Nge Felfelan’um ko Tirok Got Ban’en

“Mfeked e mat’ rog ngam tiyed nga pomed . . . , mi gimed pirieg e toffan.”​—MATT. 11:29.

1. Mang e yog Got ni ngan rin’ u daken e Burey ni Sinai, ma mang fan?

 FARE m’ag ko motochiyel nni pi’ u daken e Burey ni Sinai e ba muun ngay murung’agen fare madnom ko Sabbath ni yima tay u gubin e wik. I tay Jehovah chilen ngak piyu Israel u daken Moses ni gaar: “Nel’ e rran ni ngam muruwliyed e maruwel romed, machane rofen ni medlip ngay e ngam toffangad, ya nge yog ni toffan e pi sib, nge pi milekag ni yad be maruwel romed, nge pi gamanman romed.” (Ex. 23:12) Arrogon, i tay Jehovah reb e rran ni nga i “toffan” e girdi’ rok riy ni bochan e be lemnagrad ni yad bay u tan fare motochiyel.

2. Mang angin ni yib ngak piyu Israel ni bochan e ur madnomnaged e Sabbath?

² Gur, fare rran ko Sabbath e kemus ni fan ko toffan? Danga’, ya aram bang ko liyor ni ma tay piyu Israel ngak Jehovah nib ga’ fan. Rofen  ni Sabbath e aram e ngiyal’ ni ma fil e pi matam ngak e tabinaw rorad rogon ni “nguur rin’ed e tin nib mat’aw nge tin nib yal’uw.” (Gen. 18:19, BT) Ku aram e ngiyal’ ni ma muulung chon e tabinaw nge pi tafager nga taabang ni ngar fal’eged i lemnag e pi n’en ni ke rin’ Jehovah mar felfelan’gad u taabang. (Isa. 58:13, 14) Ma bin th’abi ga’ fan riy e, fare madnom ko Sabbath e ku be yip’ fan e ngiyal’ ni yira pirieg e bin riyul’ e toffan u tan e Gagiyeg rok Kristus u Lan Fare Biyu’ i Duw. (Rom. 8:21) Machane, uw rogon e ngiyal’ ney ni gad bay riy? Uw rogon nge uw e ra pirieg e tin riyul’ e Kristiano e bin riyul’ e toffan riy?

Nge Felfelan’dad ni Gad Ma Chag Pi Walagdad

3. Uw rogon ni i pi’ e pi Kristiano e athamgil nga lanin’rad u nap’an e bin som’on e chibog, ma mang angin?

³ I yog apostal Paul ni ulung ni Kristiano e ir e “duga’ me ir e be dunubiy fare thin nib riyul’.” (1 Tim. 3:15) Tin som’on e Kristiano e ur pied e athamgil nga lanin’rad u fithik’ e t’ufeg. (Efe. 4:11, 12, 16) Nap’an ni immoy Paul u Efesus me yan e pi Kristiano nu Korinth ra guyed ngar pied e athamgil nga laniyan’. Angin ni yib riy e ba tamilang ko thin ni yog Paul ni gaar: “Kug felfelan’ ni ke yib Stefanas nge Fortunatus, Akaikus . . . . ma kar felfelan’niged gag.” (1 Kor. 16:17, 18) Ku arrogon ni nap’an ni yan Titus nga Korinth ni nge guy e pi walag u rom, me yog Paul ngorad ni gaar: “Ri ba ga’ e felfelan’ . . . ni ke tay u rogon ni mu ayuweged ni gimed gubin nge felfelan’.” (2 Kor. 7:13) Ere, ku arrogon e ngiyal’ ney ni ma felfelan’ e Pi Mich Rok Jehovah ni yad ma chag nga taabang.

4. Uw rogon ni ma pi’ e pi muulung e athamgil nga lanin’dad?

⁴ Ba mudugil ni kam guy nib gel e felfelan’ ni gad ma tay ko pi muulung ni gad ma un ngay. Aram e gin ni ma ‘fel’ rogon be’ ko michan’ rok be’’ riy. (Rom. 1:12) Pi walagdad ni Kristiano e gathi kemus ni gad manangrad, ya yad e tin riyul’ e fager ni yad ba t’uf rodad ma gad ma tay farad. Ri gad ma felfelan’ ma ma gapas lanin’dad ni bochan e gad ma chag pi walagdad u nap’an e muulung.​—Filem. 7. 

