Ngan Pasig ko Bin Riyul’ e Liyor

“Woldug ni ngan kunuy ngan tay nga naun e ba ga’ ni ba ga’ yang, machane piin ni ngar maruweliyed nge thap nga naun e ba lich.”​—MATT. 9:37.

1. Uw rogon ni ngam weliy murung’agen be’ ni be gurgur?

 SUSUN bay e babyor rom ni ngan fal’eg e daba’ ma bay be’ nib t’uf ni nge ayuwegem. Ere mang e ga ra rin’? Ba t’uf ni nga mog ngak e cha’ nem, ni nge lungum: “Wenig ngom aygum fal’eg e re ngi babyor ney e daba’. Ya gu be GURGUR!” Ga be yan ni ngam mada’gad boch e girdi’ ya bay ban’en nib ga’ fan ni ngam rin’ed, machane kam sagaal. Ere mang e ga ra rin’? Ga ra yog ngak e en ni be kol e yap’ ko karrow ni nge lungum, “Wenig ngom mu papey ya gu be GURGUR!” Arrogon, faanra bay ban’en nib t’uf ni ngam rin’ nib papey ma dabki gaman e tayim rom, ma ra magafan’um. Re n’em e ra k’aringem ni ngam rin’ ban’en nib papey.

2. Mang maruwel e th’abi ga’ fan ni nge gurnag e tin riyul’ e Kristiano e ngiyal’ ney?

² Tin riyul’ e Kristiano e ngiyal’ ney e yad manang ni fare maruwel ni ngan machibnag fare thin nib fel’ min pingeg e girdi’ ngar manged pi gachalpen Jesus e ireray e n’en ni thingar rin’ed nib gur. (Matt. 24:14; 28:19, 20) Ke fanay Mark e thin rok Jesus u nap’an ni yog nib t’uf ni ngan rin’ e re maruwel ney ni “som’on,” re n’ey e be yip’ fan ni ngan rin’ u m’on ni nge yib e tomur. (Mark 13:10) Ma ba puluw e re n’em ni ke yog. I yog Jesus ni gaar: “Woldug ni ngan kunuy ngan tay nga naun e ba ga’ ni ba ga’ yang, machane piin ni ngar maruweliyed nge thap nga naun e ba lich.” Ba t’uf ni ngan kunuy e woldug u m’on ni nge kireb.​—Matt. 9:37.

3. Mang e ke rin’ boor e girdi’ ni fan ko fare maruwel ni machib nib gur?

³ Bochan ni gad manang nib ga’ fan e re maruwel ney, ere ba puluw ni ngada fanayed boor e tayim rodad, nge gelngidad, ma ngad tedan’dad ngay. Ma gad be felfelan’ ya boor e pi walagdad ni yad be rin’ ni aram rogon. Boch i yad e kar lichnaged e maruwel rorad ma kar manged boch e pioneer ara missionary ara kar uned ko maruwel u Bethel. Riyul’ ni boor pa’ u puluwrad. Sana boor ban’en rorad ni kar paged, ma ku boor e magawon ni ma yib ngorad. Machane ke tow’athnagrad Jehovah, ma gad be felfelan’ ngorad. (Mu beeg e Luke 18:28-30.) Boch i yad e dabiyog ni ngar uned ko pioneer machane kar rin’ed e tin rayog rorad ni fan ko re maruwel ney nib muun ngay ni yad be ayuweg e bitir rodad ko tirok Got ban’en.​—Deut. 6:6, 7.

