Nge T’uf e Tin nib Mat’aw Rom u Polo’ i Gum’irchaem
Nge T’uf e Tin nib Mat’aw Rom u Polo’ i Gum’irchaem
“Ba t’uf rom e n’en nib [mat’aw].”—PS. 45:7, BT.
1. Mang e ra ayuwegdad ni ngad leked e “bin nib mat’aw e kanawo’”?
MA FANAY Jehovah e Thin Rok nge gelngin nib thothup ni nge pow’iy e girdi’ rok ko “bin nib mat’aw e kanawo’.” (Ps. 23:3) Machane, bochan ndawor da flontgad, ma rayog ni ngad sorgad nga bang ko re kanawo’ nem. Faanra ngad sulod ngad rin’ed e tin nib mat’aw mab t’uf ni ngad athamgilgad. Ere, mang e ra ayuwegdad? Thingar da adaged ni ngad rin’ed e tin nib mat’aw ni bod Jesus.—Mu beeg e Psalm 45:7.
2. Mang e “bin nib mat’aw e kanawo’”?
2 Mang e “bin nib mat’aw e kanawo’”? Rayog ni ngad nanged e re “kanawo’” nem ni faan gad ra nang ko mang e ba m’agan’ Jehovah ngay. Fare bugithin ni “mat’aw” ko thin ni Hebrew nge Greek e be yip’ fan ni ngan fol ko pi kenggin e motochiyel nib fel’ rogon. Bochan ni Jehovah e ir “tagil’ e tin nib mat’aw,” mab felfelan’ e pi tapigpig rok ni ngar sapgad ngak ni nge dag e bin nib mat’aw e kanawo’ ngorad ni ngar leked.—Jer. 50:7, NW.
3. Uw rogon ni ngkud nanged boch murung’agen e ngongol rok Got nib mat’aw?
3 Faan gad ra athamgil ngad folgad ko pi kenggin e motochiyel rok Got nib mat’aw ma aram e rayog ni ngad fel’gad u wan’. (Deut. 32:4) Machane, som’on e thingar da filed murung’agen Jehovah Got nib fel’ rogon u daken e Thin rok ni aram e Bible. Ra yoor ban’en ni gad ra fil u murung’agen, ma aram e rayog ni ngad chugurgad ngak, miki t’uf rodad e ngongol rok nib mat’aw. (Jas. 4:8) Nap’an nra t’uf ni ngad dugliyed ban’en, ma thingar da paged e Thin Rok ni ke thagthagnag nge pow’iydad.
Ngan M’oneg e Tin nib M’agan’ Got Ngay
4. Mang e ba muun ko ngan m’oneg e tin nib m’agan’ Got ngay?
4 Mu beeg e Matthew 6:33. Ra ngan m’oneg e tin nib m’agan’ Got ngay ma gathi kemus ni ngan machibnag fare thin nib fel’ ni murung’agen Gil’ilungun. Thingari puluw e ngongol rodad ko pi kenggin e motochiyel rok Jehovah u gubin e rran ni faanra nge fel’ e pigpig rodad u wan’. Mang e thingari rin’ e piin ni yad baadag ni ngar m’oneged u wan’rad e tin nib m’agan’ Jehovah ngay? Be gaar e Bible: “Thingar mon’ed nga dakenmed e bin nib beech i gimed ni bod rogon e munmad, ni bin nib beech i gimed ni Got e sunumeg ni bod ir, ma ke gagiyel u daken e bin riyul’ e wok nib yal’uw ma mmat’aw ni ke yog ngomed.”—Efe. 4:24.
