Piin Pumoon, Gimed Ma Tay ni Jesus e Ir Lolugmed?

“Kristus e ir e lolugen urngin e pumoon.”​—1 KOR. 11:3.

1. Mang e be dag ni Jehovah e ir ba Got nib yaram?

 BE GAAR e Revelation 4:11: “Somol romad ma Got romad! Ba’ rogom ni nga nog e sorok ngom, min ta’ fam, ma ba’ rogom ni nge mil suwon urngin ban’en ngom. Yi gur e mu sunumiy urngin ban’en, yi gur e mu lemnag mi yad sum ni yad ba fos.” Ere bochan ni Jehovah e ke sunmiy urngin ban’en u lan e lang ngu fayleng ma aram fan ni bay rogon ni nge gagiyegnag urngin ban’en. Rayog ni ngan guy ni Jehovah e ir ba ‘Got ni ba yaram ma ba gapas,’ u rogon ni ke yarmiy e pi engel ke tay.​—1 Kor. 14:33; Isa. 6:1-3; Heb. 12:22, 23.

2, 3. (a) Mini’ e sunmiy Jehovah ko som’on? (b) Mang e liw ko bin nganni’ i Fak Got ni be dag ni be tayfan e Chitamangin?

² Immoy Got u m’on ni sunmiy urngin ban’en. Bin th’abi som’on e n’en ni sunmiy Got e aram reb e engel ni ka nog “fare Thin” ngak ni bochan e ir e Mitethin rok Jehovah. Fare Thin e ir e kan sunmiy urngin ban’en u pa’. Ma boch nga tomuren, me yib nga fayleng nib girdi’ nib flont mi nog Jesus Kristus ngak.​—Mu beeg e John 1:1-3, 14.

³ Mang e be yog e Bible u murung’agen e liw rok Got nge bin nganni’ i Fak? Rogon ni yog apostal Paul e gaar: “Gub adag ni ngam nanged fan ni Kristus e ir e lolugen urngin e pumoon, ma pumoon e ir lolugen leengin, mi Got e lolugen Kristus.” (1 Kor. 11:3) Ere Kristus e ma fol ko Chitamangin. Rayog ni nge aw e gapas me yaram e girdi’ nge engel ni faan yad ra fol ko en lolugrad. Mus ngak Jesus ni ‘pa’ e sunumeg Got urngin ban’en ngay’ e kub t’uf ni nge tay ni Got e ir lolugen.​—Kol. 1:16.

4, 5. Uw rogon u wan’ Jesus e liw rok ni be dag ni be tayfan e Chitamangin?

⁴ Uw rogon u wan’ Jesus ni nge tayfan Jehovah ni ir lolugen nge yib nga fayleng? Be gaar e Bible: “Gubin ngiyal’ ni immoy rok rarogon Got, machane de guy rogon ni nge gelnag ir nge yan i par nib taareb rogon ngak Got. Ya ir e lem rok me pag e flaab rok ni gubin, nge yib i ngal’ nib tapigpig. Mi ni gargeleg ni bod e girdi’, me m’ug ni bod rogon e girdi’; mi i par nib sobut’an’ ma be fol rok Got nge yan i mada’ ko ngiyal’ ni yim’.”​—Fil. 2:5-8.

⁵ Gubin ngiyal’ ni i par Jesus nib sobut’an’ ni i fol ko tin nib m’agan’ e Chitamangin ngay. Ke gaar: “Dariy ban’en ni gu ra rin’ ni gag e lem rog; gu ma pufthinnag e girdi’ ni bod rogon ni ke yog Got ngog, ere tin ni gu be turguy e mmat’aw, ya gathi tin ni gub adag e ir e gu be guy rogon ni nggu rin’, ya ke mus ni tin ni ba adag e en ni l’ugeg ku gub.” (John 5:30) Miki gaar: “Gubin ngiyal’ ma gu be rin’ e tin nib m’agan’ [e Chitamag] ngay.” (John 8:29) Nap’an ni ke chugur ni nge mus e yafas rok u fayleng, me meybil ngak e Chitamangin ni gaar: “Kug gilnag buguwam u fayleng; ma kug mu’nag e maruwel ni mpi’ ngog ni nggu rin’.” (John 17:4) Ere gubin ngiyal’ ni i tay Jesus ni Jehovah e ir lolugen.

