Taareban’, Aram e Pow ko Bin Riyul’ e Liyor

“Bay gu kunuymed nga taabang ngam pired ni gimed bod e saf ni bay u lan ba sum.”​—MIK. 2:12.

1. Uw rogon ni be m’ug e gonop rok Got ko tin ni ke sunmiy?

 I YOG be’ ni yoloy e Psalm ni gaar: “Somol, ri pire’ ban’en ni kam sunumeg! Ri gab gonop nga rogon ni mu sunumeg ni gubin! Ke sug e fayleng nga urngin e tin ni kam sunumeg!” (Ps. 104:24) Ba tamilang e gonop rok Got u rogon ni ma maruwel e woldug, nge chachangeg, nge gamanman, nge ku boch e yafas u taabang ni ngar ayuweged yad. Maku urngin yang u dowey ni tin yira guy nge mada’ ko tin ni dab ni guy ni ma maruwel u taabang ni nge ayuweg fithik’ i dowey nge par nib fel’ rogon.

2. Mang fan ni rayog ni nga nog ni taareban’ ni bay u thilin e Kristiano e gowa ba maang’ang nrogon ni be m’ug ko sasing ko page 16?

² Ke sunmiy Jehovah e girdi’ ni ngaur ayuweged yad. Ba thilthil yaan e girdi’, nge rarogorad, nge salap rorad. Maku nap’an ni sunmiy e gal ni som’on e girdi’ me pi’ boch e fel’ngin ngorow ya nge yog ni nguur ayuwegew yow ma yow be taga’ ngorow. (Gen. 1:27; 2:18) Machane girdi’ ko re fayleng ney e yad ba dar rok Got ma der yog ni ngar pared nib taareban’rad. (1 John 5:19) Ere taareban’ ni immoy u lan e ulung ni Kristiano ko bin som’on e chibog e  gowa ba maang’ang ni bochan e boch i yad e sib nu Efesus, ma boch i yad e ppin nu Greek nib gilbuguwan, ma boch i yad e pumoon nu Jew nib tolang e skul rorad, ma boch i yad e i un ko meybil ko liyos kafram.​—Acts 13:1; 17:4; 1 Thess. 1:9; 1 Tim. 6:1.

3. (a) Uw rogon ni be weliy e Bible murung’agen e taareban’ ni bay u thilin e Kristiano? (b) Mang e gad ra fil ko biney e thin?

³ Bin riyul’ e liyor e ma ayuweg e girdi’ nge yog ni ngar maruwelgad u taabang ni bod e n’en ni ma rin’ e dowef. (Mu beeg e 1 Korinth 12:12, 13.) Boch ban’en ni gad ra weliy ko re thin ney e: Uw rogon ni ma taarebnag e bin riyul’ e liyor laniyan’ e girdi’? Mang fan ni goo Jehovah e rayog ni nge taarebnag laniyan’ girdien e pi nam? Mang boch ban’en ni ma magawonnag e taareban’ u thiliy ni ma ayuwegdad Jehovah ni ngad gelgad ngay? Ma uw rogon nib thil e taareban’ u thilin e tin riyul’ e Kristiano nge tin de riyul’?

Uw Rogon ni Ma Taarebnag e Bin Riyul’ e Liyor Laniyan’ e Girdi’?

4. Uw rogon ni ma taarebnag e bin riyul’ e liyor laniyan’ e girdi’?

⁴ Piin ni yad ma un ko bin riyul’ e liyor e yad manang ni bochan ni Jehovah e ir e ke sunmiy urngin ban’en, ma ir e bay rogon ni nge Gagiyegnag e palpalth’ib. (Rev. 4:11) Ere yugu aram rogon nib thilthil rogon e par ko tin riyul’ e Kristiano nge gin ra bad riy, ma taab motochiyel e yad ma fol riy ni aram e motochiyel rok Got. Maku yad ma puluwnag e ngongol rorad ko pi kenggin e motochiyel nu Bible. Urngin e tin riyul’ e tapigpig rok Jehovah ni yad ma tay ni ir e ‘Chitamangirad.’ (Isa. 64:8; Matt. 6:9) Ere yad bogi walag ni bochan e taareb e michan’ rorad ma taareban’ ni bay rorad e bod e n’en ni yog e en ni yoloy e Psalm ni gaar: “Rib fel’ ma ba manigil, ni ngi i par e girdi’ rok Got u taabang nib taareb lungurad!”​—Ps. 133:1.

