Ngan Ayuweg e Piin Bitir Ngar Nanged Rarogon e Ulung Rok Jehovah

PIIN bitir e yad baadag ni ngar filed ban’en. Mu lemnag e pi deer ni sana ke fith e piin bitir nu Israel u nap’an ni ur moyed u Egypt ko bin som’on e nep’ ko Paluk’af ni lungurad: ‘Mang fan ni kan li’ e saf ?’ ‘Mang fan ni ke achey e chitamag e racha’ nga langan e mab?’ ‘Nga darod ngan?’ Be m’ug ko pi motochiyel ni pi’ Jehovah ngak piyu Israel nib fel’ u wan’ ni kar fithed e pi deer nem. Ke yog Jehovah ngorad murung’agen e Paluk’af ni yad ra tay boch nga m’on ni gaar: “Ra fithmed pi fakmed ko mang fan e pi n’ey, ma nge lungumed, Gamanman ni yibe li’ ko Paluk’af ni yibe ta’ fan Somol, ni bochan e luk’af e pi naun ntafen piyu Israel u lan yu Egypt ko fa ngiyal’ nem ni thang e fan rok piyu Egypt me pag e pi tabinaw rodad nde bit’ ko girdi’ riy.” (Ex. 12:24-27) Boch nga tomuren me puguran Jehovah ngak e piin gallabthir feni ga’ fan ni ngar pied e fulweg ko pi deer ko pi bitir rorad u murung’agen e “pi motochiyel” ni ke pi’ ngorad.​—Deut. 6:20-25.

Ba tamilang ni baadag Jehovah ni nge nang e pi bitir nem e fulweg ko pi deer rorad u  murung’agen e bin riyul’ e liyor, ya re n’ey e ra k’aringrad ni nge t’uf Jehovah rorad ni ir e Got rorad ma Taayuw rorad. Maku ireray e n’en ni baadag Jehovah ni ngan rin’ ngak e piin bitir e ngiyal’ ney. Reb e kanawo’ ni rayog ni nge skulnag e piin gallibthir e bitir rorad ni nge yog ni nge t’uf Got rorad nge girdi’ rok, e ngan ayuwegrad ni ngar nanged murung’agen e ulung rok nge rogon nra yib angin e pi n’en ni yima rin’ riy ngorad. Ere ngad guyed boch e kanawo’ ni rayog ni ngan ayuweg e piin bitir ni nge yoor ban’en ni ngar nanged u murung’agen e ulung rok Got.

Ulung Rodad

Pi bitir romed e ba t’uf ni ngar nanged rarogon e ulung ni ma un e tabinaw romed ngay. Rayog e re n’ey ni faanra gimed e pi gallabthir e ngam feked e pi bitir romed ngam uned nga urngin e muulung ko Kristiano. Ra ngam rin’ed ni aram rogon, ma gimed be fol ko fare motochiyel ni pi’ Jehovah ngak piyu Israel ni gaar: “Mu ulunguy urngin e pumoon, nge ppin, nge bitir . . . , ya nge gubin e girdi’ me rung’ag ngar filed rogon ni nguur pired ma bay madgun Somol ni Got romed u wun’rad ma yad be fol ko tin ni ke yog u fithik’ e yul’yul’. Piin ni owchemed ndawor rung’aged fapi motochiyel rok Somol ni Got romed e ara’ kanawoen mi yad rung’ag.”​—Deut. 31:12, 13.

Piin bitir e rayog ni ngar tababgad ni ngar filed e thin rok Jehovah u nap’an ni ka yad ba madway. Ke yog apostal Paul murung’agen Timothy ni gaar: “Nnap’an ni ka gab bitir ma ga manang e thin ni bay u lan fare babyor nib thothup.” (2 Tim. 3:15) Nap’an e muulung, ma piin bitir e rayog ni ngar tababgad ni ngar nanged fan e n’en ni yibe weliy, maku rayog ni nge mit e tang ni gad be yon’ u Kingdom Hall ngorad. Mu rom e ku yad ma fil rogon ni ngar fanayed e Bible nge pi babyor nib puluw e thin riy ko Bible mu kur ted fan e thin riy. Maku nap’an e muulung rodad e  rayog ni ngar guyed ni bay e t’ufeg u fithik’dad ni ireray e pow ko tin riyul’ i gachalpen Kristus. I yog Jesus ni gaar: “Nggu pi’ reb e motochiyel nib beech ngomed, nge bigimed me t’uf bigimed rok. Rogon ni um pired ni gimed ba t’uf rog, e aram rogon nthingar um pired nra bigimed ma ba t’uf rok bigimed. Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:34, 35) T’ufeg nge pagan’ ni yad ma guy u Kingdom Hall e rayog ni nge ayuwegrad ngar adaged ni ngar uned ko muulung u n’umngin nap’an e yafas rorad.

