Piin Fel’ Yangaren, Mu Adaged ni Ngam Pigpiggad ngak Jehovah

“Mu lemnag e en ni sunumiyem ko ngiyal’ ni ka gab pagel.”​—EKL. 12:1.

1. Mang e ka nog ngak e piin bitir nu Israel ni ngar rin’ed?

 SOGONAP’AN 3,500 e duw kafram me tay Moses ni profet rok Jehovah chilen ngak e pi prist nge piin piilal nu Israel ni gaar: “Mu ulunguy urngin e pumoon, nge ppin, nge bitir . . . , ya nge gubin e girdi’ me rung’ag ngar filed rogon ni nguur pired ma bay madgun Somol ni Got romed u wun’rad ma yad be fol ko tin ni ke yog u fithik’ e yul’yul’.” (Deut. 31:12) Ere ka nog ni nge muulung e pumoon, nge ppin, nge bitir nga taabang ni ngar liyorgad ngak Jehovah. Ere mus ko piin bitir mu ku nog ngorad ni ngar motoyilgad, mar nanged fan, mi yad fol ko thin rok Jehovah.

2. Uw rogon ni dag Jehovah ni i lemnag e piin fel’ yangaren u lan e ulung ni Kristiano kakrom?

² Nap’an e bin som’on e chibog mi ki dag Jehovah ni be lemnag e piin fel’ yangaren. Bod ni thagthagnag nga laniyan’ apostal Paul ni nge yoloy nga babyor boch e thin nge pi’ ko ulung ni nge ayuweg e piin fel’ yangaren. (Mu beeg e Efesus 6:1; Kolose 3:20.) Piin Kristiano nib fel’ yangarrad nra folgad ko re fonow ney e ra mon’oggad ko tirok Got ban’en me fel’ e tha’ u thilrad ma boor e flaab ni yog ngorad ko tirok Got ban’en.

3. Uw rogon ni nge dag e piin fel’ yangaren e ngiyal’ ney ni yad baadag ni ngar pigpiggad ku Got?

³ Ku yibe pining e piin fel’ yangaren e ngiyal’ ney ni ngar uned ko muulung mar liyorgad ngak Jehovah, fa? Arrogon! Ba felfelan’ e girdi’ rok Got e ngiyal’ ney ni yad be guy boor e fel’ yangaren u ga’ngin yang e fayleng ni yad be fol ko fare thin ni yog Paul ni gaar: “Nge bagadad ma ngi i lemnag bagadad, ma nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak. Ma ngad guyed rogon ndab da paged e muulung rodad, ni bod rogon ni be rin’ boch e girdi’. Ma nge bagadad me pi’ e athamgil nga laniyan’ bagadad, ngari gel ni fan e gimed be guy ni Chirofen ni bay yib Somol riy e be chugur.” (Heb. 10:24, 25) Ku yad be un ko gallabthir rorad i machibnag fare thin nib fel’ ni murung’agen Gil’ilungun Got. (Matt. 24:14) Ma bokum biyu’ i yad e ma un ko taufe u gubin e duw ni bochan e ba t’uf Jehovah rorad ma kar felfelan’gad ni kar manged boch i gachalpen Kristus.​—Matt. 16:24; Mark 10:29, 30.

Ngam Pigpiggad Ngak Jehovah e Chiney

4. Mingiyal’ e rayog ni nge pigpig e piin fel’ yangaren ngak Got?

⁴ Be gaar e Eklesiastes 12:1: “Mu lemnag e en ni sunumiyem ko ngiyal’ ni ka gab pagel.” In duw romed e piin fel’ yangaren ma aram e fin rayog ni ngam pigpiggad ngak Jehovah? Der yog e Bible ko in e duw rok be’ mfin nrayog ni nge pigpig ngak Jehovah. Ere dab mu lemnaged ni kaygi gel e bitir romed ni ngam liyorgad ngak Jehovah mi gimed pigpig ngak. Demtrug ko uw yangarmed ma yibe pi’ e athamgil nga lanin’med ni nge dab mu sagaalgad ni ngam rin’ed e re n’ey.

