Ngan Gay e Ayuw u Fithik’ e Girdi’ Rok Got

“Bay gu pining e magar ngom u lan e muulung rok pi girdiem.”​—PS. 35:18, BT.

1-3. (a) Mang e rayog ni nge kirebnag e pi Kristiano e ngiyal’ ney? (b) Uw e rayog ni nge pirieg e girdi’ rok Got e ayuw riy?

 NAP’AN ni ke yan Joe nge ppin rok ko vacation ma ranow nga maday ni ngar yaliyew e lugoch nge nig ni boor raen ma ba thil thil yaan. Kar kangow boch i yan nga feth ni ngar guyew e nig nge lugoch u ar. Munmun me nang e ppin rok Joe ni kar tawgow nga bang ni ke toar, ma aram me gaar, “Gu be lemnag ni ke palog e gin ni ka darow riy.” Me gaar Joe, “Dab mu rus, ya gu manang e n’en ni gu be rin’.” De n’uw nap’an me nang Joe ni dakir guy e nig nge lugoch ma aram me gaar u wan’, ‘Uw e ke yan fapi nig ngay?’ Ke rus ya ke nang ni ka ranow nga bang nib toar, ma faani sap me guy ba ayang ni be yib nib puluw ngak. Kari gel boch e marus rok ya ke nang ni dakuriy ban’en nrayog ni nge rin’. Gonap’an in e fit nga orel me chel fare ayang nge yan.

² Reb e Kristiano e ku rayog ni nge magawonnag e pi n’en ni ma fanay Satan ko re fayleng ney ni bod rogon e gosgos, maruwel, fa nge yoor e chugum rok ma aram e dabki nang ni be sor i yan ko gin ni bay e riya’ riy. Ke gaar Joe ni ir reb e piilal, “N’en ni ke buch rog e ke ayuwegeg ni nggu lemnag e piin ni gad ma chag ngorad. Dabda paloggad ko ulung, ya aram e gin ni dariy e riya’ riy.” Ere dab mu pag e pi n’en ni bay ko re fayleng ney ni nge palognagem ko ulung. Faanra kam nang ni kam palog, mag gurnagem ngam sul ko ulung rok Got, ya faanra danga’ ma rayog ni nge kireb e tha’ u thilmew Jehovah.

³ Re fayleng ney e boor ban’en riy nrayog ni nge kirebnag e piin Kristiano. (2 Tim. 3:1-5) Manang Satan ni dabki n’uw nap’an ni nge par, ere be guy rogon ni nge bannag e piin ni darur tedan’rad. (1 Pet. 5:8; Rev. 12:12, 17) Machane gadad e bay e ayuw rodad. Ke pi’ Jehovah bang ni rayog ni nge nab e girdi’ rok ngay ni aram e ulung ni Kristiano.

4, 5. Uw rogon ni ma lemnag boor e girdi’ e pi n’en ni bay nga m’on rorad, ma mang fan?

⁴ Buchuuw e ayuw ni ma pi’ e girdi’ ni fan ko par rodad. Boor e girdi’ e dakir fel’ rogon e par rorad ni bochan e kireb, cham, chugum ni ke tolang puluwon nge pi n’en u toobdad ni be kireb. Maku bay e magawon ni aram e gad be pilibthir ma gad be m’ar. Ma piin ni bay e maruwel rorad, nge tabinaw, nge salpiy, ma ba fel’ rogorad, mab fel’ fithik’ i dowrad e ku ma magafan’rad ko mang e ra buch rorad boch nga m’on.