4. Mang fan ni bay boch e girdi’ ni dakurur lemnaged ni ngar pigpiggad ku Got nib gur?

⁴ Kad guyed ni yima rin’ ban’en nib gur ni faanra kan guy ni daki yoor e tayim ni ke magey. Gad be par u ba ngiyal’ ni ka nog e tin tomuren e rran ngay, ma pi n’en ni be buch e chiney nge pi thin ni be yog e Bible e be micheg ni riyul’ ni aram rogon. (Matt. 24:3, 33; 2 Tim. 3:1-5) Machane dariy be’ nri manang e ngiyal’ nra yib e tomur. Nap’an ni weliy Jesus murung’agen e “pi n’en” nra buch ni aram e pow u “tomuren” e re m’ag ney me yog ni gaar: “Re rran nem nge re awa nem e dariy be’ ni manang e ngiyal’ nra taw riy ni mus ko pi engel ni yad bay u tharmiy, ara en ni Fak Got; ya ke mus ni en ni Chitamangiy e manang.” (Matt. 24:36) Bochan e re n’ey, ma boch e Kristiano e dakurur lemnaged ni kari chugur e tomur, nib ga’ ni faanra ke n’uw nap’an ni kar pigpiggad ngak Got. (Prov. 13:12) Gur, aram rogon ni ga ma lemnag yu ngiyal’? Mang e rayog ni nge ayuwegdad ni  dabda paged talin ni thingar uda rin’ed fare maruwel ni ke pi’ Jehovah nge Jesus Kristus nib gur e ngiyal’ ney?

Mu Lemnag e Pi N’en ni i Rin’ Jesus

5. Uw rogon ni dag Jesus ni manang nib t’uf ni ngan gurnag e machib?

⁵ Urngin e Kristiano ni yad be pigpig ku Got ni yad manang ni ke chugur e tomur e yad be fol rok Jesus. Reb i fan ni i rin’ Jesus e maruwel rok nib gur e bochan e manang ni ka boor e maruwel ni nge rin’ u lan dalip nge baley e duw. Yugu aram rogon, ma boor ban’en ni ke rin’ ni fan ko bin riyul’ e liyor ni faanra ngan taarebrogonnag ngak boch e girdi’. Ke tamilangnag fithingan e Chitamangin nge tin nib m’agan’ Got ngay, me machibnag fare thin nib fel’. Ma ki tamilangnag e machib ni nde riyul’ ko pi tayugang’ ko piyu raba’ i teliw ni googsur me n’uf e gagiyeg rok Jehovah nge mada’ ko yam’. Kari athamgil ni nge milekag u reb e binaw ngu reb ni be machib, ma be ayuweg e girdi’, ma be golnag e m’ar ko girdi’. (Matt. 9:35) Dariy be’ ni ke rin’ ban’en ni aram rogon u lan dalip nge baley e duw.​—John 18:37.

6. Mang e ma tiyan’ Jesus ngay ni nge rin’?

⁶ Mang e k’aring Jesus ni nge machib u fithik’ e pasig? Bochan e n’en ni yiiynag Daniel, ma susun ke nang Jesus n’umngin nap’an ni nge rin’ e maruwel rok. (Dan. 9:27) Ere machib ni tay e ra m’ay u lan “dalip nge baley e duw.” Dawori n’uw nap’an nga tomuren ni ke yan Jesus nga Jerusalem ko duw ni 33 me gaar: “Ke taw ko fare awa ni ngan pi’ e flaab ni ba ga’ ngak e en ni Fak e Girdi’ min ta’ fan.” (John 12:23) Yugu aram rogon ni ke nang Jesus ni ke chuchugur ni nge yim’ ma da i par ni aram e n’en ni be lemnag. Ya ke athamgil ni nge fanay e tayim rok ni nge rin’ e tin nib m’agan’ e Chitamangin ngay me dag e t’ufeg rok ko girdi’. Re t’ufeg nem e ke k’aring ni nge kunuy boch e girdi’ me fil ngorad rogon ni ngar manged pi gachalpen me l’ograd ngar machibgad. Ke fil ngorad e re n’ey ya nge yog ni ngar ululgad i rin’ e re maruwel nem u lan boor e duw.​—Mu beeg e John 14:12.

7, 8. Mang e ke rin’ pi gachalpen u nap’an ni chuweg Jesus e girdi’ ni be fol chuway’ u tempel, ma mang fan ni ke rin’ e re n’em?

⁷ Reb e ban’en ni buch ko yafas rok Jesus e be dag nrib pasig ko pigpig ku Got. Dawori n’uw nap’an ni tabab Jesus ko machib u nap’an e Paluk’af ko duw ni 30 C.E. ma Jesus nge pi gachalpen e ka ranod nge Jerusalem mi yad guy e “pumoon u lan e tempel ni yad be chuway’ ko garbaw, nge saf, nge bulogol, ma ku er rogon e piin ni yad ma thilyeg e salpiy ni yad bay u tebel rorad.” Ere mang e ke rin’ Jesus, ma uw rogon u wan’ pi gachalpen?​—Mu beeg e John 2:13-17.

