Ga Ma Fanenikay e Ngongol Nde Mat’aw, Fa?

“Fanenikam e ngongol nde mat’aw.”—HEB. 1:9.

1. Mang e fil Jesus u murung’agen e t’ufeg?

 I TAMILANGNAG Jesus ngak pi gachalpen feni ga’ fan e t’ufeg ni gaar: “Nggu pi’ reb e motochiyel nib beech ngomed, nge bigimed me t’uf bigimed rok. Rogon ni um pired ni gimed ba t’uf rog, e aram rogon nthingar um pired nra bigimed ma ba t’uf rok bigimed. Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:34, 35) I tay Jesus chilen ngak pi gachalpen ni nge bagayad me t’uf bagayad rok. Re t’ufeg nem e ra mang pow rorad. Miki yog ni gaar: “Nge t’uf romed e pi toogor romed, mpied e meybil rok e piin ni yad be ngongliy e kireb ngomed.”—Matt. 5:44.

2. Pi gachalpen Kristus e thingar ra fanenikayed e mang?

² Machane gathi kemus ni ke fil Jesus ngorad murung’agen e t’ufeg, ya ki fil ngorad ni bay ban’en ni ngar fanenikayed. Kan weliy murung’agen Jesus ni gaar: “Ma ngongol nib mat’aw e ir e ba t’uf rom ma fanenikam e ngongol nde mat’aw.” (Heb. 1:9; Ps. 45:7) Re n’ey e be dag ni thingar da t’ufeged e tin nib mat’aw ban’en ma gad fanenikay e denen ara ngongol nde mat’aw. Aram fan ni tamilangnag apostal John ni gaar: “En nra denen e ba kireb e rok ni ke th’ab e motochiyel rok Got; ya denen e aram e kan th’ab fare motochiyel.”—1 John 3:4.

3. Mang aningeg ban’en e yira weliy ko re article ney ni bay rogon ko ngan fanenikay e ngongol nde mat’aw?

 ³ Gadad e Kristiano e thingar da fithed gadad ni nge lungudad, ‘Gu ma fanenikay e ngongol nde mat’aw, fa?’ Ngad weliyed rogon ni nge m’ug ni gad ma fanenikay e kireb ko aningeg i n’en ni baaray ni aram e: (1) rogon e unum nib pag rogon u wan’dad, (2) rogon ngongolen e pig u wan’dad, (3) rogon e ngongol ni darngal u wan’dad, nge (4) rogon e piin ni yad baadag ni ngar rin’ed e ngongol nde mat’aw u wan’dad.

Dab Mu Unum nge Pag Rogon

4. Mang fan nda i magawon Jesus ni nge ginang e girdi’ u murung’agen e unum nib pag rogon?

⁴ Yu ngiyal’ e ma unum Jesus buchuuw e wain ya manang ni aram reb e tow’ath ni yib rok Got. (Ps. 104:14, 15) Machane, da i unum nge pag rogon. (Prov. 23:29-33) Aram fan ni da i magawon ni nge fonownag e girdi’ ni yad ma unum nge pag rogon. (Mu beeg e Luke 21:34.) Unum nib pag rogon e rayog ni nge waliy be’ nge rin’ reb e denen nib ubchiya’. Aram fan ni yoloy apostal Paul ni gaar: “Dab mu balyanggad ko wain, ya ra kirebnagmed.” (Efe. 5:18) Ki fonownag e piin ni kar puwelwolgad u lan e ulung ndab ra “manged sib ko wain.”—Titus 2:3.

5. Piin yad ma unum e alkul e susun ni mang deer e ngar fithed yad riy?

⁵ Faanra ngam dugliy ni ngam unum e alkul, ma thingar mu fithem ni nge lungum: ‘Taareb rogon e lem romow Jesus u murung’agen e unum nib pag rogon, fa? Da gur magawon ni faanra nggu fonownag be’ ni ma unum nib pag rogon, fa? Gu ma unum ni nge chuw e magafan’ rog ara nge dab kug mochuch, fa? Uw urngin e alkul ni gu ma unum u gubin e wik? Mang e gu ma rin’ u nap’an nra yog be’ ngog ni kaygi pag rogon e unum ni gu ma tay? Gu ma yoror rog ara gu ma damumuw, fa?’ Unum nib pag rogon e ra mo’maw’nag ni ngad lemgad nib fel’ rogon ma gad dugliy ban’en u fithik’ e gonop. Pi gachalpen Kristus e yad ma athamgil ni ngar ayuweged e lem rorad.—Prov. 3:21, 22.