5. Mang fel’ngin e ku ma taarebnag laniyan’ e tin riyul’ e tapigpig rok Got?

⁵ Yugu aram rogon ni dawori flont e tin riyul’ e Kristiano, ma yad ma liyor u taabang nib taareban’rad ni bochan e kar filed rogon ni ngaur t’ufeged yad. Ma fil Jehovah ngorad rogon ni ngaur daged e t’ufeg ni der yog ni nge dag e yug girdi’. (Mu beeg e 1 John 4:7, 8.) Be gaar e Bible: “Aram fan ni runguy, nge gol, nge sobut’an’, nge sumunguy, nge gum’an’ e thingar mon’ed nga dakenmed nge mang mad romed. Nge bigimed mi i ayuweg bigimed ko meewar rok u fithik’ e runguy, mu um n’iged fan u wan’med e n’en ni manga ke kirebnag bigimed u laniyan’ bigimed ko re ngiyal’ i n’en ni ba’ ban’en ni ke dabuy bigimed ni ke rin’ bigimed ngak. Thingar um n’iged fan u wan’med e n’en ni ke rin’ bigimed ngak bigimed ni bod rogon ni ke n’ag Somol fan u wan’ e tin ni kam rin’ed nib togopluw ngak. Nge rogon nib t’uf Got nge girdi’ romed e ngam puthuyed nga urngin e pi n’ey, ni ir e ma chugumiy urngin ban’en nga taabang nge par ni ke fel’ rogon.” (Kol. 3:12-14) T’ufeg e aram e bin th’abi gagiyel e pow ko tin riyul’ e Kristiano. Gathi kam guy nre taareban’ ney e aram e pow ko bin riyul’ e liyor?​—John 13:35.

6. Uw rogon nib taareban’dad ni bochan e gad be athapeg Gil’ilungun Got?

⁶ Tin riyul’ e tapigpig rok Got e kub taareban’rad ni bochan e yad ma tay ni kemus ni Gil’ilungun Got e ir e rayog ni nge ayuweg e girdi’. Yad manang ni dab ki n’uw nap’an me yan Gil’ilungun Got nga lon e pi am ko girdi’ me tow’athnag e piin ni yad ma fol ni aram e nge awnag e gapas u thilrad ni dariy n’umngin nap’an. (Isa. 11:4-9; Dan. 2:44) Aram fan ni ma fol e tin riyul’ e Kristiano ko n’en ni yog Jesus u murung’agen pi gachalpen ni gaar: “Gathi yad e girdi’ nu roy u fayleng ni bod gag ni gathi gag e girdi’ nu fayleng.” (John 17:16) Tin riyul’ e Kristiano e yad ma par u mathilin ngongolen e fayleng; ere aram fan ni yad ma par nib taareban’rad ni yugu aram rogon ni girdi’ u toobrad e yad be mahl.

Gin ni Gad Ma Fek e Fonow Riy

7, 8. Uw rogon ni ma taarebnag e thin nu Bible lanin’dad?

⁷ Kristiano ko bin som’on e chibog e taareb e ulung ni ma pi’ e athamgil nga lanin’rad. Yad  manang ni be skulnag Jesus e ulung ma be pow’iy u daken ba ulung ni ma pow’iyey ara fare governing body ni aram e pi apostal nge piin piilal nu Jerusalem. Gubin ban’en ni ma dugliy e pi pumoon ney mab puluw ko thin rok Got maku yad ma pi’ e thin riy nge yan ngak e pi ulung ni bay ko pi binaw i yan u daken e piin ni yad ma lekag e ulung. Be weliy e Bible murung’agen e pi piilal nem ni gaar: “Nap’an nranod u lan fapi binaw mi yad weliy ngak e piin ni ke mich Jesus u wun’rad fapi motochiyel ni ke turguy e pi apostal nge piin ni piilal ko galesiya u Jerusalem, mi yad yog ngorad ni nguur folgad ko pi motochiyel nem.”​—Acts 15:6, 19-22; 16:4.

⁸ Ku arrogon e ngiyal’ ney ni bay reb e Ulung ni Ma Pow’iyey ni fapi Kristiano ni kan dugliyrad girdien, ma yad ma ayuweg e pi ulung rok Got u fayleng ni ngaur pared nib taareban’rad. Re ulung ney e ma ngongliy boch e babyor nib puluw e thin riy ko Bible nga boor mit e thin ni fan e nge ayuweg e pi tapigpig rok Got. Ere thin ni bay ko pi babyor ney e gathi thin ko girdi’ ya thin rok Jehovah.​—Isa. 54:13.

