Mu Rin’ Urngin e Tin Nrayog Rom u Nap’an ni Ka Gab Muchugbil

“En nrayog rok e nge fol ko pi thin ney.”​—MATT. 19:12.

1, 2. (a) Uw rogon e muchugbil u wan’ Jesus, nge Paul, nge ku boch e girdi’? (b) Mang fan nrayog ni nge lemnag boch e girdi’ ni muchugbil e gathi ba tow’ath?

 MABGOL e aram reb e tow’ath nrib fel’ ni yib rok Got. (Prov. 19:14) Machane, boor e Kristiano nib muchugbil ni ku yad ba felfelan’ mab fel’ e par rorad. Harold nreb e walag ni pumoon ni 95 e duw rok ndawori mabgol biid e gaar: “Yugu aram rogon ni gu ma felfelan’ ni gamad ma chag boch e girdi’, ma gu ma gol ngorad, machane ra yigoo gag ma der ma chalbag. Ere sana rayog ni nga nog ni ke yog e tow’ath ko piin muchugbil ngog.”

² Ki yog Jesus Kristus nge apostal Paul ni yira par ni yib muchugbil ma aram reb e tow’ath ni yib rok Got, ni bod e mabgol. (Mu beeg e Matthew 19:11, 12; 1 Korinth 7:7.) Machane, gathi urngin e girdi’ ndawori mabgol e ir rok e ke dugliy ndabi mabgol. Ya yu ngiyal’ e ba mo’maw’ ni ngam pirieg be’ nib fel’ ni ngam leay. Maku boch e girdi’ nib muchugbil e i un ko mabgol kafram ma kar dargow e en mabgol rok ara ke yim’. Ere uw rogon ni muchugbil e reb e tow’ath? Ma uw rogon ni nge rin’ e piin Kristiano e tin nrayog rorad u nap’an ni ka yad ba muchugbil?

Reb e Tow’ath ni Yugu Ba Thil

3. Mang fel’ngin e Kristiano nib muchugbil?

³ Be’ nib muchugbil e kab gel e puf rogon rok ngak be’ nib mabgol. (1 Kor. 7:32-35) Ireray boch ban’en nrayog ni nge ayuweg nge yoornag e tayim rok ko machib, me t’ufeg urngin e girdi’, me  chugur ngak Jehovah. Boch e Kristiano e kar nanged fel’ngin e muchugbil, ma kar dugliyed ni ngar ‘folgad ko pi thin ney’ ni aram e ngar pared ba ngiyal’ ni yad ba muchugbil. Maku boch e girdi’ e dar lemnaged ni ngar pared ni yad ba muchugbil, machane nap’an ni ke thil boch ban’en ko par rorad, ma kar nanged nrayog ni nge ayuwegrad Jehovah nge ayal e par rorad ni yugu aram rogon ni yad ba muchugbil. Ere ba fel’ u wan’rad rarogorad ni ke thil, ma kar pared ni yad ba muchugbil.​—1 Kor. 7:37, 38.

4. Mang fan nrayog ni nge pigpig e pi Kristiano ni yad ba muchugbil ngak Got ni yad ba felfelan’?

⁴ Pi Kristiano ni yad ba muchugbil e yad manang nde t’uf ni ngar mabgolgad ni fan e ngar gagiyelgad ara ngar fel’gad u wan’ Jehovah ara ulung rok. Ma t’ufegdad Got ni be’ nge be’. (Matt. 10:29-31) Dariy be’ ara ban’en nrayog ni nge daregdad ko re t’ufeg nem. (Rom. 8:38, 39) Demtrug ko gad ba mabgol ara gad ba muchugbil, ma rayog ni ngad pigpiggad ngak Got ni gad ba felfelan’.