5. Mang e ra ayuwegdad ni ngad gelgad ko pi n’en ni ma meewarnag lanin’uy?
5 Nap’an ni gad be athamgil ni ngad folgad ko pi kenggin e motochiyel rok Got, ma yu ngiyal’ e rayog ni nge mulan’dad ni bochan e pi n’en ni gad ba meewar riy. Mang e ra ayuwegdad ni nge dabki mulan’dad u nap’an ni ke yib e magawon nib gel ngodad me t’uf e tin nib mat’aw u wan’dad? (Prov. 24:10) Thingar ud meybilgad ngak Jehovah ni gubin ngiyal’ “ni gadad ba yul’yul’ u lanin’dad ngak ma mmich u wan’dad nder maruwaran’dad rok.” (Heb. 10:19-22) Demtrug ko gadad e Kristiano ni kan dugliydad fa athap rodad e ngad pared u fayleng, mab mich u wan’dad fare biyul ni pi’ Jesus Kristus nge liw rok ni ir e Prist nib Tolang. (Rom. 5:8; Heb. 4:14-16) I yoloy apostal John ni gaar: “Rachaen Jesus . . . e ir e be beechnagdad u urngin e denen rodad. (1 John 1:6, 7) Yugu aram rogon ni denen rodad e rib gagiyel nib ramaen row, machane be yog e Bible ni ‘bay ni maluknagdad ngad beechgad ni bod feni beech e ayis ni ma mul u lang nga but’.’ Biyul ni ke tay Jehovah ngodad u daken e maligach ni pi’ Fak nrib t’uf rok e aram ban’en nrib fel’!—Isa. 1:18.
Ngam Fal’eg i Yaliy Madan e Cham Rom ni Ke Pi’ Got
6. Mang nrib ga’ fan ni ngaud fal’eged i yaliy madan e cham rodad ni ke pi’ Got?
6 Gubin ngiyal’ nib t’uf rodad “fa gin’en ni ma ing e salthaw nga daken ngorongoren,” ya aram bang ko fare madan e cham ni ke pi’ Got ngodad. (Efe. 6:11, 14) Demtrug ko ka fin da ognaged gadad ngak Jehovah fa ke n’uw nap’an ni gad be pigpig ngak, ma rib ga’ fan ni ngaud fal’eged i yaliy madan e cham rodad ni ke pi’ ni gubin e rran. Mang fan? Bochan e ka nin’ Moonyan’ nge pi engel rok nga fayleng. (Rev. 12:7-12) Kari damumuw Satan ma manang ndaki n’uw nap’an ni nge par. Aram fan ni kari elmerin ni be cham ngak e pi tapigpig rok Got. Ere rib ga’ fan ni ngaud pared ni gubin ngiyal’ ma bay rodad “fa gin’en ni ma ing e salthaw nga daken ngorongoren.”
7. Faanra ba ga’ fan u wan’dad “fa gin’en ni ma ing e salthaw nga daken ngorongoren,” ma ra uw rogon e ngongol rodad?
7 Fa gi n’en ni ma ing e salthaw nga daken ngorongoren e ma ayuweg gum’irchaen, ku arrogodad ni tin nib mat’aw e ma yororiy lanin’dad. Bochan ndawor da flontgad, ma aram fan nib sasalap gum’ircha’dad. (Jer. 17:9) Ere rib ga’ fan ni ngan ayuweg. (Gen. 8:21) Faanra ba ga’ fan u wan’dad “fa gin’en ni ma ing e salthaw nga daken ngorongoren,” ma dariy ba ngiyal’ ni gad ra luf, ni aram e ngad chuweged e chalban rodad ko pi n’en ni ma fanenikay Got; ara ud lemnaged ni ngad uned ko ngongol nib kireb. Ku dab da adbeyed e tayim ko miyal TV, ya ngad athamgilgad ni ngad rin’ed e tin nib m’agan’ Jehovah ngay. Mus ni faanra kad olobochgad kad lemnaged boch ban’en nde mat’aw, ma rayog ni ngad thilyeged e lem rodad u daken e ayuw rok Jehovah.—Mu beeg e Proverbs 24:16.
8. Mang fan nib t’uf rodad “fa gin’en ni yima mith nga fon ko cham”?
8 “Fa gin’en ni yima mith nga fon ko cham,” e ku aram bang ko fare madan e cham ni ke pi’ Got ngodad. Ra ayuwegdad ni ngad piliged “urngin gan e gat’ing ni be yik’ ni be pag Faanem nib Kireb” ngodad. (Efe. 6:16) Ma michan’ nge t’ufeg rodad ngak Jehovah u polo’ i gum’ircha’dad e ra ayuwegdad ni ngaud rin’ed e tin nib mat’aw ma gad par u daken fare pa’ i kanawo’ ni sor ko yafas ni manemus. Ra gel feni t’uf Jehovah rodad, ma aram e ra ga’ fan u wan’dad e tin nib m’agan’ ngay. Machane uw rogon e nangan’ rodad? Uw rogon nra ayuwegdad ni nge t’uf e tin nib mat’aw rodad?