5. Uw rogon ni ngad felfelan’naged gadad u nap’an e pi convention nge assembly?

⁵ Pi convention nge assembly ni gad ma un ngay e ku aram reb e kanawo’ ni gad ma felfelan’ riy. Pi muulung nib ga’ ney e gad ma fil e tin riyul’ riy u lan e Bible nra pi’ e yafas ngodad maku aram e ngiyal’ ni gad ma chag nga taabang ma gad ma “ga’nag e t’ufeg” rodad. (2 Kor. 6:12, 13, NW) Machane, uw rogon ni faanra gad ba tamra’ ni ngaud nonad ko girdi’? Reb e kanawo’ ni ngad nanged boch e walag riy e aram e ngad pied e ayuw u nap’an e convention. Tomuren ni un reb e walag nib pin i pi’ e ayuw u nap’an reb e international convention me yog ni gaar: “Gathi ri boor e girdi’ u rom ni gu manang, ya kemus ni yigoo chon e tabinaw rog nge pi tafager rog. Machane nap’an ni gu pi’ e ayuw ko klin, mug mada’nag boor e walag ma kar gu felfelan’!”

6. Mang reb e kanawo’ nrayog ni ngad felfelan’gad riy u nap’an ni ka darod nga bang ko milekag?

⁶ Piyu Israel kakrom e dalip yay u reb e duw ni yad ma milekag nga Jerusalem ni fan ko liyor. (Ex. 34:23) Ere ba ga’ ni yad ma pag e milay’ nge siyobay rorad ni nga ranod u but’ ko milekag. Machane, ri yad ma “felfelan’” ni yad ma yan nga tempel ni bochan e yad ma ‘pining e sorok’ ngak Jehovah. (2 Kron. 30:21, BT) Boor e tapigpig rok Jehovah e ngiyal’ ney nri yad ma felfelan’ u nap’an ni yad ma yan chon e tabinaw rorad nga Bethel nge boch e branch ofis ko Pi Mich Rok Jehovah. Ere, gur, rayog ni nge yay ni migid nim marod e tabinaw rom ko milekag nga bang mi gimed yan ko yungi n’ey?

7. (a) Faanra kad ted reb e abich, ma uw rogon ni nge yib angin ko piin ni kar uned ngay? (b) Uw rogon ni ngan pi’ e athamgil nga laniyan’ e piin ni kar uned nga reb e abich?

⁷ Ku rayog ni nge yib e athamgil nga lanin’dad u nap’an reb e abich ni kad muulunggad chon e tabinaw nge pi tafager rodad nga taabang. I yog Solomon ni Pilung ni gaar: “Bin th’abi fel’ ngak be’ ni nge rin’ e nge abich me  garbod me felfelan’ ko tin ke thognag.” (Ekl. 2:24, BT) Gad ra muulung nga taabang ma gathi kemus ni ma yib e athamgil nga lanin’dad, ya ku ma gelnag e t’ufeg rodad ngak pi walagdad ni Kristiano. Ere, faanra kad muulunggad nga taabang ni fan nga reb e abich, mab fel’ ni ngan guy rogon ni nge dabi yoor e girdi’, ma dariy e wagey riy, nib ga’ ni faanra yibe unum riy, ya nge yog ni pi’ e athamgil nga laniyan’ e piin ni kar uned ngay.

Machib e Ma K’aring e Felfelan’ Ngodad

8, 9. (a) Mu weliy e n’en nib thil u thilin e machib rok Jesus nge pi motochiyel rok e pi tamachib ko motochiyel nge pi Farise. (b) Mang angin nra yib ngodad ni faan gad ra weliy e thin riyul’ u Bible ngak e girdi’?