5. Mang e ba t’uf ni faanra nge yog fel’ngin e muchugbil ngak be’?

⁵ Piin ni yad ba salap ko musik ara gosgos e bay ban’en ni kar rin’ed ma kar salapgad riy, ere ku er rogon fare tow’ath ni ngan par ni yib muchugbil ni ku bay boch ban’en ni ngan athamgiliy, ma aram e rayog ni ngan guy fel’ngin. Ere uw rogon ni nge rin’ e piin Kristiano e ngiyal’ ney urngin e tin nrayog rorad u nap’an ni ka yad ba muchugbil ndemtrug ko yad e walag ni pumoon ara ppin, ara kab fel’ yangarrad fa kar ilalgad, ara kar mel’eged ni ngar pared ni yad ba muchugbil fa yad ba muchugbil ni bochan boch ban’en? Ngad guyed e n’en ni i rin’ boch e Kristiano ko ulung kakrom nrayog ni ngad filed boch ban’en riy.

Muchugbil u Nap’an ni Kab Fel’ Yangarey

6, 7. (a) Mang tow’ath e yog ngak fapi rugod ni fak Filip ni ur pigpiggad ngak Got? (b) Mang boch e kanawo’ ni i rin’ Timothy urngin e tin rayog rok riy u nap’an ni kab muchugbil? (c) Uw rogon nni tow’athnag Timothy ni bochan e m’agan’ ngay ni nge pigpig ngak Got u nap’an ni kab pagel?

⁶ Filip ni tamachib e immoy aningeg i rugod ni fak ndawor ra uned ko mabgol ni yad ba pasig ko machib ni bod e chitamangirad. (Acts 21:8, 9) Reb e tow’ath ni yog ko girdi’ u daken gelngin Got nib thothup e aram e yog ni ngaur yiiygad, ma i maruwel e pi rugod ney ko re tow’ath nem ni fan e nge lebug fare thin ko Joel 2:28, 29.

⁷ Timothy reb e pagel ni i rin’ urngin e tin nrayog rok u nap’an nib muchugbil. Nap’an ni kab bitir, me fil Eunice ni chitiningin nge Lois ni titaw rok e “thin ni bay u lan fare babyor nib thothup” ngak. (2 Tim. 1:5; 3:14, 15) Machane, sana fin ra mangew Kristiano u nap’an e yay nsom’on e milekag ni tay Paul nga Lystra, ni aram e gin ni ur pared riy u bang ko duw ni 47 C.E. L’agruw e duw nga tomuren ko yay ni dalip e milekag ni tay Paul e ngaram ma sana  ke chugur ni nge gaman 20 e duw yangaren Timothy ara ka fini pag. Yugu aram feni kab bitir ara ka fini fil e tin riyul’, ma rib “fel’” thin ni i weliy e piin piilal ni Kristiano u Lystra nge Ikonium. (Acts 16:1, 2) Ere aram fan ni fek Paul nga i un ngak ko milekag. (1 Tim. 1:18; 4:14) Dabiyog ni nga nog nde mabgol Timothy, machane rayog ni nga dogned ni nap’an ni kab pagel, me m’agan’ ngay ni nge un ngak Paul, ma boor e duw ni i missionary nib muchugbil ma be ayuweg e ulung.​—Fil. 2:20-22.

8. (a) Mang e ayuweg John Mark ni nge nameg boch ban’en ko pigpig ni i tay? (b) Mang tow’ath e yog ngak ni bochan e pi n’em?

