Gathi Lem nu Fayleng e Nge Yog Ngodad Ya Gelngin Got nib Thothup

“Gadad e gathi lem nu roy u fayleng e ir e ke yog ngodad; ya fare gelngin Got nib thothup e ir e ke yog ngodad, ni fan e nge yog nda nanged urngin e tin ni ke pi’ Got ngodad.”—1 KOR. 2:12.

1, 2. (a) Mang cham e be un e tin riyul’ e Kristiano ngay? (b) Mang boch e deer ni gad ra weliy?

 TIN riyul’ e Kristiano e yad be un ko cham ni fan ko tirok Got ban’en. En toogor rodad e ba gel gelngin ma ba sasalap, ma baadag e cham. Bay talin e cham rok nib gel, ma aram fan ni ke gel ngak yooren e girdi’. Machane dab da lemnaged ni dabiyog ni ngad gelgad ngak. (Isa. 41:10) Ya bay e ayuw ni kan pi’ ngodad nrayog ni nge ayuwegdad ngad gelgad ngak.

² Cham ni gad be un ngay e bay rogon ko tirok Got. En toogor rodad e aram Satan ni Moonyan’, ma talin e cham nri ma fanay e aram e “lem nu fayleng.” (1 Kor. 2:12) Ma n’en ni ma ayuwegdad e aram gelngin Got nib thothup. Ba t’uf ni ngad ninged gelngin Got nib thothup ma ngad daged wom’engin ko ngongol rodad ni faanra nge par nib fel’ e tha’ u thildad Got. (Gal. 5:22, 23) Machane mang e lem nu fayleng ma uw rogon ni ke garer? Uw rogon ni ngad nanged ko lem nu fayleng e be gagiyegnagdad fa danga’? Mang e rayog ni ngad filed rok Jesus u rogon ni ke yib gelngin Got nib thothup ngak nge rogon ni ke togopuluw nga gelngin e lem nu fayleng?

Mang Fan ni Ke Garer e Lem nu Fayleng?

3. Mang e lem nu fayleng?

³ Lem nu fayleng e yib rok Satan “ni ir e be gagiyegnag e girdi’ nu fayleng” ma re n’ey e ba togopuluw nga gelngin Got nib thothup. (John 12:31; 14:30; 1 John 5:19) Lem ko re fayleng ney e aram e ngongol rok yooren e girdi’ ni be k’aringrad ni ngar folgad riy. Re n’ey e be k’aringdad ni ngad togopuluwgad ko tin nib m’agan’ Got ngay.

4, 5. Uw rogon ni ke garer e lem nu fayleng ni yib rok Satan?

⁴ Uw rogon ni ke garer e lem nu fayleng ni yib rok Satan? Bin som’on, e ke bannag Satan Efa u lan fare milay’ nu Eden. Ke yog ngak nra fel’ boch e yafos rok ni faanra togopuluw ngak Jehovah. (Gen. 3:13) Riyul’ ni Satan e be’ nrib malulfith! (John 8:44) Ngemu’ ma ki fanay Efa ni nge waliy Adam ni nge dabki fol rok Jehovah.  Bochan e n’en ni ke dugliy Adam ni nge rin’ ma aram fan ni ke mang girdi’ e sib ko denen ma ke mom ngorad ni ngar folgad ku Satan mar togopuluwgad ngak Got.—Mu beeg e Efesus 2:1-3.

⁵ Ki yog rok Satan ni nge gagiyegnag boor e engel ma kar manged e pi moonyan’ rok. (Rev. 12:3, 4) Ki buch e re n’em u m’on ko fare ran ni tharey e fayleng u nap’an Noah. Pi engel nem e ke mich u wan’rad nra fel’ boch e yafos rorad ni faanra ngar paged e maruwel rorad u tharmiy ngar bad nga fayleng ngar rin’ed e tin ni yad baadag. (Jude 6) Ngiyal’ ney e yad be par ko giyow ko kan ni yad be ayuweg Satan ni ngar ‘bannaged e girdi’ nu fayleng ni polo’.’ (Rev. 12:9) Machane yooren e girdi’ e dar nanged ni ke bannagrad moonyan’.—2 Kor. 4:4.