⁸ N’en ni rin’ nge n’en ni yog Jesus, e ke k’aring pi gachalpen ni nge yib ngan’rad e thin u reb e tang rok David ni gaar: “Rogon feni pasigan’ug ni nggu tiyan’ug ko tempel rom e be gak’ u lan ngorongoreg.” (Ps. 69:9) Mang fan? Ya n’en ni rin’ Jesus e bay e riya’ riy. Ya girdi’ u tempel nib tolang e liw rorad, ni aram e pi prist  nge piin ni ta yol nge ku boch e girdi’ e yad be tay tanggin e re fol chuway’ n’em u fithik’ e sasalap. Ngongol rorad nib kireb ni kan tamilangnag e ra k’aringrad ni ngar togopuluwgad ngak Jesus. Ere ba puluw e n’en ni ke yog pi gachalpen Jesus u murung’agen e n’en ni buch u tempel nra gaargad: ‘Rogon feni pasigan’ ni nge tiyan’ ko tempel rok Got e be gak’ u lan ngorongoren’. Mang e be yip’ fan e pasig? Ba thil ko ngan gur?

Kan Taarebrogonnag e Pasig nge Ngan Gur

9. Mang e be yip’ fan fare thin ni pasig?

⁹ Faanra ke rin’ be’ reb e maruwel ke m’ay u fithik’ e pasig, ma aram e rayog ni nga nog ni ke rin’ fare maruwel ni be tiyan’ ngay ma ba felfelan’ ngay. Aram rogon e machib ni i tay Jesus. Ere aram fan ni nap’an ni guy pi gachalpen e n’en ni rin’ u tempel me yib ngan’rad e thin rok David. Mang e k’aring Jesus ni nge rin’ e re n’em?

10. Mang fan fare thin ni “pasig” ni bay u Bible?

¹⁰ Fare thin ni “pasig” ni bay ko tang ni yon’ David e ke yib ko fare thin ni Hebrew ni kan piliyeg ni “Taliyeg” u yu yang u Bible. Reb e Bible e bay yu yang riy ni kan piliyeg e re thin ney riy ni “ngan pigpig ku Got u polo’ i gum’irchaey.” Reb e dictionary e be weliy murung’agen e re thin ney ni gaar: “Re thin ney e ba ga’ ni yima fanay nib l’ag rogon ko mabgol . . . Bod ni piin ni mabgol e yad ma taliyegnaged yad ni bochan e yad baadag ni ngar yul’yul’gad ngorad. Ere ku arrogon Got ni bay mat’awun ni nga i taliyegnag e girdi’ rok ni bochan e baadag ni ngar pared ni yad ba yul’yul’ ngak.” (Mark 12:28-30; Luke 4:8) Pasig ni bod rogon ni be weliy e Bible e gathi kemus ni adag rom nga ba mit e ban’en, ni bod rogon e piin ni bay ba mit e gosgos nri yad baadag ni yad ma yaliy. Pasig ni dag David e aram e pasig nra k’aring be’ ni nge ayuweg thin be’ ni nge dabi kireb ara yal’uweg ban’en ni manang ni de puluw.

11. Mang e k’aring Jesus ni nge rin’ ban’en u fithik’ e pasig?

¹¹ Ba puluw e n’en ni ke rin’ pi gachalpen Jesus u nap’an ni kar taarebrogonnaged e thin rok David ko n’en ni kar guyed ni ke rin’ Jesus u tempel. De rin’ Jesus e re n’em ya bochan e manang nra yim’, machane i rin’ ni bochan baadag ni nge fal’eg thin e Chitamangin nge liyor nib machalbog. Nap’an ni ke guy Jesus e pi n’en ni kan rin’ ni be kirebnag thin Got, ma aram me yal’uweg e re kireb n’em. Nap’an ni ke guy Jesus e girdi’ ni ke gafgownagrad e tayugang’ ko teliw, ma rogon feni pasig e k’aring ni nge ayuweg e pi girdi’ nem, me yog e thin nib gel ngak fapi tayugang’ ko teliw.​—Matt. 9:36; 23:2, 4, 27, 28, 33.

