Mu Ayuweg e Bitir Rom ni Ngar Gelgad ko Pi Magawon ni Ma Yib Ngorad

BOOR ban’en ni yima towasariy e piin fel’ yangaren ngay. Yad be par u fithik’ nifengin e re fayleng rok Satan nib kireb ney, ma thingar ra gelgad ko “tin ni ma ar’arnag” e piin fel’ yangaren. (2 Tim. 2:22; 1 John 5:19) Maku reb, e bochan ni yad be athamgil ni ngar ‘lemnaged e En ni Sunmiyrad’ ma thingar ra gelgad ko moning nge gafgow ni ma tay e piin ni ma togopuluw ko michan’ rorad. (Ekl. 12:1) Reb e walag ni Vincent fithingan e weliy murung’agen e ngiyal’ ni kab pagel ni gaar: “Gubin ngiyal’ ni yima gafgownageg, ma yima puw ni cham ngog ni bochan e gag reb e Mich Rok Jehovah. Boor yay nib gel e gafgow ni yima tay ngog ma aram mu gu dabuy ni nggu wan nga skul.” *

Gathi kemus ni yigoo towasar e thingari gel pi fakdad ngay, ya ku thingar ra gelgad ko ar’ar rorad ni nge taareb rogorad e pi taab yangar rorad. Cathleen, nreb e walag ni 16 e duw rok e yog ni gaar, “De mom ni ngam par ni gab thil u fithik’ey.” Ma reb e walag ni Alan ni 21 e duw rok e ki yog ni gaar, “Ba ga’ ni ma piningeg e piin ni gamad nga skul ni nggu un ngorad ko Sabado nge Madnom, ma ri gu baadag ni nggu un.” Boor e fel’ yangaren ni yad baadag ni ngar uned nga boch e gosgos ni yima tay u skul, ma re n’ey e rayog ni nge k’aringrad ngar chaggad ngak boch e girdi’ nde fel’ e ngongol rorad. Reb e walag nib fel’ yangaren ni Tanya fithingan e yog ni gaar, “Boor mit e gosgos ni gu baadag. Pi coach u skul ara piin ni yad ba ga’ u boch e gosgos e yugu yad ma yog ngog ni nggu un nga boch e gosgos ni yima tay u skul. Ere rib mo’maw’ ni nggu siyeg.”

Uw rogon ni ngam ayuweg e bitir rom ni ngar gelgad ko pi magawon ni ma yib ngorad? Ke tay Jehovah chilen ko gallabthir ni ngar  ayuweged e bitir rorad. (Prov. 22:6; Efe. 6:4) Ere n’en ni ma nameg e gallabthir ni bay madgun Got u wan’rad e ngar ayuweged e bitir rorad ngar adaged ni ngaur folgad rok Jehovah. (Prov. 6:20-23) Faan yira rin’ ni aram rogon, ma aram e rayog ni ngi i siyeg e bitir rorad e pi n’en ni ma towasariyrad e fayleng ngay ni mus ko ngiyal’ nder guyrad e gallabthir rorad.

Gathi ban’en nib mom ko gallabthir ni ngar yognaged e tin nib t’uf ko tabinaw rorad, mar chuguliyed pi fakrad, mar rin’ed e maruwel u lan e ulung u taabangiyal’. Boch i yad e dariy be’ ni be ayuweg ko pi maruwel ney, fa en ni mabgol rok e de mich e thin rok Got u wan’. Yugu aram rogon, ma baadag Jehovah ni nge tay e gallabthir ba ngiyal’ ni ngar skulnaged e bitir rorad mar ayuweged yad. Ere mang e rayog ni ngam rin’ ni ngam ayuweg e bitir rom ni ngar gelgad ko pi n’en ni yima towasariyrad ngay, nge pi n’en ni yima waliyrad ngay, nge gafgow ni yima tay ngorad ni gubin e rran?

