Mu Un ko fare Mokun Woldug Nge Mus Rogom Riy

“Gubin ngiyal’ ma nguum muruwliyed e maruwel romed ni fan ngak Somol.”​—1 KOR. 15:58.

1. Mang maruwel e pining Jesus pi gachalpen ngay?

 NGIYAL’ nem e ke chugur nga tungun e duw ni 30 C.E., ma be milekag Jesus ni ke taw nga Samaria me yan i toffan nga ba luwed ni bay u tooben fare binaw nu Sykar. U rom e yog riy ngak pi gachalpen ni gaar: “Ngam fal’eged i yaliy e yungi woldug: ya woldug ni ba’ riy e ke el ni ke taw nga nap’an ni ngan t’ar!” (John 4:35) Gathi ngan t’ar wom’engin e woldug e be yip’ Jesus fan, ya be yip’ fan ni ngan kunuy e girdi’ nib fel’ gum’irchaen ni ngar manged pi gachalpen. Ere n’en ni be rin’ e be pining pi gachalpen ni ngar uned ko re maruwel nem. Kab gel e maruwel ni ngan tay ma ke lich e tayim!

2, 3. (a) Mang e be dag ni gad be par u ngal’an e mokun woldug? (b) Mang e gad ra weliy u lan e re thin ney?

² Fapi thin ni yog Jesus u murung’agen e mokun woldug e ku bay fan ngodad e chiney. Gad be par u ba ngiyal’ ni ke el wom’engin e woldug ni “ke taw nga nap’an ni ngan t’ar!” Gubin e duw ni bokum milyon e girdi’ ni yibe piningrad ni ngar filed e tin riyul’ nra yognag e yafos ni manemus ngorad, ma bokum biyu’ i yad e yibe taufenag. Gad ba tow’ath ni gad be un ko re maruwel ney ni gathi bay kun rin’ bayay, ni gad be maruwel u tan pa’ e Masta ko re maruwel ney ni aram Jehovah Got. Ere ga be ‘maruweliy e maruwel rom’ ni fan ko re mokun woldug ney, fa?​—1 Kor. 15:58.

³ Nap’an fa dalip nge baley e duw ni i machib Jesus u fayleng, mi i skulnag pi gachalpen ni fan ko re maruwel ney ni mokun woldug. Re thin ney e yira weliy riy dalip ban’en nib ga’ fan ni fil Jesus ngak pi gachalpen. Ra reb ko pi n’ey ma be tamilangnag e re fel’ngin nib t’uf ni nge yog ngodad u nap’an ni gad be maruwel ni ngad yognaged boch pi gachalpen Jesus. Ngad weliyed e pi fel’ngin ney ni reb nge reb.

Ba Ga’ Fan e Sobut’an’

4. Uw rogon ni susunnag Jesus feni ga’ fan e sobut’an’?

⁴ Mu lemnag e n’en ni ke buch: Ka fini mu’ pi gachalpen Jesus i tugthinnag ko mini’ rorad e ba tolang ma ka be m’ug u owcherad ni be yib lanin’rad ngorad. Ma aram me pining Jesus bochi tir nge sak’iynag nga p’eowcherad me gaar ngorad: “En nra yan i par ni ir e th’abi tolang ko gagiyeg nu tharmiy e en nra sobut’nag ir nge bod e chi tir ney.” (Mu beeg e Matthew 18:1-4.) Susun ndab ra lemgad ni bod e girdi’ nu fayleng ni yad ma turguy rarogon e girdi’ u wan’rad ni be yan u rogon feni yoor ban’en rok be’, nge liw rok, ya thingar ra nanged ni faanra ngar tolanggad ma aram e ngar ‘sobut’naged yad’ u mit e girdi’. Ra tow’athnagrad Jehovah ma ra maruwel ngorad ni faanra sobut’an’rad.

5, 6. Mang fan nthingari sobut’an’um ni faanra nge yog nim un ko fare maruwel ni mokun woldug? Mu weliy.