Ngan Palog ko Ngongolen e Pig

6, 7. (a) Uw rogon e ngongol rok Jesus ngak Satan nge pi moonyan’ rok? (b) Mang fan ni ke garer e ngongol ko pig e ngiyal’ ney?

⁶ Nap’an ni immoy Jesus u fayleng ma i togopuluw ngak Satan nge pi moonyan’ rok. I togopuluw nga boch ban’en ni i rin’ Satan ni nge skengnag e yul’yul’ rok. (Luke 4:1-13) Ki tamilangnag me siyeg boch ban’en nib mith ni i fanay Satan ni nge gagiyegnag e lem nge ngongol rok. (Matt. 16:21-23) Ki ayuweg Jesus boch e girdi’ ni ke ying e moonyan’ ngorad.—Mark 5:2, 8, 12-15; 9:20, 25-27.

⁷ Tomuren ni Pilung Jesus ko duw ni 1914, me chuweg Satan nge pi moonyan’ rok u tharmiy. Tomuren nnin’ Satan nga fayleng ma aram me tabab i “bannag e girdi’ nu fayleng ni polo’.” (Rev. 12:9, 10) Dab ni gin ngay ni be yoor ngongolen e pig i yan. Ere mang e rayog ni nge ayuwegdad?

8. Mang boch e deer ni nge bagadad me fith ir riy ni bay rogon ko pi n’en ni gad ma chuweg e chalban ngay?

⁸ Rib tamilang rogon ni be ginangey e Bible u murung’agen e riya’ nra yib ko ngongolen e pig. (Mu beeg e Deuteronomy 18:10-12.) Ngiyal’ ney e ma gagiyegnag Satan nge pi moonyan’ rok laniyan’ e girdi’ u daken e kachido, nge boch e babyor, nge gosgos ko TV nge  internet ni yaan e pig. Ere nap’an ni gad be mel’eg boch ban’en ni ngad chuweged e chalban rodad ngay ma thingar da fithed gadad ni nge lungudad: ‘Kug mel’eg ni nggu yaliy e kachido, nge gosgos ko TV nge internet, nge boch e babyor ni bay yaan ngongolen e moonyan’ riy u lan fa in i pul ni ke yan, fa? Gu manang feni ga’ fan ni ngan palog ko pi n’ey, fa gu be darifannag? Gu ma lemnag rogon laniyan’ Jehovah ko pi n’en ni gu ma chuweg e chalban rog ngay, fa? Faanra kug un ko pi ngongol ney, ma gu ra guy rogon nggu digey ni bochan e ba t’uf Jehovah rog nge pi kenggin e motochiyel rok nib mat’aw, fa?’—Acts 19:19, 20.

Mu Fol ko N’en ni Yog Jesus u Murung’agen e Ngongol ni Darngal

9. Mang e ra rin’ me adag be’ e tin nde mat’aw?

⁹ Ke tay Jesus tanggin e motochiyel rok Jehovah u murung’agen e par ko pumoon nge ppin ni gaar: “Mogned, dawor mbeeged e pi thin ni baaray u lan e babyor nib thothup ni gaar, Som’on ko tabolngin e sunumiyrow e en ni Tasunumiy ni bagayow e be’ nib pumoon ma bagayow e be’ ni ppin? Me gaar, ‘Ereray fan nra digey e pumoon e chitamangin nge chitiningin ngar pirew leengin, mi yow par ni kar taab girdi’gow.’ Ya aram e gathi ku yow ba ruw ni girdi’, ya kar taab girdi’gow. Ere thingari dabi dareg e girdi’ e gali cha’ ni Got e ke chagiyrow.” (Matt. 19:4-6) Manang Jesus ni pi n’en ni gad ma guy e rayog ni nge kirebnag lanin’dad. Nap’an fare Welthin rok u daken e Burey me yog ni gaar: “Kam rung’aged ni ke lunguy, ‘Dab mpirew be’ ni gathi mabgol rom.’ Machane nggog ngomed e chiney, ni en nra sap ngak be’ ni ppin me finey ni manga yugu ra pirew, e ke kireb e rok, ni fan e kar pirew u fithik’ i laniyan’.” (Matt. 5:27, 28) Bin riyul’ riy, e piin ni kar darifannaged e thin ni yog Jesus e ba t’uf e tin nde mat’aw rorad.

