Dakurur Rusgow ko Tomur

NAP’AN ni ke chugur ko duw ni 1980, ma ke mich u wan’ Gary nge Karen ni ke chugur tomuren e fayleng. Ma aram mar chuwgow u lan e mach nga ranow ra parew nga bang ni ngaur maruweliyew boch ban’en ni fan ngorow ndab kur taga’gow ngak be’, ya yow baadag ni ngar mageygow ni yow ba fas.

Ere n’en nra rin’ew e ra chuw’iyew boch e babyor, mar fekew boch e class, ma ur nonow ngak urngin e girdi’ nrayog. Kar milay’gow, mar yungew 50 ken e gek’iy nder ma ga’ ma bay wom’engin ni yima kay. Kar kunuyew boch e awoch nge talin e maruwel. Mar filew rogon ni ngar yungew boch e woldug nge rogon ni ngan ayuweg e ggan nge par ndabi kireb. Reb e fager rorow e fil ngorow rogon i li’ e gamanman ngan fal’eg rogon e ufin riy nrayog ni ngan kay. I fil Karen rogon ni nge nang e miti gek’iy ni yima kay wom’engin nge woldug ni yima kay limmun nrayog ni ngar kayew u nap’an ni ke m’ay e ggan rorow. Ke fil Gary rogon i fanay e corn ni l’ud nge rogon i ngongliy e stof ni yima fanay e l’ud ngay, nge naun nde t’uf e gamig ngay.

I gaar Karen: “Bochan ni kari gel e wagey u fayleng e ngiyal’ nem ma aram mu gu lemnag ni nge kireb urngin ban’en u fayleng.” Me Gary e gaar: “Kug gay rogon ni nggu taleg e laniyan’ ni bay u thilin e girdi’ nib thil ramaen dowrad, nge Mahl ni Un Tay u Vietnam, nge sasalap ni be tay e girdi’. Machane de n’uw nap’an me mulan’ug,  ya bod ndab ki n’uw nap’an ma girdi’ e yad ra thanged yad ni faanra ngaun par ni aray rogon.”

I gaar Gary: “Faani reb e nep’ u nap’an ni bay buchuuw e tayim rog, mu gu fek e Bible nggu beeg ko Matthew nge mada’ ko Revelation. Mu kug beeg bayay ni aningeg e nep’. Ma faani bin migid e rran ngay, mug gaar ngak Karen: ‘Gad bay ko tin tomuren e rran. Dab ki n’uw nap’an me klinnag Got e fayleng. Ba t’uf ni ngad gayew e piin ni yad ra magey ni yad ba fas.’” Ere ke yan Gary nge Karen ko yurba’ i teliw i yan ni yow be gay e piin ni yad baadag ni ngar mageygad ni yad ba fas u nap’an nra yib e tomur.

De n’uw nap’an me yib reb e Mich Rok Jehovah nga tabinaw rorow, ma aram mar tababgad ko fol Bible. I gaar Karen: “Kar gu felfelan’ ni bochan e kan weliy fan e thin nu Bible ngog nib fel’ rogon. Ke n’uw nap’an ni gu baadag ni nggu nang e tin riyul’ u murung’agen e tomur, ma ka fin gu pirieg. Riyul’ ni bay e athap ko gabul nge langlath. Ma n’en ni kab gel e fel’ riy e ke yog ni nge fel’ thilmow e Chitamangidad nu tharmiy, ni aram fare Got ni sunmiy e palpalth’ib.”

I gaar Gary: “Ke yib fan e yafas rog. Nap’an ni gu tabab i fil e Bible, ma daki yog ni gu tal. Kug beeg e pi yiiy u lan e Bible, ma kug gay e mich riy nra riyul’, ma ke mich u wan’ug ndab ki n’uw nap’an me rin’ Got ban’en. Ma kug lemnag ni: ‘Thingari fal’eg e girdi’ rogorad ni fan ko fare yafas ni baadag Got ni nge yog ngodad, ma gathi magothgoth.’” Ere ke felfelan’ Gary nge Karen ko tin ni bayi buch nga m’on. Dakurur rusgow nga tomuren e fayleng ya ke pagan’row nra chuweg Got gubin e magawon ko girdi’ me paradisnag e fayleng.

Mang e be rin’ Gary nge Karen e chiney ni ke yan 25 e duw? I gaar Karen: “Gu be gelnag e t’ufeg nge michan’ rog ngak Jehovah, ma kug be ayuweg e girdi’ ni ngkur rin’ed e re n’ey. Gamow be ayuwegew Gary gamow nge tabinaw romow ni nga i par nib gel mab taareban’mad ko pigpig ni gamad be tay ngak Got. Gamow be gay rogon ni ngaug parew nib yaram e par romow ma de yoor e chugum romow ya nge yog ni gu ayuwegew yugu boch e girdi’ ko tin nib t’uf rorad.”

Ki gaar Gary: “Gubin ngiyal’ ni gu ma yibilay Gil’ilungun Got ni nge yib nge ayuweg e piin ni kar gafgowgad. Ma gubin ngiyal’ ni gu ra yan ko machib, ma gu ma meybil ya nge yog ni gu pirieg be’ nrayog ni gu weliy e thin nu Bible ngak. Ke pag 25 e duw ni be fulweg Jehovah taban e re meybil rog nem. Ba mich u wan’mow Karen ndab ki n’uw nap’an me thilyeg Jehovah rarogon e fayleng, machane dakugur rusgow ko tomur.”​—Matthew 6:9, 10; 2 Peter 3:11, 12.

[Picture on page 9]

Chiney e ma ayuweg Gary nge Karen e girdi’ ni nge yog e athap ngorad ni bay u Bible