Rogon ni i Tayfan e Chitamangin e Yib Angin Ngak

6. Mang boch e pi fel’ngin nib fel’ ni dag Jesus?

⁶ Boor fel’ngin Jesus nib fel’ ni i dag u nap’an ni immoy u fayleng. T’ufeg e aram reb e pi fel’ngin nem ni i dag ngak e Chitamangin. Ke gaar: “Thingar ra nanged nib t’uf rog e en ni Chitamangiy.” (John 14:31) Ma ki dag e t’ufeg  ngak e girdi’. (Mu beeg e Matthew 22:35-40.) Ba gol, ma ma lemnag e girdi’, ma de gel e thin rok. Ke yog ni gaar: “Mired ngog, ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed. Mfeked e mat’ rog ngam tiyed nga pomed, mi gimed folwok rog, ya gub munguy ma gub sobut’an’; mi gimed pirieg e toffan. Ya re mat’ ni gu ra pi’ ngomed e mmom, ma tomalngin e re n’en ni gu ra tay nga pomed e bbaud.” (Matt. 11:28-30) Girdi’ ni yad ba sobut’an’ ni demtrug yangarrad ma ke gafgow lanin’rad e kar pirieged e felfelan’ ko n’en ni i rin’ nge thin ni i yog ngorad.

7, 8. (a) Rogon ko motochiyel, uw rogon be’ nib pin ni ke molul? (b) Uw rogon e ngongol rok Jesus ngak fare pin ni ke molul?

⁷ Am lemnag rogon e ngongol rok Jesus ngak e piin nib pin. Kab kakrom i yib ma boor e pumoon ni yad ma gafgownag e ppin. Ireray e n’en ni i rin’ e pi tayugang’ ko teliw nu Israel. Machane Jesus e i tayfan ma i ayuweg e piin nib pin. Ke ayuweg be’ nib pin ni ke gaman 12 e duw nib m’ar ni molul. Rib “gel e gafgow ni be tay” ma ke yoor e togta ni be yan ngorad ma der gol, ya “fini aram e be ubchiya’.” Rogon ko Motochiyel e ir be’ nib taay, ma en ra math ngak e ku ra taay.​—Lev. 15:19, 25.

⁸ Nap’an ni rung’ag e re ppin nem ni be golnag Jesus e m’ar, ma aram me yan i maathuk nga fithik’ e girdi’ nib liyeg Jesus, me gaar u wan’: “Yugu ra gu math ko mad rok, ma ke mutrug ni ngug gol.” Me math ko mad rok Jesus ma ka chingiyal’ nem me gol. Manang Jesus nthingar dabi math e re ppin nem ko mad rok, machane de puwan’ ngak, ya ke  ayuweg. Manang gelngin e gafgow ni ke tay e re ppin nem ni boor e duw ma manang nrib t’uf ni ngan ayuweg ko m’ar rok. Ma aram me gaar ngak: “Fakag, michan’ rom ngak Got e ke golnigem. Mman ni ke pagan’um, ya kam gol ko m’ar rom.”​—Mark 5:25-34.

9. Nap’an ni guy pi gachalpen Jesus rogon ni ngar taleged fapi bitir, ma mang e yog Jesus ngorad?

⁹ Mus ko piin ni bitir ma kur felfelan’gad u nap’an ni ur moyed rok Jesus. Nap’an ni fek e girdi’ e bitir rorad i yan ngak Jesus, me puwan’ pi gachalpen ya yad be lemnag ni yad be magawonnag. Machane, gathi ireram e n’en ni be lemnag Jesus. Be gaar e Bible: “Ma faani nang Jesus ni aram rogon me ri dabuy, me yog ngak pi gachalpen ni gaar, ‘Mpaged e pi bitir nir ngar bad ngog! Dab mu taleged yad, ya gagiyeg rok Got e fan ngak e piin ni bod e pi bitir ney.’” Ma aram me kunuy “fapi bitir ngak me tay pa’ nga dakenrad, ni aram e ke yibilayrad.” Ere baadag Jesus ni nge ayuweg fapi bitir.​—Mark 10:13-16.

