Ngiyal’ Nra Sul e Athap nge T’ufeg

PIIN gallabthir, nge sensey nge ku boch e girdi’ ni yad ma ayuweg e piin fel’ yangaren e yad manang ndariy be’ nrayog rok ni nge thilyeg rarogon e re fayleng ney. Bay boch ban’en ni ma buch ndariy be’ nrayog ni nge taleg. Machane boor rogon nrayog ni ngad ayuweged e piin fel’ yangaren ngar felfelan’gad, me fel’ fithik’ i dowrad, miki fel’ rogorad.

Kab fel’ ni ngan gay rogon ni nge dabi buch ban’en ko bin ni ngan gay rogon ni ngan taleg, ere aram fan ni thingari fal’eg e gallabthir i lemnag e n’en nra rin’ e par rorad nge pi n’en ni yad ma mon’eg nga rogon e ngongol ko bitir rorad. Faanra i par e tabinaw ni bay e t’ufeg riy, ma aram e rayog ni nge dabi sum boch e ngongol nra kirebnigey. Reb e ban’en nrib t’uf rok e piin fel’ yangaren e aram be’ ni nga i motoyil ngorad. Faanra dabi motoyil e gallabthir rorad ngorad, ma sana en ra motoyil ngorad e be’ ndabiyog ni nge ayuwegrad.

Ere mang e thingari rin’ e gallabthir? Thingar mu ayuweged e bitir romed ko ngiyal’ ni ka yad ba bitir, ya aram e ngiyal’ nib t’uf ni ngan ayuwegrad. Boor e tabinaw nde mom ni ngar rin’ed e re n’ey, ya gallabthir riy e thingari maruwel ni nge yognag e tin nib t’uf ko tabinaw. Machane, piin ni kar paged fan boch ban’en ni fan e ngar ayuweged e bitir rorad e ke yib angin ko tabinaw rorad ya kar guyed ni ke fel’ rogon e par ko bitir rorad. Yugu aram rogon ni ma athamgil e gallabthir ni ngar ayuweged e bitir rorad, ma yu ngiyal’ e rayog ni nge sum e magawon ko bitir rorad.

Rayog ni Nge Pi’ e Pi Tafager Nge Ku Boch e Piilal e Ayuw

Bochan e mahl, mokol girdi’ u gelngiy, nge gafgow ni yibe tay ko fel’ yangaren, ma aram fan nib t’uf be’ ni nge ayuweg e pi fel’ yangaren ni ke yib e magawon ngorad ni aray rogon. Pi fel’ yangaren ni ke buch e pi n’ey rorad ma ke magey u lanin’rad e ba mo’maw’ ni ngan ayuwegrad. Sana ba t’uf ni ngan tay ba ngiyal’ min athamgil ngan ayuwegrad. De fel’ ni ngan weliy thibngirad ara ngan fek owchey rorad. Ere gur rayog ni ngad fal’eged i lemnag rogon ni ngad ayuweged e pi arorad ni ke t’uf e ayuw rok ma gad rin’ u fithik’ e gol nge t’ufeg?

Gathi kemus ni yigoo gallabthir e ba t’uf ni ngar tedan’rad ngar nanged e n’en ni be magawonnag e piin fel’ yangaren, ya ku thingari pi’ e pi tafager nge pi walagrad e ayuw. Faanra yibe guy ni bay ban’en ni be magawonnag lanin’rad, ma ngan gur ngan motoyil ngorad. Ma faanra rayog mab fel’ ni ngan gay rogon ngan fith boch ban’en ngorad ya nge yog ni ngan nang e n’en ni bay u lanin’rad mar nanged ni gadad e tin riyul’ e fager rorad. Pi fager nge girdi’ u tabinaw ni yira pagan’uy ngorad e rayog ni ngar ayuweged e piin gallabthir u boch e magawon nib gel ni ke sum; machane ngar guyed rogon ndab ra rin’ed e maruwel ko gallabthir. Ba ga’ ni yooren e fel’ yangaren e yad ma lied yad ngar m’ad ni bochan e der motoyil e gallabthir rorad ngorad.

Bin th’abi fel’ e tow’ath ni rayog ni nge pi’ be’ ngak reb e fel’ yangaren e aram e athap ko felfelan’ ni bay ko gabul nge langlath mar adaged ni ngar pared ni yad ba fas. Boor e fel’ yangaren ni ke mich u wan’rad e n’en ni ke micheg e Bible u murung’agen reb e m’ag ni kab fel’ boch ndab ki n’uw nap’an me yib.

Ngan Ayuwegrad Nge Dab Ra Lied Yad

Reb e ppin u Sapan ni boor yay ni lemnag ni nge li’ ir e gaar: “Kari yoor yay ni kug lemnag ni nggu lieg nggum’. Nap’an ni ku gub achig, ma i rin’ be’ ni ma pagan’ug ngak boch ban’en nib kireb ngog. . . . Da kug nang ko in yang e babyor ni ug yoloy kafram ni u gog riy ni ‘Gu baadag ni  nggum’.’ Ke n’uw nap’an ni kug mang reb e Mich Rok Jehovah, ma chiney e gu ma machib u polo’ e tayim rog, machane yu ngiyal’ e ku ma yib e biney e lem nib kireb ngog. . . . Machane, Jehovah e ir e be ayuwegeg ni nggu par ni gub fas, ma bod ni be gaar ngog, ‘Ngaum par ni gab fas.’”

