Eden Ireram Tafen e Girdi’ ko Som’on, Fa?

AM SUSUNNAG ni ga bay u lan bangi milay’. Dariy ban’en ni be magawonnag lanin’um, ma dariy lingan boch ban’en ni be magawonnagem. Ba ga’ yang e re milay’ nem, ma dariy ban’en riy ni be kirebnag e gapas. Maku der magafan’um ko m’ar nge amith. Dariy ban’en u toobem ni be magawonnagem.

Som’on e ga ra guy boor mit e floras, nge nochi pa’ i lul’ ni be aw raen e yal’ ngay nib fel’ yaan, nge yuwan e gek’iy nge pan nib galunglung. Ga be thamiy e nifeng ni be aw ngom, ma ga be frabon boch ban’en nib fel’. Ma ga be rung’ag lingan yuwan e gek’iy nge lingan e ran ni be yib i map’ u taban e war nga but’, nge lungun e arche’ nge chachangeg. Ga ra susunnag e pi n’ey ma gathi ga ra adag ni ngam par u bang ni aray rogon?

Girdi’ u ga’ngin yang e fayleng e ke mich u wan’rad ni aram rogon e par ko girdi’ ko som’on. U lan boor e chibog ma girdi’ ko teliw ko Judaism, nge Kristiano ni googsur, nge Islam e kan fil ngorad murung’agen fare milay’ nu Eden, ni ireray e gin ni tay Got Adam nge Efa ngay. Rogon ni yog e Bible e ur parew u fithik’ e gapas nge felfelan’. Bay e gapas u thilrow, nge thilrad e gamanman nge Got, me pi’ Got e athap ngorow ni ngar parew u rom ni manemus.—Genesis 2:15-24.

Girdi’ ni Hindu e teliw rorad e kub thil e michan’ rorad u murung’agen e paradis kakrom. Ma pi Buddhist e ke mich u wan’rad ni pi tayugang’ ko teliw rorad ara Buddha e ra sumgad u nap’an ni ka ba paradis e fayleng. Boor e teliw nu Africa ni ma fil e chep ni bay rogon ko fare chep u murung’agen Adam nge Efa.

Bang ko n’en ni ma machibnag boor e teliw e bay rogon ko fare paradis kakrom. Reb e tayol babyor, e yog ni gaar: “Boor e girdi’ ni ke mich u wan’rad ni fare paradis kakrom e ba flont urngin ban’en ni bay riy, ma ba puf rogoy, ma ba gapas, ma bay e felfelan’, ma bay urngin ban’en nib t’uf ko girdi’, dariy be’ ni be towasariy be’ ni nge rin’ ban’en, dariy e marus nge cham. . . .  Bochan e re n’ey ma boor e girdi’ ni kar m’ad ni bochan e re paradis ney ma yad baadag ni ngar gayed e kanawo’ nge yog ngorad e par ni aram rogon.”

Gur, urngin e pi chep nge yalen ney e sum u taa ban’en? Maku rayog ni ‘pi n’en ni ke nang e girdi’’ u murung’agen e paradis e sum u ban’en nib riyul’? Riyul’ ni immoy fare milay’ nu Eden kakrom, maku riyul’ ni immoy Adam nge Efa kakrom, fa?

Piin nde mich fare paradis u wan’rad e yad be darifannag e re chep ney. Ngiyal’ ney ni ke yoor e tamilangan’ ko science, ma ke yoor e girdi’ ni yad be yog nde riyul’ e re chep ney ma boor e pi tayugang’ ko teliw ni yad ma yog nde riyul’ ni immoy fare milay’ nu Eden. Yad be yog nre chep nem e ba fanathin.

Riyul’ ni Bible e bay e fanathin riy. Ke weliy Jesus boor e fanathin nib fel’. Machane be weliy e Bible murung’agen fare milay’ nu Eden e gathi ba fanathin, ya reb e chep nib riyul’ mab mom ni ngan nang fan. Machane faanra de riyul’ e n’en ni be yog e Bible u murung’agen fare paradis ma kub mo’maw’ ni nge pagan’uy nga boch e thin u yu yang riy. Ere ngad guyed ko mang fan ni boch e girdi’ e de mich u wan’rad fare milay’ nu Eden, maku ngad guyed ko mang fan ni aray rogon e n’en ni yad be lemnag. Ngemu’, ma gad guy ko mang nib ga’ fan e re chep ney ngodad.