Gur, Rayog ni Nge Fel’ u Wan’ Be’ e Tin Bay Rok?

“Ra fel’ u wan’ be’ nib gafgow e tin bay rok, ma ra fel’ rogon; ma ra dabi fel’ u wan’ be’ nib fel’ rogon e tin bay rok, ma ra gafgow.”​—Benjamin Franklin.

BOOR e girdi’ ni kar nanged ni dabiyog ni nge fel’ u wan’rad e tin bay rorad ni bod e chugum ni ngan chuw’iy. Ere aram fan nib mo’maw’ ni nge fel’ u wan’ e girdi’ e tin bay rorad ni bochan e gad be par u ba fayleng ni chugum nge fel’ rogon e ke m’on u wan’ e girdi’! Bay reb e pi thin ni baaray ni ke magawonnagem, fa?

• Piin ni yad ma dag fel’ngin e chugum ni ngan chuw’iy e yad ma guy rogon ni ngan lemnag nra fel’ u wan’ be’ e n’en ni bay rok ni faanra ngki chuw’iy boch.

• Tagenging ni yima tay u tabon e maruwel ara skul e ra k’aringem ni ngam lemnag ni gab fel’ ni faan ga ra rin’ e tin ni be rin’ boch e girdi’.

• Der fel’ u wan’ e girdi’ e tin ni ga be rin’ ni fan ngorad.

• Pi tafager rom e yad ma guy rogon ni ngam chogownag e tin bay rorad.

• Pi deer rom u murung’agen e yafas e danir pi’ e fulweg riy.

Ere faanra aray rogon e magawon rom, ma gur, rayog ni nge fel’ u wan’um e pi n’en ni bay rom? I weliy apostal Paul murung’agen rogon ni nge ‘fel’ u wan’dad e tin ni ba’ rodad.’ Yu ngiyal’ e boor ban’en rok, ma yu ngiyal’ e buchuuw. Pi tafager rok e yad baadag daken, machane immoy boch e girdi’ ni ur moningniged. Yugu aram rogon ma ke ‘fil rogon ni nge fel’ u wan’ e tin ni ba’ rok.’​—Filippi 4:11, 12.

Piin de fel’ u wan’rad e tin bay rorad e dar nanged e re n’ey, machane ke yog Paul nrayog ni ngan fil rogon. Ere chiney e ngad weliyed lal e kanawo’ ni be yog e Bible nra ayuwegem ni nge fel’ u wan’um e tin bay rom.