Be Gagiyegnagem fare Lem nu Fayleng, Fa?

6. Uw rogon nrayog ni nge gagiyegnagdad e lem nu fayleng?

⁶ Boor e girdi’ e darur nanged ko uw rogon ni ma bannagrad Satan, machane tin riyul’ e Kristiano e yad manang ya kar filed e Bible. (2 Kor. 2:11) Bin riyul’ riy e dabiyog ni nge gagiyegnagdad e lem nu fayleng, ni faanra dab da paged. Ngad yaliyed aningeg e deer nra ayuwegdad ni ngad nanged ko gelngin Got nib thothup e be gagiyegnagdad fa lem nu fayleng.

7. Mang reb e kanawo’ ni ma guy Satan rogon ni ngad digeyed Jehovah?

⁷ Mang e be m’ug u rarogog ko pi n’en ni gu ma chuweg e chalban rog ngay? (Mu beeg e James 3:14-18.) Be guy Satan rogon ni ngad digeyed Got, ma aram e be k’aringdad ni ngad adaged e cham. Manang Satan ni ma fanenikay Jehovah e piin ni yad baadag e cham. (Ps. 11:5) Aram fan ni ma guy Satan rogon ni nge fanay boch e babyor, kachido, musik, nge electronic games ni nge k’aring e girdi’ ni ngar uned ko ngongol ni darngal nge cham. Ra felfelan’ Satan ni faanra ba t’uf rodad e tin nib kireb, ni yugu aram rogon ni kab t’uf e tin nib mat’aw rodad.—Ps. 97:10.

8, 9. Mang boch e deer ni ngad fithed gadad riy u murung’agen e pi n’en ni gad ma chuweg e chalban rodad ngay?

⁸ Gelngin Got nib thothup e ma ayuweg e girdi’ ngar pared ni yad ba machalbog, ma yad ba gapas, ma yad ma dag e runguy. Thingar da fithed gadad ni nge lungudad: ‘Pi n’en ni gu ma mel’eg ni nggu chuweg e chalban rog ngay e ra k’aringeg ni nggu dag e pi fel’ngin nib fel’, fa?’ Fare gonop ni yib u tharmiy e gathi ‘yibe dake modingnigey.’ Piin ni be gagiyegnagrad gelngin Got nib thothup e darur machibnaged murung’agen e tin nib machalbog ban’en nge gapas ngak e buguli yoror rorad ngemu’ mi yad yaliy e kachido ni be dag yaan e cham nge ngongol ni darngal u lan e tabinaw rorad.

⁹ Baadag Jehovah ni goo ir e ngad pigpiggad ngak. Machane gad ra rin’ reb e kireb, ma ra felfelan’ Satan ni bod e n’en ni yog ngak Jesus ni nge rin’. (Luke 4:7, 8) Ere ngad fithed gadad ni nge lungudad: ‘N’en ni gu ma mel’eg ni nggu chuweg e chalban rog ngay e rayog ni nge ayuwegneg ni nggu pigpig ngak Got ni goo ir, fa? Pi n’ey ni kug mel’eg e ra ayuwegneg ni nggu togopuluw ko lem nu fayleng, fa danga’? Ba t’uf ni nggu thilyeg e pi n’en ni gu ma chuweg e chalban rog ngay, fa?’

10, 11. (a) Uw rogon e chugum u wan’ e piin ni bay e lem nu fayleng rorad? (b) Thin rok Got e be pi’ e athamgil nga lanin’dad ni ngad rin’ed e mang?

¹⁰ Uw rogon e chugum u wun’ug? (Mu beeg e Luke 18:24-30.) ‘Tin nra guy e girdi’ ma yad baadag ni nge yog ngorad’ ni aram e chogowen e chugum e bang ko “lem nu fayleng.” (1 John 2:16) Re lem ney e ra k’aring boor e girdi’ ni ngar nameged ni nge yoor e chugum rorad. (1 Tim. 6:9, 10) Maku be k’aringdad ni nge pagan’dad ni bochan ni ke yoor e chugum rodad. (Prov. 18:11) Machane faanra m’on e salpiy u wan’dad me tomur Got, ma aram e ra gel Satan ngodad. Ere thingar da fithed gadad ni nge lungudad: ‘Gubin ngiyal’ ni gu ma lemnag e chugum ni boor nge fafel, fa?’