⁸ Ba pasig Jesus ko machib, ma ki pi’ e athamgil nga laniyan’ pi gachalpen ni ngaur rin’ed ni aram rogon. Baaray e mich riy ko n’en ni yog ni gaar: “Woldug ni ngan kunuy ngan tay nga naun e ba ga’ ni ba ga’ yang, machane piin ni ngar maruweliyed nge thap nga naun e ba lich. Mu yibilgad ngak e en ni ir e suwon e re woldug nem ngki pi’ boch girdien e maruwel ngar maruweliyed e re woldug rok nem nge thap nga naun.” (Matt. 9:37, 38) Fare thin ni i machibnag Jesus e rriyul’ ni ma fal’eg lanin’uy ni bochan e aram e “thin nib fel’.” (Matt. 4:23; 24:14) Rib thil ko pi motochiyel rok e pi Farise ni kaygi tomal ngak e girdi’.​—Mu beeg e Matthew 23:4, 23, 24.

⁹ Nap’an ni gad be machib, ma aram e gad be ayuwegrad ko tirok Got ban’en, maku be gelnag e tamilangan’ rodad ko thin riyul’ nu Bible. I yog e en ni yoloy Psalm ni gaar: “Mu pining e sorok ngak Somol! Rib manigil ni nga non’ tangin e sorok ngak e Got rodad.” (Ps. 147:1, BT) Rayog ni ngam gelnag e felfelan’ rom ni ga be weliy ngak e piin ni migid ngom feni sorok Jehovah, fa?

10. Angin e machib ni gad ma tay e be yan u rogon e en nra motoyil ngodad, fa? Mu weliy rogon.

¹⁰ Riyul’ ni yu yang e boor e girdi’ ni baadag e machib riy nga yu yang. (Mu beeg e Acts 18:1, 5-8.) Faanra ga be par u bang ni gathi ri boor e  girdi’ ni baadag e machib riy, ma ngam gay rogon ni ngam sap nga fel’ngin e n’en ni ga be rin’. Dab mu pagtalin ni fithingan Jehovah ni ga be athamgil ni ngam machibnag e dabi yan i aw nib m’ay fan. (1 Kor. 15:58) Maku reb e angin e machib ni gad be tay e der yan u rogon e en nra motoyil ngodad. Rayog ni nge pagan’dad nra guy Jehovah rogon ni nge rung’ag e piin ni yad baadag e tin riyul’ fare thin nib fel’ u murung’agen Gil’ilungun Got.​—John 6:44.

Fol Bible ni Tabinaw e Ra Felfelan’nagdad

11. Mang maruwel e ke pi’ Jehovah ngak e gallabthir, ma uw rogon ni ngar rin’ed?

¹¹ Gallabthir ni bay madgun Got u wan’rad e ba milfan ngorad ni ngar filed ngak e bitir rorad murung’agen Jehovah nge pi kanawo’ rok. (Deut. 11:18, 19) Faanra gur reb e gallabthir, ma kam tay ba ngiyal’ ni ngam fil ko bitir rom murung’agen e Chitamangidad nu tharmiy, fa? Boor e babyor, nge video, nge audio recording ni kan ngongliy ni bay e thin rok Jehovah riy nrayog ni nge ayuwegem u nap’an ni ga be skulnag e bitir rom.

12, 13. (a) Uw rogon ni nge yib angin ko tabinaw fare nep’ ni kan dugliy ni fan ko Fol Bible ni Tabinaw? (b) Uw rogon ni nge guy e gallabthir rogon ni nga i felfelan’ e bitir ko fol Bible ni yima tay u tabinaw?

¹² Maku reb e, ki yarmiy fare tapigpig nib yul’yul’ ma ba gonop reb e nep’ u gubin e wik ni fan ko Fol Bible ni Tabinaw. Boor e tabinaw ni kar pirieged ni ke yib angin e re yaram ney ngorad ni bochan e ke yog ni nge taareban’rad ma ke gel e t’ufeg u thilrad nge Jehovah. Machane, mang e ra rin’ e gallabthir me felfelan’ e tabinaw rorad ko biney e yaram me yib angin ngorad?