10. Uw rogon ni ke yog fel’ngin Got ngak Jesus?

¹⁰ Uw rogon ni yog e pi fel’ngin nem ngak Jesus ni i dag ngak e girdi’? Nap’an ni immoy u tharmiy, ma ba n’uw nap’an ni i guy rogon ni i maruwel e Chitamangin ma i fol rok. (Mu beeg e Proverbs 8:22, 23, 30.) Ke guy me fol u rogon e t’ufeg ni immoy rok Jehovah u rogon ni i gagiyegnag gubin ban’en ni Ke sunmiy. Ere faan gomanga de fol Jesus rok Got ma dariy e t’ufeg rok. Ere ba felfelan’ ni i fol ko Chitamangin, ma ba gel e felfelan’ ni ke tay Jehovah ni bochan e be fol Fak rok. Nap’an ni immoy Jesus u fayleng, ma ke dag e pi fel’ngin nib fel’ ni bay ko Chitamangin. Rra fel’ rogodad ni faan gad ra fol rok Kristus ni aram e en ni ke tay Got ni nge Gagiyeg u Gil’ilungun u tharmiy!

Ngad Daged Pi Fel’ngin Kristus

11. (a) Mini’ e ngad guyed rogon ni ngad folwokgad rok? (b) Mang fan nib ga’ ni piin pumoon u lan e ulung e ngar guyed rogon ni ngar folwokgad rok Jesus?

¹¹ Ba ga’ ni piin pumoon u lan e ulung ni Kristiano e thingar ra athamgilgad ngar daged pi fel’ngin Kristus. Bod ni ke yog e Bible ni ke gaar: “Kristus e ir e lolugen urngin e pumoon.” Bod rogon ni i folwok Kristus ko en Lolugen ni aram Got, e ku aram rogon ni nga i fol e piin pumoon ni Kristiano ko en lolugrad ni aram Kristus. Aram e n’en ni rin’ apostal Paul u nap’an ni yib i mang reb e Kristiano. Ke gaar: “Um folwokgad rog, ni bod rogon ni gu be folwok rok Kristus.” (1 Kor. 11:1) Miki gaar apostal Peter: “Ereray e re n’en ni ir e ke piningmed Got ngay; yi Kristus e ir e gafgow ni bochmed me dag ngomed rogon ni ngam folwokgad rok, ni aram e nguum leked luwan ay.” (1 Pet. 2:21) Re thin ney ni ngan folwok rok Kristus e ku bay reb i fan ngak e piin pumoon ya yad e yad ma mang piilal nge ministerial servant. Ere bod rogon ni ke felfelan’ Jesus ni bochan e i fol rok Jehovah, maku aram rogon e piin pumoon ni yad ra pirieg e felfelan’ ni faan yad ra folwok rok Kristus mi yad dag pi fel’ngin.

12, 13. Uw rogon ni nge ayuweg e piin piilal e girdi’ u lan e ulung?