¹¹ Machane thin rok Got e ra ayuwegdad ni nge dabi m’on e salpiy u wan’dad ma ngad  maruwelgad nib gel ni fan e nge yog e tin nib t’uf rodad nge tabinaw rodad. (1 Tim. 5:8) Piin ni bay gelngin Got nib thothup rorad e yad ma dag fel’ngin Jehovah nib gol. Ba ga’ fan e girdi’ u wan’rad ko chugum ma yad baadag ni ngar pied boch ban’en ngak e girdi’ ni faanra rayog rorad. (Prov. 3:27, 28) Darur fanayed urngin e tayim rorad ni fan ko salpiy ya nge dab ki yog ni ngar pigpiggad ngak Got.

12, 13. Uw rogon nra ayuwegdad Gelngin Got nib thothup?

¹² Mang e be gagiyegnag e ngongol nge lem rog? (Mu beeg e Kolose 3:8-10, 13.) Lem nu fayleng e ma mon’ognag e ngongol nib kireb. (Gal. 5:19-21) Yira nang ko mang e be gagiyegnag e ngongol nge lem rodad u nap’an nra yib e magawon, ni bod u nap’an ni bay reb i walagdad ndabi non ngodad ara ke k’aring e damumuw ngodad, ara ke rin’ ban’en nib kireb nib togopuluw ngodad. Mus nga lan e tabinaw rodad ma rayog ni nge m’ug ko mang e be gagiyegnag e ngongol rodad. Ba fel’ ni ngad fithed gadad ni nge lungudad, ‘U lan nel’ e pul ni ke yan ma ug ngongol ni bod rogon Kristus fa kug sul ko ngongol rog nib kireb?’

¹³ Gelngin Got nib thothup e ra ayuwegdad ni ngad n’aged e ‘bin kakrom i gadad ni kad mechamgad ngay’ ma ‘bin nib beech i gadad e nga don’ed nga dakendad.’ Re n’ey e ra ayuwegdad ni ngad daged e t’ufeg nge gol. Ma ra mom ni ngad n’aged fan e kireb ni ke rin’ be’ ngodad ni yugu aram rogon ni bay tapgin ni ngad damumuwgad ngak. Dab kud ‘tolulgad ngak be’ u fithik’ e damumuw ara u dogned e thin nib kireb ngak be’.’ Ya ngad athamgilgad ni nge bagadad me ‘munguy ngak bagadad.’—Efe. 4:31, 32.

14. Uw rogon e Thin rok Got u wan’ boor e girdi’?

¹⁴ Ba t’uf rog e motochiyel nu Bible ma gu ma tayfan, fa? (Mu beeg e Proverbs 3:5, 6.) Lem nu fayleng e ba togopuluw ko Thin rok Got. Piin ni be gagiyegnagrad e lem nu fayleng e yad be darifannag e thin nu Bible mab mo’maw’ ni ngar folgad riy ya yad baadag ni ngar folgad ko yalen nge llowan’ ko girdi’. (2 Tim. 4:3, 4) Ma boch i yad e dariy reb e Thin nu Bible ni baadag. Yad ma yog nde riyul’ e thin nu Bible ma yad be lemnag ni yad ba llowan’. Yad ma darifannag e motochiyel nu Bible u murung’agen e ngongol ni darngal nge mabgol ni be dar. Yad ma yog e ‘kireb ko manigil nge manigil ko kireb.’ (Isa. 5:20) Ere gur, ke af e re lem ney ngodad? Nap’an nra yib e magawon ngodad ma ma pagan’dad ko gonop ko girdi’ fa gonop rodad? Fa gad be athamgil ni ngad folgad ko fonow nu Bible?