I yog reb e rugod nu Russia ni 15 e duw rok ni gaar: “Nap’an ni gaman meruk e duw rog, mug lemnag ni dakuriy be’ ni gub t’uf rok. Dariy e tayim ko gallabthir rog ni nggu nonad, ere kug gay rogon ni nggu pithig e magawon rog ni yigoo gag. Gubin e magawon ma ku gon’ nga dakenag. Gubin ngiyal’ ni gamad ma cham e girdi’ rog. Ma aram me yib reb e lem ngog ni nggu lieg nggum’. Machane kar gu felfelan’ u nap’an ni gu mada’nag e Pi Mich Rok Jehovah!”

Cathy ni be’ nu Australia ni 30 e duw rok e bay e thin ni yog nra pi’ e athamgil nga lanin’uy, ya be dag ni rayog ni nge chuw e kireban’ me yib e athap. I gaar: “Boor rogon ni ug lemnag ni nggu lieg nggum’, me tomur riy mug lemnag ni nggu rin’. Gu baadag ni nggu chuw ko biney e fayleng ni ke sug ko kireban’ nge damumuw. Kireban’ nib gel e mo’maw’nag ngog ni nggu chuw u fithik’ e magawon rog, ya gowa kug aw nga ‘tafen e gonow.’ Ere kug lemnag ni faan gu ra lieg nggum’ ma ra chuw e magawon rog.

“Som’on ni gu rung’ag nra paradis e re fayleng ney me par e girdi’ riy u fithik’ e gapas nge felfelan’ ma ri gu baadag. Machane ra gu lemnag ma gowa ba lik’ay. Faani munmun mfin gu nang fan rogon e yafas u wan’ Jehovah nge rogon feni ga’ fadad u wan’. Ke mich u wan’ug ni bay e athap ko gabul nge langlath. Faani tomur riy mfin gu pirieg e kanawo’ ni nggu chuw u lan fare ‘tafen e gonow.’ Machane riyul’ nib mo’maw’. Yu ngiyal’ e ri ma gel e kireban’ rog mu gu par ni ke balyangan’ug. Bochan e kug mon’eg Jehovah u wan’ug ma aram e ke yog ni nggu chuchugur ngak mu gu par nib pagan’ug. Gu be pining e magar ngak Jehovah u gubin ban’en ni ke rin’ ni fan ngog.”

Dab Ku Nim’ Ndawori Taw Nga Yangarey

Faanra fil reb e fel’ yangaren e Bible ma rayog ni nge nang ni ka bay ban’en ni kab fel’ boch nga m’on ni aram e n’en ni yog apostal Paul e “bin riyul’ e yafos” ngay. I fonownag Timothy ni gaar: “Mog ngak e piin ni boor ban’en rorad ko biney e tamilang ndab ra ufanthingad, ma dabi l’agan’rad ko pi n’em nde mudugil, ni aram e pi n’en ni ma fel’ rogoy riy ko biney e tamilang, machane nge l’agan’rad ngak Got ni ir e ba gol ni be pi’ urngin ban’en ngodad ni be fel’ rogodad riy. Mog ngorad ngar ngongliyed e tin nib fel’, . . . mi yad kunuy e flaab ni fan ngorad ni ir e bay mang def ngorad nib gel ni fan ngorad e chiney i yan ngaram.”​—1 Timothy 6:17-19.

Fonow rok Paul e be yip’ fan nthingar da ayuweged boch e girdi’ nge yog e athap ngorad ko gabul nge langlath. “Bin riyul’ e yafos” e aram e n’en ni ke micheg Jehovah nra yog ngak e girdi’ u nap’an e “bin nib beech e lan e lang nge bin nib beech e fayleng.”​—2 Peter 3:13.

Boor e fel’ yangaren ni ur fanayed e drug mu ur uned nga boch e ngongol nib kireb e kar nanged ni aram e n’en nra fekrad i yan ko yam’, machane yad ra lied yad ngar m’ad ma aram e ke mus e yafas rorad u rom. Kar nanged nre fayleng ney ni ke sug ko mahl, nge fanenikan, nge ngongol ni kireb, nge ngongol ndariy e t’ufeg riy e bayi chuw. Kar nanged nre fayleng ney e dabiyog ni nge chuweg e magawon ko girdi’, ya kemus ni yigoo Gil’ilungun Got e rayog ni nge yibnag e bin riyul’ e athap ni aram e bin beech e fayleng nra par e girdi’ nib fel’ riy ni manemus, ma dariy ba ngiyal’ ni yad ra finey ni ngar m’ad.​—Revelation 21:1-4.