Ra Yib Gelngidad Ngad Gelgad nga Urngin Mit e Skeng

“Demtrug e mit i n’en ni gu ra mada’nag ma ba’ gelngig ni ke pi’ Kristus nrayog ni gu par riy.”​—FIL. 4:13.

1. Mang fan ni boor mit e gafgow ni ma yib ko pi tapigpig rok Jehovah?

 BOOR mit e gafgow ni ma yib ngak e pi tapigpig rok Jehovah. Boch e ma yib ni bochan e dawor da flontgad ma boch e bochan ni ka gad be par ko re m’ag ni kireb ney. Maku reb e bochan ni bay e toogor u thilin e piin ni yad ma pigpig ngak Got nge piin ndarur pigpiggad ngak. (Gen. 3:15) Kab kakrom i yib ni ma ayuweg Got e pi tapigpig rok ni yad ba yul’yul’ ni ngar athamgilgad u fithik’ e togopuluw ni ma yib ngorad ni bochan e michan’ rorad, nge towasar ni ma tay e pi taab yangar rorad ngorad, nge ku boch e gafgow. Maku arrogodad ni ku rayog ni nge ayuwegdad gelngin Got nib thothup.

Ra Yib Gelngidad Ngad Athamgilgad u Fithik’ e Togopuluw ni Ma Yib Ngodad ni Bochan e Michan’ Rodad

2. Mang fan ni yima togopuluw ko teliw, ma ba miti mang togopuluw e yima tay ngorad?

² Yima togopuluw ko teliw ni bochan e michan’ rorad, ya yibe guy rogon ni ngar paged fa nge dab ki garer e machib rorad, ara ngan kirebnag e yul’yul’ rorad. Boor mit e togopuluw ni boch e ba gagiyel ma boch e de gagiyel. Ke taarebrogonnag e Bible e cham ni ma tay Satan ko layon nge porchoyog ni bay e yub u l’ugun.​—Mu beeg e Psalm 91:13.

3. Uw rogon ni ma gafgownagdad Satan ni bod e layon nge porchoyog ni bay yub u l’ugun?

³ Satan e bod ba layon nib damumuw ya ma cham ko girdi’ rok Got, ma ma guy rogon ni nga nin’rad nga kalbus, ara ni talegrad ko machib. (Ps. 94:20) Boor murung’agen e pi togopuluw ney u lan e pi Yearbook ko Pi Mich Rok Jehovah e ngiyal’ ney. Yu ulung i girdi’ ni be pow’iyrad e pi tayugang’ ko teliw, ara piin ma ayuweg e am e yad be gafgownag e pi tapigpig rok Got u boor e nam. Bay boch e girdi’ ni ke tal ko pigpig ngak Jehovah ni bochan e pi togopuluw ney. Satan e ku bod e porchoyog ni bay e yub u l’ugun, ya ma par nib mith nga i rin’ boch ban’en ni nge  alitnag laniyan’ e pi tapigpig rok Got me bannagrad ngar rin’ed e tin nib m’agan’ ngay. Mit ney e cham e ma tay Satan ya nge warnag e michan’ rodad. Machane gelngin Got nib thothup e rayog ni nge ayuwegdad ngad gelgad ko pi n’ey.

4, 5. Mang e bin th’abi fel’ e kanawo’ ni ngad fal’eged rogodad riy ni fan ko gafgow nra yib ngodad, ma mang fan? Mu weliy ban’en ni ke buch.

⁴ Ra ngam lemnag e miti gafgow ni yira tay ngom boch nga m’on, ma gathi aram e bin nib fel’ e kanawo’ ni ngam fal’eg rogom riy. Ya bin riyul’ riy e, dad nanged ko ba miti mang gafgow e yira tay ngodad boch nga m’on, ma dabi yib angin ngodad ni faanra magafan’dad nga ban’en ndabi buch. Machane, bay ban’en nrayog ni ngad rin’ed. Yooren e piin ni yog ni ngar athamgilgad u fithik’ e gafgow ni un tay ngorad e yog rorad e pi n’em ni bochan e ur fal’eged i lemnag rogon e yul’yul’ ni i tay e pi tapigpig rok Jehovah ni bay u Bible, nge machib nge ngongol nib fel’ ni i dag Jesus. Re n’ey e ke ayuwegrad ni nge gel e t’ufeg rorad ngak Jehovah. Ma re t’ufeg nem e ke ayuwegrad ni ngar gelgad ko pi skeng ni ma yib ngorad.