9. Uw rogon ni fare maruwel ni ke pi’ Got ngodad e ma ayuwegdad ni nge taareban’dad?

⁹ Pi Kristiano ni yad ma ayuweg e ulung e ku yad ma yarmiy rogon e machib ni yima tay ma re n’ey e ku be ayuweg e ulung ni nge par nib taareban’. Tha’ u thilin e piin ni yad ma maruwel u taabang ni fan ko pigpig ngak Got e kab gel ko tha’ u thilin e girdi’ nu fayleng ni kemus ni yad ma chag u taabang. Ke sum e ulung ni Kristiano ni gathi kemus ni bochan e nga i chag e girdi’ riy, ya bochan e ngar pininged e sorok ngak Jehovah mar rin’ed e maruwel ni kan pi’ ngorad ni aram e ngar machibnaged fare thin nib fel’, mar pingeged e girdi’ ngar manged pi gachalpen Jesus, mar ayuweged e ulung. (Rom. 1:11, 12; 1 Thess. 5:11; Heb. 10:24, 25) Ere ke yog apostal Paul murung’agen e piin Kristiano ni gaar: “Gimed be athamgiliy u taab yang ni taa ban’en e gimed be athapeg ni aram e nge mich u wan’ e girdi’ fare Thin Nib Fel’ ni yib rok Got.”​—Fil. 1:27.

10. Mang boch e kanawo’ nib taareban’dad riy ni gadad e girdi’ rok Got?

¹⁰ Ere bochan ni gadad e girdi’ rok Jehovah ma ba taareban’dad ya ke m’agan’dad nga mat’awun Jehovah ko gagiyeg, ma ba t’uf pi walagdad rodad, ma gad be athapeg Gil’ilungun Got, ma gad ma tayfan e piin ni ke tayrad Got ni nga u rogned e thin rodad. Ma ayuwegdad Jehovah ni ngad digeyed boch e ngongol ni gad ma rin’ ni bochan e dawor da flontgad nra kirebnag e taareban’ ni bay rodad.​—Rom. 12:2.

Rogon ni Ngan Gel ko Tolangan’ nge Awan’

11. (a) Mang fan ni ma kirebnag e tolangan’ thilin e girdi’? (b) Uw rogon ni ma ayuwegdad Jehovah ni nge dab ki tolangan’dad?

¹¹ Tolangan’ e ma yurba’nag e girdi’. Be’ nib tolangan’ e ma lemnag ni kab tolang ko tin ka bay e girdi’ ma ba ufanthin. Ngongol ni aray rogon e ma kirebnag e taareban’ ni bay u thilin e girdi’ ni bochan e faanra un rung’ag e thin ni be yog be’ u fithik’ e ufanthin ma rayog ni nge awan’uy ngak. I yog James ni gaar: “Urngin e pi n’ir ni gimed be yog ni gimed e soromed riy e ba kireb.” (Jas. 4:16) De fel’ ni ngaun sap nga  but’ ko girdi’. Jehovah e ke dag e kanawo’ nib fel’ u rogon ni ngaun ngongol u fithik’ e sobut’an’ ni bochan e ma lemnag rarogon e girdi’ ni dawor ra flontgad ni bod gadad. I yoloy David ni gaar: “Sobut’an’ ni kam dag ngog e ir e ke gilnag buguwag.” (2 Sam. 22:36, NW) Thin rok Got e ma ayuwegdad ni nge dab ki tolangan’dad ni aram e ma fil ngodad rogon ni ngad lemnaged ban’en nib fel’ rogon. Kan thagthagnag nga laniyan’ Paul ni nge fith ni gaar: “I mini’ e cha’ ni ke ta’med ni gimed ba tolang ngak e tin ni ka ba’ e girdi’? Gathi urngin ban’en ni ba’ romed me Got e ke pi’? Ere ra diin mi gimed yog ni gimed e soromed ni gowa tin ni ba’ romed ban’en e gathi ni pi’ ngomed nib tow’ath?”​—1 Kor. 4:7.

12, 13. (a) Mang fan nib mom ni nga i awan’dad? (b) Mang angin ni faanra ud lemnaged e girdi’ ni bod rogon ni ma lemnagrad Jehovah?