5. Uw rogon ni nge ayuweg e gallabthir pi fakrad ngar mon’oggad ko tirok Got ban’en?

⁵ Boor i gimed ni gallabthir rok e ke ayuweg ke mon’og ko tirok Got ban’en ni bod rogon Timothy. Nap’an ni kab bitir me fil e chitiningin nge titaw rok e thin nu Bible ngak. (2 Tim. 3:14, 15) Ere ku taareb rogon ko gallabthir romed ni yad be fil e Bible ngomed, ma  gimed ma meybil u taabang, ma gimed ma yan ko muulung nge machib u taabang. Riyul’ nreb e maruwel ni ke pi’ Jehovah ko gallabthir romed e ngar filed ngomed e thin rok. Ere gimed ma felfelan’ ni ma t’ufegmed e gallabthir romed ma yad ma ayuwegmed, fa?

6. (a) Uw rogon e liyor nib m’agan’ Jehovah ngay ni bay ko Psalm 110:3? (b) Mang e gad ra fil e chiney?

⁶ Nap’an ni gimed ra ilal ma baadag Jehovah ‘ni ngam nanged e tin nib m’agan’ ngay ni tin nib fel’, nib fel’ u wan’ ma rib yal’uw’ ni bod rogon Timothy. (Rom. 12:2) Faan gimed ra rin’ ni aray rogon ma aram e rayog ni ngam uned ko pi n’en yibe rin’ u lan e ulung ni bochan e gimed baadag ni ngam rin’ed e tin nib m’agan’ Got ngay. Ma faan gimed ra pigpig ngak Jehovah nib m’agan’med ngay ma ra felfelan’. (Ps. 110:3) Uw rogon ni ngam daged ni gimed baadag ni ngam motoyilgad ngak Jehovah mi gimed fol ko thin rok? Gad ra weliy dalip ban’en nib ga’ fan nrayog ni ngam rin’ed ni aram e, fol Bible, nge meybil, nge ngongol romed. Ere ngad weliyed e bin som’on.

Nge Riyul’ Jehovah u Wan’med

7. (a) Uw rogon ni ke dag Jesus e kanawo’ ni ngan folwok riy u rogon ni i motoyil ko thin nu Bible? (b) Mang e ayuweg Jesus ni nge rin’ e re n’em?

⁷ Bin som’on e kanawo’ nrayog ni ngam daged ni gimed baadag ni ngam pigpiggad ku Jehovah e aram e ngaum beeged e Bible ni gubin e rran. Rayog ni ngam felfelan’gad ni ke yoor ban’en ni kam nanged ni faanra um beeged e Bible ni gubin ngiyal’. (Matt. 5:3) Ke dag Jesus e kanawo’ nrayog ni ngan folwok riy. Nap’an ni ke gaman 12 e duw rok me pirieg e gallabthir rok ni bay u tempel “ni kar pired e pi tamachib nu Israel nga but’, be motoyil ngorad ma be fithrad.” (Luke 2:44-46) Kab bitir Jesus me adag ni nga i fil e thin nu Bible nge nang fan. Mang e ke ayuweg ni nge rin’ e re n’ey? Ba gel e ayuw ni pi’ e gallabthir rok ngak. Yow l’agruw ni yow ma pigpig ngak Got, mar filew e thin rok Got ngak Jesus u nap’an ni kab madway.​—Matt. 1:18-20; Luke 2:41, 51.

8. (a) Mingiyal’ e nge tabab e gallabthir ni ngar filew e thin rok Got ko bitir rorow? (b) Mu weliy e n’en ni ke rin’ reb e matin ni be micheg nib ga’ fan ni ngan fil e thin rok Got ko bitir ni kab madway.

⁸ Ireray e n’en ni ma rin’ e gallabthir ni bay madgun Got u wan’rad ko bitir rorad e chiney. Yad be guy rogon ni ngar filed e thin rok Got ngorad. (Deut. 6:6-9) Aray e n’en ni rin’ Rubi nreb e walag nib pin u tomuren ni ke gargelnag bochi pagel ni Josef fithingan. Gubin e rran ni ma beeg fare babyor ni Babyor Rog Ni Chep Nu Bible ngak. Ma nap’an ni be ilal me ayuweg ni nge mit boch e thin nu Bible ngak. Ere, ke yib angin e skul ni tay ngak Josef, fa? Nap’an ni ke nang e thin ma rayog ni nge weliy boor e chep nu Bible ko thin rok. Ma nap’an ni gaman lal e duw rok, me pi’ e bin som’on e welthin rok ko Theocratic Ministry Skul.