⁵ Mu lemnag e n’en ni rin’ l’agruw i walagdad nib pin u Malawi. Immoy ba ulung i girdi’ ko am nra pirdiiyed yow, ngemu’ min guchthuy e mad rorow, mi nog ngorow ni yira kolrow u yargel ni faanra dab ra chuw’iyew yungi card ko am. Mu kun bannagrow nga nog ni pi yungi card nem e ke chuw’iy e girdi’ nu Bethel boch. Ere mang e yog fa gal walag? “Kemus ni goo Jehovah Got e gamow ma pigpig ngak. Ere faanra ke chuw’iy e pi walag nu branch boch e pi card nir, ma dariy rogon ngomow. Ki gimed ra thang e fan romow, ma dab gu rin’ew e n’en ni gimed be yog!” Tomuren ni kar parew ni yow ba yul’yul’, ma aram min pagrow.

6, 7. Uw rogon ni ma pi’ Jehovah gelngin e pi tapigpig rok ngar pared ni yad ba yul’yul’ u nap’an ni yibe gafgownagrad?

⁶ Ke guy apostal Paul ni ke fil e pi Kristiano nu Thessalonika e tin riyul’ ni yugu aram rogon nib “gel e gafgow” ni ur ted, mar folgad riy u fithik’ e “felfelan’ ni ma pi’ [“gelngin Got nib thothup,” NW].” (1 Thess. 1:6) Boor e Kristiano kakrom nge chiney ni un gafgownagrad ni ka rogned ni yugu aram feni gel e gafgow ni un tay ngorad, ma ur pared nib gapas lanin’rad, ni aram reb i wom’engin gelngin Got nib thothup. (Gal. 5:22) Re gapas laniyan’ nem ni immoy rorad e ir e ayuweg gum’ircha’rad nge tafinay rorad nga i par nib gel. Arrogon, gelngin Got nib thothup e ir e ma ayuweg e pi tapigpig rok Jehovah ni ngar k’adedan’rad mar ngongolgad u fithik’ e gonop u nap’an ni keb e skeng nge gafgow ngorad. a

⁷ Piin ni ur guyed e gafgow ni un tay ko pi tapigpig rok Got e kar gingad nga ferad yul’yul’ ni yugu aram rogon nib gel e gafgow ni yibe tay ngorad, ya gowa bay reb e gelngin ni gathi gelngin e girdi’ ni be pi’ gelngirad. Ma rriyul’ ni aram rogon. Ke micheg apostal Peter ngodad ni gaar: “Faanra nog e thin nib kireb ngomed ni fan e gimed girdien Kristus; ya ra er rogon ma fare [“gelngin,” NW] ni aram [“gelngin Got nib thothup,” NW] e ke yib nga dakenmed.” (1 Pet. 4:14) Gafgow ni yibe tay ngodad ni bochan e gad be fol ko pi motochiyel rok Got e be dag ni gad ba fel’ u wan’. (Matt. 5:10-12; John 15:20) Riyul’ ni gad ma felfelan’ ko re tow’ath ney!

Ra Yib Gelngidad Ngad Gelgad ko Towasar ni Ma Tay e Pi Taab Yangar Rodad Ngodad

8. (a) Mang e ayuweg Joshua nge Kaleb ngar gelgow ko towasar ko girdi’? (b) Mang e gad ra fil ko n’en ni rin’ Joshua nge Kaleb?

⁸ Ba mit e togopuluw ni gathi rib gagiyel nthingari k’adan’ e piin Kristiano riy e aram e towasar ko pi taab yangar rorad. Machane, bochan ni kab gel gelngin Jehovah nib thothup ko fare lem ni ke garer ko re fayleng ney, ma aram fan nrayog ni ngad athamgilgad ko moning ni yima tay ngodad, nge thin nde riyul’ ni yima weliy u murung’agdad, nge towasar ni yima tay ngodad ni ngad rin’ed e tin ni baadag e girdi’. Mang e ayuweg Joshua nge Kaleb ni nge dabi taareban’rad fa ragag i damit nni pi’rad nga ranod  nga Kanaan? Bochan ni ur folgow u rogon ni be pow’iyrow gelngin Got nib thothup, ma aram fan nib thil e lem rorow ko pi cha’nem.​—Mu beeg e Numbers 13:30; 14:6-10, 24.