⁵ Ki mada’ ko ngiyal’ ney ma boor e girdi’ nu fayleng ni yad ma nameg e fel’ rogon, nge liw nib tolang, nge ku boch ban’en. Angin ni ke yib riy, e ke lich ara dakuriy e tayim rorad ni fan ko tirok Got ban’en. (Matt. 13:22) Machane, girdi’ rok Jehovah e yad ba felfelan’ ni yad ma ‘sobut’naged yad’ u p’eowchen e girdi’ ya nge yog ni tow’athnagrad fare Masta ko mokun woldug mi yad fel’ u wan’.​—Matt. 6:24; 2 Kor. 11:7; Fil. 3:8.

⁶ Mu lemnag e n’en ni rin’ Francisco ni ir reb e piilal u reb e ulung u South Amercia. Nap’an ni kab pagel me tal ko skul nib tolang ni bochan e nge un ko pioneer. I yog ni gaar: “Munmun mu gu puruynagew be’ e mabgol. Rayog ni nggu un nga reb e maruwel nra fel’ rogomow e ppin rog riy. Machane, kug dugliyew ni nggu lichnagew e maruwel u puluwmow ya nge yog ni nggu ululgow  ko pioneer. Faani munmun ma gamow fakay e bitir, ma aram me yoor boch e magawon romow. Machane, ke ayuwegmow Jehovah ni nge dab kug yoornagew e maruwel nga puluwmow.” Tomur riy me gaar: “Ke pag guyey e duw ni kug mang reb e piilal, maku boor e maruwel u lan e ulung ni kug un i rin’. Dariy ba ngiyal’ ni ke kireban’mow ni bochan e da gu mon’egew e tin nu fayleng ban’en.”

7. Uw rogon ni kam gay rogon ni ngam fol ko fare fonow ni bay ko Roma 12:16?

⁷ Roma 12:16 (NW) e be gaar: “Dab um lemnaged e tin nib tolang ban’en ya tin nib sobut’ ban’en e ir e ngaum lemnaged.” Faan ga ra fol ko re fonow ney ma boor e tow’ath nra yog ngom ko re maruwel ney ni mokun woldug.​—Matt. 4:19, 20; Luke 18:28-30.

Yira Pasig Ma Ra Yib Angin

8, 9. (a) Mu weliy fare fanathin rok Jesus u murung’agen fa dalip i tapigpig. (b) Mini’ e rayog ni nge pi’ e re fanathin ney e athamgil nga laniyan’?

⁸ Reb e fel’ngin nib t’uf ni nge yog ngodad u nap’an ni gad be rin’ e re maruwel ney e aram e pasig. I weliy Jesus e re n’ey u lan fare fanathin rok u murung’agen fa dalip i tapigpig. * Re fanathin nem e murung’agen be’ nib moon ni yan ko milekag me pining dalip i tapigpig rok nge madilnag urngin ban’en rok ngorad. Fa bin som’on e tapigpig e pi’ lal e biyu’ e dolla ngak, ma bin migid e l’agruw e biyu’, ma bin dalip e taareb e biyu’. Tomuren ni ke yan fare moon me fek fagal ni som’on e tapigpig e salpiy rorow ngar ‘maruwelgow’ ngay. Ma fa bin dalip e tapigpig e ba “malmal.” I fek e birok e salpiy nge yan i k’eyag. Faani sul fare moon, me tow’athnag fagal ni som’on e tapigpig ni aram e pag fan “pire’ ban’en” ngorow. Ma fa bin dalip e tapigpig e sulweg rok fapi salpiy ni ke pi’ ngak me yog ngak ni nge chuw u tafen.​—Matt. 25:14-30.

⁹ Dabisiy ni ga baadag ni ngam folwok rok fa gali tapigpig ni yow ba pasig, ma ga un i rin’ fare maruwel ni ngan pingeg e girdi’ ngar manged pi gachalpen Jesus. Machane uw rogon ni faanra dabiyog ni ngam un i rin’ e re maruwel ney nib fel’ rogon ni bochan rarogom? Fa reb e kam pilibthir fa kam m’ar. Faanra aray e magawon rom ma fare fanathin rok Jesus ni murung’agen fa dalip i tapigpig e ra pi’ e athamgil nga lanin’um.