¹² Awan’ e ku aram ban’en ni ma magawonnag e taareban’. Bochan ni dawor da flontgad, ma rayog ni nge “awan’dad” ngak be’. Mus ngak be’ ni ke n’uw nap’an ni ke mang Kristiano e ku rayog ni nge awan’ ngak boch e girdi’ ni bochan ban’en ni bay rorad ni dariy rok. (Jas. 4:5, NW) Bod ni rayog ni nge awan’ reb e walag ni bay e bitir rok ngak reb e walag ni ma machib u polo’ e tayim rok. Maku rayog ni nge awan’ reb e walag ni ma machib u polo’ e tayim rok ngak be’ ni bay e bitir rok. Uw rogon ni nge dabi magawonnag e awan’ e taareban’ ni bay rodad?

¹³ Rogon ni ngad siyeged e awan’ e ngad lemnaged rogon ni ke taarebnag e Bible e pi Kristiano ni kan dugliyrad u lan e ulung nga yu yang u dowey. (Mu beeg e 1 Korinth 12:14-18.) Bod ni lan owchey e rayog ni ngan guy ma gum’irchaey e dabiyog. Machane l’agruw nib ga’ fan ngodad. Ere ku arrogon e girdi’ u lan e ulung ni yad gubin nib ga’ farad u wan’ Jehovah ni yugu aram rogon ni boch i yad e yibe guy ni boor e maruwel ni yad be rin’ u lan e ulung ma boch i yad e danga’. Ere ngaud lemnaged pi walagdad ni rogon ni ma lemnagrad Jehovah. Ngaud daged ngorad ni gad be lemnagrad ko bin ni nga i awan’dad ngorad. Ya faan gad ra rin’ ni aray rogon ma aram e rayog ni nge gagiyel e taareban’ ni bay u thildad ni gad e tin riyul’ e Kristiano nib thil ngak e pi yurba’ i teliw ko Kristiano ni googsur.

Teliw ko Kristiano ni Googsur e Ke Yurba’

14, 15. Uw rogon ni ke yurba’ e Kristiano ni googsur?

¹⁴ Taareban’ ni bay u thilin e tin riyul’ e Kristiano e ba thil ko pi yurba’ i teliw ko Kristiano ni googsur ni der taareb lungurad. Nap’an e bin aningeg e chibog ma ke yoor e piin ni yad ma yog ni yad e Kristiano, ma aram e ngiyal’ ni ke gagiyegnagrad e pilung nu Roma me ga’ i yan e teliw rorad. Boor e nam nra chuwgad u tan pa’ piyu Roma mar sunmiyed boch e galesiya ngorad.

¹⁵ Boor ko pi nam nem e bokum e chibog ni ur chamgad ngorad. Nap’an e bin 17 nge bin 18 e chibog ma girdi’ nu Britain, France, ngu Meriken e kar mon’ognaged e yul’yul’ ko nam rorad nge yan i par ni t’ufeg rok be’ ko nam rok e ke mang teliw rok. Ma nap’an e bin 19 nge 20 e chibog ma yooren e girdi’ e ra pared ni yul’yul’ ko nam e ir e ke suwey lanin’rad. Faani munmun me yoor raba’ e teliw ko Kristiano ni googsur ngki sum nochi ulung riy ni yooren i yad e ma yul’yul’ ko nam. Piin ni yad ma un nga galesiya e ur mahlgad ngak e piin taareb e michan’ rorad ni yad bay u yugu boch e nam. Ere ngiyal’ ney e ke yoor raba’ e teliw ko Kristiano ni googsur ni boch e ba thilthil e machib rorad ma boch e ba yul’yul’ ko nam rorad.

16. Mang boch ban’en ni be yurba’nag e teliw ko Kristiano ni googsur?

 ¹⁶ Nap’an e bin 20 e chibog ma boor raba’ e teliw ni kar gayed rogon ni nge taareban’rad. Ma nga tomuren boor e duw ma boor raba’ e pi teliw ney ni kar taarebgad machane girdi’ riy e der yog ni nge taareban’rad u boch ban’en ni bod fare machib ni girdi’ e sum ko gamanman, nge mali’ bitir u mayel, nge par ko pumoon nge pumoon nge ppin nge ppin, nge ppin ni be yog e thin u lan e galesiya. Ma boch e tayugang’ ko pi yurba’ i teliw ko Kristiano ni googsur e ra achignaged fan boch e machib ni i yurba’nag e pi yurba’ i teliw kafram ya nge yog ni taareban’rad bayay. Machane re n’ey e ke warnag e michan’ ko girdi’ ma ke yurba’nag e teliw ko pi Kristiano ni googsur.