9. Mang nib ga’ fan ni ngaum beeged e Bible ma gimed be fal’eg i lemnag e thin riy?

⁹ Gimed e piin fel’ yangaren e faanra ngam mon’oggad ko tirok Got ban’en ma thingar mu mechameged ngomed ni ngaum beeged e Bible ni gubin e rran e chiney ni kab fel’ yangarmed nge mada’ ko ngiyal’ ni kam piilalgad. (Ps. 71:17) Mang fan nrayog ni nge ayuwegmed e beeg Bible ni gimed ma tay ngam mon’oggad? Mu ted fanmed i yan ko n’en ni yog Jesus ngak e Chitamangin ko meybil rok ni gaar: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got.” (John 17:3) Faanra yoor ban’en nim nanged u murung’agen Jehovah, ma aram e rayog ni nge riyul’ Jehovah u wan’med me t’uf romed. (Heb. 11:27) Ere, nap’an ni gimed be beeg e Bible ma ngam gayed rogon ni nge yoor ban’en nim filed u murung’agen Jehovah. Nge bigimed me fith ir ni nge gaar: ‘Mang e be yog e re thin ney ngog u murung’agen Jehovah? Uw rogon ni be tamilangnag e re thin ney feni ri gub t’uf rok Got ma ma lemnageg?’ Faan gimed ra fal’eg i lemnag e pi deer ney ma ra ayuwegmed ni ngam nanged rogon laniyan’ Jehovah nge n’en ni baadag ni ngam rin’ed.  (Mu beeg e Proverbs 2:1-5.) Rayog ni nge ‘mich u wan’med’ e n’en ni kam filed u Bible me ayuwegmed ni ngam pigpiggad ngak Jehovah nib m’agan’med ngay ni bod rogon Timothy.​—2 Tim. 3:14.

Rogon Nra Ayuwegmed e Meybil Ngari T’uf Jehovah Romed

10, 11. Uw rogon nra ayuwegmed e meybil ngam adaged ni ngam pigpiggad ku Got?

¹⁰ Bin l’agruw e kanawo’ ni gimed ra adag ni ngam pigpiggad riy ngak Jehovah e ngam meybilgad ngak. Psalm 65:2, NW, e be gaar: “Bochan ni ga ma rung’ag e meybil, ma urngin e girdi’ e ngar bad ngom.” Mus ko ngiyal’ ni baaram ni ka bay e m’ag u thilin Got nge piyu Israel, ma girdi’ ko pi nam nib orel ni kar bad nga tempel rok Jehovah e rayog ni ngar meybilgad ngak. (1 Ki. 8:41, 42) Got e de laniyan’. Piin ni yad ma fol ko pi motochiyel rok e ba mich u wan’rad nra motoyil ko meybil rorad. (Prov. 15:8) Re thin ney e fan ngak “urngin e girdi’” ni gimed ba muun e fel’ yangaren ngay.

¹¹ Ra nge fel’ e tha’ u thilin l’agruw e fager ma ngaur sabethingow. Dabisiy ni gimed baadag ni ngam weliyed lanin’med ngak be’ nrib fel’ e thin romed. Ere, ku arrogon ni faanra um meybilgad ngak Jehovah u polo’ i gum’ircha’med ma aram e gimed be weliy lanin’med ngak. (Fil. 4:6, 7) Mu nonad ngak Jehovah ni bod rogon ni gimed ma non ngak e gallabthir romed ara fager romed nrib fel’ thilmed. Bin riyul’ riy e bay rogon e meybil romed nga rogon Jehovah u wan’med. Faanra gel e tha’ u thilmed Jehovah, ma aram e gimed ra nang ni ke fel’ e meybil romed.

12. (a) Mang fan ni gathi kemus ni thin e ra yibnag angin e meybil? (b) Mang e ra ayuwegmed ngam nanged nib chugur Jehovah ngomed?