Ngan Pasig ko Bin Riyul’ e Liyor

12, 13. Mang e ke rin’ e pi tayugang’ ko teliw e ngiyal’ ney u murung’agen (a) fithingan Got? (b) Gil’ilungun Got?

¹² Ngongol ko pi yurba’ i teliw e ngiyal’ ney e taareb rogon ara be gel boch e kireb riy ko pi yurba’ i teliw u nap’an Jesus. Mu lemnag e n’en ni som’on ni fil Jesus ngak pi gachalpen u murung’agen rogon e meybil ni aram e ngar yibilayed fithingan Got, ni gaar: “Ngan tay fan fithingam nib thothup.” (Matt. 6:9) Gur, gad ma guy e pi tayugang’ ko pi yurba’ i teliw ni yad ma yog ni yad e Kristiano, ni yad be fil ngak e girdi’ murung’agen fithingan Got ya nge yog ni ngar thothupnaged mi yad tay fan e re ngachal nem? Danga’, ya n’en ni yad ma rin’ e yad ma fil murung’agen e Trinitas, nge u nap’an nra yim’ be’ ma bay ban’en u fithik’ i dow ni ma par nib fas, nge nifiy ni dabi math biid, ma be m’ug riy ni Got e ba mo’maw’ ni ngan nang fan rarogon, der ma runguy e girdi’, ma baadag ni nge gafgownagrad. Ma kar kirebnaged thin Got ni bochan e ngongol rorad nib kireb nge ku yad be dake modingniged yad. (Mu beeg e Roma 2:21-24.) Ma kar athamgilgad ni ngar rin’ed boch ban’en ya nge dabi nang e girdi’ fithingan Got, ma kar chuweged fithingan Got u Bible rorad. Ere yad be taleg e girdi’ ni nge dabi fel’ e tha’ u thilrad Got.​—Jas. 4:7, 8.

¹³ Ke fil Jesus ngak pi gachalpen ni ngar yibilayed Gil’ilungun Got ni gaar: “Me yib  gil’ilungum ngomad. Min rin’ e tin nib m’agan’um ngay u fayleng, ni bod rogon u tharmiy.” (Matt. 6:10, NW) Yugu aram rogon ni pi tayugang’ ko teliw ni yad ma yog ni yad e Kristiano, e yad ma sul u daken e re meybil ney, maku yad ma k’aring e girdi’ ni ngar ted tanggin e am nge ku boch e ulung ko girdi’. Maku yad be darifannag e piin ni yad be athamgil ni ngar machibnaged murung’agen Gil’ilungun Got. Ma wenegan e boor e piin ni yad ma yog ni yad e Kristiano, ma darur weliyed murung’agen e re Gil’ilungun nem, ma de michan’rad ngay.

14. Uw rogon ma pi tayugang’ ko teliw ni yad ma yog ni yad e Kristiano e kar achignaged fan e thin rok Got?

¹⁴ Nap’an ni meybil Jesus ngak Got me yog nib tamilang ni gaar: “Mu fil ngorad e tin nib riyul’, ni er e thin rom.” (John 17:17) Nap’an ni ka bay Jesus u fayleng, me dugliy ni “fare tapigpig nib yul’yul’ ma ba gonop” e ir e nge ayuweg e girdi’ rok ko tirok Got ban’en. (Matt. 24:45) Yugu aram rogon ni pi tayugang’ ko teliw ni yad ma yog ni yad e Kristiano, ma yad ma yog ni yad ma fil e thin rok Got ngak e girdi’, machane riyul’ ni kar rin’ed e n’en ni yog Jesus? Danga’. Yad ma yog ni thin nu Bible e de riyul’. Darur filed e thin rok Got ngak e girdi’, ni aray e n’en ni rayog ni fal’eg lanin’uy, ya kar filed ngorad e llowan’ ko girdi’, ya ireray e n’en ni yad baadag. Maku kar achignaged fan e thin rok Got ma yad be fil ngorad e tin ni yad baadag, ya dubrad ni ngar k’aringed e damumuw ngak e girdi’.​—2 Tim. 4:3, 4.