⁸ Kab pagel John Mark ndawori mabgol miki rin’ e tin nrayog rok ni fan ko pigpig ngak Got. Ir nge Maria ni chitiningin, nge Barnabas ni be’ rok e yad boch e tin som’on i girdien e ulung nu Jerusalem. Sana kub fel’ rogon e tabinaw ku Mark, ya bay e naun rorad u lan e mach, maku bay e tapigpig rorad. (Acts 12:12, 13) Yugu aram rogon, ma nap’an ni kab pagel ma gathi goo ir e ma lemnag ir. Maku de lemnag ni nge yog reb e tabinaw ngak. Chag ni ur ted e pi apostal u taabang e aram fan ni adag ni nge mang reb e missionary. Ma aram me un ngak Paul nge Barnabas ko yay ni som’on e milekag nra tew nga i ayuwegrow. (Acts 13:5) Boch nga tomuren mi yow milekag Barnabas u taabang, miki boch nga tomuren me un ngak Peter ngaur machibgow u Babylon. (Acts 15:39; 1 Pet. 5:13) Dariy bagadad ni manang n’umngin nap’an ni par Mark nib muchugbil. Machane i par nib fel’ thin ma yima yog ni ir be’ nib m’agan’ ngay ni nge machibnag e girdi’ ma boor ban’en ni i rin’ ko pigpig ni i tay.

9, 10. Mang boch e kanawo’ nrayog ni nge yoornag e piin fel’ yangaren ni Kristiano ni yad ba muchugbil e tayim rorad ni fan ko machib? Mu weliy reb e kanawo’.

⁹ Boor e piin fel’ yangaren u lan e ulung e ngiyal’ ney ni yad ba muchugbil ni yad be yoornag e tayim rorad ni fan ko pigpig ngak Got. Yad ba felfelan’ ngay ni yad manang ni faanra gab muchugbil ma rayog ni ngam piem ko ‘maruwel rok Somol nib puf rogom’ ni bod Mark nge Timothy. (1 Kor. 7:35) Reb e ban’en e ray nib fel’, ya piin muchugbil e boor e kanawo’ nrayog ni ngar pigpiggad ngak Jehovah riy. Rayog ni ngar uned ko pioneer, maku rayog ni ngar pied e ayuw ko machib ko gin nib t’uf e ayuw riy, maku rayog ni ngar filed yugu reb e thin, maku rayog ni ngar pied e ayuw ko dimow Kingdom Hall ara boch e naun u branch, maku rayog ni ngar uned ko Ministerial Training School, maku rayog ni ngar uned ko maruwel u Bethel. Faanra kab fel’ yangarem ma dawor mu un ko mabgol, ma ga be rin’ urngin e tin rayog rom e chiney ni ka gab muchugbil, fa?

¹⁰ Reb e walag ni Mark fithingan e tabab ko pioneer u nap’an ni kab fel’ yangaren, me un ko Ministerial Training School, ma boor yang u fayleng ni ke yan riy ni be rin’ boch e maruwel ni fan ko pigpig ngak Jehovah. Tomuren ni ke sul ke lemnag fa 25 i duw ni ke yan ni i pigpig u polo’ e tayim rok, me gaar: “Kug guy rogon ni nggu maruwelgad urngin e girdi’ ko ulung u taabang, ma gamad ma machib u taabang, ma gu ma yan gguyrad ngaug pi’ e athamgil nga lanin’rad, ma kug ma piningrad nga tabinaw rog ko abich, ma kug ma fal’eg rogon boch e abich nra pi’ e athamgil nga laniyan’ e girdi’ u lan e ulung. Urngin e pi n’ey ni gu ma felfelan’ ngay.” Rogon ni ke m’ug ko thin rok Mark e bin th’abi ga’ e felfelan’ e ma yib ko ngan pi’ ban’en ngak be’, ma pigpig u polo’ e tayim e ma bing boor e kanawo’ ni ngan ayuweg boch e girdi’ riy. (Acts 20:35) Demtrug ko mang e ga baadag, fa gab salap riy, fa ke buch rom, ma piin fel’ yangaren e ngiyal’ ney e boor e maruwel nrayog ni ngar rin’ed ni fan ngak Somol.​—1 Kor. 15:58.