Nge Fel’ e Tha’ u Thilrad Jehovah

Som’on e ba t’uf ni nge riyul’ Jehovah u wan’ e bitir rodad nge yan i par ni gowa kar ‘guyed.’ (Heb. 11:27) Vincent ni kan weliy murung’agen faram e ke yib ngan’ rogon ni ayuweg e gallabthir rok nge fel’ e tha’ u thilrow Jehovah. Ke gaar: “Kar filew ngog feni ga’ fan e meybil. Keb ngan’ug nnap’an ni ku gub bitir, ma gu ma meybil ngak Jehovah ni gubin e nep’ u m’on ni nggu mol. Rib riyul’ Jehovah u wan’ug.” Gimed ma meybil e bitir rom u taabang, fa? Mang ndab mu motoyil ko n’en ni yad ma yog ko meybil rorad? Yugu yad ma sul u daken taa bugithin? Fa yad ma weliy u lan e meybil rorad rogon Jehovah u wan’rad? Faan ga ra motoyil ko meybil ni ma tay e bitir rom, ma rayog ni ngam nang rogon ni yad be mon’og ko tirok Got ban’en.

Faanra i beeg e piin fel’ yangaren e Bible rorad ni goo yad ma aram reb e kanawo’ nrayog ni ngar chugurgad ngak Jehovah. Cathleen ni kan weliy murung’agen faram e gaar: “Bochan ni kug beeg e Bible ni polo’ u nap’an ni ku gub bitir  ma ke ayuwegeg ni ngaug par nib pagan’ug ko ayuw rok Jehovah ni mus ko ngiyal’ ni yibe togopuluw ngog.” Ere bay ba ngiyal’ ni ke tay e bitir rom ni ngaur beeged e Bible rorad riy ni yigoo yad, fa?​—Ps. 1:1-3; 77:12.

Riyul’ nib thilthil rogon ni ma fol e bitir ko fonow ni ma pi’ e gallabthir rorad ngorad. Maku reb e, mon’og ni kar ted ko tirok Got ban’en e be yan u yangarrad. Machane, faanra dab ni ayuwegrad ma ra mo’maw’ ni nge riyul’ Jehovah u wan’rad. Thingari fil e gallabthir e thin rok Got ngak pi fakrad ya nge yog ni ur lemnaged e thin rok Jehovah ni yugu demtrug e gin’en ni yad be yan riy. (Deut. 6:6-9) Ma thingari mich u wan’rad ni ma lemnagrad Jehovah.

Rogon ni Nge Fel’ e Numon u Thiliy

Ku reb e kanawo’ ni ngam ayuweg e bitir rom e ngaum non ngorad. Machane, ra nge fel’ e numon u thilmed e bitir rom ma gathi kemus ni ngaum non ngorad. Ba muun ngay ni ngaum fith boch ban’en ngorad mag gum’an’nigem ngaum motoyil ko fulweg rorad ni yugu aram rogon nib thil ko n’en ni ga be lemnag ni ngam rung’ag. Anne ni chitiningin l’agruw e pagel e gaar, “Gu ma fithrow nge mada’ ko ngiyal’ ni kug nang fan e n’en ni yow be lemnag nge magawon ni yow be mada’nag.” Manang e bitir rom ni ga ma motoyil ngorad u nap’an ni yad be weliy salaprad, fa? Tanya ni kan weliy murung’agen faram e gaar: “Ri ma motoyil e gallabthir rog ngog ma darur pagew talin e n’en ni gamad ma weliy. Yow manang fithingan e piin ni gamad nga skul. Ba ga’ ni yow ma fith murung’agrad nge boch ban’en ni kug weliyed kafram.” Ere faanra nge fel’ e numon u thiliy ma rib ga’ fan ni ngaun motoyil ma dab ni pagtalin e n’en ni kan weliy.

Boor e tabinaw ni kar pirieged ni nap’an e abich e aram e ngiyal’ nib fel’ ni ngar sabethingad. I yog Vincent ni gaar: “Abich ni gamad ma tay e tabinaw rog u taabang e rib ga’ fan u wan’mad. Ra taw nga nap’an e abich ma goo gamad bay u tebel. Dabiyog ni nggu yaliyed e TV, fa nggu motoyilgad ko radio, ara gu beeged e babyor u nap’an e abich. Aram e ngiyal’ nrayog ni nge gapas lanin’ug ko pi magawon ni gu ma mada’nag u skul.” Miki gaar: “Bochan ni ke mecham ngog ni gamad ma sabethin e gallabthir rog u nap’an e abich, ma ke ayuwegeg ndab kug magawon ni nggu weliy salpeg ngorow.”