10. Uw rogon ni dag fare moon u lan fare fanathin nde laniyan’, ma mang fan ni be pi’ e re n’ey e athamgil nga lanin’um?

¹⁰ Mu tay fanam i yan riy ni ke nang fare moon ko fare fanathin nra bagayad fapi tapigpig ma bay e tin rayog rok. I dag e re n’ey u nap’an ni pi’ fapi salpiy ngak fapi tapigpig ‘nrogon e maruwel nrayog rorad.’ (Matt. 25:15) Fa bin som’on e tapigpig e boor e tin ni yognag ko bin migid e tapigpig. Machane manang fare moon  gelngin e athamgil ni kar tayew mab ga’ fan u wan’, ere aram fan ni yog ni yow ba manigil me tow’athnagrow ni taareb rogon. (Matt. 25:21, 23) Ere ku er rogon Jehovah Got ni ir e Masta ko mokun woldug ni gad be tay, ni manang rarogon e tin nrayog ni ngam rin’ ni fan ko pigpig ni ga be tay ngak. Dabi pagtalin e pigpig ni ga be tay ngak u polo’ i gelngim, ma ra tow’athnagem.​—Mark 14:3-9; mu beeg e Luke 21:1-4.

11. Mu weliy rogon ni yira tow’athnagdad ko pasig ni gad be tay u fithik’ boch ban’en nib mo’maw’.

¹¹ N’en ni rin’ Selmira nreb e walag nib pin ni ma par u Brazil e be dag ni pasig ko pigpig ngak Got e der yan u rogon e par rodad. Reliw’ e duw ni ke boyochnag boch e moro’ro’ e pumoon rok ke yim’, ma dalip e bitir rorow ni bay nthingari ayuweg. Ma maruwel nib n’uw nap’an ni ma klinnag e naun ko girdi’, maku thingari un ko maaf af me taw nga tafen. Yugu aram rogon feni mo’maw’ e par rok ma ke un ko pioneer. Maku bay l’agruw e bitir rok ni kar unew ko pioneer. I yog ni gaar: “U lan e pi duw ney ma ke pag reliw’ e girdi’ ni kug fil e Bible ngorad ma kar manged boch i chon e tabinaw rog. Ke mada’ ko chiney, ma gu be felfelan’ ni ke fel’ e thin romad ma bay e t’ufeg u thilmad. Aray reb e tow’ath ndabiyog ni ngan chuw’iy ko salpiy.” Faen Masta ko mokun woldug e ba mudugil ni ke tow’athnag Selmira ko athamgil ni be tay u fithik’ e pasig!

12. Uw rogon ni nge m’ug ni gad ba pasig ko machib?

¹² Faanra dabiyog ni ngam yoornag e tayim rom ko machib ni bochan rarogom, ma rayog ni ngam guy rogon ni nge yib angin e machib ni ga be tay. Faan ga ra fol ko fonow ni yima pi’ u nap’an e Service Meeting ni yima tay u gubin e wik, ma rayog ni ngam salap ko machib miki yib angin e machib ni ga be tay. (2 Tim. 2:15) Maku reb e faanra rayog rom mab fel’ ni ngam digey boch ban’en ni ga ma rin’ ni yugu de ga’ fan, fa mu rin’ u yugu ba ngiyal’ ya nge yog ni ngam un ko machib nib fel’ rogon.​—Kol. 4:5.

13. Mang e n’en th’abi ga’ fan nra ayuwegdad ni ngad maruweliyed ni ngad pared ni gad ba pasig?

¹³ Dab mu pagtalin ni faanra gab pasig ko pigpig ngak Got ma aram e be m’ug nib t’uf rom ma ga be pining e magar ngak. (Ps. 40:8) Fa bin dalip e tapigpig ni weliy Jesus murung’agen u lan fare fanathin rok e ke rus ko masta rok, ya be lemnag ni fare masta e be’ nib kireb nder runguy e girdi’. Ere n’en ni rin’ fare tapigpig e yan i k’eyag fapi salpiy nni pi’ ngak nde maruwel ngay ni nge yib e win riy. Ere thingar da paged e ngongol ni aray rogon, ngad maruweliyed e tha’ u thildad Jehovah nge par nib fel’. Mu tay ba ngiyal’ ni ngam fil e Bible ma ga fal’eg i lemnag pi fel’ngin Jehovah nrib manigil ni bod rogon e t’ufeg, gum’an’, nge runguy. Faan ga ra rin’ ni aray rogon, ma aram e rayog ni ngam pigpig ngak Jehovah u polo’ i gum’irchaem.​—Luke 6:45; Fil. 1:9-11.

