Bin 5

Mu Guy Rogon Ngam Chugur ngak Got

MANG E BE FIL E BIBLE? “Mu chugurgad ngak Got, me chugur ngomed.”​—James 4:8.

MANG E MAGAWON RIY? Bokum biyu’ e teliw nib thilthil, ma boor e machib rorad nib togopuluw reb nga reb u rogon ni ngan chugur ngak Got. Ere uw rogon ma ga nang ko baan ngan e teliw e be fil e tin riyul’, mab m’agan’ Got ngay? Boch e ta yol e ka rogned ni michan’ ngak Got nge ngan pigpig ngak u fithik’ e yul’yul’ e de puluw maku ra gafgownagey. Baaray e n’en ni yog ba ken e babyor u murung’agen e lem rok be’ ndariy barba’ e teliw nib mich u wan’: “Bochan ni ma fil e Kristiano ni gathi kemus chi rogon e yafas aray, ma aram fan ni gowa dariy fan e biney e yafas . . . ma bochan e re michan’ ney ma aram fan ni be cham e girdi’.”​—Maclean’s.

MANG E RAYOG NI NGAM RIN’? Mu fal’eg i yaliy e mich riy nriyul’ ni bay Got. (Roma 1:20; Hebrews 3:4) Dab mu pag be’ nge talegem ni nge dab kum gay e fulweg ko pi deer ni baaray nib ga’ fan, ni aram e: Mang fan ni gad ba’? Ka ba’ reb e yafas nga bang u tomuren ni kad m’ad, fa? Mang fan ni kaygi gel e gafgow? Mang e baadag Got ni nggu rin’? Ga ra pirieg e fulweg ko pi deer ney ma ra ayuwegem ni ngaum par nib fel’ u wan’um e tin bay rom.

Machane dabi mich u wan’um gubin ban’en ni ma yog boch e girdi’ ngom. Be pi’ e Bible e athamgil nga lanin’um ni ngam maruwel ko tin ni kam ‘nang’ nib m’agan’ Got ngay. (Roma 12:1, 2) Ya faan ga ra rin’, ma ra tow’athnagem. Ma faan ga ra tay ba ngiyal’ ni ngam fil e Bible ma ga fol ko fonow riy, ma aram e rayog ni ngam palog ko magawon, me war e magafan’ rom, ma ga felfelan’. Rayog ni nge pagan’um ko re n’ey. Bokum milyon e girdi’ nib thilthil rarogorad ni ke yib angin ngorad e tin riyul’ u murung’agen Got nge tin nib m’agan’ ngay ni kar filed.

Ra yib angin e fonow nu Bible ngom ni ga be fol riy, ma aram e ra gel e yul’yul’ rom ngak Got. Mang ndab mu filed e Pi Mich Rok Jehovah e Bible? Ya faan ga ra rin’, ma ra m’agan’um ko fapi thin ni yoloy apostal Paul ni gaar: “Liyor ni yima tay ngak Got e ri ra fel’ rogon be’ riy nfaanra ke fel’ u wan’ e tin ni ba’ rok.”​—1 Timothy 6:6.

[Picture on page 8]

Ngam nang e tin nib m’agan’ Got ngay