Am fithem ni nge lungum, ‘Uw urngin yay ni gamad ma abich e tabinaw rog u taabang u gubin e wik?’ Gur, faan ga ra thilyeg boch ban’en u rogon e par ko tabinaw rom ma gathi ra fel’ boch e numon u thilmed e bitir rom?

Feni Ga’ Fan e Fol Bible ni Tabinaw

Fol Bible ni Tabinaw ni gubin e wik e ma ayuweg chon e tabinaw ni nge puf e thin u thilrad miki ayuweg e piin fel’ yangaren ni ngar pithiged e magawon rorad. Alan ni kan weliy murung’agen faram e gaar: “Gallabthir rog e yow ma fanay e ngiyal’ ni gamad ma fol Bible ni tabinaw ni ngar gayew rogon ni ngar nangew e n’en ni bay u lanin’mad. Yow ma lemnag boch ban’en nrayog ni nggu weliyed ni bay rogon ko magawon ni gamad ma mada’nag.” Ma chitiningin Alan e gaar: “Gamad ma tay ba ngiyal’ u nap’an e fol Bible romad ni ngan yan u yaan boch ban’en ni gamad be fil. Pi n’ey e ke ayuweg e bitir romow ni ngar nanged rogon ni ngad ayuweged e michan’ rorad mar daged ni tin ni ke mich u wan’rad e ba riyul’. Ki yog ni ngar pared nib pagan’rad u nap’an ni kar mada’naged e magawon.”

Nap’an ni yira towasariy e bitir nga boch ban’en, ma gathi kemus ni nga rogned e danga’ mi yad chuw, ya ku thingar ra weliyed fan. Ku thingar ra nanged e n’en ni ngar rin’ed u nap’an ni yibe moningnagrad ni bochan e michan’ rorad. Faanra dab ra nanged rogon ni ngar weliyed e tin ni ke michan’rad ngay, ma aram e dabiyog ni ngar pared ni yad ba mudugil ni fan ko bin riyul’ e liyor. Yira yan u yaan boch ban’en ni kan fil ma ra ayuwegrad ni ngari pagan’rad.

Fare  kahol ni bay ko page 30 e be weliy boch e magawon ni ma mada’nag e bitir u skul  nrayog ni ngan yan u yaan u nap’an e Fol Bible ni Tabinaw. Mu gay rogon ni nge m’ag e pi n’ey ko bitir rom ni aram e ngam ayuwegrad ni ngar nanged rogon ni ngar pied e fulweg ko gubin e magawon ni yad ra mada’nag. Maku reb e rayog ni ngar weliyed boch ban’en ni yira fil rok boch e girdi’ u lan e Bible. Pi n’ey e dariy e maruwar riy nra ayuweg e bitir rom ni ngar nanged e n’en ni ngar rin’ed u nap’an ni kar mada’naged e magawon u skul.

Rayog ni Nge Pagan’uy u Tabinaw?

Tabinaw e aram bang ni ma nameg e bitir rom ni ngar bad ngay u tomuren ni kar sulod u skul, fa? Faanra aram bang nrayog ni nge pagan’ e bitir rom riy, ma ra ayuwegrad ni ngar gelgad ko pi magawon rorad. Reb e walag nib pin ni ma maruwel u Bethel e yog ni gaar: “Nap’an ni gu ilal ma reb e ban’en nri ayuwegeg e aram e tabinaw romad nrib pagan’ug riy. Demtrug e miti magawon ni gu ma mada’nag u skul ma gu manang nnap’an ni gu ra sul nga tabinaw, ma gubin ban’en mab fel’ rogon.” Ere uw rogon e tabinaw rom? Aram bang ni yib ta damumuw riy, ma yima athamgiliy ban’en riy ni fan nga nog e sorok ku be’, ara yima yurba’ riy? Fa aram bang ni bay e t’ufeg, nge felfelan’, nge gapas riy? (Gal. 5:19-23) Faanra dariy e gapas u lan e tabinaw, ma ga ma gay rogon ni ngam nang e n’en nib t’uf ni ngan thilyeg ya nge yog ni pagan’ e bitir u tabinaw, fa?