Faanra gimed ma yib nga Kingdom Hall nib papey ma tomuren e muulung ma ki gimed par ngam uned boch ko sabethin, ma aram e rayog ni nge pirieg e pi bitir romed e fager u lan e ulung. Mu pagrad nge yog ni ngar nonad ngak e pi walag nib thilthil yangarrad. Faanra yad ra rin’ ni aram rogon ma rayog ni ngar pirieged ni pi walagdad ni kar pilibthirgad e boor e tamilangan’ nge gonop rorad. Zekariah ni ir e “tafonow” rok Uzziah ni kab pagal ni pilung nu Judea kakrom e ke ayuweg ni nge mon’og e re pilung nem ko tirok Got ban’en. Ere ku arrogon e ngiyal’ ney ni piin ni kar pigpiggad ngak Jehovah u lan boor e  duw u fithik’ e yul’yul’ e rayog ni ngar ayuweged e piin bitir u lan e ulung. (2 Kron. 26:1, 4, 5) Maku nap’an ni gimed bay u Kingdom Hall, ma rayog ni ngam weliy ngak e bitir rom murung’agen e library nge gin’en ni yima tay boch e babyor ngay ni fan ko ulung nge ku boch ban’en.

Ulung u Ga’ngin Yang e Fayleng

Ba t’uf ni nge nang e piin bitir ni ulung ni yad ma un ngay e aram bang ko pi ulung u ga’ngin yang e fayleng nib pag 100,000 u gubin. Mu weliy boch e yaram u lan e ulung nge pi n’en nrayog ni nge rin’ e piin bitir ni ngar ayuweged e pi yaram ney. Mu dag ngorad fan ni ga be athapeg ni ngam un ko circuit assemblies nge district conventions nge wub nra tay faen ni ma lekag e ulung.​—Mu guy fare kahol ni be weliy  “Boch Ban’en ni Yira Weliy u Nap’an e Fol Bible ni Tabinaw,” ko page  31.

Faanra rayog romed, mi gimed pining e piin ni ma lekag e ulung, nge pi missionary, nge piin ni ma maruwel u Bethel, nge ku boch e walag ni ma un ko machib ni polo’ e tayim rorad, ngar bad nga tabinaw romed ngam abichgad u taabang. Dab mu lemnag ni dariy e tayim rorad ni fan ko piin ni bitir. Pi cha’ ney e yad be athamgil ni ngar folwokgad rok Jesus ni gubin ngiyal’ ni baadag ni nge yib e bitir ngak ni nge non ngorad. (Mark 10:13-16) Faanra yad ra rung’ag e pi n’en ni ke rin’ e pi walag ney nge felfelan’ rorad ko pigpig ngak Jehovah ma rayog ni nge k’aringrad ni ngar nameged ni ngar pigpiggad ku Jehovah u polo’ e tayim rorad.

Mang e ku rayog ni ngam rin’ed nge yog ni ngam ayuweged e pi bitir romed ngari tamilang u wan’rad rogon e ulung rok Jehovah? Baaray boch ban’en ni rayog ni ngam rin’ed: Mu nameged ni ngam beeged fare ke babyor ni Jehovah’s Witnesses​—Proclaimers of God’s Kingdom. Mu tamilangnag e yul’yul’, nge sobut’an’ ni ke dag e pi tapigpig rok Jehovah. Ngam dag ko uw rogon ni ke fanayrad Jehovah ni ngar machibnaged fare thin nib fel’ u ga’ngin yang e fayleng. Rayog ni ngam dag boch e video ni ke fal’eg e ulung rok Jehovah ma rayog ni ngar nanged rogon e n’en ni i rin’ e ulung kakrom ke mada’ ko chiney. Faanra rayog romed, marod ngam guyed fare branch office nge Bethel home ko nam romed ara yugu reb e nam. Re n’ey e rayog ni nge ayuweg e bitir romed ngar guyed feni rib yaram e ulung rok Jehovah u rogon ni be ayuweg fare tapigpig nib yul’yul’ ma ba gonop e girdi’ ko tirok Got ban’en ni bod rogon ni un rin’ ko bin som’on e chibog.​—Matt. 24:45-47; Acts 15:22-31.