¹² Dab mu paged talin ni faanra nge fel’ e meybil romed ma gathi kemus ni ngam nonad, ya kub muun e tin ni bay u lanin’med ngay. Mogned ngak Jehovah nib t’uf romed, ma gimed be tayfan, ma be pagan’med ngak. Gimed ra nang rogon ni ke fulweg Jehovah taban e meybil romed, ma aram e gimed ra nang ni Jehovah e “ba chugur ngak urngin e piin ni yad ma non ngak.” (Ps. 145:18) Arrogon, ra chugur Jehovah ngomed, me pi’ gelngimed ni ngam togopuluwgad ngak Moonyan’ mi gimed dugliy e n’en nib fel’ ni ngam rin’ed ko yafas romed.​—Mu beeg e James 4:7, 8.

13. (a) Uw rogon ni ngan fager ngak Got e ke ayuweg reb e walag nib pin? (b) Uw rogon ni be ayuwegmed e tha’ u thilmed Got ni ngam gelgad ko pi n’en ni yibe towasariymed ngay?

¹³ Am lemnaged e n’en ni rin’ Cherie ni bochan e ba fel’ e tha’ u thilrow Jehovah. Boor e award ni un pi’ ngak u skul ni bochan e ba llowan’ maku ba cheg ko gosgos. Ma nap’an ni chuw u skul min ognag ba guruy e salpiy ngak nrayog ni nge yan nga reb e skul nib tolang. I gaar, “Gu baadag e re n’em ni kan ognag ngog, miki towasariyeg e piin ni ur filed e gosgos ngog nge piin ni gamad nga skul ni nggu fek.” Machane, ke nang ni faanra un ko skul nib tolang ma ra lich e tayim rok ni fan ko pigpig ngak Jehovah ni bochan e thingari tiyan’ ko skul nge gosgos. Ere mang e rin’ Cherie? I gaar,  “Tomuren ni kug meybil ngak Jehovah, ma aram mu gu siyeg fare guruy i salpiy mu gu turguy ni nggu un ko pioneer.” Chiney e ke gaman lal e duw ni ke pioneer Cherie. I gaar, “Dariy ban’en ni kug kal riy ngan’ug. Gu be felfelan’ ni bochan e gu manang ni kug rin’ e n’en nib m’agan’ Jehovah ngay. Riyul’ ni faan ga ra mon’eg e tirok Got ban’en, ma ra pi’ e tin nib t’uf rom.”​—Matt. 6:33.

Ngongol Romed nib Fel’ e Ra Dag nib ‘Machalbog e Lem Romed’

14. Mang fan ni ngongol romed nib fel’ e ba ga’ fan u wan’ Jehovah?

¹⁴ Bin dalip e kanawo’ nrayog ni ngam daged ni gimed be pigpig ngak Jehovah nib m’agan’med ngay e aram e ngongol romed. Ma tow’athnag Jehovah e piin fel’ yangaren nib beech e ngongol rorad. (Mu beeg e Psalm 24:3-5.) Nap’an ni kab bitir Samuel ma de folwok ko ngongol nib kireb ni i rin’ fagali pagel ni fak Eli ni ir e Ba Ga’ ko Prist. Ngongol rok Samuel nib fel’ e de par nib mith, ya be gaar e Bible: “Mi i ilal fare pagel i Samuel ni be’ nib fel’ u wan’ Somol ngu wan’ e girdi’.”​—1 Sam. 2:26.

15. Mang boch i fan ni gimed be par nib fel’ e ngongol romed?

¹⁵ Gad be par u ba ngiyal’ nra be’ ma goo ir e be lemnag ir, ma ke gel e tolangan’, ma dakunir fol ko gallabthir, ma dakunir pining e magar ngak be’, ma dakuriy e yul’yul’, ma ke gel e damumuw nge ufanthin, ma ke t’uf e fafel ma ke tomur Got u wan’uy. Ireray boch fapi ngongol ni weliy Paul murung’agen. (2 Tim. 3:1-5) Ere aram fan nrib mo’maw’ ni ngad pared nib fel’ e ngongol rodad ya ke liyegdad e kireb. Machane, gubin yay ni gimed ra rin’ e tin nib fel’ mi gimed siyeg e ngongol nib kireb, ma aram e gimed be micheg ni gimed ba muun nga ba’ rok Jehovah. (Job 2:3, 4) Ki gimed ra felfelan’ ni faan gimed ra fol ko fare thin ni yog Jehovah ni gaar: “Fakag, mu gonop, ma gu ra felfelan’; ya bay e fulweg ni gu ra yog ko en be gathibthibnageg.” (Prov. 27:11, BT) Maku reb e faan gimed ra nang ni gimed be rin’ e tin nib m’agan’ Jehovah ngay ma aram e rayog ni ngam adaged ni ngam pigpiggad ngak.