⁵ Boor e girdi’ ni dakir pagan’rad. Bokum biyu’ e girdi’ ni yad be athapeg e gapas ma nge fel’ rogon e mabgol nge tabinaw rorad e be magafan’rad ya der yog ni nge fel’ rogon e par rorad. Pi yurba’ i teliw e der yog ni ngar ayuweged e girdi’ ni nge tamilangan’rad ko thin nu Bible. Yad be fil boch e machib ngak e girdi’ ni dariy u Bible, mab kireb e ngongol rorad, ere boor e girdi’ ni kar dabuyed ni ngar filed e thin rok Got. Boor e girdi’ ni ke l’agan’rad ko tin ni be fil e science nge llowan’ ko girdi’ ma kar paged e thin rok Got. Ere ngiyal’ ney u fayleng e boor e girdi’ ni gathi ri yad ma lemnag murung’agen e n’en ni bay nga m’on rorad.

6, 7. (a) Uw rogon nib thil e n’en nib mich u wan’ e piin ni yad ma pigpig ngak Got ko piin ndarur pigpiggad ngak? (b) Mang e gad ra weliy?

 ⁶ Ere ba thil e n’en nib mich u wan’ e piin ni Kristiano nge piin ni gathi yad e Kristiano. Yugu aram rogon ni gadad e girdi’ rok Jehovah, maku gad ma mada’nag e pi magawon ney ni ma yib ngak gubin e girdi’ u fayleng. Machane rib thil rogon ni gad ma lemnag e pi magawon ney. (Mu beeg e Isaiah 65:13, 14; Malaki 3:18.) Mang fan? Bochan ni gad ma pirieg e fulweg ni be pi’ e Bible ko pi magawon ney ni ma yib ko girdi’ ni gubin e rran. Ere der magafan’dad ko pi n’en ni bay nga m’on. Bochan ni gad ma liyor ngak Jehovah ma rayog ni nge ayuwegdad nge dabda uned nga boch e machib ni dariy u Bible, nge ngongol ni darngal, nge ku boch e kireb. Ulung ni Kristiano e bay e gapas riy ni dariy ko girdi’ nu fayleng.​—Isa. 48:17, 18; Fil. 4:6, 7. 

⁷ Pi n’en ni ke buch rok boch e girdi’ rok Got e rayog ni nge ayuwegdad ni ngad nanged ni bay e ayuw ni ma felfelan’ e pi tapigpig rok Jehovah ngay ndariy rok yugu boch e girdi’. Pi n’ey e ra ayuwegdad ni ngad tedan’dad ko n’en ni gad be rin’ ma gad fal’eg i lemnag boch e fonow rok Got ni rayog ni ngad folgad riy.​—Isa. 30:21.

Ke “Chugur ni Nge Dabki Pagan’ug”

8. Mang e ma rin’ e pi tapigpig rok Jehovah?

⁸ Kab kakrom i yib ma girdi’ ni kar dugliyed ni ngar pigpiggad ma ra folgad rok Jehovah e ur guyed rogon ni nge dab ra chaggad ko girdi’ ni der ma pigpig ngak Got. Ke dag Jehovah nra par e girdi’ rok nge girdi’ rok Satan ni yad ba toogor. (Gen. 3:15) Bochan ni yad ma fol ko kenggin e thin rok Got u Bible ma aram e ba thil e ngongol rorad ko girdi’ u toobrad. (John 17:15, 16; 1 John 2:15-17) Re n’ey ni yad ma rin’ e de mom. Boch e girdi’ ni ma pigpig ngak Jehovah e yu ngiyal’ e yad ma lemnag ko ri mang fan ni ngan pigpig ngak.

9. Mu weliy e magawon ni ke pirieg e en ni yoloy e Psalm 73.

⁹ Reb e tapigpig rok Jehovah ni i lemnag  ko rib gonop e n’en ni ke dugliy e aram be’ ni yoloy e Psalm 73 ni reb e girdi’ rok Asaf. Ke fith ko mang fan ni girdi’ nib kireb e ba ga’ ni ma fel’ rogorad ma yad ba felfelan’ ma girdi’ ni ma pigpig ngak Got e ma yib e skeng nge magawon ngorad.​—Mu beeg e Psalm 73:1-13.

