Thin rok Got e Bay u Bible, Fa?

“Urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoloyed nga babyor, me ir e ba ga’ fan ya ma fil e tin nib riyul’ e thin ngodad, ma be yal’uweg e tin ni be oloboch e girdi’ riy, ma be fulweg e girdi’ ko ngongol nib fel’, ma be fonownag e girdi’ u rogon e ngongol ni ngar pired riy ni ir e mmat’aw u mit Got, ya en ni be pigpig ngak Got e nge par ni ke bung rogon nrayog ni nge rin’ urngin mit e ngongol nib fel’.”​—2 TIMOTHY 3:16, 17.

BA MANGING’ e thin ni yog apostal Paul u murung’agen fel’ngin e thin nu Bible! Ba tamilang ni be sul be yan i weliy murung’agen e pi babyor ko Bible nib ga’ ni ma yog boch e girdi’ e Bin Kakrom e M’ag rok Got ngay. Machane thin ni yog e bay rogon ko fa 66 ken e Babyor u Bible ni kub muun ngay e tin ni yoloy pi gachalpen Jesus ko bin som’on e chibog C.E.

Rib ga’ fan e Bible u wan’um ni bod rogon Paul, fa? Ga be lemnag ma piin nra yoloyed e Bible e Got e thagthagnag nga lanin’rad? Aram e n’en nib mich u wan’ e pi Kristiano ko bin som’on e chibog keb i mada’ ko chiney. John Wycliffe nreb e ga’ ko teliw u England u nap’an e bin 14 e chibog e rogon ni i lemnag, e “thin nu Bible e gubin nib puluw.” I yog fare The New Bible Dictionary, ni fapi thin ni yog Paul aray nga lang e “ba riyul’ ni bochan e Got e thagthagnag.”

Ke Thil Rogon i Lemnag e Bible

Machane chiney e boor e girdi’ ni dakir pagan’ ko thin nu Bible. I yog reb e babyor ni gaar: “Sana gubin e Kristiano ni ma pagan’rad ko thin nu Bible ma yad ma pag ni nge gagiyegnag e ngongol nge michan’ rorad.” (The World’s Religions) Machane gathi riyul’ e re n’ey ya boor e  girdi’ e ngiyal’ ney e yad ma lemnag ni thin ni kan yoloy nga Bible e kemus ni be weliy murung’agen e “yalen nge llowan’ ko girdi’ ni dabiyog ni nge pagan’uy ngay.” Yugu aram rogon ni yad ma yog ni piin ra yoloyed e Bible e ba mich Got u wan’rad. Machane yad ma sap ngorad ni kemus ni yad be gay rogon ni ngar weliyed e thin rok Got nib riyul’, machane dariy e tamilangan’ rorad ni bod gadad.

Bin riyul’ riy e buchuuw e girdi’ e ngiyal’ ney ni yad ma pag e thin nu Bible ni nge gagiyegnag e lem nge ngongol rorad. Uw urngin yay ni kam rung’ag ni ke yog be’ ni pi motochiyel nu Bible ni murung’agen e ngongol e ke kakrom ma daki puluw ngodad e ngiyal’ ney? Boor e girdi’ ni yad ma warnag fan e pi motochiyel nge pi kenggin e motochiyel nu Bible fa reb e ra paged ndab ra folgad riy ni faanra ba mo’maw’ ngorad. Ma piin ni yad ma yog ni yad e Kristiano e darur folgad ko n’en ni be yog e Bible u murung’agen e ngongol ndarngal, nge ngam parew be’ ni gathi mabgol rom, nge sasalap, nge chingaw.​—1 Korinth 6:9, 10.

Mang fan ni aray rogon? U tabolngin e bin 20 e chibog me yog Sir Charles Marston u lan ba ken e babyor rok ni, “ba ga’ nib mom ni nge m’agan’ e girdi’ ko thin ni ma yog e pi ta yol e chiney” nib ga’ ni yad ma togopluw nga rogon feni riyul’ e thin nu Bible. (The Bible Is True) Kub riyul’ e re n’ey e ngiyal’ ney? Susun ni nge uw rogon u wan’um e thin nge lem ko girdi’ ni llowan’ ni yad ma darifannag e Bible? Baaray e n’en ni be yog e bin migid e thin u murung’agen e re n’ey.