Thingar Mu Yul’yul’ ni Gubin Ngiyal’, Fa?

GUBIN e girdi’ e der ma yul’yul’ ni gubin ngiyal’. In e girdi’ ni ga manang ni yad ma guy rogon ni ngar yul’yul’gad ni gubin ngiyal’?

Ngiyal’ ney e boor ban’en ndanir yul’yul’ ngay. Machane, gad manang rogon e yul’yul’ u wan’ Got. Bod rogon reb ko fa ragag i motochiyel ni gaar: “Dab mmoro’ro’.” (Exodus 20:15) Boor e girdi’ e ma lemnag nra taw nga ba ngiyal’ ma de kireb ni ngan moro’ro’ fa dab kun yul’yul’. Ere, ngad weliyed dalip e kanawo’ ni yima rin’ ni aram rogon.

Rayog ni Ngam Moro’ro’ ni Faanra Gab Gafgow, Fa?

Reb i girdien e am nu Roma e gaar: “Gafgow e ir lik’ingin e kireb.” Be’ nib gafgow e rayog ni nge lemnag nrayog ni nge moro’ro’. Maku ma lemnag e girdi’ nib fel’ e re n’em. Machane, uw rogon e re n’ey u wan’ Jesus? I “taganan’” ko piin ni ke t’uf ban’en rorad. (Matthew 9:36) Machane, dariy ba ngiyal’ ni yog nrayog ni nge moro’ro’ e piin gafgow. Ere, mang e thingari rin’ be’ nib gafgow?

Ma runguy Got e piin ni yad baadag ni ngar folgad rok, ma ra tow’athnag e piin ni yad be guy rogon ni nge yog e tin nib t’uf ngorad. (Psalm 37:25) Be micheg e Bible ni gaar: “I Somol e dabi pag e girdi’ nib manigil ngar m’ad ko bilig, machane ma taleg e piin kireb ndabiyog ngorad e pi n’en ni kar m’ad ni bochan.” (Proverbs 10:3, BT) Rayog ni nge pagan’ be’ nib gafgow ko re thin ney, fa? Ke mich e re thin ney u wan’ Victorine.

Victorine e dariy e pumoon rok ma bay lal e bitir rok ni yad ma un nga skul. Yad ma par u reb e nam ndawori mon’og e am riy, ere buchuuw e ayuw ni ma yib ngorad. Gubin ngiyal’ ni ma guy e girdi’ rogon ni ngar iringed ban’en. Machane, Victorine e ba thil ya ba yul’yul’ ma der ma guy rogon ni nge moro’ro’, ma ma athamgil ni nge pi’ boch ban’en nchuway’ u tooben e kanawo’. Mang fan ni ma par nib yul’yul’?

Ke gaar: “Som’on e ba mich u wan’ug ni Got e ba yul’yul’ ma ra yul’yul’ ngog ni faan gu ra folwok rok. Bin migid e rayog ni nge yul’yul’ e bitir ni faan yad ra guyeg ni gub yul’yul’.”

Ere, uw rogon ni be ayuweg e tabinaw rok? Ke gaar: “Bay e ggan, nge mad, nge naun romad. Machane, yu ngiyal’ e gu ma ning e ayuw ngak e pi fager rog ni ngar ayuweged gag u boch ban’en nib t’uf ni nggu pi’ puluwon. Ma  gubin ngiyal’ ni yad ma ayuwegeg. Mang fan? Bochan e yad manang ni gub yul’yul’ ngorad.

“Ke ilal e bitir rog ma yad ba yul’yul’. Immoy ba ngiyal’ ni guy e buguli yoror rog e salpiy u daken e tebel u tabinaw romad, me fith ngog ko ra fek e pi bitir nem e pi salpiy nem fa danga’. Ma nap’an ni gog ngak ndabi rin’ e bitir rog ban’en ni aram rogon, ma de mich u wan’. Ere guy rogon ni nge skengnagrad ni dagnang. I digey e salpiy u tabinaw romad u bang ni manang nib mom nra pirieg fapi bitir riy. Ma nap’an e bin migid e rran ni yib, me guy ni ka bay fapi salpiy, ma ri gin ngay. Faanra ba yul’yul’ e bitir rom, ma kab fel’ ko bin ni nge yoor ban’en rom.”

“Gubin e Girdi’ ni Be Rin’”

Moro’ro’ u tabon e maruwel e ban’en ni yima rin’. Aram fan ni boor e girdi’ ni ma gaar u wan’, ‘Faanra gubin e girdi’ ni be rin’, ma mang fan ni dab gu rin’?’ Ba thil e n’en ni be yog e Bible ni gaar: “Dab mu uned ko kireb ni bochan e aram rogon ni ma rin’ e tin yoor e girdi’.” (Exodus 23:2) Ke fol Victoire ko re thin ney. Keb angin ngak nib fel’, fa?