15. Mang e ga be lemnag u murung’agen urngin ban’en ni ke rin’ e pi tayugang’ ko teliw u daken fithingan Got?

¹⁵ Bochan e pi n’en nib kireb ni yibe rin’ u daken fithingan Got ma aram fan ni boor e girdi’ nib yul’yul’ ni ke mulan’rad ara dakir mich Got nge Bible u wan’rad. Kar awgad ko wup rok Satan nge fare m’ag rok nib kireb. Faan ga ra guy ma ga rung’ag ni be buch e pi n’ey ni aray rogon u gubin e rran, ma mang e ga ra lemnag? Bochan ni gur reb e tapigpig rok Jehovah, nap’an ni ga ra guy e pi n’en ni yibe rin’ ni be darifannag fithingan Got, ma gathi ga baadag ni ngam rin’ ban’en ya nge tamilangnag ni dariy ban’en nib kireb ni ke rin’ Got? Nap’an ni ga ra guy e girdi’ nib yul’yul’ ni kan bannagrad, ma gur, gathi ga baadag ni ngam rin’ ban’en ni ngam fal’eg lanin’rad? Nap’an ni guy Jesus e girdi’ ni “ke magafan’rad ndar nanged e n’en ni ngar rin’ed, ya yad bod e saf nde moy rorad e en ni ma gafaliyrad,” ma gathi kemus ni ke runguyrad. Ya ke “tabab i machibnag boor ban’en ngorad.” (Matt. 9:36; Mark 6:34) Ere bay fan ni ngad pasiggad ko bin riyul’ e liyor ni bod rogon Jesus.

16, 17. (a) Mang e ra k’aringdad ni ngad machibgad u fithik’ e pasig? (b) Mang e gad ra weliy ko bin migid e thin?

 ¹⁶ Faanra gad ma machib u fithik’ e pasig, ma fare thin rok apostal Paul ni bay ko 1 Timothy 2:3, 4 e bay fan ngodad. (Mu beeg.) Gad ba pasig ko machib ni gathi kemus ni bochan ni gad manang ni gad be par ko tin tomuren e rran, ya ku gad manang ni ireray e n’en nib m’agan’ Got ngay. Ya baadag ni nge nang e girdi’ e tin riyul’ me yog ni ngar liyorgad ngak nrogon nib m’agan’ ngay ma ra tow’athnagrad. Gad be machib u fithik’ e pasig ni gathi kemus ni bochan ni daki yoor e tayim ni ke magey, ya bochan ni gad baadag ni ngad pininged e sorok nga fithingan Got ma ngad ayuweged e girdi’ ngar nanged e n’en nib m’agan’ Got ngay. Ere ngaud pasiggad ni fan ko bin riyul’ e liyor.​—1 Tim. 4:16.

¹⁷ Gadad, e kan tow’athnagdad ko tamilangan’ ko tin riyul’ u murung’agen e tin nib m’agan’ Got ngay ni fan ko girdi’ nge fayleng. Bay rogodad ni ngad ayuweged e girdi’ ni ngar pirieged e felfelan’ nge athap nib mudugil ko gabul nge langleth. Rayog ni ngad pow’iyed yad nga ranod ko gin’en ni dariy e riya’ riy u nap’an ni yira gothey e m’ag rok Satan. (2 Thess. 1:7-9) Susun dabi mulan’dad ya gad be lemnag ni ke sagaal fare rran rok Jehovah, ya susun e ngad felfelan’gad ni ka bay e tayim rodad ni ngad liyorgad ngak Got u fithik’ e pasig. (Mik. 7:7; Hab. 2:3) Uw rogon ma rayog ni ngad liyorgad ngak Got u fithik’ e pasig? Ireray e n’en ni gad ra weliy ko bin migid e thin.

Rayog ni Ngam Weliy?

• Mang e ke k’aring Jesus ni nga i machib u fithik’ e pasig?

• Mang fan fare thin ni “pasig” ni bay u Bible?

• Mang e gad be guy e ngiyal’ ney ni ra k’aringdad ngad liyorgad ku Got u fithik’ e pasig?

[Study Questions]

[Picture on page 10]

Jesus e i par ni be rin’ e tin nib m’agan’ e Chitamangin ngay, ma i dag e t’ufeg ngak e girdi’

[Picture on page 12]

Bay fan ni ngaud liyorgad ngak Got u fithik’ e pasig