Nga i Par e Nangan’ Rom nib Fel’
9. Mang angin ni faanra ud pared nib fel’ e nangan’ rodad?
9 Nap’an ni kad uned ko taufe, ma gad ning ngak Jehovah ni nga i par e nangan’ rodad nib “fel’.” (1 Pet. 3:21) Bochan ni gad be maruweliy e michan’ rodad ni fan ko fare biyul, ma aram fan nrayog ni nge upunguy rachaen Jesus e denen rodad ma gad par ni kad beechgad u mit Got. Machane, faanra ngad pared ni aram rogon ma rib t’uf ni nga i par e nangan’ rodad nib fel’. Faanra bay yu ngiyal’ ni ma magawon e nangan’ rodad nga ban’en ma aram e be m’ug riy ni ka be maruwel nib fel’ rogon. Re n’ey e ku be dag ni ka be maruwel e nangan’ rodad nrogon nib puluw ko pi kanawo’ rok Jehovah nib mat’aw. (1 Tim. 4:2) Machane piin nib t’uf e tin nib mat’aw rorad e ku bay reb e kanawo’ nrayog ni nge ayuwegrad e nangan’ rorad riy.
10, 11. (a) Mu weliy e n’en ni buch rok be’ ni be dag feni ga’ fan ni ngad folgad ko nangan’ rodad ni kan skulnag ko thin nu Bible? (b) Mang fan nrayog ni ngad felfelan’gad ni faanra ba t’uf e tin nib mat’aw rodad?
10 Nap’an ni gad ra rin’ ban’en nib kireb, ma rayog ni nga i yog e nangan’ rodad ngodad. Immoy reb e fel’ yangaren ni digey e bin nib mat’aw e kanawo’, ma aram me mecham ngak ni nga i yaliy yaan e ngongol ni puwlag miki tabab i thoy e marijuana. Ra yan ko muulung ma be magawon laniyan’ ni bochan e manang ni be rin’ ban’en nib kireb, maku arrogon u nap’an nra un ko machib. Ere faani munmun me tal ndaki un ko pi n’ey. I gaar: “Da gu nang nra i par e nangan’ rog ma be yog ngog ni bay ban’en ni kug rin’ nib kireb.” Miki gaar, “Aningeg e duw ni gu par ni aram rogon e ngongol rog.” Munmun me lemnag ni ngki sul bayay ko tin riyul’. Yugu aram rogon ni lemnag ndabi motoyil Jehovah ko meybil rok, me meybil nge wenig ni ngan n’ag fan rok. De gaman ragag e minit, me taw e chitiningin ni nge guy me pi’ e athamgil nga laniyan’ ni nge sul nge un ko muulung. Ma aram me yan nga Kingdom Hall nge yog ngak reb e piilal ni nge fil e Bible ngak. Boch nga tomuren me un ko taufe, ma ri be pining e magar ngak Jehovah ni ke ayuweg e yafas rok.
11 Riyul’ ni faan gad ra rin’ e tin nib fel’, ma gad ra felfelan’. Ma gad ra fil rogon ni nge t’uf e tin nib mat’aw rodad mu ud rin’ed ni gubin ngiyal’, ma aram e ku ra gel boch e felfelan’ rodad ni bochan e gad manang ni gad be rin’ e tin nib m’agan’ e Chitamangidad nu tharmiy ngay. Aygum lemnag! Dab ki n’uw nap’an me par urngin e girdi’ nib fel’ e nangan’ rorad ni bochan e ke yog ni nge m’ug rarogon Got rorad nib fel’ rogon. Ere, ngad athamgilgad ni ngari t’uf e tin nib mat’aw rodad ma gad felfelan’nag Jehovah.—Prov. 23:15, 16.
12, 13. Uw rogon ni ngad skulnaged e nangan’ rodad?