Nap’an ni ke gaman 19 e duw rok, me un nga reb e maruwel ni yima fal’eg e gapgep riy. Me yan i pirieg ni bay 40 e ppin u rom ni yad ma iring boch e pi n’em ni yima fal’eg e gapgep riy. Gubin e wik ma ra bagayad ma ma pi’ ni chuway’ e pi n’em ni ke iring ni gonap’an puluwon u dalip fa aningeg e rran. Ke yog Victoire ni gaar: “Yima rin’ e re n’em ya gubin e girdi’ ni ma rin’. Ere ka rogned ngog ni nggu un ngorad i rin’, machane kug siyeg, ma ku gog ngorad ni gu baadag ni nggu par ni gub yul’yul’. Kar moningniged gag, ma ka rogned ndabi yog boch ban’en ngog.

“Reb e rran ni kan mu’ ko maruwel, ma yugu ra gingad ma ke yib e en nib ga’ ko maruwel ni nge guy e kabang ko gubin e girdi’, me yan i pirieg ni gubin e girdi’ ma bay boch fapi n’em ni kar iringed u lan e kabang rorad ma kemus ni birog e kabang e dariy e pi n’em riy. Ere, ke yog faen ga’ nreb e ngan chuwegrad ko maruwel, fa reb e dariy puluwrad u lan l’agruw e wik. U lan e gal wik nem, ma ka fini nang fapi ppin ni gub yul’yul’.”

“En ni Ke Pirieg e Nge Fanay”

Uw rogon u wan’um u nap’an ni ga ra pirieg ban’en ni fen be’ ni ke mul rok? Nap’an nra guy e girdi’ ban’en ni aram rogon ma yad baadag ni ngar fanayed ma darur lemnaged ni ngar sulweged. Yad ma lemnag fare thin ni ma yog e girdi’ ni “en ni ke pirieg e nge fanay.” Boch e girdi’ e ma yog ndariy ban’en nib kireb riy ya en fen e ke lemnag ni ke mul rok ma dabki pateg. Ma boch e girdi’ e ma lemnag ni gathi maruwel rorad ni ngar gayed e en fen, ya ba gel e maruwel riy.

Uw rogon e re n’ey u wan’ Got? Deuteronomy 22:1-3 e be yog ni en ni ke pirieg ban’en ni fen be’ e gathi nge fanay, machane nge chaariy nge mada’ ko ngiyal’ ni ke ‘yib e en ni fen ni be changarnag, me fulweg ngak.’ Faanra dabi yog be’ e n’en ni ke pirieg ngan nang, ma rayog ni nga nog ni ke moro’ro’. (Exodus 22:9) Ku rayog ni ngan fol ko re thin ney e ngiyal’ ney, fa? Ke mich e re thin ney u wan’ Christine.

Christine e ir e ga’ u reb e skul. Ere, reb e Dalip Fen e Maruwel me fek puluwon ko maruwel ni ke tay u lan reb e pul, me bachiy nge tay nga kabang rok. Ma aram me taleg reb e taxi me af ngay nge yan ko muulung. Ma nap’an ni og nga but’ me fek e salpiy ni nge pi’ puluwon e taxi me mul fare thum i salpiy ni puluwon nga but’ nde nang ya ke aw e lumor.

In e minit nga tomuren me yib Blaise ni 19 e duw yangaren ni be’ ni fini yib ko re binaw nem. Me yib ni nge un ko fare muulung ni ki yib Christine ni nge un ngay. Ma aram me pirieg fare thum i salpiy u but’ me fek nge tay nga paketo rok. Tomuren ni ke m’ay e muulung, me yog ngak ba fager rok ni ke pirieg ban’en u wen ma ra bay be’ ni ke n’ag ban’en ni fen ma rayog ni ngan dengwanag mi nog ngak ko mang e ke n’ag be’.

 Nap’an ni taw Christine nga tabinaw rok e re nep’ i n’em, me pirieg ni ke thay fare thum i salpiy rok. Reb e wik nga tomuren, me yog ngak Josephine nreb e fager rok ni ke yan e salpiy rok nga bang. Ma aram me yog Josephine ngak ni bay be’ ni ke pirieg ban’en u nap’an e muulung, ma rayog ni ngan dengwanag. Ere dengwanag Christine Blaise me yog ngak ni ke n’ag e salpiy rok. Kari felfelan’ u nap’an ni ke sulweg Blaise e salpiy rok ni ke thay. Ere mang e ke rin’ Blaise u nap’an ni pirieg fapi salpiy? Ke chaariy u lan reb e wik, machane ke gaar, “Kab gel e felfelan’ ni kug sulweg e salpiy ko en fen ko bin ni nggu fanay.”