Liyor ko Nam e Dabi Magawonnag e Bin Riyul’ e Liyor

17. Uw rogon ni kan yiiynag nra taarebnag e bin riyul’ e liyor laniyan’ e girdi’ u nap’an e “tin ni tomuren e rran”?

¹⁷ Yugu aram rogon ni be yurba’ e girdi’ ni bochan e dakir taareban’rad, machane tin riyul’ e tapigpig rok Got e yad be par nib taareban’rad. I yiiynag Mikah ni profet rok Got ni gaar: “Bay gu kunuymed nga taabang ngam pired ni gimed bod e saf ni bay u lan ba sum.” (Mik. 2:12) I yiiynag Mikah ni bin riyul’ e liyor e ra yan i par nib lingagil u fithik’ gubin mit e liyor ni be tay e girdi’ ni demtrug ko liyor ni yibe tay ko pi got ni googsur ara nam. I gaar: “Tin ni [tomuren] e rran e fare burey ni bay e tempel riy e bayi par ni ir e th’abi tolang u fithik’ e burey. Girdien pire’ e nam e bay ra thelepgad ngay. Ra reb e nam ma yad be meybil ma yad be fol rok e birorad e kan, machane gadad e bay ud meybilgad ngak Somol ni Got rodad.”​—Mik. 4:1, 5. 

18. Mang boch ban’en ni ke ayuweg e bin riyul’ e liyor boch e girdi’ kar thilyeged u rarogorad?

¹⁸ Ki weliy Mikah rogon nra fal’eg e bin riyul’ e liyor thilin e piin ni ur moyed ni yad ba toogor. “[Girdi’ ko pi nam e] bayi lungurad, ‘Nga darod nga daken fare burey rok Somol, ko tempel rok fare Got nu Israel, ya bayi fil ngodad e tin ni ba adag ni ngad rin’ed; mu udarod u daken e yu pa’ i kanawo’ ni ke dugliy.’ . . . Sayden rorad e bay ra pirdiiyed ngar ngongliyed talin e maruwel riy ni ma gi’ e but’, mi yad yodoromnag e sarey rorad ngar ngongliyed e yar riy ni yima th’eth’ab papa’ngin e woldug ngay ni bochan e nge tamilang l’ugun. Pi nam e dab kur sulod ngar mahlgad bayay, ara ra fal’eged rogorad bayay ni ngar mahlgad.” (Mik. 4:2, 3) Piin ni kar digeyed e liyor ni yima tay ko pi got ni girdi’ e ra ngongliyed nge liyor ko nam kar pigpiggad ngak Jehovah, e yad be felfelan’ ko taareban’ ni bay u thilrad pi walagrad u ga’ngin yang e fayleng. Be skulnagrad Got u kanawoen e t’ufeg.

19. Taareban’ ni bay u thilin bokum milyon e girdi’ e pow ko mang?

¹⁹ Taareban’ ni bay u thilin e tin riyul’ e Kristiano e ngiyal’ ney e yugu ba thil ma aram e mich riy ni ka be pow’iy Jehovah e girdi’ rok u daken gelngin nib thothup. Aray ban’en ni dawori buch ni ka nap’an nni sunmiy e girdi’. Re n’ey e ke lebguy fare thin ni bay ko Revelation 7:9, 14, ma be dag ni dab ki  n’uw nap’an ma ra pag e pi engel rok Got fa aningeg i “nifeng” ni be yip’ fan e magothgoth ni nge gothey e re m’ag nib kireb ney. (Mu beeg e Revelation 7:1-4, 9, 10, 14.) Ere gad ba tow’ath nib taareban’dad pi walagdad u ga’ngin yang e fayleng. Uw rogon ni nge bagadad me maruweliy ni nga i par e re taareban’ ney u thildad? Ireray e n’en ni yira weliy ko bin migid e thin.

Uw Rogon ni Ga Ra Fulweg?

• Uw rogon ni ma taarebnag e bin riyul’ e liyor laniyan’ e girdi’?

• Uw rogon ni dab da paged e awan’ ni nge kirebnag e taareban’ ni bay rodad?

• Mang fan nder yurba’nag e liyor ni ma tay boch e girdi’ ko nam rorad e tin riyul’ e tapigpig rok Got?

[Study Questions]

[Picture on page 16]

Pi Kristiano ko bin som’on e chibog e ba thil thil e nam rorad nge thin rorad?

[Picture on page 18]

Faan ga ra un ko maruwel ni yima tay ni fan ko pi Kingdom Hall i yan ma uw rogon ni ga be maruweliy ni nga i par e taareban’ u thildad?