“Thingar Mpired ni Gimed ba Thothup”

14. Mang boch ban’en nthingari rin’ e piin ni yad baadag ni ngar uned ko re mokun woldug ney?

¹⁴ I weliy apostal Peter e n’en nib m’agan’ Got ngay ni fan ko pi tapigpig rok u fayleng nrogon nib puluw ko thin ko Pi Babyor ko Bible nni Yoloy Som’on Nthin ni Hebrew ni gaar: “Ngam pired ni gimed ba thothup u fithik’ urngin e tin ni gimed be rin’, ni bod rogon Got nib thothup ni ir e ke piningmed. Ya be gaar e babyor nib thothup, ‘Thingar mpired ni gimed ba thothup, ya gub thothup.’” (1 Pet. 1:15, 16; Lev. 19:2; Deut. 18:13) Be tamilangnag e re thin ney ni piin ni yad be un ko re mokun woldug ney e thingar ra pared ni yad ba beech u mit Got. Uw rogon nrayog ni ngad rin’ed e re n’ey? Rayog ni ngad rin’ed u daken e ayuw ko thin rok Got.

15. Mang e rayog ni nge rin’ e thin rok Got ngodad?

¹⁵ Thin rok Got nib riyul’ e taareb rogon ko ran ni ma beechnagey. I yog apostal Paul ni fare ulung i Kristiano ni kan dugliyrad e yad ba beech u mit Got, ma taareb rogorad ngak be’ nib pin ni ngar mabgolgow Kristus, ni kan machalbognag “ko ran ke beech, ni fan e nge yog ni pi’ e re galesiya nem ngak nrib gamog, ma mmachalbog ma dariy thibngin, . . . , ma dariy bayang riy nde fel’.” (Efe. 5:25-27) U m’on ni buch e re n’ey ma ki weliy Jesus rogon ni ma beechnagey fare thin rok Got ni i machibnag. Nap’an ni be non ngak pi gachalpen, me gaar: “Kam beechgad ni bochan fapi thin ni kug weliy ngomed.” (John  15:3) Ere, bay gelngin e thin rok Got nrayog ni nge beechnagey. Machane, faan gad ra pag e thin rok Got ni nge beechnagdad ma aram e rayog ni nge fel’ e liyor rodad u wan’.

16. Uw rogon ni ngad pared ni gad ba beech u mit Got?

¹⁶ U m’on ni ngad manged boch i girdien e re mokun woldug ney, ma thingar da digeyed boch e ngongol nde beech u mit Got. Ma faanra ngkud ululgad i rin’ e re maruwel ney ma thingar ud folgad ko pi motochiyel rok Jehovah. (Mu beeg e 1 Peter 1:14-16.) Thingar da paged e thin rok nga i beechnagdad ni gubin ngiyal’ ni bod rogon dowdad ni gad ma gay rogon ni nga i par nib beech. Re n’ey e ba muun ngay e beeg Bible nge muulung. Ku be yip’ fan nthingar da athamgilgad ngaud folgad ko pi n’en ni ma puguran Got ngodad. Faan gad ra rin’ ni aray rogon ma rayog ni ngad gelgad ko pi meewar rodad nge pi n’en ni yima suruydad ngay ko re fayleng ney. (Ps. 119:9; Jas. 1:21-25) Ri gad ba felfelan’ ngay ni kad nanged nrayog ni nge ‘beechnagdad’ e thin rok Got nib riyul’ ni yugu ra kad rin’ed e denen ni ubchiya’.​—1 Kor. 6:9-11.