Fan ni Kar Athamgilgad ni Ngar Yul’yul’gad ni Gubin Ngiyal’

Victorine, Victoire, nge Blaise e ba thil e gin ni yad ma par riy ma dar nanged yad. Machane, bay ban’en nib taareb rogon rorad. Yad e Pi Mich Rok Jehovah ni yad ma fol ko n’en ni be yog e Bible u murung’agen e yul’yul’. Yad be son ni nge riyul’ e n’en ni ke micheg Got u lan e bin beech e fayleng. “Bay sum e bin nib beech e lan e lang nge bin nib beech e fayleng, ni aram e tin nib mat’aw e ngongol e bay i par riy.” Gubin e girdi’ ni yad ra par u rom e yad ba mat’aw ma yad ba yul’yul’.​—2 Peter 3:13.

Manang Victorine ni fin ngiyal’ nra thilyeg Got gubin ban’en nge fel’ e fin aram e ngiyal’ nra fel’ rogon. Machane, ba flaab ko tirok Got ban’en e chiney ni aram ban’en ndabiyog ni ngan chuw’iy ko salpiy. Gubin e bitir rok ni yad ba yul’yul’ mab fel’ pangirad. Gubin e madnom ni yad ma ‘weliy’ murung’agen feni rib gol Got ma yad be tamilangnag ko uw rogon nra flaabnag e piin ni “yad be non ngak u fithik’ e yul’yul’” ma ra ayuweg e “piin nib t’uf rorad.”​—Psalm 145:7, 18, 20.

Boch nga tomuren me tal Victoire ko fare maruwel ni yima ngongliy e gapgep me tababnag e siyobay rok ni ma pi’ boch ban’en ni ma ngongliy ko thiyogang ni chuway’. Bochan e ba yul’yul’ ma boor e girdi’ ni ma yib i chuw’iy e pi n’em. Ma ke lichnag e tayim ko siyobay rok ma ke yoornag e tayim ni nge un i machibnag ngak boch e girdi’ murung’agen e athap u lan e bin beech e fayleng nib yul’yul’ gubin e girdi’ nra par riy. Boch nga tomuren ma ke mabgol, ma chiney e yow ma machib e pumoon rok ni gubin ngiyal’.

Christine e ke thay e salpiy rok u tooben e Kingdom Hall ko Pi Mich Rok Jehovah. Blaise e manang in e girdi’ u lan e re ulung nem, machane manang ni yad pi walagen ni Kristiano ni yad ma guy rogon ni ngar yul’yul’gad ni gubin ngiyal’.

In e girdi’ e ga manang ni yad ma athamgil ni ngar yul’yul’gad ni gubin ngiyal’? Am lemnag ni faan gomanga bay 50, fa 100, fa 200 e girdi’ ni yad ba yul’yul’. Aram rogon e Pi Mich Rok Jehovah ni yad ma un ko muulung u Kingdom Hall. Ere mang fan ndab man ngaram ngam chag ngorad mag nang feni ri yad ba yul’yul’.

[Picture on page 12]

“Faanra ba yul’yul’ e bitir rom, ma kab fel’ ko bin ni nge yoor ban’en rom.”​—VICTORINE

[Picture on page 14]

Be Yog e Proverbs 6:30 Nrayog ni Ngan Moro’ro’, Fa?

Be gaar e Proverbs 6:30, BT: “Girdi’ e darir dabuyed ba moro’ro’ ni k’iy me iring e ggan.” Ere be yog e re thin ney nrayog ni ngan moro’ro’? Danga’. Re guruy ney e be dag nra gechignag Got e piin ni yad ma moro’ro’. Ki yog ko bin migid e verse ni gaar: “Ma faan ni kol, ma thingari pi’ puluwon ni medlip yay, thingari pi’ gubin ban’en ni bay u pa’.” (Proverbs 6:31, BT) Ere be’ ni ke iring ban’en ni bochan e ke yim’ ko bilig e de thil ngak be’ ni ke moro’ro’ ni bochan e chogow fa be guy rogon ni nge gafgownag be’, ya yow l’agruw ni yow ra sulweg ‘puluwon’ e n’en ni kar rin’ew nib kireb. Piin ni yad baadag ni ngar folgad rok Got e thingar dab ra moro’ro’gad.