11. Mang boch angin nra yib ni faanra dab ni gur ngan mabgol?

¹¹ Yugu aram rogon ni boor e piin fel’ yangaren ni yad baadag ni ngar uned ko mabgol, ma boor fan nib fel’ ndab ni gur ngan mabgol. Ba fel’ ni ngan son nge thumur e ngiyal’ nib gel e ar’ar ko dowef. Ba t’uf e tayim ni ngam nang rarogom, me yoor ban’en nim nang nra ayuwegem ngam pirieg be’ ni gimew ra m’ag. Yira micheg ban’en u nap’an e mabgol ma thingar ni rin’ u nap’an e yafas.​—Ekl. 5:2-5.

 Muchugbil u Nap’an ni Kan Ilal

12. (a) Uw rogon ni i par Anna nib muchugbil u nap’an ni thil rarogon e par rok? (b) Mang tow’ath e yog ngak?

¹² Anna ni bay murung’agen ko Gospel rok Luke e ri kireban’ nib gel u nap’an ni yim’ figirngin ni ka fini pag medlip e duw ni kar mabgolgow. Dad nanged ko bay e bitir rorow fa dariy, ara i lemnag ni ngki un ko mabgol bayay fa danga’. Machane, be yog e Bible ni ki gaman 84 e duw rok ma kab muchugbil. Ere rayog ni nga dogned nnap’an ni thil rarogon Anna me par nib chugur ngak Jehovah. Da i “pag e tempel ni rran nge nep’, ni be meybil ma be pag e abich yu ngiyal’ ngi i meybil.” (Luke 2:36, 37) Ere pigpig ni i tay ngak Got e aram e n’en th’abi ga’ fan u wan’. Re n’em e de mom, machane nni tow’athnag riy. I yog ni nge guy Jesus ni kab madway miki weliy ngak e girdi’ murung’agen fare Messiah nge tin ra rin’ u nap’an nra yib.​—Luke 2:38.

13. (a) Mang e be dag ni Dorkas e ir be’ nib pasig u lan e ulung? (b) Uw rogon ni kan tow’athnag Dorkas ni bochan e ir be’ nib fel’ ma ba gol?

¹³ Immoy reb e ppin ni Dorkas fithingan ni ku yima pining Tabitha ngak ni i par u Joppa ni bangi ban’en nib chugur ko day ni bay ko lel’uch ni ngal u Jerusalem. Der yog e Bible ni bay e pumoon rok e ngiyal’ nem, ere dabisiy nib muchugbil. Dorkas e i “par ni tin nib fel’ e be rin’ ma be ayuweg e piin ni gafgow.” Boor e mad ni ma yip’ nga i pi’ ngak e piin ni ke yim’ figirngirad nge ku boch e girdi’, ma ri adag e pi cha’nem daken. Nap’an ni yib e m’ar ngak nib tomgin nge yim’, ma aram min pi’ e thin nge yan ngak Peter ni nge yib i faseg walagrad ko yam’. Ma faani wer murung’agen u Joppa ni kan faseg ko yam’, ma boor e girdi’ nra uned ko tin riyul’. (Acts 9:36-42) Dabisiy ni boch i yad e i ayuweg Dorkas ni bochan e ir be’ nrib gol.

14. Mang e ra k’aring e pi Kristiano ni muchugbil ngar chugurgad ngak Jehovah?

¹⁴ Boor e girdi’ u lan e ulung e ngiyal’ ney ni kar pilibthirgad ni yad ba muchugbil ni bod Anna nge Dorkas. Boch i yad e sana dawori pirieg be’ nib fel’ ni ngar mabgolgow. Maku boch i yad e kar dargow e en mabgol rok fa ke yim’. Pi Kristiano ni muchugbil e kar filed rogon ni ngaur taga’gad ngak Jehovah ni bochan e dariy be’ ni ngaur weliyed lanin’rad ngak. (Prov. 16:3) Silvia nreb e walag nib muchugbil ni ke pag 38 e duw ni ke pigpig u Bethel e ke guy nreb e tow’ath e re n’ey. I gaar: “Yu ngiyal’ e ma chalbag ya thingar gu par ni gub gel. Ma bayi n’en mug lemnag ko, ‘Mini’ e nge pi’ e athamgil nga lanin’ug?’” Miki gaar: “Bochan ni ke pagan’ug ni manang Jehovah e tin nib t’uf rog ni kab fel’ rogon nga rogon ni gu manang ma aram e n’en ni ke ayuwegeg ni nggu chugur ngak. Ma pi n’en ni ma pi’ e athamgil nga lanin’ug e ma yib u yu yang nda gu lemnag nra yib riy.” Gad ra chugur ngak Jehovah ma gubin ngiyal’ nra i ayuwegdad ma rayog ni nge pagan’dad ngak.