10. Mu weliy ban’en ni ke buch rok be’ ni be dag ni rayog ni nge tal be’ i yaliy yaan e ngongol ni puwlag.

¹⁰ Be n’igin Satan ni nge elmerin e ngongol ni darngal ni be rin’ e girdi’ u daken yaan e ngongol ni puwlag ni ma yaliy e girdi’ e ngiyal’ ney. Ke garer yaan e ngongol ni puwlag e ngiyal’ ney. Piin yad ma yaliy e pi n’ey e kar pirieged ni ke mo’maw’ ni ngar chuweged u lanin’rad. Ma rayog ni ngar mechamgad ngay. Mu lemnag e n’en ni buch rok reb e Kristiano. Ke yog ni gaar: “Ug mith ngaug yaliy yaan e ngongol ni puwlag. Ma ug par ngaug lemnag reb e par ni gu be lemnag nib thil nga rogon e par ko piin ni yad ma pigpig ngak Jehovah. Gu manang nib kireb e re n’ey, machane kug lemnag ni kab fel’ u wan’ Got e pigpig ni gu be tay ngak.” Mang e ke thilyeg e lem rok e re walag ney? Ke yog ni gaar: “Kug dugliy ni nggog e magawon rog ngak e piin piilal ni yugu aram rogon ni aram e n’en nth’abi mo’maw’ ni nggu rin’.” Ke yog rok e re walag ney ni nge pag e re ngongol rok nem nib kireb. I gaar: “Tomuren ni kug pag e re n’em, ma kug thamiy ni ke beech e nangan’ rog.” Piin ni yad be fanenikay e ngongol nde mat’aw e thingar ra fanenikayed yaan e ngongol ni puwlag.

11, 12. Uw rogon ni nge m’ug ni gad be fanenikay e ngongol nde mat’aw ko pi tang ni gad ma motoyil ngay?

¹¹ Musik nge tang ni gad ma motoyil ngay e rayog ni nge suruy lanin’dad ko tin nib fel’ ara tin nib kireb. Musik e reb e tow’ath ni yib rok Got ma ke n’uw nap’an ni yima fanay ni fan ko bin riyul’ e liyor. (Ex. 15:20, 21; Efe. 5:19) Machane ke yoor mit e tang e ngiyal’ ney ni be gagiyelnag e ngongol ni darngal. (1 John 5:19) Uw rogon ni ngam nang ko ba kireb e tang ni ga ma motoyil ngay fa danga’?

 ¹² Rayog ni ngam fithem ni nge lungum: ‘Pi tang ni gu ma motoyil ngay e be weliy murung’agen e mathang fan, nge ngongol ni darngal, nge ngongol ni be darifannag Got, fa? Faan gu ra beeg e thin riy ngak be’ ma ra lemnag ni gu be fanenikay e ngongol nde mat’aw, fa ra lemnag nib alit e lem rog?’ Dabiyog ni nga dogned ni gad be fanenikay e ngongol nde mat’aw ni faanra aram rogon e miti musik ni gad ma motoyil ngay. Ke yog Jesus ni gaar: “Pi n’en nra yib u lan l’uguney nga but’ e yib u lanin’uy; ereram e pi n’en ni ir e ma alitnag be’. Ya laniyan’ be’ e ma yib e lem nib kireb riy ni ir e ma pingeg faanem nge li’ be’ ngem’, fa ra pirew be’ ni gathi mabgol rok, ma be rin’ yugu boch ban’en ni aram e ngongol ko darngal; nge moro’ro’ u fithik’ e yargel, me lifith l’ugun, me t’ar e thin nga daken e girdi’.”—Matt. 15:18, 19; mu taarebrogonnag ko James 3:10, 11.