¹³ Nge gay e gallabthir rogon ndabi chalban e bitir rorad ko fol Bible ni yad ma tay u tabinaw. Gad be liyor ngak fare Got nib felfelan’, ma baadag ni nge felfelan’dad ko liyor ni gad be tay ngak. (1 Tim. 1:11; Fil. 4:4) Faan gad ra tay reb e nep’ ni ngad weliyed e tin riyul’ u Bible nrib ga’ fan, ma ra yib angin ngodad. Rayog ni nge skulnag e gallabthir e bitir rorad u boor e kanawo’. Bod ni reb e tabinaw e ka rogned ngak Brandon ni reb e pagel ni fakrad ni ragag e duw rok ni nge weliy fare thin ni kenggin e “Mang Fan ni Fanay Jehovah e Porchoyog ni nge Yip’ Fan Satan?” Ke n’uw nap’an ni ma magawon laniyan’ Brandon ni bochan e baadag e porchoyog, ma dabun ni kan taareb rogonnag ngak Satan. Boch e tabinaw e yad ma yan u yaan boch ban’en u Bible ni kar beeged, ara ranod u yaan yug ban’en nra ayuweg e fol Bible ni yad be tay. Pi n’ey e ra adag e bitir maku ra ayuwegrad ni nge dabi chalbarad ko fol Bible ni yibe tay me taw e pi kenggin e motochiyel nu Bible nga gum’ircha’rad. *

Mu Siyeg e Pi N’en Nra Tomalnag Lanin’um

14, 15. (a) Uw rogon ni ke gel e mochuch ma dakuriy e pagan’ e chiney ko tin tomuren e rran? (b) Ku mang boch ban’en ni be yon’ daken e mochuch rodad?

¹⁴ Ke gel e mochuch ma dakuriy e pagan’ e chiney ko tin tomuren e rran. Boor e girdi’ ndariy e maruwel rorad ma yad ba gafgow ko salpiy. Mus ko piin yad ma un ko maruwel ma yad be lemnag ni salpiy ni yad ma yognag e gowa yibe tay nga lan reb e poketo nib kur, ya gathi ri be fel’ rogon e tabinaw riy. (Mu taarebrogonnag ko Haggai 1:4-6.) Girdien e am nge ku boch e tayugang’ e der yib angin e n’en ni yad be rin’ ni fan e nge tal e kireb ni be rin’ e terrorist nge ku boch e kireb. Maku boor e girdi’ ni be mulan’rad ni bochan e pi n’en nder yog rorad.​—Ps. 38:4.

¹⁵ Mus ko tin riyul’ e Kristiano ni ku be yib e magawon nge mochuch ko re fayleng rok Satan ney ngorad. (1 John 5:19) Bay yu ngiyal’ ni ma gel e mochuch ni ma tay e pi gachalpen Kristus u nap’an ni yad be par ni yad ba yul’yul’ ngak Jehovah. I gaar Jesus: “Faanra kar gafgowniged gag, ma bay kur gafgowniged gimed.” (John 15:20) Machane, yugu aram  rogon ni yibe ‘togopuluw ngodad’ ma ‘dariy ba ngiyal’ ndariy taabe’ ni fager rodad.’ (2 Kor. 4:9) Mang fan ni aram rogon?

16. Mang e ra ayuwegdad ni ngaud pared ni gad ba felfelan’?

¹⁶ I gaar Jesus: “Mired ngog, ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed.” (Matt. 11:28) Faanra mich u wan’dad fare biyul ni pi’ Kristus, ma aram e bod ni kad paged fadad ngak Jehovah. Faan gad ra rin’ ni aray rogon ma aram e ra yog ngodad fare ‘gelngin ni ir e ba th’abi gel.’ (2 Kor. 4:7) Gelngin Got nib thothup e ir e ma ‘ayuwegdad’ ni nge gel e michan’ rodad ya nge yog nda k’adedan’dad ko pi skeng nge gafgow ni ma yib ngodad ma gad par ni gad ba felfelan’.​—John 14:26; Jas. 1:2-4.

17, 18. (a) Mang lem e thingar da kol ayuwgad riy? (b) Mang wenegan ni faanra m’on u wan’dad boch ban’en ni yima felfelan’ ngay nde ga’ fan?

