:1.) Arrogon, faan gad ra lek Kristus ni gad ba pasig, ma aram e ra gapas lanin’dad, me fel’ e yafas rodad u wan’dad, ma gad fel’ u wan’ Got, me yog e athap ko yafas ni manemus ngodad.​—1 Tim. 4:10.

Ka Ga Manang?

• Mang reb e maruwel nib ga’ fan ni kan pi ngodad, ma susun ni uw rogon ni ngad sapgad ngay?

• Mang e thingar da kol ayuwgad riy, ma mang fan?

• Mang e ngad fal’eged i yaliy u rarogodad?

• Mang e ra ayuwegdad ni ngaud leked Kristus ni gubin ngiyal’?

[Study Questions]

[Picture on page 31]

Mang e Ra Ayuwegem ni Ngam Ulul Ngaum Lek Kristus?

▪ Mu beeg e Thin Rok Got ni gubin e rran, mu um fal’eg i lemnag.​—Ps. 1:1-3; 1 Tim. 4:15.

▪ Mu yibilay gelngin Got nib thothup ni nge ayuwegem me pow’iyem.​—Zek. 4:6; Luke 11:9, 13.

▪ Mu chag ngak e piin ni yad ba pasig ko machib.​—Prov. 13:20; Heb. 10:24, 25.

▪ Nge tamilangan’um u rarogon e ngiyal’ ney ni gad be par riy.​—Efe. 5:15, 16.

▪ Ngaum lemnag wenegan nra yib ni faan ga ra ‘dabuy’ ni ngam rin’ e n’en nib milfan ngom.​—Luke 9:59-62.

▪ Gubin e rran ni ngaum lemnag e n’en ni kam micheg ngak Jehovah ni ngam rin’ nge tow’ath nra yog ngom ni faan ga ra pigpig ngak ma ga lek Kristus u polo’ i gum’irchaem.​—Ps. 116:12-14; 133:3; Prov. 10:22.