9. Mang fan nthingari par e piin Kristiano ni yad ba thil?

⁹ Gelngin Got nib thothup e ir e pi gelngin e pi apostal rok Jesus ni ngar folgad rok Got ko bin ni ngar folgad ko piin ni yima tay farad ma yima yog ni yad e tamachib ko baan riyul’ e teliw. (Acts 4:21, 31; 5:29, 32) Yooren e girdi’ e yad ma rin’ e n’en ni ma rin’ e girdi’ u toobrad ya nge dab ni togopuluw ngorad. Machane, tin riyul’ e Kristiano e thingar ra pared ni yad ba mudugil ko tin nib mich u wan’rad nib fel’. Machane ke magar Jehovah ni be pi’ gelngin nib thothup be ayuwegrad ya dakurur rusgad ni ngar pared ni yad ba thil. (2 Tim. 1:7) Mu lemnag reb e kanawo’ ndab da m’inggad riy ko towasar.

10. Mang e magawon ni ma mada’nag boch e Kristiano?

¹⁰ Boch e fel’ yangaren e yad ra nang ni ke rin’ reb e fager rorad ban’en nib togopuluw ko motochiyel u Bible, me maruwaran’rad ko nga rogned fa danga’. Rayog ni ngar lemnaged ni faan yad ra yog ma dab ki pagan’ e fager rorad ngorad, ma aram mar mithaged. Faen ni ke rin’ ban’en nib kireb e ku rayog ni nge yog ko fager rok ni nge mithag ndabi yog. Machane, gathi kemus ni goo fel’ yangaren e yad ma rin’ e re n’ey, ya ku bay boch e girdi’ nib mo’maw’ ni nga rogned ko piilal ko ulung e n’en ni ke rin’ reb e fager rorad, ara reb e girdi’ u tabinaw rorad nib kireb. Machane, tin riyul’ e Kristiano e mang e susun ni ngar rin’ed?

11, 12. Mang e ba fel’ ni ngam rin’ ni faanra yog be’ ngom u lan e ulung ndab mog e kireb ni ke rin’, ma mang fan?

¹¹ Mu lemnag ban’en nrayog ni nge buch. Susun e bay reb e walag ni Alex fithingan ni ke nang ni bay e fager rok u lan e ulung ni Steve fithingan ni ma mith nga i chingaw. Ma aram me yan i non ngak. Machane, de motoyil Steve ko n’en ni ke yog. Ma nap’an ni yog Alex ngak ni nge yan i yog e magawon rok ko piilal, ma aram me yog Steve ngak ni faanra riyul’ ni yow ba fager ma dabi yan Alex i yog e n’en ni ke rin’. Ere gur nge rus Alex nri kireb thilrow e fager rok? Sana ra lemnag ko mini’ rorow e ra riyul’ e thin rok u wan’ e piilal ni faan yira fith Steve me ban. Machane dabi puf e magawon ni faanra dabi yog Alex ban’en. Riyul’ nre n’ey e rayog ni nge kirebnag e tha’ u thilin Steve nge Jehovah. Maku ba fel’ ni nge yib ngan’ Alex ni faanra ‘i lemnag ko mang e be tafinaynag yugu boch e girdi’ ngak, ma bay riy’en, ma faanra pagan’ ngak [Jehovah], ma dabi buch ban’en rok.’ (Prov. 29:25, BT) Mang e ku rayog ni nge lemnag Alex? Rayog ni ngki yan i non ngak Steve bayay. Thingari athamgil ndabi rus. Rayog ni nge m’agan’ Steve ngay ni ngar weliyew murung’agen e magawon rok. Susun ni ngki pi’ e athamgil nga laniyan’ Steve bayay ni nge yan i yog e magawon rok ko piilal, miki yog ngak ni faanra dabi rin’, ma ra mang ir e yan i yog.​—Lev. 5:1.