10. Mang fan ni fapi magawon ni yog e en ni yoloy e psalm e ba ga’ fan ngodad?

¹⁰ Bay ba ngiyal’ ni kam fith boch e deer ni bod e deer ni i fith e en ni yoloy e psalm? Faanra kam rin’ ma dab mu lemnag ni ke war e michan’ rom. Bay boch e tapigpig rok Jehovah nra yoloyed e Bible ni ku ur lemgad ni aram rogon. (Job 21:7-13; Ps. 37:1; Jer. 12:1; Hab. 1:1-4, 13) Machane piin ni yad baadag ni ngar pigpiggad ngak Jehovah e thingar ra fal’eged i lemnag e fulweg ko re deer ni baaray: Ngan pigpig min fol rok Got e aram e n’en ni th’abi fel’ ni ngan rin’, fa? Re n’ey e bay rogon ko togopuluw ni tay Satan u Eden. Ke guy rogon ni nge togopuluw nga mat’awun Got ni nge gagiyeg. (Gen. 3:4, 5) Ere gad gubin ma thingar da fal’eged i lemnag e magawon ni pirieg e en ni yoloy e psalm. Thingari awan’dad ko girdi’ nib kireb ni bochan e ba fel’ rogon e yafas rorad ngodad, fa? Thingar da talgad ko pigpig ngak Jehovah ma da folwokgad ko tin ni yad be rin’, fa? Aram e n’en ni baadag Satan ni ngad rin’ed.

11, 12. (a) Uw rogon ni daki maruwar laniyan’ e en ni yoloy e psalm, ma mang e be fil e re n’ey ngodad? (b) Mang e ke ayuwegem ni bod e n’en ni ke ayuweg e en ni yoloy e psalm?

¹¹ Mang e ke ayuweg e en ni yoloy e psalm ni nge thil e lem rok? Yugu aram rogon ni ke chugur ni nge pag e tin nib mat’aw ban’en, machane ke par nib gel u nap’an ni ke yan nga lan e “tempel” rok Got, ma aram e ngiyal’ ni ke chag ngak e girdi’ rok Got me tiyan’ ko tin nib m’agan’ Got ngay. Ma ireray e ngiyal’ ni ke nang e en ni yoloy e psalm ni de t’uf ni nge fel’ rogon ni bod rogon e piin ni ma rin’ e kireb. Rayog ni nge guy ni ngongol rorad nge pi n’en ni kar mel’eged ni fan ko yafas rorad e ke tayrad nga bang nib “tamasirgig.” Ke yog e en ni yoloy e psalm ni gubin e girdi’ ni yad ma pag Jehovah e ra thangrad “u lan taab talab,” ma ra ayuweg e piin ni yad ma fol rok. (Mu beeg e Psalm 73:16-19, 27, 28.) Dariy e maruwar riy ni kad guyed e tin riyul’ e thin. Faanra mu rin’ e tin ga baadag ko yafas rom ma damur fol ko motochiyel rok Got ma boor e girdi’ ni ga ra fel’ u wan’, machane dabiyog ni ngam siyeg wenegan nra yib ngom ko tomur.​—Gal. 6:7-9.

¹² Ku mang e gad be fil ko n’en ni buch rok e en ni yoloy e Psalm? Ke pirieg e ayuw nge gonop u fithik’ e girdi’ rok Got. Nap’an ni ke yan nga tempel rok Jehovah ma ke tamilangan’ ko n’en nib mat’aw ni nge rin’. Ku taareb rogon ngodad e ngiyal’ ney nrayog ni ngad pirieged e ayuw ma gad felfelan’ ko thin rok Got u nap’an e muulung. Aram fan ni ke tay Jehovah chilen ngak e pi tapigpig rok ni nguur uned ko muulung. Nap’an e muulung ma rayog ni ngar pied e athamgil nga lanin’rad ma ra ngongolgad u fithik’ e gonop.​—Isa. 32:1, 2; Heb. 10:24, 25.