Dabi Yoor Ban’en ni Ngan Weliy

Nap’an ni ga be fil ban’en ko bitir rom ma ngam lemnag rogon ni ke fil Jesus ban’en ngak e pi apostal rok. I yog ngorad ni gaar: “Ka boor ban’en ni nggu weliy ngomed, machane yugu ra yoor ngomed e chiney.” (John 16:12) De fil Jesus boor ban’en ngak pi gachalpen u lan taabangiyal’ ya buchuuw ma buchuuw me yog ni ngar nanged fan nib fel’ rogon. Ku aram e n’en ni ngam rin’ u nap’an ni ga be fil ban’en ngak e bitir rom. Faanra dabi yoor ban’en ni ngam fil ngorad u lan taabangiyal’ u murung’agen e ulung rok Jehovah ma dabi chalbarad ngay. Nap’an ni be ilal e bitir rom i yan ma rayog ni ngaum puguran boch ban’en ni ke fil ma ga be weliy fan ngak ni ngari tamilang u wan’.

Fare ulung ni Kristiano e ireray e gin ni ma yib e ayuw riy ngodad ni nge yog ni ngad pared nib fel’ e tha’ u thildad Got. Piin ni bitir ni yad ma un ko n’en ni yima rin’ u lan e ulung u fithik’ e pasig e ra yib gelngirad ni ngar togopuluwgad ko ngongol nib kireb ko re fayleng ney. (Rom. 12:2) Ke mudugil lanin’mad ni ga ra pirieg e felfelan’ u nap’an ni ga be ayuweg e bitir rom ni ngar nanged murung’agen e ulung rok Jehovah. Yibe athapeg ni ngaur pared ni yad ba yul’yul’ ngak Jehovah nge ulung rok.

[Picture on page 31]

 Boch Ban’en ni Yira Weliy u Nap’an e Fol Bible ni Tabinaw

Baaray boch ban’en u murung’agen e ulung rok Jehovah ni rayog ni ngam weliyed u nap’an e Fol Bible ni Tabinaw ni blayal’.

▪ Ngan weliy murung’agen e ulung ni gimed ma un ngay. Wuin nge uw rogon ni tabab? Bin ngan e Kingdom Hall e un fanay? Fel’ ni ngan pining reb e walag ni ke n’uw nap’an ko ulung ni nge pi’ e fulweg ko deer nra fith e bitir romed.

▪ Ngan weliy fan e pi muulung ni yima tay nge rogon nra fel’ rogorad riy.

▪ Mu weliyed fan boch e skul ni yima tay u lan e ulung rok Jehovah. Mu weliy boch angin ni ke yib ngak e piin ni kar uned ko pi skul nem.

▪ Mu ayuweged e piin ni bitir ni ngar nanged feni ga’ fan ni ngar manged pi ta machib ko fare thin nib fel’. Ngan dag ngorad ni pi n’en ni yad ma rin’ e ra mang bang ko fare ke babyor ni Yearbook of Jehovah’s Witnesses ni be weliy e n’en ni ma rin’ e Pi Mich Rok Jehovah u ga’ngin yang e fayleng.

▪ Ngan weliy murung’agen boch e maruwel ni bay u lan e ulung rok Jehovah ni rayog ni nge un e piin ni fel’ yangaren ngay u polo’ e tayim rorad. Guruy ni 10 ko fare ke babyor ni Organized to Do Jehovah’s Will e rayog ni nge ayuwegmed.

▪ Ngan ayuweg e piin nib fel’ yangaren ni ngar nanged fan e pi motochiyel ni yima fol riy u lan e ulung. Ngan weliy ko mang fan ni dab ra togopuluwgad ko yaram ko ulung rok Jehovah ni ki mada’ ko tin ni ba achig ban’en. Ngan dag ngorad ni rayog ni ngar ayuweged ni nge par e ulung nib yaram ni faanra ngar folgad ko piin piilal.

[Picture]

Faanra m’ag fager e pi bitir romed ngak e piin Kristiano ni ma machib nib n’uw nap’an e ra fel’ rogorad riy

[Picture on page 30]

Piin gallabthir e ngiyal’ ney e nap’an nra fithmed e bitir romed u murung’agen e ulung rok Jehovah ma ngam pied e fulweg ngorad nib tamilang ni bod ni ma rin’ piyu Israel kakrom