15. Mang e thingar da rin’ed ko bin ni nge pagan’dad ko gonop rodad?

¹⁵ Gelngin Got nib thothup e ra k’aringdad ni ngad ted fan e Bible. Gad be tay ni thin rok Got e bod ba magal ni be pow’iydad, me ir e tamilang ko kanawo’ ni gad be yan riy ni bod e  n’en ni yog fare psalmist. (Ps. 119:105) Ke pagan’dad ko Thin rok Got ni nge ayuwegdad ngad nanged e tin nib mat’aw nge tin nib kireb. Gathi kemus ni gad be tayfan e Bible ya kub t’uf rodad.—Ps. 119:97.

Mu Fil Ban’en ko N’en ni Rin’ Jesus

16. Mang e ba muun ngay ni ngan dag “laniyan’ Kristus”?

¹⁶ Faanra nge yog gelngin Got nib thothup ngodad ma thingar da maruweliyed ni ngad daged “laniyan’ Kristus.” (1 Kor. 2:16) Rayog ni ngad “folwokgad rok Kristus Jesus” ni faanra kad nanged rogon ni ma lem nge rogon e ngongol rok. (Rom. 15:5; 1 Pet. 2:21) Mu lemnag boch e kanawo’ ni rayog ni ngad rin’ed ni aram rogon.

17, 18. (a) Mang e gad ra fil rok Jesus u murung’agen e meybil? (b) Mang fan ni thingar ud “ninged” ban’en ngak Got?

¹⁷ Ngan yibilay gelngin Got nib thothup. U m’on ni nge yib e skeng ngak Jesus me yibilay gelngin Got nib thothup ni nge ayuweg. (Luke 22:40, 41) Ma kub t’uf ni ngad ninged ngak Got gelngin nib thothup. Ri ma pi’ Jehovah gelngin nib thothup ngak e piin ni yad ma ning ngak u fithik’ e yul’yul’. (Luke 11:13) I gaar Jesus: “Mu ninged, me yog ngomed; mu gayed mi gimed pirieg; mu tugtuguyed e mab, min bing e mab ngomed. Ya urngin e piin ni yad ra ning e ra yog ngorad, ma en nra gay e ra pirieg, ma mab e yira bing ngak e en nra tugtuguy.”—Matt. 7:7, 8.

¹⁸ Nap’an ni gad ra ning gelngin Jehovah nib thothup ni nge ayuwegdad ma dab da gurgad ngad talgad ndab kud ninged. Sana ba t’uf ni ngad meybilgad ni boor yay ma ba n’uw boch nap’an. Yu ngiyal’ e ma pi’ Jehovah e tayim ngak e piin ni yad be meybil ngak ni ngar daged ko riyul’ ni yad be ning ban’en ngak u fithik’ e yul’yul’ u m’on ni nge fulweg taban e meybil rorad. a

19. Mang e rin’ Jesus ni gubin ngiyal’, ma mang fan ni ngad folwokgad rok?

¹⁹ Mu folgad ku Jehovah u polo’ i gum’ircha’med. Gubin ngiyal’ ni ma rin’ Jesus e tin nib m’agan’ e Chitamangin ngay. Immoy ba ngiyal’ nib thil rogon ni lemnag Jesus e n’en ni ma lemnag e Chitamangin. Machane ke yog ngak e Chitamangin u fithik’ e pagan’ ni gaar: “Gathi tin nib m’agan’ug ngay e ngam rin’, ya tin nib m’agan’um ngay.” (Luke 22:42) Ere ngam fithem ni nge lungum, ‘Gu ma fol rok Got ngki mada’ ko ngiyal’ nib mo’maw’ rog?’ Rib ga’ fan ko yafas rodad ni ngan fol rok Got. Bochan ni ir e ke Sunmiydad ma ir e Ma Pi’ e tin nib t’uf ko yafas rodad ma arfan ni thingar da folgad rok. (Ps. 95:6, 7) Dabiyog ni ngad fel’gad u wan’ Jehovah ni faanra dabda folgad rok.   