Mu Mel’eg e Piin ni Ngam Chag Ngorad

13-15. (a) Mang e ke rin’ Dinah, ma mang e be dag ngodad? (b) Uw rogon nra yib e ayuw ngodad ni faanra ud chaggad ngak e pi Kristiano?

¹³ Dinah ni fak Jakob e l’ag nga reb e magawon ni bochan e i chag ngak e girdi’ ni da ur pigpiggad ngak Got. Fare babyor ni Genesis e be yog ngodad ni i chag ngak boch e ppin nib fel’ yangarrad u Kanaan ni ur pared u toobrad. Girdi’ nu Kanaan e da ur liyorgad ngak Jehovah. Bay e mich riy ni be dag ni piyu Kanaan e yad ma meybil ko liyos, ma yad ma un ko ngongol ni darngal nge ngongol ni golong nge cham. (Ex. 23:23; Lev. 18:2-25; Deut. 18:9-12) Baaray e n’en ni ke buch rok Dinah ni bochan e i chag ko pi girdi’ nib kireb ney.

 ¹⁴ Shekem ni be’ u Kanaan ni ri “yima tayfan u tabinaw rok” e guy Dinah “me yan i kol nge moleg u gelngin.” (Gen. 34:1, 2, 19) Rib kireb e n’en ni ke buch rok. Gur, i lemnag Dinah nra buch ban’en rok ni aram rogon? Sana i lemnag ni kemus ni nge fel’ e thin rorad e pi pumoon nib fel’ yangaren nem, ma i lemnag ni dariy e kireb riy. Machane kan bannag.

¹⁵ Mang e be fil e re n’ey ngodad? Be dag ni de fel’ ni ngad chaggad ko girdi’ ni de mich Got u wan’rad mad lemnaged ni dariy ban’en nib kireb nra buch rodad. Be yog e Bible ni faanra “nchag ngak e girdi’ nib kireb me kireb pangiy nib fel’.” (1 Kor. 15:33) Ere faanra ga ra chag ngak e girdi’ ni taareb e michan’ romed ma ngongol rom nib fel’ nge t’ufeg rom ngak Jehovah e ra ayuwegem. Maku rayog ni ngam athamgil ni ngam ngongol u fithik’ e gonop.​—Prov. 13:20.

Kan “Beechnagmed”

16. Mang e ke yog apostal Paul u murung’agen boch e girdi’ u lan e ulung u Korinth?

¹⁶ Ulung ni Kristiano e ke ayuweg boor e girdi’ ni ngar beechnaged e ngongol rorad nib kireb. Nap’an ni yoloy apostal Paul e gin som’on e babyor rok ngak e ulung nu Korinth, me yog ngorad ni kar thilyeged e ngongol rorad kar mat’awgad u mit Got. Boch i yad e ur uned ko ngongol ni darngal, ara yad ma ta’fan ma yad ma meybil ko liyos, ara yad ma par e piin ni gathi mabgol rorad, ara yad e pumoon ni ma darngalnag e pumoon, ara piin ni yad ma iring ban’en u fithik’ e yargel, ara yad ba chogow, ara yad ma balyang ko rrum, nge ku boch e ngongol nib kireb. Ke gaar Paul ngorad: “Ke n’ag Got fan e denen romed ke beechnagmed.”​—Mu beeg e 1 Korinth 6:9-11.

17. Uw rogon ni ke thilyeg e thin nu Bible e yafas rok boor e girdi’?

¹⁷ Girdi’ ni dariy e michan’ rorad e darur folgad ko motochiyel u Bible. Yad be fol ko tin ni yad be lemnag nge pi n’en ni be rin’ e piin ni bay u toobrad, ni bod e n’en ni i rin’ boch e girdi’ u Korinth nib mich Got u wan’rad. (Efe. 4:14) Ra tamilangan’uy ko thin rok Got u Bible nge tin nib m’agan’ ngay ma bay gelngin nrayog ni nge thilyeg e yafas ko piin yad ra fol riy. (Kol. 3:5-10; Heb. 4:12) Boor e girdi’ u lan e ulung ni Kristiano ni rayog ni nga rogned ngom nu m’on ni kar filed e motochiyel rok Got ma ur rin’ed boch ban’en nib kireb. Ma da ur felfelan’gad. Machane chiney e kar pirieged e gapas ni bochan e yad be chag ko girdi’ rok Got ma yad be fol ko pi kenggin e motochiyel u Bible.

