Pi N’en ni Kan Guy ko Giyow ko Kan

DEMTRUG n’umngin nap’an ni ga be fal’eg i yaliy lan e lang ma dabiyog ni ngam guy reb e kan. Kag ra motoyil ma dab mu rung’ag laman reb e kan nra non ngom. Machane, rayog ni nge mudugil lanin’um ni bay e kan. Ya yad ba llowan’ mab gel gelngirad, ma ba thilthil fithingrad nge rarogorad. Boch i yad e ma rin’ e tin nib fel’ ngodad, ma boch i yad e baadag ni ngar magawonnaged gadad. Yad gubin ni yad ma lemnag ban’en ngodad.

Bin riyul’ e Got e reb e Kan. (John 4:24) Bay fithingan ni aram Jehovah, nib thil ngak boch e got ni googsur. (Psalm 83:18) Faen ni yoloy e psalm e yog ni gaar: “I Somol e ba sorok, ere thingar ni pining e sorok ngak; thingari ga’ madgun u wun’uy ngak urngin e pi kan. Fapi kan rok yugu boch e nam e ke mus ni bogi liyos ni yima meybil ngay, machane Somol e ir e sunumeg lan e lang ni ga’ngin. Flaab nge feni sorok e ke par nga fithik’, feni sorok nge flaab rok e bay u tempel rok.”​—Psalm 96:4-6.

Pi N’en ni Kan Guy u Murung’agen e Bin Riyul’ e Got

Be gaar e Bible: “Dariy be’ ni kaa guy owchen Got.” (John 1:18) Dariy bagadad ni rayog ni nge susunnag yaan Got nge flaab ni bay rok, ya dariy bagadad ni ke guy Got biid, ni bod be’ nni gargelnag mab malmit ni dabiyog ni nge susunnag raen ban’en, ya dawori guy raen ban’en biid. Bod rogon reb e sensey nib fel’ ni ma weliy boch ban’en nib mo’maw’ ni ngan nang fan ni ma fanay e thin nib mom ni nge nang e piin ni be skulnagrad fan. Ere ku er rogon Got ni ma fil ngodad boch ban’en u daken e Thin rok ni aram e Bible ni be weliy boch ban’en nrayog ni ngad guyed. U daken e pi n’en ni ke guy e pi tapigpig rok nib yul’yul’ kakrom, ma be ayuwegdad Jehovah ni ngad nanged fan e gin ni ma par riy u tharmiy ma ngkud nanged fan e tha’ rodad ngak e piin ni yad ma par u rom.

Nap’an ni kan piliyeg e changar rok Ezekiel ni profet ke guy e flaab rok Jehovah, ma ke yog ni ke guy e nifiy, nge tamilang, nge malang ni sapphire, nge rigim. Maku nap’an ni kan piliyeg e changar rok apostal John ma ke yog murung’agen Jehovah ni bay u tagil’ ni “be gal ramaen owchen ni bod e malang nib tolang puluwon ni jasper nge karnelian; ma bay ba rigim ni ke liyeg tagil’ faanem ni bod raen ba malang ni emerald.” Pi thin ney e be fil ngodad ni gin ni ma par Jehovah riy e rib fel’ yaan, ma bay e felfelan’ riy, ma ba gapas.​—Revelation 4:2, 3; Ezekiel 1:26-28.

 Ma ki guy Daniel e pi engel ni “raay e milyon urngirad ni ur sak’iygad u p’eowchen [Jehovah].” (Daniel 7:10, NW) Dabisiy ni ke gin Daniel ngay! Ga ra guy taareb e engel ma ga ra ngat ngay, machane am lemnag ni kam guy bokum biyu’ e engel!

Ke chugur ko 400 yay ni be weliy e Bible murung’agen e engel, boch i yad e serafim nge kerubim. Fare thin ni Greek nge Hebrew ni kan piliyeg u Bible ni “engel” e be yip’ fan e “tamolog.” Ere pi engel e rayog ni ngar nonad ngorad, ma kakrom e ur nonad ngak e girdi’. Pi engel e gathi yad e girdi’ nu fayleng kakrom. Ke sunmiyrad Jehovah nib n’uw nap’an u m’on ni nge sunmiy e girdi’.​—Job 38:4-7.

Nap’an ni kan piliyeg e changar rok Daniel ke guy bokum e engel ni kar muulunggad u taabang ni ngar guyed ban’en nib ga’ fan, ma aram me guy Daniel “be’ ni bod yaan ba girdi’” ni be yib nge tagil’ Got. “Min pi’ mat’awun ko gagiyeg ni nge tay ma ngan tay fan, ma nge par ni ir e pilung, ya girdi’ u urngin e pi nam, nge pi racha’, nge pi thin e nguur folgad rok.” (Daniel 7:13, 14) Ere “be’ ni bod yaan ba girdi’” e bay e liw rok nib ga’ fan u tharmiy, ma ir Jesus Kristus ni kan faseg ko yam’ ma kan pi’ mat’awun ni nge gagiyegnag e fayleng ni polo’. Dabki n’uw nap’an ma gagiyeg rok e ra yan nga lon e am ko girdi’ ma ra chuweg e m’ar, kireban’, gafgow ni yibe tay ko girdi’, gafgow ko par nge salpiy nge yam’.​—Daniel 2:44.

Ba mudugil ni gagiyeg rok Kristus e ra k’aring e felfelan’ ngak e pi engel nib yul’yul’ ni yad baadag ni nge yog e tin th’abi fel’ ngak e girdi’. Machane gathi urngin e engel ni aram rogon e lem rorad.