20. Mang e n’en ni fanay Jesus e yafas rok ngay, ma uw rogon ni ngad folwokgad rok?

²⁰ Mu fil e Bible nib fel’ rogon. Nap’an ni skengnag Satan e michan’ rok Jesus, me yog boch e thin u Bible. (Luke 4:1-13) Nap’an ni non ngak e pi tayugang’ ko pi yurba’ i teliw ma be pi’ e fulweg ni be fanay e thin nu Bible. (Matt. 15:3-6) I fanay Jesus e yafas rok ni nge fil e pi motochiyel rok Got me fol riy. (Matt. 5:17) Ku arrogodad ni ngad adaged ni ngad filed e Thin rok Got ya nge gel e michan’ rodad. (Fil. 4:8, 9) Ba mo’maw’ ngak boch e girdi’ ni ngar pirieged e tayim ni ngar filed e thin rok Got ni goo yad ara u lan e tabinaw. Ere dab da gayed e tayim ya ba t’uf ni ngad ted e tayim ni fan ko fol Bible.—Efe. 5:15-17.

21. Mang yaram e rayog ni ngad fanayed ni nge ayuwegdad ni ngad nanged e Thin rok Got nib fel’ rogon ma rayog ni ngad folgad riy?

 ²¹ “Fare tapigpig nib yul’yul’ ma ba gonop” e ke yarmiy ni ngaun tay e fol Bible ni Tabinaw u gubin e wik ya nge yog e tayim ni ngad filed e Bible rodad ni goo gadad ara chon e tabinaw rodad. (Matt. 24:45) Ere gur, ga ma fol ko re yaram ney? Nap’an e re fol Bible ney ma gur, rayog ni ngam ted e tayim ni ngam weliyed murung’agen e pi n’en ni fil Jesus? Rayog ni ngam fanay fare article ni “N’en Ni Gad Ra Fil Rok Jesus” ni bay ko Wulyang Ntagil’ E Damit ko September 1, 2008, nge June 1, 2009, nge December 1, 2009. b Mang fan ni dab mu uneg e pi article ney ko Fol Bible ni Tabinaw ni gimed ma tay.

Rayog ni Ngad Gelgad ko Fayleng

22, 23. Mang e thingar da rin’ed ni faanra ngad gelgad ko fayleng?

²² Faanra pow’iydad gelngin Got nib thothup ma thingar da togopuluwgad ko fare lem nu fayleng. Re n’ey e gathi ba mom. Machane rayog ni ngad gelgad ko lem nu fayleng ni faanra ngad athamgilgad. (Jude 3) Ke yog Jesus ngak pi gachalpen ni gaar: “Bayi gafgownagmed e fayleng. Machane dab mu rusgad! Ya kug gel ko fayleng!”—John 16:33.

²³ Ku arrogodad, rayog ni ngad gelgad ko fayleng ni faanra ngad togopuluwgad ko ngongol nib kireb ni bay riy ma ngad athamgilgad ni nge yog gelngin Got nib thothup ngodad. Riyul’ e re n’ey, ya “faanra ba’ Got u ba’ rodad, me mini’ e rayog rok ni nge togopuluw ngodad?” (Roma. 8:31) Faanra bay gelngin Got nib thothup rodad ma gad be fol ko thin nu Bible, ma gad ra pirieg e felfelan’ nge gapas nge athap ko yafas ni dariy n’umngin nap’an u lan fa bin nib beech e fayleng ni ke chuchugur ni nge yib.

[Footnotes]

Ka Ga Manang?

• Mang fan ni ke garer fare lem nu fayleng?

• Mang aningeg e deer ni thingar da fithed gadad riy?

• Mang dalip ban’en ni gad ra fil rok Jesus u rogon ni nge yog gelngin Got nib thothup ngodad?

[Study Questions]

[Picture on page 10]

Uw rogon ma boch e engel e kar manged e pi moonyan’?

[Picture on page 12]

Ma fanay Satan e lem nu fayleng ni nge gagiyegnag e girdi’ ngay, machane rayog ni ngad gelgad