¹² Ba milfan ngak e piin piilal u lan e ulung ni ngar filed rogon ni ngar boded Kristus. Ke yog Peter ngak e piin piilal ni gaar: “Nguum gafaliyed fare ran’ i saf ni Got e ke pi’ ngomed, nguum gafaliyed yad nib m’agan’med ngay nrogon nib m’agan’ Got ngay ni ngam rin’ed, ma gathi nguum rin’ed nde m’agan’med ngay. Mu ngongliyed e maruwel romed ni gathi ke mus ni bochan e salpiy ni yibe pi’ riy ngomed, machane ngam ngongliyed ni fan e ri gimed ba adag ni ngam pigpiggad ngak Got. Dab mu guyed rogon ni ngam suweyed e piin ni kan pi’rad ngomed ni ngam gafaliyed yad, machane ngam pired nib fel’ pangimed ya nguur folwokgad romed.” (1 Pet. 5:1-3) Piin piilal e gathi ngar tolanggad, fa nge ga’ lungurad, fa nge gel e thin rorad. Ya ngar folgad rok Kristus ma ngar guyed rogon ni ngar daged e t’ufeg, ma ra lemnaged e ulung, me sobut’an’rad, mar sumunguygad u rogon ni yad be ayuweg e ulung.

¹³ Piin pumoon ni yad ma yog e thin u lan e ulung e thingar ra nanged ndar flontgad.  (Rom. 3:23) Ere thingar ra athamgilgad ngar filed murung’agen Jesus mi yad dag e t’ufeg ni i dag. Ngar fal’eged i lemnag rogon e ngongol rok Got nge Jesus ngak e girdi’ mar guyed rogon ngar folwokgad rorow. I gaar Peter: “Gimed gubin nthingar mon’ed madan e sobut’ laniyan’ nge bigimed me pigpig ngak bigimed; ya babyor nib thothup e be gaar, ‘I Got e ma togopluw ngak e piin nib tolangan’rad, ma ma ayuweg e piin nib sobut’an’rad.’”​—1 Pet. 5:5.

14. Mang boch ban’en nthingari rin’ e piin piilal ni ngar daged ni yad be tayfan e girdi’ u lan e ulung?

¹⁴ Ra nge ayuweg e piin ni kan dugliyrad e ulung rok Got ma thingari m’ug fel’ngin Got rorad. Be gaar e Roma 12:10: “Nge bigimed me t’uf bigimed rok nrogon e walag ni girdien Kristus, ma nge pasigan’med ngay ni nge bigimed mi i ta’ fan bigimed.” Piin piilal nge ministerial servant e ngar ted fan boch e girdi’. Nge taareb rogorad ko girdi’ u lan e ulung ma ‘dabi suk’ ngan’rad ni ngar muruweliyed ban’en ni yad e ngar m’onod riy ni fan e nga nog ni yad e sororad, ara bochan e nge yib ufan ngorad; machane nge bagayad me sobut’nagan’, ma dabi finey bagayad ni ir e ba sorok ngak e tin ni ka bay e girdi’.’ (Fil. 2:3) Piin piilal u lan e ulung e ngar ted fan e tin ka bay e girdi’. Faan yad ra rin’ ni aray rogon ma aram e yad be fol ko thin rok Paul ni gaar: “Gadad e piin nib gel e michan’ rodad ngak Somol e susun e ngad ayuweged e piin ni yad mmeewar ngad uned i fek gilbarad. Ma gathi gadad e nga darod nga lanin’dad. Machane nge bagadad me yan nga laniyan’ walagen ni girdien Kristus ni fan ngak faanem, ya nge ayuweg nge gel e michan’ rok ngak Somol. Yi Kristus e de yan nga laniyan’.”​—Rom. 15:1-3.

‘Ngan Tayfan e Piin Leengiy’

15. Uw rogon ni nge ayuweg e piin figirngiy e piin leengirad?

¹⁵ Am lemnag e thin rok Peter ngak e piin pumoon ni kar mabgolgad. Ke gaar: “Ma ku er rogomed e piin ni pumoon ni nguum pired e pi leengimed ma thingar um nanged ni yad mmeewar ko pumoon, ere thingar um tiyed farad.” (1 Pet. 3:7) Ra ngam tayfan be’ ma be yip’ fan ni nge m’on u wan’um. Ere thingar um man nga laniyan’, mag lemnag e tin nib t’uf rok nge tin ni baadag ni faanra dariy ban’en nra kirebnag. Aram rogon ni thingari ngongol e piin figirngiy ngak e piin leengirad.