Ku reb e kanawo’ ni ngam ayuweg e bitir rom e ngam gay rogon ni ngaur chaggad ngak boch e girdi’ ni yad ra pi’ e athamgil nga lanin’rad. Rayog ni ngam uneg boch e walag u lan e ulung ni kar ilalgad ko tirok Got ban’en ko n’en ni gimed ma rin’ e tabinaw rom ni fan ko felfelan’, fa? Rayog ni ngam pining e piin ni yad ma lekag e ulung ara yugu boch e girdi’ ni yad ma machib u polo’ e tayim rorad nga tabinaw rom ni ngam abichgad u taabang, fa? Ga manang boch e missionary, ara boch e walag ni yad ma maruwel u Bethel nrayog ni nge fel’ e thin rorad e bitir rom, fa ur yolgad ngorad, ara ur nonad u telefon, fa? Fager ni aray rogon e rayog ni nge ayuweg e bitir rom ni nga ranod ko bin nib mat’aw e kanawo’ mar nameged boch ban’en ni fan ko tirok Got. Mu lemnag e kanawo’ nib fel’ ni dag apostal Paul ngak Timothy. (2 Tim. 1:13; 3:10) Bochan ni ur chaggow ma aram e n’en ni ayuweg Timothy ni nga i par nib m’on u wan’ e tirok Got ban’en.​—1 Kor. 4:17.

U Mog e Tin nib Fel’ ni Ke Rin’ e Bitir Rom

Ri ma felfelan’ Jehovah ni ma guy e piin fel’ yangaren ni yad be par ni yad ba mudugil ni fan ko tin nib mat’aw ni yugu aram rogon ni boor ban’en ni yima towasariyrad ngay u lan e fayleng rok Satan. (Ps. 147:11; Prov. 27:11) Dariy e maruwar riy ni ga ma felfelan’ ni ga ma guy pi fakdad ni yad be mel’eg e bin nib fel’ e kanawo’. (Prov. 10:1) Mog ko bitir rom rogon ni ga ma lemnagrad, mag pining e magar ngorad ko tin nib fel’ ni kar rin’ed. Jehovah e ir e ke dag e bin nib fel’ e kanawo’ ngak e gallabthir. Nap’an nni taufenag Jesus, me gaar Jehovah: “I gur Fakag, ni gab t’uf rog, ni kari felan’ug ngom.” (Mark 1:11) Yugu aram rogon ni manang Jesus e gafgow ni bayi yib ngak, ma ba mudugil ni ke athamgil laniyan’ ni bochan e thin rok e Chitamangin. Ere ku arrogon ni ngam dag ko bitir rom ni yad ba t’uf rom ma nga u mog e tin nib fel’ ni yad ma rin’.

Dabiyog ni ngam taleg e towasar, nge gafgow, nge moning ni yima tay ko bitir rom. Machane, rayog ni ngam ayuwegrad. Ni uw rogon? Aram e ngam ayuwegrad nge yog ni nge fel’ e tha’ u thilrad Jehovah. Mag guy rogon ni nge fel’ e numon u thilmed. Mu kum gay rogon ni nge m’ag ngorad e tin ni yibe fil u nap’an e Fol Bible ni Tabinaw, me pagan’rad u tabinaw. Faan ga ra rin’ ni aray rogon ma dariy e maruwar riy nra ayuweg e bitir rom ni ngar nanged rogon i pithig e magawon rorad.

[Footnote]

[Picture on page 30]

 NGAN YAN U YAAN BAN’EN NRAYOG NI NGE AYUWEGEY

Baaray boch e magawon ni ma mada’nag e piin fel’ yangaren. Ere mang ndab mmarod u yaan boch e pi n’ey u nap’an e Fol Bible ni Tabinaw?

▸ Ka nog ngak reb e rugod ni fakam ni nge un nga boch e gosgos u skul.

▸ Kan ognag e langad nge tamagow ko bitir rom u nap’an ni be sul i yan nga tabinaw.

▸ Ke fith boch e bitir nu skul ngak reb e pagel ni fakam ko mang fan nder ma un nga boch e madnom ni yima tay u skul.

▸ Nap’an ni yibe yan ko machib me mada’nag reb e rugod ni fakam be’ ni yow nga skul.

▸ Kan fith ngak reb e rugod ni fakam ko mang fan nder ma siro’ ko flak.

▸ Yugu be moningnag reb e pagel e bitir rom ni bochan e ir reb e Mich Rok Jehovah.

[Picture on page 29]

Ke dugliy e bitir rom ba ngiyal’ ni ngaur beeged e Bible riy ni goo yad, fa?