 Pi Toogor rok Got nge Girdi’

Immoy reb e engel kakrom ni togopuluw ngak Jehovah me piliyeg ir nge mang Satan, ya baadag ni nge liyor e girdi’ ngak. Fare bugithin ni Satan e be yip’ fan e “ta togopuluw.” Satan e ir tabolngin e kireb e kari togopuluw ngak Jehovah ni fare Got ko t’ufeg. Fapi engel ni ke un ngak Satan ko togopuluw e be yog e Bible e pi moonyan’ ngorad. Ma kar manged e toogor rok e girdi’ ni bod Satan. Ba ga’ ni ke yib e gafgow nga fayleng, nge tin nde mat’aw, nge m’ar, nge gafgow ko par, nge mahl ni bochrad.

Yugu aram rogon ni boor e pi Kristiano ni googsur e gathi ri yad ma weliy murung’agen Satan e ngiyal’ ney, machane fare babyor rok Job u Bible e be tamilangnag ngodad murung’agen e ngongol nge lem rok. Be yog ni gaar: “Faani taw ko rofen ni nge yan e pi kan nga p’eowchen Somol, ma ba’ Satan u fithik’rad.” U nap’an ni yad be muulung me yog Satan ni fan ni be pigpig Job ngak Got e bochan e pi n’en ni ma pi’ ngak. Ke li’ Satan e pi gamanman, nge ragag e bitir rok Job ya nge yib i m’ug nib riyul’ e n’en ni ke yog. Me tomur riy miki k’aring Satan e malad nge yib i for u downgin Job. Machane urngin ban’en ni rin’ Satan ngak Job ma de k’aring ni nge pag Jehovah.​—Job 1:6-19; 2:7.

Boor fan ni ke pag Jehovah Satan nib n’uw nap’an, machane gathi bayi par ni manemus, ya dabki n’uw nap’an ma yira thang. Bay ban’en ni kan rin’ ngak Satan u tharmiy ni be tamilangnag fare babyor ni Revelation murung’agen ni gaar: “Ma aram mi ni mahl u tharmiy! Me cham Mikael nge tirok e engel ngak fare dragon, me cham fare dragon nge tirok e engel ngorad; machane me meewar fare dragon, ma da ni pag fare dragon nge tirok e engel ni ngar pired u tharmiy. Mi nin’ fare dragon nri ba ga’ nga wuru’ e tharmiy! I ir fare porchoyog ni ke kakrom, ni kan tunguy fithingan ni Moonyan’, ara Satan, ni ir faanem ni bannag e girdi’ nu fayleng ni polo’. Mi nin’ u lang nga daken e fayleng, nib muun urngin e pi engel rok ngak.”​—Revelation 12:7-9.

Ere ka nog ni Satan e “ir faanem ni bannag e girdi’ nu fayleng ni polo’.” Be bannag e girdi’ u daken boch e machib ni googsur ya ngar paged Jehovah nge Thin Rok. Reb e ban’en ni ba ga’ ni ma bannag e girdi’ riy e urngin e girdi’ nra yim’ e yad ra yan ko giyow ko kan. Boor rogon ni be lemnag e girdi’ murung’agen e re machib ney. Ni bod rogon u Africa nge Asia, ni boor e girdi’ ni ke mich u wan’rad ni nap’an nra yim’ be’ ma ra yan ko gin ni ma par e girdi’ rok riy ni kar m’ad. Fare machib ni purgatoryo nge infierno e ke bay rogon ko fare machib nnap’an nra yim’ be’ ma ka bay ban’en u fithik’ i dow nra par ni kab fas.

Tomuren Nra Yim’ Be’ Ma Ra Yan Nga Tharmiy?

Ere uw rogon fare machib ni urngin e girdi’ nib fel’ e yad ra yan nga tharmiy? Riyul’ ni bay boch e girdi’ nra yan nga tharmiy machane ri yad buchuuw ni faanra ngan taarebrogonnag nga bokum milyon e girdi’ ni kar m’ad. Be yog e Bible ni 144,000 e girdi’ ni “kan biyuliyrad u fayleng” ma yad ra mang “prist” maku “bay ra gagiyeggad u fayleng.” (Revelation 5:9, 10; 14:1, 3) Ere yad ra un ngak Jesus Kristus ngar manged e pilung ko Gil’ilungun Got u tharmiy. Re Gil’ilungun nem e ra thang Satan nge pi moonyan’ rok ma ra fal’eg e re fayleng ney nge mang paradis. Yooren e piin ni kar m’ad e bay ni fasegrad ko yam’ ma bay e athap rorad ni ngar pared u paradis u fayleng ni manemus.​—Luke 23:43.

Ere kad nanged ni boor mit e kan ni ma par ko giyow ko kan. Ma en th’abi tolang rorad e aram Jehovah Got, ya ir e ke sunmiy urngin ban’en nib fas. Boor e engel ni yad ba yul’yul’ ni yad be pigpig ngak Jehovah. Bay boch e engel ni Satan e be gagiyegnagrad kar togopuluwgad ngak Jehovah ma yad be bannag e girdi’. Maku bay boch e girdi’ ni kan ‘biyuliyrad’ u roy u fayleng ma kan pi’ e maruwel rorad ni ngar rin’ed u tharmiy. Ere ngada guyed ko mini’ e rayog ni ngad nonad ngorad ko giyow ko kan nge rogon ni ngad rin’ed e re n’ey.