17. Faanra ngad pared ni gad ba beech, ma mang fonow e thingar da folgad riy?

¹⁷ Ga ma pag e thin rok Got ni nge beechnagem, fa? Mang e ga ma rin’ ni faanra kam guy ni bay e riya’ u boch ban’en ni yima chuweg e chalban ngay? (Ps. 101:3) Ga ma kol ayuw ko piin ni ga ma chag ngorad u skul nde taareb e michan’ romed ngu tabon e maruwel, fa? (1 Kor. 15:33) Riyul’ ni ga be athamgil ni ngam gel ko pi n’en ni gab meewar riy nrayog ni nge alitnagem u mit Jehovah, fa? (Kol. 3:5) Ga ma par ni gab dar ko pi ngongolen e am ko re fayleng ney nge tagenging ni yima tay ko gosgos, fa?​—Jas. 4:4.

18. Faan gad ra par ni gad ba beech u mit Got, ma uw rogon nra ayuwegdad nge yib angin e maruwel rodad?

¹⁸ Faanra um fol ko pi n’ey u fithik’ e yul’yul’ ma ra yib angin ngom. I taareb rogonnag Jesus pi gachalpen nga pa’ngin e grapes ni gaar: “Urngin i pa’ngig nder k’uf e ma th’ab [e chitamag], ma ma tamilangnag owchen urngin i pa’ngig ni be yib wom’engin, ni fan e nge tamilang owchen nge yib wom’engin ni pire’.” (John 15:2) Faan ga ra fol ko thin riyul’ nu Bible ni ma beechnagey, ma ra yib angin e maruwel ni ga be tay.

Flaab e Chiney i Yan nga M’on

19. Uw rogon ni kan tow’athnag e athamgil ko mokun woldug ni i tay pi gachalpen Jesus?

¹⁹ Pi gachalpen Jesus ni yad ba yul’yul’ ni ur folgad ko fonow ni i pi’ ngorad, e nap’an e Pentekost ko duw ni 33 me yib gelngin Got nib thothup nga dakenrad ngar machibgad “nge yan i mada’ ko yungi n’en ni yan i mus e fayleng ngay.” (Acts 1:8) Ur pigpiggad ni boch i yad e girdien fare ulung ni ma pow’iyey, ma boch i yad e missionary, ma boch e ma lekag e ulung. Machane, yad gubin ni ur rin’ed ban’en nib ga’ fan ni ngar machibnaged fare thin nib fel’ “ngak urngin e girdi’ u fayleng.” (Kol. 1:23) Ri boor e tow’ath ni yog ngorad, ma rib gel e felfelan’ nra pied ko girdi’!

20. (a) Mang boch e tow’ath ni ke yog ngom ni bochan e ga be un ko fare maruwel ni mokun woldug? (b) Mang e kam dugliy ni ngam rin’?

²⁰ Faanra ud pared nib sobut’an’dad, ma gad ba pasig, ma gad be fol ko pi motochiyel ni bay ko thin rok Got, ma aram e rayog ni ngaud pared ni gad ba felfelan’ ko re maruwel ney ni mokun woldug. Yugu aram rogon ni boor e girdi’ e ngiyal’ ney ni be magafan’rad ko tin nu fayleng ban’en, machane gadad e gad ba felfelan’ ma ba fel’ u wan’dad e tin ni bay rodad ban’en. (Ps. 126:6) Bin th’abi ga’ fan riy e ‘gadad manang ni pigpig ni gadad be tay ngak Somol e gathi ra yan i aw nib m’ay fan.’ (1 Kor. 15:58) Fare Masta ko mokun woldug ni aram Jehovah Got e ra tow’athnagdad ndariy n’umngin nap’an ni bochan e ‘maruwel ni kad ngongliyed, ara rogon nib t’uf rodad ni kad daged.’​—Heb. 6:10-12.

[Footnote]

Ka Ga Manang?

Nap’an ni ga be athamgil ni ngam un ko fare maruwel ni mokun woldug ma . . .

• mang fan ni ngari sobut’an’um?

• uw rogon ni ngam par ni gab pasig?

• mang nib ga’ fan ni ngam par ni gab beech u mit Got?

[Study Questions]

[Picture on page 21]

Sobut’an’ e ra ayuwegdad ni nge m’on u wan’dad e pigpig ni gad be tay ngak Got nge maruwel ni gad be tay ni fan nga Gil’ilungun