15. Uw rogon ni nge t’ufeg e piin muchugbil ni Kristiano “urngin e girdi’”?

¹⁵ Faanra ba muchugbil be’, ma aram reb e kanawo’ nrayog ni nge t’ufeg “urngin e girdi’” riy. (Mu beeg e 2 Korinth 6:11-13. a) Jolene nreb e walag nib muchugbil ni 34 e duw ni ke pigpig u polo’ e tayim rok e gaar: “Kug athamgil ni nge fel’ thilmad e girdi’, ni gathi goo piin ni gamad taab yangar, ya kub muun gubin yangar e girdi’ ngay. Faanra gab muchugbil ma ra yoor e tayim rom ni fan ngak Jehovah, nge tabinaw rom, nge pi walag u lan e ulung. Gu be pilibthir i yan ma be gel e felfelan’ rog ni gu be par ni gub muchugbil.” Piin pilibthir, nge piin nib m’ar, nge matam ara matin nib muchugbil, nge fel’ yangaren, nge ku boch e girdi’ u lan e ulung e yad ma felfelan’ ko ayuw ni ma pi’ e piin muchugbil ngorad. Riyul’ nnap’an ni gad ra dag e t’ufeg ngak boch e girdi’ ma gad ma felfelan’. Ere rayog ni ngam t’ufeg urngin e girdi’, fa?

Muchugbil Nnap’an e Yafas

16. (a) Mang fan ni par Jesus nib muchugbil u nap’an e yafas rok? (b) Uw rogon ni rin’ Paul urngin e tin rayog rok u nap’an nib muchugbil?

¹⁶ De un Jesus ko mabgol, ya thingari fal’eg rogon me rin’ e maruwel ni kan pag fan ngak. I  milekag nib n’uw woen, ma ma maruwel nri kakadbul nge mada’ ko lukngun e nep’, me munmun me pi’ e yafas rok nib maligach. Bochan nib muchugbil, ma aram fan ni yog ni nge rin’ e re maruwel ney. Apostal Paul e ki milekag ni bokum biyu’ e mayel, ma ki mada’nag boor mit e gafgow u nap’an ni i machib. (2 Kor. 11:23-27) Yugu aram rogon ni sana i mabgol ko som’on, ma ke mel’eg ni nge par nib muchugbil u nap’an ni mang reb e apostal. (1 Kor. 7:7; 9:5) I pi’ Jesus nge Paul e athamgil nga laniyan’ boch e girdi’ ni ngar folwokgad rorow ni fan ko fare maruwel ni machib. Machane dariy bagayow ni ke yog nthingari dabi un e pi tamachib ko mabgol.​—1 Tim. 4:1-3.

17. (a) Uw rogon ni ke folwok boch e girdi’ rok Jesus nge Paul? (b) Mang fan nrayog ni nge pagan’dad nrib felfelan’ Jehovah ngak e piin ni kar paged farad ni fan ngak?

