Kan Ayuweg Nde Li’ Ir

BOCH e Pi Mich Rok Jehovah e ka fin ra mu’gad ko machib u bochi reb e binaw, me yib i yan be’ nib moon nib pilibthir u toobrad ni bay ba ke Bible u pa’. Ma aram mar guyed rogon ni ngar machibnaged fare “thin nib fel’” ngak, ma n’en ni i yog ngorad e, ‘Mu digeyed gag.’ Faani taaboch me thil e lem rok nge adag ni nge un ngak bagayad ko abich ni blayal’. Faani bin migid e rran, me yan bagayad fapi Mich ko gin ma par riy u tafen e pilibthir ni nge weliy e thin nu Bible ngak.

Nap’an ni yow be non, me gaar fare moon ngak fare walag: “Kam ayuweg e pogofan rog. Fowap e gu be yan i yan ko malang ko ppin rog. . . . ma kug lemnag ni nggu taw e ngaram mu gu lieg nggum’. U m’on ndawor da mada’gad, ma aningeg e awa ni ku ug wan u fithik’ e pan ni dag nang e gin ni gu be sor ngay. Mu kug beeg boch babyoren e tang nu galesiya, maku der fel’ lanin’ug. Ere rib fel’ e ngiyal’ ni kam bad ma kari magar Got ni bochan.”

Fin nnang ko tomur ni ke yib i ying e moonyan’ ko re moon nem ma aram fan ni i yan ni nge li’ ir. Machane, thin nu Bible e ke ayuweg. (Efe. 6:11-18) Ma ki felfelan’ ni ke nang ni bayi faseg Got “urngin e girdi’ ko yam’, ni tin nib [mat’aw] nge tin [de mat’aw].” (Acts 24:15) De n’uw nap’an me ognag e yafas rok ngak Jehovah Got me un ko taufe ni ke gaman 81 e duw rok. Thin nge ngongol nib fel’ nge “thin ko babyor nib thothup,” e ir e ayuweg e re moon ney nde li’ ir, maku ir e ke yognag e l’agan’ ngak ko yafas ni manemus.​—Rom. 6:23; 15:4.