16. Mang e Thin rok Got nra ayuweg e piin figirngiy ni ngar ted fan e piin leengirad?

¹⁶ Nap’an ni be yog ngak e piin figirngiy ni ngar ted fan pi leengirad, miki gaar Peter: “[Ya] nge dabi magawon ban’en ko meybil ni gimed be pi’ ngak Got.” (1 Pet. 3:7) Rib tamilang ni be dag e re thin ney feni rib ga’ fan u wan’ Jehovah rogon e ngongol rok e piin figirngiy ngak pi leengirad. Faanra dabi tay reb e pumoon fan e ppin rok ma ra yan i aw nib m’ay fan e meybil rok. Gathi ra felfelan’ e piin leengiy ni faanra i tay e piin figirngirad farad?

17. Uw rogon ni nge t’ufeg e piin figirngiy e piin leengirad?

¹⁷ Ki yog e Bible rogon ni nge t’ufeg be’ leengin ni gaar: “Pumoon e thingari t’uf rorad e piin nleengirad ni bod rogon nib t’uf dowrad rorad. . . . Ya dariy be’ ni kaa fanenikay e birok e dowef. Ya ma duruw’iy ma ma ayuweg, ni bod rogon e n’en ni ma rin’ Kristus ngak girdien e galesiya . . . urngin e pumoon e thingari t’uf rok leengin ni gowa ir.” (Efe. 5:28, 29, 33) Uw rogon ni nge t’ufeg e piin figirngiy e piin leengirad? Be gaar Paul: “Piin ni pumoon, ngari t’uf e piin nleengimed romed ni bod rogon feni t’uf girdien e galesiya rok Kristus me pi’ e pogofan rok ni fan ngorad.” (Efe. 5:25) Arrogon, piin pumoon e thingar ra paged fan e yafas rorad ni fan ngak e piin leengirad ni bod  rogon ni rin’ Kristus. Ere faanra i ayuweg e pumoon e ppin rok u fithik’ e sumunguy, tayfan, gol, nge t’ufeg ma aram e ra mom ko ppin rok ni nge tayfan ni ir lolugen.

18. Mang e ra ayuweg e piin figirngiy ni ngar rin’ed e n’en nib milfan ngorad u lan e mabgol rorad?

¹⁸ Ba mo’maw’ rok e piin figirngiy ni ngar ted fan e piin leengirad, fa? Danga’, ya dabiyog ni nge yog Jehovah ban’en ni ngan rin’ ni faanra manang ndabiyog. Maku reb e bay gelngin Got nib thothup nrayog ni nge ayuweg e pi tapigpig rok. Ke gaar Jesus: “Yugu ereyer fanmed kireb, ma gimed manang rogon ni ngam pied e tin nib fel’ ban’en ngak pi fakmed. Ere en ni Chitamangiy ni bay u tharmiy e ri ra pi’ [“gelngin nib thothup,” NW] ngak e piin ni yad ra ning ngak!” (Luke 11:13) Rayog ni nge yibilay e piin figirngiy gelngin Jehovah nib thothup ni nge ayuwegrad u rogon ni ngar ayuweged boch e girdi’ nib muun e piin leengirad ngay.​—Mu beeg e Acts 5:32.

19. Mang e gad ra fil ko bin migid e thin?

¹⁹ Piin pumoon e thingar ra athamgilgad nib gel ni ngar folgad rok Kristus ni ir lolugrad. Ere uw rogon e piin nib pin nge piin leengiy? Bin migid e thin e gad ra fil rogon ni ngaur ngongolgad nib puluw nga rogon ni ke yarmiy Jehovah.

Ka Ga Manang?

• Mang e pi fel’ngin Jesus nthingar da folwokgad riy?

• Uw rogon ni thingari ayuweg e piin piilal e ulung?

• Thingari uw rogon e ngongol rok e en figirngiy ngak leengin?

[Study Questions]

[Picture on page 16]

Ngad folwokgad rok Jesus ni aram e ngaud ted fan boch e girdi’