¹² Faanra ke buch ban’en rom ni aray rogon, ma sana som’on e dabi fel’ u wan’ e fager rom ni ga be athamgil ni ngam ayuweg. Machane, ra  munmun ma sana ra nang ni ga be gay rogon ni ngam ayuweg. Faanra kan ayuweg facha’, ma ke kalngan’, ma dabisiy nra i par ni be pining e magar ngom u laniyan’ nga fanam yul’yul’. Machane, faanra dabuy dakenam, ma aram rogon e miti fager ni ga baadag? N’en th’abi fel’ ni ngaud rin’ed e nga u darod nga laniyan’ e bin th’abi fel’ e fager rorad, ni aram Jehovah. Faan gad ra mon’eg u wan’dad, ma piin nib t’uf rorad e yad ra tay fadad ni bochan e yul’yul’ rodad, mu kur manged boch e fager rodad nib manigil. Dariy ba ngiyal’ ni ngad ted tagil’ Moonyan’ u lan e ulung ni Kristiano. Ya faan gad ra rin’ ni aram rogon, ma aram e gad be togopuluw nga rogon ni ma maruwel gelngin Got nib thothup. Machane, faan gad ra athamgil ni ngad ted e ulung nib beech, ma aram e gad be ngongol nib puluw nga rogon ni be pow’iydad e re gelngin nem.​—Efe. 4:27, 30.

Ra Yib Gelngidad Ngad K’adedan’dad u Fithik’ Urngin Mit e Gafgow

13. (a) Mang gafgow e ma mada’nag e girdi’ rok Jehovah? (b) Mang fan ni ke yoor e pi gafgow ney e chiney?

¹³ Boor mit e gafgow ni ma yib ngodad, ni bod ndakuriy e salpiy, ara maruwel, ara bochan e yoko’ nge ku boch ban’en, ara ke yim’ be’ nib t’uf rodad, ara kad m’argad, nge ku boch e gafgow. Bochan ni ke “mo’maw’” e par, ma gad gubin nra yib e skeng ngodad, ni faanra gathi chiney ma boch nga m’on. (2 Tim. 3:1) Nap’an nra buch, ma thingar dab da rusgad, ya demtrug e miti gafgow nra yib ngodad, ma bay gelngin Got nib thothup nra pi’ gelngidad ngad k’adedan’dad riy.

14. Mang e pi’ gelngin Job ni nge athamgil u fithik’ e gafgow?

¹⁴ Boor mit e gafgow ni yib ngak Job taab yay. I yim’ urngin e gamanman rok nge pi fak, ma pi fager rok e ra digeyed, me m’ar nib gel, ma daki pagan’ e ppin rok ngak Jehovah. (Job 1:13-19; 2:7-9) Machane, Elihu e ir e i fal’eg laniyan’ Job. Thin rok nge thin rok Jehovah ni i yog ngak e be gaar: “Aygum tal boch ngiyal’, ngam motoyil; ma ga lemnag e pi n’en nib fel’ ni ma rin’ Got.” (Job 37:14, BT) Mang e ayuweg Job ni nge k’adan’ u fithik’ e pi skeng ni i yib ngak? Ma mang e ku ra ayuwegdad? Aram e ngaud fal’eged i lemnag e pi kanawo’ ni ma maruwel gelngin Got nib thothup riy. (Job 38:1-41; 42:1, 2) Dabisiy nra yib ngan’dad yu ngiyal’ ni kad guyed ni ma lemnagdad Got, ma ka ma lemnagdad e chiney.

15. Mang e pi’ gelngin apostal Paul ni nge athamgil u fithik’ e gafgow?

¹⁵ Boor mit e gafgow ni i mada’nag apostal Paul ni bochan e michan’ rok. (2 Kor. 11:23-28) Uw rogon ni par nib mudugil mab gel e michan’ rok u nap’an e pi gafgow nem ni i mada’nag? Bochan e i taga’ ngak Jehovah u daken e meybil. Nap’an e pi skeng nem ni i yib ngak nge mada’ ko ngiyal’ nli’ riy nge yim’, me yoloy ni gaar: “Somol e par rog nge pi’ gelngig, nge yog ni gu weliy urngin e thin rok Got nge rung’ag urngin e piin ni gathi yad yu Israel; me Somol e ayuwegeg nda kug wan nga lan l’ugun e layon.” (2 Tim. 4:17) Aram fan nrayog ni nge micheg ngak e piin taareb e michan’ rorad ni ngar pared ni ‘dariy ban’en ni nge magafan’rad ngay.’​—Mu beeg e Filippi 4:6, 7, 13.

16, 17. Mu weliy ban’en ni ke buch ni be dag rogon ni ma pi’ Jehovah gelngin e pi tapigpig rok ngar athamgilgad u fithik’ e gafgow e ngiyal’ ney.