12 Uw rogon ni ngad skulnaged e nangan’ rodad? Nap’an ni gad be fil e Bible nge pi babyor ni kan ngongliy nib puluw e thin riy ko Bible, ma rib ga’ fan ndab da paged talin ni en nib mat’aw e ra fal’eg i lemnag e n’en ni ke fil ya nge nang rogon e “fulweg” ni nge pi’ ku be’. (Prov. 15:28, BT) Am lemnag rogon nra ayuwegdad e re n’ey u nap’an nra t’uf ni ngad dugliyed ban’en u murung’agen reb e maruwel ni ngad uned ngay. Faanra bay reb e maruwel nib tamilang u Bible ndab da uned ngay, ma yooren i gadad e ba papey nra fol ko fonow ni kan pi’ u daken fare tapigpig nib yul’yul’ ma ba gonop. Machane, faanra gathi rib tamilang ko ba fel’ ni ngad uned ngay fa danga’, ma aram e susun ni ngad yaliyed e pi kenggin e motochiyel u Bible ma gad fal’eg i lemnag u fithik’ e meybil. Re n’ey e ku bay rogon nga boch e kenggin e motochiyel u Bible nib t’uf ni ngad folgad riy ya nge dab da magawonnaged laniyan’ boch e girdi’. (1 Kor. 10:31-33) Kub ga’ fan ni ngad lemnaged e pi kenggin e motochiyel ni bay rogon ko tha’ u thildad Got. Faanra ba riyul’ Jehovah u wan’dad, ma ngad fithed ni nge lungudad, ‘Faan gu ra un ko re maruwel ney, ma ra kireban’ Jehovah ngay, fa?’—Ps. 78:40, 41.
13 Nap’an ni gad be fal’eg rogodad ni fan ko Fol Wulyang ko Damit ara Fol Bible ko Ulung, ma ba fel’ ni ngad fal’eged i lemnag e pi n’en ni gad be fil riy. Gad ma gur ngaud line naged e fulweg ko deer riy, ngemu’ ma gad yan ko bin migid e paragraph ndab da filed nib fel’ rogon, fa? Faanra aram rogon ni gad ma fil e babyor rodad ma aram e dabiyog ni ngari t’uf e tin nib mat’aw rodad ara i par e nangan’ rodad nib fel’. Faanra nge t’uf e tin nib mat’aw rodad, ma ba t’uf ni ngaud filed e Thin rok Got nib fel’ rogon ma ud fal’eged i lemnag. Ere rib t’uf e athamgil!
Piin ni Kar M’ad ni Bochan e Tin nib Mat’aw
14. Mang e baadag Jehovah Got nge Jesus Kristus ni ngad lemnaged ko pigpig ni gad be tay?
14 Baadag Jehovah Got nge Jesus Kristus ni ngaud pigpiggad ni gad ba felfelan’. Uw rogon ni ngad pared ni gad ba felfelan’? Thingari t’uf e tin nib mat’aw rodad! I yog Jesus ko fare Welthin ni tay u daken e Burey ni gaar: “Nge felan’ e piin ni kar m’ad ni bochan ni ngar nanged e tin nib mat’aw, ya Got e ra pi’ e tin nib t’uf rorad!” (Matt. 5:6, NW) Mang fan e pi thin ney ngak e piin nri yad baadag ni nge t’uf e tin nib mat’aw rorad?
15, 16. Mang boch e kanawo’ ni yira pi’ e tin t’uf rok e piin ni kar m’ad ni bochan ni ngar nanged e tin nib mat’aw?
15 Re fayleng ney ni gad be par riy e ke suwey faanem nib kireb. (1 John 5:19) Gad ra beeg e shimbung ma gad ra pirieg riy murung’agen e kireb nge cham ni be tay e girdi’. Kireb ni be rin’ e girdi’ ngorad e ba mo’maw’ ni nge nang be’ nib mat’aw fan. (Ekl. 8:9) Bochan nib t’uf Jehovah rodad, ma gad manang ni kemus ni goo ir e rayog ni nge pi’ e tin nib t’uf rok e piin ni kar m’ad ni bochan ni ngar nanged e tin nib mat’aw. Dab ki n’uw nap’an min chuweg e piin nib kireb, ma dab ki gafgow e piin nib t’uf e tin nib mat’aw rorad ni bochan e kireb ni be rin’ e piin dubrad ni ngar folgad. (2 Pet. 2:7, 8) Aram e ngiyal’ ni yira felfelan’!
16 Gadad e piin ni gad be pigpig ngak Jehovah ma gad be folwok rok Jesus Kristus e gad manang ni urngin e piin ni yad be yim’ ni bochan e tin nib mat’aw e yira “pi’ e tin nib t’uf rorad.” Ra fel’ rogorad u daken e yaram rok Got ni fan ko bin nib beech e lan e lang nge bin nib beech e fayleng ni “tin nib mat’aw e ngongol e bay i par riy.” (2 Pet. 3:13) Ere dabi mulan’dad ara da gingad ko pi kireb ni be buch u lan e re fayleng rok Satan ney. (Ekl. 5:8) Jehovah ni ir e En Th’abi Tolang e manang e n’en ni bayi buch ma dab ki n’uw nap’an me chuweg e piin nib t’uf e tin nib mat’aw rorad u fithik’ e gafgow.