¹⁷ Boch e girdi’ e ngiyal’ ney e kar mel’eged ni ngar pared ni yad ba muchugbil, ya nge yog nra p’eyn’iyed e machib. Harold ni kan weliy murung’agen faram e ke pag 56 e duw ni ke pigpig u Bethel. I gaar: “Nap’an ni gaman 10 e duw ni kug pigpig u Bethel, ma kug guy boch e mabgol ni kar talgad ko pigpig u Bethel ni bochan e m’ar, ara ngar ayuweged e gallabthir rorad. Ngiyal’ nem e ke yim’ e gallabthir rog. Machane ri gu baadag e maruwel u Bethel, ma dabug ni nggu un ko mabgol me mul e binem e tow’ath u paag.” Boch e duw kafram, miki yog reb e pioneer ni Margaret fithingan ni gaar: “Boor ban’en ni ug rin’ nri gu baadag u nap’an ni gu be pioneer ma aram ma da gu mabgol. Bochan nib puf rogog, ma aram mu gu yoornag e tayim rog ko machib, ma re n’ey e kari gelnag e felfelan’ rog.” Dabi pag Jehovah talin e piin ni yad ma pag farad ni fan ko bin riyul’ e liyor.​—Mu beeg e Isaiah 56:4, 5.

Mu Rin’ e Tin Nrayog Rom e Chiney

18. Uw rogon ni ngan pi’ e athamgil nga laniyan’ e pi Kristiano ni yad ba muchugbil min ayuwegrad?

¹⁸ Gubin e Kristiano ni yad ba muchugbil ni yad be rin’ e tin nrayog rorad ni fan ko pigpig ngak Jehovah e bay rogon ni ngad pininged e magar ngorad, ma gad pi’ e athamgil nga lanin’rad. Yad gubin nri yad ba t’uf rodad, ma gad be guy fel’ngirad, ma gad be pining e magar ko tin ni yad be rin’ u lan e ulung. Faan gad ra mang ‘pi walagrad ni pumoon, nge pi walagrad ni ppin, nge pi chitiningrad, nge pi fakrad,’ ma aram e dabi chalbarad ni yad be par ni yad ba muchugbil.​—Mu beeg e Mark 10:28-30.

19. Uw rogon ni ngam rin’ e tin rayog rom u nap’an ni ka gab muchugbil?

¹⁹ Demtrug ko gab muchugbil ni bochan e gur e kam turguy ara bochan boch ban’en, ma manga yigi ayuwegem e pi thin ney ngam nang ni faan ga ra par ni gab muchugbil ma rayog ni ngam par ni gab felfelan’ ma boor ban’en nrayog ni ngam rin’. Ga ra par ni gab muchugbil ma bod ba tow’ath ni um athapeg ni ngan pi’ ngom, maku rayog ni nge bod ba tow’ath nda um lemnag ni yira pi’ ngom. Boch e tow’ath e yira pi’ ngak be’ ma ka ngiyal’ nem me felfelan’, ma boch e ra i n’uw nap’an mfin be’ ga’ fan u wan’. Machane, re n’ey e be yan u rogon e lem rom. Ere uw rogon ni ngam rin’ e tin rayog rom u nap’an ni ka gab muchugbil? Aram e ngam chugur ngak Jehovah, ma ga yoornag e maruwel ni ga be rin’ ni fan ko pigpig ngak, ma ga t’ufeg urngin e girdi’. Muchugbil e rayog ni nge mang reb e tow’ath ni bod e mabgol ni faan yira sap ngay ni bod rogon ni ma sap Got ngay, min maruwel ngay nib fel’ rogon.

[Footnote]

Ka Ga Manang?

• Mang boch e kanawo’ ni yira par ni yib muchugbil ma reb e tow’ath?

• Mang angin nra yib ngom ni faan ga ra par ni gab muchugbil u nap’an ni kab fel’ yangarem?

• Mang boch e kanawo’ nrayog ni nge chugur e piin muchugbil ni Kristiano riy ngak Jehovah ma ur t’ufeged urngin e girdi’?

[Study Questions]

[Caption on page 20]

Ga be rin’ urngin e tin nrayog rom ni fan ko pigpig ni ga be tay ngak Got, fa?