18. Mang e ke buch rok reb e fel’ yangaren, ma mang e be micheg ngodad?

¹⁸ Boch e girdi’ e kar paged e ulung ni Kristiano kafram ma chiney e kar kalgadngan’rad. Tanya ni reb e walag nib pin e yog ni “kan chuguliy u ba tabinaw ni yad ma un ko tin riyul’,” machane nap’an ni ke gaman 16 e duw rok me pag e ulung me “un ko ngongol nib kireb.” Wenegan ni yib riy e diyen me li’ e bitir rok. Ere yog ni gaar: “Dabiyog ni nggu pagtalin e kireb ni ug rin’ u lan fa dalip i duw ni gu pag e ulung ni Kristiano. Dab gu pagtalin ni gu li’ e bitir rog. Gu baadag ni nggog ngak e piin ni fel’ yangaren ni yad be athapeg ni manga yugu ra ‘uned’ nga ngongolen e fayleng u taabochi ngiyal’ ni: ‘Dab mu uned ngay.’ Sana gowa ba fel’ ko som’on, machane wenegan nra yib riy e ba kireb. Re fayleng ney e dariy ban’en nib fel’ nra yog  riy ngom. Gu manang, ya ke buch rog. Mu par u lan e ulung rok Jehovah, ya kemus rogon mag felfelan’.”

19, 20. Mang e ayuw ni ma pi’ e ulung ni Kristiano, ma uw rogon?

¹⁹ A mu lemnag ko mang e ra buch ni faanra mu pag e ayuw ni ma yib ko ulung ni Kristiano. Boor e girdi’ e dubrad ni ngar lemnaged e pi n’en nib kireb ni ur rin’ed kafram. (John 6:68, 69) Rayog ni ngam par nib pagan’um ma bay e ayuw nra yib ngom ni faanra mu chag ngak girdien e ulung ni Kristiano ni yugu aram rogon ni bay e gafgow nge magawon ko re fayleng rok Satan ney. Ra um chag ngorad ma ga be un ngorad ko muulung ni gubin ngiyal’, ma ra i yib ngan’um e pi motochiyel rok Jehovah, maku ra pi’ e athamgil nga lanin’um ni ngam fol riy. Ere bay fan ni ngan ‘pining e magar ngom u lan e ulung,’ ni bod rogon e n’en ni rin’ e en ni yoloy e psalm.​—Ps. 35:18.

²⁰ Boor fan nib mo’maw’ ni nga i par e piin Kristiano ni yad ba yul’yul’. Ba t’uf ni ngan pow’iyrad ko kanawo’ nib fel’. Ere mang e rayog ni ngam rin’ nge tin ka bay e girdi’ u lan e ulung ni ngam ayuweged e piin ni ke yib e magawon ngorad? Bin migid e thin e ra tamilangnag ko uw rogon ni rayog ni ngam ‘pi’ e athamgil nga laniyan’’ pi walagem.​—1 Thess. 5:11.

Uw Rogon ni Ga Ra Fulweg?

• Mang e gad be fil ko n’en ni ke rin’ e en ni ke yoloy e Psalm 73?

• Mang e gad ra fil ko n’en ni buch rok Dinah?

• Mang fan ni rayog ni ngam pirieg e ayuw u lan e ulung ni Kristiano?

[Study Questions]

[Picture on page 9]

Ngaum par ko gin ni dariy e riya’ riy, ni aram e ulung rok Got