 ¹⁶ Reb e pioneer ni Roxana fithingan e ke guy rogon ni ma ayuweg Jehovah e girdi’ rok. Nap’an ni ning e matal rok ngak e en ga’ ko maruwel ni fan e nge un nga reb e convention, me damumuw fare moon, me yog ngak ni faanra yan ma ra taleg ko maruwel. Yugu aram rogon me yan Roxana, ma i meybil ni nge dabin taleg ko maruwel. Tomuren me gapas laniyan’. Ma faani Montag u tomuren fare convention min taleg ko fare maruwel. Kari magafan’ Roxana. Yugu aram rogon nib sobut’ puluwon ko re maruwel nem, ma ba t’uf rok ya nge yog ni ayuweg e tabinaw rok. Ere ki meybil bayay, me lemnag ni faanra ke ayuweg Got ko tirok ban’en u nap’an fare convention, mab mutrug ni ku ra ayuweg ko tin nib t’uf ko par rok. Nap’an ni be sul i yan nga tabinaw, me guy bangi sign ni be yog ni yibe gay be’ ni nge maruwel u reb e tafen e wup mad, ma aram me yan i yog ir ni nge un ngay. Yugu aram rogon ni ke guy e en ga’ ko maruwel nde nang e wup mad, machane me fek, me pi’ pulwon ni l’agruw yay nib tolang ko fabinem e maruwel ni immoy riy. Ma bin th’abi ga’ e tow’ath ni yog ngak e ke machibnag fare thin nib fel’ ngak girdien e maruwel rok. Ma lal i yad nib muun fare moon nib ga’ ko maruwel ngay e ra filed e Bible mar uned ko taufe.

¹⁷ Yu ngiyal’ e gowa danir fulweg taban e meybil rodad nib papey ara rogon ni gad be lemnag. Faanra aram rogon ma bay ban’en ni fan. Jehovah e manang fan, machane ku rayog ni ngad nanged fan boch nga m’on. Machane bay taab n’en nrayog ni nge pagan’dad ngay, ni aram e der ma digey Got e pi tapigpig rok ni yad ba yul’yul’.​—Heb. 6:10.

Ra Yib Gelngidad Ngad Gelgad ko Skeng nge Pi N’en ni Ma Waliyey ko Kireb

18, 19. (a) Mang fan ni gad manang nra ud mada’naged e skeng nge pi n’en ni ma waliyey? (b) Uw rogon ni ngam gel ko skeng ni ma yib ngom?

¹⁸ Pi tapigpig rok Jehovah e darur gingad ko skeng, nge pi n’en ni ma meewarnag lanin’uy, nge togopuluw, nge towasar ko pi taab yangar rorad. Be fanenikaydad e girdi’ nu fayleng. (John 15:17-19) Machane gelngin Got nib thothup e rayog ni nge ayuwegdad ko pi magawon ni gad ma mada’nag ko pigpig ni gad ma tay ngak Got. Jehovah e dabi pag nge yib ngodad e pi n’en ni ma waliy e girdi’ nge denen nge pag rogon ndab ki yog rodad. (1 Kor. 10:13) Ri dabi pagdad ma ri dabi n’agdad. (Heb. 13:5) Faan gad ra fol ko Thin rok ni kan thagthagnag ma ra gelnagdad. Maku reb e ku rayog ni nge pow’iy gelngin Got nib thothup e piin taareb e michan’ rodad ni ngar ayuweged gadad ko ngiyal’ ni kari t’uf e ayuw rodad.

¹⁹ Manga yugu da ululgad ngaud ninged gelngin Got nib thothup ko meybil rodad nge fol Bible ni gad ma tay. Ma manga yigi ‘gelnagdad Got nga polo’ i gelngin ni ma yib u gelngin ndabi m’ay, nge yog nda athamgiliyed urngin ban’en u fithik’ e gum’an’.’​—Kol. 1:11.

[Footnote]

Uw Rogon ni Ga Ra Fulweg?

• Uw rogon ni ngam fal’eg rogom ni fan ko gafgow nra yib ngom?

• Mang e ngam rin’ ni faanra yog be’ ngom ni ngam mithag e kireb rok?

• Mang e rayog ni nge pagan’um ngay u nap’an ni ke yib e gafgow ngom?

[Study Questions]

[Caption on page 30]

Mang e gad ra fil rok Joshua nge Kaleb?

[Caption on page 31]

Uw rogon ni ngam ayuweg reb e fager rom ni ke rin’ ban’en nib kireb?