¹⁷ Tin riyul’ e Kristiano e ngiyal’ ney e ba t’uf ni ngar kol ayuwgad ndabi af e lem ko re fayleng ney ngorad ni yigoo fafel e nge m’on u wan’rad. (Mu beeg e Efesus 2:2-5.) Ya faanra danga’ ma rayog ni nge bannagdad e “tin nib tagan ban’en ni yima ar’arnag, ni tin nra guy e girdi’ ma yad ba adag ni nge yog ngorad, nge urngin ban’en ni bay u roy u fayleng nri ma uf e girdi’ ngay.” (1 John 2:16) Fa reb e da lemnaged nrayog ni ngad felfelan’gad ni faan gad ra mon’eg e tin yima ar’arnag. (Rom. 8:6) Bod ni boch e girdi’ e yad ma fanay e drug, ara yad ma chingaw, ara yad ma yaliy yaan e ngongol ni puwlag, ara yad ma un nga boch e gosgos ni yira maad’ad riy, ara yugu boch ban’en ni fan e ngar felfelan’gad. Ma maruwel Satan ko pi “ban” rok ya nge chafeg laniyan’ e girdi’ nga boch ban’en nib kireb ni yad be lemnag ni ir e ra yibnag e bin riyul’ e felfelan’ ngorad.​—Efe. 6:11.

¹⁸ Riyul’ ni dariy ban’en nib kireb ko abich, nge garbod, nge pi n’en ni ma chuweg e chalban. Machane thingar dab ni rin’ nge pag rogon. Maku dab da paged ni nge m’on u wan’dad. Ere ba ga’ fan ni ngaun t’ar lanin’uy min nang e n’en nib ga’ fan ni bochan e ngiyal’ ney ni gad be par riy. Rayog ni nge tomalnag lanin’dad e pi n’en ni gad be nameg ni nge yog ngodad nde ga’ fan, me k’aringdad ni ngad malmalgad ko pi n’en ni kad nanged ni murung’agen e “Somol rodad i Jesus Kristus.”​—2 Pet. 1:8.

19, 20. Uw rogon ni ngan pirieg e bin riyul’ e felfelan’?

¹⁹ Faanra ud lemgad nib puluw ko pi motochiyel rok Jehovah, ma aram e rayog ni ngad nanged ni pi n’en ni yima felfelan’ ngay ko re fayleng ney e ra m’ay. Manang Moses e re n’em, maku arrogodad. (Heb. 11:25) Bin riyul’ riy e ri gad ra felfelan’ ni faan gad ra rin’ e n’en nib m’agan’ e Chitamangidad nu tharmiy ngay.​—Matt. 5:6.

²⁰ Manga yugu da ululgad ngad felfelan’gad ko tirok Got ban’en me pi’ e athamgil nga lanin’dad. Faan gad ra rin’ ni aram rogon ma aram e rayog ni ngad “paged pangidad nge ngongol rodad . . . ma gadad . . . sonnag fare Rran nib fel’ ni ir e ke l’agan’dad ngay, ni aram e Rofen ni bay yib i m’ug e flaab rok Got rodad riy ni ir e th’abi tolang ni er Jesus Kristus ni ir e ma thapegdad ngak Got.” (Titus 2:12, 13) Ere ngaud pared u tan e mat’ rok Jesus ni aram e ngaud folgad u rogon ni be gagiyegnagdad ngu rogon ni be pow’iydad, ya faan gad ra rin’ ni aram rogon ma aram e gad ra pirieg e bin riyul’ e felfelan’ nge toffan!

[Footnote]

Uw Rogon ni Ga Ra Fulweg?

• Uw rogon ni ma felfelan’ e pi tapigpig rok Jehovah e ngiyal’ ney?

• Mang boch e kanawo’ ni ngad felfelan’gad ko machib ni gad ma tay nge piin ni gad machibnagrad?

• Mang e nge rin’ e piin lolugen e tabinaw ya nge yog ni yib angin e fol Bible ni yad ma tay e tabinaw rorad u taabang?

• Mang boch ban’en nra tomalnag lanin’dad ko tirok Got ban’en?

[Study Questions]

[Picture on page 28]

Faan gad ra tay e mat’ rok Jesus nga podad, ma boor ban’en ni gad ra pirieg e felfelan’ riy