Ra T’uf e Tin nib Mat’aw Rom ma Ra Yib Angin Ngom
17. Faanra t’uf e tin nib mat’aw rodad, ma mang angin nra yib ngodad?
17 Psalm 146:8 (BT) e ku be tamilangnag reb i angin nra yib ni faan yira lek kanawoen e tin nib mat’aw. I tang fare psalmist ni gaar: “Ba t’uf rok [Jehovah] e girdi’ ni yad ba mat’aw.” Am lemnag! Gad ba t’uf rok e En Th’abi Tolang u palpalth’ib ni bochan e ba t’uf e tin nib mat’aw rodad. Bochan ni gad ba t’uf rok Jehovah, mab pagan’dad ni faan gad ra m’oneg e tin nib m’agan’ ngay ma ra pi’ e tin nib t’uf rodad. (Mu beeg e Psalm 37:25; Proverbs 10:3.) Ra munmun ma piin nib t’uf e tin nib mat’aw rorad e yad ra tafanay e fayleng. (Prov. 13:22) Yooren e girdi’ rok Got e ra yog e tow’ath ngorad ni aram e felfelan’ nge yafas ndariy n’umngin nap’an u paradis u fayleng. Mus ko chiney ma yibe tow’athnag e piin nib t’uf e tin nib mat’aw rorad, ya ke yog ni nge par e tabinaw nge ulung rorad nib taareban’ e girdi’ riy.—Fil. 4:6, 7.
18. Mang e thingar da ululgad ngad rin’ed u nap’an ni gad be sonnag fare rran rok Jehovah?
18 Nap’an ni gad be sonnag fare rran rok Jehovah nib ga’, ma thingar da ululgad i m’oneg e tin nib m’agan’ ngay. (Zef. 2:2, 3) Ere ngad gayed rogon ni nge m’ug nib t’uf e tirok Jehovah nib mat’aw rodad. Ba muun ngay ni nga u darod ma bay rodad “fa gin’en ni ma ing e salthaw nga daken ngorongoren,” ya nge dabi buch ban’en rodad. Kub ga’ fan ni nga i par e nangan’ rodad nib beech ya ngad felfelan’gad miki felfelan’ Got.—Prov. 27:11.
19. Mang e susun ni ngad dugliyed ni ngad rin’ed, ma mang e gad ra weliy ko bin migid e article?
19 Jehovah e “ma fal’eg i yaliy e re fayleng ney ni ga’ngin, ni nge pi’ gelngin e piin yad ba yul’yul’ ngak u gum’ircha’rad.” (2 Kron. 16:9, BT) Rra pi’ e pi thin nem e athamgil nga lanin’dad u nap’an ni gad be athamgil ni ngaud rin’ed e tin nib mat’aw u lan e re fayleng ney ni ke sugnag gubin mit e kireb! Riyul’ nra balyangan’ e girdi’ ni yad ba dar rok Got ni bochan e ngongol rodad nib mat’aw. Machane, faan gad ra rin’ e tin nib m’agan’ Jehovah ngay, ma ra yib angin ngodad. (Isa. 48:17; 1 Pet. 4:4) Ere, ngad dugliyed u wan’dad ni nge t’uf rodad e tin nib mat’aw u polo’ i gum’ircha’dad, mu ud rin’ed ya kemus rogon ma gad felfelan’. Machane, faanra ngad rin’ed e re n’ey mab t’uf ni ngad fanenikayed e ngongol nde mat’aw. Ireray e n’en ni yira weliy ko bin migid e article.
Uw Rogon ni Ga Ra Fulweg?
• Faanra nge t’uf e tin nib mat’aw rodad ma mang nib t’uf ni nge ga’ fan fare biyul u wan’dad?
• Mang nib ga’ fan ni nga u darod ma bay rodad “fa gin’en ni ma ing e salthaw nga daken ngorongoren”?
• Uw rogon ni ngad skulnaged e nangan’ rodad?
[Study Questions]
[Picture on page 26]
Faanra ba fel’ e nangan’ rodad ma ra ayuwegdad ni ngad dugliyed boch ban’en ni bay rogon ko maruwel