Mu Fol Rok Jesus u Rogon ni Ma Lemnag e Piin Yad Baadag e Ngongol ni De Mat’aw

13. Uw rogon u wan’ Jesus e piin kar paged yad nga pa’ e denen?

¹³ Ke yog Jesus ni ke yib ni nge ayuweg e pi ta denen ni ngar kalgadngan’rad. (Luke 5:30-32) Ere uw rogon u wan’ e piin ni kar paged yad nga pa’ e denen? I ginangey Jesus u murung’agen e ngongol rorad nib kireb ni ngan guy rogon ni nge dabi af. (Matt. 23:15, 23-26) Ki yog nib tamilang ni gaar: “Gathi gubin e girdi’ ni ma piningeg ni ma lungurad ‘Somol, Somol,’ e yad ra yan nga suwon Got u tharmiy, ya kemus ni piin ni yad ma rin’ e n’en ni baadag e Chitamag nu tharmiy ni ngar rin’ed e yad ra yan ngay. Ma ra yan i taw ko Chirofen nem ma boor e girdi’ e ra gaar ngog, ‘Somol, Somol! U daken fithingam e ug weliyed e thin rok Got riy ngak e girdi’, ma fithingam e ug tulufed boor e moonyan’ ngay, ma fithingam e ug ngongliyed boor e maang’ang ngay!’” Machane, ra gaar ngak e piin ni yad ma rin’ e tin de mat’aw: “Mu chuwgad rog.” (Matt. 7:21-23) Mang fan nra yog e thin ni aram rogon ngorad? Bochan e kar darifannaged Got ma ngongol rorad nde mat’aw e ke gafgownag boch e girdi’.

14. Mang fan ni yima tharbog e girdi’ ko ulung ndarur kalgadngan’rad?

¹⁴ Be yog e Thin Rok Got ni piin ni kar denengad ma dab ra kalgadngan’rad e ngan chuwegrad ko ulung. (Mu beeg e 1 Korinth 5:9-13.) Dalip fan nib t’uf ni ngan rin’ e re n’ey, ni aram e: (1) nge dab nog ban’en nib togopuluw nga fithingan Jehovah, (2) me par e ulung nib beech, (3) min ayuweg faen ni ke denen nge kalngan’.

15. Faanra gad baadag ni ngad pared ni gad ba yul’yul’ ngak Jehovah, ma mang boch e deer nib ga’ fan ni ngad fithed gadad riy?

¹⁵ Taareb rogon e lem rodad Jesus u murung’agen e piin ni kar paged yad nga pa’ e denen, fa? Ba t’uf ni ngad lemnaged e pi deer ni baaray: ‘Ra ug chag ngak be’ ni kan tharbog ko ulung ara be’ ni ke chuweg ir ko ulung, fa? Uw rogon ni faanra faen ni kan tharbog ko ulung e be’ u lan e tabinaw rog ndakir par u tabinaw?’ Re n’ey e rayog ni nge skengnag e t’ufeg rodad ko tin nib mat’aw nge yul’yul’ rodad ngak Got.

16, 17. (a) Mang magawon e ke mada’nag reb e matin ni Kristiano? (b) Mang e ke ayuweg ni nge fol ko fonow ni kan pi’ u murung’agen e piin ni kan tharbograd ko ulung?

¹⁶ Mu lemnag e n’en ni buch rok reb e walag nib pin ni bay reb e pagel ni fak ni immoy nib t’uf Jehovah rok. Ma faani munmun me mel’eg ni nge rin’ e tin nde mat’aw ma de kalngan’. Ma aram min tharbog ko ulung. Fare  walag nib pin e rib t’uf Jehovah rok, maku ba t’uf fak rok. Ere ke pirieg nrib mo’maw’ ni nge fol ko motochiyel u Bible ni be yog ndab kun chag ngak.

¹⁷ Faan manga gur, ma mang fonow e ga ra pi’ ko re walag ney? Reb e piilal e ayuweg ni nge nang ni manang Jehovah e amith ni ke tay laniyan’. Ke yog fare walag ngak ni nge lemnag e amith ni tay laniyan’ Jehovah u nap’an ni ke togopuluw boch e engel rok ngak. Ke yog fare piilal ngak ni yugu aram rogon ni manang Jehovah gelngin e kireban’ ni gad ra tay, machane rogon e motochiyel rok e ngan tharbog facha’ ni bochan e de kalngan’. Ere ke fol ko fonow ni kan pi’ ngak ma ke tayfan e re yaram nem. a Yul’yul’ ni aray rogon e ma felfelan’nag Jehovah.—Prov. 27:11.