16. Uw rogon ni ke felfelan’nag reb e walag nib pin Jehovah?

¹⁶ Carol nreb e walag nib pin e ba fel’ e ngongol rok u nap’an ni i un nga skul ni bochan e ma fol ko pi kenggin e motochiyel nu Bible. Ere mang e buch? Piin ni yad nga skul e yad ma moningnag ni bochan e der ma un ko pi madnom ko fayleng ni yima tay u skul. Ra taw nga reb e pi madnom nem ma aram e ngiyal’ ni ma weliy e tin ni ke michan’ ngay. Boor e duw nga tomuren ni ke chuw u skul, me pi’ be’ ni yow nga skul bangi babyor ngak ni baaray e thin riy: “Ke n’uw nap’an ni gu ma athapeg ni ngad nonow nggu pining e magar ngom. Ngongol rom nib fel’, nge rogon ni um par ni gab yul’yul’ ko michan’ rom nda um un ko pi madnom ko fayleng e de par nib mith. Gur e bin som’on e Pi Mich Rok Jehovah ni kug mada’nag.” Ngongol rok Carol nib fel’ e thilyeg e lem ko fare pin ni yow nga skul ma aram me adag ni nge fil e Bible. I yog u lan e gi babyor rok nem ni ke pag 40 e duw ni ke un ko taufe! Ere, gimed e piin fel’ yangaren ni gimed ma fol ko pi kenggin e motochiyel nu Bible e ku rayog ni ngam pingeged laniyan’ boch e girdi’ ngar adaged e tin riyul’ ni bod e n’en ni rin’ Carol.

 Piin Fel’ Yangaren ni Yad Be N’uf Jehovah

17, 18. (a) Uw rogon u wan’um e piin fel’ yangaren u lan e ulung rom? (b) Mang e bay nga m’on ni fan ngak e piin fel’ yangaren ni bay madgun Got u wan’rad?

¹⁷ Gad gubin u lan e ulung rok Jehovah u ga’ngin yang e fayleng e gad be felfelan’ ni gad be guy bokum biyu’ e fel’ yangaren ni yad ba pasig ni yad be un ko bin riyul’ e liyor! Pi fel’ yangaren ney e kar adaged ni ngar pigpiggad ngak Jehovah ni bochan e yad ma beeg e Bible rorad ni gubin e rran, ma yad ma meybil, ma ba puluw e ngongol rorad ko tin nib m’agan’ Got ngay. Pi fel’ yangaren ney e ri yad be felfelan’nag e gallabthir rorad nge urngin e girdi’ rok Jehovah.​—Prov. 23:24, 25.

¹⁸ Ra boch nga m’on ma pi fel’ yangaren ni yad ba yul’yul’ e yad ra moy u fithik’ e piin ni yad ra un nga lan e bin nib beech e m’ag ni ke micheg Got. (Rev. 7:9, 14) Mu rom e ra yog e flaab riy ngorad ni boor, mi yad tayfan Jehovah mar pininged e sorok ngak ndariy n’umngin nap’an.​—Ps. 148:12, 13.

Rayog ni Ngam Weliy?

• Uw rogon ni ngam uned e piin fel’ yangaren ko bin riyul’ e liyor e ngiyal’ ney?

• Faanra nge yib angin e beeg Bible ni ga ma tay, ma mang nib ga’ fan ni ngaum fal’eg i lemnag e thin riy?

• Uw rogon nra ayuwegem e meybil ni ngam chugur ngak Jehovah?

• Mang angin e ngongol nib fel’ ni ke rin’ reb e Kristiano?

[Study Questions]

[Picture on page 17]

Kam mechameg ngom ni ngaum beeg e Bible rom ni gubin e rran, fa?