18, 19. (a) Faanra dab kud nonad ngak be’ ni kan tharbog, ma be m’ug ni gad be fanenikay e mang? (b) Mang angin nra yib ni faan gad ra par ni gad ba yul’yul’ ngak Got nge yaram rok?

¹⁸ Faanra ke buch e re n’ey rom, ma dab mu pagtalin ni manang Jehovah e kireban’ ni kam tay. Faanra dab mu non ngak be’ ni kan tharbog ko ulung fa ke chuweg ir ko ulung, ma aram e ga be dag ni ga be fanenikay e ngongol nib kireb ni ke rin’. Maku be m’ug nib t’uf rom ma ga baadag ni ngam rin’ ban’en nra yib angin ngak. Faan ga ra par ni gab yul’yul’ ngak Jehovah ma dabisiy nra kalngan’ nge sul ngak Jehovah.

¹⁹ Immoy be’ nni tharbog ko ulung miki sul bayay ni gaar: “Gu be felfelan’ ni bochan e t’ufeg rok Jehovah ko girdi’ rok ma aram fan ni ma ayuweg e ulung rok ni nge par nib beech. N’en ni ma lemnag e girdi’ ndariy e runguy riy e riyul’ nib t’uf ni ngan rin’ ma bay e t’ufeg riy.” Ga be lemnag nra yog e cha’ ney e pi thin ney ni faan gomanga nni tharbog ko ulung ma ka yibe non ngak? Faan gad ra fol ko re yaram ney ma aram e be m’ug nib t’uf e tin nib mat’aw rodad ma gad be tayfan mat’awun Jehovah ni nge tay e motochiyel u lan e ulung.

“Mu Fanenikayed e Tin nib Kireb”

20, 21. Mang nib ga’ fan ni ngad filed rogon ni ngad fanenikayed e tin nde mat’aw?

²⁰ I ginangey apostal Peter ni gaar: “Mu tedan’med mi gimed ayuwegmed!” Mang fan? Bochan ni “moonyan’ ni ir e toogor romed e yugu be yan ni bod ba layon ni be tolul, ni be gayiy be’ ni nge longuy.” (1 Pet. 5:8) Gur e cha’nem, fa? Rayog ni nge dabi aw ni gur ni faan ga ra fil rogon ni ngam fanenikay e tin nde mat’aw.

²¹ De mom ni ngan fanenikay e tin nib kireb. Kan gargelegdad nga fithik’ e denen ma gad be par u ba fayleng ni girdi’ riy e goo tin ni yad baadag e yad be rin’. (1 John 2:15-17) Faan gad ra folwok rok Jesus Kristus me t’uf Jehovah Got rodad ma aram e rayog ni ngad fanenikayed e tin nde mat’aw. Ere ngad dugliyed ni ngad “fanenikayed e tin nib kireb,” ma nge pagan’dad ni Jehovah e ma “yoror rok e piin ba yul’yul’.”—Psalm 31:23, BT; Amos 5:15.

[Footnote]

Uw Rogon ni Ga Ra Fulweg?

• Mang e ra ayuwegdad ni ngad gonopiyed rogon e alkul u wan’dad?

• Mang boch ban’en nrayog ni nge ayuwegdad ngad paloggad ko ngongolen e pig?

• Mang fan nib kireb ni ngaun yaliy yaan e ngongol ni puwlag?

• Uw rogon ni nge m’ug ni gad be fanenikay e tin nde mat’aw u nap’an ni kan tharbog be’ nib t’uf rodad?

[Study Questions]

[Picture on page 29]

Faanra kam dugliy ni ngam unum e alkul, ma mang e susun ni ngam lemnag?

[Picture on page 30]

Mu kol ayuw ko pi n’en ni ma fanay Satan ni ngan chuweg e chalban ngay

[Picture on page 31]

Be’ ni ma yaliy yaan e ngongol ni puwlag e mang e be m’ug nib t’uf rok?